Book List

<h2 style="text-align: center;">အခန်း - ၃၉၄</h2> <h2 style="text-align: center;">( ထွက်ခွာခြင်း - ၁ )</h2> <h2 style="text-align: center;">*</h2> <p> </p> <p>"အဖေ၊ အမေနဲ့ အစ်မတို့က ပါရဂွန်အစောပိုင်းအဆင့်ကို ရောက်နေတော့ သူတို့ တည်နေရာကူးပြောင်း ဝင်္ကပါကို တိုက်ရိုက် သုံးလို့ရတယ်... ရှောင်ဖုန်းနဲ့ တခြားသူတွေက ငါ့ရဲ့ မိစ္ဆာသားရဲတွေ ဖြစ်ပြီး သားရဲယဥ်ပါး ဒန်တျန် ဆက်သွယ်မှု ရှိနေတော့ သူတို့ ငါနဲ့ လိုက်လာရုံပဲ... ဖုန်းရှောင်၊ ယန်ရန်၊ ထျဲလန်အာနဲ့ တခြားသူတွေက ပိုတောင် အားနည်းသေးတော့ သူတို့ကိုလည်း တိုက်ရိုက် တည်နေရာကူးပြောင်း ပို့ဆောင်လို့ ရတယ်... ဒါပေမဲ့... ပိုင်ဟွာရှု၊ မူချင်း၊ မူရှာနဲ့ တခြားသူတွေကော..."</p> <p>လူတိုင်း ထွက်ခွာသွားသည်နှင့် နိုင်းယွမ် အတွေးများထဲသို့ နစ်မြုပ်သွား၏။</p> <p>သူ သိသော တည်နေရာကူးပြောင်း ဝင်္ကပါက ပါရဂွန် အလယ်အဆင့်အောက် ကျင့်ကြံသူများကိုသာ ပို့ဆောင်ပေးနိုင်ပေသည်။ သူ့ ဖခင်၊ မိခင်၊ အစ်မ၊ မြို့သခင် လော့၊ လော့ချင်းချန်၊ ဖုန်းရှောင်၊ ယန်ရန်နှင့် အခြားသူများကို အလွယ်တကူ ပို့ဆောင်ပေးနိုင်သော်လည်း သူကဲ့သို့ ပါရဂွန် အလယ်အဆင့်ထက် ကျော်လွန်သူများအတွက်မူ ဒုက္ခများမည် ဖြစ်၏။</p> <p>ဟင်းလင်းပြင် ဝိညာဉ်ကျောက်တုံးနှင့် ငရဲကိုးဆင့် အေးခဲပုလဲတို့တွင် ဝင်္ကပါ၏ တည်နေရာကူးပြောင်း ထိရောက်မှုကို တိုးမြှင့်ပေးနိုင်သော အာနိသင် ရှိသော်လည်း အသေးစိတ်ကို သူ မသိရှိချေ။ တည်နေရာကူးပြောင်း ဝင်္ကပါများက ဟင်းလင်းပြင် ပြဿနာများနှင့် သက်ဆိုင်သောကြောင့် နည်းနည်းမျှ မှားလို့ မဖြစ်ချေ။</p> <p>သူ တစ်ယောက်တည်းဆိုလျှင် အဆင်ပြေနိုင်ပေသည်။ ဘဝနှစ်ခုမှ အသိပညာနှင့် ကောင်းကင်မျက်လုံး သခင်ကဲ့သို့သော ထိပ်သီးပါရမီ စွမ်းရည်များ ရှိ၏။ အကယ်၍ သူ အမှန်တကယ် အန္တရာယ် ကြုံတွေ့ရပါက ရှင်သန်ရန် အခွင့်အရေး ရှိနေသေးပေသည်။ သို့သော် ပိုင်ဟွာရှုနှင့် အခြားသူများမှာ... ထိုကဲ့သို့သော စွမ်းရည်မျိုး ရှိမည် မဟုတ်ချေ။</p> <p>"သူတို့ကို ကျိဟွာဂူစံအိမ်ထဲ ထည့်ပြီး တည်နေရာကူးပြောင်း ပို့ဆောင်ဖို့က မဖြစ်နိုင်ဘူး... မဟုတ်ရင် ငါ့မိဘတွေ ဒါမှမဟုတ် အစ်မကို အင်မော်တယ်လိုဏ်ဂူထဲ ဝင်ခိုင်းပြီး ငါ့ကိုယ်ငါလည်း ထည့်လိုက်ရင် ပြဿနာ မရှိတော့ဘူး..."</p> <p>တည်နေရာကူးပြောင်း ဝင်္ကပါ ကိုယ်တိုင်က ဟင်းလင်းပြင်ကို အသုံးပြု၏။ အကယ်၍ လူများကို သိမ်းဆည်းရန် ကျိဟွာဂူစံအိမ်ကို အသုံးပြုပါက ယင်းကို တည်နေရာကူးပြောင်း ပို့ဆောင်၍ မရနိုင်ချေ။ သို့မဟုတ်ပါက သူ့ကို မဆိုထားနှင့် ထိုဟွားသခင်ကြီးပင်လျှင် ဤနေရာသို့ ရောက်ရှိနေလောက်ပြီ ဖြစ်၏။</p> <p>ဟွားသခင်ကြီး၏ အဆင့်အတန်းအရ သူ ကျိဟွာဂူစံအိမ်ကဲ့သို့ ထိပ်တန်း အင်မော်တယ်လိုဏ်ဂူ တစ်ခု မရှိလျှင်ပင် သူတွင် သေးငယ်သော အင်မော်တယ်လိုဏ်ဂူများ ရှိနေမည် ဖြစ်၏။ အကယ်၍ ထိုသို့ ဖြစ်နိုင်ခဲ့ပါက အလုပ်ရှုပ်ခံနေတော့မည် မဟုတ်ချေ။ </p> <p>ယခု ဘာလုပ်ရမည်နည်း။</p> <p>ခဏမျှ စဉ်းစားပြီးနောက် အကြံဉာဏ်ကောင်းများ မရရှိသဖြင့် နိုင်းယွမ် သူ့ နားထင်ကို ပွတ်သပ်ကာ အခန်းထဲမှ ထွက်လာ၏။</p> <p>"နိုင်းယွမ်..."</p> <p>သူ အခန်းထဲမှ ထွက်လာသည်နှင့် တိုးညှင်းသော အော်ခေါ်သံ တစ်သံကို ကြားလိုက်ရ၏။ ခေါင်းလှည့်ကြည့်လိုက်ရာ ပိုင်ဟွာရှု၊ မူချင်းနှင့် မူရှာတို့ မလှမ်းမကမ်းတွင် ရပ်နေသည်ကို တွေ့လိုက်ရ၏။</p> <p>"မင်းတို့ မနားသေးဘူးလား..." နိုင်းယွမ် ပြုံးလိုက်၏။</p> <p>"ကျွန်မ မျောလွင့်ကုန်းမြေတိုက်ကြီးကို မရောက်ဖူးပေမယ့် အဲဒီနေရာကို ရောက်ဖို့ ခက်ခဲတယ်ဆိုတာ သိတယ်... မဟုတ်ရင် ဟွမ်လင်းနဲ့ တခြားသူတွေ ဒီမှာ ပိတ်မိနေမှာ မဟုတ်ဘူး... ရှင့်မှာ အခက်အခဲ တချို့ ရှိနေလား..." ပိုင်ဟွာရှု လူငယ်လေး၏ မျက်နှာပေါ်ရှိ ပင်ပန်းနွမ်းနယ်မှုကို သတိပြုမိပုံ ရပြီး မေးလိုက်သည်။</p> <p>"အမှန်အတိုင်း ပြောရရင်... အခက်အခဲတွေတော့ ရှိတာပေါ့... ငါ မျောလွင့်ကုန်းမြေတိုက်ကြီးကို ရောက်နိုင်တဲ့ ရှေးဟောင်း တည်နေရာကူးပြောင်း ဝင်္ကပါ တစ်ခုကို သိတယ်... ဒါပေမဲ့ ဒီဝင်္ကပါက ပါရဂွန် အလယ်အဆင့်အောက် ကျင့်ကြံသူတွေကိုပဲ ပို့ဆောင်ပေးနိုင်တယ်... ကျင့်ကြံဆင့် အရမ်း မြင့်နေရင် အန္တရာယ်ကြီး ရှိနိုင်တယ်..."