Book List

<h2 style="text-align: center;">အပိုင်း(၅၀၁)</h2> <h2 style="text-align: center;">ပထမဆုံး စမ်းသပ်ပျံသန်းခြင်း</h2> <h2 style="text-align: center;">*</h2> <p> </p> <p> </p> <p> </p> <p> </p> <p>၂၀၁၉ ခုနှစ် မေလသို့ ရောက်သောအခါ "အာကာသယာဉ်တွင်း လုံခြုံရေး စီမံခန့်ခွဲမှုဌာန" ဟူသော ဌာနသစ်တစ်ခု တိတ်တဆိတ် ထွက်ပေါ်လာခဲ့သည်။</p> <p>ဌာနစတင် ဖွဲ့စည်းသည့် ပထမဆုံးနေ့မှာပင် စက်ရုံများနှင့် သုတေသနဌာနများအတွက် ပြည်တွင်း ပြုပြင်ပြောင်းလဲရေး ညွှန်ကြားချက် စာတမ်းတစ်စောင်ကို ထုတ်ပြန်လိုက်သည်။</p> <p>ပထမအချက် - အာကာသယာဉ်အတွင်း အလွယ်တကူ ရွှေ့ပြောင်းနိုင်သော မည်သည့်ပစ္စည်းကိုမဆို ကုန်းပတ်ပေါ်ရှိ လျှို့ဝှက်သော့ခလောက်များဖြင့် ချိတ်ဆက် သော့ခတ်ထားရမည်။</p> <p>မဖြစ်မနေ ရွှေ့ပြောင်းရမည့် ပေါ့ပါးသော ကိရိယာအချို့ကို အသုံးပြုပြီးပါက အသေတပ်ဆင်ထားသော သိုလှောင်သေတ္တာများထဲသို့ ချက်ချင်း ပြန်လည် ထည့်သွင်းရမည်။</p> <p>ဒုတိယအချက် - စက်ရုံအတွင်းပိုင်း နံရံများတွင် နူးညံ့သော အကာအကွယ်များ ထပ်မံတပ်ဆင်ရမည်။</p> <p>တတိယအချက် - တုန်ခါမှုဒဏ်ကို မခံနိုင်သော စက်ကိရိယာအချို့၏ အလုပ်မလုပ်ပုံနှင့် အန္တရာယ်ရှိနိုင်စွမ်းကို အကဲဖြတ်စစ်ဆေးရမည်။</p> <p>စတုတ္ထအချက် - စက်ရုံများနှင့် ဌာနအသီးသီးသည် အစိုးရမှ ထုတ်ပြန်ထားသော ဘေးကင်းလုံခြုံရေး စည်းမျဉ်းများကို တင်းကျပ်စွာ လိုက်နာရမည်ဖြစ်ပြီး မည်သည့်အကြောင်းပြချက်နှင့်မျှ ချိုးဖောက်ခွင့် မရှိစေရ။</p> <p>...</p> <p>ထို့နောက် တစ်လခန့်အကြာတွင် ထို "အာကာသယာဉ်တွင်း လုံခြုံရေး စီမံခန့်ခွဲမှုဌာန" မှ ဝန်ထမ်းများအားလုံးနီးပါး အင်တိုက်အားတိုက် ဆင်းလာကြပြီး စက်ရုံကြီးများနှင့် ဌာနအသီးသီး၏ ပြုပြင်ပြောင်းလဲမှု အခြေအနေများကို တစ်ရုံပြီးတစ်ရုံ အသေအချာ လိုက်လံစစ်ဆေးကြတော့သည်။</p> <p>၎င်းနောက်တွင်တော့ ဤပြုပြင်ပြောင်းလဲရေး လှိုင်းတံပိုးက လူနေရပ်ကွက်များဆီသို့ပါ ကူးစက်သွားပြီး အိမ်တိုင်းစေ့နီးပါးအထိ ထိုးဖောက်ဝင်ရောက်သွားခဲ့သည်။</p> <p>အာကာသယာဉ်အတွင်းရှိ အခြေအနေက ပိုမိုလေးနက် တင်းမာလာပြီး အကဲခတ်ကောင်းသူ အချို့ကမူ တစ်စုံတစ်ရာကို ရိပ်မိနေကြပြီ ဖြစ်သည်။</p> <p>မေလ၏ နောက်ဆုံးရက်သို့ ရောက်သောအခါ စက်ရုံများနှင့် သုတေသနဌာနများ အားလုံးသာမက အစိုးရဝန်ထမ်း အများစုကိုပါ အားလပ်ရက် ပေးလိုက်သည်။</p> <p>ထိုအခါမှသာ မိမိတို့ ခြေအောက်ရှိ ဧရာမ အာကာသယာဉ်ကြီးသည် မကြာမီ ပထမဆုံးအကြိမ် စမ်းသပ်ပျံသန်းတော့မည် ဖြစ်ကြောင်းကို လူတိုင်း သိရှိသွားကြတော့သည်။</p> <p>စိုးရိမ်ပူပန်မှု လေထုက လူ့အဖွဲ့အစည်း တစ်ခုလုံးကို ဖုံးလွှမ်းသွားခဲ့၏။ ဤယာဉ်ပျံထဲတွင် နေထိုင်လာခဲ့သည်မှာ ကြာမြင့်နေပြီ ဖြစ်သောကြောင့် မိမိတို့ ခြေအောက်ရှိ နေရာသည် ကုန်းမြေမဟုတ်ဘဲ ကြီးမားခမ်းနားလှသော အာကာသယာဉ်ကြီး တစ်စီးသာ ဖြစ်ကြောင်းကို လူအများစုက မေ့လျော့လုနီးပါး ဖြစ်နေကြချေပြီ။</p> <p>လူသားများသည်လည်း အမှန်တကယ် ငြိမ်းချမ်းသွားခဲ့ခြင်း မဟုတ်ဘဲ မကြာမီ အချိန်အတွင်း ထွက်ပြေးတိမ်းရှောင်ရတော့မည် ဖြစ်သည်။</p> <p>...</p> <p>နောက်တစ်နေ့ နံနက်ခင်းတွင်တော့ ယခင်က ဆူညံပွက်လောရိုက်နေတတ်သော လူနေရပ်ကွက်များသည် အထူးတလည် တိတ်ဆိတ်ငြိမ်သက်နေပြီး လမ်းမများပေါ်တွင်လည်း လူသူတစ်ယောက်မျှ မရှိတော့ပေ။</p> <p>"မိဘပြည်သူများခင်ဗျာ... အာကာသယာဉ်ကြီးဟာ မကြာမီမှာ ပထမဆုံး စမ်းသပ်ပျံသန်းမှုကို ပြုလုပ်တော့မှာ ဖြစ်ပါတယ်"</p> <p>"ဒါကြောင့် နေထိုင်သူများအားလုံး ဘေးကင်းလုံခြုံရေး ကိရိယာတွေကို တပ်ဆင်ထားကြပြီး အပြင်ကို လျှောက်မသွားကြဖို့ မေတ္တာရပ်ခံအပ်ပါတယ်"</p> <p>"ဒီတစ်ကြိမ် စမ်းသပ်ပျံသန်းမှုဟာ မနက် ရှစ်နာရီခွဲကနေ စတင်မှာဖြစ်ပြီး ငါးနာရီကြာမြင့်မှာ ဖြစ်ပါတယ်... နေ့လယ် တစ်နာရီခွဲမှာ ပြီးဆုံးမှာဖြစ်ပြီး အသေးစိတ် အချက်အလက်တွေကို သတင်းကွန်ရက်မှာ ဝင်ရောက်ကြည့်ရှုနိုင်ပါတယ်"</p> <p>နံနက် ရှစ်နာရီတိတိတွင် ညင်သာသော အီလက်ထရွန်းနစ် အသံတစ်သံက လူနေရပ်ကွက်များ၏ ကောင်းကင်ယံမှ ထွက်ပေါ်လာသည်။</p> <p>စမ်းသပ်ပျံသန်းတော့မည့် သတိပေးသံကို ကြားလိုက်ရသောအခါ ချွေ့ဝေ့ချွမ်က တိတ်တဆိတ် သက်ပြင်းရှည်ကြီးတစ်ခုကို ရှိုက်သွင်းလိုက်သည်။</p> <p>သူတို့ မိသားစု သုံးယောက်လုံးမှာ စောစောစီးစီးကတည်းက ဘေးကင်းလုံခြုံရေး ကိရိယာများကို တပ်ဆင်ထားပြီး ဖြစ်သည်။</p> <p>ဘေးနားရှိ သမီးလေး၏ မျက်နှာမှာ စိုးရိမ်ထိတ်လန့်မှုကြောင့် ဖြူဖျော့နေပြီး သူမက ကြည်လင်သော အသံလေးဖြင့် မေးလိုက်၏။</p> <p>"ဖေဖေ... သမီးတို့ ဘာမှမဖြစ်ဘူးမလားဟင်"</p> <p>ချွေ့ဝေ့ချွမ်က အလျင်အမြန်ပင် တောင့်တင်းနေသော အပြုံးတစ်ခုကို ဖန်တီးလိုက်ပြီး ပေါ့ပေါ့ပါးပါး ဟန်ဆောင်ကာ ပြောလိုက်သည်။</p> <p>"စိတ်ချပါ... ဟိုအာကာသယာဉ်လေးကို သမီး သိတယ်မလား"</p> <p>"သမီးတို့ စီးလာခဲ့တဲ့ တစ်စီးလား"</p> <p>သမီးဖြစ်သူက အနည်းငယ် ကြောက်ရွံ့နေသော မျက်နှာလေးဖြင့် ပြန်ဖြေလေသည်။</p> <p>"ဟုတ်တယ်... အဲဒီယာဉ်ကို သမီးက တစ်ခါပဲ စီးဖူးပေမယ့် ဖေဖေကတော့ အကြိမ်ကြိမ် စီးဖူးတယ်လေ... တစ်ခါမှ ပြဿနာ မဖြစ်ခဲ့ဘူး... စီးရတာ တအားသက်တောင့်သက်သာ ရှိတာ... တုန်ခါမှုလေးတောင် မရှိဘူး... ဘာမှတောင် မခံစားရဘဲ ကမ္ဘာမြေကို ချက်ချင်းရောက်သွားတာ"</p> <p>"အခု ဖေဖေတို့ စီးမယ့် အာကာသယာဉ်ကြီးက အဲဒီယာဉ်ငယ်လေးထက် အများကြီး ပိုပြီး ခေတ်မီတယ်... လုံးဝ ဘာမှဖြစ်မှာ မဟုတ်ဘူး... သမီး စိတ်ချလက်ချသာ နေလိုက်... တကယ်တော့ ဖေဖေ့အထင် ပြောရရင် ဒီတစ်ခါက သိပ်ပြီး အကျယ်ချဲ့လွန်းနေတာ... ဒီလို ယာဉ်မျိုးက ပျံသန်းတဲ့အခါ ပိုပြီးတော့တောင် ငြိမ်သေးတယ်... တုန်ခါတာမျိုးတောင် ရှိမှာမဟုတ်ဘူး"</p> <p>"ဒါက လုံခြုံရေးအတွက်နေမှာပါ... အရင်တုန်းက ကားမောင်းရင်တောင် ထိုင်ခုံခါးပတ် ပတ်ရသေးတာပဲ မဟုတ်လား"</p> <p>သမီးဖြစ်သူက ကြည်လင်စွာ ရယ်မောရင်း ပြောလိုက်ရာ သူမ၏ မျက်နှာထားမှာ တော်တော်လေး ပေါ့ပါးသွားခဲ့ပြီ ဖြစ်သည်။</p> <p>ချွေ့ဝေ့ချွမ်သည် သမီးငယ်ကို နှစ်သိမ့်ပြီးနောက် ဇနီးဖြစ်သူကိုပါ စတင် ဂရုစိုက်ရပြန်သည်။</p> <p>"ဒီလုံခြုံရေး ကိရိယာက ဗိုက်ကိုများ ထိခိုက်နိုင်မလား"</p> <p>ချွေ့ဝေ့ချွမ်က ဇနီးဖြစ်သူ၏ ဗိုက်ကြီးကို ကြည့်ကာ စိုးရိမ်တကြီးဖြင့် မေးလိုက်၏။ ထိုစဉ်က ဇနီးဖြစ်သူအား နည်းပညာသစ်ကို အသုံးပြုကာ ကိုယ်ဝန်ဆောင်စေရန် သူ သိပ်သဘောမကျခဲ့ပေ။</p> <p>မည်သို့ပင်ဆိုစေကာမူ ဤသို့ ဗီဇပြုပြင်ထားသော ကလေးသည် မိမိ၏ သွေးသား အစစ်အမှန် ဟုတ်မဟုတ်ကို သူ သေချာမသိချေ။</p> <p>အကယ်၍ မွေးလာသောအခါ မိမိတို့နှင့် တစ်စက်ကလေးမျှ မတူဘဲ သူတစ်ပါး၏ အတင်းအဖျင်း ပြောဆိုခြင်းကို ခံရပါက ရင်ထဲတွင် တော်တော်လေး ခံရခက်မည် ဖြစ်သည်။</p> <p>သို့သော်လည်း ထိုအချိန်က စွဲလမ်းရူးသွပ်နေသည့် ဇနီးဖြစ်သူ၏ ပုံစံကို ကြည့်ကာ နောက်ဆုံးတွင်တော့ သူ သဘောတူခွင့်ပြုပေးခဲ့ရခြင်း ဖြစ်သည်။</p> <p>ယခုအခါ ဇနီးသည် ကိုယ်ဝန်ဆောင်ထားသည်မှာ ကိုးလနီးပါး ရှိနေပြီဖြစ်ကာ မီးဖွားရမည့်ရက်သို့ ရောက်လုနီးပါး ဖြစ်နေပြီလေ။</p> <p>ဤစမ်းသပ်ပျံသန်းမှုကို ယနေ့တွင် ပြုလုပ်မည်ဟု မည်သူက သိထားမည်နည်း။ နောက်ထပ် တစ်လလောက် ဆုတ်ဆိုင်းလိုက်လျှင် ပိုကောင်းမည် ဖြစ်သည်။</p> <p>"ဒါက ကိုယ်ဝန်ဆောင်တွေအတွက် သီးသန့်ထုတ်ထားတာမို့ ဘာမှမဖြစ်လောက်ပါဘူး"</p> <p>ဇနီးဖြစ်သူက စိုးရိမ်နေသော မျက်နှာဖြင့် ဗိုက်ကို ပွတ်သပ်ကာ နှစ်သိမ့်လိုက်သည်။</p> <p>ချွေ့ဝေ့ချွမ်က အာကာသဝတ်စုံနှင့်တူသော ဖောင်းကားကား လုံခြုံရေးကိရိယာကို ကြည့်ကာ အနည်းငယ် သက်ပြင်းချလိုက်မိသည်။</p> <p>အစိုးရက