BIT

Title

Show in VIP/Series

Status (Active / Inactive)

<h2 style="text-align: center;">အပိုင်း (၁၀၈၄)</h2>

<h2 style="text-align: center;">စိတ်ပျက်အားငယ်ခြင်း (၃)</h2>

ကျိုးပဲ့နေသော အင်မော်တယ်ဓား၏ အရှိန်မှာ ရုတ်တရက် မြင့်တက်လာပြီး ရှေးဟောင်းနတ်ဆိုး၏ နံဘေးမှတစ်ဆင့် ထိုးဖောက်ဝင်ရောက်ကာ ၎င်း၏ ခန္ဓာကိုယ်အတွင်း၌ နောက်တစ်ကြိမ် အရှိန်အဟုန်ဖြင့် မွှေနှောက်တိုက်ခိုက်လိုက်သည်။

ရှေးဟောင်းနတ်ဆိုးမှာ နာကျင်မှုကြောင့် တုံ့ပြန်လိုက်ရပြီး ထိတ်လန့်ဒေါသထွက်သွားခဲ့သည်။ ကျိုးပဲ့နေသော အင်မော်တယ်ဓား၏ အရှိန်မှာ အလွန်မြန်ဆန်လွန်းလှသဖြင့် ၎င်းအနေဖြင့် နောက်သို့လှည့်၍ ထွက်ပြေးခြင်းမှလွဲ၍ အခြားတားဆီးနိုင်မည့် နည်းလမ်းမရှိပေ။

၎င်း၏ ခန္ဓာကိုယ်အတွင်း၌ ကျိုးပဲ့နေသော အင်မော်တယ်ဓား ဖျက်ဆီးနေသည်ကို ခံစားရသဖြင့် ၎င်းသည် အဆက်မပြတ် ဟိန်းဟောက်နေပြီး ထိခိုက်သွားသော ကိုယ်တွင်းအစိတ်အပိုင်းများကို ပြန်လည်ကုသရန်အတွက် အင်မော်တယ်စွမ်းအင်များကို ခန္ဓာကိုယ်တစ်ခုလုံးဆီသို့ စီးဆင်းစေလိုက်သည်။

လောကဦးနတ်ဝိညာဉ်ကို လောင်ကျွမ်းစေလိုက်သည်နှင့်အမျှ ကျိုးပဲ့နေသော အင်မော်တယ်ဓား၏ အရှိန်မှာ အရင်ကထက် ပိုမိုမြန်ဆန်လာပြီး ပေါက်ကွဲသံများလည်း ဆက်တိုက် ထွက်ပေါ်နေခဲ့သည်။ မျက်စိတစ်မှိတ်အတွင်းမှာပင် ၎င်းသည် ရှေးဟောင်းနတ်ဆိုး၏ ခန္ဓာကိုယ်အတွင်းရှိ အသားများနှင့် ကိုယ်တွင်းအင်္ဂါအားလုံးကို ဖျက်ဆီးပစ်လိုက်ပြီး အရိုးပေါင်း သုံးရာကျော်ကို ဖျက်ဆီးကာ တစ်ကိုယ်လုံး၏ ကိုးဆယ်ရာခိုင်နှုန်းခန့်ကို ပျက်စီးသွားစေခဲ့သည်။

သို့သော် ဖြတ်တောက်ရန် အရိုးပေါင်း ၃၀ ခန့် ကျန်ရှိနေသေးသည်။ ထိုအချိန်တွင် ရှေးဟောင်းနတ်ဆိုး၏ အတွင်းရှိ အင်မော်တယ်စွမ်းအင်များ ပေါက်ကွဲထွက်လာပြီး တစ်ကိုယ်လုံးရှိ ဒဏ်ရာများမှာ ချက်ချင်း ပြန်လည်သက်သာသွားခဲ့သည်။

“မလုံလောက်သေးဘူး... နည်းနည်းလေးပဲ လိုတော့တာ...”

