BIT

Title

Show in VIP/Series

Status (Active / Inactive)

<h2 style="text-align: center;">ချင်းလန်လျှို့ဝှက်နယ်မြေဆီသို့</h2>

နောက်တစ်နေ့တွင် ဖုန့်ဖန်းယီက သူ့ကတိအတိုင်း သက်ရှည်ကျင့်စဉ်၏ ရွှေအမြုတေအဆင့် နည်းစနစ်ကို စုန့်ဝမ်ထံ လာရောက် ပေးအပ်ခဲ့သည်။ စုန့်ဝမ်လည်း တံခါးပိတ်ကျင့်ကြံမှုအတွက် ပြင်ဆင်ရန် ဝိညာဥ်ဆေးပင်တောင်တွင် ပစ္စည်းများစွာ ဝယ်ယူခဲ့သည်။ တံခါးပိတ်ကျင့်ကြံသည်ဟု အကြောင်းပြရခြင်းမှာ သူပြသထားသော ကျင့်ကြံမှုအဆင့်ကို အခြေတည် အလယ်အဆင့်သို့ မြှင့်တင်ရန် ဖြစ်သည်။ အမှန်တကယ်က ချန်းလန် လျှို့ဝှက်နယ်မြေသို့ ဝင်ရောက်ရန်အတွက် ကြိုတင်ပြင်ဆင်ရန်ပင် ဖြစ်သည်။ အခြေတည် အစောပိုင်းအဆင့်ဖြင့် ဝင်ရောက်လျှင် ကျင့်ကြံမှုအဆင့် နိမ့်လွန်းသဖြင့် မလိုလားအပ်သော အာရုံစိုက်မှုများကို ခံရနိုင်သည်။ အခြေတည် အလယ်အဆင့်ဆိုလျှင် အနည်းငယ် နိမ့်ပါးသော်လည်း အနည်းဆုံးတော့ အထူးတလည် သတိထားမိစရာ မဖြစ်တော့ပေ။

စုန့်ဝမ် ထိုနေရာသို့ ဝင်ရောက်ရန် အဓိက ရည်ရွယ်ချက်မှာ ယင်ယန်သွေးမျက်ရည်သစ်ပင်နှင့် နှစ်တစ်သောင်း ဝိညာဉ်အရည်တို့ ရယူရန် ဖြစ်သည်။ သူသည် ငွေအကျိုးပြုတံဆိပ်ကို အသုံးပြု၍ ရွှေအမြုတေဆေးလုံး ဖော်စပ်နည်းနှင့် အချက်အလက်များကို ရရှိထားပြီး ဖြစ်သည်။ ထိုဆေးလုံးသည် ရွှေအမြုတေ ဖြစ်တည်နိုင်စွမ်းကို ၃၀ ရာခိုင်နှုန်းအထိ မြှင့်တင်ပေးနိုင်သဖြင့် စုန့်ဝမ်မှာ အလွန် စိတ်လှုပ်ရှားနေပြီး ကိုယ်တိုင် ဖော်စပ်ရန် စီစဉ်ထားခြင်း ဖြစ်သည်။ ထိုဆေးလုံးကို ဖော်စပ်ရန်အတွက် လိုအပ်သော ဝိညာဥ်ဆေးပင်များကိုလည်း စုဆောင်းရန် ရည်ရွယ်ထားသည်။ ယင်ယန် သွေးမျက်ရည်သစ်ပင်မှာ အဓိက ပါဝင်ပစ္စည်းဖြစ်သော်လည်း အလွန် ရှားပါးလှပြီး သားရဲသခင်ဂိုဏ်း၏ ဆေးစိုက်ခင်းများတွင်ပင် စိုက်ပျိုးထားခြင်း မရှိပေ။

