Book List

<h2 style="text-align: center;">အခန်း ၈၇ - အဆင့်-D တတိယအလွှာ နှင့်</h2> <h2 style="text-align: center;">အရပ်ဆယ်မျက်နှာ သုတ်သင်ခြင်း ဓားသိုင်း အဆင့်-၄</h2> <h2 style="text-align: center;">*</h2> <p> </p> <p> </p> <p> </p> <p> </p> <p style="text-align:justify">ခန္ဓာကိုယ်အတွင်း၌ နှစ်ဆတိုးလာသော စွမ်းအားများကို ခံစားမိတော့မှ လုချန် စိတ်အေးသွားရသည်။ အချိန်က စောသေးသည်ဖြစ်ရာ သူ အနားမယူတော့ဘဲ ဓားကို ဆွဲထုတ်လိုက်သည်။ သူက အရပ်ဆယ်မျက်နှာ သုတ်သင်ခြင်း ဓားသိုင်းကို စတင် လေ့ကျင့်တော့သည်။ ဤဓားသိုင်း၏ တတိယအဆင့်က အခြေခံခွန်အားကို ၆ ဆ တိုးစေနိုင်ပြီး စတုတ္ထအလွှာသို့ ရောက်ရှိသွားပါက ၉ ဆအထိ မြှင့်တင်ပေးနိုင်မည် ဖြစ်သည်။</p> <p style="text-align:justify">ထို့နောက်တွင်တော့ လုချန်က ဓားဆွဲထုတ်သည့် အလေ့အကျင့်ကိုသာ ထပ်တလဲလဲ အာရုံစိုက် လုပ်ဆောင်နေခဲ့သည်။ အချိန်များ ကုန်ဆုံးသွားသည်ကိုပင် သူ သတိမထားမိတော့ပေ။ ရင်းနှီးနေသော အကြောင်းကြားစာ အသံလေး ထွက်ပေါ်လာသည့်တိုင်အောင်ပင်။</p> <p style="text-align:justify">“အရပ်ဆယ်မျက်နှာ သုတ်သင်ခြင်း ဓားသိုင်း အဆင့်-၄ သို့ အောင်မြင်စွာ ဖောက်ထွက်သွားပါပြီ။”</p> <p style="text-align:justify">သူ လှုပ်ရှားမှုများကို ရပ်တန့်လိုက်ပြီး သက်ပြင်းတစ်ချက် အားရပါးရ ချလိုက်သည်။ သူ၏ မျက်နှာပေါ်တွင် ချွေးများက စီးကျနေသည်။ ယခုအခါ အရပ်ဆယ်မျက်နှာ သုတ်သင်ခြင်း ဓားသိုင်းက စွမ်းအားကို ၉ ဆ မြှင့်တင်ပေးနိုင်ပြီ ဖြစ်သည်။ ထို့အပြင် ကောင်းကင်ခွဲ နတ်ဓားသိုင်း၏ ဓားရည်ရွယ်ချက်က ၁၁ ဆ မြှင့်တင်ပေးထားရာ စုစုပေါင်း မြှင့်တင်မှုမှာ ၉၉ ဆအထိ ရှိလာခဲ့ပြီ ဖြစ်သည်။ ဓာတ်သဘာဝ အပိုဆုများကို ထည့်မတွက်ထားလျှင်ပင် သူ၏ သီအိုရီအရ စွမ်းအားထွက်ရှိမှုမှာ တန်ချိန် ၇၄.၂၈ သန်းအထိ မြင့်တက်သွားသည်။</p> <p style="text-align:justify">လုချန်က ဓားရိုးကို ခပ်တင်းတင်း ဆုပ်ကိုင်လိုက်ရင်း ရင်ထဲတွင် စိတ်လှုပ်ရှားမှုများ ပြည့်နှက်သွားသည်။ ဤစွမ်းအားမှာ အဆင့်B တတိယအလွှာ စစ်သည်တော်တစ်ဦး၏ အခြေခံခွန်အားဖြစ်သော တန် ၆ သန်းထက်ပင် အဆပေါင်းများစွာ သာလွန်နေလေသည်။ ဤအခိုက်အတန့်ကျမှသာ သူ၏ စိတ်ထဲမှ လေးလံမှုများမှာ လုံးဝ ဥဿုံ ကွယ်ပျောက်သွားတော့သည်။ သူက ယုံကြည်ချက် ပိုရှိလာခဲ့သည်။</p> <p style="text-align:justify">အချိန်ကို ကြည့်လိုက်တော့ မနက် ၈ နာရီ ၃ မိနစ် ရှိနေပြီ ဖြစ်သည်။ မဟာမိတ်အဖွဲ့သို့ သွားရန် အချိန်တန်သည်။ ယနေ့တွင် ချိုက်ကျိကွမ်နှင့် အခြားသူများကို သွားရောက်တွေ့ဆုံရမည့်အပြင် ကောဂျီနှင့် အခြားကျောင်းနေဖက် သုံးဦးကိုလည်း ပါရမီနိုးထစေရန် ကူညီပေးမည်ဟု သူက ကတိပေးထားခဲ့သည်။ သို့သော် မနေ့က ဖြစ်ရပ်များကြောင့် ချိုက်ကျိကွမ်အနေဖြင့် နိုးထခြင်း စမ်းသပ်မှုများကို လုပ်ဆောင်ပေးနိုင်ဦးမည်လား သူ သွားရောက် စစ်ဆေးရဦးမည်။</p> <p style="text-align:justify">ယခုအခါ သူ၏ ဝိညာဉ်သွေးကြော အချင်းမှာ ပိုမိုကျယ်ပြန့်လာခဲ့ရာ သိုလှောင်ထားသော စွမ်းအင်များလည်း ပိုမိုများပြားလာသည်။ ထို့ကြောင့် မည်သည့် ဝန်ထုပ်ဝန်ပိုးမှ မရှိဘဲ နောက်ထပ် ကိုယ်ပွားတစ်ခုကို ဖန်တီးနိုင်ပြီ ဖြစ်သည်။ သူက အာရုံစူးစိုက်လိုက်ကာ တစ်ချက်တွေးရုံဖြင့် ကိုယ်ပွားကုဋေကုဋာ အတတ်ကို အသက်သွင်းလိုက်သည်။</p> <p style="text-align:justify">သူ၏ ခန္ဓာကိုယ်မှ အလင်းများ ဖြာထွက်လာပြီး ဝေဝါးသော ပုံရိပ်တစ်ခု ထွက်ပေါ်လာသည်။ ထိုပုံရိပ်မှာ တဖြည်းဖြည်း ပိုမိုကြည်လင်လာပြီး နောက်ဆုံးတွင် သက်ရှိထင်ရှား လူတစ်ယောက်ကဲ့သို့ ဖြစ်သွားသည်။ ကိုယ်ပွားက သူ၏ မည်သူမည်ဝါဖြစ်ကြောင်း ဖုံးကွယ်ရန်အတွက် ရိုးရှင်းသော အဖြူရောင်မျက်နှာဖုံးကို တပ်ဆင်လိုက်သည်။</p> <p style="text-align:justify">"သွားတော့" </p> <p style="text-align:justify">လုချန်က အမိန့်ပေးလိုက်ရာ ကိုယ်ပွားက ခေါင်းညိတ်ပြပြီး အခန်းထဲမှ ပျောက်ကွယ်သွားသည်။ ၎င်းက လော့နျန်ဝေတို့ အိမ်သို့ တန်းတန်းမတ်မတ် သွားလိမ့်မည် ဖြစ်သည်။ လုချန်က အသက်ကို ပြင်းပြင်းတစ်ချက် ရှူလိုက်ပြီးနောက် အောက်ထပ်သို့ ဆင်းကာ ကားပေါ် တက်လိုက်သည်။ အင်ဂျင်သံ ဟိန်းခနဲ မြည်သွားသည်နှင့်အတူ ကားလေးမှာ မဟာမိတ်အဖွဲ့ရှိရာသို့ ဦးတည် ထွက်ခွာသွားတော့သည်။</p> <p style="text-align:justify">သူက ရောက်သွားချိန်တွင် ထိုနေရာမှာ ဖရိုဖရဲ ဖြစ်နေဆဲပင်။ လမ်းမပေါ်တွင် မှန်ကွဲစများ ပြန့်ကျဲနေပြီး အလုပ်သမားများမှာ ပြတင်းပေါက်များ အစားထိုးရန်အတွက် အလုပ်ရှုပ်နေကြသည်။ သူတို့က အပျက်အစီးများကို စုပုံကာ ရှင်းလင်းနေကြသည်။ နံရံများပေါ်တွင် အက်ကွဲကြောင်းများနှင့် မီးလောင်ကျွမ်းထားသော အမှတ်အသားများ ထင်ကျန်နေခြင်းမှာ ယမန်နေ့က ဤမြို့တော်ကြီး