လီဟောင်၏ နှလုံးသားမှာ မကျေမနပ် ဖြစ်နေခဲ့သည်။ ထိုမျှလောက်ဖြင့် အဆုံးသတ်သွားရတော့မည်လား။

ထို့အပြင် သေစေနိုင်သော စွမ်းရည်မှာလည်း အသက်မဝင်သေးပေ။ ၎င်းသည် စစ်မှန်သော အင်မော်တယ်တစ်ပါးအပေါ်တွင် သက်ရောက်မှုမရှိခြင်းမဟုတ်လျှင် သူ၏ တိုက်ခိုက်မှုအရှိန်မှာ မြန်ဆန်လွန်းနေသဖြင့် အားလုံးကို တိုက်ခိုက်မှုတစ်ခုတည်းအဖြစ် သတ်မှတ်လိုက်သည်လား။

“ဒါက ဘယ်လိုလုပ် ဖြစ်နိုင်မှာလဲ...”

“မသတ်နိုင်ဘူး... လုံးဝကို သတ်လို့မရဘူး”

ရှေးဟောင်းနတ်ဆိုး၏ အရှိန်အဝါများ ပြန်လည်အားကောင်းလာသည်ကို မြင်လိုက်ရသော သူတော်စင်များမှာ စိတ်ပျက်အားငယ်သွားကြသည်။ လီဟောင်သည် အကန့်အသတ်အဆင့်များကို ထုတ်ဖော်ကာ မိုးမြေသွေးကြောကို ဝန်းရံထားသော ကောင်းကင်ဘုံ ကြယ်တာရာ သွေးကြောများနှင့် အဆုံးစွန်အဆင့်စွမ်းအားများကိုပင် ထုတ်ဖော်ခဲ့သော်လည်း ကျရှုံးခဲ့ရသည်ကို သူတို့ မြင်တွေ့နေရသည်။

လီဟောင် စုစည်းထားသော စွမ်းအားမှာ သူတို့ကို ထိတ်လန့်တုန်လှုပ်စေသော်လည်း စစ်မှန်သော အင်မော်တယ်အဆင့် ရှေးဟောင်းနတ်ဆိုးကို သတ်ဖြတ်နိုင်လောက်သည့် စွမ်းအားမျိုး မဟုတ်သေးပေ။

“ဘုန်း”

ရှေးဟောင်နတ်ဆိုး၏ ခန္ဓာကိုယ်မှာ ပြန်လည်သက်သာလာသည်နှင့် လီဟောင်ထံသို့ တိုက်ရိုက် တိုးဝင်လာပြီး အင်မော်တယ်နယ်မြေဖြင့် ဖိနှိပ်လိုက်သည်။ ကြီးမားသော ဖိအားမှာ လီဟောင်၏ အရိုးများကိုပင် ချေမှုန်းပစ်တော့မည့်အတိုင်း ဖြစ်နေခဲ့သည်။ ထာဝရတာအိုနယ်မြေမှာ အင်မော်တယ်နယ်မြေ၏ အတင်းအဓမ္မ ထိုးဖောက်ခြင်းကို ခံလိုက်ရပြီး ဥပဒေသစွမ်းအင်အားလုံးမှာလည်း အာနိသင် ကင်းမဲ့သွားခဲ့သည်။

ရှေးဟောင်းနတ်ဆိုးသည် ၎င်း၏ သွေးအိုင်ကဲ့သို့သော ပါးစပ်ကြီးကိုဟကာ လီဟောင်၏ ဦးခေါင်းကို ကိုက်ဖြတ်ရန်ပြင်လိုက်သည်။ လီဟောင်၏ လောကဦးနတ်ဝိညာဉ်ကို တိုက်ရိုက်စုပ်ယူ၍ ၎င်း၏ ခန္ဓာကိုယ်အတွင်း၌ တဖြည်းဖြည်း သန့်စင်နှိပ်စက်ရန် ကြံစည်နေခြင်း ဖြစ်သည်။

