Book List

<h2 style="text-align: center;">အပိုင်း(၅၁၆)</h2> <h2 style="text-align: center;">ရေဒြပ်စင်သင်္ကေတအရိုးကို ရရှိခြင်း</h2> <h2 style="text-align: center;">*</h2> <p> </p> <p>ချယ်ရီလမ်းမကြီးက မူလက ဂေဟမြို့တော်၏ မြောက်ဘက်တွင် တည်ရှိပြီး လင်ကျောင်းနှင့် ဆက်စပ်နေသည်။</p> <p>ရေလွှမ်းမိုးမှုကြီး မတိုင်မီက ထိုနေရာက နာမည်ကြီး မြစ်ကမ်းဘေး အပန်းဖြေနေရာတစ်ခု ဖြစ်ခဲ့ဖူးသည်။</p> <p>နှစ်စဉ် နွေဦးရာသီ ရောက်တိုင်း လမ်းဘေးတစ်ဖက်တစ်ချက်စီတွင် ချယ်ရီပန်းများ မရေမတွက်နိုင်အောင် ပွင့်လန်းလေ့ရှိပြီး အလွန်ပင် သာယာလှပပေသည်။</p> <p>နယ်ဝေးမှ ခရီးသွားများစွာကလည်း ချယ်ရီပန်းများကို ကြည့်ရှုရန် လာရောက်လေ့ရှိကြသည်။</p> <p>"ရေကြီးပြီး သုံးလလောက်အကြာမှာ... ဓားမြီးပင်လယ်မြွေက ချယ်ရီလမ်းမကြီးမှာ နေရာယူလာခဲ့တယ်"</p> <p>"အဲ့ဒီတုန်းက မိုးသည်းကြီးမဲကြီးရွာတာ သုံးလရှိသွားပေမဲ့ တချို့ အဆောက်အအုံတွေကို လုံးဝ ရေလွှမ်းမသွားသေးဘူး... အသက်ရှင်ကျန်ရစ်သူ တော်တော်များများကလည်း အဆောက်အအုံကြီးတွေထဲမှာ နေထိုင်နေကြတုန်းပဲ"</p> <p>"ဒါပေမဲ့ ဓားမြီးပင်လယ်မြွေ ပေါ်လာပြီးကတည်းက... လူတွေကို နေရာအနှံ့ လိုက်ပြီး တိုက်ခိုက်တော့တာပဲ"</p> <p>"အဲ့ဒီဘက်မှာ ကြောက်ဖို့ကောင်းတဲ့ သန္ဓေပြောင်း သတ္တဝါတစ်ကောင် ပေါ်လာပြီဆိုတာကို အားလုံး သိသွားကြတော့... လူတိုင်းက အဲ့ဒီနေရာကနေ ထွက်ပြေးဖို့ နည်းလမ်းပေါင်းစုံနဲ့ ကြိုးစားခဲ့ကြတယ်"</p> <p>"အဲ့ဒီကနေမှ... ရှောင်မောင်းတောင် စုဝေးစခန်းဆိုတာ ဖြစ်လာခဲ့တာပဲ"</p> <p>"အဲ့ဒီအချိန်တုန်းက လူတော်တော်များများ စောစောစီးစီး ထွက်ပြေးနိုင်ခဲ့လို့ တော်သေးတာပေါ့... မဟုတ်ရင် မလွယ်ဘူး... နောက်ပိုင်း ရေလွှမ်းမိုးမှုက ပိုပိုကြီးလာပြီး ရေအောက်က သန္ဓေပြောင်း သတ္တဝါတွေကလည်း ပိုပိုပြီး အစွမ်းထက်လာကြတာ"</p> <p>"မြစ်ကမ်းဘေးမှာ နေခဲ့ကြတဲ့ ကျွန်မတို့လို လူတွေဆိုရင်... ပြေးလို့တောင် လွတ်နိုင်မှာ မဟုတ်ဘူး"</p> <p>ရေပြင်ပေါ်တွင် ထိုက်ယန်တောင် အမြန်လှေတစ်စင်းက အရှိန်အဟုန်ဖြင့် မောင်းနှင်နေသည်။</p> <p>ဂျိရှောင်ယွီက ချယ်ရီလမ်းမကြီးအကြောင်းကို မိတ်ဆက်ပေးနေရင်း ဓားမြီးပင်လယ်မြွေအကြောင်းကိုပါ ပြောပြနေသည်။</p> <p>ဘေးနားရှိ ကွမ်ယွဲ့က "ဆရာလင်း... ဓားမြီးပင်လယ်မြွေက တကယ်ကို အစွမ်းထက်တယ်... ကျွန်မတို့လည်း အဲ့ဒီ တိရစ္ဆာန်ကို မတွေ့ရတာ သုံးလနီးပါးလောက် ရှိနေပြီ" ဟု ပြောလိုက်သည်။</p> <p>"အခုချိန်မှာ သူက ပိုပြီး အစွမ်းထက်လာပြီလား ဆိုတာကိုတော့ မသိရသေးဘူး"</p> <p>လင်းယွမ်က "ဒီဓားမြီးပင်လယ်မြွေက လင်ကျောင်းဘက်ကနေ ကူးလာတာလား"</p> <p>ကွမ်ယွဲ့က ခေါင်းညိတ်လိုက်ပြီး "ဖြစ်နိုင်တယ်... အရင်ကတော့ ကျွန်မတို့ဆီမှာ ဓားမြီးပင်လယ်မြွေကို တစ်ခါမှ မတွေ့ဖူးဘူး" ဟု ပြန်ဖြေလိုက်သည်။</p> <p>"ပြီးတော့ ကျွန်မ သိထားသလောက်ဆိုရင်... ဓားမြီးပင်လယ်မြွေက ပင်လယ်ထဲမှာပဲ ရှိသင့်တဲ့ ပင်လယ်မြွေ အမျိုးအစားပဲ... ရေချိုထဲမှာ မရှိသင့်ဘူးလေ"</p> <p>"ဒီနေရာကို ဘယ်လို ရောက်လာမှန်းတောင် မသိပါဘူး"</p> <p>လင်းယွမ်က ခေါင်းကို အသာအယာ ညိတ်လိုက်သည်။ သူက ရေလွှမ်းမိုးမှု အစောပိုင်းကာလ ကတည်းက ရေကြီးမှုထဲတွင် ငါးသတ္တာများကို မြင်တွေ့ခဲ့ရပြီး ဖြစ်သည်။</p> <p>ယင်းက မြစ်ချောင်းအင်းအိုင်များ အားလုံး စောစောစီးစီး ရေလွှမ်းမိုးခံခဲ့ရပြီး ပင်လယ်ရေများက ကုန်းမြေပေါ်သို့ ပြန်လည် စီးဝင်လာခဲ့ပြီ ဖြစ်ကြောင်းကို ပြသနေပေသည်။</p> <p>ထို့ကြောင့်သာ ဤပင်လယ်သတ္တဝါများ ပေါ်ထွက်လာရခြင်း ဖြစ်သည်။</p> <p>ထို့အပြင် လင်းယွမ်၏ တစ်ခဏတာ စောင့်ကြည့်လေ့လာမှုအရ ရေလွှမ်းမိုးမှုထဲရှိ သန္ဓေပြောင်း သတ္တဝါများထဲတွင် ဤပင်လယ် သန္ဓေပြောင်း သတ္တဝါများက ပို၍ အစွမ်းထက်တတ်ပြီး ရေချိုအိုင်များထဲတွင်မူ အစွမ်းထက်သော သန္ဓေပြောင်း သတ္တဝါများက ရှားပါးလှပေသည်။</p> <p>သူက ယခင်ကလည်း ပါမောက္ခ လီဟန်ကျုံးတို့နှင့် ဤကိစ္စကို ဆွေးနွေးခဲ့ဖူးသည်။</p> <p>အားလုံးက ကမ္ဘာကြီး သန္ဓေပြောင်းလဲမှုက စောစောစီးစီး စတင်ခဲ့ခြင်း ဖြစ်နိုင်ပြီး အစောဆုံး သန္ဓေပြောင်းလဲမှုသည် ပင်လယ်သမုဒ္ဒရာထဲမှ စတင်ခဲ့ခြင်း ဖြစ်နိုင်သည်ဟု တညီတညွတ်တည်း ယူဆထားကြသည်။</p> <p>ထို့ကြောင့် ဤပင်လယ်သတ္တဝါများက အခြား မျိုးစိတ်များထက် ရှေ့ပြေးကာ ဦးစွာ ဆင့်ကဲပြောင်းလဲနိုင်ခဲ့ပြီး ပိုမို အစွမ်းထက်လာရခြင်း ဖြစ်သည်။</p> <p>ဖုချီပေါ်ကလည်း ပင်လယ်သတ္တဝါများ၏ မျိုးစိတ်များနှင့် အရေအတွက်က ကုန်းမြေပေါ်နှင့် ရေချိုအိုင်များထဲရှိ သတ္တဝါများ၏ မျိုးစိတ်များနှင့် အရေအတွက်ထက် များစွာ သာလွန်ကြောင်းကို ထောက်ပြခဲ့သေးသည်။</p> <p>ထို့ကြောင့် ဖြစ်နိုင်ခြေ သဘောတရားအရ ကြည့်မည်ဆိုလျှင် ပင်လယ်ထဲတွင် ပို၍ အစွမ်းထက်သော သန္ဓေပြောင်း သတ္တဝါများ မွေးဖွားလာခြင်းကလည်း အလွန် ပုံမှန်ပင် ဖြစ်ပေသည်။</p> <p>"ဆရာလင်း... ဓားမြီးပင်လယ်မြွေက အရမ်းမြင့်မားတဲ့ ခွန်အားနဲ့ ရေအောက်အလျင်ကို ပိုင်ဆိုင်ထားရုံတင် မကဘူး... ပြင်းထန်တဲ့ အဆိပ်စွမ်းရည်ကိုလည်း ပိုင်ဆိုင်ထားသေးတယ်"</p> <p>"သူ့ရဲ့ အဆိပ်က ခန္ဓာကိုယ်ကို တိုက်ခိုက်နိုင်ရုံတင် မဟုတ်ဘူး... စိတ်ကိုပါ ထိခိုက်စေနိုင်တယ်"</p> <p>ကွမ်ယွဲ့က သတိပေးလိုက်သည်။</p> <p>လင်းယွမ်က ခေါင်းကို အသာအယာ ညိတ်လိုက်ပြီး "သတိပေးတဲ့အတွက် ကျေးဇူးပါ... ကျွန်တော် သတိထားပါ့မယ်" ဟု ပြန်ပြောလိုက်သည်။</p> <p>"ဒီနားတစ်ဝိုက်ပဲ ဖြစ်မယ်"</p> <p>ဂျိရှောင်ယွီက ရုတ်တရက် ခေါင်းမော့ကာ ပတ်ဝန်းကျင်ရှိ ရေပြင်ကို အကဲခတ်လိုက်ပြီးနောက် လင်းယွမ်ကို သတိပေးလိုက်သည်။</p> <p>လင်းယွမ်က ခေါင်းမော့ကြည့်လိုက်ရာ ပတ်ပတ်လည်တွင် ရေပြင်ကျယ်ကြီးသာ ရှိနေပြီး တစ်ဆယ့်ရှစ်ထပ်အထက် ရှိသော အဆောက်အအုံ အချို့သာ ရေပြင်ပေါ်သို့ ပေါ်ထွက်နေသည်ကို မြင်လိုက်ရသည်။</p> <p>ဂျိရှောင်ယွီက မလှမ်းမကမ်းရှိ ရေပြင်ပေါ်သို့ ပေါ်ထွက်နေသော လူနေရပ်ကွက်တစ်ခုကို လက်ညှိုးထိုးပြကာ "အဲ့ဒီရပ်ကွက်က ရွှေရှုဥယျာဉ် ဖြစ်မယ်... ချယ်ရီလမ်းမကြီးက ရွှေရှုဥယျာဉ်ရဲ့ ဘေးမှာပဲ ရှိတာ" ဟု ပြောလိုက်သည်။</p> <p>ယင်းက ဒေသခံများသာ သိနိုင်သော ပထဝီဝင် အနေအထားပင် ဖြစ်သည်။</p> <p>လင်းယွမ်က မတ်တတ်ရပ်ကာ အနီးနားတစ်ဝိုက်ကို ကြည့်လိုက်ရာ ရေလှိုင်းများက တလွင့်လွင့် ဖြစ်နေပြီး ရေပြင်ပေါ်တွင် အမှိုက်သရိုက် အမြောက်အမြား ပေါလောပေါ်နေသည်ကို တွေ့လိုက်ရသည်။</p> <p>သစ်သားတုံးများ၊ ပလပ်စတစ် ပစ္စည်းအမျိုးမျိုး၊ မျောပါနေသော သစ်ပင်အမြစ်များ၊ အဆောက်အအုံ အပျက်အစီးများ ရှိနေပြီး အလောင်းအချို့ပင် ရှိနေသေးသည်။</p> <p>သူက လေးနက်သော အသံဖြင့် "ကျွန်တော် ဆင်းပြီး သွားကြည့်လိုက်မယ်... ခင်ဗျားတို့က ဒီကနေ အရင် ထွက်သွားပြီး အနီးနားက အဆောက်အအုံကြီးတွေထဲမှာ သွားပုန်းနေလိုက်ကြ" ဟု ပြောလိုက်သည်။</p> <p>"ဂရုစိုက်နော်" ဂျိရှောင်ယွီက မနေနိုင်ဘဲ အော်ပြောလိုက်သည်။</p> <p>လင်းယွမ်က သူမကို တစ်ချက်ကြည့်လိုက်ပြီး ပြုံးကာ "စိတ်ချပါ" ဟု ပြောလိုက်သည်။</p> <p>ပြောပြီးနောက် သူက ခန္ဓာကိုယ်ကို တစ်ချက် လွှဲလိုက်ကာ ရေထဲသို့ တိုက်ရိုက် ခုန်ချသွားခဲ့သည်။</p> <p>ဂျိရှောင်ယွီက အမြန် ခြေလှမ်းနှစ်လှမ်းခန့် လျှောက်သွားကာ အမြန်လှေ၏ ကုန်းပတ်ပေါ်တွင် ရပ်လိုက်ပြီး ရေလှိုင်းများကို ကြည့်ရင်း မျက်နှာပေါ်တွင် စိုးရိမ်ပူပန်မှုများ အပြည့် ရှိနေသည်။</p> <p>ကွမ်ယွဲ့က မနေနိုင်ဘဲ ပြုံးလိုက်ပြီး "ရှောင်ယွီ... နင်က ဆရာလင်းကို ဒီလောက်တောင် ဂရုစိုက်နေတာလား"</p> <p>ဂျိရှောင်ယွီက နောက်သို့ လှည့်မကြည့်ဘဲ ပြန်ဖြေလိုက်သည်။ "သူက လူကောင်းတစ်ယောက်ပါ... ဒီကမ္ဘာပေါ်မှာ လူကောင်းတွေ သိပ်မရှိတော့ဘူးလေ"</p> <p>ကွမ်ယွဲ့က ချက်ချင်း မှင်သက်သွားပြီး မနေနိုင်ဘဲ သက်ပြင်းတစ်ချက် ချလိုက်ကာ ပြောလိုက်သည်။ "ဟုတ်ပါတယ်လေ... ဆရာလင်း ဘေးကင်းစေဖို့ပဲ မျှော်လင့်ရတော့မှာပဲ"</p> <p>သူတို့နှစ်ဦးက ရေပြင်ကို အတန်ကြာအောင် ကြည့်နေပြီးနောက် နောက်ဆုံးတွင် အမြန်လှေကို စက်နှိုးကာ မလှမ်းမကမ်းရှိ ရွှေရှုဥယျာဉ်ဆီသို့ အလျင်အမြန် မောင်းနှင်သွားကြသည်။</p> <p>...</p> <p>ရေအောက် ပေ ၃၀ ခန့်တွင် လင်းယွမ်က မျိုးရိုးဗီဇ အသွင်တစ်ရာကို အသုံးပြုကာ ရေလူသားအသွင်သို့ ပြောင်းလဲလိုက်သည်။</p> <p>လိပ်ခွံစွမ်းအင်အကာအကွယ် ကဲ့သို့သော အကာအကွယ်များကို တိုက်ရိုက် ဖွင့်လှစ်ခြင်း သို့မဟုတ် ရေကွင်းသင်္ကေတကို အသုံးပြု၍ ရေငုပ်ခြင်းထက်စာလျှင် ဤအခြေအနေဖြင့် ရေငုပ်ခြင်းက ပို၍ လျှို့ဝှက်နိုင်ပြီး သန္ဓေပြောင်းစွမ်းအင်များကိုလည်း ပို၍ ချွေတာနိုင်ပေသည်။</p> <p>လင်းယွမ်က ရေအောက်တွင် လှည့်လည်သွားလာနေပြီး သူ၏ မျက်လုံးများက ညကြည့်စွမ်းရည်ကို ဖွင့်လှစ်ထားပြီး ဖြစ်သည်။</p> <p>မျိုးရိုးဗီဇ အသွင်တစ်ရာ အလုပ်လုပ်လာပြီးနောက် သူက ရေအောက်ရှိ ဖိအားကို အလျင်အမြန်ပင် အသားကျသွားခဲ့သည်။</p> <p>သူက ရေအောက်သို့ ဆက်တိုက် ငုပ်ဆင်းသွားသည်နှင့်အမျှ မကြာမီတွင်ပင် နိမ့်ပါးသော အဆောက်အအုံ အချို့ကို မြင်တွေ့လိုက်ရသည်။</p> <p>ထိုအဆောက်အအုံများက ဂေဟမြို့တော်ရှိ ဒေသခံများ၏ လူနေအိမ်များ ဖြစ်ကြပြီး နှစ်ထပ် သုံးထပ် အဆောက်အအုံငယ်လေးများနှင့် စားသောက်ဆိုင်ငယ်လေးများစွာလည်း