BIT

Title

Show in VIP/Series

Status (Active / Inactive)

ယွင်ရှန်းအနေဖြင့် ဤအလုပ်မှာ သူမအတွက် အလွန်အမင်း ခက်ခဲလိမ့်မည်ဟု မထင်မိပေ။

မှော်မျှော်စင်ရှိ မှော်ဆရာအိုကြီးအတွက် မှော်လှံတံတစ်ခုကို ကူညီကာ သွန်းလုပ်ပေးပြီးနောက်တွင် နတ်သူငယ် ကံကြမ္မာမီးသည် မှော်ပစ္စည်းများ၊ လက်နက်များနှင့် ဆေးလုံးများ ဖော်စပ်ရာတွင် အလွန်ထူးခြားသော အစွမ်းသတ္တိများ ရှိနေသည်ကို သူမ သတိပြုမိခဲ့သည်။ ထို့အပြင် ဤမီးကို သူမ ပိုမိုအသုံးပြုလေလေ မှော်စွမ်းအင်ဓာတ်များကို ထိန်းချုပ်နိုင်စွမ်း ပိုမိုမြင့်မားလာလေလေဖြစ်ပြီး ကံကြမ္မာမီး၏ သန့်စင်မှုမှာလည်း ပိုမိုတိုးတက်လာခဲ့သည်။

ထို့ကြောင့် သူမသည် ယီပိုင်မင်း၏ တောင်းဆိုချက်ကို သဘောတူလိုက်ပြီး သူ၏ ဝက်ဝံတစ်ကောင်ကဲ့သို့ ပွေ့ဖက်ခြင်းမှလည်း လွတ်မြောက်အောင် ရုန်းထွက်လိုက်တော့သည်။

ယီပိုင်မင်း၏ အလုပ်လုပ်ပုံမှာ တကယ့်ကို မြန်ဆန်လွန်းလှသည်။ ယွင်ရှန်းက သဘောတူသည်နှင့် တစ်ပြိုင်နက် သူသည် သိုလှောင်လက်စွပ်နှစ်ကွင်းကို ချက်ချင်း ထုတ်ပေးလိုက်သည်။

လက်စွပ်တစ်ကွင်းအတွင်း၌ အဆင့်မြင့်လက်နက် ၅၀၀ နှင့် စစ်သုံးသံခမောက် ၅၀၀ ပါဝင်သည်။ အခြားလက်စွပ်တစ်ကွင်းထဲတွင်မူ အမြောက်အမြားရှိသော ခရမ်းရောင်ရွှေရိုင်းများ ပါဝင်နေသည်။ အပြန်အလှန်အားဖြင့် သူသည် သူဌေးကြီးရွှေကို ခေါ်ဆောင်သွားပြီး နောက်ရက်များတွင် သတင်းစောင့်နေရန် ယွင်ရှန်းအား မှာကြားခဲ့သည်။

သိုလှောင်လက်စွပ်ထဲရှိ ခရမ်းရောင်ရွှေရိုင်းပုံကြီးကို ကြည့်ရင်း ယွင်ရှန်းမှာ အလွန်အမင်း ဝမ်းသာသွားရသလို တစ်ဖက်မှာလည်း မမျှတမှုကို ခံစားလိုက်ရသည်။ မြေခွေးယီသည် တကယ့်ကို မရိုးသားသူပင်။ သူ၏ လက်ဝယ်ရှိ ခရမ်းရောင်ရွှေများ၏ အရည်အသွေးနှင့် ပမာဏမှာ သူမထံတွင်ရှိသည်ထက် များစွာ သာလွန်နေပြီး ယခုထုတ်ပေးလိုက်သည်မှာ သူပိုင်ဆိုင်သမျှ၏ အစိတ်အပိုင်းအနည်းငယ်မျှသာ ဖြစ်ဟန်ရှိသည်။