ဤကိုယ်ဝန်ဆောင် မိခင်များကို အထူး ဂရုစိုက်ထားသည်ဟု ဆိုရမည်ပင်။ ကိုယ်ဝန်ဆောင်ပြီးနောက် နေ့စဉ် အသားဟင်းများကို အခမဲ့ ထောက်ပံ့ပေးရုံသာမက စမ်းသပ်ပျံသန်းမှု မတိုင်မီ ရက်အနည်းငယ်အလိုတွင် လုံခြုံရေး ကိရိယာများကိုလည်း ကိုယ်ဝန်ဆောင် သီးသန့်သုံး ကိရိယာများဖြင့် လဲလှယ်ပေးခဲ့သည်။</p> <p>ထိုစဉ် ဇနီးဖြစ်သူက ရုတ်တရက် မျက်မှောင်ကြုတ်သွားပြီး ဗိုက်ကို ဖိကာ နာကျင်နေသော မျက်နှာအမူအရာ ဖြစ်သွားလေသည်။</p> <p>"ဘာဖြစ်လို့လဲ... မွေးတော့မလို့လား"</p> <p>ချွေ့ဝေ့ချွမ်က ရင်ထိတ်သွားကာ အလျင်အမြန် မေးလိုက်၏။</p> <p>"မဟုတ်ဘူး... ကလေးက ထပ်ကန်နေပြန်ပြီ"</p> <p>ဇနီးဖြစ်သူက အနည်းငယ် သက်သာသွားပြီးနောက် သက်ပြင်းတစ်ချက်ချကာ ချွဲနွဲ့သောလေသံဖြင့် ပြောလိုက်သည်။</p> <p>"သူ့အားက တအားကြီးတာပဲ... ဗိုက်တောင် ပေါက်ထွက်တော့မလိုပဲ... ကြီးလာရင်တော့ အတော်ဆိုးမယ့် ကလေးပဲ ဖြစ်ရမယ်"</p> <p>သေချာပေါက် အားကြီးမည်သာ ဖြစ်သည်။ ဤမျိုးဆက်သစ် လူသားများကို ကမ္ဘာပျက်ကပ်ဘေး မတိုင်မီက အခြေအနေနှင့် နှိုင်းယှဉ်ပါက တစ်ယောက်ချင်းစီတိုင်းသည် စူပါမင်းအဆင့်တွင် ရှိနေကြသည်။</p> <p>လက်ရှိ လူသားများ၏ ခန္ဓာကိုယ် ကြံ့ခိုင်မှုကသာ ပိုမို အားကောင်းမနေပါက ဤကလေးများကို မွေးဖွားနိုင်ရန်မှာ အမှန်တကယ် လွယ်ကူသော ကိစ္စတစ်ရပ် မဟုတ်ပေ။</p> <p>အချိန်များက တစ်မိနစ်ပြီးတစ်မိနစ် ကုန်လွန်သွားခဲ့ပြီး အပြင်ဘက်ရှိ အသံချဲ့စက်များမှ ထပ်တလဲလဲ သတိပေးသံများနှင့်အတူ နံနက် ရှစ်နာရီခွဲသို့ အလျင်အမြန် ရောက်ရှိလာခဲ့သည်။</p> <p>ဤအခိုက်အတန့်တွင် လူတိုင်း အသက်အောင့်ထားမိကြသည်။</p> <p>...</p> <p>ထိုအချိန်တွင် အာကာသယာဉ်၏ အမြီးပိုင်း တစ်ဖက်တစ်ချက်စီ၌ တပ်ဆင်ထားသော အချင်း ပေ ၁၃၀ ကျော်ခန့်ရှိသည့် ဧရာမ အင်ဂျင်အိတ်ဇောပေါက် ရှစ်ခုက စတင် အပူပေးလာခဲ့သည်။</p> <p>အပူချိန် ပြင်းထန်လှသော မီးတောက်ကြီးများက တဝုန်းဝုန်းဖြင့် ပြတ်တောင်းပြတ်တောင်း ပန်းထွက်လာခဲ့၏။</p> <p>စက္ကန့်အနည်းငယ် အကြာတွင် အာကာသယာဉ်ကြီးက သတိမပြုမိနိုင်လောက်အောင် အနည်းငယ် တုန်ခါသွားပြီးနောက် ခရုတစ်ကောင်၏ အမြန်နှုန်းကဲ့သို့ ဖြည်းညင်းစွာ စတင် ပျံသန်းလေတော့သည်။</p> <p>မိနစ်အနည်းငယ် အကြာတွင် မီးတောက်များက သွေးခုန်နှုန်းလှိုင်း အလင်းတန်းများအဖြစ်သို့ ပြောင်းလဲသွားပြီး အမှောင်ထု လွှမ်းမိုးနေသော အာကာသဟင်းလင်းပြင်ကြီးကို ထူးဆန်းလှပသော အရောင်အသွေးများဖြင့် တန်ဆာဆင်လိုက်တော့သည်။</p> <p>အာကာသယာဉ်၏ အမြန်နှုန်းက