ငွေရောင်အကျိုးပြုတံဆိပ်ဖြင့် ကျမ်းစာဆောင်တွင် စုစည်းထားသော ဂိုဏ်းမှ ရွှေအမြုတေအဆင့် ကျင့်ကြံသူများ၏ ရွှေအမြုတေ တည်ဆောက်ခြင်း အတွေ့အကြုံများကိုလည်း လေ့လာခွင့် ရရှိခဲ့သည်။ ကျင့်ကြံသူတစ်ဦး ရွှေအမြုတေ တည်ဆောက်ခြင်း လုပ်ငန်းစဉ်ကို အကြမ်းဖျင်းအားဖြင့် အဆင့်သုံးဆင့် ခွဲခြားနိုင်သည်။ ပထမဦးစွာ၊ ဒန်တန်အတွင်း သိုလှောင်ထားသော ဝိညာဉ်စွမ်းအားကို မာနာစွမ်းအင်အဖြစ် ပြောင်းလဲရမည်။ ဤဖြစ်စဉ်တွင် ဝိညာဉ်စွမ်းအား အမြောက်အမြား လိုအပ်ပြီး အဆင့်မြင့် ဝိညာဉ်ကျောက်တုံးများ သို့မဟုတ် ဝိညာဉ်စွမ်းအား ကြွယ်ဝသောဆေးပင်များကို အသုံးပြုလေ့ရှိသည်။ နှစ်တစ်သောင်းဝိညာဉ်အရည်မှာမူ အကောင်းဆုံး ရွေးချယ်မှု ဖြစ်သည်။

နောက်တစ်ဆင့်မှာ ထိုမာနာစွမ်းအင်ကို ရွှေအမြုတေအဖြစ် ဖိသိပ်လိုက်ခြင်း ဖြစ်သည်။ ရွှေအမြုတေဆေးလုံးမှာ ဤအဆင့်တွင် သောက်သုံးရခြင်း ဖြစ်သည်။ နောက်ဆုံးအဆင့်တွင်မူ နှလုံးသားနတ်ဆိုးဘေးဒုက္ခပင် ဖြစ်သည်။ ထိုအဆင့်မှာ ကျင့်ကြံသူ၏ စိတ်ဓာတ်ကို စမ်းသပ်ခြင်း ဖြစ်သည်။ ၎င်းကို ကျော်ဖြတ်နိုင်ပါက ရွှေအမြုတေအဆင့်သို့ တက်လှမ်းနိုင်မည် ဖြစ်ပြီး၊ အကယ်၍ မကျော်ဖြတ်နိုင်ပါက ဒဏ်ရာရရှိကာ ကျင့်ကြံဆင့် လျော့ကျသွားနိုင်ပြီး၊ ပိုမို ပြင်းထန်ပါက သေဆုံးသည်အထိ ဖြစ်နိုင်သည်။ အလွန်တရာ စိတ်ဓာတ် ကြံ့ခိုင်သူများ သို့မဟုတ် စိတ်သဘောထား ဖြူစင်သူများမှာ ၎င်းကို မကြုံတွေ့ရဘဲ ကျော်ဖြတ်သွားနိုင်သည်ဟု ဆိုသည်။ သို့သော် ထိုကဲ့သို့သော သူများမှာ အလွန် ရှားပါးလှသည်။ မရှိဟုပင် ဆိုရမည်။ 
…….

ဆယ်လ ကြာပြီးနောက် စုန့်ဝမ်သည် တံခါးပိတ်ကျင့်ကြံရာမှ ထွက်လာခဲ့သည်။ သူ၏ ကျင့်ကြံမှုမှာ ယခုအခါ အခြေတည် အလယ်အဆင့်သို့ ရောက်ရှိနေပြီ ဖြစ်သည်။ ထိုဆယ်လအတွင်း စုန့်ဝမ်သည် သွေးဝိညာဉ်ဆေးလုံးများကို အဆက်မပြတ် သန့်စင်သောက်သုံးခဲ့သဖြင့် ကျင့်ကြံဆင့်မှာ များစွာ တိုးတက်လာခဲ့သည်။ သို့သော် အခြေတည် နှောင်းပိုင်းအဆင့်သို့ ရောက်ရန် လိုအပ်ချက်များစွာ ရှိနေသေးသည်။

စုန့်ဝမ်သည် တံခါးပိတ်ကျင့်ကြံရာမှ ထွက်လာသည်နှင့် လျိုကျန်းကို တွေ့ရန် မြွေဂူသို့ တန်းသွားခဲ့သည်။ စုန့်ဝမ် မရှိသည့်အချိန်တွင် လျိုကျန်းက ထိုဂူကို ခေတ္တ စီမံခန့်ခွဲနေခဲ့ခြင်း ဖြစ်သည်။ စုန့်ဝမ် ပြန်ထွက်လာသည်ကို မြင်သောအခါ လျိုကျန်းက ဝမ်းသာအားရ ကြိုဆိုပြီး စီမံခန့်ခွဲမှုတာဝန်ကို စုန့်ဝမ်ထံ ပြန်လွှဲပေးရန် ရည်ရွယ်ခဲ့သည်။ လျူကျန်းသည် မြွေလူသားများ ပျိုးထောင်ရာတွင် ကျွမ်းကျင်သော်လည်း အလောင်းသန့်စင်ခြင်းကိုမူ သိပ်နားမလည်ပေ။ ထို့ကြောင့် ဆန်းကြယ်ချီ သန့်စင်မှုကို ကြီးကြပ်ရခြင်းမှာ သူ့အတွက် အလွန် ခက်ခဲနေခဲ့ခြင်း ဖြစ်သည်။

သို့သော် လျိုကျန်း၏ တောင်းဆိုမှုကို စုန့်ဝမ်က ကျင့်ကြံမှုအဆင့် တက်လှမ်းထားကာစ ဖြစ်သဖြင့် ၎င်းကို တည်ငြိမ်အောင် လုပ်ရန် အချိန်လိုအပ်သေးသည်ဟု အကြောင်းပြကာ ငြင်းပယ်လိုက်သည်။ အမှန်တကယ်က နောက်သုံးလနေလျှင် ချန်းလန် လျှို့ဝှက်နယ်မြေ ပွင့်တော့မည် ဖြစ်သဖြင့် စုန့်ဝမ်မှာ မြွေဂူကို စီမံရန် စိတ်မပါတော့ခြင်းပင် ဖြစ်သည်။ စုန့်ဝမ် အကြောင်းပြချက် ခိုင်လုံနေသဖြင့် လျိုကျန်းလည်း ဆက်မပြောသာတော့ဘဲ လက်ခံလိုက်ရသည်။

မြွေဂူမှ ထွက်ပြီးနောက် စုန့်ဝမ် ရွှမ်ဆေးခန်းမသို့ ရောက်လာသည်။ သူအနေဖြင့် ရွှေအမြုတေဆေးလုံး ဖော်စပ်နည်းနှင့် ဗဟုသုတများကို ရရှိထားသော်လည်း စာတွေ့လေ့လာရသည်မှာ မလုံလောက်ဟု ခံစားရသောကြောင့် ဖြစ်သည်။ ရွှမ်ဆေးလုံးခန်းမရှိ ဆေးဖော်စပ်သူများသည် ရွှေအမြုတေဆေးလုံးကို တစ်ခါမျှ မဖော်စပ်ဖူးသော်လည်း ထိုဆေးလုံးတွင် ပါဝင်သော ဝိညာဥ်ဆေးပင်များကိုမူ အသုံးပြုဖူးကြသူများ ဖြစ်သည်။ ထို့ကြောင့် ထိုအပင်များ၏ အနှစ်သာရ ထုတ်ယူပုံနှင့် ပေါင်းစပ်ပုံတို့ကို သူတို့ထံမှ အကြံဉာဏ် တောင်းရန် ရည်ရွယ်ထားခြင်း ဖြစ်သည်။