ရှိနေပေသည်။</p> <p>ဤနေရာက ချယ်ရီလမ်းမကြီးကြောင့် အပန်းဖြေစရာ နေရာတစ်ခု ဖြစ်လာခဲ့ပြီး ပတ်ဝန်းကျင်ရှိ ဒေသခံများက ထိုအခွင့်အရေးကို အသုံးချကာ တည်းခိုခန်းများနှင့် စားသောက်ဆိုင် လုပ်ငန်းများကို လုပ်ကိုင်လာခဲ့ကြခြင်း ဖြစ်သည်။</p> <p>သို့သော်လည်း ယခုအခါတွင် ဤအဆောက်အအုံများ အားလုံးက ရေလွှမ်းမိုးခံခဲ့ရပြီ ဖြစ်ကာ လင်းယွမ်က တည်းခိုခန်းတစ်ခုအတွင်း ကြမ်းပြင်ပေါ်တွင် ကျန်နေခဲ့သော လူအရိုးစု အချို့ကိုပင် မြင်တွေ့လိုက်ရသေးသည်။</p> <p>အနီးနားရှိ သစ်ပင်များကလည်း စောစောစီးစီး ရေလွှမ်းမိုးခံခဲ့ရပြီး ယခင်က ကားလမ်းမကြီးကလည်း ရွှံ့နွံ အမြောက်အမြားဖြင့် ဖုံးလွှမ်းခံနေရပြီ ဖြစ်သည်။</p> <p>သို့သော် လင်းယွမ်ကို အံ့အားသင့်သွားစေသည်မှာ လမ်းဘေးတစ်ဖက်တစ်ချက်စီရှိ ချယ်ရီပင်များက ပုပ်သိုး ညှိုးနွမ်းသွားခြင်း မရှိပေ။</p> <p>ထိုချယ်ရီပင်များ၏ မျက်နှာပြင်တွင်မူ ကျောက်သလင်း ကဲ့သို့သော အခေါက်များ အမြောက်အမြား ပေါ်ထွက်နေပေသည်။</p> <p>ထိုသစ်ပင် ပင်စည်များကလည်း အလွန် ကြီးမား တုတ်ခိုင်လာခဲ့ပြီး တစ်ချက်ကြည့်လိုက်ရုံဖြင့် ဘိလပ်မြေဖြင့် လောင်းချထားသည်နှင့်ပင် တူညီနေတော့သည်။</p> <p>လင်းယွမ်က မနေနိုင်ဘဲ ရှေ့သို့ တိုးသွားကာ ထိုချယ်ရီပင်များကို အသာအယာ ထိတွေ့ကြည့်လိုက်သည်။</p> <p>ထိုသို့ ထိတွေ့လိုက်သည်နှင့် တစ်ပြိုင်နက် တစ်ပင်လုံးရှိ ကျောက်သလင်း အခေါက်များက ရုတ်တရက် လင်းလက်လာခဲ့သည်။</p> <p>မျက်စိတစ်မှိတ်အတွင်းမှာပင် ဤသစ်ပင်က ပွဲတော်ကာလတွင် ရောင်စုံမီးသီးလေးများ ချိတ်ဆွဲထားသကဲ့သို့ တောက်ပလာခဲ့တော့သည်။</p> <p>လင်းယွမ်က အနည်းငယ် အံ့အားသင့်သွားကာ "ဒီချယ်ရီပင်တွေက ရေလွှမ်းမိုးခံရပြီးတဲ့နောက်မှာ... သူတို့ရဲ့ ကိုယ်ပိုင် ဆင့်ကဲပြောင်းလဲမှု လမ်းကြောင်းကို ရှာတွေ့သွားခဲ့တဲ့ပုံပဲ"</p> <p>"နေရောင်ခြည်လည်း မရှိ... လေလည်း မရှိဘဲနဲ့ ရေအောက်မှာ ရှင်သန်ဖို့ ဘယ်လိုများ အသားကျသွားခဲ့ပါလိမ့်"</p> <p>လင်းယွမ်က ရုတ်တရက် သိချင်စိတ် ပြင်းပြသွားကာ သစ်ကိုင်းတစ်ကိုင်းကို ချိုးကြည့်ရန် ကြိုးစားလိုက်သည်။</p> <p>သို့သော် ထိုသို့ အားကုန်သုံး၍ ချိုးလိုက်သောအခါ ဤချယ်ရီပင်၏ သစ်ကိုင်းများက အလွန် မာကျောလှပြီး သံမဏိချောင်းများထက်ပင် ပို၍ ခိုင်ခံ့နေကြောင်းကို တွေ့ရှိလိုက်ရသည်။</p> <p>လင်းယွမ်၏ ယခုလက်ရှိ ခွန်အား အမှတ်များဖြင့်ပင်လျှင် အနည်းငယ် အားစိုက်ထုတ်နေရသည်ကို ခံစားလိုက်ရသည်။</p> <p>ဤအရာက အကိုင်းအခက် သေးသေးလေး တစ်ခုသာ ရှိသေးကြောင်းကို သိထားရန် လိုအပ်ပေသည်။</p> <p>သူက မနေနိုင်ဘဲ မျက်နှာပေါ်တွင် အံ့အားသင့်မှုများ ပြည့်နှက်သွားကာ "ဒီချယ်ရီပင်က ဘယ်လိုများ ဆင့်ကဲပြောင်းလဲလာတာလဲ... ဒီကျောက်သလင်းတွေက သံထက်တောင် ပိုမာနေသေးတယ်"</p> <p>သူ့စိတ်ထဲတွင် အတွေးတစ်ချက် ဝင်လာခဲ့သည်။ အကယ်၍ ဤအရာများကိုသာ လက်နက်အဖြစ် ပြုလုပ်နိုင်ပါက တိုက်ခိုက်ရေးစွမ်းအားက သေချာပေါက် သံထည်ပစ္စည်းများထက် သာလွန်သွားပေလိမ့်မည်။</p> <p>အစွမ်း သွင်းထားသော သန္ဓေပြောင်း သတ္တဝါများ၏ အရိုးများပင်လျှင် ဤကဲ့သို့သော မာကျောမှုမျိုးကို မရရှိနိုင်ပေ။</p> <p>ထိုသို့ တွေးမိလိုက်သည်နှင့် လင်းယွမ်က ချက်ချင်းပင် အပင်တစ်ပင်ကို အမြစ်ပါမကျန် ဆွဲနှုတ်လိုက်ပြီး ပစ္စည်းသိုလှောင်ခန်းထဲသို့ ထည့်လိုက်သည်။</p> <p>"ထိုက်ယန်တောင် အနီးနားက ရေအောက်မှာ ပြောင်းစိုက်လို့ ရလောက်တယ်"</p> <p>လင်းယွမ်က ဤချယ်ရီလမ်းမကြီး တစ်လျှောက် ဆက်လက်၍ ကူးခတ်သွားရာ ရုတ်တရက် သူ၏ ခြေလှမ်းများက တုံ့ဆိုင်းသွားပြီး မလှမ်းမကမ်းရှိ ရွှံ့နွံများ စုပုံနေသော ကားလမ်းမကြီးဆီသို့ လှမ်းကြည့်လိုက်သည်။</p> <p>ထိုနေရာရှိ ရွှံ့နွံများက ဘေးနှစ်ဖက်သို့ ဖယ်ရှားခံထားရပြီး အလယ်တွင် နက်ရှိုင်းသော မြောင်းကြီးတစ်ခု ပေါ်ထွက်နေသည်ကို မြင်တွေ့လိုက်ရသည်။</p> <p>ထိုမြောင်းကြီးက ပေ ၂၅ ခန့် အကျယ် ရှိကာ S ပုံသဏ္ဌာန် ကွေ့ကောက်နေပြီး တစ်စုံတစ်ရာ တွားသွားထားသော အရာနှင့်ပင် တူညီနေပေသည်။</p> <p>လင်းယွမ်၏ မျက်လုံးများက အနည်းငယ် ကျဉ်းမြောင်းသွားပြီး ယင်းက မည်သည့်အရာ ဖြစ်ကြောင်းကို ချက်ချင်းပင် သတိပြုမိသွားခဲ့သည်။</p> <p>"ဓားမြီးပင်လယ်မြွေပဲ"</p> <p>ဤကြီးမားသော မြောင်းကြီးက ထိုဓားမြီးပင်လယ်မြွေကြီး တွားသွားရာမှ ကျန်ရစ်ခဲ့သော အရာ ဖြစ်ဖို့ များပေသည်။</p> <p>လင်းယွမ်က ထိုမြောင်းကြီးထဲသို့ ခြေလှမ်းကျဲကြီးများဖြင့် ဝင်ရောက်သွားခဲ့သည်။</p> <p>ထိုအထဲသို့ ရောက်ရှိသွားမှသာ ဤဓားမြီးပင်လယ်မြွေကြီးက မည်မျှ ကြီးမားကြောင်းကို