Book List

<h2 style="text-align: center;">အပိုင်း(၅၁၃)</h2> <h2 style="text-align: center;">ဂျိရှောင်ယွီနှင့် အပေးအယူ</h2> <h2 style="text-align: center;">*</h2> <p> </p> <p> </p> <p>လင်းယွမ်က အံ့အားသင့်သွားသည်။ ဂျိရှောင်ယွီ၏ စကားထဲတွင် အချက်အလက်များစွာ ပါဝင်နေပေသည်။</p> <p>ဂျိရှောင်ယွီက တစ်ကိုယ်တော်ဟု သူက အမြဲတမ်း ထင်မှတ်ထားခဲ့ခြင်း ဖြစ်သည်။</p> <p>သူမ၏ စကားအရဆိုလျှင် သူမက တစ်ယောက်တည်း မဟုတ်ဘူးဆိုတဲ့ သဘောလား။</p> <p>ဂျိရှောင်ယွီက ခေါင်းညိတ်လိုက်ပြီး တိုးညှင်းသော အသံဖြင့် ပြောလိုက်သည်။ "ဒီအခြေအနေထိ ရောက်လာမှတော့ ကျွန်မ သိနိုင်ပါပြီ... အစ်ကိုလင်း ရှင်က ဝူယောင်ပန်းတို့လို လူတွေနဲ့ မတူဘူး... ရှင်တို့က လူကောင်းတွေပါ"</p> <p>"တကယ်တော့ ကျွန်မက တစ်ယောက်တည်း မဟုတ်ပါဘူး... ကျွန်မရဲ့ နောက်ကွယ်မှာလည်း အင်အားစုတစ်ခု ရှိတယ်"</p> <p>လင်းယွမ်က စိတ်ဝင်စားသွားကာ ထိုင်ချလိုက်ပြီး ပြောလိုက်သည်။ "သေချာလေး ရှင်းပြပါဦး"</p> <p>ဂျိရှောင်ယွီကလည်း ထိုင်ချလိုက်ပြီး ဖြည်းညှင်းစွာ ပြောလိုက်သည်။</p> <p>"ဝူယောင်ပန်း ပြောတာ မမှားပါဘူး... လွန်ခဲ့တဲ့ သုံးလလောက်ကပေါ့... တကယ်တော့ ဟင်းလင်းပြင် ခေါက်ချိုးထဲမှာ ပိတ်မိနေတဲ့ ကျွန်မတို့လို လူတွေဆီမှာ မဟာမိတ်အဖွဲ့အစည်း တစ်ခု ရှိခဲ့တယ်"</p> <p>"အဖွဲ့အစည်းထဲမှာ မျိုးရိုးဗီဇမျိုးစေ့အဆင့် အစွမ်းပိုင်ရှင်တွေလည်း မနည်းဘူး... ဒါပေမဲ့ သူတို့အားလုံးကို ဝူယောင်ပန်းက လျှို့ဝှက်ပြီး လုပ်ကြံသတ်ဖြတ်ပစ်ခဲ့တယ်"</p> <p>"ဝူယောင်ပန်းက အဲဒီ မျိုးရိုးဗီဇမျိုးစေ့အဆင့် အစွမ်းပိုင်ရှင်တွေကို သတ်ဖြတ်ပြီးတာနဲ့... ရှောင်မောင်းတောင်ကို စတင် ဝါးမျိုတော့တာပဲ... ရှောင်မောင်းတောင်ပေါ်က အသက်ရှင်ကျန်ရစ်သူတွေကို အုပ်ချုပ်ပြီး ဧဒင်ဥယျာဉ်ကို တည်ဆောက်ခဲ့တယ်... သူ့ရဲ့ ကိုယ်ပိုင် ဘုရားသခင်နိုင်ငံတော်ကို ဖန်တီးဖို့ စိတ်ကူးယဉ်နေခဲ့တာ"</p> <p>"အဲဒီအချိန်တုန်းက အမျိုးသမီးအများစုက... ရက်ရက်စက်စက် သတ်ဖြတ်ခံခဲ့ရပြီး... သူ့ရဲ့ ဖမ်းဆီး အဓမ္မပြုကျင့်တာကို ခံခဲ့ရတယ်"</p> <p>"ခုခံတဲ့သူတွေကိုကျတော့... သူက ရက်ရက်စက်စက် သတ်ဖြတ်ပြီး... ရှောင်မောင်းတောင်ရဲ့ လက်ဝါးကပ်တိုင်ပေါ်မှာ ချိတ်ဆွဲထားပြီး တခြားသူတွေကို သတိပေးခဲ့တယ်"</p> <p>"ကျွန်မ သေသေချာချာ မှတ်မိနေသေးတယ်... အဲဒီ တိုတောင်းတဲ့ လဝက်အတွင်းမှာတင် ရှောင်မောင်းတောင်ပေါ်က အသက်ရှင်ကျန်ရစ်သူ ဆယ်ပုံတစ်ပုံလောက် သေဆုံးသွားခဲ့တယ်"</p> <p>"ကျွန်မရဲ့ အစ်မကိုလည်း