Book List

<h2 style="text-align: center;">အခန်း (၉၄)</h2> <h2 style="text-align: center;">အခမ်းအနား</h2> <h2 style="text-align: center;">*</h2> <p> </p> <p> </p> <p>ရန်ချီက ဂူဖန်းရှန်းကို လက်သီးတစ်ချက်ဖြင့် အနိုင်ယူလိုက်ပြီး လှောင်ပြောင် ပြောလိုက်၏။ "မင်းလို အမှိုက်ကောင်ကများ ငါ့ကို ဒီကနေ ထွက်သွားစေချင်သေးတယ် ဟုတ်လား"</p> <p>ဂူဖန်းရှန်းက တော်ဝင်အိမ်ရှေ့စံ အဖွဲ့ဝင် ဖြစ်သော်လည်း ရန်ချီက လုံးဝ ကြောက်ရွံ့မနေချေ။</p> <p>ယခုအချိန်တွင် သူက လောကအုပ်ချုပ်သူတစ်ယောက်ဖြစ်ကာ ငရဲမီးတောက် မီးပြင်းဖိုကို အသုံးပြုလျက် မိစ္ဆာအမြုတေများကို တိုက်ရိုက်စားသုံးနိုင်သဖြင့် သူ့ ကျင့်ကြံခြင်းမှာ ခုန်ပျံကျော်လွှား တိုးတက်လာနိုင်သည်။</p> <p>အချိန်တစ်ခ ကြာပြီးနောက် သူက နောက်ဆုံး၌ သက်တမ်း အကြိမ်ကြိမ် ခိုးယူကာ ငရဲတံခါးနှင့် ပတ်သက်၍ ဉာဏ်အလင်းအချို့ ရရှိလာတော့သည်။ ထို့ကြောင့် သူက တော်ဝင်အိမ်ရှေ့စံနှင့် ပတ်သက်ပြီး အနည်းငယ်လောက်သာ ကြောက်ရွံ့တော့၏။</p> <p>ငရဲတံခါးမှာ မိစ္ဆာနတ်ဆိုးများကို ဆင့်ခေါ်နိုင်ပြီး သက်ရှိကမ္ဘာတစ်ခုလုံး ငရဲပြည်အဖြစ် ပြောင်းလဲနိုင်ပေသည်။ သို့သော်လည်း ထိုကဲ့သို့သတ္တဝါများကို ဆင့်ခေါ်ခြင်းမှာ အန္တရာယ် များလွန်းသည့် နည်းလမ်းတစ်ခုသာ ဖြစ်ပေသည်။</p> <p>ဂူဖန်းရှန်း သူရှုံးနိမ့်သွားကြောင်းကို မယုံကြည်နိုင်ချေ။ "မင်း... ငါ မင်းကို သတ်မယ်"</p> <p>သူက အလွန် မာနကြီးသူတစ်ယောက် ဖြစ်လေရာ လောကအုပ်ချုပ်သူ အဆင့်ရှိ တစ်စုံတစ်ယောက်ကို ရှုံးနိမ့်သွားခြင်းက အလွန် အရှက်ရစေသည်။ ထိုအချက်ကြောင့်ပင် သူက ရန်ချီကို သေစေရမည့် ရန်ဖက်အဖြစ် သတ်မှတ်လိုက်သည်။</p> <p>"အင်မော်တယ် သုတ်သင်ခြင်း ပန်းချီကား"</p> <p>သူက ကြုံးဝါးလိုက်သည်။ မီးတောက်မီးလျှံများက သူ့နောက်ကျောဘက်၌ ထွက်ပေါ်လာပြီး ပန်းချီကားတစ်ချပ်အဖြစ် ပြောင်းလဲသွားခဲ့သည်။ ထိုအရာမှာ သာမန် လူသားများထက် သာလွန်သည့် အင်မော်တယ် နတ်ဘုရားများဖြစ်ကြပြီး ၎င်းတို့ကို မီးလျှံများက ရစ်ပတ်ထားကြ၏။ သူတို့၏ မျက်နှာများက နာကျင်မှုများ ပေါ်လွင်နေကာ ဘာမှမရှိတော့သည့်အထိ လောင်ကျွမ်းခံခဲ့ရသည်။</p> <p>ဂူဖန်းရှန်း မျက်နှာက ရက်စက်သော ပုံစံပေါက်လာကာ ပြောလိုက်သည်။ "ငါ့ကို နောက်အနည်းငယ် ဆုတ်သွားအောင် မင်း လုပ်နိုင်မယ်လို့ ထင်မထားခဲ့ဘူး... ဒီလို အရှက်ခွဲမှုမျိုးက ခွင့်မလွှတ်နိုင်ဘူးကွ... ဒါကြောင့် မင်း အသက်ရှင်နေလို့မရဘူး... ငါ မင်းကို နှိပ်စက်ပြမယ်... မင်းကိုယ်တိုင်တောင် သေဖို့ ဆုတောင်းနေစေရမယ်... မင်းက ငါ့ရဲ့ အင်ပါယာအဆင့် စွမ်းအင်ပညာရပ် အင်မော်တယ် သတ်ဖြတ်ခြင်း အတွဲငါးတွဲ ပညာရပ်ကို ပထမဆုံး ခံစားဖူးတဲ့ သူပဲ"</p> <p>"အင်မော်တယ်ခြေနင်း ကျောင်းတော်က ပညာရပ် မဟုတ်ဘူး"</p> <p>"ဂူကလန်က ချမ်းသာကြွယ်ဝတိုက်ကြီးမှာ ထိပ်တန်းအချမ်းသာဆုံး ဆယ်ကလန်ထဲမှာ ပါတယ်လေ... ကောလာဟလတွေအရ သူတို့မှာ မဟာသူတော်စင်တောင် ရှိသေးတယ်တဲ့... သူတော်စင် ဘိုးဘေးမင်းဆက်ကတောင် သူတို့ကို မျက်နှာသာ တော်တော်လေး ပေးရသေးတယ်... အင်မော်တယ် သတ်ဖြတ်ခြင်း အတွဲငါးတွဲ အရမ်းအစွမ်းထက်လွန်းတယ်... အကယ်၍ သူတို့ကိုသာ အတူတကွ အသုံးပြုရင် အင်မော်တယ်ကိုတောင် သုတ်သင်ပစ်နိုင်တယ်... လွန်ခဲ့တဲ့ နှစ်တွေတုန်းက သူတို့ ကလန် မငြိမ်မသက်ဖြစ်ပြီးတော့ ငါးတွဲထဲက လေးတွဲက ပျောက်ဆုံးသွားခဲ့တယ်... အခု သူတို့ဆီမှာ တစ်တွဲပဲ ကျန်တော့တာတောင် ကြောက်စရာကောင်းလောက်အောင် အစွမ်းထက်လွန်းနေသေးတယ်"</p> <p>"ဒီကောင်လေးကရော ဘယ်သူလဲ... သူ့အဝတ်အစားအရတော့ အပြင်စည်း ကျောင်းသား တစ်ယောက်ဖြစ်လိမ့်မယ်... သူ့ရဲ့ ကျင့်ကြံခြင်း အခြေခံက ဒီလောက် နက်ရှိုင်းလွန်းတာ ငါ ယုံတောင် မယုံနိုင်ဘူး... သူ တကယ်ကြီး ဂူဖန်းရှန်းကို အနိုင်ယူနိုင်တာလား"</p> <p>"ဂူဖန်းရှန်းက နည်းနည်းလေးမှ ဂရုမစိုက်ဘူးဟ... သူက သူ့ရဲ့ အင်မော်တယ် သုတ်သင်ခြင်း ပန်းချီကားကို အသုံးပြုမှတော့ အခြား ကျောင်းသားက သူ့ကို အနိုင်ယူနိုင်မှာ မဟုတ်လောက်ဘူး"</p> <p>"ကောင်းပြီလေ... ဒီလူက လောကအုပ်ချုပ်သူ ဖြစ်မှတော့ အကြီးအကဲတွေက သူ့ကို သေဖို့ ခွင့်ပြုမှာ မဟုတ်လောက်ဘူး... သူတို့ ဝင်ရောက်စွက်ဖက်လိမ့်မယ်... လောကအုပ်ချုပ်သူတိုင်းက ကျောင်းတော်ရဲ့ အနှစ်သာရပဲလေ"</p> <p>ကျောင်းသားအများစုက ရန်ချီနှင့် ပတ်သက်ပြီး