Book List

<h2 style="text-align: center;">အခန်း (၂၄၁)</h2> <h2 style="text-align: center;">မုန့်မိသားစု ဘိုးဘေးကြီးကို အရင်သတ်ခြင်း</h2> <h2 style="text-align: center;">*</h2> <p> </p> <p><strong>မုန့်မိသားစု ဘိုးဘေးကြီး</strong> သည် <strong>မုန့်ဝမ်</strong> စိတ်ဝင်စားသွားသည်ကို မြင်သောအခါ အခွင့်အရေးကို လက်မလွှတ်ဘဲ အရှိန်မြှင့်၍ ပြောလိုက်တော့သည်။</p> <p>"ဒီ <strong>နက်နဲသော ကောင်းကင်လျှို့ဝှက်ချက် မှန်</strong> ဆိုတာ ငါတို့ဘိုးဘေးတွေဆီကနေ အဆင့်ဆင့် လက်ဆင့်ကမ်းလာခဲ့တဲ့ ရတနာပဲ။</p> <p>ဘိုးဘေးတို့ရဲ့ မှာကြားချက်အရ ဒီပစ္စည်းထဲမှာ ကောင်းကင်နဲ့ မြေကြီးရဲ့ အဆုံးစွန်သော အမှန်တရားတွေ ကိန်းအောင်းနေပြီး အနာဂတ်ကို တွက်ချက်နိုင်သလို ကောင်းကင်လျှို့ဝှက်ချက်တွေကိုလည်း ထိုးဖောက်သိမြင်နိုင်တယ်........ နှမြောစရာကောင်းတာကတော့..."</p> <p>သူသည် စကားကို တမင်တကာ ရပ်လိုက်ပြီး သက်ပြင်းချကာ နောင်တရသည့် အမူအရာကို လုပ်ပြလိုက်သည်။</p> <p>"နှမြောစရာကောင်းတာက ဒီအဘိုးကြီးက ဉာဏ်ထိုင်းလွန်းတယ်။ ဒီရတနာကို လက်ထဲမှာ ကိုင်ထားပေမဲ့ ဘယ်တုန်းကမှ သူ့ရဲ့ နက်နဲတဲ့ လျှို့ဝှက်ချက်တွေကို နားမလည်ခဲ့ဘူး။</p> <p>အဲဒါကြောင့်သာ မဟုတ်ရင် ဒီနေ့ ဒီလိုအခြေအနေအထိ ငါ ဘယ်ရောက်ပါ့မလဲ........"</p> <p>ဘိုးဘေးကြီးသည် ပြောရင်းဖြင့် သူ၏ မျက်ဝန်းထောင့်မှ မျက်ရည်များကို သနားစဖွယ် သုတ်နေကာ ရင်ကွဲမတတ် ခံစားနေရဟန် ဆောင်နေသည်။</p> <p>"အို... ဒါဆို မုန့်မိသားစုရဲ့ ဘိုးဘေးတွေက တကယ်ပဲ ဒီလို နတ်ဘုရားအဆင့် ပစ္စည်းကို ပိုင်ဆိုင်ခဲ့တာလား........"</p> <p>မုန့်ဝမ်က အံ့သြဟန်ဆောင်လိုက်သော်လည်း သူမ၏ စိတ်ထဲတွင်မူ လှောင်ပြောင်နေလေပြီ။ <strong>နှလုံးစားပိုးကောင် </strong> ရှိနေသဖြင့် သူမသည် ဤအဘိုးကြီး၏ စကားများကို လုံးဝ ယုံကြည်မည် မဟုတ်ပေ။</p> <p> အမွေအနှစ်ဆိုသည်နှင့် နက်နဲသော ကောင်းကင်လျှို့ဝှက်ချက် မှန် ဆိုသည်မှာလည်း သူမကို လှည့်စားရန် သူလုပ်ကြံဖန်တီးထားသော လိမ်လည်မှုများသာ ဖြစ်သည်။</p> <p>"လုံးဝ အမှန်ပဲ........"