Book List

<h2 style="text-align: center;">အပိုင်း(၅၀၂)</h2> <h2 style="text-align: center;">ပထမဆုံး အာကာသတိုက်တိုက်ပွဲ</h2> <h2 style="text-align: center;">*</h2> <p> </p> <p> </p> <p> </p> <p>ထိုစဉ် အသိဉာဏ်တုစနစ်က တစ်စုံတစ်ခုကို ထောက်လှမ်းမိသွားပုံရပြီး ဘယ်ဘက်မျက်နှာပြင်ပေါ်တွင် အချက်အလက်မြောက်မြားစွာက ရေတံခွန်တစ်ခုပမာ အဆက်မပြတ် ကျဆင်းပေါ်လာတော့သည်။</p> <p>"ယာဉ်မှူး... အာကာသယာဉ်နဲ့ မိုင် ၄၉ သန်းအကွာမှာ အာကာသသက်ရှိတစ်ကောင်ကို ထောက်လှမ်းတွေ့ရှိရပါတယ်" အသိဉာဏ်တုစနစ်က သတင်းပို့လာသည်။</p> <p>လော်ယွမ်က အနည်းငယ် ကြောင်အမ်းသွားပြီးနောက် သူ၏မျက်နှာထက်တွင် အံ့သြဝမ်းသာမှုများ ဖြစ်ပေါ်လာ၏။</p> <p>ယခုအခါ ဉာဏ်ပညာဆေးရည်သည် လူသားမျိုးနွယ် ဖွံ့ဖြိုးတိုးတက်ရေးအတွက် အရေးပါသော တွန်းအားတစ်ခု ဖြစ်လာခဲ့ပြီ ဖြစ်သော်လည်း စွမ်းအင်ဗဟိုချက်မှ ထုတ်ပေးနိုင်သော တက်ကြွစွမ်းအင် ပမာဏမှာ အကန့်အသတ်ရှိနေသောကြောင့် ထုတ်လုပ်မှုနှုန်းကို မြှင့်တင်၍ မရနိုင်သေးပေ။</p> <p>တစ်နှစ်လျှင် အများဆုံးအနေဖြင့် ဉာဏ်ပညာဆေးရည် ပုလင်းနှစ်ထောင်ခန့်သာ ထုတ်လုပ်နိုင်သည်။ ပြီးခဲ့သည့်ရက်သတ္တပတ်အထိ စာရင်းဇယားများအရ ဉာဏ်ပညာဆေးရည် သောက်သုံးထားသူ စုစုပေါင်း ၆၁၂၃ ဦးသာ ရှိသေးသည်။</p> <p>ယခုအခါ အရေအတွက် သုံးသိန်းအထိ ရှိလာပြီဖြစ်သော သိပ္ပံနှင့် သုတေသနပညာရှင် အရေအတွက်နှင့် နှိုင်းယှဉ်ကြည့်လျှင် ထိုပမာဏမှာ သနားစရာကောင်းလောက်အောင် နည်းပါးလှသည်။</p> <p>လော်ယွမ်၏အမြင်တွင် ဤမျှနှင့် လုံးဝ မလုံလောက်သေးချေ။ ပြည်သူအားလုံး ဉာဏ်ပညာဆေးရည် သောက်သုံးနိုင်ရန် မဆိုထားနှင့် အနည်းဆုံး သုတေသနပညာရှင်များ အားလုံးတော့ သောက်သုံးနိုင်သင့်သည်ဟု သူ ခံစားမိသည်။</p> <p>သူက သိပ္ပံပညာရှင်များကို တက်ကြွစွမ်းအင်နှင့် ပတ်သက်၍ သုတေသန မလုပ်ခိုင်းခဲ့သည်တော့ မဟုတ်ပေ။ အမှန်တကယ်တွင် ထိုသုတေသနများကို ပြန်လည်တည်ဆောက်ရေးဇုန် ကာလကတည်းက စတင်ခဲ့ခြင်းဖြစ်သည်။</p> <p>သို့သော် ထိုစွမ်းအင်မှာ အလွန်လျှို့ဝှက်ဆန်းကြယ်လွန်းလှသည်။ စောင့်ကြည့်လေ့လာမှုများအရ ၎င်းသည် မျက်စိဖြင့်မမြင်နိုင်ဘဲ တည်ရှိမနေသကဲ့သို့ပင်။</p> <p>အဆင့်မြင့် သန္ဓေပြောင်းသတ္တဝါများ၏ ခန္ဓာကိုယ်အတွင်းရှိ စွမ်းအင်သလင်းကျောက်များတွင်ပင် ဩဂဲနစ်ဒြပ်စင် အစိတ်အပိုင်းများမှလွဲ၍ ၎င်း၏ အရိပ်အယောင်ကို လုံးဝ ရှာမတွေ့နိုင်ချေ။</p> <p>သို့သော် ရှေ့နောက်မညီ ဖြစ်ရသည်မှာ ထိုစွမ်းအင်က သက်ရှိများအပေါ် တကယ်တမ်း သက်ရောက်မှု ရှိနေခြင်းပင် ဖြစ်သည်။</p> <p>လက်ရှိ လူသားများ၏ နည်းပညာအဆင့်အတန်းဖြင့်ပင် ထိုစွမ်းအင်နှင့် ပတ်သက်၍ နားလည်နိုင်စွမ်းမှာ အကန့်အသတ် ရှိနေဆဲဖြစ်သည်။</p> <p>လူလုပ်နည်းလမ်းဖြင့် ဖန်တီးရယူရန် ဆိုသည်မှာတော့ ပြောစရာပင် မလိုတော့ချေ။ ဉာဏ်ပညာဆေးရည် ထုတ်လုပ်မှုကို ချက်ချင်းလက်ငင်း တိုးမြှင့်ချင်ပါက လက်ရှိအခြေအနေတွင် အာကာသသားရဲများကို ပိုမိုရှာဖွေသတ်ဖြတ်ရန်မှလွဲ၍ အခြားနည်းလမ်း မရှိပေ။</p> <p>ဝမ်းနည်းစရာကောင်းသည်မှာ နေအဖွဲ့အစည်းကြီးက အလွန်တရာ ကျယ်ပြောလွန်းနေခြင်းပင်။</p> <p>ဤအာကာသယာဉ်၏ ခေတ်မီဆန်းသစ်သော ထောက်လှမ်းရေးစနစ်များနှင့် အားကောင်းသော တွက်ချက်မှုစွမ်းရည်များ ရှိနေစေကာမူ ကျယ်ပြောလှသော နေအဖွဲ့အစည်းအတွင်း လက်ဆယ်ချောင်းစာပင် မပြည့်သော အာကာသသားရဲကြီးများကို ရှာဖွေရခြင်းမှာ သမုဒ္ဒရာထဲ အပ်ကျတာကို ရှာရသကဲ့သို့ပင် ခက်ခဲလှသည်။</p> <p>ထို့အပြင် မြင်ကွင်းကို ကွယ်နေသော ဂြိုဟ်များစွာ ရှိနေခြင်းကလည်း ရှာဖွေရေးလုပ်ငန်းစဉ်ကို ပိုမိုခက်ခဲသွားစေသည်။</p> <p>ထို့ကြောင့် သုံးနှစ်ဆက်တိုက် ရှာဖွေခဲ့သော်လည်း ဘာမှ ထူးခြားမှု မရှိခဲ့ချေ။</p> <p>ယခု ပထမဆုံးအကြိမ် စမ်းသပ်ပျံသန်းမှုမှာပင် ကံကောင်းထောက်မစွာဖြင့် တစ်ကောင်ကို ရှာဖွေတွေ့ရှိသွားလိမ့်မည်ဟု သူ လုံးဝ မထင်မှတ်ထားခဲ့ပေ။</p> <p>"ဘယ်နေရာမှာလဲ" လော်ယွမ်က ချက်ချင်းပင် လောတကြီး မေးလိုက်သည်။</p> <p>"သောကြာဂြိုဟ်ရဲ့ အနောက်ဘက် နေနဲ့နီးတဲ့ဘက်မှာပါ"</p> <p>အသိဉာဏ်တုစနစ်က