တဖြည်းဖြည်းချင်း စတင် မြင့်တက်လာခဲ့သည်။</p> <p>ဤဘက်သို့ အရှိန်အဟုန်ဖြင့် ပျံသန်းလာသော ဥက္ကာခဲ တစ်လုံးသည် အာကာသယာဉ်နှင့် မဝင်တိုက်မိမီမှာပင် မည်သည့်နေရာမှန်း မသိရသော နေရာမှ ပစ်လွှတ်လိုက်သည့် စွမ်းအင်မြင့် လေဆာတန်းတစ်ခု၏ ထိမှန်မှုကို ခံလိုက်ရပြီး မျက်စိတစ်မှိတ်အတွင်းမှာပင် အငွေ့ပျံကာ ပျောက်ကွယ်သွားခဲ့သည်။</p> <p>ဤအချိန်တွင် အာကာသယာဉ်၏ ဗဟိုထိန်းချုပ်ရေးခန်း၌ ခုံလွတ်တစ်ခုမျှ မကျန်တော့ပေ။</p> <p>လော်ယွမ် အပါအဝင် အာကာသယာဉ် အမှုထမ်းများသာမက အထက်တန်း အရာရှိများ အားလုံးပါ တစ်နေရာတည်းတွင် စုဝေးနေကြပြီး ဤစမ်းသပ်ပျံသန်းမှုကို အသေအချာ စောင့်ကြည့်နေကြသည်။</p> <p>"အာကာသယာဉ်က ဆက်လက် အရှိန်တင်နေပါတယ်... တစ်စက္ကန့်ကို ဒသမ ၆ မိုင်နှုန်းပါ"</p> <p>"တစ်စက္ကန့်ကို ဒသမ ၇ မိုင်နှုန်းပါ"</p> <p>"တစ်စက္ကန့်ကို ဒသမ ၇၅ မိုင်နှုန်းပါ"</p> <p>ပထမဆုံးအကြိမ် စမ်းသပ်ပျံသန်းမှု ဖြစ်သောကြောင့် အရာအားလုံးကို တည်ငြိမ်မှု အဓိကထား၍ ဆောင်ရွက်နေရပြီး အာကာသယာဉ်၏ အရှိန်မြှင့်တင်မှုမှာ အတော်လေး နှေးကွေးနေခဲ့သည်။</p> <p>ပင်မထိန်းချုပ်ရေးခုံ၏ ဘယ်ဘက်ရှိ ဧရာမ သုံးဖက်မြင် ဖန်သားပြင် ငါးခု ခြောက်ခုခန့်ပေါ်တွင် မရေမတွက်နိုင်သော အချက်အလက်များနှင့် တွက်ချက်မှု ပုံသေနည်းများက လျင်မြန်စွာ ပြောင်းလဲနေသည်။</p> <p>အများစုမှာ မျက်စိတစ်မှိတ်အတွင်း လင်းလက်သွားပြီးနောက် ပျောက်ကွယ်သွားတတ်ရာ သာမန်လူ အများစုအတွက်မူ ထိုအချက်အလက်များကို တစ်ချက်ကြည့်လိုက်ရုံဖြင့် ခေါင်းမူး မျက်စိလည်သွားစေနိုင်သည်။</p> <p>အရှိန်ပြင်းပြင်းဖြင့် ရွေ့လျားနေသော အာကာသယာဉ်တစ်စီးကို မောင်းနှင်ရသည်မှာ အလွန်တရာ ရှုပ်ထွေးခက်ခဲလှသော ကိစ္စရပ်တစ်ခု ဖြစ်သည်။</p> <p>အာကာသထဲတွင် အချိန်မရွေး ဥက္ကာခဲများနှင့် ကြုံတွေ့နိုင်ရုံသာမက အနီးအနားရှိ ဂြိုဟ်များနှင့် ကြယ်များ၏ ဆွဲငင်အားကလည်း အာကာသယာဉ်၏ လမ်းကြောင်းအပေါ် သက်ရောက်မှု ရှိစေနိုင်သည်။</p> <p>ဤအရာများတွင် တွက်ချက်မှု အမြောက်အမြား ပါဝင်နေသည်။ အာကာသယာဉ် အနေဖြင့် ဥက္ကာခဲ တစ်လုံးချင်းစီ၏ ရွေ့လျားမည့် လမ်းကြောင်းကို ကြိုတင် တွက်ချက်ထားရန် လိုအပ်သည့်အပြင် တစ်ချိန်တည်းမှာပင် အာကာသယာဉ်၏ ပျံသန်းမှု လမ်းကြောင်းကိုလည်း အဆက်မပြတ် ပြုပြင်ပေးနေရသည်။</p> <p>အကယ်၍ တွက်ချက်မှု အမြောက်အမြားကို တာဝန်ယူ လုပ်ဆောင်ပေးနိုင်မည့် အစွမ်းထက်သော ပင်မထိန်းချုပ်ရေး ဉာဏ်ရည်တု ကွန်ပျူတာသာ မရှိပါက အာကာသအတွင်း ပျံသန်းရာတွင် ကံတရားကိုသာ အားကိုးရပေလိမ့်မည်။ ကံကောင်းပါက ဘေးအန္တရာယ်ကင်းရှင်းမည် ဖြစ်ပြီး ကံမကောင်းပါက ယာဉ်ရော လူပါ ပျက်စီးသေဆုံးရမည် ဖြစ်သည်။</p> <p>ဤအချက်အလက်များက ခြောက်ကပ်ပြီး ပျင်းစရာကောင်းလှသည်။ ဉာဏ်ပညာဆေးရည် သောက်သုံးထားသော သင်္ချာပညာရှင်များက စိတ်ထဲမှနေ၍ တိတ်တဆိတ် တွက်ချက်နေကြသည်မှလွဲ၍ ကျန်သူများမှာ ထိုအရာများကို သိပ်ပြီး ဂရုမစိုက်ကြပေ။</p> <p>အထက်တန်း အရာရှိကြီးများ၏ အာရုံစိုက်မှု အများစုမှာ အလယ်ဗဟိုရှိ ပုံရိပ်ယောင် မြင်ကွင်းပေါ်တွင်သာ ရှိနေကြသည်။</p> <p>ပုံရိပ်ယောင် မြင်ကွင်းပေါ်ရှိ ရုပ်ထွက်များက အပြင်ဘက်ရှိ အစစ်အမှန် မြင်ကွင်းထက် ပိုမို လင်းထိန်နေပုံရပြီး အဝေးမှ ဖြတ်သန်းသွားသော ဥက္ကာခဲများကိုပင် မြင်တွေ့နိုင်စွမ်း ရှိသည်။</p> <p>သို့သော်လည်း ဥက္ကာခဲများကို အမြဲတမ်း တွေ့မြင်ရလေ့ မရှိပေ။ အချိန်အများစုတွင် ကမ္ဘာမြေပေါ်မှ မြင်ရသည်ထက် ပိုမို တောက်ပနေသော အဝေးဆီမှ ကြယ်ရောင်များကိုသာ ကြည့်ရှုနေရသည်။</p> <p>ခရီးစဉ် တစ်လျှောက်လုံးတွင် လုပ်ဆောင်ချက် အားလုံးနီးပါးကို ဉာဏ်ရည်တု ကွန်ပျူတာ၏ ထိန်းချုပ်မှုအောက်သို့ အပ်နှင်းထားရသည်။</p> <p>အာကာသယာဉ် အမှုထမ်းများ အနေဖြင့် ညွှန်ကြားချက်အသစ်များ ထုတ်ပြန်ရန် မလိုအပ်ပါက အခြား မည်သည့် အပိုလုပ်ဆောင်ချက်ကိုမျှ ပြုလုပ်ရန် မလိုအပ်ဘဲ အခြေခံအားဖြင့် အထောက်အကူပြု အခန်းကဏ္ဍမှသာ ပါဝင်ကြသည်။</p> <p>မည်သို့ပင်ဆိုစေကာမူ လူသားများနှင့် နှိုင်းယှဉ်ပါက မမျှော်လင့်ထားသော အခြေအနေများနှင့် ရင်ဆိုင်ရသည့်အခါ ဉာဏ်ရည်တု ကွန်ပျူတာ၏ တုံ့ပြန်မှုက ပိုမို လျင်မြန်လှသည်။ ၎င်းတွင် တုံ့ပြန်မှုနှေးကွေးခြင်း မရှိသလို အပြင်ဘက် ခလုတ်များ၊ သွယ်ဝိုက် ထိန်းချုပ်မှုများလည်း မလိုအပ်ပေ။</p> <p>ညွှန်ကြားချက် ပေးလိုက်သည်နှင့် တစ်ပြိုင်နက် အာကာသယာဉ်၏ စနစ်အသီးသီးက ချက်ချင်း တုံ့ပြန် လုပ်ဆောင်ပေးနိုင်သည်။</p> <p>အရာအားလုံးက ၎င်း၏ ယုတ္တိဗေဒ တွက်ချက်မှု စွမ်းရည်အပေါ်တွင်သာ မူတည်နေပြီး ယုတ္တိဗေဒ တွက်ချက်မှု စွမ်းရည်အရ ဆိုလျှင်မူ ၎င်းသည် လူသားများထက် အဆပေါင်းများစွာ သာလွန်နေသည်မှာ ယုံမှားသံသယဖြစ်ဖွယ် မရှိချေ။</p> <p>လော်ယွမ် ကိုယ်တိုင်ပင် ၎င်းနှင့် ယှဉ်နိုင်ရန် အလှမ်းဝေးလွန်းလှသည်။ ဤသည်မှာ မွေးရာပါ ကွာဟချက်တစ်ခုပင် ဖြစ်သည်။</p> <p>သက်ရှိတစ်ခု၏ ဉာဏ်ရည်ဉာဏ်သွေးက မည်မျှပင် အားကောင်းနေပါစေ ကွမ်တမ်ယူနစ် တစ်သိန်းပါဝင်သော စူပါကွမ်တမ်ကွန်ပျူတာ တစ်လုံး၏ တွက်ချက်မှုစွမ်းရည်နှင့် ယှဉ်ပြိုင်နိုင်စွမ်း မရှိပေ။</p> <p>အလုံးစုံ လေးဘက်မြင်စနစ်သို့ ကူးပြောင်းသွားသော ဦးနှောက်တစ်ခုကသာ ၎င်းနှင့် ယှဉ်ပြိုင်နိုင်စွမ်း ရှိပေလိမ့်မည်။</p> <p>...