</p> <p>ဘိုးဘေးကြီးသည် သူ၏ အတွေးများကို မုန့်ဝမ်က ခိုးနားထောင်နေသည်ကို မသိသေးဘဲ လက်ကိုမြှောက်ကာ လေးလေးနက်နက် ကျိန်ဆိုလိုက်သည်။</p> <p>"နင် ငါ့အသက်ကို ချမ်းသာပေးမယ်ဆိုရင် ဒီ 'နက်နဲသော ကောင်းကင်လျှို့ဝှက်ချက် မှန်' ကို ပေးအပ်မယ့်အပြင် ငါ့ရဲ့ နှစ်ပေါင်း ရာနဲ့ချီတဲ့ ကျင့်ကြံခြင်း အတွေ့အကြုံတွေကိုလည်း ဘာမှမချန်ဘဲ ပြောပြပေးဖို့ အသင့်ပဲ........</p> <p>နင်က သစ္စာဖောက်တဲ့ အလုပ်တွေ အများကြီး လုပ်ခဲ့ပေမဲ့ နင်က မုန့်မိသားစုရဲ့ <strong>သွေးကြော</strong> ပဲလေ။ ဒီရတနာက တခြားလူတွေလက်ထဲ ရောက်သွားတာထက်စာရင် နင့်ဆီကို ရောက်သွားတာက ပိုကောင်းပါတယ်........”</p> <p>မုန့်ဝမ်က စဉ်းစားဟန်ဆောင်လိုက်ပြီး ခဏအကြာတွင် အသာအယာ ခေါင်းညိတ်လိုက်သည်။</p> <p>"ကောင်းပြီ၊ ငါတို့က သွေးချင်းတူနေတာကို ထောက်ထားပြီး ရှင့်ကို အခွင့်အရေးတစ်ခု ပေးမယ်။ ရှင့်ရဲ့ အဲဒီ 'နက်နဲသော ကောင်းကင်လျှို့ဝှက်ချက် မှန်' ကို သွားကြည့်ကြတာပေါ့။</p> <p>အကယ်၍ အဲဒါက တကယ်ပဲ ရတနာကောင်းတစ်ခု ဖြစ်နေရင် ရှင့်အသက်ကို ချမ်းသာပေးဖို့က မဖြစ်နိုင်တာတော့ မဟုတ်ဘူး........”</p> <p>ဘိုးဘေးကြီးသည် ထိုစကားကို ကြားသောအခါ အလွန်ဝမ်းသာသွားပြီး ကြက်သွန်ဖြူထောင်းသည့်အလား ခေါင်းကို တရစပ် ညိတ်လိုက်တော့သည်။</p> <p>"ကောင်းပြီ၊ ကောင်းပြီ........ နက်နဲသော ကောင်းကင်လျှို့ဝှက်ချက် မှန် ကို မုန့်မိသားစုရဲ့ ဘိုးဘေးသင်္ချိုင်းထဲမှာ ဝှက်ထားတာ။ ဒီအဘိုးကြီး အခုပဲ နင့်ကို ခေါ်သွားပေးမယ်........"</p> <p>ပြောပြောဆိုဆိုနှင့်ပင် ဘိုးဘေးကြီးသည် သူ၏ ပျံသန်းခြင်း အလင်းတန်းကို အသက်သွင်းကာ ရှေ့မှ ဦးဆောင်သွားတော့သည်။</p> <p>လမ်းတစ်လျှောက်တွင်လည်း သူသည် ထိုမှန်၏ အစွမ်းထက်ပုံများကို မုန့်ဝမ်အား မနားတမ်း ရှင်းပြနေကာ ကမ္ဘာပေါ်တွင် ရှားပါးရတနာတစ်ခု ဖြစ်သည့်အလား ပြောနေလေသည်။</p> <p>မုန့်ဝမ်က ငြိမ်သက်စွာ နားထောင်ရင်း တစ်ခါတစ်ရံမှသာ မေးခွန်းအချို့ မေးလိုက်ရာ အလွန်စိတ်ဝင်စားဟန် ပေါ်နေသည်။</p> <p>ဘိုးဘေးကြီးသည် ပျံသန်းနေရင်း ရုတ်တရက် ရပ်လိုက်သည်။ သူသည် ပတ်ဝန်းကျင်ကို ဝေ့ဝဲကြည့်နေပြီး မျက်နှာမှာ တဖြည်းဖြည်း ဖြူလျော်လာသည်။</p> <p>သူ သတိထားမိသွားသည်ကို မြင်သောအခါ မုန့်ဝမ်သည် ဟန်ဆောင်မနေတော့ပေ။</p> <p>သူမ၏ မျက်လုံးများတွင် အေးစက်သော အလင်းတန်းတစ်ခု လက်ခနဲ ဖြစ်သွားပြီး ဝတ်ရုံလက်စွပ်အတွင်း ဝှက်ထားသော လက်မှာ ရုတ်တရက် ထွက်ပေါ်လာသည်။</p> <p>သူမ၏ လက်ချောင်းငါးချောင်းကို ဖြန့်ကာ ဘိုးဘေးကြီး၏ ဦးခေါင်းကို လှမ်းဖမ်းလိုက်သည်။</p> <p>သူမ၏ လှုပ်ရှားမှုနှင့်အတူ သွေးမြူများမှာ ဒီရေအလား ထွက်ပေါ်လာသည်။</p> <p>ထိုသွေးမြူများသည် ဘိုးဘေးကြီးကို ချက်ချင်းပင် ဝန်းရံလိုက်ပြီး သွေးနီရောင် လှောင်အိမ်ကြီးတစ်ခုသဖွယ် သူ့ကို တင်းကျပ်စွာ ပိတ်လှောင်လိုက်တော့သည်။</p> <p>ဘိုးဘေးကြီး၏ မျက်နှာမှာ သိသိသာသာ ပြောင်းလဲသွားသည်။ သူသည် အသည်းအသန် ရှောင်တိမ်းလိုက်သဖြင့် မုန့်ဝမ်၏ တိုက်ကွက်မှာ သူ၏ ကျောပြင်ပေါ်သို့သာ ကျရောက်သွားသည်။</p> <p>"နင် ဘာလုပ်တာလဲ................ နက်နဲသော ကောင်းကင်လျှို့ဝှက်ချက် မှန် ကို မလိုချင်တော့ဘူးလား................"</p> <p>မုန့်ဝမ်က ပြုံးလိုက်သည်။</p> <p>"ကျွန်မ စဉ်းစားကြည့်လိုက်တယ်။ ဘာပဲဖြစ်ဖြစ် အဲဒါက ဘိုးဘေးတွေရဲ့ ပစ္စည်းပဲလေ၊ ပြီးတော့ သင်္ချိုင်းထဲမှာ ဝှက်ထားတာ။</p> <p>ကျွန်မလို မိုက်မဲတဲ့ မျိုးဆက်သစ်တစ်ယောက်က ဘိုးဘေးတွေရှေ့ကို သွားပြီး သူတို့ကို သွားနှောင့်ယှက်တာမျိုး မလုပ်သင့်ဘူး မဟုတ်လား........"</p> <p>ဘိုးဘေးကြီး၏ မျက်နှာမှာ ချက်ချင်းပင် မည်းမှောင်သွားသည်။</p> <p>လမ်းပြနေစဉ်အတွင်း သူသည် မုန့်ဝမ်ကို အမြဲတစေ သတိထားနေပြီး သူမ၏ ချောင်းမြောင်းတိုက်ခိုက်မှုကိုလည်း ကာကွယ်ရန် ပြင်ဆင်ထားခဲ့သည်။</p> <p>သို့သော် သူမ၏ အရှိန်မှာ မြန်လွန်းလှသည်။ သူ မတုံ့ပြန်နိုင်မီမှာပင် တိုက်ခိုက်ခြင်းကို ခံလိုက်ရခြင်း ဖြစ်သည်။</p> <p>ဘိုးဘေးကြီးသည် အသက်ကို ပြင်းပြင်းရှူကာ သူ၏ ကိုယ်တွင်းမှ ဝိညာဉ်စွမ်းအင်များကို အတင်းအကျပ် တွန်းထုတ်ပြီး သွေးမြူလှောင်အိမ်မှ လွတ်မြောက်ရန် ကြိုးစားတော့သည်။</p> <p>သို့သော် ပါးလွှာပုံရသော ထိုသွေးမြူများအတွင်း၌ အဆုံးမရှိသော စွမ်းအားများ ရှိနေပုံရသည်။ သူ၏ ရုန်းကန်မှုတိုင်းမှာ ခိုင်ခံ့လှသော နံရံကြီးကို တိုက်မိနေသကဲ့သို့ အချည်းနှီးသာ ဖြစ်နေသည်။</p> <p>ဘိုးဘေးကြီး မလွတ်မြောက်နိုင်မီမှာပင် မုန့်ဝမ်သည် <strong>သွေးမိစ္ဆာကောင်းကင်ဘုံကျင့်စဉ် </strong>ကို အသုံးပြုကာ ဘိုးဘေးကြီး၏ အသားနှင့် သွေးများကို တဖြည်းဖြည်း စုပ်ယူပြီး သန့်စင်လိုက်တော့သည်။</p> <p>"နင်... နင် ငါ့ကို တကယ်ပဲ သန့်စင်ဖို့ ကြိုးစားနေတာလား........"