ပြောဆိုနေကြသည်။</p> <p>ယွမ်ဟိုက်လန်၏ မျက်နှာအမူအရာက အေးစက်နေသော်လည်း အကယ်၍ သူမသာ ရန်ချီကို နက်နက်ရှိုင်းရှိုင်းသိပါက သူ ဘာကြောင့် ကျင့်ကြံခြင်း အလျင်အမြန် တိုးတက်လာသနည်း ဆိုသည်ကို နားလည်နိုင်ပါလိမ့်မည်။</p> <p>ယခင်တစ်ချိန်က ထိုလူငယ်လေးမှာ မည်မျှပင် ခက်ခက်ခဲခဲကျင့်ကြံပါစေ သာမန်ထက် နည်းနည်းလေးသာ အရည်အချင်းရှိမည်ဟု သူမ ထင်မြင်ထားခဲ့သည်။ ထိုလူက လောကအုပ်ချုပ်သူ အဆင့် ရောက်လာမည်ဟု ထင်မထားခဲ့ချေ။ သူက ထင်ပေါ်ကျော်ကြားသူတစ်ယောက် ဖြစ်လာကာ သူမအတွက် ခြိမ်းခြောက်မှုကြီး တစ်ခု ဖြစ်လာခဲ့သည်။</p> <p>ဂူဖန်းရှန်းနှင့် ပတ်သက်၍ ထိုလူက တော်ဝင်အိမ်ရှေ့စံ အဖွဲ့၌ ထိပ်သီးပါရမီရှင် တစ်ယောက် ဖြစ်ကြောင်း သူမ ကောင်းစွာသိသည်။ သူက လွန်ခဲ့သည့် ဆယ်နှစ်ခန့်က လောကအုပ်ချုပ်သူ တစ်ယောက်ဖြစ်လာကာ လက်ရှိ၌ လောကအုပ်ချုပ်သူ အဆင့်နှစ်၌ ရှိနေသည်။ ရန်ချီက သူ့ကို ရှုံးနိမ့်ရမည့်အစား သူ့ အင်မော်တယ် သတ်ဖြတ်ခြင်း အတွဲငါးတွဲ စွမ်းအင်ပညာရပ်ကိုပါ ထုတ်သုံးဖို့ အထိပင် ဖိအားပေးထားခဲ့သည်။ ယွမ်ဟိုက်လန်က ထိုကိစ္စရပ်များ ယခုလို ဖြစ်မသွားသင့်မှန်း သိသည်။</p> <p>"ဒီမှာ ရပ်ကို ရပ်မှ ဖြစ်မယ်" သူမ အေးစက်စွာ ပြောလိုက်သည်။ ထိုစကားက သူမအတွက်လား ရန်ချီအတွက်လား ဆိုတာကို ပြောဖို့ ခဲယဉ်းလှ၏။</p> <p>ဂူဖန်းရှန်းက အင်မော်တယ်သတ်ဖြတ်ခြင်း ပန်းချီကားကို ထုတ်သုံးဖို့ ပြင်လိုက်ချိန်၌ သူတော်စင် သင်ကြားရေး အကယ်ဒမီမှ အကြီးအကဲတစ်ယောက်က သူ့ လက်ညှိုးကို ဝှေ့ယမ်းလိုက်ရာ ချွန်ထက်နေသည့် ဓားတစ်ချောင်း ပေါ်လာခဲ့သည်။</p> <p>"လုံလောက်ပြီ"</p> <p>"ဝှစ်..."</p> <p>သူတော်စင်သုတ်သင်ခြင်း ပန်းချီကားမှာ ပြိုကွဲသွားပြီး အစစ်အမှန် စွမ်းအင်များက ဂူဖန်းရှန်းထံ ပြန်လည် ဝင်ရောက်သွားခဲ့သည်။ ထိုလူအိုကြီး၏ အကွက်တစ်ကွက်တည်းဖြင့် သူက ရှုံးနိမ့်ခဲ့ရသည်။</p> <p>ထိုမြင်ကွင်းက ရန်ချီကို တုန်လှုပ်သွားစေ၏။</p> <p>"အကြီးအကဲ ချေမှုန်းရေးတပ်သား"</p> <p>"အကြီးအကဲ ချေမှုန်းရေးတပ်သား... ဆရာ ဘာများ ပြောစရာရှိလို့လဲ"</p> <p>အကြီးအကဲ တစ်ယောက်၏ ဝင်ရောက်စွက်ဖက်မှုကြောင့် ဂူဖန်းရှန်း၏ ဘက်တော်သားများက သူ့ကို အေးဆေးနေဖို့ တိုက်တွန်းလိုက်ကြသည်။</p> <p>"ဂူဖန်းရှန်း... အကြီးအကဲ ချေမှုန်းရေး တပ်သားက ဝင်ရောက်စွက်ဖက်ပြီ ဆိုတော့ မင်းရဲ့ စွမ်းအင်ပညာရပ်ကို မသုံးတော့တာ ပိုကောင်းမယ်... ဒီကောင်လေးက သူတော်စင် သင်ကြားရေး အကယ်ဒမီကို အတင်းဝင်ရောက် လာတာကြောင့် အကြီးအကဲ ချေမှုန်းရေး တပ်သားက သူ့ကို အပြစ်ပေးစေချင်ပါတယ်... ဒါဆို ကျွန်တော်တို့ တော်ဝင်အိမ်ရှေ့စံ အဖွဲ့သားတွေ ဝင်ရောက်စွက်ဖက်ဖို့ မလိုတော့ပါဘူး"</p> <p>အကြီးအကဲ ချေမှုန်းရေးတပ်သားက အင်မော်တယ်ခြေနင်း ကျောင်းတော်၌ အလွန် အဆင့်မြင့်သော ရာထူးရှိကြောင်း သိသာလှသည်။ လောကအုပ်ချုပ်သူများပင် သူ့ကို အာခံမတုရဲကြချေ။</p> <p>‘တော်တော် ကြောက်ဖို့ကောင်းတဲ့ ဓားစွမ်းအင်ပဲ’ ရန်ချီ တွေးလိုက်သည်။ ‘သူ သက်တမ်း ဘယ်နှကြိမ်တောင် ခိုးပြီးပြီလဲ မသိဘူး... အံ့အားသင့်စရာပဲ... တကယ်လို့ သူသာ ငါ့ကို တိုက်ခိုက်ခဲ့ရင် ငါ့ကိုယ်ငါတောင် ကာကွယ်နိုင်ပါ့မလား မသိဘူး’</p> <p>ရန်ချီ၏ စွမ်းအင်ပညာရပ်က သန်မာလွန်းသော်လည်း သူက အတွေ့အကြုံ မရှိလေရာ အကြီးအကဲ ချေမှုန်းရေး နတ်ဘုရား၏ အဆင့်နှင့် ပတ်သက်၍ အသေးစိတ် မသိချေ။</p> <p>"တိတ်စမ်း" အကြီးအကဲ ချေမှုန်းရေး တပ်သားက ပြောလိုက်သည်။ ထို့နောက် တော်ဝင်အိမ်ရှေ့စံ အဖွဲ့မှ လူများကိုကြည့်ကာ ဆက်ပြောလိုက်၏။ "ငြိမ်ငြိမ်နေကြ... ဒီကိစ္စက ဒီမှာတင် ပြီးပြီ"</p> <p>ထို့နောက် သူက ရန်ချီကို ကြည့်လိုက်သည်။ "မင်းနာမည် ဘယ်လို ခေါ်လဲ ကောင်လေး"</p> <p>"အကြီးအကဲ ချေမှုန်းရေးတပ်သား... ကျွန်တော့်နာမည်က ရန်ချီပါ" သူက လေးလေးစားစား ပြောလိုက်သည်။ "ကျွန်တော် လောကအုပ်ချုပ်သူဖြစ်လာလို့ လက်ရွေးစင်ကျောင်းသား ဖြစ်လာဖို့ အစမ်းသပ် လာခံတာပါခင်ဗျာ"</p> <p>"ငါ မြင်တယ်... မင်းမှာ လောကအုပ်ချုပ်သူရဲ့ စွမ်းအားတွေ ရှိနေတာပဲ... အဲ့ဒါက ပြိုင်ဘက်ကင်း ရှင်ဘုရင်လက်သီး ဖြစ်ရမယ်... မှန်လား... မပြည့်စုံတဲ့ သိုင်းကျမ်းကို ဒီလောက် စွမ်းအား ထုတ်ဖော်နိုင်ပုံ အရဆိုရင် မင်းမှာ ပါရမီ အချို့ ရှိရမယ်... ကျန်တဲ့ မင်းတို့ရော ဘယ်လို ထင်လဲ" အကြီးအကဲ ချေမှုန်းရေး တပ်သားက အခြား