ပါးနပ်သော အပြုံးတစ်ခုမှာ ယွင်ရှန်း၏ မျက်နှာထက်တွင် ပြန့်ကားသွားတော့သည်။

သူမသည် ဟွမ်ချွဲကို ချက်ချင်း ခေါ်ယူလိုက်ပြီး "ဟွမ်ချွဲ... အခုချက်ချင်း အမဲလိုက်စစ်သည်စခန်းကို သွားပြီး ငါတို့ရဲ့ လက်နက်တွေနဲ့ ချပ်ဝတ်တန်ဆာတွေ အကုန်လုံးကို ဒီကို သယ်လာခဲ့။ ပြီးတော့ ဂူဖုန်းကိုလည်း မှော်လှံတံကို ပို့ပေးဖို့ ပြောလိုက်ဦး"

သူမအနေဖြင့် လက်နက်များကို သန့်စင်သွန်းလုပ်မည်ဆိုပါက အားလုံးကို တစ်ပြိုင်တည်း လုပ်ဆောင်ရန် ဆုံးဖြတ်လိုက်ခြင်း ဖြစ်သည်။ အထူးသဖြင့် မြေခွေးယီမှာ လက်နက်သွန်းလုပ်ရန် ခရမ်းရောင်ရွှေ မည်မျှအထိ လိုအပ်သည်ကို အတိအကျ မသိရှိနိုင်သောကြောင့်ပင်။

"ဒီလိုအရှိုက်ကို ထိုးနှက်ရမယ့် အခွင့်အရေးမျိုးကို လက်လွှတ်လိုက်တာက ငတုံးတစ်ယောက်ရဲ့ လုပ်ရပ်ပဲ"

ယွင်ရှန်းသည် တစ်စက္ကန့်မျှ မနားဘဲ အလုပ်ရှုပ်နေတော့သည်။ သူမသည် မှော်မျှော်စင်သို့ တိုက်ရိုက်သွားကာ တံခါးပိတ်ကျင့်ကြံရင်း လက်နက်သွန်းလုပ်ခြင်းကို စတင်လိုက်သည်။

ပထမဦးစွာ နတ်သူငယ် ကံကြမ္မာမီးကို အသုံးပြု၍ ခရမ်းရောင်ရွှေရိုင်းများကို အဆင့်မြင့်ကာ သန့်စင်လိုက်သည်။ ထို့နောက် ကောင်းကင်အမဲလိုက်တပ်ဖွဲ့စစ်သည်များ၏ ချပ်ဝတ်တန်ဆာများ၊ ကာကွယ်ရေးပစ္စည်းများနှင့် လက်နက်အမျိုးမျိုးအတွင်းသို့ ခရမ်းရောင်ရွှေများကို တဖြည်းဖြည်းချင်း ပေါင်းစပ်ထည့်သွင်းလိုက်သည်။

ခရမ်းရောင်ရွှေမှာ မှော်လှံတံများနှင့် မှော်ပစ္စည်းအမျိုးမျိုးတွင်လည်း ပေါင်းစပ်၍ ရနိုင်သည်။ ပေါင်းစပ်မှု လုပ်ဆောင်နေစဉ်အတွင်း ယွင်ရှန်း သဘောပေါက်လိုက်သည်မှာ ခရမ်းရောင်ရွှေသည် တကယ့်ကို ဤတိုက်ကြီး၏ အကောင်းဆုံး သတ္တုရိုင်းဖြစ်နေခြင်းပင်။

လက်နက်နှင့် မှော်ပစ္စည်းများ၏ အဆင့်အတန်းအလိုက် ခရမ်းရောင်ရွှေကို လက်ခံနိုင်စွမ်း ကွာခြားကြသော်လည်း ပေါင်းစပ်ပြီးနောက်တွင် လက်နက်များ၏ ထက်မြက်မှုနှင့် ခိုင်ခံ့မှုမှာ သိသိသာသာ မြင့်တက်လာခဲ့သည်။ မှော်လှံတံများမှာလည်း မှော်စွမ်းအင်နှင့် လိုက်လျောညီထွေရှိမှု ပိုမိုကောင်းမွန်လာသဖြင့် မှော်ဆရာများအနေဖြင့် သူတို့၏ မှော်လှံတံကို ပိုမိုထိရောက်စွာ အသုံးချနိုင်လာတော့သည်။

ဥပမာအားဖြင့် ယန်ချန်းလန်၏ ချပ်ဝတ်တန်ဆာနှင့် လက်နက်များတွင် ယွင်ရှန်း၏ ခရမ်းရောင်ရွှေအချို့ကို ထည့်သွင်းပေးခဲ့ဖူးရာ ထိုစဉ်က ကုန်ကျခဲ့သည့် ပမာဏကို ပြန်တွေးမိတိုင်း ယွင်ရှန်းမှာ နှမြောတသ ဖြစ်နေရဆဲပင်။ သို့သော် ခရမ်းရောင်ရွှေကို အများဆုံး စုပ်ယူလိုက်သည့် ပစ္စည်းမှာ ယွင်ရှန်း၏ လျှို့ဝှက်ဆန်းကြယ် အရိုးမှော်လှံတံပင်။ ကြောင်ရိုးသဖွယ် သွယ်လျလှသော ထိုမှော်လှံတံလေးတစ်ခုတည်းကပင် ယီပိုင်မင်း၏ သိုလှောင်လက်စွပ်ထဲရှိ ခရမ်းရောင်ရွှေ ဆယ်ပုံတစ်ပုံခန့်ကို ဝါးမြိုသွားခဲ့သည်။

ရှန်းကျူမှ နတ်ဘုရားလေဘုရင်က သူမ၏ မှော်လှံတံမှာ သာမန်မှော်ပစ္စည်းမဟုတ်ကြောင်း အရိပ်အမြွက် ပြောခဲ့ဖူးသည်ကိုလည်း သူမ သတိရလိုက်သည်။ ခရမ်းရောင်ရွှေ အနည်းငယ်မျှပင် ထူးခြားသော စွမ်းအားများကို ထုတ်ဖော်ပေးနိုင်ရာ ယခုအခါ ကောင်းကင်အမဲလိုက်

တပ်ဖွဲ့၏ စုစုပေါင်း အင်အားမှာ အနည်းဆုံး ၂၀ ရာခိုင်နှုန်းခန့် မြင့်တက်သွားသည်။

သို့သော် ယွင်ရှန်းသည် ဤအကြောင်းများကို ယီပိုင်မင်းအား ပြောပြရန် အစီအစဉ်မရှိပေ။ မြေခွေးယီက ခရမ်းရောင်ရွှေကြော တစ်ဝက်ခန့်ကို တိတ်တဆိတ် ရယူထားခဲ့သည်ကို တွေးမိတိုင်း သူမမှာ အံကြိတ်နေရဆဲပင်။

မှော်မျှော်စင်အတွင်းရှိ အချိန်များမှာ တရွေ့ရွေ့ ကုန်ဆုံးနေသည်။ ယွင်ရှန်းသည် ပင်ပန်းလာတိုင်း တရားထိုင်ကာ မျှော်စင်အတွင်းရှိ ကြွယ်ဝလှသော မှော်စွမ်းအားများကို အသုံးပြု၍ သူမ၏ စွမ်းအင်များကို ပြန်လည်ဖြည့်တင်းသည်။ ထိုအတောအတွင်း သူမ၏ ရိုးတွင်းခြင်ဆီ ကျောက်စိမ်းကျင့်စဉ်မှာလည်း တိတ်တဆိတ် ပိုမိုသန်မာလာခဲ့သည်။

တစ်ချိန်တည်းမှာပင် ယီပိုင်မင်းသည် သူဌေးကြီးရွှေကို ခေါ်ဆောင်၍ သူ၏ နေအိမ်သို့ ပြန်လည်ရောက်ရှိသွားပြီ ဖြစ်သည်။

သူဌေးကြီးရွှေမှာ ထာဝရမှော်ပစ္စည်းတစ်ခု ဖြစ်သည့်အတွက် လူသားကဲ့သို့ ကိုယ်ပိုင်တွေးခေါ်

နိုင်စွမ်း မရှိပေ။ ၎င်း၏ ဖန်တီးရှင်ဖြစ်သူ ယွင်ရှန်း၏ စိတ်အာရုံမှာသာ ၎င်းအတွက် အမိန့်တော်ဖြစ်သည်။

မထွက်ခွာမီ ယွင်ရှန်းက သူဌေးကြီးရွှေအား ယီပိုင်မင်းနောက်သို့ လိုက်သွားရန်နှင့် ယီပိုင်မင်း ခိုင်းသမျှကို သူမကိုယ်တိုင် ခိုင်းစေသကဲ့သို့ မှတ်ယူ၍ လုပ်ဆောင်ရန် ညွှန်ကြားထားခဲ့သည်။