ဖြေကြားနေစဉ်မှာပင် ပုံရိပ်ယောင် မျက်နှာပြင်ကြီးပေါ်တွင် ဧရာမ သောကြာဂြိုဟ်ကြီးတစ်ခု ပေါ်လာပြီး ၎င်း၏ဘေး သိပ်မဝေးလှသော နေရာတွင် မမြင်ရသလောက် သေးငယ်သော အစက်လေးတစ်ခု လွင့်မျောနေသည်ကို တွေ့လိုက်ရသည်။</p> <p>ထိုအစက်လေးကို အသိဉာဏ်တုစနစ်က တမင်တကာ စက်ဝိုင်းဝိုင်းပြထားပြီး သောကြာဂြိုဟ်ကိုလည်း အဆပေါင်းထောင်ချီ၍ ချဲ့ပြထားခြင်းမျိုး မရှိပါက အပ်ပေါက်ထက်ပင် သေးငယ်သော ထိုအမည်းစက်လေးကို မည်သူကမျှ သတိပြုမိနိုင်မည် မဟုတ်ချေ။</p> <p>"အဲဒါကို ချဲ့ပြစမ်း"</p> <p>စကားမဆုံးမီမှာပင် ထိုအစက်လေးကို အသိဉာဏ်တုစနစ်က အစွမ်းကုန်ချဲ့ပြလိုက်ရာ မျက်နှာပြင်တစ်ခုလုံး အပြည့်ဖြစ်သွား၏။</p> <p>၎င်း၏အနောက်ဘက်တွင် နေရှိနေသောကြောင့် ထိုဧရာမ သတ္တဝါကြီးမှာ အလင်းရောင်ကွယ်နေသော်လည်း မြင်ကွင်းကမူ အတော်လေး ရှင်းလင်းနေဆဲဖြစ်သည်။</p> <p>ပင်လယ်သတ္တဝါတစ်ကောင်ကဲ့သို့ ကိုးရိုးကားယားနိုင်လှသော ၎င်း၏ခန္ဓာကိုယ်ကြီးကို ကြည့်ရင်း လော်ယွမ်က ပို၍ရင်းနှီးနေသလို ခံစားလာရသည်။</p> <p>ထိုသားရဲကြီးမှာ လကမ္ဘာပေါ်တွင် သူတို့ ကြုံတွေ့ခဲ့ရဖူးသော အာကာသသားရဲကြီးပင် ဖြစ်နေသည်။ ပြီးခဲ့သည့်နှစ်များအတွင်း ၎င်းက ထိုနေရာအထိ ရောက်သွားလိမ့်မည်ဟု သူ လုံးဝ ထင်မထားခဲ့ချေ။</p> <p>သို့သော် လော်ယွမ်၏ သက်ပြင်းချမှုမှာ မိတ်ဆွေဟောင်းတစ်ဦးနှင့် ပြန်လည်ဆုံတွေ့ရခြင်းကြောင့် ထွက်ပေါ်လာသော သက်ပြင်းချမှုမျိုး မဟုတ်ဘဲ အန္တရာယ်ပြုလိုသော ရည်ရွယ်ချက်များ အပြည့်အဝ ပါဝင်နေသည်။</p> <p>ယခုလို အာကာသသားရဲကြီးများ နေအဖွဲ့အစည်းအတွင်း လှည့်လည်သွားလာနေခြင်းက လူသားများအတွက် မည်သည့်အကျိုးကျေးဇူးမျှ မရှိပေ။</p> <p>ဤသတ္တဝါများသည် သက်ရှိများ၏ အံ့မခန်း အံ့ဖွယ်ရာများပင် ဖြစ်သည်။ ၎င်းတို့၏ ဆင့်ကဲပြောင်းလဲမှု လမ်းကြောင်းနှင့် နည်းပညာ ဖွံ့ဖြိုးတိုးတက်မှုများမှာ နည်းလမ်းမတူသော်လည်း ပန်းတိုင်တစ်ခုတည်းသို့ သွားနေခြင်းဖြစ်သည်။</p> <p>၎င်းတို့၏ စွမ်းရည်များ အထူးသဖြင့် စွမ်းအင်နှင့် စက်ကွင်းစွမ်းအား အသုံးပြုမှုများကို