Book List

<h2 style="text-align: center;">C667</h2> <h2 style="text-align: center;">နေလ ဓားမဟာမိတ် (၁)</h2> <h2 style="text-align: center;">*</h2> <p> </p> <p> </p> <p>စွန်တစ်ကောင်ကဲ့သို့ ပျံသန်းနေသော ဓားနောက်တွင် အေ့စ်ဟာ တရွတ်တိုက် ပါလာသော်လည်း မည်သည့်အသံမျှ မထွက်ပေ။ ဤအချက်ကပင် ဓားကို ထိန်းကျောင်းနေသူအား ဤလူမှာ စိတ်မနှံ့သူတစ်ဦးဖြစ်ကြောင်း ပို၍ပင် သေချာသွားစေပြီး၊ ဤကဲ့သို့သောလူမျိုး ယနေ့ထက်တိုင် မည်သို့အသက်ရှင်နေသနည်းဟုပင် တွေးတောမိစေသည်။</p> <p> </p> <p>သို့သော်ငြားလည်း သူက အရူးတစ်ကောင်နှင့် စကားပြောရန် အထင်သေးနေဆဲဖြစ်ပြီး၊ သူ့ကို ပြန်လည်ဆွဲခေါ်သွားခြင်းမှာ သူ၏ တာဝန်ဝတ္တရားတစ်ခုကို လုပ်ဆောင်နေခြင်းသာ ဖြစ်သည်။</p> <p>အေ့စ်ကမူ တောင်တန်းများထဲသို့ ပိုမိုနက်ရှိုင်းစွာ ဝင်ရောက်လာသည်နှင့်အမျှ တောင်တန်းများ၏ အနေအထားကို အနီးကပ် စောင့်ကြည့်နေသည်။ ချီ စွမ်းအင်များ ပိုမိုသိပ်သည်းလာသည်ကိုလည်း သူ ခံစားနေရသည်။</p> <p>သို့သော် ရှေ့တွင် အံ့သြဖွယ်ရာတစ်ခုကို မြင်လိုက်ရသောအခါ သူ့မျက်လုံးများ ပြူးကျယ်သွားရသည်။ ယခုအခါ သူက ကောင်းကင်ယံသို့ ရောက်နေသဖြင့် ဤနေရာ၏ လှပသော မြင်ကွင်းကို မြင်တွေ့နိုင်သော်လည်း၊ ဤမြင်ကွင်းမှာ တစ်စုံတစ်ယောက်၏ စိတ်ကူးယဉ်အိပ်မက်ထဲမှ ထွက်ပေါ်လာသကဲ့သို့ ဆန်းကြယ်လှသည်။</p> <p>တောင်တန်းများ ယှက်နွယ်နေသည့် အလယ်ဗဟိုတည့်တည့်တွင် တိမ်မြူများကြားထဲသို့ တိုးဝင်ပျောက်ကွယ်သွားသော ကျောက်လှေကားထစ်ကြီးတစ်ခုကို သူ မြင်လိုက်ရသည်။ယင်းအပြင် အမှန်တကယ် တုန်လှုပ်စရာကောင်းသည်မှာ ထိုလှေကားထစ်များ မစတင်မီ တောင်ခြေတွင် ရှိနေသော နေနှင့်လ သင်္ကေတများပါသည့် တောင်တစ်လုံးစာခန့်ကြီးမားသော ကြေးဝါတံခါးကြီးနှစ်ချပ်ပင် ဖြစ်သည်။</p> <p>ထို့အပြင် ထိုတံခါးကြီးများ၏ ဘေးတွင် ရွှေရောင်နှင့် ငွေရောင် ဝိုင်ဗန် နဂါးရုပ်တုကြီးနှစ်ခုမှာ သက်ရှိထင်ရှားရှိနေသကဲ့သို့ ခန့်ညားစွာ တည်ရှိနေသည်။ မိုင်ပေါင်းများစွာ အကွာအဝေးမှပင် ထိုတံခါးကြီးများ၏ ခန့်ညားထည်ဝါသော အရှိန်အဝါကို အေ့စ် ခံစားနေရပြီး၊ ၎င်းမှာ မည်သည့်သာမန်လူကိုမဆို ကြောက်ရွံ့ရိုသေစွာဖြင့် ဒူးထောက်သွားစေနိုင်လောက်သည်။</p> <p> </p> <p>ထိုတံခါးကြီးများ၏ ရှေ့တွင် ပုရွက်ဆိတ်များကဲ့သို့ စုဝေးနေကြသော လူအုပ်ကြီးကိုလည်း အေ့စ် သတိပြုမိလိုက်သည်။</p> <p>'ဒါက ဘယ်လို ငရဲမျိုးလဲ..'</p> <p>ဖြူဖွေးသော မြူထုများထဲသို့ ဦးတည်နေသည့် ဧရာမ တံခါးကြီးများနှင့် လှေကားထစ်များကို မြင်ရုံဖြင့် အေ့စ် အတော်ပင် တုန်လှုပ်သွားရသည်။</p> <p>ထိုမြူထုများ၏ တစ်ဖက်တွင် ဘာရှိသလဲဆိုသည်ကိုမူ သူ မသိပေ။ အဘယ်ကြောင့်ဆိုသော် ထိုနေရာမှစ၍ အရာအားလုံးမှာ ထူထပ်သော မြူဖြူများဖြင့် ဖုံးလွှမ်းနေသောကြောင့် ဖြစ်သည်။</p> <p>သူ မြင်တွေ့နေရသောအရာများကပင် သူရောက်ရှိနေသည့်နေရာနှင့် ပတ်သက်၍ ယေဘုယျအချက်အလက်များကို သိရှိရန် လုံလောက်နေပြီဖြစ်သည်။</p> <p>'ငါ့အထင်မမှားရင် ဒီနေရာက အသူရာတိုက်ကြီးရဲ့ အင်ပါယာနယ်မြေထက် မနိမ့်ကျဘူး။ ပြီးတော့ ဒီမှာ လူသားတွေက အဆင့်အတန်းမြင့်ပုံရတယ်။ ငါ ရွှေကောင်းကင်ကမ္ဘာရဲ့ တစ်နေရာရာမှာ ပုန်းကွယ်နေတဲ့ အင်အားစုကြီးတစ်ခုရဲ့ နယ်မြေထဲကို ရောက်သွားတာတော့ မဟုတ်ပါဘူးနော်..'</p> <p>အနီရောင်တောက်နေသော ကံကြမ္မာမြေပုံကို ကြည့်ရင်း အေ့စ် စိုးရိမ်တကြီး တွေးတောနေမိသည်။</p> <p>သူသာ အရူးအဖြစ် ဟန်မဆောင်ထားပါက ရှေ့မှလူကို မေးမြန်းမိမည်ဖြစ်သော်လည်း၊ ယခုအချိန်တွင်မူ ငြိမ်ငြိမ်နေပြီး အူကြောင်ကြောင် ဆက်လုပ်နေခြင်းက အကောင်းဆုံးဖြစ်ကြောင်း သူ သိသည်။</p> <p>ဝိညာဉ်စူးစမ်းခြင်း အကြောင်းကိုမူ သူ လုံးဝမစဉ်းစားရဲပေ။ အဘယ်ကြောင့်ဆိုသော် ထိုသူသည် အကောင်းဆုံး အခြေအနေတွင် ရှိနေသရွေ့ ၎င်းမှာ ကျရှုံးမည်မှာ သေချာသောကြောင့်ဖြစ်သည်။ ဝိညာဉ်သရုပ်ပြခြင်းနယ်ပယ်ဆိုသည်မှာ နောက်ပြောင်စရာမဟုတ်ပေ။ လုံးဝယုံကြည်မှုမရှိဘဲနှင့် ဤသို့ မသိနားမလည်သော နယ်မြေတွင် ဝိညာဉ်စူးစမ်းရန် ကြိုးစားခြင်းမှာ အေ့စ်အတွက် အလွန်အန္တရာယ်များလှသည်။</p> <p>ယင်းက သူ့ကို ဤနေရာသို့ ခေါ်ဆောင်လာခြင်းကိုပင် သူ ကျေးဇူးတင်မိသည်။ သို့မဟုတ်ပါက သူဟာ တစ်စုံတစ်ခုသော ထောင်ချောက်ကို နင်းမိနိုင်သည်၊ သို့မဟုတ် ပြန်လည်တိုက်ခိုက်ရန် ကြိုးစားပါက သူ၏ ကိုယ်ပိုင်လက္ခဏာများ ပေါ်သွားနိုင်သည်။</p> <p>ထိုအချိန်တွင် ပျံသန်းနေသော ဓားမှာ ဘယ်ဘက်သို့ ရုတ်တရက် အကွေ့အကောက်ဖြင့် လှည့်လိုက်ပြီး ဧရာမ တံခါးကြီးများဆီသို့ ဦးတည်မသွားသည်ကို တွေ့လိုက်ရသဖြင့် အေ့စ် အံ့သြသွားသည်။</p> <p>သူ့ရှေ့တွင် မြင်လိုက်ရသည်မှာ ကြည်လင်သော ငွေရောင်အတားအဆီး တစ်ခုဖြစ်ပြီး၊ ထိုအတားအဆီး၏ နောက်ကွယ်ရှိ တောင်ကြီးတစ်လုံးပေါ်တွင် ဟောင်းနွမ်းနေသော ရှေးဟောင်းအဆောက်အအုံများ ပျံ့နှံ့နေသည်။</p> <p>၎င်းမှာ တောင်ပေါ်မြို့တော်တစ်ခုနှင့်ပင် တူလှသည်။</p> <p>တောင်ဟောင်းကြီးဆီသို့ နီးကပ်သွားသောအခါ ပို၍ပင် တုန်လှုပ်စရာကောင်းသော မြင်ကွင်းတစ်ခုကို တွေ့လိုက်ရသည်။ ၎င်းမှာ ကျောက်လမ်းများပေါ်တွင် အဝတ်ဟောင်းများကို ဝတ်ဆင်ကာ လမ်းလျှောက်နေကြသော ဒေသခံများဖြစ်ပြီး၊ ထိုသူများထဲတွင် လူသားများသာ ပါဝင်သည်မဟုတ်ပေ။</p> <p>အသားညိုညို အရပ်ရှည်ရှည် အသူရာတစ်ဦးမှာ လူသားတစ်ဦးနှင့်အတူ ရယ်မောကာ စကားပြောရင်း လမ်းလျှောက်နေသည်ကို မြင်လိုက်ရသောအခါ အေ့စ် တစ်ယောက် အိပ်မက်မက်နေသည်ဟုပင် ထင်မှတ်သွားသည်။ ၎င်းတင်မကသေးဘဲ ဆိုင်တစ်ဆိုင်ရှေ့တွင် ခရမ်းရောင် လင်းနို့တောင်ပံလေးများပါပြီး နောက်ကျောတွင် မြှားပုံသဏ္ဌာန် အမြီးပါသော အပြာရောင် လူသားပုံသဏ္ဌာန်ရှိသူတစ်ဦး ရပ်နေသည်ကိုလည်း တွေ့လိုက်ရသည်။</p> <p>'ဒါ... ဒါက နတ်ဆိုးပဲ'</p> <p>ထူးခြားသော မျိုးနွယ်စုလက္ခဏာများကြောင့် ထိုသူအား နတ်ဆိုးအဖြစ် ချက်ချင်း ခွဲခြားသိမြင်လိုက်သည်။</p> <p>ထို့အပြင် ထူးခြားသော ဆံပင်အရောင်များဖြင့် လမ်းလျှောက်နေသည့် လူသားသုံးဦးကိုလည်း တွေ့ရပြီး သူတို့မှာ မုဆိုးများ ဖြစ်ပုံရသည်။</p> <p>ကွဲပြားခြားနားသော မျိုးနွယ်စုဝင်များမှာ တိုက်ခိုက်နေကြမည့်အစား တစ်ဦးနှင့်တစ်ဦး ရောနှောနေထိုင်နေကြသည်ကို မြင်ရသဖြင့် အေ့စ်လည်း တကယ့်ကို အိပ်မက်ကမ္ဘာထဲ ရောက်နေသကဲ့သို့ ခံစားရသည်။</p> <p>သူ၏ စူးရှသော အမြင်အာရုံဖြင့် ကြည့်လိုက်ရာ လူတိုင်းမှာ အဖြူရောင်ဝတ်ရုံများကို ဝတ်ဆင်ထားကြပြီး အားလုံးမှာ အတော်ပင် ပိန်လှီနေကြသည်ကို သတိပြုမိလိုက်သည်။</p> <p>ဓားစီးလာသူမှာ သူခေါ်လာသော အရူးက အရာအားလုံးကို မြင်နေရသည်ဟု လုံးဝမထင်မှတ်ထားဘဲ၊ ဧရာမ တောင်တံခါးများဆီသို့ ဆင်းသက်လိုက်သည်။</p> <p>ထိုနေရာတွင် လှံများကို ကိုင်ဆောင်ကာ ကင်းစောင့်နေသော အဖြူရောင်ဝတ်စုံ ဝတ်ဆင်ထားသည့် လူသားနှစ်ဦး ရှိနေပြီး၊ သူတို့မှာ အပြာရောင်အလင်းတန်း ဝင်လာသည်ကို မမြင်မီအထိ ပျင်းရိငြီးငွေ့နေပုံရသည်။</p> <p>နောက်အခိုက်တန့်မှာပဲ အစောင့် နှစ်ယောက်မှာ ကြောင်နှင့်တိုးသော ကြွက်များကဲ့သို့ ဖြစ်သွားပြီး မျက်နှာများ ဖြူဖျော့ကာ ကျောကို ဆတ်ခနဲ မတ်လိုက်ကြသည်။ တံခါးကို စောင့်ကြပ်နေသော ကျောက်ရုပ်တုများကဲ့သို့ပင် ကြွက်သားတစ်ချက်မျှ မလှုပ်ရဲကြတော့ပေ။</p> <p>နောက်ဆုံး၌ အပြာရောင်အလင်းတန်းဟာတောင်တံခါးနှင့် မီတာအနည်းငယ်အကွာတွင်  အရှိန်သတ်လိုက်ပြီး ချောမောသော အမျိုးသား ပေါ်ထွက်လာသည်။</p> <p>ကင်းသမားနှစ်ဦးမှာ ထိုသူ၏ ဝတ်ရုံကို မြင်လိုက်ရသောအခါ လန့်ဖျပ်သွားပြီး ချက်ချင်း ဒူးထောက်ကာ တစ်ပြိုင်နက်တည်း အော်ဟစ်လိုက်ကြသည်။</p> <p>"ကျွန်တော်မျိုးတို့ အင်မော်တယ်အရှင်ကို ဂါရဝပြုပါတယ်.."</p> <p>'ဟင်..အင်မော်တယ် အရှင်ဆိုပါလား'</p> <p>ယင်းနှုတ်ဆက်စကားကြောင့် အေ့စ် ရယ်ချင်သွားမိသော်လည်း၊ သူ၏ လက်ကောက်ဝတ်တွင် ပတ်ထားသော ချီ စွမ်းအင်များ ပြေလျော့သွားသည်ကို ခံစားလိုက်ရသဖြင့် လန့်သွားသည်။ နောက်တစ်ခဏတွင် ၎င်းမှာ ပျောက်ကွယ်သွားပြီး သူဟာ ပေ ၃၀ ကျော် (၁၀ မီတာကျော်) အမြင့်မှ ကျောက်ပြင်ပေါ်သို့ ပြုတ်ကျသွားတော့သည်။</p> <p>အကယ်၍ သူသာ သာမန်လူတစ်ယောက် အမှန်တကယ် ဖြစ်နေပါက အရိုးကျိုးခြင်း သို့မဟုတ် ပြင်းထန်သော ဒဏ်ရာများ ရရှိသွားမည်ဖြစ်ပြီး ၎င်းမှာ ဓားပေါ်မှလူက အေ့စ် ၏ အသက်ကို လုံးဝဂရုမစိုက်ကြောင်း ပြသနေခြင်းဖြစ်ပြီး၊ သူက အေ့စ်ကို