Book List

<h2 style="text-align: center;">အခန်း(၁၁၉)</h2> <h2 style="text-align: center;">*</h2> <p> </p> <p> </p> <p> </p> <p> </p> <p>“ ထန် ”</p> <p>ရွှေရောင်ဓားပျံသည် အခြေတည်နယ်ပယ် ကျင့်ကြံသူတစ်ယောက်၏ အစွမ်းကုန်တိုက်ခိုက်မှု ဖြစ်သည်။ ထိုထဲမှာ ပမာဏများပြားသော ဝိညာဉ်စွမ်းအား ကိန်းအောင်းနေသည့်အပြင် ဓားပျံကိုယ်၌က သတ္ထုဒြပ်စင် ဖြစ်သည်။ ယင်းတို့နှစ်ခု ပေါင်းစပ်သွားသည့်အခါ ဓားပျံက ကြောက်မက်ဖွယ်ကောင်းသော အဖျက်စွမ်းအားကို ထုတ်လွှတ်လိုက်သည်။</p> <p>ထိုသို့ဓားပျံ၏ အရှေ့တွင် အလွန်ထူထဲသော သတ္ထုနံရံသည်ပင် အပေါက်ဖြစ်အောင် ထိုးဖောက်ခံရလိမ့်မည်။</p> <p>သို့သော်လည်း ဓားပျံက မရဏကျီးကန်းဘုရင်၏ အတောင်ပံများကို ထိမှန်သွားသည့်အခါ ကျယ်လောင်သော သတ္ထုမြည်သံ ထွက်ပေါ်လာသည်။ အနက်ရောင်အလင်းသည် အတောင်ပံများထံမှ ပေါက်ကွဲထွက်လာပြီး မီးခိုးရောင်အလင်းလွှာက သူ၏ ခန္ဓာကိုယ်ထဲမှ ပေါ်ထွက်လာသည်။</p> <p>“ ဝှစ် ”</p> <p>မရဏကျီးကန်းဘုရင်၏ မျက်လုံးထဲမှ အလင်းရောင်က အထွတ်အထိပ်သို့ ရောက်ရှိသွားသည်။ အခြေတည်နယ်ပယ် ကျင့်ကြံသူကို သူစိုက်ကြည့်လိုက်သည်နှင့်ချက်ချင်း သေခြင်းစွမ်းအားက သူ့မျက်လုံးထဲမှ ပျံသန်းထွက်သွားသည်။ သေခြင်းစွမ်းအားသည် အရောင်မဲ့ပြီး အသံမဲ့သည်။ သာမန်မျက်စိဖြင့် ယင်းကို မမြင်နိုင်ပေ။</p> <p>“ အား ”</p> <p>သို့သော်လည်း အခြေတည်နယ်ပယ် ကျင့်ကြံသူက ချောက်ချားဖွယ်ကောင်းစွာ အော်ဟစ်လိုက်သည်။ သူ၏ မျက်နှာက လူသေကောင်ပမာ ဖြူဖျော့သွားပြီး သူ့မျက်လုံးထဲမှာ အကြောက်တရားဖြင့် ပြည့်နှက်သွားသည်။ ဖော်မပြနိုင်သော နာကျင်မှုက သူ၏ ခန္ဓာကိုယ်ပေါ်မှာ ထွက်ပေါ်လာသည်။ သူ၏ မျက်နှာက ရှုံ့မဲ့သွားသည်။ မကြာမီ သူ၏ မျက်လုံးထဲမှ အလင်းရောင်က တဖြည်းဖြည်း မှေးမှိန်သွားသည်။</p> <p>မရဏကျီးကန်းဘုရင်၏ စိုက်ကြည့်ခံလိုက်ရသည့်အခါ ပြင်းထန်သော