</p> <p>ဘိုးဘေးကြီးမှာ ထိတ်လန့်သလို ဒေါသလည်း ထွက်နေကာ သူ၏ မျက်လုံးများထဲတွင် မုန်းတီးမှုနှင့် ကြောက်ရွံ့မှုများ ပြည့်နှက်နေပြီး အော်ဟစ်နေတော့သည်။</p> <p>"ငါက နင့်ရဲ့ ဘိုးဘေးပဲ........ နင် ငါ့ကို သတ်ရဲရင် ငါသေသွားတဲ့အခါ ကလဲ့စားချေတဲ့ ဝိညာဉ်ဖြစ်ပြီး နင့်အသက်ကို ပြန်တောင်းမယ်........"</p> <p>"ရှင် အသက်ရှင်နေတုန်းကတောင် ကျွန်မက မကြောက်တာ၊ သေသွားလို့ ကလဲ့စားချေတဲ့ ဝိညာဉ်ဖြစ်မှာကို ဘာလို့ ကြောက်နေရမှာလဲ........"</p> <p>မုန့်ဝမ်က ရယ်စရာ ဇာတ်လမ်းတစ်ခုကို ကြားလိုက်ရသည့်အလား ရယ်မောလိုက်သည်။ သူမသည် ခေါင်းကို အသာအယာ ခါယမ်းလိုက်ပြီး သန့်စင်ခြင်း ဖြစ်စဉ်ကို မြှင့်တင်လိုက်သည်။</p> <p>ဘိုးဘေးကြီး၏ အော်ဟစ်သံများမှာ တဖြည်းဖြည်း အားနည်းသွားပြီး သူ၏ ခန္ဓာကိုယ်မှာ ရေဓာတ်အားလုံး အစုပ်ခံထားရသော အလောင်းခြောက်ကြီးအလား ပိန်ချုံးသွားသည်။</p> <p>သူသည် နောက်ဆုံးလက်ကျန် အင်အားကို သုံး၍ ခေါင်းကိုမော့ကာ မုန့်ဝမ်ကို စိုက်ကြည့်ပြီး အက်ကွဲသော အသံဖြင့် ကျိန်ဆဲလိုက်သည်။</p> <p>"မုန့်ဝမ်........ နင်က နတ်ဆိုးမပဲ........ နင် ကောင်းကောင်း သေရမှာ မဟုတ်ဘူး........ နင် ဝဋ်လိုက်လိမ့်မယ်........ နင် သေချာပေါက် ဝဋ်လည်လိမ့်မယ်........"</p> <p>မုန့်ဝမ်က လှောင်ပြောင်သော အပြုံးဖြင့် ကျင့်စဉ်ကို ဆက်လက် အသက်သွင်းကာ ဘိုးဘေးကြီး၏ ခန္ဓာကိုယ်အတွင်းရှိ နောက်ဆုံးလက်ကျန် <strong>နှလုံးသွေး</strong>များကို ဝါးမြိုပစ်လိုက်သည်။</p> <p>"ဝဋ်လည်မယ်........ ဟားဟား... ကိုယ့်ရဲ့ အစွမ်းကသာ လုံလောက်နေရင် ဝဋ်လိုက်မှာကို ဘာလို့ ကြောက်နေရမှာလဲ........"