Book List

<h2 style="text-align: center;">အခန်း ၆၄၆</h2> <h2 style="text-align: center;">ကောင်းကင်မျက်လုံး လိပ်ပြာ</h2> <h2 style="text-align: center;">*</h2> <h2> </h2> <p> </p> <p> </p> <p> </p> <p>"နောက်ထပ် နေရာက လိပ်ပြာချိုင့်ဝှမ်း"</p> <p>ချင်စန်းက ဦးတည်ချက် သတ်မှတ်ရန် သူ့မြေပုံကို ထုတ်ကြည့်လိုက်သည်။</p> <p>လိပ်ပြာချိုင့်ဝှမ်းမှာ အဆိပ်အိုင်နှင့် သိပ်မဝေးပေ။ အကယ်၍ ဓားပျံစီးခရီးသွားလျှင် ရောက်ရှိရန် နှစ်ရက်သာ ကြာမြင့်ပေလိမ့်မည်။</p> <p>နာမည် အတိုင်းပင်... လိပ်ပြာချိုင့်ဝှမ်းမှာ မရေမတွက်နိုင်သော လိပ်ပြာများဖြင့် ပြည့်နှက်နေသည့် လှပသော လျှိုမြောင်တစ်ခု ဖြစ်သည်။</p> <p>လည်ပတ်ခဲ့ဖူးသူတိုင်းက တူညီသော ခံစားချက် တစ်ခုတည်းကိုသာ ဖော်ပြကြသည်... လှပခြင်း...</p> <p>ထောင်သောင်းချီသော လိပ်ပြာများက ချိုင့်ဝှမ်း တစ်လျှောက် တနှစ်ပတ်လုံး ဖူးပွင့်နေသော ပန်းပွင့်များကြား ကခုန်ပျံသန်းနေကြသည်။ နွေဦး၊ နွေရာသီ၊ ဆောင်းဦး သို့မဟုတ် ဆောင်းရာသီ ဖြစ်စေ... ရှုခင်းမှာ အမြဲတမ်း ညှို့ယူဖမ်းစားနိုင်စွမ်း ရှိ၏။</p> <p>ဤလိပ်ပြာများမှာ လူ့လောကတွင် တွေ့ရလေ့ရှိသော သာမန် မျိုးစိတ်များ ဖြစ်ကြသည်။ ဝိညာဉ်ပိုးကောင်များ မဟုတ်ကြသလို ချိုင့်ဝှမ်း ကိုယ်တိုင်မှာလည်း သာမန် ချိုင့်ဝှမ်းတစ်ခုသာ။ အတွင်း၌ မည်သည့် အကာအကွယ် အတားအဆီးများ၊ ဝိညာဉ်ဆေးပင်များ ဝှက်ထားခြင်း မရှိပေ။</p> <p>ကျင့်ကြံသူများ လိပ်ပြာချိုင့်ဝှမ်းကို ဦးဆုံး ရှာတွေ့ချိန်တွင် လိပ်ပြာများကို ဆွဲဆောင်ပြီး တွယ်တာစေသော ရတနာ တစ်ခုခု ဖုံးကွယ်ထားသည်ဟု သံသယ ဝင်ခဲ့ကြသည်။</p> <p>ချိုင့်ဝှမ်း တစ်ခုလုံးကို မွှေနှောက် ရှာဖွေခဲ့ကြသော်လည်း လုံးဝ သဘာဝအတိုင်း ဖြစ်တည်နေသော နေရာတစ်ခု ဖြစ်ကြောင်း အတည်ပြုနိုင်ခဲ့ရုံသာ ရှိသည်။ မြေပြင်အနေအထားကြောင့် ထိုနေရာရှိ ဝိညာဉ်ချီမှာ အနည်းငယ် ပိုသိပ်သည်းပြီး ရာသီဥတုမှာ တနှစ်ပတ်လုံး နွေဦးပေါက်ကဲ့သို့ သမမျှတ နေခြင်း ဖြစ်သည်။</p> <p>ကောင်းကင်မျက်လုံး