ခန်းမသို့ ရောက်သည်နှင့် ကျိုးစစ်ယိ ဆုံသည်။ "မောင်လေးဝူ... ကျင့်ကြံရာကနေ ထွက်လာပြီလား" ဟု ကျိုးစစ်ယိက မေးရင်း စုန့်ဝမ်အော်ရာကို သတိထားမိသဖြင့် "အယ်… အခြေတည် အလယ်အဆင့်ကို တက်လှမ်းနိုင်ပြီပဲ၊ ဝမ်းသာလိုက်တာ"ဟု ဆိုလာသည်။ စုန့်ဝမ်က ပြုံးပြပြီး "ခုမှ တက်လှမ်းထားတာဆိုတော့ မတည်ငြိမ်သေးပါဘူး" ဟု ပြန်ဖြေလိုက်သည်။ ထို့နောက် နှစ်ဦးသား ခဏတာ စကားပြောပြီးနောက် စုန့်ဝမ် ဆေးခန်းမထဲ ဝင်ခဲ့သည်။ 
……..

သုံးလခန့်ကြာသော်...  
သားရဲသခင်ဂိုဏ်း ပင်မတောင်ပေါ်ရှိ ရင်ပြင်တွင် အခြေတည်အဆင့် ကျင့်ကြံသူ ၁၄ ဦး စုဝေးနေကြသည်။ ထိုသူများမှာ ချန်းလန် လျှို့ဝှက်နယ်မြေသို့ ဝင်ရောက်ရန် ဆန္ဒပြုထားကြသော ဂိုဏ်း၏ တောင်အသီးသီးမှ သူများ ဖြစ်ကြသည်။ စုန့်ဝမ် ထိုနေရာသို့ ဆင်းသက်လိုက်သည်နှင့် လူနှစ်ဦးက သူ့ဆီ ရောက်လာသည်။

"အကြီးအကဲဝူ... မင်းလည်း ချန်းလန် လျှို့ဝှက်နယ်မြေထဲ ဝင်မှာလား" ဟု ရုန်ကျင့်ယွမ်က အံ့ဩစွာ မေးလိုက်သည်။ သူမဘေးတွင် ခင်ပွန်းဖြစ်သူ ဟန်ချန်းလည်း ရှိနေသည်။ လျှို့ဝှက်နယ်မြေသို့ ဝင်ရောက်ခြင်းမှာ တစ်ဦးချင်းစီ၏ ဆန္ဒအလျောက်သာ ဖြစ်ပြီး ဂိုဏ်းက အတင်းအကျပ် ခိုင်းစေခြင်း မဟုတ်။ ယင်ယန်သွေးမျက်ရည်သစ်ပင်မှ လွဲ၍ ကျန်ရရှိသော အရာအားလုံးမှာ ကာယကံရှင်နှင့်သာ ဆိုင်သည်။ စုန့်ဝမ်က လျှို့ဝှက်နယ်မြေသို့ ဝင်ရောက်မည်ကို မည်သူ့ကိုမျှ အသိပေးထားခြင်း မရှိသဖြင့် ရုန်ကျင့်ယွမ် အံ့ဩသွားခြင်း ဖြစ်သည်။

"ကျွန်တော်က အရင်က တစ်ကိုယ်တော်ကျင့်ကြံသူဆိုတော့ လျှို့ဝှက်နယ်မြေတွေကို တစ်ခါမှ မဝင်ဖူးဘူး။ အခု ချန်းလန် လျှို့ဝှက်နယ်မြေ ပွင့်တယ်ဆိုတော့ ဗဟုသုတရအောင် ဝင်ကြည့်ချင်လို့ပါ"ဟု စုန့်ဝမ်က ပေါ့ပေါ့ပါးပါး ပြောလိုက်သည်။

"လျှို့ဝှက်နယ်မြေထဲမှာ အစွမ်းထက်တဲ့ သားရဲတွေနဲ့ အန္တရာယ်တွေ အများကြီး ရှိတယ်။ တခြားကျင့်ကြံသူတွေရဲ့ ခြိမ်းခြောက်မှုကိုလည်း သတိထားရမယ်။ အကြီးအကဲဝူ... သေချာ စဉ်းစားပါဦး" ဟု ရုန်ကျင့်ယွမ်က အကြံပေးသည်။

"ကျွန်တော်က လျှို့ဝှက်နယ်မြေရဲ့ တည်ရှိမှုကို စပ်စုချင်တာပါ။ သားရဲတွေ ဒါမှမဟုတ် ကျင့်ကြံသူတွေနဲ့ ဆုံရင်တော့ အဝေးကနေ ရှောင်သွားပါ့မယ်။ ပြဿနာ မရှိနိုင်ပါဘူး" 
စုန့်ဝမ်သည် ကျင့်ကြံခြင်းကမ္ဘာ၏ ခါးသီးသော အမှန်တရားများကို မသိနားမလည်ဟန် ဆောင်လိုက်သည်။

ရုန်ကျင့်ယွမ်က ခေါင်းယမ်းလိုက်ပြီး ဆက်လက်၍ နားချခြင်း မပြုတော့ပေ။ အတိတ်က မြွေတွင် ရှိခဲ့သော ပတ်သက်မှုများကြောင့် စိုးရိမ်စိတ်ဖြင့် ပြောလိုက်ခြင်း ဖြစ်သော်လည်း ကာယကံရှင်က အရေးမစိုက်ဟန် ရှိသဖြင့် ဆက်မပြောတော့ခြင်း ဖြစ်သည်။

ရင်ပြင်အတွင်း၌ သူနဲ့ ရင်းနှီးသောသူများကို စုန့်ဝမ် တွေ့လိုက်ရသည်။ ဖုန်ချီနှင့် လျန်ထျန်းလုတို့လည်း ရှိနေပြီး၊ သူတို့နောက်တွင် သံမျက်နှာဖုံး တပ်ထားသော လူတစ်ဦးလည်း ရှိနေသည်။ ထိုမျက်နှာဖုံးမှာ ဝိညာဉ်အာရုံ စစ်ဆေးမှုကို တားဆီးထားသဖြင့် ကျင့်ကြံဆင့်နှင့် ပုံပန်းသဏ္ဌာန်ကို မသိနိုင်ပေ။ သို့သော် စုန့်ဝမ်က ထိုသူ၏ ကိုယ်ဟန်ကို ရင်းနှီးနေသလို ခံစားမိနေသည်။ ထို့ပြင် သူ့ကို ကြည့်နေသော အကြည့်တွင် မုန်းတီးမှုများ ပြည့်နေသည်ကိုပါ သတိပြုမိသည်။ ယင်းက စုန့်ဝမ်ကို ဇဝေဇဝါ ဖြစ်စေသည်။ သားရဲသခင်ဂိုဏ်းအတွင်း လျန်ထျန်းလုမှအပ မည်သူနှင့်မျှ နက်ရှိုင်းသော ရန်ငြိုးမရှိဟု ထင်ခဲ့သောကြောင့် ဖြစ်သည်။ ယခုတော့ တစ်ခုခု မှားနေပုံရသည်။

မွန်းတည့်ချိန် ရောက်သောအခါ ကောင်းကင်ယံ၌ ရွှေအမြုတေ ကျင့်ကြံသူ ထူလျန် ပေါ်လာပြီး ရင်ပြင်ရှိ လူ ၁၄ ဦးကို ကြည့်ကာ "ထွက်ခွာမယ့် အချိန် ရောက်ပြီ။ အားလုံး သင်္ဘောပျံပေါ် တက်ခဲ့ကြ"ဟု ဆိုသည်။ ထိုသို့ပြောပြီးသည်နှင့် သူ့ရှေ့တွင် ပေ ၃၀ ကျော် ရှည်လျားသော သင်္ဘောပျံတစ်စင်း ပေါ်လာသည်။ လူအားလုံး သင်္ဘောပျံပေါ် တက်လိုက်ကြပြီးနောက် အနောက်ဘက်သို့ အရှိန်အဟုန်ဖြင့် ပျံသန်းသွားခဲ့တော့သည်။ 
………