လီဟောင်၏ မျက်နှာမှာ ပျက်သွားပြီး ကျိုးပဲ့နေသော အင်မော်တယ်ဓားကို စွန့်လွှတ်လိုက်သည်။ အစောပိုင်းက တိုက်ခိုက်မှုများကြောင့် ဓားသွားမှာ လိပ်သွားခဲ့ပြီး ထပ်မံအသုံးပြုရန် မဖြစ်နိုင်တော့ပေ။

“ငါ့မှာသာ စစ်မှန်တဲ့ အင်မော်တယ်လက်နက်တစ်ခုရှိပြီး အဲဒါက လုံလောက်အောင် ထက်မြက်နေမယ်ဆိုရင်...”

လီဟောင်သည် သူ၏လက်သီးကို တင်းတင်းဆုပ်လိုက်သည်။ သူ၏ စွမ်းအားမှာ လုံလောက်နေသည်ဖြစ်ရာ ပြင်းထန်စွာ တိုက်ခိုက်လိုသော စိတ်ဆန္ဒများ ဖြစ်ပေါ်နေခဲ့သည်။ သူ၏ လက်ဖဝါးအတွင်း၌ ကျိုးပဲ့နေသော အင်မော်တယ်ဓား နှစ်လက် ထပ်မံပေါ်ပေါက်လာပြီး သူ၏ လောကဦးနတ်ဝိညာဉ် စွမ်းအားကို နှစ်ပိုင်းခွဲကာ ဓားတစ်လက်စီကို ထိန်းချုပ်၍ ရှေးဟောင်းနတ်ဆိုးခေါင်းဆောင်ထံသို့ တိုက်ခိုက်လိုက်သည်။

ယခုတစ်ကြိမ်တွင်လည်း သူသည် ဝမ်းဗိုက်ဘေးဖက်ရှိ အားနည်းချက်ကိုသာ တိုက်ခိုက်နေဆဲဖြစ်သော်လည်း ရှေးဟောင်းနတ်ဆိုး၏ ရုပ်ခန္ဓာကို သတ်ရန် မကြိုးစားတော့ပေ။ သူသည် သေစေနိုင်သော စွမ်းရည်ပေါ်တွင်သာ သူ၏ မျှော်လင့်ချက်ကို ပုံအောထားလိုက်သည်။ တစ်ရာခိုင်နှုန်းသော ဖြစ်နိုင်ခြေမှာ ယခုအခါ အကြီးမားဆုံးသော မျှော်လင့်ချက် ဖြစ်လာခဲ့သည်။

“ဘုန်း... ဘုန်း... ဘုန်း”

ကျိုးပဲ့နေသော အင်မော်တယ်ဓား နှစ်လက်မှာ ရှေးဟောင်းနတ်ဆိုး၏ တိုက်ခိုက်မှုများကို ရှောင်ကွင်းကာ နဂါးများကဲ့သို့ပင် ပြိုင်ဘက်၏ ခန္ဓာကိုယ်အတွင်းသို့ အရှိန်အဟုန်ဖြင့် တိုးဝင်သွားခဲ့သည်။ ကျိုးပဲ့နေသော အင်မော်တယ်ဓား၏ တိုက်ခိုက်မှုတိုင်းကို တိုက်ခိုက်မှု တစ်ချက်အဖြစ် ရေတွက်ခံရမည်ဖြစ်သည့်အတွက် ၎င်းသည် သေစေနိုင်သော စွမ်းရည်ကို ပိုမိုမြန်ဆန်စွာ အသက်ဝင်လာစေနိုင်သည်။