လိပ်ပြာဟု ခေါ်သော ဝိညာဉ်ပိုးကောင် တစ်ကောင် ချိုင့်ဝှမ်းထဲတွင် နေထိုင်သည်ဟု ဆိုကြသည်။</p> <p>ချင်စန်းက ကောင်းကင်မျက်လုံး လိပ်ပြာအတွက် အထူးတလည် ရောက်လာခဲ့ခြင်းပင်။ သို့သော် ၎င်းကို သူ့သက်စောင့် ဂူပိုးကောင် အဖြစ် အသုံးပြုသင့် မသင့် မသေချာသေးပေ။</p> <p>စုန်းမျိုးနွယ်က ကောင်းကင်မျက်လုံး လိပ်ပြာကို သက်စောင့် ဂူပိုးကောင် အတွက် အနည်းဆုံး သင့်လျော်သော ရွေးချယ်မှုများထဲမှ တစ်ခုဟု သတ်မှတ်ထားသည်။ ယူလင်းဂိုဏ်း အတွင်း၌လည်း ဤလိပ်ပြာနှင့် ပတ်သက်သော မှတ်တမ်းများမှာ မပြည့်စုံဘဲ ပျက်စီးနေသော ရှေးဟောင်း စာလိပ်တစ်ခုအပေါ် အခြေခံထားခြင်း ဖြစ်သည်။</p> <p>ထိုမှတ်တမ်းများ အရ ကောင်းကင်မျက်လုံး လိပ်ပြာသည် အရွယ်အစား အားဖြင့် သာမန် လိပ်ပြာတစ်ကောင်နှင့် တူညီသည်။ ၎င်း၏ အတောင်ပံများမှာ ပေါ့ပါးပြီး ပုံသဏ္ဍာန်မှာ ကျက်သရေ ရှိသည်။ အထင်ရှားဆုံး အင်္ဂါရပ်မှာ ၎င်းအတောင်ပံများ၏ ခမ်းနားထည်ဝါမှုပင်။</p> <p>နေရောင်ခြည်အောက်တွင် ၎င်း အတောင်ပံများက မှိန်ဖျော့ဖျော့ ကောင်းကင်ပြာရောင်ကို ပြသသည်။ ပျံသန်းနေစဉ် ပြာလဲ့သော ပင်လယ်ပြင်ကို ဖြတ်သန်းသွားသော လှိုင်းလုံးများကဲ့သို့ ကြည့်ရှုရပြီး တစ်ခါတစ်ရံ အတောင်ပံများက သက်တံအလား တောက်ပသော အရောင်အသွေးများဖြင့် လက်လက်ထနေတတ်သည်။</p> <p>အတောင်ပံများ အပြည့်အဝ ဖြန့်လိုက်လျှင် လေထဲ ကခုန်ပျံသန်းနေစဉ် လှိုင်းလုံးများနှင့် သက်တံများ ဝန်းရံထားသကဲ့သို့ ထင်မှတ်ရပြီး ဆန်းကြယ်သော အလှတရား တစ်ခုကို ပိုင်ဆိုင်ထားသည်။</p> <p>၎င်း အတောင်ပံများပေါ်တွင် မျက်လုံးများနှင့် တူသော အကွက်များ ပါရှိသည်။</p> <p>ထို့ကြောင့် ကောင်းကင်မျက်လုံး လိပ်ပြာဟု အမည်တွင်ခြင်း ဖြစ်သည်။</p> <p>အမှန်တကယ်တွင် မျက်လုံးပုံစံ အကွက်များမှာ အလှဆင်ရုံ သက်သက် မဟုတ်ပေ။ လိပ်ပြာက တတိယအကြိမ် အသွင်ပြောင်းလဲမှု ပြီးဆုံးပြီးနောက် ထိုအကွက်များမှာ အစစ်အမှန် ကောင်းကင်မျက်လုံးများ ဖြစ်လာလိမ့်မည်။ ဤသည်မှာ ၎င်း၏ မွေးရာပါ စွမ်းရည် ရင်းမြစ်ပင်။</p> <p>ဒုတိယအကြိမ် အသွင်ပြောင်းလဲချိန်တွင်ပင် ကောင်းကင်မျက်လုံး လိပ်ပြာ၌ ဖုံးကွယ်ခြင်းနှင့် ပုံသဏ္ဍာန် ပြောင်းလဲခြင်း စွမ်းရည်များ ပိုင်ဆိုင်ထားပြီး ဖြစ်သည်။</p> <p>သာမန် လိပ်ပြာတစ်ကောင် အဖြစ် ရုပ်ဖျက်ထားလျှင် မည်သည့် အားနည်းချက်မျှ မပြသပေ။ ပုန်းကွယ်လိုက်သည်နှင့် ရွှေအမြူတေ အဆင့် ကျင့်ကြံသူ တစ်ဦး၏ စိတ်စွမ်းအင်ကိုပင် ရှောင်တိမ်းနိုင်သည် ဆိုကြသည်။</p> <p>သို့သော် ထိုမျှ အားကောင်းသော ရှင်သန်ခြင်း စွမ်းရည်များက ထိုရည်ရွယ်ချက် တစ်ခုတည်း အတွက်သာ အသုံးဝင်သည်... ရှင်သန်ခြင်း။</p> <p>ထို့အပြင် ကောင်းကင်မျက်လုံး လိပ်ပြာတွင် အခြား အထူးစွမ်းအားများ မရှိပေ။ သာမန် လိပ်ပြာတစ်ကောင်ကဲ့သို့ နုနယ်သည်။ လေပြင်း တစ်ချက် တိုက်ခတ်ခြင်းကပင် သေစေနိုင်သည်။ ငယ်ရွယ်စဉ် သေဆုံးရန် လွယ်ကူလှ၏။</p> <p>တောရိုင်းထဲတွင် ရှင်သန်နိုင်စွမ်းမှာ ၎င်း၏ စူးရှသော အန္တရာယ် အာရုံခံနိုင်စွမ်းနှင့် ဖုံးကွယ်ခြင်း၊ ပုံသဏ္ဍာန် ပြောင်းလဲခြင်း ကျွမ်းကျင်မှုများအပေါ် လုံးဝ မှီခိုနေရသည်။</p> <p>အကယ်၍ ကျင့်ကြံသူ တစ်ဦးသာ ကောင်းကင်မျက်လုံး လိပ်ပြာကို သက်စောင့် ဂူပိုးကောင် အဖြစ် ရွေးချယ်ခဲ့လျှင် တတိယအကြိမ် အသွင်ပြောင်းပြီးသည် အထိ တိုက်ပွဲတွင် မည်သည့် အကူအညီမှ ရလိမ့်မည် မဟုတ်ပေ။</p> <p>ထိုအချိန် ရောက်လျှင်ပင် ၎င်း၏ ရုပ်ပိုင်းဆိုင်ရာ အားနည်းချက်မှာ ကြီးကြီးမားမား ပြောင်းလဲသွားခြင်း မရှိပေ။ အတောင်ပံများပေါ်ရှိ ကောင်းကင်မျက်လုံးများကသာ ထူးခြားဆန်းပြား စွမ်းရည်များကို စတင် ထုတ်ဖော်လာလိမ့်မည်။</p> <p>ဤစွမ်းအားများ၏ တိကျသော သဘောသဘာဝမှာ ရှင်းလင်းမှု မရှိပေ။ ယူလင်းဂိုဏ်း၏ မှတ်တမ်းများတွင် ထိုကဲ့သို့ စွမ်းရည်တစ်ခုမှာ ပုံရိပ်ယောင်များနှင့် အတားအဆီးများကို ဖောက်ထွင်းမြင်နိုင်ပြီး အမြင်ပိုင်းဆိုင်ရာ အနှောင့်အယှက်များကြောင့် ထိခိုက်မှု မရှိခြင်း ဖြစ်ကြောင်းသာ ဖော်ပြထားသည်။</p> <p>၎င်း၏ စွမ်းအားနှင့် ပတ်သက်၍ အသေးစိတ် ရှင်းပြချက် မရှိပေ။</p> <p>သေချာသည်မှာ ကောင်းကင်မျက်လုံး လိပ်ပြာက အနည်းဆုံး စတုတ္ထအကြိမ် အသွင်ပြောင်းလဲမှု အထိ ရောက်နိုင်သည့် အလားအလာ ရှိသော်လည်း ထိုအလွန် မှတ်တမ်းများမှာမူ ပို၍ပင် ဝေဝါးနေသည်။ လိပ်ပြာ၏ ကောင်းကင်မျက်လုံးများ ဆက်လက် တိုးတက်ပြောင်းလဲနေမည်ဟု ဖော်ပြထားသည်။</p> <p>ဤသည်မှာ ချင်စန်း တွန့်ဆုတ်ရခြင်း၏ အရင်းအမြစ်ပင်။</p> <p>သူက သက်စောင့် ဂူပိုးကောင်ကို အကြောင်းရင်း နှစ်ချက်ဖြင့် မွေးမြူခြင်း ဖြစ်သည်။ ပထမမှာ သူ့ခန္ဓာကိုယ် အတွင်းရှိ စည်းတံဆိပ်အပိုင်းအစများကို ကိုင်တွယ်ဖြေရှင်းရန်။ ဒုတိယမှာ ဝိညာဉ်သန္ဓေသား အဆင့်သို့ ထိုးဖောက် ဝင်ရောက်ရာတွင် ကူညီပေးနိုင်မည့် အဖော်မွန် တစ်ကောင် ရရှိရန်။</p> <p>သူ့တွင် သက်စောင့် ဝိညာဉ်ဓား တစ်လက် ပိုင်ဆိုင်ထားပြီး ဖြစ်သဖြင့် ပိုးကောင် ရွေးချယ်ရာတွင် တိုက်ခိုက်ရေး စွမ်းရည်မှာ အရေးအကြီးဆုံး စံနှုန်း မဟုတ်ပေ။</p> <p>သို့တိုင် အလွန်အမင်း အားနည်း၍ မဖြစ်ပေ။ အကယ်၍ ပိုးကောင်က မည်သည့် အထောက်အပံ့မှ မပေးဘဲ မွေးမြူရန် ကြီးမားသော ကြိုးပမ်းအားထုတ်မှုနှင့် အရင်းအမြစ်များ လိုအပ်နေပါက အချိန်နှင့် အလားအလာကို ဖြုန်းတီးရာ ရောက်ပေလိမ့်မည်။</p> <p>ထိုအချက်က ကောင်းကင်မျက်လုံး လိပ်ပြာနှင့် ပတ်သက်၍ အဓိက ပြဿနာ ဖြစ်နေသည်။ ၎င်း၏ ခန္ဓာကိုယ်မှာ နုနယ်ပြီး ဆည်းဆာကြမ်းပိုးနှင့် မတူဘဲ တိုက်ပွဲတွင် မည်သည့် အထောက်အပံ့မှ မပေးပေ။ လိပ်ပြာ၏ ထူးခြားဆန်းပြား စွမ်းရည်များ မည်မျှ အစွမ်းထက်မည်ကို သိရှိရန်လည်း ချင်စန်း၌ နည်းလမ်း မရှိချေ။ တတိယအကြိမ် အသွင်ပြောင်းသည်အထိ စောင့်ဆိုင်းရပေဦးမည်။</p> <p>အကယ်၍ ၎င်း စွမ်းအားမှာ သာမန် မျက်လုံးအခြေခံ တာအိုနည်းစနစ်များနှင့် တူညီနေပါက ဆုံးဖြတ်ချက်အတွက် နောင်တရရန်မှတပါး ရွေးချယ်စရာ ရှိမည် မဟုတ်ပေ။</p> <p>ထူးခြားဆန်းပြား ပိုးမွှားမှတ်တမ်းတွင် ပါဝင်သော အခြား ပိုးမွှားများကဲ့သို့ပင် ကောင်းကင်မျက်လုံး လိပ်ပြာကို မွေးမြူပျိုးထောင်ရန် အလွန် ခက်ခဲသည်။ ကြီးထွားမှုနှုန်း မြန်ဆန်စေရန် အထူးနည်းလမ်းများ အသုံးပြု၍ ကျွေးမွေးရမည် ဖြစ်ပြီး ကြီးမားသော အရင်းအမြစ် ပမာဏ လိုအပ်ပေလိမ့်မည်။ သူကိုယ်တိုင် ရှာဖွေ ပြင်ဆင်ရပေမည်။</p> <p>ဤအချက်များ ရှိနေလင့်ကစား ကောင်းကျိုးနှင့် ဆိုးကျိုးများကို ချိန်ဆပြီးနောက် ချင်စန်းက ကောင်းကင်မျက်လုံး လိပ်ပြာကို သူ့ရွေးချယ်စရာများထဲမှ တစ်ခု အဖြစ် ထည့်သွင်းရန် ဆုံးဖြတ်လိုက်သည်။</p> <p>ထူးခြားဆန်းပြား ပိုးမွှားမှတ်တမ်းသို့ ဝင်ရောက်နိုင်သော မည်သည့် ပိုးကောင်မဆို ရှင်းလင်းသော အလားအလာ ရှိစမြဲပင်။</p> <p>မှတ်တမ်းကောင်းကောင်း ရှိသော ထူးခြားဆန်းပြား ပိုးမွှားများမှာ များသောအားဖြင့် ပိုကြီးမားသော အလားအလာ ရှိကြပြီး အသွင်ပြောင်းလဲမှု နှေးကွေးသော်လည်း အပြန်အလှန် အားဖြင့် ကြောက်မက်ဖွယ် မွေးရာပါ စွမ်းရည်များကို တိုးတက်စေကြသည်။ ကောင်းကင်မျက်လုံး လိပ်ပြာမှာလည်း သိပ်နောက်ကျ ကျန်ရစ်ခဲ့မည် မဟုတ်သဖြင့် စွန့်စားရကျိုး နပ်ပေသည်။</p> <p>အကယ်၍ ၎င်း၏ ပုံရိပ်ယောင်များကို ဖောက်ထွင်းမြင်နိုင်စွမ်းမှာ လုံလောက်အောင် အားကောင်းပါက အခြေအနေများစွာတွင် အလွန် တန်ဖိုးရှိပေလိမ့်မည်။ အထူးသဖြင့် လျှို့ဝှက် သို့မဟုတ် ဆန်းကြယ်သော နေရာများကို စူးစမ်းရှာဖွေရာတွင်ပင်။ ထို့အပြင် ဤသည်မှာ လိပ်ပြာ၏ တစ်ခုတည်းသော စွမ်းရည် ဖြစ်ချင်မှ ဖြစ်မည်။</p> <p>အကယ်၍ ပိုကောင်းသော ဂူပိုးကောင် ရှာမတွေ့ပါက ချင်စန်း အနေဖြင့် ကောင်းကင်မျက်လုံး လိပ်ပြာကို ရွေးချယ်ယုံသာ။</p> <p>တကယ်တော့... အဲ့ဒါက ဖမ်းမိမှ ပြောလို့ရမယ့် ကိစ္စပါ...</p> <p>နှစ်ရက် အကြာတွင် ချင်စန်းက လိပ်ပြာချိုင့်ဝှမ်း တည်ရှိရာ တောင်တန်းသို့ ရောက်ရှိလာ၏။ ချိုင့်ဝှမ်း အနီးသို့ ရောက်သောအခါ သူ့မျက်မှောင် ရုတ်တရက် ကြုတ်သွားသည်။ တောင်ထိပ်တစ်ခုပေါ် ဆင်းသက်ပြီး ခေါင်းငုံ့ကာ ခါးရှိ ပိုးကောင်ခြင်းတောင်းကို လှမ်းကြည့်လိုက်သည်။</p> <p>ခြင်းတောင်း အတွင်းမှ တိုးညှင်းသော်လည်း စူးရှသော တရှဲရှဲ မြည်သံ ထွက်ပေါ်နေဆဲ။</p> <p>ဖက်တီးပိုးကောင်က ခြင်းတောင်းကို ကိုက်ခဲနေပြန်ပြီ။</p> <p>ချင်စန်း