</p> <p>အချိန်များ ကုန်လွန်လာသည်နှင့်အမျှ အာကာသယာဉ်၏ အမြန်နှုန်းမှာ တစ်စက္ကန့်လျှင် မိုင် ၆၀ ခန့်အထိ ရောက်ရှိလာခဲ့သည်။</p> <p>ထို့နောက် အညိုဖျော့ဖျော့ ဂြိုဟ်တစ်လုံးသည် အမြင်အာရုံထဲသို့ ဝင်ရောက်လာခဲ့သည်။ ထိုဂြိုဟ်မှာ နေအဖွဲ့အစည်းရှိ ဂြိုဟ်ကြီးရှစ်လုံးအနက်မှ သောကြာဂြိုဟ်ပင် ဖြစ်ပြီး ယခုတစ်ကြိမ် ပျံသန်းရမည့် ဦးတည်ရာလည်း ဖြစ်သည်။</p> <p>(သာြက်ာဂြိုဟ် ဆိုတာ ဗီးနပ်ဂြိုလ်ကို ပြောတာပါ)</p> <p>အင်္ဂါဂြိုဟ်ဆီသို့ မသွားဘဲ သောကြာဂြိုဟ်ဆီသို့ ဦးတည်ပျံသန်းရခြင်း၏ အကြောင်းရင်းမှာ ကမ္ဘာနှင့် အင်္ဂါဂြိုဟ်ကြားတွင် ဥက္ကာပျံလမ်းကြောင်းတစ်ခု တည်ရှိနေပြီး ပတ်ဝန်းကျင် အခြေအနေမှာ ရှုပ်ထွေးလွန်းသောကြောင့် ဖြစ်သည်။</p> <p>ပထမဆုံးအကြိမ် စမ်းသပ်ပျံသန်းမှု ဖြစ်သည့်အတွက် ဘေးကင်းလုံခြုံရေးကို ပထမဦးစားပေး အနေဖြင့် ရွေးချယ်ခဲ့ရခြင်းမှာ ယုံမှားဖွယ်ရာ မရှိပေ။</p> <p>ဤအချိန်တွင် အကွာအဝေးမှာ ဝေးကွာနေသေးသဖြင့် ကမ္ဘာမြေနှင့် အရွယ်အစား အရွယ်အစားတူညီသော ဤဂြိုဟ်ကြီးသည် အညိုဖျော့ဖျော့ ဖန်ဂေါ်လီလုံးလေး တစ်လုံးကဲ့သို့ ကောင်းကင်ယံတွင် တိတ်ဆိတ်ငြိမ်သက်စွာ တွဲလောင်းကျနေပုံပေါ်သည်။</p> <p>"သောကြာဂြိုဟ်ကို ချဲ့ကြည့်လိုက်"</p> <p>လော်ယွမ်က ခေတ္တမျှ ကြည့်ပြီးနောက် အသံထွက်ကာ အမိန့်ပေးလိုက်သည်။</p> <p>"ဟုတ်ကဲ့ပါ ယာဉ်မှူး"</p> <p>ဉာဏ်ရည်တု ကွန်ပျူတာက လော်ယွမ်၏ အမိန့်ကို ချက်ချင်း တုံ့ပြန်လိုက်သည်။</p> <p>ဗဟိုဖန်သားပြင်ပေါ်ရှိ ပုံရိပ်ယောင် မြင်ကွင်းသည် ချက်ချင်းပင် နှစ်ပိုင်း ကွဲသွားပြီး လိမ္မော်ရောင်သန်းနေသော ထိုဂြိုဟ်ကြီးက လျင်မြန်စွာ ကြီးမားလာကာ အချိန်တိုအတွင်းမှာပင် ဖန်သားပြင်၏ ထက်ဝက်ခန့်ကို နေရာယူသွားတော့သည်။</p> <p>သို့သော်လည်း ၎င်းက ဆက်လက်၍ ကြီးမားလာဆဲပင်။ သုံးဖက်မြင် ဖန်သားပြင်သည် အတိုင်းအတာ တစ်ခုအထိ နစ်မြုပ်ခံစားနိုင်စွမ်း ရှိသည့်အပြင် ကြည်လင်ပြတ်သားသော ရုပ်ထွက်များကြောင့် လူတစ်ယောက်လုံး ထိုဂြိုဟ်ကြီးပေါ်သို့ ပြုတ်ကျသွားတော့မလို ခံစားချက်မျိုးကို ဖြစ်ပေါ်စေသည်။</p> <p>စက္ကန့်အနည်းငယ် အကြာတွင် ကင်မရာမှန်ဘီလူးက လေထုအလွှာထဲသို့ ထိုးဖောက် ဝင်ရောက်သွားခဲ့သည်။ ၎င်းသည် အဝေးမှ ကြည့်ရသကဲ့သို့ တိတ်ဆိတ်ငြိမ်သက်နေခြင်း မရှိတော့ပေ။</p> <p>ကြမ်းတမ်းလှသော လေထုအလွှာက