ရှေးဟောင်းနတ်ဆိုး၏ ထက်မြက်သော လက်သည်းကြီးများမှာ လီဟောင်ကို ဖမ်းဆုပ်ရန်ရောက်ရှိလာခဲ့သည်။ လီဟောင်သည် ထိပ်တိုက်ရင်ဆိုင်ရန် မကြိုးစားဘဲ ဆက်တိုက် ဆုတ်ခွာလိုက်သည်။ သူ၏ ခန္ဓာကိုယ် လှုပ်ရှားမှု နည်းစနစ်မှာ ယခင်ကကဲ့သို့ မဟုတ်ဘဲ တာအို ဝင်ရောက်ခြင်းအဆင့်သို့ ရောက်နေပြီဖြစ်ရာ ဟင်းလင်းပြင်ရှိ မည်သည့်နေရာမှမဆို စွမ်းအင်ကို ငှားရမ်းအသုံးပြုနိုင်ပြီ ဖြစ်သည်။

သို့သော် အင်မော်တယ်နယ်မြေ၏ ဖိနှိပ်မှုကြောင့် လီဟောင်၏ လှုပ်ရှားမှုများမှာ ဆယ်ဆခန့် နှေးကွေးသွားပြီး ထက်မြက်သော လက်သည်းကြီးများ၏ ဖမ်းဆုပ်ခြင်းကို ခံလိုက်ရသည်။ ရှေးဟောင်းနတ်ဆိုးသည် လီဟောင်၏ ဓားနှစ်လက်ကို ဂရုမစိုက်ဘဲ လီဟောင်ကိုသာ ဖမ်းဆုပ်ထားပြီး သူ၏ ဦးခေါင်းကို ကိုက်ဖြတ်ရန် ပြင်လိုက်သည်။

“မြန်မြန်... ပေါ်လာစမ်း”

လီဟောင်သည် အံကို တင်းတင်းကြိတ်ကာ ရှေးဟောင်းနတ်ဆိုး၏ လက်သည်းကြီးများကို သူ၏ လက်မောင်းဖြင့် ဖယ်ရှားရန် ကြိုးစားလိုက်သည်။ သို့သော် သူ ဂုဏ်ယူရသော ရုပ်ခန္ဓာခွန်အားမှာ တောင်ကြီးတစ်လုံးကို တွန်းနေရသကဲ့သို့ ဖြစ်နေပြီး လှုပ်ရှားရန်ပင် ခက်ခဲနေခဲ့သည်။

ရှေးဟောင်းနတ်ဆိုးသည် ကိုက်ဖြတ်တော့မည့် အခိုက်အတန့်တွင် ရုတ်တရက် ၎င်း၏ ခန္ဓာကိုယ်မှာ တုန်ခါသွားပြီး ပြင်းထန်သော သေခြင်းတရား အရှိန်အဝါများက ၎င်းကို လွှမ်းခြုံသွားခဲ့သည်။

ရှေးဟောင်းနတ်ဆိုး၏ မျက်ဆံများ ကျုံ့ဝင်သွားခဲ့သည်။ ထိုခံစားချက်မှာ အလွန်ပြင်းထန်ပြီး လီဟောင်သည် ၎င်းကို အပြင်းအထန် ဒဏ်ရာရအောင် တိုက်ခိုက်ခဲ့စဉ်ကထက်ပင် ပို၍ ခြိမ်းခြောက်မှု ရှိနေခဲ့သည်။ ခုခံ၍မရနိုင်သော စွမ်းအားတစ်ခုမှာ ကောင်းကင်တာအိုကဲ့သို့ပင် လျင်မြန်စွာ ချဉ်းကပ်လာနေသော်လည်း ၎င်းမှာ ကောင်းကင်တာအိုထက်ပင် သာလွန်ကာ ကောင်းကင်တာအိုကို ကျော်လွန်နေသော စွမ်းအားမျိုး ဖြစ်နေခဲ့သည်။

“ရွှစ်”

ရှေးဟောင်းနတ်ဆိုး၏ ခန္ဓာကိုယ်မှာ ရုတ်တရက် ပေါက်ကွဲသွားပြီး မရေမတွက်နိုင်သော သွေးစများအဖြစ် ပြောင်းလဲသွားခဲ့သည်။ ဤမြင်ကွင်းမှာ လီဟောင်ကို မှင်တက်သွားစေခဲ့သည်။