နာကျင်မှုက သူ၏ ခန္ဓာကိုယ်အနှံ့မှ ထွက်ပေါ်လာကြောင်း သူခံစားမိသွားသည်။ အမှန်မှာ ထိုနာကျင်မှုက သူ၏ ခန္ဓာကိုယ်မှ ထွက်ပေါ်နေခြင်း မဟုတ်ပေ။ ယင်းအစား သူ၏ စိတ်ဝိညာဉ်ထံမှ ဖြစ်သည်။</p> <p>အခြေတည်နယ်ပယ် ကျင့်ကြံသူတစ်ယောက်၏ စိတ်ဝိညာဉ်သည်ပင် သေမင်းနတ်ဘုရား၏ အကြည့်ကို မတောင့်ခံနိုင်ပေ။ သူ၏ စိတ်ဝိညာဉ်က ချက်ချင်း ညှိုးနွမ်းသွားသည်။</p> <p>“ မရဏကျီးကန်းဘုရင်ရဲ့ သေမင်းနတ်ဘုရားအကြည့်က အရမ်းအားကောင်းတယ်… အဲ့ဒါက အခြေတည်နယ်ပယ် ကျင့်ကြံသူတွေကို တိုက်ခိုက်တဲ့နေရာမှာ အကောင်းဆုံး လူသတ်လက်နက်လို့တောင် ပြောကြတယ်… အမြူတေဖွဲ့စည်းခြင်းနယ်ပယ် ကျင့်ကြံသူတွေတောင် သေမင်းနတ်ဘုရားအကြည့်ရဲ့ ခြိမ်းခြောက်မှုကို ခံစားရလိမ့်မယ်… တကယ်လို့ အလစ်တိုက်ခိုက်မယ်ဆိုရင် သေမင်းနတ်ဘုရားအကြည့်က အမြူတေဖွဲ့စည်းခြင်းနယ်ပယ် ကျင့်ကြံသူတစ်ယောက်ကို ချက်ချင်း သတ်ပစ်နိုင်တယ် ”</p> <p>သေမင်းနတ်ဘုရားအကြည့်အောက်မှာ အခြေတည်နယ်ပယ် ကျင့်ကြံသူတစ်ယောက်၏ စိတ်ဝိညာဉ်က အလွယ်တကူ ဖျက်ဆီးခံလိုက်ရကြောင်း မဒူဆာမြင်သောအခါ သူက ညင်သာစွာ ခေါင်းညိတ်လိုက်သည်။</p> <p>“ အနံ့ဆိုးကျီးကန်းမှာ အစွမ်းထက်တဲ့ ဝှက်ဖဲကတ်တချို့ ရှိသားပဲ ”</p> <p>ဇာမဏီငှက်က ပျော်ရွှင်စွာ ပြောသည်။</p> <p>“ ဝုန်း ”</p> <p>ထိုအခိုက်အတန့်မှာ လေထဲ၌ မျောလွင့်နေသော အဖြူရောင်ကျောက်စိမ်းစစ်တုရင်ခုံက ရုတ်တရက် အပြင်းအထန် တုန်ယင်သွားသည်။ စစ်တုရင်ခုံ၏ ဘေးပတ်ဝန်းကျင်တွင် မိုးမြေဝိညာဉ်စွမ်းအားက တအိအိလှုပ်ခတ်သွားသည်။ ကြောက်မက်ဖွယ်ကောင်းသော စွမ်းအင်လှိုင်းဂယက်များက စစ်တုရင်ခုံထံမှ ပေါ်လျှိုးထွက်လာသည်။</p> <p>ဤသည်မှာ ဧရာမသားရဲတစ်ကောင်က စစ်တုရင်ခုံထဲမှ ခုန်ထွက်လာတော့မည့်အလားပင်။</p> <p>“ အမမဒူဆာ ဟိုကို ကြည့်… စစ်တုရင်ခုံက လှုပ်နေတယ်… အကိုသီက အဲ့ဒီလူကို အနိုင်ယူလိုက်ပြီလားမသိဘူး… ”</p> <p>ဇာမဏီငှက်က