အကြီးအကဲများကို လှည့်ကြည့်လိုက်သည်။</p> <p>အကြီးအကဲတစ်ယောက် မတ်တပ်ရပ်လိုက်သည်။ "မင်း ပြောတာ တော်တော်လေး မှန်တယ် အကြီးအကဲ ချေမှုန်းရေး တပ်သားရေ... သူက လောကအုပ်ချုပ်သူ ကျင့်ကြံခြင်း အခြေခံ ရှိမှတော့ ငါ ဒီကောင်လေးကို အခု အနီးကပ် ကြည့်လိုက်ဦးမယ်... မေးစရာတော့ မရှိပေမယ့်လည်း ငါတို့ စည်းမျဉ်းတွေအရတော့ စစ်ဆေးကြည့်ရဦးမှာပေါ့"</p> <p>"အကြီးအကဲချေမှုန်းရေး သူရဲကောင်း၊ အကြီးအကဲ ချေမှုန်းရေး မြင့်မြတ်သူ... ငါတို့ လေးယောက် ဒီလူငယ်လေးရဲ့ စွမ်းအားပင်လယ်ကို စစ်ဆေးသင့်တယ်"</p> <p>အခြား အကြီးအကဲများက ခေါင်းညိတ်ကာ မတ်တပ်ရပ်လိုက်ကြသည်။</p> <p>"ဝှစ်..."</p> <p>နူးညံ့ ညင်သာသော စွမ်းအင်စီးကြောင်းများက သူတို့၏ လက်များမှ ထွက်ပေါ်လာပြီး ရန်ချီထံ ဦးတည်သွားကြသည်။</p> <p>ရန်ချီက ခုခံတွန်းလှန်ဖို့ မကြိုးစားခဲ့ချေ။ သူ့ အကာအကွယ် စွမ်းအင်များကို ရုပ်သိမ်းကာ သူတို့၏ စွမ်းအားကို သူ့ကိုယ်အတွင်း ဝင်ရောက်ခွင့်ပြုလိုက်သည်။ ထိုစစ်ဆေးခြင်းသည် အင်မော်တယ်ခြေနင်း ကျောင်းတော်မှ သူ့အား လက်ရွေးစင်ကျောင်းသား စစ်ဆေးကာ အဆင့်မြင့်စေဖို့ တစ်ခုတည်းသော နည်းလမ်း ဖြစ်ကြောင်း သူ သိထားသည်။</p> <p>ယခုအချိန်၌ အမှန်တရားအတွက် စစ်ဆေးခြင်းဖြစ်လေရာ သူ့ မိစ္ဆာနတ်ဘုရား စည်းတံဆိပ်က အလုပ်ဖြစ်လာမည်လား။</p> <p>လက်ရှိ၌ မဟာ အကြီးအကဲငါးယောက် ရှိကြသည်။ သူတို့ထဲ၌ အဆင့်အတန်း အမြင့်မားဆုံးက အကြီးအကဲ ချေမှုန်းရေးတပ်သားဖြစ်ကာ သူ့နောက်၌ အကြီးအကဲ ချေမှုန်းရေး ဂုဏ်သိက္ခာ၊ အကြီးအကဲ ချေမှုန်းရေး သူရဲကောင်း၊ အကြီးအကဲ ချေမှုန်းရေး စွမ်းအားနှင့် အကြီးအကဲ ချေမှုန်းရေး မြင့်မြတ်သူတို့ ဖြစ်ကြသည်။</p> <p>ထိုအကြီးအကဲ ငါးယောက်က သူတော်စင်သင်ကြားရေး အကယ်ဒမီ၌ တာဝန်ရှိသူများ ဖြစ်ကြရာ ကျောင်းတော်၏ကိစ္စရပ်များကို သူတို့သာ ကိုင်တွယ်ကြရသည်။ အရေးကြီးသည့် ဆုံးဖြတ်ချက်များလည်း သူတို့သာ ချမှတ်ကြရသည်။ အကြီးအကဲအုပ်ချုပ်ရေးမှူးဖြစ်သည့် အကြီးအကဲ ချေမှုန်းရေး သူတော်စင်က သူ့ အချိန်အများစုကို ဉာဏ်အလင်းများ ရရှိဖို့အတွက် ဂူပိတ် ကျင့်ကြံနေတတ်သည်။ သူ့ကို မတွေ့ရသည်မှာ နှစ်တစ်ရာကျော်လောက်ပင် ကြာခဲ့လေပြီ။</p> <p>ထိုအကြီးအကဲ ငါးယောက်က ရန်ချီ၏ သွေးကြောများကို သူတို့၏ စွမ်းအင်များ စေလွှတ်ကာ ထိုမှတစ်ဆင့် ရန်ချီ၏ စွမ်းအားပင်လယ်ထဲသို့ ရောက်ရှိလာသောအခါ ပြိုင်ဘက်ကင်း ရှင်ဘုရင်လက်သီးနှင့် ရွှေခေါင်းလောင်း အကာအကွယ် အစစ်အမှန် စွမ်းအင်များကို တွေ့လိုက်ကြသည်။ ငရဲချေမှုန်းနတ်ဆင် စွမ်းအားနှင့် လေးရာသီ ဓားပညာတို့က အမှုန်အမွှား တစ်ခုသဖွယ် ဖြစ်နေလေရာ သူတို့က သတိမပြုမိကြချေ။</p> <p>အစစ်အမှန် စွမ်းအင်အား အနီးကပ် စစ်ဆေးပြီးနောက် စွမ်းအင်စီးကြောင်း ငါးခုက သူ့ အကြောဆုံမှတ်နှင့် ဦးခေါင်းသို့ မရောက်ခင် သွေးကြောများကို ထပ်မံ စစ်ဆေးလိုက်သည်။</p> <p>နောက်ဆုံး၌ စွမ်းအင်များက သူ့ နဖူးထပ်သို့ ရောက်ရှိလာခဲ့သည်။</p> <p>ရန်ချီက အကြီးအကဲများ ရွှေရောင် နတ်ဆိုးကလေးကို သတိထားမိသွားမှာကို စိုးရိမ်နေခဲ့သည်။</p> <p>သို့သော် အချိန်ခဏကြာပြီးနောက် အကြီးအကဲများက ၎င်းကို သတိမပြုမိလေရာ သူ့ စိုးရိမ်နေခြင်းက အဓိပ္ပာယ်မရှိကြောင်း သဘောပေါက်လိုက်သည်။</p> <p>ရွှေရောင် နတ်ဆိုးကလေးက အစစ်အမှန်မဟုတ်ဘဲ ပုံရိပ်ယောင်ကမ္ဘာမှ တည်ရှိနေကာ သူ ထွက်ပေါ်လာချင်မှ ထွက်ပေါ်လာနိုင်ပေသည်။</p> <p>"ကောင်းပြီ" အကြီးအကဲ ချေမှုန်းရေး တပ်သားက ပြောလိုက်သည်။ ထို့နောက် အကြီးအကဲ ငါးယောက်က သူတို့၏ အစစ်အမှန် စွမ်းအင်များကို ရုပ်သိမ်းလိုက်တော့သည်။ "မင်း အောင်မြင်ပြီ ရန်ချီ... မင်းမှာ ရောနှောနေတဲ့ အစစ်အမှန် စွမ်းအင်တွေ မရှိဘူး... ရှိနေတာက အမှန်တရား လမ်းစဉ်လိုက်တဲ့ စွမ်းအားတွေနဲ့ ပထမတန်းစား စွမ်းအင်ပညာရပ်ပဲ... ဒီအဆင့်ထိ တိုးတက်လာတာကိုက မင်းမှာ ပါရမီ ဘယ်လောက်ရှိလဲ ပြသနေတာပဲလေ... ငါတို့ အားလုံး မင်းကို လက်ရွေးစင်ကျောင်းသားဖြစ်ဖို့ သဘောတူလိုက်ကြပြီ"</p> <p>"အံ့ဖွယ်ပဲ"</p> <p>အပြင်ဘက်ရှိ လီဟီနှင့် အခြားလူများက အထဲမှ အပြောင်းအလဲများကို ကြားနေရသည်။ သူတို့က အကူအညီမပေးနိုင်သဖြင့် စိတ်လှုပ်ရှား နေခဲ့ကြသည်။ သို့သော်လည်း ရန်ချီက လက်မလျှော့ဘဲ လက်ရွေးစင်ကျောင်းသား ဖြစ်လာခဲ့သည်။</p> <p>"လောကအုပ်ချုပ်သူ ဖြစ်လာပြီးနောက် ဘယ်သူမဆို သေဆုံးစေနိုင်သည့် စွမ်းအင်ပညာရပ်နှင့် တားမြစ်ပညာရပ်နှင့် အဆက်အနွယ်မရှိပါက စစ်ဆေးမှု အောင်မြင်ကာ လက်ရွေးစင် ကျောင်းသား ဖြစ်နိုင်တယ်" အကြီးအကဲ ချေမှုန်းရေး တပ်သားက ရှင်းပြလိုက်သည်။ "ကဲ... ယွမ်ဟိုက်လန်နဲ့ ရန်ချီရဲ့ အဆင့်တက်ခြင်း အခမ်းအနားကို တစ်ခါတည်း ကျင်းပကြမယ်... လူတွေ လာကြစမ်း"</p> <p>"ဆရာ" ဧရာမ လူဘီလူးကြီးက အကြီးအကဲ ချေမှုန်းရေး တပ်သားရှေ့၌ ဒူးထောက်လိုက်သည်။ "သွား... သိုလှောင်ရုံကနေ လက်ရွေးစင် ကျောင်းသားဝတ်စုံ နှစ်စုံနဲ့ အသိအမှတ်ပြု တံဆိပ်တွေ သွားယူလာခဲ့"</p> <p>"ဟုတ်ကဲ့ ဆရာ"</p> <p>ခဏကြာပြီးနောက် ဧရာမလူကြီးက ဝတ်စုံနှစ်စုံနှင့် အသိအမှတ်ပြု ပစ္စည်းများ ယူဆောင်လာခဲ့သည်။ ရန်ချီက ထိုဝတ်စုံကို ဝတ်လိုက်သည်နှင့် သူ့ကိုသူ ပိုမို ဂုဏ်ရှိသလို ခံစားလိုက်ရသည်။</p> <p>"အခု အင်မော်တယ်ခြေနင်း ကျောင်းတော်နဲ့ သူတော်စင် သင်ကြားရေး အကယ်ဒမီက အောင်မြင်ခဲ့တဲ့ စီနီယာတွေကို သုံးကြိမ် ဒူးထောက်ကန်တော့ပါ"</p> <p>ရန်ချီက သူတော်စင်သင်ကြားရေး အကယ်ဒမီ အတွင်းပိုင်းသို့ ကြည့်လိုက်ရာ လူဆယ်ယောက်၏ ပုံတူပန်းချီများ တွေ့လိုက်ရသည်။ သူတို့က နေမင်းအလား နတ်ဘုရား အင်မော်တယ်များအလား ထင်မှတ်ရသည်။ သူတို့က မည်သည့် အချိန်တွင်မဆို လှုပ်ရှားလာမည့်ပုံ ပေါ်နေပြီး မြင့်မြတ်သော သူတော်စင်တစ်ပါး၊ အင်ပါယာတစ်ပါးနှင့် တူကြသည်။</p> <p>သူတို့က ကျောင်းတော်၏ နှစ်ထောင်ချီ သက်တမ်း၌ ထိုအဖွဲ့အစည်းကို ဦးဆောင်ခဲ့သူများ ဖြစ်ကြောင်း သိသာလှ၏။</p> <p>နောက်ဆုံးရုပ်ပုံမှာ လက်ရှိ ကျောင်းတော်၏အကြီးအကဲဖြစ်ကာ အဝါရောင်ဝတ် လူငယ်လေးက လက်တစ်ဖက်မှ စာလိပ်ကိုကိုင်ကာ နောက်တစ်ဖက်၌ ဓားကို ကိုင်ထားသည်။ သူက သာမန်လူ တစ်ယောက် မဟုတ်ကြောင်း သိသာလှသည်။ သူ့ မျက်လုံးများက ဝမ်းနည်းကြေကွဲနေကာ သာမန် လူသားများအတွက် စိုးရိမ်နေပုံ ပေါ်လွင်နေသည်။ သူက သူ့လက်ထဲမှ စာလိပ်ကို မကြည့်ဘဲ မိုးကောင်းကင်ထက်ကို ကြည့်ကာ သက်ရှိများအတွက် ငြိမ်းချမ်းစေလိုပုံ ပေါ်လွင်နေတော့သည်။</p> <p> </p> <p> </p> <p style="text-align: center;">End</p> <p style="text-align: center;">***</p>


Save