Book List

<h2 style="text-align: center;">အခန်း ၉၂၉</h2> <h2 style="text-align: center;">ဝါးမြှားများ၊ အမြင့်ဆုံး A အဆင့်နှင့် ထိပ်တန်းအဆင့် အနက်ရောင်ရွှေသစ်သား</h2> <h2 style="text-align: center;">*</h2> <p> </p> <p> </p> <p>လောလောဆယ်တွင် အချက်အလက်များမှာ အလွန်နည်းပါးနေသေးသဖြင့် အတည်မပြုနိုင်သေးသော်လည်း ရှောင်းယီသည် တစ်စုံတစ်ယောက်က မကြာမီ အခြားအချက်အလက်များကို ပေးပို့လာလိမ့်မည်ဟု ယုံကြည်နေခဲ့သည်။</p> <p>ရှောင်းယီအပြင် နောက်ထပ် SSS အဆင့် အသက်ရှင်ကျန်ရစ်သူတစ်ဦးမှာ ကျိကျိယင်း ဖြစ်သည်။ ရှောင်းယီအနေဖြင့် ကျိမိသားစုထံမှ အချက်အလက်များကိုသာ စောင့်ကြည့်ရန် လိုအပ်ပြီး ၎င်းမှာ ကျိမိသားစုက မည်သည့်အချိန်တွင် အကူအညီတောင်းခံလာမည်နည်းဆိုသည့် အပေါ်တွင် မူတည်နေပေသည်။</p> <p>ကျွန်းအထိမ်းအမှတ်ကျောက်တိုင်ပေါ်ရှိ ယီထျန်းဂရုကို ကြည့်လိုက်လျှင် လောက်လွှဲများ၊ မြှားပစ်လှည်းများနှင့် လက်ကိုင်ဒူးလေးများမှာ အခုရေ ၅ သိန်းကျော် ရောင်းချပြီးဖြစ်သည်။</p> <p>အသက်ရှင်ကျန်ရစ်သူ အရေအတွက်မှာ ထိုမျှမရှိသော်လည်း အသက်ရှင်ကျန်ရစ်သူများ၏ ကျွန်းပေါ်တွင် ဒေသခံအများအပြား ရှိနေခြင်းဖြစ်သည်။ ယခုအခါ အဖွဲ့ဝင်အများစုမှာ ဒေသခံများဖြစ်သည်ဟုပင် ဆိုနိုင်ပေသည်။</p> <p>ထို့အပြင် ဤလက်နက်အေးများမှာ ဈေးမကြီးသလို မဟာမိတ်အဖွဲ့၏ ဘေးကင်းလုံခြုံရေးနှင့်လည်း သက်ဆိုင်နေသဖြင့် မည်သူမျှ တွန့်တိုနေကြမည်မဟုတ်ပေ။</p> <p>“မနေ့ကသာ ဒီလိုရောင်းရရင် တော်တော်ကောင်းမှာပဲ။”</p> <p>ရှောင်းယီ သက်ပြင်းချလိုက်မိ၏။ မနေ့က ဆုလာဘ် နှစ်ဆရသောနေ့ဖြစ်ပြီး ယနေ့ အရောင်းအဝယ်များမှာမူ ပုံမှန်ဆုလာဘ်သာ ရရှိမည်ဖြစ်သည်။</p> <p>“နောက်ဆုံးတော့ ငါတို့တပ်မတော်ကို S အဆင့် လက်ကိုင်ဒူးလေးတွေ အပြည့်အစုံ တပ်ဆင်နိုင်ခဲ့ပြီ။ အခုမှပဲ အေးအေးဆေးဆေး အိပ်နိုင်တော့တယ်။”</p> <p>“ဟုတ်တယ်။ အဲဒီမြှားပစ်လှည်းတွေရှိရင် တစ်ဖက်က အလုံးအရင်းနဲ့ တက်လာမှာကို စိုးရိမ်စရာ မလိုတော့ဘူး။”</p> <p>“အင်း... ငါ့မှာ မေးခွန်းတစ်ခုရှိတယ်။ ငါတို့လက်နက်တွေက S အဆင့်ဖြစ်ပေမဲ့ သုံးနေတဲ့မြှားတွေကတော့ သာမန်အဆင့်တွေချည်းပဲ။ အဲဒါတွေက တကယ်ပဲ အသုံးဝင်မှာ သေချာလို့လား။”</p> <p>“အမ်... မင်းမပြောရင် ငါတောင် မေ့တော့မလို့။ ဟုတ်သားပဲ...ဒါဆို ဘယ်လိုလုပ်ကြမလဲ။”</p> <p>“ကျုပ်ရဲ့ ခန့်မှန်းချက်အရတော့ သာမန်မြှားတွေကို သုံးမယ်ဆိုရင် ဟိုအရိုးစုတွေကို ထိတာနဲ့ တန်းပြီး ကြေမွသွားလိမ့်မယ်။”</p> <p>“ဒုက္ခပဲ...ဘယ်လိုလုပ်ကြမလဲ။ ဒါက သေနတ်ရှိပြီး ကျည်ဆန်မရှိသလိုပဲ။ ငါတို့တော့ သွားပြီ။”</p> <p>“သူဌေး ကျေးဇူးပြုပြီး ကူညီပါဦး။ ကျုပ်တို့ အဆင့်မြင့်မြှားတွေ လိုချင်ပါတယ်။”</p> <p>အုပ်စုထဲမှလူများက သူ့ကို မန်းရှင်းခေါ်ကာ အဆင့်မြင့်မြှားများ ဝယ်ယူလိုကြောင်း ပြောနေကြသည်ကို မြင်သောအခါ ရှောင်းယီလည်း ကြက်သေသေသွားခဲ့သည်။ သူ၏ ထုတ်လုပ်မှု အင်တာဖေ့စ်ကို ပြန်လည်စစ်ဆေးကြည့်ရာတွင် သူထံ၌ B အဆင့် ဝါးမြှားတစ်ခုသာ ရှိသည်ကို တွေ့လိုက်ရလေသည်။</p> <p>အနည်းငယ် စဉ်းစားပြီးနောက် ရှောင်းယီသည် ဝါးမြှား ၄ စင်း ပြုလုပ်လိုက်ပြီး စူပါပေါင်းစပ်စက်ကို ထုတ်၍ ပေါင်းစပ်ကြည့်လိုက်သည်။</p> <p>“ပေါင်းစပ်မှု အောင်မြင်ပါသည်။ ရရှိသောပစ္စည်းများ - ဝါးမြှား (A အဆင့်) ၂။”</p> <p>နောက်တစ်ကြိမ် ထပ်မံကြိုးစားလိုက်၏။</p> <p>“ပေါင်းစပ်၍ မရနိုင်ပါ။ ဤဝါးမြှား၏ ကုန်ကြမ်းပစ္စည်းမှာ A အဆင့်အထိသာ အမြင့်ဆုံး ရရှိနိုင်ပါသည်။”</p> <p>ရှောင်းယီသည် စိတ်ပျက်လက်ပျက်ဖြင့် မျက်လုံးလှန်လိုက်မိပြီး အုပ်စုထဲတွင် ပြောလိုက်သည်။</p> <p>“လောလောဆယ် ကျုပ်ဆီမှာ A အဆင့် ဝါးမြှားတွေကိုပဲ ထောက်ပံ့ပေးနိုင်ပါတယ်။ ဒီအဆင့်မြှားတွေနဲ့ဆိုရင်တော့ လုံလောက်သင့်ပါပြီ။”</p> <p>“သူဌေးကမှ တကယ့်ကို အချိန်ကိုက် ကယ်တင်ရှင်ပဲ။ လိုအပ်တာမှန်သမျှ အကုန် ထုတ်ပေးနိုင်တယ်။”</p> <p>“ကျုပ်ကတော့  သူဌေးက ဒိုရေမွန်နဲ့ ပိုတူတယ်လို့ ခံစားရတယ်။ သူ့မှာ ရတနာအိတ်ကြီးရှိပြီး လိုချင်တာမှန်သမျှ အချိန်မရွေး ထုတ်ပေးနိုင်သလိုပဲ။”</p> <p>“ကျေးဇူးတင်ပါတယ် သူဌေး။ ဒီအဆင့်ဆိုရင် သေချာပေါက် လုံလောက်ပါတယ်။ ကျုပ်တို့ မဟာမိတ်အဖွဲ့ထဲက မသေမျိုးတွေက B အဆင့်လောက်ပဲ ရှိတာပါ။”</p> <p>“ငါတို့ မဟာမိတ်အဖွဲ့ကတော့ A အဆင့်ပဲ။ ဒါက အမြင့်ဆုံး ဖြစ်လိမ့်မယ် ထင်တယ်။”</p> <p>“အမြင့်ဆုံးဟုတ်လား။ သူဌေးတစ်ယောက်လုံး ရှိနေတာကို မင်းက အမြင့်ဆုံးလို့ ပြောရဲသေးတယ်ပေါ့။”</p> <p>“အဟမ်း... ငါပြောတာက သူဌေးကို