မျက်လုံးကျယ်ကျယ်ဖွင့်လိုက်ပြီး ကောင်းကင်ပေါ်သို့ မော့ကြည့်လိုက်သည်။</p> <p>မဒူဆာက မည်သည့်စကားမှ မပြောပေ။ သူက တိတ်တဆိတ် ခေါင်းမော့၍ စစ်တုရင်ခုံကို ကြည့်နေသည်။ သူ၏ မျက်လုံးထဲမှာ ထူးဆန်းပြီး ဖော်ပြရခက်သောအကြည့် ထွက်ပေါ်လာသည်။ သို့သော် ထိုအကြည့်က မကြာမီ ပြန်ပျောက်ကွယ်သွားသည်။</p> <p>စစ်တုရင်ခုံသည် အချိန်ကြာလာသည်နှင့်အမျှ ပိုပြီးပြင်းထန်စွာ တုန်ယင်လာသည်။ ကျယ်လောင်သော မြည်သံသည်လည်း စစ်တုရင်ခုံထံမှ အဆက်မပြတ် ထွက်ပေါ်လာသည်။ စစ်တုရင်ခုံ၏ ဘေးပတ်ဝန်းကျင်၌ မိုးမြေဝိညာဉ်စွမ်းအားက တအိအိလှုပ်ခတ်နေသည်။</p> <p>“ ဟွန့်… ဒီဟာက စစ်တုရင်ခုံတစ်ခုပါပဲ… ဒီလောက်လေးနဲ့ ငါသီရှီထျန်ကို ချုပ်နှောင်နိုင်မယ်လား… ဒီနေ့ အဲ့ဒါကို ငါချိုးဖြတ်ပစ်မယ်… ကျားဟိန်းသံအတတ်… ကောင်းကင်တုန်ခါစေမယ့် ဟိန်းသံ… ”</p> <p>သီရှီထျန်၏ ခန္ဓာကိုယ်ပေါ်တွင် သွေးစီးကြောင်းတချို့ ရှိသည်။ သူ၏ ဧရာမခန္ဓာကိုယ်ပေါ်တွင် ဒဏ်ရာဒဏ်ချက်များဖြင့် ပြည့်နှက်နေသည်။ လတ်ဆတ်သော သွေးက ဒဏ်ရာများမှ စီးကျနေသည်။</p> <p>သူ၏ ခန္ဓာကိုယ်ပေါ်မှာ ဒဏ်ရာများဖြင့် ပြည့်နှက်နေသော်လည်း သူက စိတ်ဓာတ်မကျသွားပေ။ ယင်းအစား သူ၏ ခန္ဓာကိုယ်ပေါ်မှာ ရက်စက်ကြမ်းကြုတ်သော ကျားရဲအရှိန်အဝါ ထွက်ပေါ်လာသည်။ သူ၏ မျက်လုံးထဲမှ ထုတ်လွှတ်နေသော အအေးဓာတ်က သူ့အရှေ့မှ လေကိုပင် အေးခဲသွားစေနိုင်ဟန် ရ၏။</p> <p>သူက လေထဲမှ ချီဝူကျူးကို စိုက်ကြည့်နေစဉ် သူ၏ မျက်လုံးထဲမှာ သတ်ဖြတ်ခြင်းစိတ်ဆန္ဒဖြင့် ပြည့်နှက်သွားသည်။</p> <p>ချီဝူကျူးသည် စစ်တုရင်လောကထဲမှာ အကြွင်းမဲ့အားသာချက်ကို ရရှိထားသည်။ စစ်တုရင်လောက၏ အားဖြည့်ပေးမှုအောက်မှာ သူ၏ တိုက်ခိုက်မှုမှန်သမျှက ပုံမှန်ထက် နှစ်ဆပိုပြီးအားကောင်းသွားသည်။ ထို့ပြင် စစ်တုရင်ခုံက စက်ကရာ၏ လှုပ်ရှားမှုများကို လှောင်ချိုင့်တစ်ခုပမာ ကန့်သတ်ထားသည်။</p> <p>ထို့ကြောင့် တိုက်ပွဲစတင်ကတည်းက သူက အောက်စည်းသို့ ရောက်ရှိနေသည်။ ချီဝူကျူး၏ ဆက်တိုက် တိုက်ခိုက်မှုအောက်မှာ သူ၏ ခန္ဓာကိုယ်ပေါ်တွင် ဒဏ်ရာဒဏ်ချက်များ ထွက်ပေါ်လာသည်။</p> <p>သူတော်စင်တစ်ပါးက မည်မျှသည်းခံနိုင်ပါစေ အကြိမ်ကြိမ် ခေါင်းခေါက်ခံရလျှင် ဒေါသထွက်သွားလိမ့်မည်။ သီရှီထျန်သည် သူတော်စင်မဟုတ်ပေ။ ယခု သူက အကြီးအကျယ် ဒေါသထွက်သွားသည်။ ဤစစ်တုရင်ခုံ၏ ထူးခြားချက်များကို စူးစမ်းရန် သူစိတ်မဝင်စားတော့ပေ။</p> <p>သို့မဟုတ်လျှင် သူက အမှန်တကယ် အခြေအနေဆိုးဝါးသွားလိမ့်မည်။</p> <p>“ ဟူး ”</p> <p>ဧရာမကျားခန္ဓာကိုယ်သည် နန်းတော်ကိုးခု၏ အလယ်တည့်တည့်မှာ မောက်မာထောင်လွှားစွာ ရပ်နေသည်။ သူ၏ အကြည့်က အေးစက်နေစဉ် သူက ကျယ်လောင်စွာ ပါးစပ်ဟလိုက်ပြီး သူ့အရှေ့မှ လေကို အကြမ်းပတမ်း စုပ်သွင်းလိုက်သည်။</p> <p>မျက်စိတစ်မှိတ်အတွင်းမှာ သူ၏ ဝမ်းဗိုက်က ဖောင်းကားသွားသည်။ ဤသည်မှာ စစ်တုရင်လောကထဲမှ လေအားလုံးက သူ၏ ဝမ်းဗိုက်ထဲသို့ စုပ်ယူခံလိုက်ရသည့်အလားပင်။ လေကို စုပ်သွင်းလိုက်စဉ် ပေငါးဆယ်မြင့်မားသော သူ၏ ကျားခန္ဓာကိုယ်က ကြီးမားစွာ ပြောင်းလဲသွားသည်။</p> <p>မိစ္ဆာချီလှိုင်းများက သူ၏ ခန္ဓာကိုယ်ထဲမှ အဆုံးမဲ့စွာ ပေါ်ထွက်လာနေစဉ် သူ၏ ကျားခန္ဓာကိုယ်က မိစ္ဆာချီကြောင့် အနက်ရောင်ထွန်းလင်းသွားသည်။ စက္ကန့်ပိုင်းလေးအတွင်းမှာ သူ၏ ကျားခန္ဓာကိုယ်က သာမန်မျက်စိဖြင့် မြင်နိုင်သော အလျင်နှင့်အတူ ကြီးမားသွားသည်။</p> <p>“ ဂျွတ်… ဂျွတ်… ဂျက်… ဂျက် ”</p> <p>အရိုးအဆစ်မြည်သံများနှင့်အတူ စက်ကရာ၏ ခန္ဓာကိုယ်က နှစ်ဆပိုကြီးမားသွားသည်။ မှန်ပေသည်။ သူက ပေတစ်ရာမြင့်မားသော ဧရာမမိစ္ဆာကျားတစ်ကောင် ဖြစ်လာသည်။</p> <p>ကျားခန္ဓာကိုယ်သာ ကြီးမားသွားခြင်း မဟုတ်ပေ။ လွှမ်းမိုးဗိုလ်ကျသော ကျားရဲအရှိန်အဝါသည်လည်း ဘေးပတ်ဝန်းကျင်တစ်လျှောက် ပျံ့လွင့်သွားသည်။ ထိုအရှိန်အဝါက