ယီပိုင်မင်းသည် လေ့ကျင့်ရေးဝတ်စုံသို့ လဲလှယ်လိုက်ပြီး သူဌေးကြီးရွှေကို သူ၏ ကိုယ်ပိုင်ဝင်းအတွင်း တည်ဆောက်ထားသော သီးသန့်လေ့ကျင့်ရေးခန်းမသို့ ခေါ်ဆောင်သွားခဲ့သည်။ ဝူရွှမ်ဝူကျိခန်းမ၏ အတွင်းခန်းမရှိ အဆောင်အယောင်များမှာ အပြင်ဘက်ထက် များစွာ သာလွန်ကောင်းမွန်လှသည်။ အတွင်းခန်းမ၏ ထိပ်တန်းတပည့်ဖြစ်သူ ယီပိုင်မင်းသည် သူ၏ လိုအပ်ချက်အရ မည်သို့သော လေ့ကျင့်ရေးခန်းမမျိုးကိုမဆို စိတ်ကြိုက် တည်ဆောက်ခွင့်ရှိသည်။

သူဌေးကြီးရွှေလေ့ကျင့်ရေးခန်းမအတွင်းသို့ ခြေချလိုက်သည်နှင့် ခြေလှမ်းတိုင်းမှာ လေးလံထိုင်းမှိုင်းသွားသည်ကို ခံစားလိုက်ရသည်။ ထာဝရမှော်ပစ္စည်းတစ်ခုအနေဖြင့် ဤအခန်း၏ ထူးခြားမှုကို ၎င်း အာရုံခံမိခြင်းပင်။ လေ့ကျင့်ရေးခန်းမှာ အလွန်မကျယ်ဝန်းဘဲ ၁၀ စတုရန်းမီတာခန့်သာ ရှိသော်လည်း ထောင့်လေးထောင့်စီတွင် မှော်စွမ်းအင်များ ထုတ်လွှတ်နေသော မှော်အစီအရင်များ ရှိနေသည်။

ဤမှော်အစီအရင်များမှာ ထူးခြားလှသည်။ အခန်းထဲသို့ ဝင်လာသူတိုင်းမှာ ပေါင်ချိန်တစ်ထောင်ခန့်ရှိသော ကျောက်ခြင်္သေ့ကြီးတစ်ကောင်ကို ကျောပိုးထားရသကဲ့သို့ ခံစားရစေပြီး လှုပ်ရှားရသည်မှာ အလွန်ပင် ခက်ခဲလှသည်။ သို့သော် ယီပိုင်မင်းကို ကြည့်ရသည်မှာ သာမန်အတိုင်းပင် ဖြစ်နေသည်။ ၎င်းမှာ သူသည် ဤကဲ့သို့သော အခြေအနေမျိုးတွင် ကြာရှည်စွာ လေ့ကျင့်ခဲ့ပြီး အသားကျနေပြီဖြစ်ကြောင်း သက်သေပြနေသည်။

"မင်း အမဲလိုက်စစ်သည်မြို့တော်တွေမှာ ဘယ်နှစ်ပွဲပဲ နိုင်ခဲ့နိုင်ခဲ့... ငါပြောရဲတာက မင်းသင်ယူခဲ့တဲ့ တိုက်ခိုက်ရေးပညာတွေနဲ့ မှော်ပညာတွေဟာ အပေါ်ယံ ဟန်ပြ အမှိုက်တွေပဲ။ အမှိုက်ဆိုတာ လွှင့်ပစ်ရမှာပဲ"

ယီပိုင်မင်း၏ လေသံမှာ ရုတ်တရက် ပြောင်းလဲသွားပြီး တစ်ကိုယ်လုံးမှ ကြောက်မက်ဖွယ်ကောင်းသော ရန်လိုသည့် အရှိန်အဝါများ ထွက်ပေါ်လာသည်။ နေ့ခင်းဘက်တွင် မြင်တွေ့ရလေ့ရှိသော ပျော့ပျောင်းသည့် ပိုင်မင်းမင်းသားမှာ ပျောက်ကွယ်သွားခဲ့ပြီ ဖြစ်သည်။ သို့မဟုတ်လျှင် ဤအသွင်မှာ သူ၏ စစ်မှန်သော မျက်နှာဖုံး ဖြစ်ပေလိမ့်မည်။

