Book List

<h2 style="text-align: center;">အခန်း ၂၆၅</h2> <h2 style="text-align: center;">ကျင်းမင်ရှန်</h2> <h2 style="text-align: center;">*</h2> <p> </p> <p>လင်းမူ သူတို့နှစ်ဦးကို ကြည့်ပြီး ဘာဆက်လုပ်ကြမည်မှန်း စောင့်ကြည့်နေလိုက်၏။ သူတို့၏ ကုန်ပစ္စည်း ထောက်ပံ့သူ အကြောင်း သူ ဘာမျှ မသိသဖြင့် ဘာတွေ ယူလာမည်မှန်း သိချင်နေမိသည်။ သူတို့၏ စကားများအရ ထိုထောက်ပံ့သူက သတင်းအချက်အလက်များနှင့် ထောက်လှမ်းရေး သတင်းများကိုလည်း ပေးမှန်း သူ နားလည်လိုက်၏။</p> <p>"သွားကြစို့... သူ လမ်းကြားထဲ ဝင်လာပြီ..." တွမ်ခယ် တိတ်ဆိတ်မှုကို ဖြိုခွင်းလိုက်သည်။</p> <p>ကျင်းဝေ ခေါင်းညိတ်ပြီး ခန်းမထဲမှ စတင် ထွက်ခွာသွား၏။ သူတို့ အိမ်ကြီးထဲမှ ထွက်လာပြီး လင်းမူက သူတို့နောက်မှ လိုက်ပါသွားကာ မကြာမီ ခြံဝင်း၏ ထွက်ပေါက်ဖြစ်သော အဆောက်အအုံငယ်လေးဆီသို့ ရောက်ရှိသွားကြသည်။ ခေါင်မိုးမှ တွဲလောင်းကျနေသော မီးအိမ်လေး လင်းလက်လာပြီး မြင်ကွင်း ပြောင်းလဲသွား၏။</p> <p>သူတို့သုံးဦး ဆိုင်၏ နောက်ဖေးခန်းသို့ ရောက်ရှိသွားပြီး ဆိုင်ထဲတွင် နေရာယူလိုက်ကြသည်။ ကျင်းဝေက ဘေးရှိ ကုလားထိုင် တစ်လုံးတွင် ထိုင်ပြီး တွမ်ခယ်က ကောင်တာတွင် ထိုင်လိုက်၏။</p> <p>ထိုအချိန်တွင် လင်းမူကမူ အနေခက်စွာ ရပ်နေမိ၏။</p> <p>"ဘာလို့ ကြောင်အမ်းအမ်း ရပ်နေတာလဲ... ဖောက်သည် တစ်ယောက်လို ဟန်ဆောင်နေလေ..." တွမ်ခယ် အေးစက်သော လေသံဖြင့် ပြောလိုက်သည်။</p> <p>'သူ ဘာလို့ ဒေါသထွက်နေတာလဲ...' လင်းမူ စိတ်ထဲမှ မေးခွန်းထုတ်လိုက်၏။</p> <p>"လူသား မိန်းမတွေက နားမလည်နိုင်စရာ ကောင်းပြီး လျှို့ဝှက်ဆန်းကြယ်တယ်... ကြီးမြတ်တဲ့ ကျင့်ကြံသူ တစ်ယောက်က ပြောဖူးတယ်... စကြဝဠာရဲ့ ကြီးမားတဲ့ လျှို့ဝှက်ချက် ရှစ်ထောင်ထဲမှာ အမျိုးသမီးတွေရဲ့ စိတ်က ထိပ်ဆုံး ဆယ်ခုထဲမှာ ပါတယ်တဲ့..." ရွှီခုန်း ရုတ်တရက် ဝင်ပြောလိုက်၏။</p> <p>"ဟီးဟီး... ဟုတ်လား စီနီယာ..." လင်းမူ အနည်းငယ် ထူးဆန်းသည်ဟု ခံစားရသဖြင့် ရေရွတ်လိုက်သည်။</p> <p>ကျွီ</p> <p>ဆိုင်တံခါး ပွင့်သွားသံ ထွက်ပေါ်လာပြီး သေသပ်လှပသော ဝတ်ရုံကို ဝတ်ဆင်ထားသည့် အမျိုးသား