မိုင်ပေါင်းသောင်းချီ ခရီးကို ဖြတ်ကျော်ခဲ့ပြီးနောက် သင်္ဘောပျံသည် အလွန်ကြီးမားသော ရေကန်ကြီးတစ်ခု၏ အထက်သို့ ရောက်ရှိလာခဲ့သည်။ နီးကပ်သွားချိန်တွင် ကန်ရေပြင်ပေါ်၌ အခြားသော သင်္ဘောပျံသုံးစင်း ပျံဝဲနေသည်ကို တွေ့ရသည်။ သင်္ဘောများတွင် လွှင့်ထူထားသော အလံများကြောင့် ၎င်းတို့မှာ မဟာကောင်းကင်ဓားဂိုဏ်း၊ ဟယ်ဟွမ်းဂိုဏ်းနှင့် ဟွန်းယွမ်ကျောင်းတော်တို့မှ ဖြစ်ကြောင်း အလွယ်တကူ သိနိုင်သည်။

သားရဲဘုရင်ဂိုဏ်း၏ သင်္ဘော ရောက်ရှိလာသည်ကို မြင်သောအခါ မဟာကောင်းကင်ဓားဂိုဏ်း၏ သင်္ဘောပျံပေါ်မှ ယန်ယုရှန် ပျံသန်းထွက်ပေါ်လာသည်။ 
"ထူလျန်... နင်နဲ့ ဒီမှာ ပြန်ဆုံမယ်လို့ မထင်ထားဘူး၊ တကယ်ကို တိုက်ဆိုင်တာပဲ"

ယန်ယုရှန်ကို တွေ့လိုက်ရသဖြင့် ထူလျန်၏ အိုမင်းနေသော မျက်နှာမှာ မည်းမှောင်ပြီး အလွန်ပင် အရုပ်ဆိုးသွားသည်။ 
"ယန်ယုရှန်... နင်ပဲလား။ ပြီးခဲ့တဲ့ တိုက်ပွဲက အရှုံးအနိုင် မပေါ်ခဲ့ဘူး၊ ဒီနေ့တော့ နောက်တစ်ပွဲ ထပ်နွှဲပြီး ဆုံးဖြတ်ကြတာပေါ့"

"မိတ်ဆွေတို့... ဒေါသမထွက်ကြပါနဲ့။ ငါတို့အားလုံးက လမ်းမှန်ဂိုဏ်းသားတွေပဲ၊ စိတ်လိုက်မာန်ပါ မလုပ်ကြပါနဲ့" ဟု ဆိုကာ ဟွန်းယွမ်ကျောင်းတော်၏ သင်္ဘောပျံပေါ်မှ ဘုန်းတော်ကြီးတစ်ပါး ထွက်လာသည်။ ထိုဘုန်းတော်ကြီးမှာ တည်ငြိမ်အေးချမ်းပြီး ကရုဏာတရား ပြည့်ဝသောပုံစံ ရှိသည်။

ထူလျန်က ဘုန်းတော်ကြီးကို အေးစက်စွာ ကြည့်လိုက်ပြီးနောက် ထူးဆန်းသော အပြုံးတစ်ခု ပေါ်လာသည်။  
"ကျောင်းထိုင်ဟွေ့မင်... ဒါ ငါတို့ သားရဲဘုရင်ဂိုဏ်းနဲ့ မဟာကောင်းကင်ဓားဂိုဏ်းကြားက ကိစ္စပဲ၊ နင် ဝင်ပါဖို့ မလိုဘူး။ အခု ဟွန်းယွမ်ကျောင်းတော်က ကိုယ့်ကိုယ်ကိုယ် ကာကွယ်ဖို့တောင် မနည်းလုပ်နေရတာ၊ ဘယ်လိုလုပ်ပြီး ဒီ ချန်းလန်လျှို့ဝှက်နယ်မြေကိစ္စကို ဝင်ရှုပ်ဖို့ အားအင် ရှိနေသေးတာလဲ"