</p> <p>နိုင်းယွမ် သူ့ စိုးရိမ်ပူပန်မှုများကို ဖော်ပြလိုက်၏။</p> <p>"ဟားဟား... ကျွန်မက ကိစ္စကြီး တစ်ခုလို့ ထင်နေတာ... ဒါက အရမ်း ရိုးရှင်းပါတယ်..." လူငယ်လေး၏ ရှင်းပြချက်ကို ကြားသောအခါ ပိုင်ဟွာရှု ရယ်မောလိုက်၏။</p> <p>"ရိုးရှင်းတယ် ဟုတ်လား..." နိုင်းယွမ် ကြောင်အသွား၏။</p> <p>သူ ထိုအကြောင်းကို အချိန်အကြာကြီး စိတ်ရှုပ်နေခဲ့ပြီး မသိရှိနိုင်ခဲ့သော်လည်း သူမက ရိုးရှင်းသည်ဟု ပြောနေ၏။</p> <p>"ဟုတ်ပါတယ် ရိုးရှင်းပါတယ်... ပါရဂွန် အလယ်အဆင့်အောက် ကျင့်ကြံသူတွေအတွက် အန္တရာယ် မရှိဘူး... အဲဒီလိုဆိုရင် ကျွန်မတို့ ချီကို ဖြန့်ခွဲပြီး ကျင့်ကြံခြင်းကို လျှော့ချလိုက်ရုံပဲ... ချီကို ဖြန့်ခွဲပြီး ကျင့်ကြံခြင်းကို လျှော့ချတာက အရမ်း အန္တရာယ်များပေမယ့်... တစ်ချိန်က ပါရဂွန်အဆင့် အထွတ်အထိပ်ကို ရောက်ခဲ့ဖူးတော့ ပြန်ကျင့်ကြံဖို့က အရမ်း ရိုးရှင်းပါတယ်... မျောလွင့်ကုန်းမြေတိုက်ကြီးက ရှင် ပြောသလောက် ကောင်းတယ်ဆိုရင်... ကျွန်မတို့ ရောက်ပြီး မကြာခင်မှာပဲ အပြည့်အဝ ပြန်ကောင်းလာနိုင်သင့်တယ်... ဘာကို စိုးရိမ်နေစရာ ရှိလို့လဲ..."</p> <p>ပိုင်ဟွာရှု ရယ်မောလိုက်၏။</p> <p>"ဒါက... ဟုတ်သားပဲ... ငါ ဘာလို့ ဒီလောက် တွေးရကျပ်နေရတာလဲ..."</p> <p>နိုင်းယွမ် သူ့ နဖူးကို ရိုက်လိုက်၏။</p> <p>သူ အင်အားကောင်းသူများ ပိုမို အားကောင်းလာရန် မည်မျှ ခက်ခဲသည်ကိုသာ တွေးတောခဲ့သော်လည်း အင်အားကောင်းသူများ သူတို့၏ အင်အားကို လျှော့ချရန် အလွန် ရိုးရှင်းသည်ကို သူ မစဉ်းစားခဲ့မိချေ။</p> <p>ချီပင်လယ်ထဲရှိ အစစ်အမှန်ချီကို ဗလာ ဖြစ်စေပြီး စွမ်းအားကို ထိန်းချုပ်လိုက်သ၍ အလိုအလျောက် ကျင့်ကြံဆင့် ကျဆင်းသွားမည် ဖြစ်၏။ ထိုကဲ့သို့သော ကျင့်ကြံဆင့် ကျဆင်းမှုမှာ လူလုပ် ထိန်းချုပ်ထားခြင်း ဖြစ်သဖြင့် ယင်းကို ပြန်လည် မြှင့်တင်ရန် သဘာဝကျစွာပင် အလွန် ရိုးရှင်းပေသည်။</p> <p>သို့သော် ထိုသည်မှာ ကျင့်ကြံဆင့် ကွာခြားချက် သိသာထင်ရှားခြင်း မရှိမှသာ ဖြစ်၏။ အကယ်၍ လူအနည်းငယ် ဖန်ဆင်းခြင်းအဆင့်သို့ ရောက်ရှိနေပြီ ဖြစ်ပြီး ပါရဂွန်အဆင့်သို့ ပြန်ဖြစ်လိုပါက ယင်းမှာ လုံးဝ မဖြစ်နိုင်ချေ။</p> <p>ဟွားသခင်ကြီးကဲ့သို့သော ထိပ်သီးပညာရှင် တစ်ယောက်ကဲ့သို့ပင် သူ ထိုကျင့်ကြံဆင့်သို့ ရောက်ရှိရန် မရေမတွက်နိုင်သော မိုးကောင်းကင် ပစ္စည်းများနှင့် မြေကြီး ရတနာများကို သုံးစွဲခဲ့ရ၏။ အကယ်၍ သူ တည်နေရာကူးပြောင်း ဝင်္ကပါ တစ်ခုကို ဖြတ်ကျော်လိုခြင်းကြောင့် ကျင့်ကြံဆင့် ကျဆင်းသွားပါက ပြန်လည် ကောင်းမွန်လာရန် မည်မျှသော နှစ်များ ကြာမြင့်မည်ကို မသိနိုင်ဘဲ ရတနာ မည်မျှ စားသုံးရမည်ကိုလည်း မသိနိုင်ချေ။</p> <p>ထို့အပြင် သူတို့ကဲ့သို့သော လူများတွင် ရန်သူ အများအပြားလည်း ရှိကြ၏။ သူတို့၏ ရန်သူများ သိရှိသွားသည်နှင့် သူတို့ ဘယ်လို သေဆုံးသွားမှန်းပင် သိလိုက်မည် မဟုတ်ချေ။</p> <p>ထို့ကြောင့် သူတို့အတွက် သူတို့ ကျိဟွာဂူစံအိမ်ကို မရနိုင်လျှင်ပင် သူတို့၏ အဆင့်ကို လျှော့ချရန် လုံးဝ မဖြစ်နိုင်ချေ။</p> <p>"မင်းတို့ အဆင့်ကို လျှော့ချစရာ မလိုဘူး... ကျုပ် အခု မင်းတို့ရဲ့ အစစ်အမှန်ချီကို သန့်စင်အောင် ကူညီပေးမယ်... မင်းတို့ရဲ့ အစစ်အမှန်ချီကို လုံလောက်အောင် ဖိသိပ်နိုင်သ၍ မင်းတို့ရဲ့ ကျင့်ကြံဆင့်က သေချာပေါက် ကျဆင်းသွားလိမ့်မယ်..."</p> <p>ထိုအရာများကို နားလည်သွားသဖြင့် နိုင်းယွမ် ပြုံးလိုက်ပြီး ဖြေရှင်းနည်း တစ်ခုကို တွေးမိလိုက်၏။</p> <p>"ကောင်းပြီ..." အမျိုးသမီး သုံးယောက် တစ်ပြိုင်နက်တည်း ခေါင်းညိတ်လိုက်ကြသည်။</p> <p>အဆင့်တူတွင်ပင် အစစ်အမှန်ချီ၏ သန့်စင်မှုမှာ ကွဲပြားနေ၏။ ထိုအချက်ကြောင့်ပင် အဆင့်တူ ပုဂ္ဂိုလ်ခြင်း အင်အား များစွာ ကွာခြားသော အခြေအနေများ ရှိနေခြင်း ဖြစ်၏။ အကယ်၍ အမျိုးသမီး သုံးယောက်က ကိုယ်တွင်းရှိ အစစ်အမှန်ချီကို သိပ်သည်း သန့်စင်နိုင်ပါက သူတို့၏ ကျင့်ကြံခြင်းကို တိုက်ရိုက် လျှော့ချနိုင်ပေသည်။</p> <p>ထို့အပြင် ထိုသို့ လုပ်ဆောင်ခြင်းက သူတို့၏ သိုင်းစွမ်းရည်ကို မအားနည်းစေဘဲ ဆန့်ကျင်ဘက်အားဖြင့် ယင်းကို မြှင့်တင်ပေးမည် ဖြစ်သည်။</p> <p>"သတိထား..." နိုင်းယွမ် သတိပေးလိုက်ပြီးနောက် သူ့ လက်ကို လှုပ်ရှားလိုက်သည်နှင့် ချီလှိုင်းတစ်ခုက