</p> <p>သူမသည် မျက်လုံးများကို ဖြည်းဖြည်းချင်း မှိတ်ကာ သူမ၏ ကိုယ်တွင်းမှ အစွမ်းကို အာရုံခံကြည့်လိုက်ပြီးနောက် အားမလိုအားမရ ဖြစ်ဟန်ဖြင့် မျက်မှောင်ကြုတ်လိုက်သည်။</p> <p>ဘိုးဘေးကြီးမှာ အိုမင်းပြီး အားနည်းနေသဖြင့် သူ၏ ခန္ဓာကိုယ်ထဲတွင် နှလုံးသွေး အများကြီး မရှိတော့ပေ။</p> <p>သူ့ကို သတ်လိုက်သဖြင့် ရရှိသော အစွမ်းမှာ သွေးလွတ်မြောက်ခြင်းကျင့်စဉ်ကို သုံးလိုက်ရသော စွမ်းအင်နှင့် နှုတ်လိုက်လျှင် အနည်းငယ်သာ အကျိုးရှိပေသည်။</p> <p>မူလက သူမ ခန့်မှန်းထားသည်မှာ မုန့်မိသားစုဝင်များကို <strong>သွေးယဇ် </strong>ပူဇော်ပြီးနောက် သူမသည် <strong>ရွှေအမြုတေအဆင့်</strong> သို့ တက်လှမ်းနိုင်လိမ့်မည်ဟု ဖြစ်သည်။</p> <p>ယခုကြည့်ရသည်မှာ သူမအနေဖြင့် ရွှေအမြုတေအဆင့် ကျင့်ကြံသူ အနည်းငယ်ကို ထပ်သတ်ရန် လိုအပ်ပုံရသည်။</p> <p>မုန့်ဝမ်သည် အနီးအနားတွင် <strong>ရွှေတိမ်တိုက်ဂိုဏ်း</strong> ၏ လျှို့ဝှက်စခန်းတစ်ခု ရှိနေသည်ကို သတိရသွားသည်။</p> <p>ရွှေတိမ်တိုက်ဂိုဏ်းက သူမကို သတ်ချင်နေမှတော့ သူမကလည်း သူတို့ရဲ့ လျှို့ဝှက်စခန်းကို အမြစ်ကနေ လှန်ပစ်ရုံပင် ဖြစ်သည်။</p> <p>ဘိုးဘေးကြီး ပြောခဲ့သော မုန့်မိသားစု ဘိုးဘေးသင်္ချိုင်းနှင့် ပတ်သက်၍မူ... နှလုံးစားပိုးကောင်မှ တစ်ဆင့် သိရှိရသော အတွေးများအရ သင်္ချိုင်းထဲတွင် ပစ္စည်းအချို့ ရှိနေသည်မှာ အမှန်ပင်။</p> <p>သို့သော် ၎င်းမှာ 'နက်နဲသော ကောင်းကင်လျှို့ဝှက်ချက် မှန်' မဟုတ်ဘဲ ဘိုးဘေးကြီး စုဆောင်းထားသော မိသားစု ပိုင်ဆိုင်မှုအချို့သာ ဖြစ်သည်။</p> <p>သို့သော်လည်း ဘိုးဘေးသင်္ချိုင်းမှာ ချင်းရှာစီရင်စုတွင် တည်ရှိသည်။ သူမ မုန့်မိသားစုကို ဖျက်ဆီးခဲ့ကတည်းက ချင်းရှာစီရင်စု၏ လုံခြုံရေးမှာ ပိုမို တင်းကျပ်လာသဖြင့် ယခုသွားရန်မှာ အချိန်ကောင်း မဟုတ်ပေ။</p> <p>၎င်းကို ခေတ္တဘေးဖယ်ထားပြီး နောက်မှ အားလပ်ချိန်တွင် ကိုင်တွယ်ခြင်းက ပိုကောင်းပေလိမ့်မည်။</p> <p>မုန့်ဝမ်သည် ရွှေတိမ်တိုက်ဂိုဏ်း၏ လျှို့ဝှက်စခန်းသို့ တိုက်ရိုက်မသွားဘဲ သူမနှင့် အနီးဆုံးနေရာတွင် ရှိသော <strong>ရွှမ်ယင်ဂိုဏ်း</strong> ၏ လျှို့ဝှက်အခြေစိုက်စခန်းတစ်ခုသို့ ဦးတည်လိုက်သည်။</p> <p>ဤအခြေစိုက်စခန်းမှာ အလွန် လျှို့ဝှက်လှပြီး အမာခံတပည့် အနည်းငယ်သာ သိရှိသော နေရာဖြစ်သည်။</p> <p>ထူးခြားမှုမရှိသော တောင်ကြားတစ်ခုအတွင်း၌ တံခါးသံ တဂိဂိ မြည်လာပြီးနောက် ကျောအနည်းငယ် ကုန်းနေသော