ခွဲခြမ်းစိတ်ဖြာ လေ့လာခြင်းဖြင့် နည်းပညာဖွံ့ဖြိုးတက်မှုအတွက် နှိုင်းယှဉ်မရနိုင်လောက်အောင် အဖိုးတန်သော အကိုးအကားများ ရရှိနိုင်မည် ဖြစ်သည်။</p> <p>အမှန်တကယ်တွင် ဗိုရှင်းဂြိုဟ်သားများ၏ နည်းပညာများကို လူသားများက တဖြည်းဖြည်း စုပ်ယူရရှိလာသည်နှင့်အမျှ သုတေသီတစ်စိတ်တစ်ပိုင်းသည် ဤထူးကဲသော သားရဲကြီးများ၏ လျှို့ဝှက်ဆန်းကြယ်သော စွမ်းရည်များဆီသို့ အာရုံစိုက်လာခဲ့ကြပြီ ဖြစ်သည်။</p> <p>လူသားတို့သည် ပိုမိုမြင့်မားသော နည်းပညာသစ်များဆီသို့ ဦးတည်နိုင်မည့် အရုဏ်ဦးအလင်းတန်းကို ရှာဖွေတွေ့ရှိခဲ့ကြပြီ ဖြစ်သည်။</p> <p>ထို့ကြောင့် စွမ်းအင်ဗဟိုချက်အတွက် မဟုတ်လျှင်တောင်မှ နောက်ပိုင်းရောက်လာမည့် ဗိုရှင်းအာကာသယာဉ်များအတွက် အခွင့်အရေး မကျန်ရစ်စေရန် အာကာသသားရဲကြီးများအားလုံးကို ရှင်းလင်းပစ်ရမည် ဖြစ်သည်။</p> <p>သို့သော် ထိုအာကာသသားရဲကြီးနှင့် သူတို့ကြားရှိ အကွာအဝေးမှာ အလွန်ဝေးကွာလွန်းနေသည်။ ထို့အပြင် ယနေ့က အာကာသယာဉ်၏ ပထမဆုံးအကြိမ် စမ်းသပ်ပျံသန်းမှု ဖြစ်သောကြောင့် အာကာသယာဉ်ကို တိုက်ရိုက်သွားခိုင်းရန်မှာ အလွန်စွန့်စားရာကျလွန်းလှသည်။</p> <p>ဤကဲ့သို့ အမြန်နှုန်းအနိမ့်ဖြင့် ခရီးနှင်ရန် အချိန်လည်း အလွန်ကြာမြင့်ပေလိမ့်မည်။ သူက ခေါင်းငုံ့ကာ ခေတ္တမျှ စဉ်းစားလိုက်ပြီးနောက်...</p> <p>"ဦးစီးမှူးစွန်း... အခု အာကာသတိုက်လေယာဉ်တွေ ထွက်ခွာလို့ ရနိုင်မလား" ဟု မေးလိုက်သည်။</p> <p>"ယာဉ်မှူးကို သတင်းပို့ပါတယ်... တိုက်လေယာဉ် ငါးစင်းကို ပြင်ဆင်ထားတဲ့ ပစ်လွှတ်ခန်းထဲ ပို့ဆောင်ထားပြီးဖြစ်လို့ အချိန်မရွေး ထွက်ခွာနိုင်ပါတယ်"</p> <p>လူလတ်ပိုင်းအရွယ် အမျိုးသားတစ်ဦးက ထိုင်ခုံမှ ချက်ချင်းမတ်တတ်ရပ်ကာ အလေးပြုရင်း အသံကျယ်ကျယ်ဖြင့် ဖြေကြားလိုက်သည်။</p> <p>"ဒါဆိုရင် အကုန်လုံးကို လွှတ်လိုက်... ပစ်မှတ်က အဲ့ဒီသားရဲကြီးကို သတ်ဖို့ပဲ"</p> <p>"ဟုတ်ကဲ့ပါ ယာဉ်မှူး"</p> <p>ယာဉ်သားများထဲမှ လူငါးဦးက အထူးထုတ်လုပ်ထားသော ဦးထုပ်များကို ချက်ချင်း