ဝမ်းနည်းစိတ်ပျက်နေကြသော သူတော်စင်များမှာလည်း ဤရုတ်တရက် ဖြစ်ရပ်ကြောင့် အံ့အားသင့်သွားကြပြီး သူတို့၏ မျက်လုံးများထဲတွင် မျှော်လင့်ချက်အလင်းရောင်များ တစ်ဖန် ပြန်လည် တောက်ပလာခဲ့သည်။

“ဒါ... ဒါ သေသွားပြီလား”

“ဒါ ဟောင်ထျန်းသူတော်စင်ရဲ့ တိုက်ခိုက်မှုလား၊ ဘာလို့ ရုတ်တရက်ကြီး ပေါက်ကွဲသွားတာလဲ”

သူတော်စင်များအားလုံး ပေါက်ကွဲသွားသော သွေးစများကို စိုးရိမ်တကြီး စိုက်ကြည့်နေကြသည်။ လီဟောင်မှာမူ ခေတ္တမျှ မှင်တက်သွားပြီးနောက် အကြောင်းရင်းကို ချက်ချင်း သဘောပေါက်သွားခဲ့သည်။

၎င်းသည် သေစေနိုင်သော စွမ်းရည်ကြောင့် ကိုယ့်ကိုယ်ကိုယ် ဖျက်ဆီးလိုက်ခြင်း မဟုတ်ဘဲ ထိုရှေးဟောင်းနတ်ဆိုးသည် သေစေနိုင်သော စွမ်းရည်၏ သက်ရောက်မှုမှ လွတ်မြောက်ရန်အတွက် ထိုနည်းလမ်းကို အသုံးပြု၍ ရှောင်တိမ်းလိုက်ခြင်းသာ ဖြစ်သည်။

လေထဲတွင် လွင့်မျောနေသော အသားစများမှာ အလောင်းတစ်ခုကဲ့သို့ အောက်သို့ ကျမသွားဘဲ၊ မကြာမီမှာပင် ထိုအသားစများမှ နက်မှောင်သော မြူခိုးများ ထွက်ပေါ်လာကာ ရှေးဟောင်းနတ်ဆိုး၏ ခန္ဓာကိုယ်ကို လျင်မြန်စွာ ပြန်လည် စုစည်းလိုက်သည်။

“သတ်စမ်း”

ထိုအခွင့်အရေးကို မြင်လိုက်သည်နှင့် လီဟောင်သည် ကျိုးပဲ့နေသော အင်မော်တယ်ဓားကို အရှိန်အကုန်မြှင့်၍ တိုက်ခိုက်လိုက်သည်။ အသစ်ပြန်လည် ဖွဲ့စည်းစပြုနေသော ရှေးဟောင်းနတ်ဆိုး၏ ရုပ်ခန္ဓာမှာ ချက်ချင်းပင် ထိုးဖောက်ခံလိုက်ရပြီး ၎င်း၏ လောကဦးနတ်ဝိညာဉ်မှာ ရုပ်ခန္ဓာမှ ကွဲကွာသွားခဲ့သည်။ လီဟောင်၏ လောကဦးနတ်ဝိညာဉ်သည် လျင်မြန်စွာ တိုက်ခိုက်လိုက်ပြီး ကွဲကွာသွားသော လောကဦးနတ်ဝိညာဉ်ကို သတ်ဖြတ်လိုက်သည်။ သို့သော် ထိုနတ်ဝိညာဉ်မှာ ရှေးဟောင်းနတ်ဆိုး၏ လောကဦးနတ်ဝိညာဉ် အပြည့်အစုံ မဟုတ်ဘဲ ဝိညာဉ်အစိတ်အပိုင်းလေးတစ်ခုမျှသာ ဖြစ်နေခဲ့သည်။

***

Book List