ပုံရိပ်တစ်ခု အခန်းထဲမှ ထွက်လာသည်။</p> <p>ဤသူမှာ ဤလျှို့ဝှက်စခန်းကို တာဝန်ခံထားသော ရွှေအမြုတေအဆင့်ရှိ <strong>ဟဲရှန်းကျီ </strong>ဖြစ်သည်။</p> <p>လာသူမှာ မည်သူဖြစ်ကြောင်း မြင်လိုက်ရသောအခါ သူ၏ မျက်လုံးထဲတွင် အံ့သြရိပ်များ လက်ခနဲ ဖြစ်သွားပြီးနောက် ချက်ချင်းပင် ဖော်လွေသော အပြုံးဖြင့် အရိုအသေပေးကာ ပြောလိုက်သည်။</p> <p>"နတ်သမီး... ဒီကို ဘယ်လိုဖြစ်ပြီး ရောက်လာတာလဲ........"</p> <p>မုန့်ဝမ်သည် အခန်းထဲသို့ ပေါ့ပေါ့ပါးပါးပင် လျှောက်လှမ်းဝင်လာပြီး ရိုးရှင်းသော အပြင်အဆင်များကို တစ်ချက်ကြည့်ကာ ဖိတ်ခေါ်ခြင်း မခံရဘဲ အဓိက ထိုင်ခုံတွင် ထိုင်လိုက်သည်။</p> <p>"ဒီအနီးအနားမှာ ရွှေတိမ်တိုက်ဂိုဏ်းရဲ့ လျှို့ဝှက်စခန်းတစ်ခု ရှိတယ်။ အဲဒီအကြောင်းနဲ့ ပတ်သက်တဲ့ အချက်အလက် အားလုံး ငါ့ကို လိုချင်တယ်........”</p> <p>ဟဲရှန်းကျီ၏ နှလုံးသားမှာ တင်းကျပ်သွားသည်။</p> <p><strong>နတ်သမီး မုန့်</strong> က ရွှေတိမ်တိုက်ဂိုဏ်းရဲ့ လျှို့ဝှက်စခန်းကို တိုက်ခိုက်ဖို့ ပြင်ဆင်နေသည်လော.........။</p> <p>သူသည် စိတ်ကို တည်ငြိမ်အောင် ထားပြီး သူ၏ ခါးမှ <strong>ကျောက်စိမ်းပြား </strong>တစ်ခုကို အမြန်ထုတ်ယူကာ မုန့်ဝမ်ထံသို့ လက်နှစ်ဖက်ဖြင့် ဆက်သလိုက်သည်။</p> <p>"နတ်သမီး... ဒီထဲမှာ ရွှေတိမ်တိုက်ဂိုဏ်းရဲ့ လျှို့ဝှက်စခန်းအကြောင်း အသေးစိတ် အချက်အလက်တွေ ပါဝင်ပါတယ်။</p> <p>အဲဒီမှာရှိတဲ့ ကျင့်ကြံသူတွေရဲ့ အဆင့်တွေ၊ အရေအတွက်နဲ့ သူတို့ရဲ့ နေ့စဉ် ကင်းလှည့်တဲ့ လမ်းကြောင်းတွေ အကုန်ပါပါတယ်........”</p> <p>မုန့်ဝမ်သည် ကျောက်စိမ်းပြားကို ယူလိုက်ပြီး သူမ၏ ဝိညာဉ်အာရုံဖြင့် ကြည့်လိုက်သည်။</p> <p>ကျောက်စိမ်းပြားတွင် မှတ်တမ်းတင်ထားသော အချက်အလက်များမှာ အမှန်တကယ်ပင် အလွန်အသေးစိတ်လှသည်။</p> <p>"ကျွန်တော်တို့ လွန်ခဲ့တဲ့ ခြောက်လအတွင်း စုံစမ်းထားချက်အရ အဲဒီလျှို့ဝှက်စခန်းမှာ ရွှေအမြုတေအဆင့် ကျင့်ကြံသူ သုံးယောက် အခြေစိုက်နေပါတယ်........”</p> <p>ဟဲရှန်းကျီသည် မုန့်ဝမ်၏ မျက်နှာအမူအရာကို အကဲခတ်ရင်း ဆက်ပြောလိုက်သည်။</p> <p> </p> <p style="text-align: center;">***</p> <p> </p>


Save