ပျက်စီးလုနီးပါး ဖြစ်ခဲ့ရကြောင်း သက်သေပြနေသကဲ့သို့ပင်။ လုချန်က ကားပါကင်ထိုးပြီးနောက် ခန်းမအတွင်းမှတစ်ဆင့် ချိုက်ကျိကွမ်၏ ရုံးခန်းသို့ လျှောက်သွားကာ တံခါးကို အသာအယာ ခေါေါက်၍ ဝင်လိုက်သည်။</p> <p style="text-align:justify">ချိုက်ကျိကွမ်က အစီရင်ခံစာပုံကြီးထဲတွင် အလုပ်ရှုပ်နေပြီး အလွန်ပင် ပင်ပန်းနွမ်းနယ်နေပုံ ပေါ်သည်။ သို့သော် သေဘေးမှ သီသီလေး လွတ်မြောက်ခဲ့ရသော မနေ့ကထက်စာလျှင် အခြေအနေ ပိုကောင်းနေပုံရသည်။ “သူ တစ်ညလုံး မအိပ်ဘဲ အလုပ်လုပ်နေတာလား”ဟု လုချန် တွေးမိလိုက်သည်။</p> <p style="text-align:justify">ချိုက်ကျိကွမ်က လုချန်ကို အတန်ကြာအောင် ကြည့်နေပြီးနောက် ပြုံးလိုက်သည်။</p> <p style="text-align:justify">"လုချန်... မင်း အဆင်ပြေတာ မြင်ရလို့ ဝမ်းသာပါတယ်ကွာ"</p> <p style="text-align:justify">ရိုးရှင်းသော စကားလုံး ဖြစ်သော်လည်း ထိုစကားနောက်ကွယ်မှ စိုးရိမ်ပူပန်မှုများကို လုချန် ခံစားမိသည်။ ခက်ခဲသော အခြေအနေများ ကြုံနေရသည့်တိုင် ချိုက်ကျိကွမ်က သူ၏ ဘေးကင်းမှုကို အရင်ဆုံး ဦးစားပေး မေးမြန်းနေခြင်းပင်။ လုချန်က ခေါင်းကို တစ်ဖက်သို့ စောင်းလိုက်ပြီး စနောက်လိုက်သည်။</p> <p style="text-align:justify">"အဖိုးကြီးချိုက်... အွန်လိုင်းပေါ်က ဗီဒီယိုကို ကျွန်တော် မြင်တယ်ဗျ... ခင်ဗျား အသက်ရှင်နေသေးတာ မြင်ရလို့ ဝမ်းသာပါတယ်"</p> <p style="text-align:justify">ချိုက်ကျိကွမ်က အားရပါးရ ရယ်မောလိုက်သည်။</p> <p style="text-align:justify">"ဟားဟား... မင်း ဒီကို ဘာကိစ္စနဲ့ လာတာလဲ... ငါ့ကို ဒီစကားတွေ လာပြောဖို့ သက်သက်ပဲလား"</p> <p style="text-align:justify">လုချန်က ခေါင်းခါပြကာ သူလာရသည့် ရည်ရွယ်ချက်ကို ရှင်းပြလိုက်သည်။ သူ၏ သူငယ်ချင်းများအတွက် ပါရမီနိုးထမှု စမ်းသပ်ချက်ကို ထပ်မံ လုပ်ဆောင်ပေးစေလိုခြင်း ဖြစ်သည်။ ချိုက်ကျိကွမ်က ခဏမျှ စဉ်းစားပြီးနောက် ခေါင်းညိတ်လိုက်သည်။</p> <p style="text-align:justify">"ရပါတယ်... ငါတို့မှာလည်း လူအင်အား လိုအပ်နေတာပဲ... မင်းရဲ့ သူငယ်ချင်းတွေထဲက တစ်ယောက်ယောက်က အစွမ်းထက်တဲ့ ပါရမီကို နိုးထလာနိုင်တာပဲ မဟုတ်လား"</p> <p style="text-align:justify">သူက တံခါးဝကို ညွှန်ပြကာ ပြောလိုက်သည်။ "သူတို့ကို ခေါ်လိုက်လေ ငါ စီစဉ်ပေးပါ့မယ်" ဟု ပြောသည်။</p> <p