တစ်ဦး ဝင်ရောက်လာ၏။ ထိုလူက ဆံပင်များကို ဦးထုပ်ထဲ ထည့်သွင်းထားပြီး မေးစေ့အထိ ကျနေသော ရှည်လျားသည့် နှုတ်ခမ်းမွေးနှင့် မုတ်ဆိတ်တိုတို ရှိလေသည်။</p> <p>သူ့ခါးတွင် ကျောက်စိမ်းတစ်ခု ချိတ်ဆွဲထားပြီး ညာလက်တွင် အဖြူရောင် ယပ်တောင် တစ်ချောင်း ကိုင်ထားကာ ဘယ်လက်ကိုမူ ခါးပတ်မှ တွဲလောင်းကျနေသော အိတ်တစ်ခုပေါ်တွင် တင်ထား၏။ ထိုလူက အသက် သုံးဆယ်ကျော် အရွယ်ခန့် ရှိပုံရသော်လည်း မျက်လုံးများက နားလည်ရခက်ပေသည်။ တစ်ခဏတွင် အပြစ်ကင်းစင်သော အကြည့်မျိုး ရှိပြီး နောက်တစ်ခဏတွင်မူ ပါးနပ်လည်ဝယ်သော အကြည့်မျိုး ဖြစ်သွားတတ်၏။</p> <p>လင်းမူ သူ့ထံမှ ထွက်ပေါ်နေသော တိုးညင်းသည့် စိတ်ဝိညာဥ်ချီ လှိုင်းများကို ခံစားမိပြီး ကျင့်ကြံသူ တစ်ဦး ဖြစ်ကြောင်း ချက်ချင်း သိလိုက်၏။ သူ စူးစမ်းလိုစိတ်ဖြင့် စိတ်ဝိညာဥ်အာရုံကို ဖြန့်ကျက်ပြီး ထိုလူကို စစ်ဆေးကြည့်လိုက်သည်။ သို့သော် ထိုသို့ ပြုလုပ်လိုက်သည်နှင့် တစ်ပြိုင်နက် ထိုလူ၏ မျက်လုံးများ သူ့ထံ ရောက်လာပြီး နှုတ်ခမ်းပေါ်တွင် မဲ့ပြုံးတစ်ခု ပေါ်လာတော့သည်။</p> <p>"အမြူတေ ဖွဲ့စည်းခြင်း အဆင့်..." လင်းမူ တိုးတိုးလေး ရေရွတ်လိုက်၏။</p> <p>ထိုအချိန်တွင် ထိုလူက သူ့ကို ထိတွေ့လာသော စိတ်ဝိညာဥ်အာရုံကို အာရုံခံမိပြီးနောက် စိတ်ဝင်စားသော အမူအရာ ပေါ်လာသည်။</p> <p>"ဟော... ကျင့်ကြံသူ ရဲဘော်ရဲဘက် တစ်ယောက်ပါလား... မင်္ဂလာပါ..." ထိုလူ လက်နှစ်ဖက် ဆုပ်ကာ ပြုံးပြရင်း နှုတ်ဆက်လိုက်၏။</p> <p>အပြုံးမှာ အဆင်ပြေပုံ ရသော်လည်း ဟာလာဟင်းလင်း ဖြစ်နေသော ခံစားချက် တစ်ခု ပါဝင်နေသည်။ လင်းမူ အလျင်အမြန် လက်နှစ်ဖက် ဆုပ်ကာ ပြန်လည် နှုတ်ဆက်လိုက်၏။</p> <p>"မင်္ဂလာပါ..." လင်းမူ အနေခက်သော လေသံဖြင့် ပြန်ပြောလိုက်သည်။</p> <p>ထိုလူ လင်းမူ၏ ယခင် အပြုအမူကို ဂရုစိုက်ပုံ မရဘဲ ခေါင်းညိတ် တုံ့ပြန်လိုက်သည်။ သူ ကောင်တာရှေ့သို့ လျှောက်သွားပြီး တွမ်ခယ်ကို ကြည့်လိုက်၏။</p> <p>"အာ... သခင်မလေး တွမ်ခယ်က အမြဲတမ်းလိုပဲ လှပနေတာပဲ... ပန်းပေါင်း သန်းချီတောင် သခင်မလေးရဲ့ မျက်နှာရှေ့မှာ အရောင်မှိန်သွားမှာပဲ..." ထိုလူ ပိုးပန်းဟန် ပါဝင်သော