Book List

<h2 style="text-align: center;">အခန်း (၂၀၈)</h2> <h2 style="text-align: center;">ချင်ကျန့်ရှန်း လှုပ်ရှားခြင်း</h2> <h2 style="text-align: center;">*</h2> <p> </p> <p>လီရွှမ်ရိနှင့် လင်းချင်းယဲ့တို့မှာမူ မုန့်ဝမ်အပေါ် ထားရှိသော သူတို့၏ ရန်လိုမှုကို ဖုံးကွယ်ထားခြင်း မရှိကြချေ။ ထိုနှစ်ဦးသည် မုန့်ဝမ်နှင့် သူမ၏ အပေါင်းအဖော်များကို ကြည့်ကာ နှုတ်ခမ်းထောင့်တွင် အေးစက်သော အပြုံးတစ်ခု ရှိနေကြသည်။</p> <p>မကြာမီ သူတို့ထံသို့ ဘေးဒုက္ခ ဆိုက်ရောက်တော့မည်ကို ယုံကြည်ချက် အပြည့်ရှိနေသည့်အလားပင်။</p> <p>မှန်ပေသည်၊ မီးတောက်ကဲ့သို့ ပြင်းထန်ပြီး မုန်းတီးမှုအပြည့်ရှိသော အကြည့်တစ်ခုက မုန့်ဝမ်ထံသို့ ချက်ချင်း ကျရောက်လာသည်။ ထိုသူမှာ အခြားသူမဟုတ်ဘဲ ရွှေတိမ်တိုက်ဂိုဏ်းမှ အကြီးအကဲ ချင်ကျန့်ရှန်းပင် ဖြစ်သည်။</p> <p>သူသည် လီရွှမ်ရိနှင့် လင်းချင်းယွဲ့တို့ထံမှတစ်ဆင့် သူ၏မြေး ချင်ရှောက်ယန်ကို သတ်ခဲ့သူမှာ မုန့်ဝမ်နှင့် သူမ၏အဖွဲ့ဖြစ်ကြောင်း သိရှိသွားခြင်း ဖြစ်၏။</p> <p>ချင်ကျန့်ရှန်း၏ မျက်နှာမှာ ပြာနှမ်းနေပြီး သူ၏ မျက်ဝန်းများထဲတွင် ဒေါသမီးများ တောက်လောင်နေသည်။ မုန့်ဝမ်နှင့် အခြားနှစ်ဦးကို ခဏမျှ စိုက်ကြည့်ပြီးနောက် သူသည် သူ၏ အဆင့်အတန်းကိုပင် ဂရုမစိုက်တော့ဘဲ မုန့်ဝမ်၊ ရွှမ်ကျီနှင့် ချင်းယွီတို့ကို တိုက်ရိုက် တိုက်ခိုက်တော့သည်။</p> <p>ချင်ကျန့်ရှန်း၏ လက်ထဲရှိ အဆင့်မြင့် ဝိညာဉ်လက်နက်မှ အလင်းတန်းတစ်ခု လက်ခနဲ ဖြစ်သွားပြီးနောက် ထိုလက်နက်မှာ လေထဲသို့ ပျံတက်သွားကာ တစ်ချက်တည်းဖြင့် အသေသတ်ရန် ရည်ရွယ်လျက် ထိုသုံးဦးထံသို့ ဖိနှိပ်ကျဆင်းလာလေသည်။</p> <p>နတ်သမီး ဝူမုန့်သည် ၎င်းကို မြင်သောအခါ နှာခေါင်းရှုံ့လိုက်ပြီး ဝင်ရောက် တားဆီးရန် ပြင်လိုက်သော်လည်း ကောင်းကင်မိုးကြိုးဂိုဏ်းမှ အကြီးအကဲနှင့် ရွှမ်ဟူကျောင်းတော်မှ ယွမ်စီတို့က ပိတ်ဆို့ထားလိုက်ကြသည်။</p> <p>ကောင်းကင်မိုးကြိုးဂိုဏ်းမှ အကြီးအကဲသည် သူ၏ဂိုဏ်းမှ နတ်သားတော်ကို သတ်ခဲ့သူမှာ မုန့်ဝမ်ဖြစ်ကြောင်း သိထားပြီး ဖြစ်သည်။ ထို့ကြောင့် သူသည် ချင်ကျန့်ရှန်းနှင့် ပူးပေါင်း၍ မုန့်ဝမ်ကို ဖယ်ရှားကာ သူ၏တူအတွက် ကလဲ့စားချေရန် ဆုံးဖြတ်လိုက်ခြင်း ဖြစ်ပေသည်။</p> <p>ရွှမ်ဟူကျောင်းတော်မှ ယွမ်စီမှာမူ မုန့်ဝမ်က သူတို့ကျောင်းတော်၏ မဟာယာနဗုဒ္ဓဘာသာတပည့်ကို လမ်းမှားသို့ ခေါ်ဆောင်သွားခြင်းအတွက် နာကျည်းနေပြီး သူ၏မျက်ဝန်းထဲတွင် ပြင်းထန်သော သတ်ဖြတ်လိုစိတ်များ လက်ခနဲ ဖြစ်သွားသည်။</p> <p>နတ်သမီး ဝူမုန့်၏ မျက်ဝန်းထဲတွင် အလင်းတစ်ခု ဖြတ်သန်းသွားပြီး အေးစက်စွာ ပြောလိုက်သည်။ "အကြီးအကဲ နှစ်ယောက်......... ရှင်တို့က ငါ့ရဲ့ ရွှမ်ယင်ဂိုဏ်းနဲ့ ရန်သူဖြစ်ချင်နေတာလား"</p> <p>ကောင်းကင်မိုးကြိုးဂိုဏ်းမှ အကြီးအကဲက တိတ်ဆိတ်နေသော်လည်း ရွှမ်ဟူကျောင်းတော်မှ ယွမ်စီကမူ လှောင်ပြုံးပြုံးလိုက်သည်။ "အရှက်မရှိတဲ့ မိစ္ဆာကျင့်ကြံသူတွေဆိုတာ လောကကြီးရဲ့ ဘုံရန်သူတွေပဲ။ လူတိုင်းမှာ သူတို့ကို သတ်ပိုင်ခွင့် ရှိတယ်။ ငါတို့ ရွှမ်ဟူကျောင်းတော်ကို တည်ထောင်ကတည်းက မိစ္ဆာတွေကို နှိမ်နင်းပြီး တရားသောလမ်းစဉ်ကို စောင့်ရှောက်ဖို့ကို ကိုယ့်ရဲ့ တာဝန်လို့ မှတ်ယူခဲ့တာ။ မင်းတို့ မိစ္ဆာကျင့်ကြံသူတွေကို စစ်ကြေညာရတာ ဘာဆန်းလို့လဲ"</p> <p>နတ်သမီး ဝူမုန့်၏ အကြည့်မှာ ပိုမို အေးစက်သွားပြီး သူမ၏ လက်ထဲတွင် အစွမ်းများကို တိတ်တဆိတ် မြှင့်တင်လိုက်သော်လည်း ထိုနှစ်ဦး၏ ပူးပေါင်း ပိတ်ဆို့မှုကို ဖောက်ထွက်ရန် ခက်ခဲနေကြောင်း တွေ့ရှိလိုက်ရသည်။</p> <p>ချင်ကျန့်ရှန်းသည် မြေးဖြစ်သူအတွက် ကလဲ့စားချေရန် ဒေါသတကြီး တိုက်ခိုက်နေခြင်း ဖြစ်သဖြင့် အစွမ်းကုန် ထုတ်သုံးထားသည်။ အဆင့်မြင့် ဝိညာဉ်လက်နက်မှ တောက်ပသော အလင်းတန်းများ ထွက်ပေါ်လာပြီး