ဖယ်ပြီး ပြောထားတာပါ။”</p> <p>ရှောင်းယီသည် မြှားများ ထုတ်လုပ်ခြင်းနှင့် ရောင်းချခြင်းကို အန်းရန်နှင့် ဆုဝမ်တို့အား တာဝန်ပေးထားလိုက်၏။ ယနေ့သည် ဆုလာဘ်နှစ်ဆရသောနေ့ မဟုတ်သဖြင့် သူကိုယ်တိုင် လုပ်နေရန် မလိုတော့ပေ။</p> <p>လက်ကိုင်ဒူးလေး၊ မြှားပစ်လှည်းနှင့် မြှားများ ရရှိလာသောအခါ ဂရုထဲမှလူများ ပြန်လည် စိတ်အေးသွားခဲ့ကြသည်။</p> <p>“ဒီကမ္ဘာ့စစ်မြေပြင်က မဆိုးပါဘူး။ စိန်ခေါ်မှု ရှိတယ်ဆိုပေမဲ့ ရင်ဆိုင်လို့ ရပါသေးတယ်။”</p> <p>“ကြွားတာ ရပ်လိုက်စမ်းပါ။ သူဌေးသာ မရှိရင် ငါတို့ကျွန်းတွေ တော်တော်များများ လက်လွှတ်လိုက်ရပြီးလောက်ပြီ။”</p> <p>“ဟုတ်တယ်။ ဒါက စိန်ခေါ်မှု အနည်းငယ် မဟုတ်ဘူး။ တကယ့်ကို ကြီးမားတဲ့ စိန်ခေါ်မှုကြီးပဲ။”</p> <p>“အားလုံးပဲ ငြင်းခုံမနေကြနဲ့ဦး။ ငါတို့ကျွန်းဆီကို သင်္ဘောတွေ ချဉ်းကပ်လာနေတာကို ငါဘာလို့ မြင်နေရတာလဲ။”</p> <p>“သင်္ဘောတွေ ချဉ်းကပ်လာတာလား။ မသေမျိုးတွေ ထပ်လာပြန်တာလား။”</p> <p>“မသေမျိုးတွေမှာ သင်္ဘောရှိလို့လား။”</p> <p>“ဘာလို့ မရှိရမှာလဲ။ ‘Pirates of the Caribbean’ ရုပ်ရှင်ကို မင်း မကြည့်ဖူးဘူးလား။”</p> <p>ရှောင်းယီသည်လည်း ထိုသတင်းစကားကို မြင်သောအခါ အလွန်အံ့သြသွားခဲ့သည်။ ကမ္ဘာ့စစ်မြေပြင်တွင် ထိုဒေသခံများသည် အသက်ရှင်ကျန်ရစ်သူများ၏ ကျွန်းကို တိုက်ခိုက်ရန် အားလပ်နေကြသေးသည်လော။ သို့မဟုတ် မသေမျိုးများက အသက်ရှင်ကျန်ရစ်သူများကိုသာ တိုက်ခိုက်နေကြခြင်းလော။</p> <p>ထိုဒေသခံများသည် ယခင်က ကျွန်းအထိမ်းအမှတ်ကျောက်တိုင်များကို လုယူခဲ့သော ကမ္ဘာသစ်ကြီး၏ ဒေသခံများလော၊ သို့မဟုတ် အရင်းအမြစ်ပင်လယ်မှ ဒေသခံများလော။</p> <p>ရှောင်းယီတွင် မေးခွန်းများစွာ ရှိနေသော်လည်း လောလောဆယ် အဖြေမရနိုင်သေးပေ။ သူသည် ဖုန်းကိုကောက်ကိုင်ပြီး အဖွဲ့ထဲသို့ မက်ဆေ့ချ် ပို့လိုက်သည်။</p> <p>“အားလုံး သတိထားကြ။ အသက်ရှင်ကျန်ရစ်သူ မဟာမိတ်တစ်ခုက ထူးဆန်းတဲ့ သင်္ဘောတွေနဲ့ ကြုံတွေ့နေရတယ်။ ငါတို့ မဟာမိတ်အဖွဲ့လည်း ပင်လယ်ပြင် အခြေအနေကို သတိထားစောင့်ကြည့်ထား။”</p> <p>“ဟုတ်ကဲ့”</p> <p>ထို့နောက် ရှောင်းယီသည် ဖုန်းကို ချထားလိုက်ပြီး ခေါင်းကို ပွတ်သပ်လိုက်မိသည်။</p> <p>မသေမျိုးများ၊ ဧရာမသားရဲများ၊ ဒေသခံများ...