သတ်ဖြတ်ခြင်းမပြုရန် တားဆီးထားသည့် ပြင်းထန်သော စည်းမျဉ်းအချို့ကြောင့်သာ အသက်ချမ်းသာပေးထားခြင်း ဖြစ်နိုင်သည်။ သို့မဟုတ်လျှင်လည်း ပုရွက်ဆိတ်တစ်ကောင်ကို ကိုင်တွယ်ရန် သူက အလွန်ပင် မာနကြီးနေခြင်းလည်း ဖြစ်နိုင်သည်။</p> <p>မည်သို့ပင်ဖြစ်စေ အေ့စ်ကမူ အခမဲ့ စီးနင်းခွင့်ရသည့်အတွက် ဝမ်းသာနေပြီး၊ ထိုသူအနေဖြင့် နောင်တစ်ချိန်တွင် မည်သူက အမှန်တကယ် ငကြောင်တစ်ကောင် ဖြစ်သည်ကို သိရှိသွားလိမ့်မည် ဖြစ်သည်။</p> <p>ထို့ကြောင့် အေ့စ်က မည်သည့်စွမ်းအားမျှ အသုံးမပြုဘဲ အူကြောင်ကြောင် မျက်နှာထားဖြင့်ပင် ကျောက်ပြင်ပေါ်သို့ မှောက်လျက်သား ကျလိုက်သည်။ ဓားပေါ်မှလူက သူ့ကို တစ်ချက်မျှသာ ကြည့်ပြီးနောက်၊ ရုတ်တရက် မြင်ကွင်းကြောင့် ကြောင်နေသည့် ကင်းသမားများဘက်သို့ ခေါင်းလှည့်လိုက်သည်။</p> <p>သူက စူးရှသော အကြည့်များဖြင့် အေးစက်စွာ မေးလိုက်၏။</p> <p> "ဒီအရူးကို ဘယ်သူ အပြင်လွှတ်လိုက်တာလဲ.."</p> <p>ကင်းသမားနှစ်ဦးမှာ ချွေးပြန်ကာ တုန်တုန်ရင်ရင် ဖြစ်လာကြသည်။</p> <p>"ကျွန်... ကျွန်တော်တို့ မသိ..."</p> <p>တစ်ယောက်က မဖြေရသေးမီမှာပင် တောင်တစ်လုံးကဲ့သို့ လေးလံသော အရှိန်အဝါတစ်ခုက သူတို့အပေါ် ကျရောက်လာသည်။</p> <p>"မင်းတို့က အခုထိ ဟန်ဆောင်နေတုန်းလား.."</p> <p>ဓားပေါ်မှလူက ဒေါသတကြီး အော်ဟစ်လိုက်သည်။</p> <p>အရူးတစ်ယောက်ကို ပြန်လိုက်ဖမ်းရသည်အထိ ပင်ပန်းအောင်လုပ်ခဲ့သော ဤနှစ်ယောက်အပေါ်တွင်သာ ဒေါသပုံချတော့မည် ဖြစ်သည်။</p> <p>"သူက သလင်းမြစ်ထဲမှာ ရေချိုးနေရုံတင်မကဘူး၊ သစ်သားချပ်အစုတ်ကြီးနဲ့ ဟိုဘက်ရောက်နေတာ။ ဒါတင်မကသေးဘူး၊ သူက နေလ ဓားမဟာမိတ်ရဲ့ ပြင်ပမှာ တားမြစ်ထားတဲ့ အနက်ရောင်ဝတ်စုံကို ဝတ်ထားတယ်။ မင်းတို့ရဲ့ တောင်သခင်ကို ဒီကို ခေါ်ခဲ့စမ်း။ ဒီအဝတ်အစားတွေကို ဘယ်သူက ရက်ပေးလိုက်သလဲဆိုတာ ငါကြည့်ချင်သေးတယ်"</p> <p>မြေပြင်ပေါ်တွင် အေ့စ်မှာ ဤအမည်ကို ကြားလိုက်ရသဖြင့် အံ့အားသင့်သွားမိသည်။</p> <p>'နေလ ဓားမဟာမိတ်တဲ့လား..'</p> <p> </p> <p> </p> <p style="text-align: center;">***</p>


Save