ပြင်းထန်သော တိုက်ကွက်မှာ အရှိန်အဝါကြီးမားသော နဂါးတစ်ကောင်အလား ဟိန်းဟောက်လျက် မုန့်ဝမ်တို့ သုံးဦးထံသို့ တည့်တည့် ပြေးဝင်သွားလေသည်။</p> <p>ဝင်ရောက် တားဆီးနိုင်သည့် တစ်ဦးတည်းသောသူဖြစ်သည့် နတ်သမီး ဝူမုန့်မှာမူ ကောင်းကင်မိုးကြိုးဂိုဏ်း အကြီးအကဲနှင့် ဆရာကြီး ယွမ်စီတို့၏ ဆွဲထားခြင်းကို ခံနေရသည်။ မုန့်ဝမ်နှင့် အခြားနှစ်ဦးမှာ ဤဘေးဒုက္ခမှ လွတ်မြောက်နိုင်ဖွယ် မရှိတော့ဟု ထင်ရပေသည်။</p> <p>သို့သော် အားလုံးက ပွဲကြည့်ရန် စောင့်ဆိုင်းနေကြစဉ်မှာပင် မုန့်ဝမ်က နှာခေါင်းရှုံ့လိုက်ပြီး သူမ၏ သွယ်လျသော လက်ကလေးကို ဝှေ့ယမ်းလိုက်ရာ ငွေရောင် ဝိညာဉ်ချပ်ဝတ်တန်ဆာတစ်ခု လေထဲတွင် ပေါ်လာပြီး သူမ၏ တစ်ကိုယ်လုံးကို ဖုံးအုပ်သွားသည်။ ထိုချပ်ဝတ်တန်ဆာမှာ တောက်ပသော အလင်းတန်းများ ဖြာထွက်နေပြီး အစွမ်းထက်သော ကာကွယ်ရေးစွမ်းအားများ ရှိနေသည်။ ၎င်းမှာ မပျက်စီးနိုင်သော ဝိညာဉ်ရွှေဖြင့် သွန်းလုပ်ထားသော ချပ်ဝတ်တန်ဆာပင် ဖြစ်၏။ ၎င်းသည် ရွှယ်ဝူယာကြောင့် ပျက်စီးခဲ့ရပြီးနောက် တိတ်တဆိတ် ပြန်လည်ပြုပြင်နေခဲ့ရာ လွန်ခဲ့သော ရက်အနည်းငယ်ကမှ အလုံးစုံ ပြန်လည်ကောင်းမွန်လာခြင်း ဖြစ်သည်။</p> <p>တစ်ချိန်တည်းမှာပင် ရွှမ်ကျီ၏ မျက်လုံးများ ပြူးကျယ်သွားပြီး သူ၏ ခန္ဓာကိုယ်မှ တောက်ပသော ရွှေရောင်အလင်းတန်းများ ထွက်ပေါ်လာရာ တောင်တစ်လုံးကဲ့သို့ မလှုပ်မယှက်ရှိသော ရွှေကိုယ်ထည် မဟာယာနဗုဒ္ဓရုပ်ပွားတော်အလား ရှိနေသည်။</p> <p>ချင်းယွီမှာမူ ကျဆင်းလာသော အဆင့်မြင့် ဝိညာဉ်လက်နက်ဆီသို့ စိုက်ကြည့်လိုက်ရာ လက်နက်၏ ပတ်ဝန်းကျင်ရှိ ဟင်းလင်းပြင်မှာ ခဏမျှ လိမ်ဖည်သွားလေသည်။</p> <p>သတ်ဖြတ်လိုသော အရှိန်အဝါများ ပြည့်နှက်နေသော ဝိညာဉ်လက်နက်မှာ ဟင်းလင်းပြင် လိမ်ဖည်သွားသည့် ခဏ၌ ရွှံ့နွံထဲသို့ ကျရောက်သွားသည့်အလား အရှိန်မှာ သိသိသာသာ လျော့ကျသွားပြီးမှသာ ထိုသုံးဦးပေါ်သို့ ပြင်းထန်စွာ ကျရောက်သွားသည်။</p> <p>ကျယ်လောင်သော မြည်ဟည်းသံနှင့်အတူ ထိုသုံးဦးမှာ ညည်းတွားလိုက်ကြပြီး ခန္ဓာကိုယ်များ ပြင်းထန်စွာ တုန်ခါသွားကာ ပါးစပ်ထောင့်မှ သွေးများ စီးကျလာသည်။ သူတို့မှာ ဒဏ်ရာ အသီးသီး ရရှိသွားသော်လည်း ကြံ့ကြံ့ခံ ရပ်တည်နေနိုင်ကြဆဲပင်။</p> <p>သူတို့၏ ပူးပေါင်း ကြိုးပမ်းမှုကြောင့် ဤကမ္ဘာပျက်မတတ် ပြင်းထန်သော ဒဏ်ချက်ကို အမှန်တကယ် ခုခံနိုင်ခဲ့ခြင်း ဖြစ်သည်။</p> <p>ချင်ကျန့်ရှန်း၏ အမူအရာမှာ အနည်းငယ် ပြောင်းလဲသွား၏။ ဤဂျူနီယာ သုံးဦးက သူ၏ သေစေနိုင်သော ဒဏ်ချက်ကို တားဆီးနိုင်လိမ့်မည်ဟု သူ ထင်မထားခဲ့ချေ။ ၎င်းကို မြင်သောအခါ နတ်သမီး ဝူမုန့်မှာ အနည်းငယ် စိတ်အေးသွားရသည်။</p> <p>မျောလွင့်နန်းတော်မှ အကြီးအကဲ၏ မျက်ဝန်းထဲတွင် အလင်းတစ်ခု လက်ခနဲ ဖြစ်သွားပြီး သူသည် မုန့်ဝမ်တို့ သုံးဦး၏ ရှေ့သို့ လျင်မြန်စွာ ရောက်ရှိလာကာ ကျန်ရှိနေသော တိုက်ခိုက်မှု အရှိန်အဝါများကို ကာကွယ်ပေးလိုက်သည်။</p> <p>တစ်ချိန်တည်းမှာပင် သူသည် ခေါင်းမော့ကာ ချင်ကျန့်ရှန်းထံသို့ အကြည့်တစ်ချက် ပေးလိုက်သည်။ "အကြီးအကဲ ချင်......... ရှင်က အကြီးအကဲ တစ်ယောက် ဖြစ်ပြီးတော့ ဂျူနီယာ သုံးယောက်ကို ဒီလို တိုက်ခိုက်တာက နည်းနည်းတော့ မသင့်တော်ဘူး မဟုတ်လား"</p> <p>ချင်ကျန့်ရှန်းသည် သွားကို ကျစ်ကျစ်ပါအောင် ကြိတ်လိုက်သော်လည်း မတတ်သာဘဲ လက်ကို ပြန်ရုပ်သိမ်းလိုက်ရသည်။ သူသည် မြေးဖြစ်သူကို ဆုံးရှုံးခဲ့ရသဖြင့် ဒေါသတကြီး တစ်ကြိမ် လုပ်ဆောင်ခဲ့ခြင်းမှာ နားလည်ပေးနိုင်သော်လည်း ဂျူနီယာ သုံးဦးနောက်သို့ တကောက်ကောက် လိုက်နေခြင်းမှာမူ အလွန်အကျွံ ဖြစ်သွားပေလိမ့်မည်။</p> <p>နတ်သမီး ဝူမုန့်၏ လှပသော မျက်နှာမှာ အေးစက်နေပြီး သူမ၏ အကြည့်မှာ ခန်းမတစ်ခုလုံးကို ဓားတစ်စင်းအလား ဝေ့ကြည့်လိုက်ကာ နောက်ဆုံးတွင် ချင်ကျန့်ရှန်းထံ၌ ရပ်တန့်သွားသည်။ "ချင်ကျန့်ရှန်း......... ရှင့်ရဲ့ အရှိန်အဝါက တော်တော်ကြီးတာပဲနော်....... ငါ့ရှေ့တင် ငါ့ရဲ့ ရွှမ်ယင်ဂိုဏ်း ဂျူနီယာတွေကို တိုက်ခိုက်ရဲတယ်ပေါ့......." သူမ၏ အသံမှာ အေးစက်နေပြီး အဆုံးမဲ့သော ဒေါသများ ပြည့်နှက်နေသည်။</p> <p>ချင်ကျန့်ရှန်း၏ မျက်နှာမှာ ပျက်ယွင်းနေသော်လည်း ဒေါသကို ထိန်းချုပ်ကာ နှာခေါင်းရှုံ့လိုက်သည်။ "ချင်ရှောက်ယန်က ငါ့ရဲ့ ရွှေတိမ်တိုက်ဂိုဏ်းက နတ်သားတော်ပဲ။ အခု သူက ရွှမ်ယင်ဂိုဏ်း တပည့်လက်ချက်နဲ့ သေခဲ့ရတာကို ငါက ဘယ်လိုလုပ် သည်းခံနိုင်မှာလဲ"</p> <p>နတ်သမီး ဝူမုန့် ထပ်မံ အော်ဟစ်ရန် ပြင်လိုက်စဉ်မှာပင် ရွှန်ထျန်းဓားဂိုဏ်းမှ အကြီးအကဲ ရွှမ်ကျီဇီက ဖျန်ဖြေရန် ရှေ့သို့ ထွက်လာသည်။ "ညီအစ်ကို ချင်က သူ ချစ်မြတ်နိုးလှတဲ့ မြေးလေးကို ဆုံးရှုံးလိုက်ရလို့ စိတ်ထိခိုက်နေတာပါ။ ဒါကြောင့် သူ စိတ်လိုက်မာန်ပါ လုပ်မိသွားတာကို နတ်သမီး ဝူမုန့်အနေနဲ့ နားလည်ပေးစေချင်ပါတယ်"</p> <p>ထာဝရစိတ်ဝိညာဉ်ဂိုဏ်းမှ အကြီးအကဲကလည်း ဝင်ပြောလိုက်သည်။ "ဟုတ်ပါတယ်၊ အဲဒီ ရှောက်ယန်လေးက ငါတို့ ရှေ့တင် ကြီးပြင်းလာခဲ့တာပါ။ သူက ပါရမီလည်း ထူးချွန်သလို စိတ်ဓာတ်လည်း တည်ငြိမ်တဲ့သူပါ။ အခုလို အဖြစ်ဆိုးနဲ့ ကြုံရတာ တကယ်ကို နှမြောဖို့ ကောင်းပါတယ်။ အကြီးအကဲ ချင်က မြေးအပေါ် သံယောဇဉ် ကြီးမားတာကလည်း နားလည်ပေးလို့ ရပါတယ်။ နတ်သမီး ဝူမုန့်ရဲ့ တပည့်တွေလည်း ဘာမှ မဖြစ်ဘူးဆိုတော့ ဒီကိစ္စကို ဒီမှာတင် ရပ်လိုက်ပါတော့"</p> <p>အခြားဂိုဏ်းများမှ အကြီးအကဲများလည်း ဝင်ရောက် ပြောဆိုကြရာ ရွှေတိမ်တိုက်ဂိုဏ်းဘက်မှ သိသိသာသာရော မသိမသာပါ ဘက်လိုက်နေကြသဖြင့် ခန်းမအတွင်းရှိ အခြေအနေမှာ ချက်ချင်းပင် တစ်မျိုးဖြစ်သွားလေသည်။</p> <p>နတ်သမီး ဝူမုန့်က လှောင်ပြုံးပြုံးလိုက်သည်။ "တကယ့်ကို ရွှေတိမ်တိုက်ဂိုဏ်းပါပဲလား၊ တကယ့်ကို ချင်ကျန့်ရှန်းပါပဲလား၊ တကယ့်ကို လမ်းမှန်ကျင့်ကြံသူတွေပါပဲလား......." သူမ၏ စူးရှသော အကြည့်မှာ ခန်းမတစ်ခုလုံးကို ဝေ့ကြည့်လိုက်ပြီး မျက်ဝန်းထဲတွင် မဖုံးကွယ်နိုင်သော မထီမဲ့မြင်ပြုမှုများ ပြည့်နှက်နေသည်။</p> <p>"ရှင်တို့ထက် အားနည်းတဲ့သူဆိုရင် နှိမ်နင်းပြီး အမြတ်ထုတ်မယ်။ ရှင်တို့ထက် အားသာတဲ့သူဆိုရင်တော့ ကပ်ဖားပြီး သတိထားမယ်။ ရှင်တို့ရဲ့ လုပ်ရပ်တွေက ငါ ဝူမုန့်ကို တကယ်ပဲ မျက်စိပွင့်စေတာပဲ"</p> <p>ရွှမ်ကျီဇီက မကျေမနပ်ဖြင့် မျက်မှောင်ကြုတ်လိုက်သည်။ "ဝူမုန့်......... မင်း စကားပြောတာ လွန်နေပြီ။ ငါတို့က မင်းရဲ့ ရွှမ်ယင်ဂိုဏ်းကို ကြောက်နေတယ်လို့ တကယ်ပဲ ထင်နေတာလား"</p> <p>အခြားသူများကလည်း ရွှမ်ယင်ဂိုဏ်းကို ဝိုင်းဝန်း ပြစ်တင်ကြသည်။ "ဒါက ရွှမ်ယင်ဂိုဏ်းကလူတွေ လွန်တာ သိသာနေတာပဲ။ အရင်ဆုံး ကောင်းကင်မိုးကြိုးဂိုဏ်းရဲ့ နတ်သားတော်ကို သတ်တယ်၊ ပြီးတော့ ရွှမ်ဟူကျောင်းတော်ရဲ့ မဟာယာနဗုဒ္ဓဘာသာတပည့်ကို မိစ္ဆာလမ်းစဉ်ထဲ ကျအောင် လုပ်တယ်၊ အခုတော့ ရွှေတိမ်တိုက်ဂိုဏ်းရဲ့ နတ်သားတော်ကိုတောင် သတ်ပစ်လိုက်ပြီ"</p> <p>"ရွှမ်ယင်ဂိုဏ်းက မိစ္ဆာကျင့်ကြံသူတွေက တကယ်ကို လွန်လွန်းနေပြီ......."</p> <p>ဘေးပတ်ဝန်းကျင်မှ ပြစ်တင်သံများကို နားထောင်ရင်း နတ်သမီး ဝူမုန့်၏ မျက်ဝန်းထဲတွင် အအေးဓာတ်များ ပိုမို ပြင်းထန်လာသည်။</p> <p>သူမသည် ရုတ်တရက် လှုပ်ရှားလိုက်ရာ တစ္ဆေတစ်ကောင်အလား မုရွှယ်ယန်၏ ရှေ့တွင် ပေါ်လာလေသည်။ သူမသည် သူမ၏ သွယ်လျသော ကျောက်စိမ်းရောင် လက်ကလေးကို မြှောက်ကာ မုရွှယ်ယန်၏ ပုခုံးကို အသာအယာ ပုတ်လိုက်သည်။ သူမ၏ လှုပ်ရှားမှုမှာ နူးညံ့ဟန် ရှိသော်လည်း ထိတ်လန့်ဖွယ်ရာ စွမ်းအားများ ပါဝင်နေသည်။</p> <p>"မင်း ဘယ်လိုများ ရဲရတာလဲ၊ လူယုတ်မာမ......." ချင်ကျန့်ရှန်း အသက်ရှူရပ်မတတ် ဖြစ်သွားပြီး သူ၏ မျက်နှာမှာ သိသိသာသာ ပြောင်းလဲသွားကာ မုရွှယ်ယန်ကို နတ်သမီး ဝူမုန့်၏ မိစ္ဆာလက်ထဲမှ ကယ်တင်ရန် အသည်းအသန် ကြိုးစား တားဆီးတော့သည်။ သို့သော် သူသည် နောက်ကျသွားခဲ့ပြီ ဖြစ်၏။</p> <p>နတ်သမီး ဝူမုန့်၏ ဖိနှိပ်ထားသော အရှိန်အဝါကြောင့် မုရွှယ်ယန်သည် တစ်ကိုယ်လုံး အေးစက်သွားပြီး တောင့်တင်းသွားရသည်။ သူမ၏ လက်ချောင်းထိပ်လေးကိုပင် မလှုပ်ရှားနိုင်တော့ချေ။</p> <p>သူမသည် ထိတ်လန့်တကြား မျက်လုံးများ ပြူးကျယ်လျက် အကူအညီ တောင်းချင်သော်လည်း နှုတ်ခမ်းမှ မည်သည့်အသံမျှ ထွက်မလာခဲ့ပေ။</p> <p>နတ်သမီး ဝူမုန့်၏ နှုတ်ခမ်းတွင် အေးစက်သော အပြုံးတစ်ခု ပေါ်လာပြီး မိစ္ဆာတစ်ကောင်အလား သူမ၏ နီမြန်းသော နှုတ်ခမ်းလွှာများကို ဟလိုက်သည်။ "အကြီးအကဲက သူ့တပည့်ကို ဒီလောက်တောင် ဂရုစိုက်နေမှတော့ ဆုံးရှုံးခြင်းရဲ့ အရသာကို နောက်တစ်ကြိမ် မြည်းစမ်းကြည့်လိုက်ဦးလေ"</p> <p>စကားမဆုံးမီမှာပင် ပြင်းထန်သော ဝိညာဉ်စွမ်းအားများမှာ မုရွှယ်ယန်၏ ခန္ဓာကိုယ်ထဲသို့ စီးဝင်သွားပြီး သူမ၏ သွေးကြောများကို ချက်ချင်းပင် ဖျက်ဆီးပစ်လိုက်သည်။ မုရွှယ်ယန်သည် စူးရှစွာ အော်ဟစ်လိုက်ပြီး သွေးများ ထွေးထုတ်ကာ မြေပြင်ပေါ်သို့ လဲကျသွားတော့သည်။</p> <p>"ဝူမုန့်......... ငါ မင်းကို အသေသတ်မယ်......." ချင်ကျန့်ရှန်း၏ မျက်ဝန်းများမှာ နီရဲနေပြီး ရှေ့သို့ ပြေးဝင်ရန် ဟောက်လိုက်လေသည်။ သို့သော် နတ်သမီး ဝူမုန့်က အသင့်ပြင်ထားပြီး ဖြစ်၏။ သူမ၏ လက်ထဲတွင် ပျော့ပျောင်းသော ဓားတစ်စင်း လေထဲ၌ ပေါ်လာပြီး ၎င်း၏ ထိပ်ဖျားမှာ မုရွှယ်ယန်၏ လည်ပင်းကို တည့်တည့် ဦးတည်ထားသည်။</p> <p>ချင်ကျန့်ရှန်း၏ မျက်စိသူငယ်အိမ်များ ကျုံ့သွားကာ ရှေ့သို့ တစ်လှမ်းမျှ မတိုးရဲတော့သည်ကို မြင်သောအခါ နတ်သမီး ဝူမုန့်က ကျေနပ်စွာ ပြုံးလိုက်သည်။ "ချင်ကျန့်ရှန်း......... ရှင် ဘာတွေ အော်ဟစ်နေတာလဲ။ ရှင်လုပ်ခဲ့သလိုပဲ ငါက ပြန်လုပ်ပေးရုံတင်ပါ၊ ဒါကို ဒီလောက်အထိ ဆူညံနေစရာ လိုလို့လား"</p> <p> </p> <p style="text-align: center;">***</p> <p> </p>


Save