အလွန်ပြင်းထန်လေရာ အသက်ရှူကျပ်မှုကို ဖြစ်ပေါ်စေနိုင်သည်။ စက္ကန့်ပိုင်းလေးအတွင်းမှာ လွှမ်းမိုးဗိုလ်ကျသော ကျားရဲအရှိန်အဝါက စစ်တုရင်လောကတစ်ခုလုံးကို ဖုံးလွှမ်းသွားသည်။</p> <p>“ စစ်တုရင်လောကရဲ့ စစ်ဝိညာဉ်… ”</p> <p>စက်ကရာထံမှ ကြီးမားသော ဖိအားကို ခံစားမိသောအခါ ချီဝူကျူး၏ အမူအရာက ပြောင်းလဲသွားသည်။ သူက နောက်ထပ် စဉ်းစားမနေဘဲ စစ်တုရင်လောကထဲမှ စစ်တုရင်ဝိညာဉ်များကို တိုက်ခိုက်ရန် ချက်ချင်း အမိန့်ပေးလိုက်သည်။</p> <p>ရေခဲမြားများ၊ မီးတောက်မြားများက တရစပ် ပျံသန်းထွက်သွားကြပြီး ဆင်ဖြူတော်က ရက်စက်ကြမ်းကြုတ်သော တိုက်ခိုက်မှုများကို တစ်ခုပြီးတစ်ခု ထုတ်ဖော်လိုက်သည်။ စစ်သူကြီးသည်သာ သူ၏ ပလ္လင်ပေါ်မှာ မလှုပ်မယှက် ထိုင်နေသည်။</p> <p>စစ်တုရင်လောကထဲတွင် သီရှီထျန်နှင့် ချီဝူကျူး၏ တိုက်ပွဲက အထွတ်အထိပ်သို့ ရောက်ရှိသွားသည်။</p> <p>မိုးထိတောင်ပေါ်တွင် လီမိသားစုဝင်များသည် မိစ္ဆာသားရဲဘုရင်များ၏ ရုတ်တရက် တိုက်ခိုက်လာမှုကြောင့် အံ့ဩမှင်သက်နေကြသည်။</p> <p>“ စတုတ္ထအကြီးအကဲ… ဒီတစ်ကြိမ်မှာ တောင်ပိုင်းမြေရိုင်းဒေသထဲက မိစ္ဆာသားရဲဘုရင်အားလုံးက ကျုပ်တို့ကို လာရောက်တိုက်ခိုက်ကြတယ်… သူတို့တစ်ကောင်စီက အမြူတေဖွဲ့စည်းခြင်းနယ်ပယ် ကျင့်ကြံသူတစ်ယောက်လို သန်မာကြတယ်… မိစ္ဆာကျားကို ဖမ်းဆီးမယ့် ကျုပ်တို့ရဲ့ အစီအစဉ် ကျရှုံးသွားပြီ ”</p> <p>လီဝမ်သည် မိစ္ဆာသားရဲဘုရင်များ၏ တိုက်ခိုက်မှုအောက်မှာ အနောက်သို့ အမြန်ဆုတ်ခွာနေကြသော ကျင့်ကြံသူတစ်ထောင်ကို ကြည့်နေရင်း ပြောသည်။ သူ၏ မျက်နှာသည် သွေးမရှိသည့်အလား ဖြူဖျော့နေသည်။</p> <p>“ အစီအစဉ် မကျရှုံးသေးဘူး ”</p> <p>စတုတ္ထအကြီးအကဲ၏ မျက်လုံးထဲမှာ ရူးသွပ်မှု ထွက်ပေါ်လာသည်။ သူ၏ အသံက ရေခဲတမျှ အေးစက်နေသည်။</p> <p>“ မိစ္ဆာကျား ရောက်လာပြီမဟုတ်ဘူးလား… ဒီတစ်ကြိမ် မိစ္ဆာသားရဲတွေအများကြီး ရောက်လာကြပေမဲ့ ငါတို့တွေ အစီအစဉ်အတိုင်း ဆက်ဆောင်ရွက်ပြီး မိစ္ဆာကျားကို ပစ်မှတ်ထားမယ်ဆိုရင် အဲ့ဒီကောင်ကို တစ်ချက်တည်းနဲ့ သတ်ပစ်နိုင်လိမ့်မယ်… မိစ္ဆာကျားသေသွားတာနဲ့ ဝိညာဉ်သံလိုက်အိမ်မြှောင်ကို ယူပြီး ဒီကနေ အမြန်ဆုံး ထွက်သွားကြမယ်… တခြားလူတွေရဲ့ သေရေးရှင်ရေးက ငါတို့နဲ့ ဘာမှမဆိုင်ဘူး ”</p> <p>သူ၏ စကားထဲမှာ အစွန်းရောက်အေးစက်မှုနှင့် ရက်စက်ကြမ်းကြုတ်မှု ပါဝင်နေသည်။ သူက ယခုအချိန်ထိ လက်မလျော့သေးကြောင်း ထင်ရှားသည်။ သူက ယခင်အစီအစဉ်အတိုင်း မိစ္ဆာကျားကို တစ်ချက်တည်းဖြင့် အပြတ်ရှင်းပစ်ချင်သည်။</p> <p>“ လီမိသားစုရဲ့ တပည့်အားလုံး ငါ့အမိန့်ကို နားထောင်ကြမယ် ”</p> <p>လီဝမ်၏ မျက်လုံးက အကြိမ်ရေအနည်းငယ် ရွေ့လျားသွားသည်။ နောက်ဆုံးမှာ သူက စိတ်ဆုံးဖြတ်လိုက်သည်။ သူ၏ မျက်နှာပေါ်မှာ စိတ်ဓာတ်ပြတ်သားသော အမူအရာ ထွက်ပေါ်လာသည်။ သူက အံကြိတ်လိုက်ပြီး မိုးထိတောင်ပေါ်မှ လီမိသားစုဝင်များကို ခေါ်လိုက်သည်။</p> <p>“ အကြီးအကဲ အမိန့်ရှိပါ ”</p> <p>လီမိသားစုဝင်နှစ်ဆယ်ကျော်သည် တစ်ပြိုင်နက် အရှေ့သို့ ထွက်လာကြပြီး ရိုသေလေးစားစွာ ပြောကြသည်။</p> <p>“ ဒီမှာ ကျောက်စိမ်းမှော်အဆောင်တချို့ ရှိတယ်… မင်းတို့တစ်ယောက်စီက ကျောက်စိမ်းမှော်အဆောင်ကို ယူပြီး အရင်က ငါပြောထားတဲ့ နေရာဆီ သွားကြပါ… ပြီးကျရင် ငါနဲ့ စတုတ္ထအကြီးအကဲရဲ့ အချက်ပေးမှုကို စောင့်နေကြပါ… အချက်ပေးတာနဲ့ချက်ချင်း တိုက်ခိုက်ကြပါ… ဝိညာဉ်သံလိုက်အိမ်မြှောင်ကို ပြန်ရယူနိုင်မလားဆိုတာ မင်းတို့ပေါ်မှာ မူတည်တယ်… မင်းတို့ လီမိသားစုဆီ ပြန်ရောက်တဲ့အခါ ရက်ရက်ရောရော ဆုချီးမြှင့်ခံရမယ် ”</p> <p>လီဝမ်သည် စကားပြောပြီးနောက် ကျောက်စိမ်းမှော်အဆောင်များကို သူ၏ သိုလှောင်အိတ်ထဲမှ ထုတ်လိုက်ပြီး တပည့်တစ်ယောက်စီကို တစ်ခုနှုန်း ခွဲဝေပေးလိုက်သည်။</p> <p>ထိုတပည့်များသည် သူတို့၏ လက်ထဲမှ ကျောက်စိမ်းမှော်အဆောင်ကို ဂရုတစိုက် ကြည့်လိုက်ကြသည်။ သူတို့က ကျောက်စိမ်းမှော်အဆောင် ပျောက်ဆုံးသွားမည်ကို စိုးရိမ်နေကြဟန် ရ၏။</p> <p>ထို့နောက် သူတို့အားလုံးက ခေါင်းညိတ်လိုက်ကြပြီး အရပ်မျက်နှာအသီးသီးသို့ ချက်ချင်း ထွက်သွားကြသည်။ အကယ်၍ တစ်စုံတစ်ယောက်က သူတို့ထွက်သွားသော ဦးတည်ရာများကို ဂရုတစိုက် စစ်ဆေးကြည့်မည်ဆိုလျှင် ထိုနေရာမှာ လျှို့ဝှက်ဆန်းကြယ်သော ဆက်သွယ်မှုတစ်ခုရှိနေကြောင်း မြင်ရလိမ့်မည်။</p> <p>“ ဟွန့်… အစက ငါက မိစ္ဆာကျားတစ်ကောင်ကိုပဲ သတ်ပစ်ဖို့ ရည်ရွယ်ထားတာ… ဒါပေမဲ့ တခြားမိစ္ဆာသားရဲတွေပါ ရောက်လာမယ်လို့ မမျှော်လင့်ထားဘူး… ဒီလိုဆိုမှတော့ မင်းတို့အားလုံးကို အတူတူ သတ်ပစ်တဲ့အတွက် ငါ့ကို ရက်စက်တယ်လို့ မပြောကြနဲ့… မိစ္ဆာမျိုးနွယ်စု နိမ့်ကျသွားတာ နှစ်ပေါင်းအတော်ကြာပြီ… မဟာမိစ္ဆာဘုရင်တချို့ အသက်ရှင်နေသေးလို့သာပေါ့… မဟုတ်ရင် တောင်ပိုင်းမြေရိုင်းဒေသထဲက မိစ္ဆာသားရဲတွေအားလုံး မျိုးတုန်းသတ်ဖြတ်ခံရပြီးပြီ ”</p> <p>စတုတ္ထအကြီးအကဲသည် သတ်မှတ်ထားသော နေရာအသီးသီးဆီသို့ ပြေးသွားနေကြသော လီမိသားစုဝင်များကို ကြည့်နေရင်း အေးစက်စွာ ပြောသည်။</p> <p>လီဝမ်က ခေါင်းညိတ်လိုက်သည်။</p> <p>“ မဟာမိစ္ဆာဘုရင်တစ်ပါးစီက ဝိညာဉ်သန္ဓေတည်နယ်ပယ်က တန်ခိုးရှင်တွေနဲ့ ယှဉ်ပြိုင်နိုင်တဲ့ အစွမ်းထက်ပုဂ္ဂိုလ်တွေ ဖြစ်ကြတယ်… အစွမ်းထက်ဆုံး မဟာမိစ္ဆာဘုရင်ရဲ့ စွမ်းအားက ဝိညာဉ်သန္ဓေတည်နယ်ပယ်ထက် ကျော်လွန်သွားပြီလို့ ကျုပ်ကြားဖူးတယ်… အဓိကကတော့ သွေးလင်းနို့ဘုရင်ပဲ… သူက အရမ်းကြောက်စရာကောင်းတယ်… သူက လူ့သွေးကို စုပ်ယူပြီး ကျင့်ကြံတယ်… ဝိညာဉ်သန္ဓေတည်နယ်ပယ်က တန်ခိုးရှင်တစ်ပါးတောင် သူ့ကို မြင်တာနဲ့ ထွက်ပြေးရလိမ့်မယ် ”</p> <p>လီဝမ်၏ အသံထဲမှာ ကြောက်ရွံ့မှု ပါရှိသည်။</p> <p> </p> <p> </p> <p> </p> <p style="text-align: center;">***</p>


Save