ခံစားသိရှိနိုင်ပေသည်။</p> <p>အကျယ်က ပေ ၂၅ ခန့် ရှိပြီး အနက်ကလည်း ၁၃ ပေခန့် ရှိပေသည်။</p> <p>ဤဓားမြီးပင်လယ်မြွေကြီးက အကြမ်းဖျင်း တွက်ကြည့်မည်ဆိုလျှင် အနည်းဆုံး ပေရာချီ ရှည်လျားပေလိမ့်မည်။</p> <p>လင်းယွမ်က မနေနိုင်ဘဲ လေတစ်ချက်ကို ပြင်းပြင်းရှူသွင်းလိုက်ရာ ပါးဟက်အောက်တွင် ရေပူဖောင်းများက ဗွက်ဗွက်ဆူကာ ထွက်ပေါ်လာခဲ့သည်။</p> <p>လင်းယွမ်က ချက်ချင်းပင် အပေါ်သို့ ခုန်တက်ကာ အလျင်အမြန် ကူးခတ်သွားပြီးနောက် အပေါ်စီးမှနေ၍ အောက်သို့ ငုံ့ကြည့်လိုက်သည်။</p> <p>ဤအရာများက အလွန် ရှင်းလင်း ထင်ရှားနေသဖြင့် လင်းယွမ်က ဤကြီးမားသော မြောင်းကြီးအတိုင်း ချက်ချင်းပင် ရှေ့သို့ လိုက်သွားခဲ့သည်။</p> <p>ချယ်ရီလမ်းမကြီး တစ်ခုလုံးက ၃ မိုင်ခန့် ရှိသော်လည်း လင်းယွမ်အတွက်မူ အသက်ရှူကြိမ် အနည်းငယ်မျှဖြင့် ပျံသန်းဖြတ်ကျော်နိုင်သော အကွာအဝေးသာ ဖြစ်သည်။</p> <p>သို့သော်လည်း ၂ မိုင်ခန့်မျှသာ ကူးခတ်ရသေးချိန်တွင် လင်းယွမ်က ရှေ့ရှိ ရွှံ့နွံလမ်းမကြီးပေါ်တွင် နက်ရှိုင်းသော မြောင်းကြီး အမြောက်အမြား ပေါ်ထွက်နေသည်ကို တွေ့လိုက်ရသည်။</p> <p>ထိုမြောင်းကြီးများက တစ်ခုနှင့်တစ်ခု ယှက်နွယ်နေကာ သိသာထင်ရှားသော လမ်းကြောင်းများ မရှိဘဲ အလွန် ရှုပ်ထွေးနေပေသည်။</p> <p>အချို့ အရာများက အသစ်စက်စက် ဖြစ်နေပြီး အချို့ကမူ အချိန်အနည်းငယ် ကြာမြင့်နေပြီ ဖြစ်ကာ အမည်မသိ ရေညှိရေမှော်ပင်များပင် ပေါက်ရောက်နေပေပြီ။</p> <p>လင်းယွမ်က မျက်မှောင်အနည်းငယ် ကြုတ်လိုက်ပြီး "ဒါက ဓားမြီးပင်လယ်မြွေ အမြဲ သွားလာလှုပ်ရှားနေတဲ့ နေရာများလား" ဟု တွေးလိုက်သည်။</p> <p>သူက အောက်သို့ ဆင်းသက်ကာ မြောင်းကြီးထဲသို့ ရောက်ရှိသွားပြီးနောက် မကြာမီမှာပင် မလှမ်းမကမ်းရှိ မြက်ခင်းပြင်ထဲတွင် လူသေအရိုးစု အမြောက်အမြားကို ရှာတွေ့သွားခဲ့သည်။</p> <p>လင်းယွမ်က ရှေ့သို့ တိုးသွားကာ ထိုအရိုးစုများကို ခြေထောက်ဖြင့် အသာအယာ ကန်ကြည့်လိုက်ရာ ထိုအရိုးစုများထဲမှ ရှုပ်ထွေးသော သင်္ကေတများ ထွင်းထုထားသည့် သင်္ကေတအရိုး တစ်ချောင်းကို ချက်ချင်း ရှာတွေ့သွားခဲ့သည်။</p> <p>သူက ထိုသင်္ကေတအရိုးကို ချက်ချင်း ကောက်ယူလိုက်ပြီး သေချာစွာ စစ်ဆေးကြည့်လိုက်သည်။</p> <p>ယင်းက ရေဓာတ် အစွမ်းပိုင်ရှင်တစ်ဦး၏ သင်္ကေတအရိုး