မြှောက်ပင့်သည့် လေသံဖြင့် ချီးကျူးလိုက်၏။</p> <p>ထိုလူ၏ စကားများကို ကြားပြီးနောက် လင်းမူ ကြက်သီး တဖြန်းဖြန်း ထသွားပြီး မသိစိတ်အရ နောက်သို့ တစ်လှမ်း ဆုတ်လိုက်မိသည်။ သူ မသိလိုက်သော်လည်း သူ့ခါးရှိ ဓားတိုပင် တုန်ခါလာပြီး ဓားအိမ်ထဲမှ ထွက်ချင်နေသကဲ့သို့ ဖြစ်လာ၏။ သို့သော် စက္ကန့်အနည်းငယ် အကြာတွင် ပြန်လည် ငြိမ်သက်သွားပေသည်။</p> <p>တွမ်ခယ်၏ နဖူးပေါ်ရှိ သွေးကြော ရုတ်တရက် ထောင်ထလာပြီး သူမ၏ မျက်နှာထား အေးစက်သွား၏။ သူမထံမှ ထွက်ပေါ်လာသော ဖိအားများ ပြင်းထန်လာသည်ကို လင်းမူ ရုတ်တရက် ခံစားလိုက်ရသည်။ ဖိအားက သူ့ကို ဦးတည်ထားခြင်း မဟုတ်သော်လည်း သူမ၏ စွမ်းအားကို သူ အာရုံခံမိနေဆဲ ဖြစ်ပေသည်။</p> <p>"အိုး... သူ တော်တော် သန်မာတာပဲ... ဖိအားက ငါ့ကို ဦးတည်ထားတာ မဟုတ်ပေမယ့် ခြိမ်းခြောက်ခံနေရသလို ခံစားရတယ်... သူ့ကျင့်ကြံခြင်း အခြေခံက ဘယ်လောက်များလဲ မသိဘူး..." လင်းမူ အနည်းငယ် ကြောက်ရွံ့စွာဖြင့် ရေရွတ်လိုက်၏။</p> <p>"အင်း... သူ ထုတ်လွှတ်နေတဲ့ အရှိန်အဝါကို ကြည့်ရရင် အမြူတေ ဖွဲ့စည်းခြင်း အဆင့်ရဲ့ အထွတ်အထိပ်မှာ ရှိနေတာ သံသယ ဖြစ်စရာ မလိုဘူး..." ရွှီခုန်း ခန့်မှန်းလိုက်၏။</p> <p>တွမ်ခယ်က အမြူတေ ဖွဲ့စည်းခြင်း အဆင့် ကျင့်ကြံသူ တစ်ဦး ဖြစ်ကြောင်း လင်းမူ သိထားပြီး သူမနှင့် တိုက်ခိုက်ခဲ့ဖူးသော်လည်း ယခု သူမ၏ အပြည့်အဝ စွမ်းအားကို ထုတ်ဖော်ပြသလိုက်သောအခါ မရည်ရွယ်ဘဲ ဖြစ်သော်လည်း သူ အံ့သြသွားမိဆဲပင်။</p> <p>"မိုးကောင်းကင်... အဲဒီတုန်းက ငါ သူ့ကို နိုင်ခဲ့တာ တကယ် ကံကောင်းတာပဲ..." လင်းမူ သူ့ကံတရားကို ကျေးဇူးတင်လိုက်၏။</p> <p>ထို့နောက် တွမ်ခယ်ကို ပိုးပန်းရန် ကြိုးစားလိုက်သော ထိုလူ၏ မျက်ခုံးများပေါ်တွင် ချွေးစက်များ ပေါ်လာသည်ကို လင်းမူ မြင်တွေ့လိုက်ရသည်။ သို့တိုင်အောင် ထိုလူ၏ မျက်နှာပေါ်ရှိ အပြုံးမှာ အနည်းငယ်မျှ လျော့ပါးမသွားဘဲ ပို၍ပင် ကျယ်ပြန့်လာ၏။</p> <p>"ဟားဟားဟား... အလုပ်ကိစ္စ စလိုက်ကြရအောင်..." သူ ဖန်တီးခဲ့သော အခြေအနေကို ဖြေလျှော့ရန် ကြိုးစားရင်း ထိုလူ ပြောလိုက်၏။</p> <p>“ဟမ့်...”