Book List

<h2 style="text-align: center;">အပိုင်း (၁)</h2> <h2 style="text-align: center;">*</h2> <p> </p> <p> </p> <p>သူ၏အမည်က ယွင်ကျုံးဟဲ့ ဖြစ်သည်။</p> <p>အမည်နာမကို ကြားလိုက်ရုံဖြင့် လူကောင်းမဟုတ်ကြောင်း သိသာ၏။ ဝတ္ထုအများစုတွင် ပါဝင်လေ့ရှိသည့် ဗီလိန်ဇာတ်ကောင်၊ အပျော်ကြူးသည့် လူယုတ်မာတစ်ဦးအဖြစ်သာ ပြေးမြင်မိပေလိမ့်မည်။</p> <p>သို့သော်ငြား သူသည် ငယ်စဉ်တည်းက ထူးချွန်သူတစ်ဦး ဖြစ်ခဲ့သည်။ ကျောင်းနေအရွယ်မှစ၍ တက္ကသိုလ် တက်ရောက်သည်အထိ ဘေးလူများ အားကျရလောက်အောင် တော်ခဲ့သူဖြစ်၏။</p> <p>အသက် (၂၄) နှစ်အရွယ်၌ ပရင်စတန်တက္ကသိုလ်မှ ပါရဂူဘွဲ့ ရရှိခဲ့ကာ၊ (၂၈) နှစ်အရွယ်တွင် နာမည်ကြီးဆေးရုံတစ်ခု၏ ဌာနမှူး ဖြစ်လာခဲ့သည်။ (၃၁) နှစ်အရွယ်သို့ ရောက်ချိန်မှာတော့ ထိုဆေးရုံ၏ ဒုတိယဆေးရုံအုပ် ရာထူးကို ရယူနိုင်ခဲ့သည်။ မည်သည့်နေရာသို့ ရောက်သည်ဖြစ်စေ သူက ထိပ်တန်းပုဂ္ဂိုလ်တစ်ဦး ဖြစ်စမြဲပင်။</p> <p>သို့ရာတွင် လွန်ခဲ့သော တစ်နှစ်ခန့်က လျှို့ဝှက်ဖုန်းခေါ်ဆိုမှုတစ်ခု လက်ခံရရှိပြီးနောက် အရာအားလုံး ပြောင်းလဲ သွားခဲ့သည်။ ဆေးရုံတစ်ရုံ၏ ဆေးရုံအုပ်အဖြစ် အတင်းအဓမ္မ ခေါ်ဆောင်ခံလိုက်ရခြင်း ဖြစ်၏။</p> <p>ဤဆေးရုံတွင် ဆရာဝန် တစ်ရာကျော်၊ သူနာပြုနှင့် ဝန်ထမ်း နှစ်ရာကျော် ရှိသော်လည်း လူနာဟူ၍ (၂၉) ဦးသာ ရှိသည်။ ပျမ်းမျှအားဖြင့် ဆေးဘက်ဆိုင်ရာဝန်ထမ်း ဆယ်ဦးက လူနာတစ်ဦးကို စောင့်ရှောက်နေရသည့် သဘော ဖြစ်သည်။</p> <p>ဆေးရုံ၏ အမည်မှာ အင်္ဂလိပ်အက္ခရာ တစ်လုံးတည်းသာ ရှိ၏။</p> <p>‘X’</p> <p>X စိတ်ကျန်းမာရေးဆေးရုံသည် တောနက်အတွင်း၌ တည်ရှိပြီး ပြင်ပလောကနှင့် လုံးဝ အဆက်အသွယ် ပြတ်တောက်နေသည်။ မြေပုံပေါ်တွင် ရှာမတွေ့နိုင်သလို အင်တာနက်ပေါ်၌လည်း အချက်အလက်မရှိပေ။</p> <p>မည်သည့်နိုင်ငံပိုင်နက် ဖြစ်ကြောင်း မသိရှိရသော်လည်း