အမျိုးသမီး သုံးယောက်ကို လုံးဝ ဝန်းရံလိုက်၏။</p> <p>သူ့ လက်ရှိ အင်အားမှာ အမျိုးသမီး သုံးယောက်နှင့် သိပ်မကွာခြားသော်လည်း သူ့ အစစ်အမှန်ချီ၏ သန့်စင်မှုနှင့် သူ့ စွမ်းအားမှာ သူတို့ထက် များစွာ ကြီးမားပေ၏။ သူ့အနေနှင့် သူတို့၏ အစစ်အမှန်ချီကို ဖိသိပ်ရန် ကူညီပေးခြင်းမှာ အလွန် ရိုးရှင်းပေသည်။</p> <p>အချိန်တစ်ခု ကြာပြီးနောက် ထိုသုံးယောက်လုံး၏ ကျင့်ကြံဆင့်က ပါရဂွန် အလယ်အဆင့်သို့ ကျဆင်းသွား၏။ သူတို့၏ အဆင့်များ ကျဆင်းသွားသော်လည်း သူတို့၏ အင်အားမှာ ယခင်ကထက် ပိုမို ကြီးမားနေပေသည်။ အကယ်၍ သူတို့ ဟွမ်လင်း အဆင့်ရှိ အားကောင်းသော ပုဂ္ဂိုလ် တစ်ယောက်နှင့် ထပ်မံ ကြုံတွေ့ရပါက သူတို့ သူ့ကို လက်ဝါး တစ်ချက်တည်းဖြင့် အလွယ်တကူ ရိုက်သတ်နိုင်ပေသည်။</p> <p>"ဟားဟား... အဲဒါ ပြီးသွားပြီ... သွားဖို့ ပြင်ဆင်ကြစို့..."</p> <p>ပုဂ္ဂိုလ် သုံးယောက်လုံး၏ အဆင့်များကို လုံးဝ ဖိနိုပ်ပြီးနောက် နိုင်းယွမ် မော့ကြည့်လိုက်ရာ သူတို့၏ ခွန်အားကို ဖိနိုပ်ရန် ကူညီပေးခြင်းက တစ်ညလုံး ကြာမြင့်သွားကြောင်း သိလိုက်ရ၏။ ကောင်းကင်သည် မည်သည့်အချိန်မှန်း မသိဘဲ လင်းထိန်နေပြီ ဖြစ်၏။</p> <p>"မင်းတို့ အားလုံး ကျုပ်အဖေနဲ့ တခြားလူတွေ ရောက်လာတာကို စောင့်... ပြီးရင် အရှေ့မြို့တော် အပြင်ဘက်မှာ အရင်ဆုံး စုဝေးကြ... ကျုပ် ဒီမှာ အရာရာကို အစီအစဥ်ချပြီးရင် ထွက်ခွာမယ်..."</p> <p>အမိန့် တစ်ခု ပေးပြီးနောက် နိုင်းယွမ် လက်ခနဲ ပျောက်သွားပြီး လော့ရှောင်ဖုန်း၏ နေအိမ်သို့ ပျံသန်းသွား၏။</p> <p>ချီပင်လယ် ကုန်းမြေတိုက်ကြီးက သေးငယ်သော်လည်း ယင်းမှာ သူ ကြိုးစားပမ်းစား တည်ဆောက်ခဲ့သော အခြေခံအုတ်မြစ် တစ်ခု ဖြစ်၏။ ယင်းကို ထိုအတိုင်း စွန့်ပစ်လိုက်ရမည်မှာ အလွန် နှမြောစရာ ကောင်းလှပေသည်။</p> <p>အမည်မသိသော အချိန်ကာလ တစ်ခု ကြာပြီးနောက် အင်ပါယာ မြို့တော် အတွင်းရှိ တက်ကြွသော အရှိန်အဝါ တစ်ခု ကောင်းကင်သို့ တည့်တည့် ထိုးတက်သွားပြီး မရေမတွက်နိုင်သော အနက်ရောင် တိမ်တိုက်များ ဖိနှိပ်လာ၏။ အရှိန်အဝါ တစ်ခုတည်းမှ ကြည့်လျှင် တစ်စုံတစ်ယောက် ပါရဂွန်အဆင့်ကို