style="text-align:justify">လုချန်က မဟာမိတ်အဖွဲ့ အဆောက်အအုံ၏ ကျယ်ဝန်းသော ရှုခင်းကြည့်ဆောင်သို့ ထွက်လာခဲ့သည်။ သူက ဖုန်းကို ထုတ်ကာ ကောဂျီ၏ အမည်ကို နှိပ်လိုက်သည်။</p> <p style="text-align:justify">"ကောဂျီ..." ဖုန်းဝင်သွားသည်နှင့် လုချန်က တည်ငြိမ်သော လေသံဖြင့် ပြောလိုက်သည်။ "ဝမ်ဝမ်၊ တွန့်ရှန်၊ ဆုတလုံနဲ့ လျိုထောင်းတို့ကိုပါ တစ်ခါတည်း ခေါ်လာခဲ့... မင်းတို့ရဲ့ ပါရမီနိုးထမှု စမ်းသပ်ချက်ကို ငါ ပြန်စီစဉ်ထားတယ်... မနေ့က အခြေအနေတွေ ရှုပ်ထွေးသွားပေမဲ့ မင်းတို့ အဆင့်မြင့် ခန္ဓာကိုယ်သန့်စင်ဆေးရည်ကိုတော့ သောက်ထားပြီးပြီ မဟုတ်လား"</p> <p style="text-align:justify">"သောက်ထားပြီးပြီ" ကောဂျီက အသံဗလုံးဗထွေး ဖြစ်နေသော်လည်း ပြတ်သားစွာ ပြန်ထူးသည်။ "ငါတို့အားလုံး အဆင်သင့်ပဲ"</p> <p style="text-align:justify">"ကောင်းပြီ... နာရီဝက်နေရင် တွေ့ကြမယ်"</p> <p style="text-align:justify">လုချန်က ဖုန်းချလိုက်ပြီး မြို့ပြရှုခင်းကို ငေးကြည့်နေမိသည်။ သားရဲများ တိုက်ခိုက်မှုကြောင့် ပျက်စီးသွားသော အစအနများက ယခုတိုင် အထင်အရှား ရှိနေဆဲပင်။ နာရီဝက်အကြာတွင် သူငယ်ချင်း ငါးဦးလုံး ရောက်ရှိလာကြသည်။ သူတို့၏ မျက်နှာများမှာ မနေ့က ဖြစ်ရပ်များကြောင့် ဖြူဖျော့ကာ အိပ်ရေးပျက်နေပုံ ပေါ်သော်လည်း မည်သူမျှ ညည်းညူခြင်း မရှိဘဲ စိတ်ပိုင်းဖြတ်ထားသော ပုံစံများဖြင့် စမ်းသပ်ခန်းအတွင်းသို့ ဝင်သွားကြသည်။</p> <p style="text-align:justify">အခြေခံခွန်အား တိုင်းတာသည့်စက်ကို ပြန်လည် ချိန်ညှိထားပြီး ဖြစ်ရာ "ဒုတ်... ဒုတ်..." ဟူသော အသံများနှင့်အတူ သူတို့အားလုံး ခွန်အားစမ်းသပ်မှုကို အောင်မြင်ခဲ့ကြသည်။ ထို့နောက် အရှိန်နှုန်း စမ်းသပ်မှုကိုလည်း ဆက်တိုက် လုပ်ဆောင်ခဲ့ကြသည်။ အဆင့်မြင့် ဆေးရည်၏ အာနိသင်ကြောင့် သူတို့၏ ကန့်သတ်ချက်များ ပွင့်ထွက်သွားကာ ကိုယ်ကာယ ကြံ့ခိုင်မှုမှာ သာမန်လူများထက် များစွာ သာလွန်နေခဲ့သည်။</p> <p style="text-align:justify">နောက်ဆုံးတွင် ပါရမီနိုးထစေမည့် အချိန်သို့ ရောက်ရှိလာသည်။ လုချန်က ဘေးမှနေ၍ လက်ပိုက်ကာ စောင့်ကြည့်နေသည်။ သူတို့ တစ်ယောက်ပြီးတစ်ယောက် ပုံဆောင်ခဲပေါ်သို့ လက်တင်ကာ စမ်းသပ်ခဲ့ကြသော်လည်း အဆုံးသတ်တွင် ကောဂျီ တစ်ဦးတည်းသာ မြေဓာတ်ပါရမီကို နိုးထနိုင်ခဲ့လေသည်။</p> <p style="text-align:justify">***</p>


Save