သူဌေးကြီးရွှေမှာ အတိုင်းအတာတစ်ခုအထိ နားလည်လိုက်သည်။ ၎င်း၏ သခင်မဖြစ်သူ ယွင်ရှန်းပင်လျှင် ၎င်းကို ဤကဲ့သို့သော လေသံမျိုးဖြင့် တစ်ခါမျှ စကားမပြောခဲ့ဖူးပေ။ ကျိုးချွမ်နှင့် အချိန်အတော်ကြာ နေထိုင်ခဲ့ဖူးသဖြင့် လူသားတို့၏ စကားကို အနည်းငယ် သဘောပေါက်နေပြီ ဖြစ်သည်။

ယီပိုင်မင်း၏ ရန်လိုသော လေသံကြောင့် သခင်မဟုတ်သူတစ်ဦးက သူ့ကို ဤကဲ့သို့ ဆက်ဆံခြင်းအပေါ် သူဌေးကြီးရွှေမှာ မကျေမနပ် ဖြစ်သွားရသည်။

"မကျေနပ်ဘူးလား ဒါဆိုလည်း လာခဲ့လေ... မင်းကျေနပ်သွားတဲ့အထိ ဒီမင်းသားက ဆုံးမပေးမယ်"

ယီပိုင်မင်းသည် သူ၏ ခန္ဓာကိုယ်အတွင်းမှ စွမ်းအင်များကို စုစည်းလိုက်ရာ လက်ဖဝါးထက်တွင် တိုက်ခိုက်ရေးစိတ်ဝိညာဉ်များ ဝဲကရက်သဖွယ် လှည့်ပတ်လာတော့သည်။ ထိုစွမ်းအင်များသည် လျင်မြန်စွာပင် ဖိသိပ်သွားပြီး သူ၏လက်ဖဝါးကို ရေနှင့်မီးပင် မဖောက်နိုင်သော လက်ဝှေ့လက်အိတ်ကြီးများအလား ဖုံးလွှမ်းသွားသည်။

ယီပိုင်မင်း၏ လက်မောင်းမှာ တုန်ခါသွားပြီး ပြင်းထန်လှသော တိုက်ခိုက်ရေးစိတ်ဝိညာဉ်များနှင့်အတူ အလွန်ရက်စက်ကြမ်းကြုတ်သော လက်သီးတစ်ချက်ကို ထိုးနှက်လိုက်သည်။

"ဝူးးး"

ဝေလငါးကြီးတစ်ကောင် ရုန်းကန်လိုက်သကဲ့သို့ ပြင်းထန်သော စွမ်းအင်လှိုင်းကြီးတစ်ခု သူ၏ ခန္ဓာကိုယ်မှ ရုတ်တရက် ပေါက်ကွဲထွက်လာသည်။

လေထုတစ်ခုလုံး စုတ်ပြဲသွားသည့်အလား ထစ်ချုန်းသံနှင့်အတူ သူ၏လက်ထဲတွင် နက်မှောင်သော တိုက်ခိုက်ရေးစွမ်းအင်လုံးတစ်ခု ပေါ်လာတော့သည်။ ထိုစွမ်းအင်လုံးမှာ အလွန်ထူးခြားလှသည်။ ၎င်းမှာ စကြဝဠာထဲရှိ တွင်းနက်တစ်ခုကဲ့သို့ပင် မည်းနက်နေပြီး ဘေးပတ်ဝန်းကျင်ရှိ တိုက်ခိုက်ရေးစိတ်ဝိညာဉ်များနှင့် မှော်စွမ်းအင်ဓာတ်အားလုံးကို ချက်ချင်း ဝါးမြိုပစ်နိုင်စွမ်း ရှိသည်။