</p> <p>မည်သည့်အရာမှ ကိုင်တွယ်ရ မလွယ်ကူပေ။</p> <p>“ဟုတ်သားပဲ။ ငါက တခြားအသက်ရှင်ကျန်ရစ်သူတွေကိုပဲ အဆင့်မြင့်မြှားတွေ ရောင်းပေးနေတာ။ ငါတို့ မဟာမိတ်အဖွဲ့အတွက်ကရော...။”</p> <p>ရှောင်းယီ ရုတ်တရက် ထိုမေးခွန်းကို သတိရသွားခဲ့၏။</p> <p>ယီရန်ပင်း မဟာမိတ်အဖွဲ့ ရင်ဆိုင်နေရသော မသေမျိုးများမှာ S အဆင့်များ ဖြစ်ကြသည်။ A အဆင့်မြှားများက ၎င်းတို့ကို ဒဏ်ရာအချို့ ပေးနိုင်သော်လည်း အကန့်အသတ်ရှိသဖြင့် S အဆင့် သို့မဟုတ် ထို့ထက်အဆင့်မြင့်သော မြှားများကို ရှာဖွေရန် လိုအပ်ပေသည်။ မသေမျိုး အရေအတွက် မည်မျှရှိသည်ကိုလည်း မသိရသေးသဖြင့် လက်နက်ခဲယမ်းများကို အကန့်အသတ်မရှိ သုံးစွဲ၍ မရပေ။ ထို့ကြောင့် အဆင့်မြင့်မြှားများကို ရှာဖွေရပေလိမ့်မည်။</p> <p>“နတ်သူငယ်တွေဆီမှာ ရှိလောက်တယ်။”</p> <p>ရှောင်းယီသည် နတ်သူငယ်မျိုးနွယ်စုကို ချက်ချင်း သတိရသွားခဲ့ပြီး အလင်းနတ်သူငယ်ဘုရင်မ ဟေးလ်ထံသို့ ဖုန်းခေါ်လိုက်သည်။</p> <p>ဟေးလ်က ချက်ချင်း ဖုန်းကိုင်လာခဲ့၏။ သူမမှာ ဖုန်းဖြင့် ဆော့ကစားနေပုံပင်။</p> <p>“ကျွန်းပိုင်ရှင် ကျွန်မ ဘာကူညီပေးရမလဲ။”</p> <p>ဟေးလ်က ရိုသေစွာ မေးလိုက်သည်။</p> <p>“ခင်ဗျားတို့ရဲ့ မြှားတွေကို ဘာနဲ့လုပ်သလဲဆိုတာ ကျုပ် သိချင်တယ်။”</p> <p>ရှောင်းယီက တိုက်ရိုက် မေးလိုက်သည်။</p> <p>“အနက်ရောင်ရွှေသစ်နဲ့ပါ။”</p> <p>ဟေးလ်က ချက်ချင်းပြန်ဖြေလာခဲ့သည်။</p> <p>“အဲဒါက ဘာလဲ။ သစ်သားလား။”</p> <p>ရှောင်းယီက မျက်မှောင်ကျုံ့ကာ မေးလိုက်သည်။ ဤအမည်ကို သူပထမဆုံးအကြိမ် ကြားဖူးခြင်းပင်။</p> <p>“ဟုတ်ပါတယ်။ အနက်ရောင်ရွှေသစ်က နတ်သူငယ်သစ်ပင်ရဲ့ ပတ်ပတ်လည်မှာ ပေါက်ရောက်တတ်တဲ့ ကျွန်မတို့ နတ်သူငယ်တွေရဲ့ အထူးထုတ်ကုန်ပါ။ ကျွန်မတို့ နတ်သူငယ်လက်နက်တွေရဲ့ ကုန်ကြမ်းပစ္စည်းလည်း ဖြစ်ပါတယ်။”</p> <p>ဟေးလ်က ဆက်လက်ရှင်းပြလိုက်၏။ ထိုစကားကိုကြားသောခါ ရှောင်းယီက ချက်ချင်းမေးလိုက်သည်။</p> <p>“အခု ခင်ဗျားတို့ စခန်းမှာ အဲ့ဒီအနက်ရောင်ရွှေသစ်တွေ ရှိသေးလား။”</p> <p>“ရှိတာပေါ့။”</p> <p>ဟေးလ်က ပြုံးကာ ပြန်ဖြေလိုက်သည်။</p> <p>“နတ်သူငယ်တိုက်ကြီးမှာ ရှိခဲ့တာထက်တောင် ပိုများသေးတယ်။”</p> <p>“ခဏစောင့်နေပေး။ ကျုပ် အခု လာကြည့်မယ်။”</p> <p>ထို့နောက် ရှောင်းယီသည် မြို့ပြန်ကျောက်ကို