ဆောင်းလိုက်ကြသည်။</p> <p>ဤဦးထုပ်များတွင် ကွမ်တန် ဆက်သွယ်ရေးစနစ် ပါဝင်ပြီး မျက်လုံးအတွင်းရှိ အလွန်သေးငယ်သော ကွမ်တန် ကွန်ပျူတာများမှတစ်ဆင့် အာကာသတိုက်လေယာဉ်များနှင့် တိုက်ရိုက်ချိတ်ဆက်ကာ ထိန်းချုပ်မောင်းနှင်နိုင်သည်။</p> <p>စက္ကန့်အနည်းငယ်အကြာတွင် အာကာသယာဉ်၏ ဘေးဘက်ရှိ လေယာဉ်ပစ်လွှတ်ခန်း တံခါးများက ဟိန်းခနဲ ပွင့်သွားပြီး နောက်တစ်ခဏတွင် အာကာသတိုက်လေယာဉ် ငါးစင်းကို ဝက်အူရစ်ပုံစံ လျှပ်စစ်သံလိုက်လမ်းကြောင်းများမှတစ်ဆင့် အရှိန်ပြင်းပြင်းဖြင့် တစ်စင်းပြီးတစ်စင်း ပစ်လွှတ်လိုက်သည်။</p> <p>အင်ဂျင်များ မစတင်ရသေးခင်မှာပင် အာကာသတိုက်လေယာဉ်များ၏ ကနဦးအမြန်နှုန်းမှာ တစ်စက္ကန့်လျှင် မိုင် ၁၈၀ ခန့်အထိ အံ့မခန်း မြင့်တက်သွားခဲ့သည်။</p> <p>အာကာသယာဉ်၏ လက်ရှိအမြန်နှုန်းဖြစ်သော တစ်စက္ကန့်လျှင် ၉၃ မိုင်ကို နုတ်လိုက်ပါက ပစ်လွှတ်သည့် တစ်စက္ကန့်မပြည့်သော အချိန်အတွင်းမှာပင် တစ်စက္ကန့်လျှင် သုည ပေမှ ၉၃ မိုင်အထိ အရှိန်တင်နိုင်ခဲ့ခြင်း ဖြစ်သည်။</p> <p>၎င်းတို့ ခံစားရမည့် ကြောက်မက်ဖွယ်ကောင်းသော ဖိအားကြောင့် သာမန်သတ္တုတုံးဆိုလျှင်ပင် ပုံပန်းပျက်ယွင်းသွားမည် ဖြစ်သော်လည်း ဤတိုက်လေယာဉ်များကမူ အနည်းငယ်မျှပင် ထိခိုက်မှု မရှိခဲ့ချေ။</p> <p>မကြာမီမှာပင် ထိုတိုက်လေယာဉ် ငါးစင်းသည် တစ်စင်းပြီးတစ်စင်း အင်ဂျင်နှိုးကာ လေးကြိုးမှ လွတ်ထွက်သွားသော မြားတစ်စင်းပမာ ဝေးကွာလှသော အာကာသ နက်ရှိုင်းရာဆီသို့ ပျံသန်းသွားကြလေသည်။ ၎င်းတို့၏ အမြန်နှုန်းမှာ တဖြည်းဖြည်း ပို၍မြန်ဆန်လာပြီး မျက်စိတစ်မှိတ်အတွင်းမှာပင် မျက်နှာပြင်ပေါ်မှ လုံးဝ ပျောက်ကွယ်သွားတော့သည်။</p> <p>အာကာသယာဉ်ကို နောက်ထပ် တစ်နာရီကျော်ခန့် ဆက်လက်မောင်းနှင်ပြီးနောက် စမ်းသပ်ပျံသန်းမှု အစီအစဉ်ကို အောင်မြင်စွာ အဆုံးသတ်နိုင်ခဲ့သည်။</p> <p>လော်ယွမ်နှင့် အဆင့်မြင့် အရာရှိတစ်စုသည် ထိန်းချုပ်ရေးခန်းထဲမှ တစ်ယောက်ပြီးတစ်ယောက် ထွက်ခွာလာခဲ့ကြသည်။</p> <p>မည်သို့ပင်ဖြစ်စေ တိုက်လေယာဉ်များနှင့် အာကာသသားရဲကြီးတို့၏ တိုက်ပွဲမှာ အချိန်တိုအတွင်း ဖြစ်ပွားမည့် ကိစ္စရပ် မဟုတ်ပေ။</p> <p>အာကာသတိုက်လေယာဉ်များအနေဖြင့် အမြင့်ဆုံး ဘေးကင်းလုံခြုံရေး အမြန်နှုန်းဖြစ်သည့် တစ်စက္ကန့်လျှင် မိုင် ၉၃၀ ဖြင့် အစွမ်းကုန် ပျံသန်းသွားမည် ဆိုလျှင်ပင် တိုက်ပွဲက နောက်ထပ် ဆယ့်လေးနာရီ ကြာပြီးမှသာ စတင်နိုင်မည်ဖြစ်သည်။</p> <p>"အဲ့ဒီ အာကာသတိုက်လေယာဉ်တွေက သားရဲကြီးကို နိုင်ပါ့မလား"</p> <p>စောစောက အဆင့်မြင့်အရာရှိများစွာ ရှိနေသဖြင့် လမ်းတစ်လျှောက်လုံး နှုတ်ဆိတ်နေခဲ့သော ချန်ရှင်းကျယ်မှာ ရုံးခန်းထဲရောက်သည်နှင့် နောက်ဆုံးတွင် မနေနိုင်တော့ဘဲ မေးလိုက်လေသည်။</p> <p>အင်ဂျင်နီယာအဖွဲ့က ကမ္ဘာမြေပေါ်သို့ အာကာသသားရဲကြီး၏ အလောင်းကို သွားရောက်ကောက်ယူပြီးသည့်နောက်တွင် ဤလျှို့ဝှက်ဆန်းကြယ်ပြီး စွမ်းအားကြီးမားလှသော သတ္တဝါများ၏ အကြောင်းမှာ သာမန်လူများကြားတွင်ပါ လူသိများလာခဲ့သည်။</p> <p>၎င်း၏ အံ့မခန်း ကြီးမားသော ခန္ဓာကိုယ်နှင့် လျှို့ဝှက်ဆန်းကြယ်သော စွမ်းရည်များကြောင့် လူသားများကို တစ်ချိန်တည်းမှာပင် စူးစမ်းချင်စိတ်များ ဖြစ်ပေါ်စေသကဲ့သို့ ထိတ်လန့်ကြောက်ရွံ့မှုများကိုလည်း ဖြစ်ပေါ်စေခဲ့သည်။</p> <p>အချိန်အတန်ကြာသည်အထိ ထိုအကြောင်းအရာမှာ လူအများ၏ အားလပ်ချိန်များတွင် ပြောဆိုဆွေးနွေးစရာ သတင်းစကားတစ်ခု ဖြစ်နေခဲ့သည်။</p> <p>"အဲဒါကတော့ တိုက်ကြည့်မှပဲ သိရမှာပေါ့" လော်ယွမ်က ထိုင်ခုံပေါ်တွင် ဝင်ထိုင်လိုက်ပြီး ပေါ့ပေါ့ပါးပါးပင် နောက်သို့မှီချလိုက်သည်။</p> <p>အမှန်အတိုင်း ပြောရလျှင် သူကိုယ်တိုင်လည်း နောက်ဆုံးရလဒ်က မည်သို့ဖြစ်လာမည်ကို သေချာမသိပေ။</p> <p>သို့သော် အာကာသတိုက်လေယာဉ်များ၏ လှုပ်ရှားနိုင်စွမ်းအရ မသတ်နိုင်ခဲ့လျှင်တောင် လွတ်မြောက်အောင် ပြေးနိုင်စွမ်း ရှိနေသည်။</p> <p>တစ်ခုတည်းသော ထည့်သွင်းစဉ်းစားရမည့် ပြဿနာမှာ သားရဲကြီး၏ ကာကွယ်မှုစွမ်းအားက မည်မျှအထိ ခိုင်မာနေမည်လဲ ဆိုသည့်အချက်ပင်။</p> <p>ထို့အပြင် ဤတိုက်လေယာဉ် ငါးစင်းမှာ ပထမမျိုးဆက်များ မဟုတ်တော့ဘဲ ဒုတိယမျိုးဆက်များ ဖြစ်နေပြီဖြစ်သည်။</p> <p>၎င်းတို့တွင် တပ်ဆင်ထားသော လျှပ်စစ်သံလိုက်အမြောက် တစ်ခုတည်းကပင်လျှင် စွမ်းအား ၁.