သူအဓမ္မပြုကျင့်တာကို အလျှော့မပေးခဲ့လို့... သူတို့က လက်ဝါးကပ်တိုင်ပေါ်မှာ ရိုက်နှက် ချိတ်ဆွဲထားခဲ့တယ်"</p> <p>ဤအကြောင်းကို ပြောနေစဉ် ဂျိရှောင်ယွီ၏ မျက်ဝန်းများက နီရဲလာပြီး မျက်ရည်များ ဝဲတက်လာကာ အမုန်းတရားများက သိသာထင်ရှားစွာ ပေါ်လွင်နေပေသည်။</p> <p>လင်းယွမ်က ထိုအခါမှသာ ဂျိရှောင်ယွီက ဧဒင်ဥယျာဉ်မှ လူများအပေါ် အဘယ်ကြောင့် ဤမျှလောက် မုန်းတီးနေရသနည်းဆိုသည်ကို နားလည်သွားတော့သည်။</p> <p>ဝူယောင်ပန်းအပေါ် အဘယ်ကြောင့် ဤမျှလောက် ရန်ငြိုးဖွဲ့နေရသနည်း ဆိုသည်ကိုလည်း သဘောပေါက်သွားသည်။</p> <p>တကယ်တော့ ဤအရာများ၏ နောက်ကွယ်တွင် ဤသို့သော အတိတ်ဇာတ်လမ်းတစ်ခု ရှိနေခဲ့ခြင်းပင်။</p> <p>ဝူယောင်ပန်း၏ ရက်စက်ယုတ်မာမှုနှင့် ကောက်ကျစ်စဉ်းလဲမှုများကို စဉ်းစားကြည့်မည်ဆိုလျှင် သူက ဤကဲ့သို့သော ကိစ္စများကို လုပ်ဆောင်ခဲ့ခြင်းမှာ အံ့သြစရာတော့ မဟုတ်ပေ။</p> <p>လင်းယွမ်က "ပြီးတော့ ဘာဆက်ဖြစ်လဲ" ဟု မေးလိုက်သည်။</p> <p>ဂျိရှောင်ယွီက တိုးညှင်းသော အသံဖြင့် ပြောလိုက်သည်။ "ကျွန်မတို့ထဲက တစ်ချို့လူတွေက ရေလူသား အမျိုးအစား အစွမ်းတွေကို နိုးထလာခဲ့ကြတယ်... ရေအောက်မှာ အသက်ရှင်နေထိုင်နိုင်လို့ အားလုံးက ရှောင်မောင်းတောင်ကနေ ထွက်ပြေးပြီး ရေအောက်မှာပဲ နေထိုင်ဖို့ ရွေးချယ်ခဲ့ကြတယ်"</p> <p>"ကျွန်မတို့က ရေအောက်မှာ ခိုလှုံရေးစခန်း တစ်ခုကို တည်ဆောက်ခဲ့တယ်... ရေအောက်မှာ အသက်ရှူနိုင်တဲ့ ရေလူသား အစွမ်းပိုင်ရှင်တွေမှပဲ ဝင်လို့ရတာ"</p> <p>"ဝူယောင်ပန်းကလည်း ကျွန်မတို့ ရှိနေတာကို သိတယ်... ဒါပေမဲ့ သူက ရေအောက်ထဲမှာ အချိန်အကြာကြီး ငုပ်လျှိုးပြီး မတိုက်ခိုက်နိုင်လို့ ကျွန်မတို့ကို ဘာမှ လုပ်လို့မရခဲ့ဘူး"</p> <p>လင်းယွမ်က မနေနိုင်ဘဲ အလွန်အံ့အားသင့်သွားသည်။ ရေလူသား အမျိုးအစား အစွမ်းပိုင်ရှင် တစ်စုက တည်ဆောက်ထားသည့် ရေအောက် ခိုလှုံရေးစခန်းဟုလား။</p> <p>"နေပါဦး... နင်တို့ကိုယ်နင်တို့ ရေလူသား အမျိုးအစား အစွမ်းပိုင်ရှင်တွေလို့ ခေါ်တာလား... ငါးလူတွေ မဟုတ်ဘူးလား"</p> <p>ဂျိရှောင်ယွီက ခေါင်းခါလိုက်သည်။ "မတူပါဘူး... ရေလူသား အမျိုးအစား အစွမ်းပိုင်ရှင်တွေနဲ့ ငါးလူ အမျိုးအစား အစွမ်းပိုင်ရှင်တွေကြားမှာ ကွာခြားချက်တွေ အများကြီး ရှိပါတယ်"</p> <p>"နှစ်မျိုးလုံးက ငါးအသွင် ပြောင်းလဲနိုင်ပြီး... ရေအောက်မှာ အသက်ရှူ ရှင်သန်နိုင်ပေမဲ့... တကယ်တမ်းကျတော့ ငါးလူ အမျိုးအစား အစွမ်းပိုင်ရှင်တွေက... ခန္ဓာကိုယ်ပိုင်းဆိုင်ရာ ဆင့်ကဲပြောင်းလဲတဲ့ဘက်ကို ပိုပြီး