ဟွန်းယွမ်ကျောင်းတော်မှ ဝိညာဥ်သန္ဓေအဆင့် ပညာရှင် နှစ်ဦးမှာ လမ်းမှန်နဲ့ နတ်ဆိုး ဂိုဏ်းတိုက်ပွဲအတွင်း ပြင်းထန်စွာ ဒဏ်ရာရရှိခဲ့ပြီး ယခုထက်ထိ မသက်သာသေးသဖြင့် ဟွန်းယွမ်ကျောင်းတော်၏ အင်အားမှာ သိသိသာသာ လျော့နည်းနေခြင်း ဖြစ်သည်။ ထို့ပြင် ဘက်ပြောင်းသွားသော ကိုးနန်းတော်ဂိုဏ်းနှင့် နယ်နိမိတ်ချင်း ထိစပ်နေသဖြင့် ကိုးနန်းတော်ဂိုဏ်းနှင့် နတ်ဆိုးကျင့်ကြံသူများ၏ နှောင့်ယှက်မှုကို မကြာခဏ ခံနေရသည်။ ကျောင်းတော်ပိုင် ဝိညာဉ်စိုက်ခင်းများနှင့် မိုင်းတွင်းများစွာမှာလည်း မကြာခဏ လုယက်ခံနေရသည်။ ထူလျန်က ထိုအချက်များကို ရည်ညွှန်းခြင်း ဖြစ်သည်။

ထူလျန်၏ လှောင်ပြောင်မှုကို ရင်ဆိုင်ရသော်လည်း ဟွေ့မင်မှာ တည်ငြိမ်မှုကို ထိန်းသိမ်းထားဆဲ ဖြစ်သည်။ 
"ထူလျန်... မပြောသင့်တဲ့ စကားတွေ မပြောဖို့ ငါ အကြံပေးချင်တယ်"

ထူလျန်က အေးစက်စွာ နှာခေါင်းရှုံ့လိုက်သည်။ 
"အကြံပေးတာ ဟုတ်လား၊ နင့်လို ခေါင်းတုံးက ဟန်ဆောင်အကောင်းဆုံးပဲ၊ မျက်နှာချင်းဆိုင်မှာ တစ်မျိုး၊ ကွယ်ရာမှာ တစ်မျိုး လုပ်တတ်ကြတာ။ နင့်အကြံပေးချက်ကို ငါတော့ မယုံရဲဘူး"

ထူလျန်နှင့် ဟွေ့မင်တို့ အငြင်းပွားနေသည်ကို မြင်သောအခါ ယန်ယုရှန်ကဘေးတွင် ရပ်ကာ ပွဲကြည့်ပရိသတ်အဖြစ် အေးအေးဆေးဆေး စောင့်ကြည့်နေခဲ့သည်။ ထိုစဉ်မှာပင် အဝေးမှ အခြားသော သင်္ဘောပျံတစ်စင်း ပေါ်လာပြီး ရေကန်ကြီးဆီသို့ အရှိန်အဟုန်ဖြင့် ပြေးဝင်လာသည်။ သင်္ဘောပေါ်တွင် အနက်ရောင် အလံကြီးတစ်ခု လွှင့်ထူထားပြီး ငွေရောင်ဖြင့် လေ့ဟူသော စာလုံးကို ထွင်းထုထားသည်။