၅ ဆအထိ တိုးမြှင့်ထားရာ ကီလိုဝပ် သန်းတစ်ရာ့ငါးဆယ်အထိ ရှိလေသည်။</p> <p>၎င်းမှာ သုံးချောင်းရေအားလျှပ်စစ်စက်ရုံ သုံးခုပေါင်းမှ ထုတ်ပေးနိုင်သော စွမ်းအင်ပမာဏနှင့် ညီမျှပေသည်။</p> <p>အမြောက်ဆန်၏ အလေးချိန်မှာ ၂.၂ ပေါင်ခန့်သာ ရှိသော်လည်း တစ်ချက်ပစ်ခတ်လိုက်သည်နှင့် ၎င်း၏စွမ်းအားမှာ နည်းဗျူဟာမြောက် အနုမြူဗုံးတစ်လုံးထက် အများကြီး လျော့နည်းနေမည် မဟုတ်ပေ။ ပို၍ကြောက်စရာကောင်းသည်မှာ ၎င်းက သုံးစက္ကန့်လျှင် တစ်ချက်နှုန်းဖြင့် ဆက်တိုက် ပစ်ခတ်နိုင်ခြင်းပင် ဖြစ်သည်။</p> <p>အခြားသော လက်နက်များမှာလည်း သဘာဝကျကျပင် အဆင့်မြှင့်တင်မှုများ ပြုလုပ်ထားပြီး ဖြစ်သည်။</p> <p>ယခုအခါ အာကာသတိုက်လေယာဉ်များ၏ တိုက်ခိုက်ရေးစွမ်းရည်မှာ ဗိုရှင်းဂြိုဟ်သားများ၏ တိုက်လေယာဉ်များထက် အများကြီး အားနည်းနေခြင်းမျိုး လုံးဝ မရှိတော့ချေ။</p> <p>......</p> <p>အချိန်အတန်ကြာ စကားစမြည် ပြောဆိုပြီးနောက် ချန်ရှင်းကျယ်လည်း လော်ယွမ်ကို ဆက်လက်အနှောင့်အယှက် မပေးတော့ဘဲ တင့်တယ်လှပသော ခြေလှမ်းများဖြင့် ရုံးခန်းထဲမှ ထွက်ခွာသွားလေသည်။</p> <p>လော်ယွမ်က လက်ဖက်ရည်တစ်ငုံ သောက်လိုက်ပြီး တောင်လိုပုံနေသော စာရွက်စာတမ်းများကို စတင်စစ်ဆေးတော့သည်။</p> <p>လူသားတို့ နေအဖွဲ့အစည်းမှ ထွက်ခွာရန် အချိန်ရေတွက်နေရပြီ ဖြစ်သည်။ လူသားများအနေဖြင့် ကြယ်တာရာများကြား ခရီးနှင်နိုင်စွမ်း ရှိမရှိ စမ်းသပ်အတည်ပြုခြင်းများနှင့် နည်းပညာအသစ်များကို စစ်ဆေးခြင်းများကလည်း အရှိန်အဟုန်ဖြင့် လုပ်ဆောင်နေဆဲ ဖြစ်သည်။</p> <p>ဤကာလများအတွင်း ဌာနအသီးသီးရှိ လူတိုင်းမှာ ခြေမအား လက်မအား အလုပ်ရှုပ်နေကြပြီး သူကိုယ်တိုင်ပင်လျှင် အားလပ်ချိန် သိပ်မရှိတော့ချေ။</p> <p> </p> <p> </p> <p>ဆက်ရန်...</p> <p> </p> <p> </p> <p> </p> <p> </p> <p style="text-align: center;">***</p>


Save