အသုံးပြုပြီး နေရာမှ ချက်ချင်း ပျောက်ကွယ်သွားတော့သည်။</p> <p>အပန်းဖြေစခန်း၏ တည်နေရာကူးပြောင်းခြင်းအမှတ်သို့ ရောက်ရှိလာပြီးနောက် သူသည် ဟိုတယ်ကားကို စီးနင်းကာ နတ်သူကယ်စခန်းသို့ အပြေးအလွှား သွားလိုက်၏။ စခန်းအဝင်ဝတွင် စောင့်ကြပ်နေသော နတ်သူငယ်များသည်လည်း ရှောင်းယီ၏ ပုံပန်းသဏ္ဍာန်ကို မှတ်မိနေကြပြီ ဖြစ်သည်။ သူ ကားပေါ်မှ ဆင်းလာသည်ကို မြင်သောအခါ တစ်ယောက်ပြီးတစ်ယောက် နှုတ်ဆက်လိုက်ကြသည်။</p> <p>“မင်္ဂလာပါ ကျွန်းပိုင်ရှင်။”</p> <p>ရှောင်းယီသည် သူတို့ကို ခေါင်းငြိမ့်ပြပြီးနောက် အတွင်းသို့ ဝင်သွားလိုက်၏။ အလင်းနတ်သူငယ်စခန်းမှာ ဤနေရာနှင့် မဝေးသဖြင့် ရှောင်းယီသည် အလင်းနတ်သူငယ်သစ်ပင် အနီးသို့ လျင်မြန်စွာ ရောက်ရှိသွားခဲ့သည်။ ဟေးလ်သည်လည်း ထိုနေရာတွင် သူ့ကို စောင့်နေပြီဖြစ်သည်။</p> <p>“ကျွန်းပိုင်ရှင် ကျွန်မနောက် လိုက်ခဲ့ပါ။”</p> <p>ဟေးလ်က ရှောင်းယီကို ဘေးတစ်ဖက်သို့ ခေါ်ဆောင်သွားပြီး နှစ်ယောက်သား ချောမွတ်ကာ မည်းနက်နေသော သစ်ပင်တစ်ပင်ရှေ့သို့ ရောက်ရှိလာခဲ့လေသည်။</p> <p>“ဒါက အနက်ရောင်ရွှေသစ်ပင်ပါပဲ။”</p> <p>ရှောင်းယီသည် ထိုသစ်ပင်ကို အံ့အားတသင့် ကြည့်လိုက်ရာ စနစ်ဆီမှ အကြောင်းကြားစာ ထွက်ပေါ်လာခဲ့သည်။</p> <p>[အနက်ရောင်ရွှေသစ်ပင် (SSS အဆင့်): နတ်သူငယ်မျိုးနွယ်စု၏ အထူးထွက်ကုန်ဖြစ်ပြီး အလွန်မာကျောသော အသားရှိသည်။ ခုတ်လှဲပြီး ၂ နာရီအကြာတွင် သစ်ပင်တစ်ပင်လုံးမှာ ပြန်လည် မာကျောသွားမည်ဖြစ်ပြီး ၎င်း၏ မာကျောမှုမှာ သံမဏိထက်ပင် သာလွန်သည်။]</p> <p>“ခုတ်လှဲပြီးရင်တောင် ဆက်ပြီး မာကျောနိုင်တာလား။ ဒီလို ထူးဆန်းတဲ့ သစ်ပင်မျိုးလည်း ရှိနေသေးတယ်ပေါ့။”</p> <p>ရှောင်းယီ အံ့သြတကြီး ပြောလိုက်မိ၏။ ထိုအခါ ဟေးလ်မှာ မှင်တက်သွားပြီး ထိတ်လန့်သွားခဲ့သည်။</p> <p>“ရှင်... ရှင် ဘယ်လိုလုပ်ပြီး သိတာလဲ။”</p> <p>ဤသစ်ပင်မှာ သူတို့နတ်သူငယ်များ၏ အထူးထွက်ကုန်ဖြစ်ပြီး အခြားမျိုးနွယ်စုများကို ဤသတင်းအား ဘယ်သောအခါမျှ ထုတ်မပြောခဲ့ဖူးပေ။ အပြင်လူများ မသိနိုင်သော်လည်း ရှောင်းယီက မည်သို့သိနေခဲ့သနည်း။</p> <p style="text-align: center;"> </p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save