တက်လှမ်းပြီး ဖန်ဆင်းခြင်းအဆင့်သို့ ရောက်ရှိသွားကြောင်း ရှင်းလင်းစွာ သိသာပေ၏။</p> <p>"ဟူး... ဖန်ဆင်းခြင်းအဆင့်မှာ ရှိတဲ့ လော့ရှောင်ဖုန်းက အင်ပိုင်ယာကို ဦးဆောင်ရင်... ကြီးမြတ်တဲ့ အင်ပိုင်ယာ ခုနစ်ခုကို ပေါင်းစည်းဖို့က သိပ်မခက်ခဲသင့်ဘူး... သူ ပညာရှင် တစ်ယောက်နဲ့ ကြုံတွေ့ရင်တောင် ငါ ချန်ထားခဲ့တဲ့ အဆောင်ရတနာ ဆယ်ခုက ကိုင်တွယ်ဖြေရှင်းဖို့ လုံလောက်သင့်တယ်..."</p> <p>လေထဲတွင် နိုင်းယွမ် မြို့အပြင်ဘက်သို့ ပျံသန်းသွားရင်း ပြုံးလိုက်၏။</p> <p>ခုနက အဆင့်တက်သွားသည်မှာ လော့ရှောင်ဖုန်းပင်။ လော့ရှောင်ဖုန်းက သူ့အပေါ် လုံးဝ သစ္စာစောင့်သိကြောင်း ကျိန်ဆိုထားသဖြင့် သူ့ သစ္စာစောင့်သိမှုမှာ သံသယဖြစ်ဖွယ် မရှိချေ။ ထို့အပြင် ထူးဆန်းသော တိုက်ဆိုင်မှု တစ်ခုကြောင့် သူလည်း လော့ချူ၏ မျိုးဆက် တစ်ယောက် ဖြစ်ပြီး သေချာစွာ တွက်ချက်ကြည့်ပါက သူ လော့ကျန်းဟောင်၏ အဘိုးအဆင့် မျိုးဆက်ပင် ဖြစ်သော်လည်း သူ ငယ်စဉ်က မိသားစုကို စွန့်ခွာသွားပြီး ဘယ်တော့မှ ပြန်မလာခဲ့သဖြင့် လော့ကျန်းဟောင်ပင်လျှင် ထိုကဲ့သို့သော ရင်းနှီးသော ဆွေမျိုး တစ်ယောက် ရှိနေကြောင်း မသိခဲ့ချေ။</p> <p>သူ နိုင်းယွမ်ကို သစ္စာခံပြီး လော့ချင်းချန်၏ ဆွေမျိုးလည်း ဖြစ်နေသဖြင့် ချီပင်လယ် ကုန်းမြေတိုက်ကြီးကို စောင့်ရှောက်ရန် သဘာဝကျစွာပင် ပြဿနာ မရှိချေ။ ချီပင်လယ် ကုန်းမြေတိုက်ကြီးရှိ ပညာရှင် အားလုံးနီးပါးကို နိုင်းယွမ် ကိုင်တွယ်ဖြေရှင်းပြီး ဖြစ်၏။ </p> <p>ရှေးဟောင်းမြို့တော်ရှိ သူများမှာမူ လင်ရှီး ကောင်းကင်နန်းတော် ပြိုကျသွားသဖြင့် အလုပ်များလွန်းနေလောက်ပေသည်။ </p> <p>သူတို့ ဒုက္ခရှာရန် လာလျှင်ပင် သူ့ စွမ်းအား အားလုံးဖြင့် သန့်စင်ထားသော အဆောင်ရတနာ ဆယ်ခုကို ချန်ထားခဲ့သေး၏။ ယင်းတို့တွင် သူ့ ဝိညာဉ်စွမ်းအားနှင့် အစစ်အမှန်ချီ စွမ်းအားများ ပါဝင်နေ၏။ ထိုအဆောင်ရတနာတို့အား ပေါ့ပေါ့ပါးပါး ပစ်ထုတ်လိုက်ပါက ဖန်ဆင်းခြင်း တတိယအဆင့်ပညာရှင် တစ်ယောက်ပင် အခက်ကြုံသွားနိုင်သည်။</p> <p>လော့ရှောင်ဖုန်း အောင်မြင်စွာ တက်လှမ်းနိုင်ရခြင်း