လေ့မိသားစု၏ သင်္ဘောပျံ ပေါ်လာသည်ကို မြင်သောအခါ ယန်ယုရှန်၏ အမူအရာ လေးနက်သွားခဲ့သည်။ သင်္ဘော မဆိုက်ကပ်မီမှာပင် ဆံပင်ဖြူနှင့် လူတစ်ယောက် သင်္ဘောပျံပေါ်မှ ထွက်လာပြီး မဟာကောင်းကင်ဓားဂိုဏ်း၏ သင်္ဘောပျံနှင့် မလှမ်းမကမ်းတွင် ရပ်လိုက်သည်။ 
"ဓားနတ်သမီးယန်... ငါတို့ ဒီလောက်အမြန် ပြန်ဆုံကြလိမ့်မယ်လို့ မထင်ထားဘူး"

ထိုသူမှာ လေ့မိသားစု၏ အကြီးအကဲ လေ့ကျွင်း ဖြစ်သည်။ အလောင်းနတ်ဆိုးဂိုဏ်းမှ ဝူယန်ကို ယန်ယုရှန်နှင့်အတူ တိုက်ခိုက်ခဲ့ဖူးသူ ဖြစ်သည်။ ယခုမူ ယန်ယုရှန်ကို ကြည့်နေသော လေ့ကျွင်း၏ မျက်လုံးများထဲတွင် သတ်ဖြတ်လိုသော အရိပ်အယောင်များ သိသိသာသာ ပေါ်လွင်နေသည်။ သူတို့ နှစ်ဦးကြားတွင် နက်ရှိုင်းသော ရန်ငြိုးတစ်ခု ဖြစ်ပေါ်နေပုံ ရသည်။

ယန်ယုရှန်က လေ့ကျွင်းကို အရေးမစိုက်ဟန်ဖြင့် ကြည့်ရင်း "အကြီးအကဲလေ့.. ရှင့်မိသားစုရဲ့ တစ်ဦးတည်းသော ဝိညာဥ်သန္ဓေအဆင့် ပညာရှင်က ခုထိ နာလန်မထူသေးဘူး မဟုတ်လား။ ဒါတောင် ရှင်က မဟာကောင်းကင်ဓားဂိုဏ်းကို ရန်စချင်နေတုန်းပဲလား"ဟု ပြောလိုက်သည်။

လေ့ကျွင်းက "ဒါ ငါတို့ကြားက ကိုယ်ရေးကိုယ်တာကိစ္စပဲ၊ အဖွဲ့အစည်းနဲ့ မဆိုင်ဘူး"ဟု ဒေါသတကြီး ပြန်ပြောသည်။

"ကိုယ်ရေးကိုယ်တာကိစ္စ ဟုတ်လား။ ကျွန်မ ရှင့်ကို ကြောက်နေမယ်လို့ ထင်နေတာလား"

ထူလျန်နှင့် ဟွေ့မင်တို့မှာလည်း ဆက်လက် အခြေအတင် ဖြစ်နေကြဆဲ။ လေ့ကျွင်းနှင့် ယန်ယုရှန်ကြားက တင်းမာမှုမှာလည်း အရှိန်မြင့်လာသည်။ ထူလျန်နှင့် ယန်ယုရှန်တို့ကြားမှာလည်း ရန်ငြိုးဟောင်းများ ရှိကြသည်။ လျှို့ဝှက်နယ်မြေသို့ ဝင်ရောက်စူးစမ်းခြင်း မစတင်မီမှာပင် ဂိုဏ်းအသီးသီးမှ တာဝန်ခံ ခေါင်းဆောင်ကြီးများမှာ အချင်းချင်း အကြီးအကျယ် စကားများနေကြပြီ ဖြစ်သည်။ ယင်းက လျှို့ဝှက်နယ်မြေသို့ ဝင်ရောက်ရန် လိုက်ပါလာကြသော အခြေတည်အဆင့် ကျင့်ကြံသူများအား မမြင်ရသော ဖိအားတစ်ခု ဖြစ်ပေါ်စေခဲ့သည်။

***

Book List