အရှိန်အဟုန်ပြင်းစွာ ရွေ့လျားနေပြီး ထိတ်လန့်ဖွယ်ရာ မုန်တိုင်းကြီးများကို ဖြစ်ပေါ်စေသည်။ ကမ္ဘာမြေပေါ်ရှိ တိုင်ဖွန်းမုန်တိုင်းများသည် ဤနေရာရှိ မုန်တိုင်းများနှင့် နှိုင်းယှဉ်ပါက လေပြည်လေညင်းလေးများသာ ဖြစ်ပေလိမ့်မည်။</p> <p>ဆန့်ကျင်ဘက်ဒြပ်သား လက်နက်များဖြင့် လူသားများကို ဖျက်ဆီးပစ်ခဲ့ပြီးနောက် ထိုရက်အနည်းငယ်အတွင်း ဖြစ်ပေါ်ခဲ့သော အခြေအနေများနှင့်သာ ယှဉ်နိုင်ပေလိမ့်မည်။</p> <p>ဤအာကာသယာဉ်ပေါ်ရှိ ထောက်လှမ်းရေးစနစ်၏ ထိတ်လန့်ဖွယ် ကောင်းလှသော အစွမ်းကို ဝန်ခံရမည်သာ ဖြစ်သည်။ ၎င်း၏ မြင်ကွင်းက ဆက်လက် ကြီးမားလာပြီး မကြာမီမှာပင် ထူထပ်လှသော လေထုအလွှာကို ဖြတ်သန်းကာ မြေပြင်ပေါ်သို့ ရောက်ရှိသွားတော့သည်။</p> <p>ဤနေရာသည် ပျက်ဆီးခြင်း အငွေ့အသက်များ လွှမ်းမိုးနေသော ငရဲပြည် တစ်ခုနှင့် တူလှသည်။ မျက်စိတစ်ဆုံး မြင်ရသမျှ နေရာတိုင်းတွင် မီးတောင်များနှင့် ချော်ရည်ပူများကိုသာ တွေ့မြင်ရပြီး ထူထပ်လှသော အက်စစ်ဓာတ်ငွေ့များက ဤနေရာရှိ တောင်ကုန်းများကို စားပွဲထိုးထားသဖြင့် အပေါက်အပြဲများစွာ ဖြစ်ပေါ်နေကာ ကျောက်တုံးကျောက်ဆောင်များကလည်း ကြမ်းတမ်းခက်ထန်နေသည်။</p> <p>ဤနေရာရှိ လူအများစုမှာ အခြားဂြိုဟ်တစ်ခု၏ မြင်ကွင်းကို ပထမဆုံးအကြိမ် ကိုယ်တိုင်ကိုယ်ကျ မြင်တွေ့ဖူးခြင်း ဖြစ်သောကြောင့် ယခုလို မြင်တွေ့လိုက်ရချိန်တွင် ရင်ထဲ၌ အံ့သြတုန်လှုပ်သွားကြသည်။</p> <p>"ထောက်လှမ်းရရှိတဲ့ အချက်အလက်တွေအရ ဒါက ကျောက်တုံးတွေနဲ့ ဖွဲ့စည်းထားတဲ့ ဂြိုဟ်တစ်လုံး ဖြစ်ပါတယ်"</p> <p>"အချင်းဝက်က ၃၇၆၀ မိုင်ခန့်ရှိပြီး ဆွဲငင်အားက သုညသမ ၉ ဂျီ ဖြစ်ပါတယ်... မြေပြင် အပူချိန်က ဖာရင်ဟိုက် ၇၅၀ ဒီဂရီကျော်လောက် ရှိပြီး လေဖိအားက ကမ္ဘာမြေရဲ့ ကိုးဆယ်ဆ ရှိပါတယ်"</p> <p>"လေထုထဲမှာ ကာဗွန်ဒိုင်အောက်ဆိုဒ် ကိုးဆယ့်ခုနစ် ရာခိုင်နှုန်း ပါဝင်ပြီး ရေဓာတ်လည်း အမြောက်အမြား ပါဝင်ပါတယ်... ပြုပြင်ပြောင်းလဲဖို့ တန်ဖိုးနည်းပါးတဲ့အတွက် သတ္တုတူးဖော်ရေး ဂြိုဟ်အဖြစ် အသုံးပြုဖို့ အကြံပြုအပ်ပါတယ်"</p> <p>ဉာဏ်ရည်တု ကွန်ပျူတာ၏ အကြံပြုချက်အပေါ် လော်ယွမ်က ရင်ထဲတွင် ခါးသက်စွာ ပြုံးလိုက်မိသည်။ သူတို့သည် မကြာမီမှာပင် ကမ္ဘာမြေကို စွန့်ခွာရတော့မည် ဖြစ်သည်။</p> <p>ဤနေရာရှိ လူအများစု အနေဖြင့် တစ်သက်တာ ကာလအတွင်း ဤနေရာသို့ ပြန်လည်ရောက်ရှိရန် အလွန်ခဲယဉ်းသွားပြီ ဖြစ်ပေသည်။</p> <p> </p> <p> </p> <p>ဆက်ရန်...</p> <p> </p> <p> </p> <p> </p> <p style="text-align: center;">***</p>


Save