အကြောင်းရင်းမှာမူ အမှန်အတိုင်း ပြောရလျှင် သူ့ ညီငယ်ကို ကျေးဇူးတင်ရမည် ဖြစ်၏။ ယင်းမှာ သူ့ ညီငယ် ကျိဟွာဂူစံအိမ်တွင် ရရှိခဲ့သော 'ပုံရိပ်ယောင်နှလုံးသား ကောင်းကင်မိစ္ဆာမီးအိမ်'က ကြီးမားသော အခန်းကဏ္ဍမှ ပါဝင်ခဲ့ခြင်း ဖြစ်ပြီး သို့မဟုတ်ပါက ယင်းမှာ အောင်မြင်မည် မဟုတ်ချေ။</p> <p>"သွားကြစို့... အဲဒီ တည်နေရာကူးပြောင်း ဝင်္ကပါက ရှေ့က တောင်တန်းထဲမှာပဲ... အဲဒီတုန်းက ထျဲလန်အာက..."</p> <p>မြို့တော်မှ ပျံသန်းထွက်ခွာသွားပြီး သူ့ မိဘများနှင့် အခြားသူများကို လျင်မြန်စွာ တွေ့ရှိလိုက်၏။ နိုင်းယွမ် ပြုံးကာ ရှေ့သို့ ညွှန်လိုက်ပြီးနောက် သူ့ စကား တစ်ဝက်တွင် ရပ်တန့်သွားလေသည်။</p> <p>သူ ပြောနေသော အရာများမှာ သူ့ ယခင်ဘဝမှ ဖြစ်ပြီး ထိုလူများမှာ ယင်းတို့အကြောင်းကို လုံးဝ မသိရှိကြချေ။</p> <p>သူ့ ယခင်ဘဝတွင် ထျဲလန်အာ၏ အကူအညီဖြင့် သူ ထိုနေရာသို့ စိတ်ပျက်အားငယ်စွာ ထွက်ပြေးခဲ့ရ၏။ မိန်းကလေးက သူ့ကို နမ်းပြီးနောက် လှည့်၍ ထွက်ခွာသွားခဲ့ပြီး သူ့ မိသားစု တစ်ခုလုံး ထိုအကြောင်းကြောင့် မကြုံစဖူးသော ကပ်ဘေးကြီး တစ်ခုကို ခံစားခဲ့ရသည်။</p> <p>အမှန်အတိုင်း ပြောရလျှင် မိန်းကလေး သေဆုံးသည်အထိ သူ တစ်ခါမှ ရင်းရင်းနှီးနှီး စကားတစ်ခွန်းမှ မပြောခဲ့သလို ကတိ တစ်ခုမှလည်း မပေးခဲ့ချေ။ သူ နောက်ပြန်လှည့်ကြည့်လိုက်၏။ လူတိုင်း မပြောင်းလဲဘဲ သူသာလျှင် ပြောင်းလဲသွားပေသည်။ သူ ပြန်လည်မွေးဖွားလာခဲ့ပြီး သူ့ ယခင်ဘဝက ကြေကွဲစရာ အဖြစ်အပျက် ထပ်မံ ဖြစ်ပွားခဲ့ခြင်း မရှိချေ။</p> <p>"ငါသာ ဒီဘဝမှာ ဒီလို အရာမျိုးနဲ့ ထပ်ကြုံရရင်တောင်... ထျဲလန်အာက တွန့်ဆုတ်နေမှာမဟုတ်ဘူး..."</p> <p>သူ မနေနိုင်ဘဲ ရင်ထဲ သက်ပြင်းချလိုက်မိသည်။ "စိတ်မပူပါနဲ့... ဒီဘဝမှာ ငါ မင်းတို့ ဘယ်သူ့ကိုမှ ထပ်ပြီး ဒုက္ခဖြစ်ခွင့် မပြုတော့ဘူး..."</p> <p>လူတိုင်း လျင်မြန်စွာ လှုပ်ရှားကြပြီး မကြာမီမှာပင် သူတို့ သူ့ ယခင်ဘဝမှ တောင်တန်းသို့ ရောက်ရှိသွားကြ၏။</p> <p style="text-align: center;"><br /> အခန်း ၃၉၄ ပြီး</p> <p style="text-align: center;">***</p>


Save