တရုတ်ပြည်တွင်း၌ မဟုတ်သည်မှာတော့ သေချာ၏။ ဆေးရုံပတ်လည် မိုင်တစ်ရာအတွင်း၌ ကြေးစားတပ်သား အများအပြား ချထားပြီး ထိုအထဲမှ ထက်ဝက်ကျော်သည် လူဖြူတပ်သားများ ဖြစ်ကြသည်။</p> <p>ရေဒါများနှင့် ခေတ်မီစက်ကိရိယာများအပြင် ကြီးမားသော ရေဒီယို တယ်လီစကုပ်ကြီးများလည်း တပ်ဆင် ထားသေးသည်။ စိတ်ကျန်းမာရေးဆေးရုံ ဟူသည်ထက် လျှို့ဝှက် စစ်စခန်းတစ်ခုနှင့်ပင် ပို၍ တူနေ၏။</p> <p>သို့သော်ငြား ဤနေရာက စစ်မှန်သော စိတ်ကျန်းမာရေးဆေးရုံ ဖြစ်ပြီး လူနာ (၂၉) ဦးမှာလည်း အရူးစစ်စစ်များ ဖြစ်ကြ၏။ ထိုအရူးများ၌ အခြားသော ဝိသေသတစ်ခု ရှိနေသေးသည်။ ထိုအရာမှာ ‘ပါရမီရှင်’ ဖြစ်ခြင်းပင်။</p> <p>ပါရမီရှင်နှင့် အရူးသည် စည်းပါးပါးလေးသာ ခြားနားသည်ဟု ဆိုကြသည်။ ဤဆေးရုံမှ လူနာ (၂၉) ဦးသည် အဆန်းကြယ်ဆုံးသော အရူးများ ဖြစ်သကဲ့သို့ ကြောက်မက်ဖွယ်ရာအကောင်းဆုံး ပါရမီရှင်များလည်း ဖြစ်ကြ၏။</p> <p>ယွင်ကျုံးဟဲ့ ကဲ့သို့သော ထူးချွန်သူတစ်ဦးပင်လျှင် ဤနေရာသို့ရောက်လာပြီးနောက် တွင်းအောင်းဖားပမာ ခံစားလိုက်ရသည်။ သို့မဟုတ် ရေအိုင်ထဲမှ ဖားသူငယ်ဟု ဆိုရမည်။ အဘယ်ကြောင့်ဆိုသော် ထိုလူနာများ၏ ရှေ့မှောက်၌ အချို့သောကိစ္စရပ်များတွင် သူက ဉာဏ်ရည်မမီသူ တစ်ဦးကဲ့သို့ ဖြစ်နေသောကြောင့်ပင်။</p> <p>………………</p> <p>အမှတ် (၁၉) လူနာ၊ အမည်ပြောင်အားဖြင့် ‘ပိုင်’။</p> <p>သူသည် ဆေးရုံရောက်သည့်အချိန်မှစ၍ စက်ဝိုင်းတန်ဖိုး ကိန်းဂဏန်း (Pi) တန်ဖိုး များကို တွက်ချက်နေခဲ့သူ ဖြစ်သည်။ အလွတ်ရွတ်ဆိုနေခြင်း မဟုတ်ဘဲ ဦးနှောက်ထဲတွင် တွက်ချက်နေခြင်း ဖြစ်သည်။ နေ့စဉ်ရက်ဆက် ပါးစပ်မှ မရပ်မနား ရွတ်ဆိုနေသော်လည်း တစ်ခါမှ ထပ်ခြင်း မရှိပေ။</p> <p>ဆေးရုံတက်လာသည်မှာ (၁၅) နှစ် ရှိခဲ့ပြီဖြစ်ပြီး တစ်စက္ကန့်လျှင် ဂဏန်းနှစ်လုံးနှုန်းဖြင့် ရွတ်ဆိုခဲ့ရာ ယခုအချိန်မှာတော့ ဒသမကိန်းနောက်မှ ဂဏန်းလုံးရေ သန်းပေါင်း (၉၄၀) အထိ ရောက်ရှိနေပြီ ဖြစ်သည်။</p> <p>အလွဲအမှား အတိမ်းအစောင်းမရှိ၊ မည်သည့်အကူအညီမှ မယူဘဲ ဦးနှောက်သက်သက်ဖြင့် တွက်ချက် ထားခြင်းပင်။ သူ၏ ဦးနှောက်သည် စူပါကွန်ပျူတာတစ်လုံးနှင့် ယှဉ်နိုင်သည်။ ထမင်းစားနေချိန်၊ အိပ်စက်နေချိန်၊ အိမ်သာတက်နေချိန်များ၌လည်း သူက မရပ်မနား ရွတ်ဆိုနေဆဲပင်။</p> <p>ပို၍ ကြောက်စရာကောင်းသည်မှာ နှုတ်မှ ဂဏန်းများ ရွတ်ဆိုနေရင်း တစ်ချိန်တည်းမှာပဲ အခြားသော သင်္ချာပုစ္ဆာများကိုပါ တွက်ချက်နိုင်စွမ်း ရှိနေခြင်း ဖြစ်၏။</p> <p>သူသည် အဆင့်မြင့်သင်္ချာများကို သင်ယူဖူးခြင်း မရှိသော်လည်း မည်မျှခက်ခဲသော ပုစ္ဆာဖြစ်ပါစေ မြင်လိုက်သည်နှင့် တစ်စက္ကန့်အတွင်း အဖြေထုတ်ပေးနိုင်သည်။</p> <p>လွန်ခဲ့သော (၁၅) နှစ်အတွင်း ကမ္ဘာ့အဆင့်မီ သင်္ချာပုစ္ဆာပေါင်းများစွာကို သူ ဖြေရှင်းခဲ့ပြီးပြီ ဖြစ်၏။ အကယ်၍သာ လူသိရှင်ကြား ထုတ်ပြန်နိုင်ခဲ့ပါက သင်္ချာလောက၏ နိုဘယ်ဆုဟု တင်စားရသော ဖီးလ်ဆုတံဆိပ်ကို အရူးတစ်ယောက်က ရရှိသွားပေလိမ့်မည်။</p> <p>………………</p> <p>အမှတ် (၂၃) လူနာ၊ အမည်ပြောင်အားဖြင့် ‘ဒါဗင်ချီ’။</p> <p>ကမ္ဘာပေါ်တွင် ပါရမီအရှိဆုံး ပန်းချီဆရာဟု ဆိုရပေမည်။ သူ၌ သင့်လျော်သော စက္ကူနှင့် မင်ရည်သာ ရှိပါက ငွေစက္ကူအတုများကို အစစ်နှင့်မခြား ရေးဆွဲနိုင်သူ ဖြစ်သည်။</p> <p>ကမ္ဘာကျော် ပန်းချီကားများကို ပြန်လည်ရေးဆွဲပြီး ဟောင်းနွမ်းအောင် အနည်းငယ် ဖန်တီးလိုက်ချိန်မှာတော့ ကျွမ်းကျင်ပညာရှင်များပင် သူ့လက်ရာကို အစစ်ဟု ထင်မှတ်ကြပြီး မူရင်းပန်းချီကားကို အတုဟု ထင်မှတ် သွားကြ၏။</p> <p>ရှေးခေတ်မှ ယနေ့ခေတ်အထိ၊ အရှေ့တိုင်းမှ အနောက်တိုင်းအထိ မည်သည့် နာမည်ကြီး ပန်းချီဆရာ၏ လက်ရာမဆို သူက မူရင်းထက် သာလွန်အောင် ပုံတူကူးနိုင်စွမ်း ရှိသည်။</p> <p>သို့သော်ငြား သူ့ကို ဒါဗင်ချီဟု ခေါ်ရသည့် အဓိကအကြောင်းရင်းမှာ လူသေအလောင်းများကို ခွဲစိတ် လေ့လာ ပြီးနောက် ခန္ဓာကိုယ် အစိတ်အပိုင်းများကို ဓာတ်ပုံတစ်ပုံပမာ တိကျသေချာစွာ ပြန်လည်ရေးဆွဲနိုင်စွမ်း ရှိသောကြောင့်ပင်။</p> <p>ဤလူသည် အလောင်းခိုးမှုဖြင့် ထောင်ကျဖူးရာမှ သူ၏ ထူးခြားသောစွမ်းရည်ကို တာဝန်ရှိသူများက ရှာဖွေတွေ့ရှိ ခဲ့ပြီး ဤဆေးရုံသို့ ပို့ဆောင်ခဲ့ခြင်း ဖြစ်သည်။</p> <p>ဆေးရုံရောက်ပြီး (၁၇) နှစ်အတွင်း သူသည် အလောင်းပေါင်းရာချီ ခွဲစိတ်ခဲ့ပြီး ခန္ဓာဗေဒပုံပေါင်း သောင်းချီ ရေးဆွဲခဲ့၏။</p> <p>ခေတ်မီ ကွန်ပျူတာများ ရှိနေပါလျက် လက်ဖြင့် ရေးဆွဲရန် လိုအပ်သည်လား။ အလွန် လိုအပ်လှပေသည်။ ခေတ်မီဆေးပညာ မည်မျှ တိုးတက်နေသည် ဆိုစေကာမူ လူ့ခန္ဓာကိုယ် အတွင်းပိုင်း အစိတ်အပိုင်းများနှင့် ပတ်သက်၍ မသိရှိသေးသည်များက များစွာ ကျန်ရှိနေသေးသည်။</p> <p>ဥပမာအားဖြင့် ဆန်းကြယ် နက်နဲသော ပိုင်နီရယ်ဂလင်း (ဦးနှောက်အတွင်းရှိ ဟောမုန်းထုတ်ဖော်သော အစိတ်အပိုင်းငယ်လေး - ဦးနှောက်အလယ်ဗဟို၌ရှိပြီး ဆန်စေ့အရွယ်ခန့်သာရှိ) နှင့် နားအတွင်းပိုင်း အစိတ်အပိုင်းများ ဖြစ်၏။</p> <p>အမှတ် (၂၃) လူနာသည် ထိုအစိတ်အပိုင်းများကို ဦးနှောက်ထဲ၌ အဆပေါင်း ထောင်ချီ ချဲ့ကားကြည့်ရှုနိုင်ပြီး အသေးစိတ် ပြန်လည်ရေးဆွဲပြနိုင်သည့် အရည်အချင်းရှိသူပင်။</p> <p>လူသားများသည် ပိုင်နီရယ်ဂလင်းကို အသုံးချမှု အလွန်နိမ့်ပါးနေသေးကြောင်း၊ အကယ်၍သာ အပြည့်အဝ အသုံးချနိုင်ပါက အလင်းနှစ် သန်းပေါင်းများစွာ အကွာအဝေးမှ ဂြိုဟ်သားအချက်ပြမှုများကိုပင် လက်ခံ ရရှိနိုင်ကြောင်း၊ အနည်းငယ် ပြုပြင်လိုက်ရုံဖြင့် စကြာဝဠာစွမ်းအင်များကို စုပ်ယူကာ လူသားအဖြစ်မှ အဆင့် တက်လှမ်းနိုင်ကြောင်း သူက ပြောသည်။</p> <p>ခန္ဓာကိုယ် အစိတ်အပိုင်းတစ်ခုကို အဆပေါင်းရာချီ ချဲ့ကားပြီး အတိအကျ ပြန်လည်ရေးဆွဲနိုင်စွမ်းမှာ ကြောက်မက်ဖွယ် ကောင်းလှပေ၏။</p> <p>…………..