Book List

<h2 style="text-align: center;">အခန်း ၂၇၂</h2> <h2 style="text-align: center;">ပျောက်ဆုံး အင်မော်တယ်၏ မှတ်တမ်း (အပိုင်း ၂)</h2> <h2 style="text-align: center;">*</h2> <p> </p> <p> </p> <p>ယခင်က အစောင့်များအတွက် လူဦးရေ စာရင်း မှားယွင်းရန် လွယ်ကူခဲ့သော်လည်း ကျွန်များအတွက်မူ ထွက်ပြေးရန် မဖြစ်နိုင်သေးချေ။ အဘယ်ကြောင့်ဆိုသော် သတ္တုတွင်း၏ ဝင်ပေါက်နှင့် ထွက်ပေါက်မှာ တစ်ခုတည်းသာ ရှိပြီး လုံခြုံရေး အထပ်ထပ် ချထားသောကြောင့် ဖြစ်ပေသည်။ အကယ်၍ သူတို့ ပျောက်ဆုံးနေသည်ဟု ယူဆခံရပါက သူတို့၏ ကျင့်ကြံခြင်း အခြေခံ အကူအညီဖြင့် ထွက်ပြေးနိုင်ပေလိမ့်မည်။ သို့သော် ယခုမူ စုံစမ်းစစ်ဆေးမှု တစ်ခု စတင်တော့မည် ဖြစ်သည်။</p> <p>ဘုရင်က မင်းသားကို အနီးကပ် စောင့်ကြည့်နေပြီး သူလုပ်မိသော အမှားတိုင်းကို ရှာဖွေနေသဖြင့် မင်းသားမှာ အတော်လေး စိုးရိမ်ပူပန်နေပြီး ထိုသို့ မဖြစ်စေရန် အရာအားလုံးကို လုပ်ဆောင်ခဲ့သည်။ ထိုအချက်က သတ္တုတွင်း၏ လုပ်ငန်းစဉ်များကို အနီးကပ် စောင့်ကြည့်ရန် သူ့ကို တွန်းအားပေးခဲ့၏။</p> <p>ထိုသို့ဖြင့် နောက်ထပ် တစ်နှစ် ကုန်ဆုံးသွားပြီး ပျောက်ဆုံး အင်မော်တယ် ကျင့်ကြံသူ တစ်ဦး ဖြစ်လာသည်မှာ စုစုပေါင်း နှစ်နှစ် ရှိခဲ့ပြီ ဖြစ်သည်။ ဆိုးရွားသော အခြေအနေများနှင့် သယံဇာတ ရှားပါးမှုကြောင့် ပျောက်ဆုံး အင်မော်တယ်လည်း ချီစုဆောင်းခြင်း အစောပိုင်း အဆင့်သို့သာ မနည်း ရောက်ရှိနိုင်ခဲ့သည်။</p> <p>သူ လေ့ကျင့်နေသော ကျင့်စဉ်က ခန္ဓာကိုယ်နှင့် မကိုက်ညီကြောင်း အဘိုးအိုကလည်း တွေ့ရှိခဲ့၏။ ထို့ကြောင့် သူ့ကိုယ်ပိုင် ကျင့်စဉ်ထက် နိမ့်ကျသော အခြား ကျင့်စဉ်တစ်ခုကို ပေးရန်မှလွဲ၍ အခြား ရွေးချယ်စရာ မရှိတော့ချေ။</p> <p>သို့တိုင်အောင် ပျောက်ဆုံး အင်မော်တယ်က ဂရုမစိုက်ဘဲ စိတ်ရောကိုယ်ပါ နှစ်ပြီး ကျင့်ကြံခဲ့သည်။ သူ ရရှိသော အားလပ်ချိန် မှန်သမျှကို လက်လွတ်မခံဘဲ စက္ကန့်တိုင်းကို အပြည့်အဝ အသုံးချခဲ့၏။ အစပိုင်းတွင် သတ်မှတ်ထားသော ပမာဏ ပြည့်မီအောင် လုပ်ဆောင်ရသဖြင့် ကျင့်ကြံခြင်းနှင့် သတ္တုတူးဖော်ခြင်းကို ဟန်ချက်ညီအောင် လုပ်ဆောင်ရန် အတော်လေး ခက်ခဲခဲ့သည်။ အကယ်၍ ထိုပမာဏ မပြည့်မီပါက အစားအစာ ရရှိမည် မဟုတ်ဘဲ အသက်စွမ်းအင်ကို ရရှိနိုင်မည် မဟုတ်ချေ။</p> <p>အသက်စွမ်းအင်က ခန္ဓာကိုယ် သန့်စင်ခြင်း အဆင့်တွင် မရှိမဖြစ် လိုအပ်ပြီး ၎င်းမရှိဘဲနှင့် ဘယ်သောအခါမှ တိုးတက်နိုင်မည် မဟုတ်ပေ။ ထို့ကြောင့် အစပိုင်းတွင် အဘိုးအို၏ အကူအညီဖြင့် သူ၏ သတ်မှတ်ပမာဏကို တတ်နိုင်သမျှ ပြည့်မီအောင် အာရုံစိုက်ခဲ့ရ၏။</p> <p>အဘိုးအို အနေဖြင့်မူ သူ၏ ကျင့်ကြံခြင်းသည်လည်း အတော်လေး နှေးကွေးနေပြီး ချီစုဆောင်းခြင်း အလယ်အဆင့်သို့သာ မနည်း ရောက်ရှိနိုင်ခဲ့သည်။</p> <p>အဘိုးအို၏ တပည့် ဖြစ်လာပြီး တစ်နှစ်အကြာတွင် ပျောက်ဆုံး အင်မော်တယ် နောက်ဆုံး၌ ခန္ဓာကိုယ် သန့်စင်ခြင်း အဆင့် ၈သို့ ရောက်ရှိခဲ့ပြီး ချီစုဆောင်းခြင်း အဆင့်သို့ ဝင်ရောက်ကာ တရားဝင် ကျင့်ကြံသူ တစ်ဦး ဖြစ်လာရန် ဆုံးဖြတ်ခဲ့သည်။ သို့တိုင်အောင် ထိုသည်မှာ လွယ်ကူသော အလုပ် မဟုတ်ဘဲ စိတ်ဝိညာဥ်ချီကို အာရုံခံနိုင်ရန် သုံးလနီးပါး ကြာမြင့်ခဲ့ပြီး စုပ်ယူနိုင်ရန် နောက်ထပ် သုံးလ ကြာမြင့်ခဲ့ပေသည်။</p> <p>အဘိုးအိုက သူ့ကို စိတ်ဓာတ်မကျစေလိုသဖြင့် ထိုအချိန်က မပြောခဲ့သော်လည်း ပျောက်ဆုံး အင်မော်တယ်က သူ မြင်ဖူးသမျှထဲတွင် ပါရမီ အနည်းဆုံး ဖြစ်ကောင်းဖြစ်နိုင်ပေသည်။ သင့်လျော်သော သယံဇာတများနှင့် ကိုက်ညီသော ကျင့်စဉ် မရှိဘဲနှင့် သူ တိုးတက်ရန် အတော်လေး ခက်ခဲမည်ဖြစ်ကြောင်း အဘိုးအို သိထား၏။</p> <p>ထိုသို့ဖြင့် ခြောက်လ ကုန်ဆုံးသွားပြီး ပျောက်ဆုံး အင်မော်တယ်၏ သန္နိဋ္ဌာန်မှာ ပိုမို ခိုင်မာလာခဲ့သည်။ နောက်ဆုံးတွင် နောက်ထပ် ပြိုကျမှု တစ်ခု ဖြစ်ပွားသည့် နေ့တစ်နေ့ ရောက်ရှိလာ၏။ ဒီတစ်ကြိမ်တွင်လည်း ကျွန် အများအပြား သေဆုံးခဲ့သော်လည်း ပျောက်ဆုံး အင်မော်တယ်နှင့် အဘိုးအိုတို့ အောင်မြင်စွာ လွတ်မြောက်သွားခဲ့ကြသည်။</p> <p>သို့နှင့် နောက်ထပ် လူဦးရေ စာရင်း ကောက်ယူမှု တစ်ခုကို စတင်စေခဲ့၏။ ပျောက်ဆုံး အင်မော်တယ်နှင့် အဘိုးအိုတို့ ထိုသည်မှာ ထွက်ပြေးရန် အချိန်ကောင်း ဖြစ်ကြောင်း သိရှိသဖြင့် စတင် စီစဉ်ကြတော့သည်။ ဝင်ပေါက်မှ ထွက်သွားရန်မှာ စောင့်ကြပ်နေသော ကျင့်ကြံသူ အချို့ ရှိနေသောကြောင့် မဖြစ်နိုင်သလောက် ရှိနေပေသည်။</p> <p>ထိုကျင့်ကြံသူများမှာ တာဝန်ယူထားသော မင်းသား၏ ကိုယ်ရံတော်များမှလွဲ၍ အခြား မဟုတ်ပေ။ အဘိုးအိုသည် သူတို့ အလွန် အားနည်းနေသေးချိန်တွင် သူ သို့မဟုတ် ပျောက်ဆုံး အင်မော်တယ်က သူတို့ကို ယှဉ်ပြိုင် တိုက်ခိုက်နိုင်မည်ဟု မယုံကြည်သဖြင့် အခြား လမ်းကြောင်းတစ်ခုကို ရှာဖွေရန် ကြိုးစားခဲ့ကြသည်။</p> <p>လူဦးရေ စာရင်း ကောက်ယူမှု ပြီးစီးရန် တစ်လခန့် အချိန်ယူရမည် ဖြစ်ပြီး ထိုအချိန်အတွင်း ဥမင်လိုဏ်ခေါင်းများထဲတွင် ပုန်းအောင်းနေခြင်းဖြင့် သူတို့အလှည့်ကို အလွယ်တကူ နောက်ဆုတ်ထားနိုင်ပေသည်။ ပြိုကျမှု အတွင်း ကျန်ရစ်ခဲ့သော အစားအစာများကို ခိုးယူနိုင်ခဲ့သဖြင့် အစားအစာ ပြဿနာ ပြေလည်သွားခဲ့၏။</p> <p>ပျောက်ဆုံး အင်မော်တယ်နှင့် အဘိုးအိုတို့၏ ရည်ရွယ်ချက်မှာ မြေပြင်ပေါ်သို့ ဦးတည်သော ဒုတိယ ဥမင်လိုဏ်ခေါင်း တစ်ခုကို ရှာဖွေရန် ဖြစ်သည်။ မြေပြင်ပေါ်အထိ မရောက်လျှင်ပင် အနီးအနား ရောက်သည်အထိ သူတို့ ကိုယ်တိုင် တူးဖော်သွားနိုင်မည်ဟု အဘိုးအိုက ယုံကြည်ထား၏။</p> <p>အဘိုးအိုနှင့် ပျောက်ဆုံး အင်မော်တယ် နှစ်ဦးစလုံးသည် ယခု ကျောက်တုံးအချို့ကို တူးဖော်ရန် လွယ်ကူလောက်အောင် သန်မာနေပြီ ဖြစ်သည်။ သင့်လျော်သော ဥမင်လိုဏ်ခေါင်း တစ်ခုကို ရှာတွေ့ရန် သုံးလခန့် ကြာမြင့်ခဲ့၏။ အောက်သို့ စေလွှတ်လိုက်သော ရှာဖွေရေး အဖွဲ့များကို ပုန်းရှောင်ရင်း အကြိမ်ကြိမ် စမ်းသပ်ကာ အမှားများစွာကို ကျော်ဖြတ်ခဲ့ကြရသည်။</p> <p>နောက်ဆုံး ရက်သတ္တပတ်တွင် သူတို့ စတင် တူးဖော်ခဲ့ပြီး သူတို့၏ ခရီးစဉ် စတင်ခဲ့လေသည်။ ထိုအချိန်အတွင်း နောက်ထပ် ပြိုကျမှု တစ်ခု ဖြစ်ပွားခဲ့သဖြင့် အခက်အခဲ တစ်ခုနှင့် ကြုံတွေ့ခဲ့ရ၏။ ထိုသို့နှင့် သူတို့အောက်ရှိ ကြမ်းပြင်မှာ ဂူတစ်ခုထဲသို့ ပြိုကျသွားခဲ့ပေသည်။</p> <p>ထိုဂူသည် ယခင်က ပိတ်ဆို့ထားပြီး မည်သူမျှ မတွေ့ရှိခဲ့ဖူးသဖြင့် ထိုနေရာတွင် ကံကောင်းသော တွေ့ဆုံမှု တစ်ခု ရှိလိမ့်မည်ဟု သူတို့ မမျှော်လင့်ထားခဲ့ချေ။</p> <p>ဂူထဲတွင် အချင်း နှစ်မီတာခန့်နှင့် အနက် တစ်မီတာခန့် ရှိသော ရေအိုင် တစ်အိုင် ရှိလေသည်။ ထိုရေအိုင်သည် မှေးမှိန်သော အလင်းရောင်ဖြင့် တောက်ပနေပြီး အဘိုးအို၏ အာရုံကို ဆွဲဆောင်သွား၏။ သူ ရတနာ တစ်ခုကို ရှာတွေ့ပြီ ဖြစ်ကြောင်း သိလိုက်ရသဖြင့် စိတ်လှုပ်ရှားသွားတော့သည်။</p> <p>ရေအိုင်သည် အမှန်တကယ်တွင် ရှေးဦး ဝိညာဥ်စမ်းရေ တစ်ခု ဖြစ်ပေသည်။ ဝိညာဥ်စမ်းရေကို ဝိညာဥ်ကျောက်တုံး မိုင်းတွင်းများ၏ သန္ဓေသား ပုံစံအဖြစ် သတ်မှတ်နိုင်၏။ ရေအိုင်ထဲတွင် ရှိနေသော ရေတွင် ပျော်ဝင်နေသော စိတ်ဝိညာဥ်ချီများ ပါဝင်ပြီး နောက်ဆုံးတွင် စုစည်းသွားကာ ဝိညာဥ်ကျောက်တုံး မိုင်းတွင်း တစ်ခု၏ အမြုတေကို ဖြစ်ပေါ်စေမည် ဖြစ်ပေသည်။</p> <p>ထိုအမြုတေသည် ဝိညာဥ်ကျောက်တုံး မိုင်းတွင်း စတင် ကြီးထွားပြီး စိတ်ဝိညာဥ်ချီများ ပိုမို စုဆောင်းမည့် နေရာလည်း ဖြစ်ပေသည်။ သို့သော် ဝိညာဥ်စမ်းရေ၏ အရွယ်အစားနှင့် အခြေအနေကို ကြည့်ပြီး ထိုဝိညာဥ်စမ်းရေသည် ဝိညာဥ်ကျောက်တုံး မိုင်းတွင်း တစ်ခုအဖြစ် ပြောင်းလဲရန် နှစ်ရာပေါင်းများစွာ ကြာမြင့်ဦးမည် ဖြစ်ကြောင်း အဘိုးအို သိလိုက်၏။</p> <p>အဘိုးအိုက ပျောက်ဆုံး အင်မော်တယ်အား ရေအိုင်ထဲရှိ စိတ်ဝိညာဥ်ချီများကို စုပ်ယူရန် ညွှန်ကြားလိုက်ရာ သူ့ကျင့်ကြံခြင်းလည်း လျင်မြန်သော အရှိန်ဖြင့် စတင် တိုးတက်လာတော့သည်။ သို့တိုင်အောင် ပျောက်ဆုံး အင်မော်တယ်၏ ပါရမီ နိမ့်ကျမှုကြောင့် သူ ရရှိသော အကျိုးကျေးဇူးများမှာ သာမန် ကျင့်ကြံသူ တစ်ဦး ရရှိမည့် အကျိုးကျေးဇူးလောက် မကြီးမားခဲ့ချေ။</p> <p>ပျောက်ဆုံး အင်မော်တယ်က ချီစုဆောင်းခြင်း အလယ်အဆင့်သို့ ရောက်ရှိသွားပြီး ချီစုဆောင်းခြင်း နှောင်းပိုင်းအဆင့်သို့ပင် မနည်း တက်လှမ်းနိုင်ခဲ့၏။ ထိုလုပ်ငန်းစဉ်တွင် ဝိညာဥ်စမ်းရေ လုံးဝ ကုန်ခမ်းသွားပြီး ၎င်းနှင့်အတူ တိုင်းပြည်၏ ဖြစ်နိုင်ချေရှိသော စည်းစိမ်လည်း ပျောက်ဆုံးသွားခဲ့ရသည်။</p> <p>အကယ်၍ ထိုဝိညာဥ်စမ်းရေသာ ဝိညာဥ်ကျောက်တုံး မိုင်းတွင်း တစ်ခု ဖြစ်လာခဲ့ပါက တိုင်းပြည်က သေချာပေါက် အာရုံခံမိမည် ဖြစ်ပြီး ၎င်း၏ အထောက်အပံ့ဖြင့် အလွန်အမင်း ချမ်းသာပြီး စွမ်းအားကြီးမားလာမည် ဖြစ်ပေသည်။ ၎င်းဖြင့် ကျင့်ကြံသူ မျိုးဆက်ပေါင်းများစွာကို ဖန်တီးနိုင်မည် ဖြစ်ပြီး သူတို့၏ အဆင့်အတန်းလည်း ကောင်းကင်အထိ မြင့်တက်သွားမည် ဖြစ်၏။</p> <p>သို့သော် ကံမကောင်းစွာဖြင့် ကံတရားက သူတို့ဘက်တွင် မရှိဘဲ ပျောက်ဆုံး အင်မော်တယ်ကိုသာ အကျိုးပြုခဲ့ပေသည်။ ထိုသည်မှာ မရေမတွက်နိုင်သော ကံဆိုးမှုများ ကြုံတွေ့ခဲ့ရပြီးနောက် သူ၏ ဒုတိယမြောက် ကြီးမားသော ကံကောင်းမှုပင်။</p> <p>ယခု သူတို့၏ အသစ်ရရှိလာသော ခွန်အားဖြင့် အဘိုးအိုနှင့် ပျောက်ဆုံး အင်မော်တယ်တို့ မြေပြင်ပေါ်သို့ အပြန်ခရီး စတင်ခဲ့ကြ၏။ သူတို့ ကျောက်တုံးများကို တစ်ခုပြီးတစ်ခု ဖောက်ထွင်းပြီး ကျောက်ဆောင်များကို တစ်ခုပြီးတစ်ခု ခွဲထုတ်ကာ နောက်ဆုံးတွင် ဥမင်လိုဏ်ခေါင်း အသစ်တစ်ခုသို့ ရောက်ရှိသွားကြသည်။</p> <p>သို့သော် ထိုနေရာတွင် ပျောက်ဆုံး အင်မော်တယ်၏ ကံကောင်းမှု အဆုံးသတ်သွားခဲ့၏။ ရှာဖွေရေး အဖွဲ့ တစ်ဖွဲ့က သူတို့ကို တွေ့ရှိသွားပေသည်။</p> <p> </p> <p> </p> <p style="text-align: center;">အခန်း ၂၇၂ ပြီး</p> <p style="text-align: center;">***</p>


Save