ခေါင်းကိုက်လာသလို ခံစားလိုက်ရသည်။ လွန်ခဲ့သော နှစ်ရက် အတွင်း ဖက်တီးပိုးကောင်က စားလိုက် အိပ်လိုက်မှလွဲ၍ ဘာမှ မလုပ်ပေ။ နိုးလာပြီး အစားအစာ မရှိသည်ကို တွေ့တိုင်း သူ့ထံမှ ပိုတောင်းဆိုရန် ခြင်းတောင်းကို မရပ်မနား စတင် ကိုက်ခဲတတ်သည်။</p> <p>အဆိုးရွားဆုံး အပိုင်းမှာ ကြက်သွေးရောင် မီးရွှေစင်မှလွဲ၍ အခြား မည်သည်မှ မစားခြင်းပင်။</p> <p>ချင်စန်းက ဝိညာဉ်ဆေးလုံး အမျိုးမျိုး၊ ဆေးရည်များနှင့် အဆိပ်များပင် ကျွေးမွေးရန် ကြိုးစားခဲ့သော်လည်း ဖက်တီးပိုးကောင်ကမူ လုံးဝ လျစ်လျူရှုထားခဲ့သည်။ တစ်ချက်လေးပင် လှည့်မကြည့်ပေ။ သူ့ကမ်းလှမ်းမှုများကို စော်ကားခံရသကဲ့သို့ သူ့အား တံတွေးနှင့် ထွေးကာ မျက်စောင်းပင် ထိုးလိုက်သေး၏။</p> <p>အကယ်၍ သူ့မျက်လုံးများ မစူးရှပါက ၎င်းတွင် မျက်လုံး ပါသည်ကိုပင် သတိထားမိလိုက်မည် မဟုတ်ပေ။</p> <p>ဤကဲ့သို့ ဝိညာဉ်ပိုးကောင်မျိုးကို သက်စောင့် ဂူပိုးကောင် အဖြစ် အသုံးပြုရန် ချင်စန်း ထည့်သွင်း မစဉ်းစားရဲပေ။ မွေးမြူရန် မဖြစ်နိုင်သလောက်ပင်။</p> <p>သို့သော် ဤသတ္တဝါမှာ လုံးဝ မိုက်မဲနေခြင်းတော့ မဟုတ်။ သူ တစ်ယောက်တည်းသာ ကြက်သွေးရောင် မီးရွှေစင်ကို သယ်ဆောင်ထားကြောင်း သိနေပုံရသည်။ မည်မျှပင် လွှင့်ပစ်ရန် ကြိုးစားပါစေ ခေါင်းမာစွာဖြင့် အကြိမ်တိုင်း တွားသွား ပြန်ရောက်လာတတ်သည်။</p> <p>တွယ်ကပ်မိသည်နှင့် တပြိုင်နက် ပျော်ရွှင်စွာ ပြန်အိပ်ပျော်သွားပြန်သည်။</p> <p>သို့သော် သူ့အား သခင်အဖြစ် အသိအမှတ် မပြုသေးပေ။</p> <p>ကျင့်ကြံသူ တစ်ဦး အနေဖြင့် ဝိညာဉ်ပိုးကောင် တစ်ကောင်ကို အမိန့်ပေးနိုင်သည့် နည်းလမ်း သုံးခုသာ ရှိသည်။ ပထမမှာ ယူလင်းဂိုဏ်း၏ ပိုးမွှားထိန်းချုပ် နည်းစနစ်များ။ ဒုတိယမှာ စုန်းမျိုးနွယ်၏ သက်စောင့် ဂူပိုးကောင်။ တတိယမှာ အလွန် ရှားပါးသော ဖြစ်ရပ်တစ်ခု ဖြစ်သည့် ဝိညာဉ်ပိုးကောင်က သခင်ကို မိမိသဘောဆန္ဒ အလျောက် အသိအမှတ် ပြုခြင်း ဖြစ်သည်။</p> <p>ဒဏ္ဍာရီများအရ ဝိညာဉ်ပိုးကောင်က နှောင်ကြိုးဖွဲ့ရန် စတင် ဦးဆောင်သောအခါ ကျင့်ကြံသူနှင့် ပိုးကောင်တို့ ထူးကဲသော ဝိညာဉ် ပဲ့တင်ထပ်မှုကို မျှဝေရရှိကြပြီး မမျှော်လင့်ထားသော အကျိုးကျေးဇူးများ ရရှိနိုင်သည်ဟု ဆိုကြသည်။</p> <p>ဤကဲ့သို့ အခွင့်အရေးမျိုးမှာ ကံတရားထက် ကျော်လွန်ပြီး လုံးဝ ကြိုတင်ခန့်မှန်း၍ မရနိုင်ပေ။</p> <p>၎င်းတို့၏ နိမ့်ကျသော ဉာဏ်ရည်ဉာဏ်သွေးကြောင့် ဝိညာဉ်ပိုးကောင်များ ဘာတွေးနေသည်ကို ခန့်မှန်းရန် မဖြစ်နိုင်သလောက်ပင်။</p> <p>အချို့က လူသားများကို ဆွဲဆောင်ရာတွင် အသုံးပြုသော နည်းဗျူဟာများ ဖြစ်သည့် ဟန်ဆောင် ခြုံခိုတိုက်ခိုက်မှု ဖန်တီးပြီး ပိုးကောင်၏ အသက်အား ကယ်တင်ကာ ကရုဏာ ပြသခြင်းမျိုးကိုပင် ကြိုးစားခဲ့ကြသည်။</p> <p>နောက်ဆုံးတွင် လုံးဝ ထိရောက်မှု မရှိကြောင်း သက်သေပြခဲ့၏။ ဝိညာဉ်ပိုးကောင်များက ကျေးဇူးတရားကို ထိုနည်းလမ်းဖြင့် မခံစားတတ်ကြပေ။</p> <p>ချင်စန်းက ဖက်တီးပိုးကောင်ကို နှစ်ရက်တိတိ စိတ်ရှည်လက်ရှည် ကျွေးမွေးခဲ့သည်။ သို့တိုင် သတ္တဝါလေးက ကျေးဇူးတင်ခြင်း မရှိဘဲ အငမ်းမရ စားချင်စိတ်ကိုသာ ပြသနေသည်။ နောက်ဆုံးတွင် သူ သည်းခံနိုင်သလောက် သည်းခံပြီးပြီဟုသာ ဆုံးဖြတ်လိုက်တော့သည်။</p> <p>ယခုက သင်ခန်းစာ ပေးရမည့် အချိန် ရောက်လေပြီ။</p> <p>၎င်း၏ စားချင်စိတ်မှာ မကြီးမားသော်လည်း မပြတ်တမ်း စားသောက်နေသည်။ ထိုပမာဏမှာ တဖြည်းဖြည်း လျင်မြန်စွာ များပြားလာသည်။</p> <p>"ကြက်သွေးရောင် မီးရွှေစင်က အရမ်း တန်ဖိုးကြီးလွန်းတယ်... ငါ့မှာ အသီးတစ်လုံးပဲ ကျန်တော့တာ... ငါ့ရဲ့ သက်စောင့် ဂူပိုးကောင် အသွင်ပြောင်းဖို့အတွက် လိုနေသေးတယ်... ဘယ်လိုလုပ် အသုံးမကျတဲ့ ဖက်တီးပိုးကောင် တစ်ကောင်ကို အစာကျွေးပြီး ဖြုန်းတီးပစ်ရမှာလဲ"</p> <p>အေးစက်စွာ နှာခေါင်းရှုံ့ရင်း ချင်စန်းက ယမမင်းတံခွန်ကို ထုတ်ယူပြီး ကိုးလွှာငရဲ မိစ္ဆာမီးလျှံ တစ်စကို ဆင့်ခေါ်ကာ သေးငယ်သော အပ်တစ်ချောင်း အဖြစ် ပြောင်းလဲလိုက်သည်။ ထို့နောက် ပိုးကောင်ခြင်းတောင်းကို ဖွင့်လိုက်တော့သည်။</p> <p>End</p> <p> </p> <p> </p> <p> </p> <p>***</p> <p> </p>


Save