</p> <p>အမှတ် (၉) လူနာ၊ အမည်ပြောင်အားဖြင့် ‘ကွမ်တမ်’။</p> <p>သူ၏ ဦးနှောက်သည် ကွမ်တမ်ကွန်ပျူတာတစ်လုံးကဲ့သို့ အလုပ်လုပ်နိုင်သည်။ လက်ရှိအခြေအနေအပေါ် မူတည်၍ မသိရှိနိုင်သေးသော အတိတ်ကို တွက်ချက်နိုင်သလို၊ ဖြစ်ပျက်လာမည့် အနာဂတ်ကိုလည်း ဟောကိန်း ထုတ်နိုင်သည်။</p> <p>ဗေဒင်ဟောခြင်း မဟုတ်ဘဲ အကြောင်းအကျိုး ဆက်စပ်မှုကို တွက်ချက်ခြင်းသာ ဖြစ်သည်ဟု သူက ပြောနေသေး၏။</p> <p>ဆေးရုံစရောက်စဉ်က သူသည် အနာဂတ်ဖြစ်ရပ်များကို အကြိမ်ကြိမ် မှန်ကန်အောင် ဟောကိန်း ထုတ်နိုင်ခဲ့သောကြောင့် နတ်လူတစ်ပါးအဖြစ်ပင် သတ်မှတ်ခံခဲ့ရသည်။</p> <p>သို့သော်ငြား လောကကြီးသည် ပြောင်းလဲမှုများဖြင့် ပြည့်နှက်နေ၏။ မျှော်လင့်မထားသော ပြောင်းလဲမှုတစ်ခု ပေါ်ပေါက်လာတိုင်း သူ၏ဟောကိန်း လွဲချော်သွားလေ့ရှိသည်။ ထိုအခါမျိုးတွင် သူ၏ ဦးနှောက်ထဲ၌ လက်တွေ့နှင့် မတူညီသော အပြိုင်ကမ္ဘာတစ်ခု ပေါ်ပေါက်လာတတ်၏။</p> <p>အမှားများ များပြားလာသည်နှင့်အမျှ အပြိုင်ကမ္ဘာများလည်း များပြားလာကာ သူ၏ ဦးနှောက်သည် မနိုင်ဝန် ထမ်းရသကဲ့သို့ ဖြစ်လာပြီး အလုပ် မလုပ်နိုင်တော့ချေ။</p> <p>ယခုအချိန်မှာတော့ အမှတ် (၉) လူနာသည် စားသောက်၊ အိပ်စက်၊ စွန့်ပစ်ခြင်းကိုသာ ပြုလုပ်တတ်သော သက်မဲ့ ရုပ်အလောင်း တစ်ခုကဲ့သို့ ဖြစ်နေတော့သည်။ အပြိုင်ကမ္ဘာပေါင်းများစွာကို တွက်ချက် နေရသောကြောင့် ပြင်ပလောကကို တုံ့ပြန်နိုင်စွမ်း မရှိတော့ခြင်းပင်။</p> <p>လွန်ခဲ့သော (၁၅) နှစ်တာ ကာလအတွင်း သူသည် မျက်လုံးပိတ်ထားသော လူသေတစ်ယောက်ပမာ နေထိုင်ခဲ့၏။</p> <p>…………..