</p> <p>တွမ်ခယ် စိတ်အနှောင့်အယှက် ဖြစ်စွာ နှာခေါင်းရှုံ့လိုက်ပြီးနောက် သူမ၏ အရှိန်အဝါကို ပြန်လည် ရုပ်သိမ်းလိုက်သည်။ ထိုလူ သူ့နဖူးမှ ချွေးများကို ဝတ်ရုံလက်ဖြင့် သုတ်လိုက်ပြီးနောက် ကျင်းဝေဘက်သို့ လှည့်ကြည့်လိုက်၏။</p> <p>"အိုး... သခင်မလေး တွမ်ခယ်ရဲ့ အဘိုးလည်း ဒီမှာ ရှိနေတာပဲ... ကောင်းတာပေါ့... သက်ကြီးရွယ်အိုတွေ ခွန်အား ပြန်လည် ပြည့်ဝလာအောင် ကူညီပေးနိုင်တဲ့ အထူး ဆေးပင်တချို့ ကျွန်တော့်ဆီမှာ ပါလာတယ်..." ထိုလူ ပြောလိုက်၏။</p> <p>အေးအေးဆေးဆေး အနားယူနေဟန်ဖြင့် လက်ဖက်ရည် သောက်နေသော ကျင်းဝေ ထိုလူ၏ ရိုင်းစိုင်းသော စကားများကို ကြားလိုက်ရသည့်အခါ လက်ဖက်ရည်များ ထွေးထုတ်မိလုနီးပါး ဖြစ်သွားတော့သည်။</p> <p>လင်းမူ ထိုလူ၏ စကားများကို ကြားသော်လည်း ဘာကို ဆိုလိုမှန်း နားမလည်သောကြောင့် မတုံ့ပြန်လိုက်ချေ။ သို့သော် တွမ်ခယ်၏ မျက်နှာထား အနည်းငယ် ပြေလျော့သွားပြီးနောက် သူမ၏ အေးစက်သော ဟန်ဆောင်မှုအောက်တွင် အလျင်အမြန် ပြန်လည် ဖုံးကွယ်လိုက်၏။</p> <p>ကျင်းဝေ လက်ဖက်ရည်ခွက်ကို ချလိုက်ပြီး ပြောလိုက်သည်။ "ဟုတ်တယ်... ဟုတ်တယ်... စကြတာပေါ့... ကဲ... ဒီနေ့ ငါတို့ကို ဘာပစ္စည်းတွေ ယူလာပေးလဲ ကျင်းမင်ရှန်..."</p> <p>"ဪ... သူ့နာမည်က ကျင်းမင်ရှန်ကိုး..." လင်းမူ ရေရွတ်လိုက်ပြီး နောက်တစ်စက္ကန့်တွင် မှတ်သားထားလိုက်၏။</p> <p>ထိုလူက တွမ်ခယ်နှင့် ဟွေယင်းကျဲ ပြီးလျှင် လင်းမူ တွေ့ဖူးသော တတိယမြောက် အမြူတေ ဖွဲ့စည်းခြင်း အဆင့် ကျင့်ကြံသူ ဖြစ်သဖြင့် အနာဂတ်တွင် တစ်နည်းနည်းဖြင့် လိုအပ်လာပါက မှတ်မိနေစေရန် သူ၏ နာမည်ကို မှတ်သားထားလိုခြင်း ဖြစ်ပေသည်။</p> <p>ကျင်းမင်ရှန် ကျင်းဝေ၏ စကားကို ခေါင်းညိတ် တုံ့ပြန်လိုက်ပြီး လက်နှစ်ဖက်ကို ဖြန့်ကားလိုက်၏။</p> <p>"ဒီနေ့... ကျွန်တော် ခင်ဗျားတို့အတွက် ကုန်ပစ္စည်း မျိုးစုံ ယူဆောင်လာပါတယ်... ထိတွေ့လို့ ရတဲ့ ပစ္စည်းတွေရာ... ထိတွေ့လို့ မရတာတွေရော ပါပါတယ်...” ကျင်းမင်ရှန် ကြွားဝါသော ဟန်ပန်ဖြင့် ပြောလိုက်သည်။</p> <p> </p> <p> </p> <p style="text-align: center;">အခန်း ၂၆၅ ပြီး</p> <p style="text-align: center;">***</p>


Save