ယိမ်းတယ်"</p> <p>"ကျွန်မတို့ ရေလူသား အမျိုးအစား အစွမ်းပိုင်ရှင်တွေကကျတော့... စိတ်စွမ်းအင်ပိုင်းဆိုင်ရာ ဆင့်ကဲပြောင်းလဲမှုဘက်ကို ပိုပြီး အားသန်ကြတယ်"</p> <p>"ပြီးတော့ ကျွန်မတို့ ရေလူသား အမျိုးအစား အစွမ်းပိုင်ရှင်တွေက... အသွင်ပြောင်းပြီးတဲ့နောက်မှာ လူသားပုံစံ အများစုကို ထိန်းသိမ်းထားနိုင်ပေမဲ့... ငါးလူ အမျိုးအစား အစွမ်းပိုင်ရှင်တွေကကျတော့... အသွင်ပြောင်းပြီးရင် ငါးအသွင်အပြင်တွေ ပိုများလာတတ်တယ်"</p> <p>လင်းယွမ်က အံ့သြမဆုံး ဖြစ်သွားသည်။ အကယ်၍ ဤသို့ဆိုလျှင် သူ၏ ရှေ့ရှိ ဂျိရှောင်ယွီက အသွင်ပြောင်းပြီးနောက် ကျန်းဖန်၏ ငါးလူအသွင်နှင့် သိသိသာသာ ကွာခြားနေခြင်းမှာ အံ့သြစရာတော့ မဟုတ်ပေ။</p> <p>အစပိုင်းတွင် လင်းယွမ်က လိင်ကွာခြားမှုကြောင့်ဟု ထင်မှတ်ထားခဲ့သော်လည်း ၎င်းတို့နှစ်ခုက လုံးဝကို မတူညီသော အစွမ်းတစ်ခု ဖြစ်နေမည်ဟု သူ မထင်ထားခဲ့ပေ။</p> <p>လင်းယွမ်က မေးလိုက်သည်။ "နင်တို့ ဘယ်နှယောက် ရှိလဲ"</p> <p>"ဆယ်ယောက်ကျော်လောက်ပါပဲ"</p> <p>ဂျိရှောင်ယွီက အတိအကျ အရေအတွက်ကို မပြောဘဲ ချန်လှပ်ထားခဲ့သည်။ သူမက လင်းယွမ်ကို အားလုံး အသိမခံချင်သည်မှာ သိသာထင်ရှားလှသည်။</p> <p>လင်းယွမ်က ကြားသည်နှင့် ချက်ချင်းပင် ဂျိရှောင်ယွီက လျှော့ပြောလိုက်မှန်း သိလိုက်သည်။ သူမ၏ နောက်ကွယ်ရှိ ဤကဲ့သို့သော ရေလူသား အမျိုးအစား အစွမ်းပိုင်ရှင် အရေအတွက်က ဤဂဏန်းထက် သေချာပေါက် ပိုများနေမည်မှာ မလွဲဧကန်ပင်။</p> <p>သူက အလွန် အံ့အားသင့်သွားပြီး မနေနိုင်ဘဲ ပြောလိုက်သည်။ "ဘယ်လိုလုပ်ပြီး တူညီတဲ့ အမျိုးအစား အစွမ်းပိုင်ရှင်တွေ ဒီလောက် အများကြီး ရှိနေရတာလဲ"</p> <p>သိထားရမည်မှာ ဤအရာက ခွန်အား အမျိုးအစား သို့မဟုတ် အလျင် အမျိုးအစားကဲ့သို့သော သာမန် အစွမ်းမျိုး မဟုတ်ပေ။</p> <p>ရေလူသား အမျိုးအစားနှင့် ငါးလူ အမျိုးအစား အစွမ်းပိုင်ရှင်များကို လင်းယွမ်က အပြင်ဘက်တွင် မြင်တွေ့ရသည်မှာ မများလှပေ။</p> <p>ယခုအချိန်အထိ သူက ကျန်းဖန် တစ်ယောက်တည်းကိုသာ မြင်ဖူးသေးသည်။</p> <p>သူ၏ ရှေ့ရှိ ဂျိရှောင်ယွီက ဒုတိယမြောက်ဟု ဆိုနိုင်ပေသည်။</p> <p>ယခု ဘယ်လိုလုပ်ပြီး ဒီလောက်များပြားတဲ့ အုပ်စုကြီး တစ်စုက ရုတ်တရက် ထွက်ပေါ်လာရတာလဲ။</p> <p>ဂျိရှောင်ယွီက ခေတ္တမျှ တုံ့ဆိုင်းသွားပြီးနောက် ပြောလိုက်သည်။ "ကျွန်မတို့ လူတွေကလည်း ဒီအကြောင်းရင်းကို ခွဲခြမ်းစိတ်ဖြာကြည့်ကြပါတယ်... ရေကြီးပြီးတဲ့နောက်မှာ လူသားတွေရဲ့ ရှင်သန်လိုတဲ့ အသိစိတ်အရ... ရေထဲမှာ ရှင်သန်နေထိုင်နိုင်ဖို့ တောင့်တတဲ့သူတွေ အများကြီး ရှိလာမယ်လို့ အားလုံးက တညီတညွတ်တည်း ယူဆကြတယ်"</p> <p>"ဒီလို စိတ်ဆန္ဒမျိုးနဲ့ အစွမ်း နိုးထလာတဲ့သူတွေက နည်းနည်းနောနော မဟုတ်ဘူး... အများစုက ကျွန်မတို့လို အစွမ်းမျိုးကို နိုးထလာဖို့ ဖြစ်နိုင်ခြေ ရှိတယ်"</p> <p>"နောက်ထပ် အကြောင်းရင်း တစ်ခုကတော့... ကျွန်မတို့လို လူတွေက ရေမကြီးခင်တုန်းက လင်ကျောင်းမြစ်ကမ်းဘေးမှာ နေထိုင်ကြတဲ့သူတွေချည်းပဲ... ဘိုးဘွားစဉ်ဆက်ကတည်းက တံငါသည်တွေချည်းပဲလေ"</p> <p>"လင်ကျောင်းမြစ်မှာ ငါးဖမ်းခွင့် ပိတ်ပင်လိုက်ကတည်းက... ကျွန်မတို့လို လူတွေက ငါးမဖမ်းကြတော့ပေမဲ့ အစိုးရက ကျွန်မတို့ကို ငါးလုပ်ငန်းနဲ့ ပတ်သက်တဲ့ အလုပ်အကိုင်တွေ စီစဉ်ပေးခဲ့တယ်"</p> <p>"ကျွန်မတို့ မိသားစုတွေက တကယ်တမ်းတော့ ခိုးကြောင်ခိုးဝှက်နဲ့ ငါးဖမ်းပြီး စားသောက်ကြသေးတာပဲ"</p> <p>"ကျွန်မတို့ ခန္ဓာကိုယ်ထဲမှာ ဘိုးဘေးတွေဆီကနေ ဆင်းသက်လာတဲ့ ငါးနဲ့ ပတ်သက်တဲ့ မျိုးရိုးဗီဇတွေ ရှိနေနိုင်ပြီး... ရေလူသား ဒါမှမဟုတ် ငါးလူ အမျိုးအစား အစွမ်းတွေကို နိုးထဖို့ ပိုပြီး လွယ်ကူနိုင်တယ်လို့... အားလုံးက တညီတညွတ်တည်း ယူဆကြတယ်"</p> <p>လင်းယွမ်က အနည်းငယ် တိတ်ဆိတ်သွားသည်။</p> <p>မိန်တုဥယျာဉ်တွင် ရှိနေစဉ်ကတည်းက လူသားများ၏ အစွမ်း နိုးထလာခြင်းမှာ အသက်အန္တရာယ်နှင့် ရင်ဆိုင်ရချိန်တွင် ၎င်းတို့ အတောင့်တဆုံးသော စိတ်ပိုင်းဆိုင်ရာ ဆန္ဒများနှင့် များစွာ သက်ဆိုင်နေကြောင်း သူက တွေ့ရှိခဲ့ပြီး ဖြစ်သည်။</p> <p>မသေဆုံးမီ မည်သည့် စွမ်းအားမျိုးကို အတောင့်တဆုံး ဖြစ်ခဲ့သနည်း ဆိုသည်အပေါ်မူတည်ပြီး နိုးထလာချိန်တွင် ထိုစွမ်းအားမျိုးဘက်သို့ ယိမ်းယိုင်သွားနိုင်ခြေ ပိုများတတ်ပေသည်။</p> <p>ဤမျိုးရိုးဗီဇ အစိတ်အပိုင်းက စိတ်ပိုင်းဆိုင်ရာ လိုအပ်ချက်ကို ဦးစားပေး တုံ့ပြန်ပြီး ထိုမှတစ်ဆင့် ပေါ်လွင်လာကာ အစွမ်းတစ်ခုအဖြစ် ဖြစ်ပေါ်လာခြင်း ဖြစ်သည်။</p> <p>ဂျိရှောင်ယွီ၏ ရှင်းပြချက်အရ သူမ၏ နောက်ကွယ်ရှိ ဤလူစုမှာ မူလကတည်းက ငါးလုပ်ငန်းနှင့် ပတ်သက်သည့် မိသားစုများ ဖြစ်ကြသည်။</p> <p>ဘိုးဘွားစဉ်ဆက် ငါးဖမ်းခြင်းဖြင့် အသက်မွေးဝမ်းကျောင်းပြုကာ တစ်သက်လုံး ငါးများကို စားသောက်လာခဲ့ကြသောကြောင့် ခန္ဓာကိုယ်တွင်းရှိ ငါးမျိုးရိုးဗီဇများက သဘာဝအလျောက် ပေါကြွယ်ဝနေမည်မှာ အသေအချာပင်။</p> <p>ဤကဲ့သို့သော အခြေအနေမျိုးတွင် ရေလူသား သို့မဟုတ် ငါးလူ အမျိုးအစား မျိုးရိုးဗီဇကို ဦးစားပေး နိုးထလာခြင်းမှာ မထူးဆန်းလှပေ။</p> <p>ရေကြီးရေလျှံမှုကြီးက ယနေ့တိုင်အောင် ဆက်လက် မြင့်တက်နေဆဲ ဖြစ်သည်။</p> <p>လူသားများ အသက်ရှင်သန်လိုပါက မြင့်ရာသို့ ပြေးရမည် သို့မဟုတ် ရေကြီးမှုအတွင်းသို့ ဝင်ရောက်ကာ ၎င်း၏ အစိတ်အပိုင်း တစ်ခုအဖြစ် ပြောင်းလဲသွားရန် သင်ယူရမည် ဖြစ်သည်။</p> <p>ရေလူသားနှင့် ငါးလူတို့မှာ ဒုတိယအမျိုးအစား ဖြစ်ပြီး ရေကြီးမှုအတွင်းသို့ တဖြည်းဖြည်း ပေါင်းစပ် ဝင်ရောက်နေကြခြင်းပင်။</p> <p>လူသားဟူသော ဤအုပ်စုကြီးသည်လည်း ဆင့်ကဲပြောင်းလဲမှု လမ်းကြောင်းပေါ်တွင် မတူညီသော ဦးတည်ချက်များဆီသို့ လျှောက်လှမ်းနေကြပြီ ဖြစ်သည်။</p> <p>ဤကဲ့သို့သော အတွေးများက လင်းယွမ်၏ ခေါင်းထဲတွင် လျှပ်တစ်ပြက် ဖြတ်ပြေးသွားခဲ့သည်။</p> <p>သူက ဂျိရှောင်ယွီကို မော့ကြည့်လိုက်ပြီး မေးလိုက်သည်။ "နင်တို့ရဲ့ ရေအောက် ခိုလှုံရေးစခန်းကို ငါ့ကို ခေါ်သွားပြလို့ ရမလား"</p> <p>ဂျိရှောင်ယွီက ချက်ချင်းပင် ခေါင်းခါလိုက်ပြီး သတိထားသွားကာ ပြောလိုက်သည်။ "မရဘူး... ကျွန်မတို့ရဲ့ ရေအောက် ခိုလှုံရေးစခန်းကို ရှင့်ကို လုံးဝ ပြောပြလို့ မရဘူး"</p> <p>သူမက မသိစိတ်အရ လင်းယွမ်ကို ငြင်းဆန်လိုက်ခြင်း ဖြစ်သော်လည်း ချက်ချင်းပင် သူမ၏ အမူအရာက သိပ်မကောင်းလှကြောင်း သတိပြုမိသွားသည်။</p> <p>သူမက စကားလမ်းကြောင်း လွှဲလိုက်ပြီး ဖြောင်းဖျလိုက်သည်။ "ဒါ့အပြင် ရှင့်ကို ပြောပြလိုက်ရင်တောင်... ရှင် ဝင်သွားလို့ ရမှာ မဟုတ်ပါဘူး"</p> <p>"ရေအောက်က အရမ်း နက်ပြီး... ရေဖိအားက အရမ်း ကြီးတယ်... ရှင်က အစွမ်းပိုင်ရှင် ဖြစ်နေရင်တောင် ခံနိုင်ရည် ရှိမှာ မဟုတ်ဘူး"</p> <p>"ရှင်က ဆဲလ်တွေရဲ့ စိမ့်ဝင်ဖိအားကို ချိန်ညှိနိုင်ပြီး... ရေအောက် ပတ်ဝန်းကျင်နဲ့ အသားကျနိုင်တဲ့ ငါးလူ... ဒါမှမဟုတ် ရေလူသား အမျိုးအစား အစွမ်းပိုင်ရှင် ဖြစ်နေမှပဲ ရမှာ"</p> <p>သူမ၏ ဤစကားများက အကြောင်းပြချက် ခိုင်လုံနေပြီး လင်းယွမ်ကို တိုက်ရိုက် ငြင်းဆန်လိုက်ခြင်းထက် များစွာ ပို၍ သွယ်ဝိုက်ရာ ရောက်ပေသည်။</p> <p>သို့သော် လင်းယွမ်ကမူ ပြုံးရုံသာ ပြုံးလိုက်ပြီး မေးလိုက်သည်။ "ငါက ငါးလူ အမျိုးအစား အစွမ်းပိုင်ရှင် မဟုတ်ဘူးလို့ နင်က ဘယ်လိုလုပ် သိနိုင်မှာလဲ"</p> <p>"ရှင်..."</p> <p>ဂျိရှောင်ယွီက ကြောင်အသွားပြီး လင်းယွမ်ကို ကြည့်လာသော အကြည့်များက ရှင်က ကျွန်မကို အရူးလို့ ထင်နေတာလားဟု မေးနေသည့်အလားပင်။</p> <p>အစောပိုင်းက လင်းယွမ်သည် သူမ၏ ရှေ့တွင် အားကောင်းသော စိတ်စွမ်းအင် အမျိုးအစား အစွမ်းကို ပြသခဲ့ပြီး ဖြစ်သောကြောင့် လင်းယွမ်က ငါးလူ အမျိုးအစား အစွမ်းပိုင်ရှင် ဖြစ်မည်ကို သူမက