ယီပိုင်မင်းသည် လေထဲသို့ ခုန်တက်လိုက်ရာ သူ၏ပုံရိပ်မှာ အရိပ်တစ်ခုအဖြစ် ပြောင်းလဲသွားသည်။ မျက်တောင်တစ်ခတ်အတွင်းမှာပင် သူဌေးကြီးရွှေ၏ ဘေးသို့ ရောက်ရှိသွားပြီး လက်ထဲမှ နက်မှောင်သော စွမ်းအင်လုံးဖြင့် သူဌေးကြီးရွှေကို အဝေးသို့ ရိုက်ထုတ်လိုက်တော့သည်။

သူဌေးကြီးရွှေမှာ အဝေးသို့ လွင့်စင်သွားရသည်။ ၎င်းကို ခရမ်းရောင်ရွှေရိုင်းဖြင့် ပြုလုပ်ထားသဖြင့် မည်သည့်တိုက်ခိုက်မှုမျိုးကမျှ ၎င်းကို သေစေနိုင်လောက်သည့် ဒဏ်ရာမျိုး မပေးနိုင်ပေ။ သို့သော် ယခုတစ်ကြိမ်တွင်မူ ၎င်းသည် ပြန်လည်ထရပ်ရန် အတော်ပင် ရုန်းကန်နေရသည်။

၎င်း၏ ရင်ဘတ်တွင် ချိုင့်ဝင်သွားသော အရာတစ်ခု ပေါ်လာသည်။ ထိုချိုင့်ခွက်မှာ အံ့သြစရာကောင်းလောက်အောင်ပင် ချက်ချင်း ပြန်လည်ကောင်းမွန်မလာနိုင်ပေ။ ထိုထက်ပင် ပို၍ နားမလည်နိုင်စရာ ကောင်းသည်မှာ သူဌေးကြီးရွှေအနေဖြင့် တစ်ဖက်လူ၏ တိုက်ကွက်ကို လုံးဝတုပ၍ မရနိုင်ခြင်းပင်။

အရမ်း အစွမ်းထက်လွန်းတယ်။ ဒီလူက တကယ့်ကို အစွမ်းထက်လွန်းတယ်။

လူသားကဲ့သို့ ကိုယ်ပိုင်အတွေးအခေါ် မရှိသော်လည်း သူဌေးကြီးရွှေမှာ ဤအချက်ကို ကောင်းကောင်းသဘောပေါက်သွားတော့သည်။

"မှတ်ထားပါ... ဒါက မင်းဘယ်တော့မှ သင်ယူလို့မရမယ့် ပထမဆုံး တိုက်ခိုက်ရေးစွမ်းရည်ပဲ။ ဒါကို ကီရင်နက်မီးတောက်လို့ ခေါ်တယ်။ မင်းဒါကို နားလည်အောင် ဒါမှမဟုတ် သင်ယူအောင် ကြိုးစားစရာ မလိုဘူး။ ငါပြောချင်တာက ငါ့ကိုလာပြီး မဆန့်ကျင်ဖို့ပဲ။ ငါ့ကို ဆန့်ကျင်တဲ့သူဆိုရင် ထာဝရမှော်ပစ္စည်းပဲဖြစ်ဖြစ် ဒီမင်းသားက မျက်တောင်တစ်ခတ်အတွင်းမှာ ဖျက်ဆီးပစ်နိုင်တယ်။ နောက်လာမယ့် တစ်ရက်နဲ့ တစ်ညမှာ ငါသင်ပေးသမျှ တိုက်ခိုက်ရေးပညာအားလုံးကို မင်းသင်ယူရမယ်။ အဲဒီပညာတွေက တောကြောင်မလေးကို ကာကွယ်ပေးမယ့် မင်းရဲ့ အကောင်းဆုံးလက်နက်တွေ ဖြစ်လာလိမ့်မယ်။ အဲဒါတွေကို သတ်ဖြတ်ရေး တိုက်ခိုက်မှုပညာလို့ ခေါ်ကြစို့"

ယီပိုင်မင်းက အေးစက်စွာ ပြောလိုက်သည်။ ဤအချိန်တွင် သူသည် အရာအားလုံးကို ငုံ့ကြည့်နေသော အမြင့်မြတ်ဆုံး သတ်ဖြတ်ရေးနတ်ဘုရားတစ်ဦးကဲ့သို့ပင်။

***

Book List