</p> <p>အမှတ် (၇) လူနာ၊ အမည်ပြောင်အားဖြင့် ‘ပုတ်သင်ညို’။</p> <p>ဤအရူးကမူ သူသည် အခြားလူတစ်ဦးအဖြစ် ပြောင်းလဲနိုင်သည်ဟု ကြွေးကြော်၏။ သာမန်အားဖြင့် ထူးဆန်းသည်ဟု မထင်ရသော်လည်း လက်တွေ့တွင်မူ အလွန်ကြောက်မက်ဖွယ် ကောင်းသည်။</p> <p>လူတစ်ဦးစီသည် သီးခြားလွတ်လပ်သော၊ ထပ်တူမကျနိုင်သော သက်ရှိများ ဖြစ်ကြပြီး အမြင်၊ အကြား၊ အထိအတွေ့၊ ခံစားချက်နှင့် မှတ်ဉာဏ်များက လူတစ်ဦး၏ ကမ္ဘာလောကကို တည်ဆောက်ထားခြင်း ဖြစ်၏။</p> <p>မျက်လုံးမှိတ်လိုက်သည်နှင့် မိမိကိုယ်တိုင်သည် တစ်ကမ္ဘာလုံးကဲ့သို့ ခံစားတတ်သည် ဖြစ်သောကြောင့်  လူတစ်ယောက်အနေနှင့် အခြားလူတစ်ယောက် ဖြစ်လာရန်ဆိုသည်မှာ မည်သို့မှ မဖြစ်နိုင်ပေ။ သို့သော်ငြား အမှတ် (၇) လူနာကမူ ဖြစ်နိုင်သည်ဟု ပြောနေချေသည်။</p> <p>သူက ပစ်မှတ်တစ်ခုကို ရွေးချယ်လိုက်ပြီဆိုလျှင် ထိုလူ၏ အတိတ်ဘဝ၊ ဝမ်းနည်းပျော်ရွှင်မှုများနှင့် တွေးခေါ်ပုံများကို စတင်လေ့လာ၏။ ကနဦးတွင် စကားပြောပုံချင်း တူလာသည်။ ထို့နောက် လှုပ်ရှားပုံများ တူလာ၏။</p> <p>နောက်ဆုံးတွင် ပို၍ ကြောက်စရာကောင်းသော အရာတစ်ခု ဖြစ်လာ၏။ အမှတ် (၇) လူနာ၏ ရုပ်ရည်သွင်ပြင်သည် သူ ရွေးချယ်ထားသော ပစ်မှတ်နှင့် တဖြည်းဖြည်း တူညီလာခြင်းပင်။</p> <p>တစ်နေ့တွင်မူ မျက်နှာမှစ၍ ခန္ဓာကိုယ်အချိုးအစားအထိ တစ်ပုံစံတည်း ဖြစ်သွားတော့သည်။ စကားပြောပုံ၊ လှုပ်ရှားပုံသာမက အတွေးများပါ ထပ်တူကျ နေတတ်၏။ ဤအရာမှာ လက်တွေ့ဘဝ၏ စစ်မှန်ခြင်း သဘောတရားကို ကျော်လွန်နေသော ဖြစ်ရပ်ဆန်းတစ်ခုအလား ဖြစ်နေသည်။။</p> <p>…………</p> <p>အမှတ် (၁၆) လူနာ၊ အမည်ပြောင်အားဖြင့် ‘သရဲ’။</p> <p>ရုပ်ရည်ကြောင့် မဟုတ်ဘဲ သူတစ်ပါး၏ စိတ်ကို ဖတ်နိုင်စွမ်း ရှိသောကြောင့် ထိုအမည်ကို ရရှိထားခြင်း ဖြစ်ပြီး မျက်ဝန်း၊ အသက်ရှူသံနှင့် မျက်နှာကြွက်သား လှုပ်ရှားမှုများကို ကြည့်ရုံဖြင့် တစ်ဖက်လူ၏ အတွေးများကို ဖန်တစ်ချပ်ကဲ့သို့ ထွင်းဖောက်မြင်နိုင်သည်။ သူ့ရှေ့ရောက်လျှင် လူတို့၏ အတွေးများသည် ဖုံးကွယ်ထား၍ မရနိုင်လောက်အောင် ထင်ရှားနေတတ်ပေ၏။</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save