လုံးဝ မယုံကြည်ပေ။</p> <p>လင်းယွမ်က သူမ မယုံကြည်သည်ကို မြင်သောအခါ အပိုစကား မပြောတော့ဘဲ တိုက်ရိုက် မတ်တတ်ရပ်လိုက်ကာ ပြောလိုက်သည်။ "သွားရအောင်"</p> <p>"ဘယ်သွားမလို့လဲ"</p> <p>"ရေအောက်ကို သွားမယ်... ရောက်ရင် မင်း အလိုလို သိလာလိမ့်မယ်"</p> <p>ဂျိရှောင်ယွီက မျက်မှောင်ကြုတ်လိုက်ပြီး လင်းယွမ်၏ နောက်မှ မတ်တတ်ရပ်ကာ ရှောင်မောင်းတောင်အောက်ရှိ ရေကြီးနေသော နေရာသို့ တစ်လျှောက်လုံး လိုက်ပါလာခဲ့သည်။</p> <p>လင်းယွမ်က ခုန်ပျံလိုက်ပြီး ရေထဲသို့ တိုက်ရိုက် ခုန်ချသွားသည်ကို တွေ့လိုက်ရသည်။</p> <p>ဂျိရှောင်ယွီကလည်း အလားတူပင် ပေါ့ပါးသွက်လက်စွာဖြင့် ရေအောက်သို့ ခုန်ဆင်းလိုက်သည်။</p> <p>ရေထဲသို့ ရောက်သည်နှင့် တစ်ပြိုင်နက် သူမ၏ ခန္ဓာကိုယ်က ချက်ချင်းပင် အလိုအလျောက် ပြောင်းလဲသွားတော့သည်။</p> <p>သေးငယ်သိမ်မွေ့သော ပန်းရောင် အကြေးခွံများက ပျံ့နှံ့ထွက်ပေါ်လာပြီး မူလကတည်းက လှပသော မျက်နှာလေးမှာ ပို၍ ဖြူဖွေးနူးညံ့လာကာ မျက်ဝန်းများကလည်း ကျောက်မျက်ရတနာ တစ်ခုကဲ့သို့ ကြည်လင် တောက်ပလာခဲ့သည်။</p> <p>သူမ၏ လက်နှစ်ဖက်နှင့် ခြေနှစ်ဖက်ကြားတွင်လည်း ရေယက်အမြှေးပါးများ ထွက်ပေါ်လာခဲ့သည်။</p> <p>ဂျိရှောင်ယွီက သူမ၏ ခန္ဓာကိုယ်ကို သက်သောင့်သက်သာ လှုပ်ရှားလိုက်ပြီးနောက် လင်းယွမ်ကို လှည့်ကြည့်လိုက်သည်။</p> <p>ထိုသို့ ကြည့်လိုက်သောအခါ သူမ၏ မျက်လုံးများက ချက်ချင်းပင် ပြူးကျယ်သွားတော့သည်။</p> <p>မလှမ်းမကမ်းရှိ လင်းယွမ်က မည်သည့် ကာကွယ်ရေး အစီအမံ သို့မဟုတ် ရေရှောင်ရှားသည့် အစီအမံများကိုမျှ ဖွင့်လှစ်ထားခြင်း မရှိသည်ကို တွေ့လိုက်ရသည်။</p> <p>ထိုသို့ ဖွင့်ထားမည့်အစား သူကလည်း ရေထဲတွင် ထိုအတိုင်း ရပ်နေခြင်း ဖြစ်သည်။</p> <p>သူ၏ လက်နှစ်ဖက်တွင်လည်း ရေယက်အမြှေးပါးများ ထွက်ပေါ်နေပြီး နားရွက်နောက်ဘက် အပိုင်းတွင်မူ ပါးဟက်များအဖြစ် ဆင့်ကဲပြောင်းလဲလာခဲ့သည်။</p> <p>သူ၏ မျက်နှာပေါ်တွင် ငါးအကြေးခွံများ မရှိသော်လည်း သူ၏ ဆဲလ်များက တစ်ခုခု ပြောင်းလဲသွားပုံရပြီး အပေါ်ယံ အရေပြားလွှာက ပို၍ ထူထဲလာပုံရသည်။</p> <p>"ရှင်... ရှင်... ရှင်"</p> <p>ဂျိရှောင်ယွီက ပါးစပ် အဟောင်းသား ဖြစ်သွားပြီး သူမ၏ မျက်နှာပေါ်တွင် မယုံနိုင်မှုများ ပြည့်နှက်နေကာ စကားများပင် ထစ်အ သွားတော့သည်။</p> <p>လင်းယွမ်က ပြုံးလိုက်ပြီး ပြောလိုက်သည်။ "ဘယ်လိုလဲ... နင့် အမြင်အရ ငါက ငါးလူ မဟုတ်ဘူးလား"</p> <p>"ဒါ မဖြစ်နိုင်ဘူး... ဒါ လုံးဝ မဖြစ်နိုင်ပါဘူး... ရှင်က စိတ်စွမ်းအင် အမျိုးအစား အစွမ်းပိုင်ရှင်လေ... နေပါဦး... မဟုတ်သေးဘူး... ရှင်က ရေခဲဓာတ် အစွမ်းပိုင်ရှင်လည်း ဖြစ်သေးတယ်"</p> <p>"အဲဒါလည်း မဟုတ်သေးဘူး... ရှင် မီးတောက်တွေ ထုတ်လွှတ်တာကိုလည်း ကျွန်မ မြင်ခဲ့ဖူးတယ်... ရှင်... ရှင်က တကယ်တော့ ဘယ်လို အမျိုးအစား အစွမ်းပိုင်ရှင်လဲ"</p> <p>ဂျိရှောင်ယွီက တွေဝေသွားတော့သည်။ သူမက လုံးဝကို ခွဲခြားမရတော့ပေ။ သူမ၏ ရှေ့ရှိ ဤအမျိုးသားက တကယ်တော့ မည်သည့် အမျိုးအစား အစွမ်းပိုင်ရှင် ဖြစ်သနည်း။</p> <p>လင်းယွမ်က ပြုံးလိုက်သည်။ "အခု ငါက ငါးလူ ဖြစ်နေပြီဆိုတာ နင် သိရင် ရပါပြီ... အခု နင့်ရဲ့ ခိုလှုံရေးစခန်းကို ငါ့ကို ခေါ်သွားလို့ ရပြီလား"</p> <p>ဂျိရှောင်ယွီက ခေါင်းကုတ်လိုက်ပြီး သူမ၏ မျက်နှာတစ်ခုလုံး ရှုပ်ထွေးသွားတော့သည်။</p> <p>လင်းယွမ်က ပြုံးကာ မေးလိုက်သည်။ "ဘာလဲ... နင်တို့ ခိုလှုံရေးစခန်းက အဲဒီလောက်တောင် အပြင်လူတွေကို လက်မခံတာလား"</p> <p>ဂျိရှောင်ယွီက ခေါင်းခါလိုက်ပြီး ပြောလိုက်သည်။ "လူတိုင်းက အရမ်း သဘောကောင်းကြပါတယ်... ကုန်းပေါ်က လူတွေရဲ့ နာကျင်အောင် လုပ်တာကို ခံခဲ့ရလို့ အားလုံးက ကုန်းပေါ်က လူတွေနဲ့ မပတ်သက်ချင်ကြတော့တာပါ"</p> <p>လင်းယွမ်က မေးလိုက်သည်။ "သူတို့က ကုန်းပေါ် မတက်ကြတော့ဘူးလား... ရေအောက်မှာပဲ တစ်ချိန်လုံး နေကြတာလား"</p> <p>"အဲဒီလိုလည်း မဟုတ်ပါဘူး... တစ်ခါတလေ အရမ်း ပျင်းလာတဲ့အခါ ဒါမှမဟုတ် ကုန်းပေါ်က အစားအစာတွေကို သတိရတဲ့အခါ ကုန်းပေါ်တက်ပြီး စားစရာ လာရှာတတ်ကြပါတယ်"</p> <p>လင်းယွမ်က ပြုံးလိုက်ပြီး မေးလိုက်သည်။ "ငါက ကုန်းပေါ်က လူလား... ဒါမှမဟုတ် နင်တို့ ရေအောက်က လူတွေထဲမှာပဲ ပါလား ဆိုတာ နင် ပြောကြည့်လေ"</p> <p>"အဲ့ဒါက..." ဂျိရှောင်ယွီက မည်သို့ ပြန်ဖြေရမည်ကို မသိတော့ပေ။</p> <p>လင်းယွမ်က ပြောလိုက်သည်။ "ကုန်းပေါ်က လူပဲ ဖြစ်ဖြစ် ရေအောက်က လူပဲ ဖြစ်ဖြစ်... အရင်တုန်းက အားလုံး လူသားတွေချည်းပါပဲ"</p> <p>"ဝူယောင်ပန်းတို့လို လူတွေက တစ်စိတ်တစ်ပိုင်းကိုပဲ ကိုယ်စားပြုနိုင်တာပါ... ဒီလို လူဆိုးတွေက ဘယ်နေရာမှာမဆို ရှိနေမှာပဲ"</p> <p>"နင်တို့အားလုံး ရေအောက်မှာ ရောက်နေရင်တောင်... ငါးလူ ဒါမှမဟုတ် ရေလူသားတွေကြားမှာ လူဆိုးတွေ မရှိနိုင်တော့ဘူးလား"</p> <p>ဂျိရှောင်ယွီက တိတ်ဆိတ်သွားသည်။ သူမက အနည်းငယ် နားဝင်သွားခဲ့ပြီ ဖြစ်သည်။</p> <p>အဓိက အချက်မှာ သူမကို နားချနေသော ဤလူကလည်း ငါးလူ ဖြစ်နေခြင်းပင်။</p> <p>အင်း... ဖြစ်နိုင်တာပဲ။</p> <p>အနည်းဆုံးတော့ သူမက လင်းယွမ်အပေါ် ကုန်းပေါ်က လူသားတွေအပေါ်မှာလိုမျိုး ဆန့်ကျင်ချင်စိတ် မရှိတော့ပေ။</p> <p>လင်းယွမ်က ပြောလိုက်သည်။ "ငါ့ကို ခေါ်သွားပြစမ်းပါ... နင်က ငါနဲ့ အပေးအယူ မလုပ်ချင်တော့ဘူးလား"</p> <p>"နင့်ဘေးနားက လူတွေက ဘယ်လို လူမျိုးတွေလဲဆိုတာ ငါ သိရမှပဲ... ရှောင်မောင်းတောင်ရဲ့ အရင်းအမြစ် တစ်ဝက်ကို နင်တို့ကို ခွဲပေးဖို့ ငါ စိတ်ချနိုင်မှာပေါ့"</p> <p>ဂျိရှောင်ယွီက ချက်ချင်းပင် နားဝင်သွားတော့သည်။ သူမက ခေတ္တမျှ စဉ်းစားလိုက်ပြီး ပြောလိုက်သည်။ "ဒါဆိုရင် ရှင် ကျိန်ဆိုရမယ်... သူတို့ကို လုံးဝ အန္တရာယ် မပေးပါဘူးလို့"</p> <p>"ငါ ကျိန်ဆိုတယ်" လင်းယွမ်က ပြုံးလိုက်ပြီး ပြောလိုက်သည်။</p> <p>ဂျိရှောင်ယွီက ခေါင်းညိတ်လိုက်သည်။ "ကျွန်မ နောက်ကနေ လိုက်ခဲ့"</p> <p>ကောင်မလေးက ရှေ့သို့ လက်ဖြင့်လှော်ခတ်လိုက်ပြီး သူမ၏ ခန္ဓာကိုယ်ပေါ်တွင် အစွမ်း အလင်းရောင်များ တောက်ပလာကာ ဖြူဖွေးသွယ်လျသော ခြေတံနှစ်ချောင်းက ရုတ်တရက် ပူးကပ်သွားတော့သည်။</p> <p>အစွမ်း အလင်းရောင်များ၏ ဖုံးလွှမ်းမှုအောက်တွင် သူမ၏ ခြေတံနှစ်ချောင်းပေါ်၌ အမြှေးပါး တစ်လွှာ ဖုံးအုပ်သွားပြီး ငါးအမြီး တစ်ချောင်း ထွက်လာသကဲ့သို့ ဖြစ်သွားသည်။</p> <p>သူမက ခြေနှစ်ချောင်းကို ညင်သာစွာ ခတ်လိုက်သည်နှင့်အမျှ သူမ တစ်ကိုယ်လုံးက မြားတစ်စင်းကဲ့သို့ ခဏတွင်းချင်း အရှိန်ပြင်းစွာဖြင့် ထွက်ခွာသွားတော့သည်။</p> <p>ဤမြင်ကွင်းကို မြင်လိုက်ရသောအခါ လင်းယွမ်က မနေနိုင်ဘဲ အနည်းငယ် အံ့အားသင့်သွားသည်။</p> <p>သူက ချက်ချင်းပင် မျိုးရိုးဗီဇ အသွင်တစ်ရာ ပင်ကိုယ်အစွမ်းကို အသုံးပြုလိုက်ရာ ခြေတံနှစ်ချောင်းနေရာတွင် အလားတူ စွမ်းအင် အမြှေးပါးများ စုစည်းလာပြီး ငါးအမြီးကဲ့သို့သော ပုံစံတစ်ခု ဖြစ်ပေါ်လာခဲ့သည်။</p> <p>ထို့နောက် ငါးအမြီးကို အားကုန်လွှဲခတ်လိုက်ရာ မျက်စိတစ်မှိတ်အတွင်း သူ၏ အရှိန်က ချက်ချင်းပင် မြင့်တက်သွားတော့သည်။</p> <p>ရှေ့မှ ဂျိရှောင်ယွီက ဤမြင်ကွင်းကို မြင်လိုက်ရသောအခါ မနေနိုင်ဘဲ ကြောင်အသွားကာ ပြောလိုက်သည်။ "ရှင်က ငါးလူ မဟုတ်ဘူးလား... ဘယ်လိုလုပ်ပြီး ကျွန်မတို့ ရေလူသားတွေရဲ့ အမြီးလှော်ခတ်တဲ့ စွမ်းရည်ကို တတ်နေရတာလဲ"</p> <p>ထိုအခါမှသာ လင်းယွမ်က နားလည်သွားတော့သည်။ ဤစွမ်းရည်ကို တကယ်တော့ အမြီးလှော်ခတ်ခြင်း ဟု ခေါ်ဆိုပြီး ဂျိရှောင်ယွီ၏ စကားအရ ဤစွမ်းရည်က ရေလူသား အမျိုးအစား အစွမ်းပိုင်ရှင်များသာ တတ်ကျွမ်းသော စွမ်းရည်တစ်ခု ဖြစ်နေပေသည်။</p> <p>ဆက်ရန်...</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save