ဖြစ်နိုင်ကာ ထိုသင်္ကေတက ရေပြာရောင် ဖြစ်နေသဖြင့် လင်းယွမ်က သန္ဓေပြောင်းစွမ်းအင်ဖြင့် ထိုသင်္ကေတအရိုးကို တိုက်ရိုက် လှုံ့ဆော်ကြည့်ရန် ကြိုးစားလိုက်သည်။</p> <p>"ဝုန်း"</p> <p>ထိုသင်္ကေတက ချက်ချင်းပင် အပြာရောင် အလင်းတန်းများ တောက်ပလာပြီး နောက်တစ်စက္ကန့်တွင် သင်္ကေတအရိုး တစ်ခုလုံးက ရေခိုးရေငွေ့ တစ်အုပ်အဖြစ်သို့ ပြောင်းလဲသွားခဲ့သည်။</p> <p>လင်းယွမ်က ၎င်းကို လက်ထဲတွင် ကိုင်တွယ်ကြည့်လိုက်ရာ ရေပူဖောင်း တစ်ခုကို ကိုင်တွယ်ထားရသည်နှင့်ပင် တူညီနေတော့သည်။</p> <p>"ဒြပ်စင်အဖြစ် ပြောင်းလဲတာလား"</p> <p>သူက အနည်းငယ် မှင်သက်သွားသည်။ ယင်းက ရေဓာတ် အစွမ်းပိုင်ရှင်များကြားတွင် အတော်လေး အားကောင်းသော အစွမ်းတစ်ခု ဖြစ်ပေသည်။</p> <p>ရေဓာတ် အစွမ်းပိုင်ရှင်တိုင်းက ဤဒြပ်စင်အဖြစ် ပြောင်းလဲခြင်း စွမ်းရည်ကို နားလည် သဘောပေါက်နိုင်ကြသည် မဟုတ်ပေ။</p> <p>ထိုက်ယန်တောင်တွင် ရေဓာတ် အစွမ်းပိုင်ရှင် အတော်များများ ရှိသော်လည်း ရေဒြပ်စင်အဖြစ် ပြောင်းလဲနိုင်သူကမူ သိပ်မများလှပေ။</p> <p>ယခုအချိန်အထိ မြူခိုးမြို့တော်မှ ရောက်လာသော သင်္ဘောကပ္ပတိန် ကျန်းဟန်လျန်တို့ အဖွဲ့ရှိ ရေဓာတ် အစွမ်းပိုင်ရှင် အနည်းငယ်မျှသာ ထိုသို့ လုပ်ဆောင်နိုင်ကြသည်။</p> <p>ဟန်ရှန်းမန်၊ လီရှောင်ကျွင်းနှင့် ခုံရှန်းတို့ကမူ ဤကျွမ်းကျင်မှုကို မပိုင်ဆိုင်ထားကြပေ။</p> <p>လင်းယွမ်က သူ အမှတ်တမဲ့ ရှာဖွေတွေ့ရှိခဲ့သော အရိုးစုများထဲတွင် ဤကဲ့သို့သော သင်္ကေတအရိုး တစ်ချောင်း ရှိနေလိမ့်မည်ဟု ထင်မထားခဲ့ပေ။</p> <p>လင်းယွမ်၏ ခန့်မှန်းချက်အရ ရေဒြပ်စင်ပြောင်းလဲခြင်း အစွမ်းက အနည်းဆုံး အစိမ်းရောင်အဆင့် အရည်အသွေး ရှိသော အစွမ်းတစ်ခု ဖြစ်သင့်ပေသည်။</p> <p>ဤကဲ့သို့သော အစွမ်းမျိုးက သာမန် တိုက်ခိုက်မှုများကို လျစ်လျူရှုနိုင်သော စွမ်းရည် ပိုင်ဆိုင်ထားသဖြင့် အလွန် အားကောင်းလှပေသည်။</p> <p>အကယ်၍ စနစ်ထဲမှ ကံစမ်းမဲနှိုက်မည် ဆိုပါက အနည်းဆုံး အမှတ် တစ်သိန်းအထက် ကုန်ကျမည် ဖြစ်သည်။</p> <p>သူက ချက်ချင်းပင် အစွမ်းကို လှုံ့ဆော်ကာ မျိုးရိုးဗီဇ အသွင်တစ်ရာကို အသုံးပြု၍ ဓာတ်မဲ့ သန္ဓေပြောင်းစွမ်းအင်များကို ရေဓာတ် စွမ်းအင်အဖြစ်သို့ အလျင်အမြန် ပြောင်းလဲလိုက်သည်။</p> <p>ထို့နောက် ဤသင်္ကေတကို စတင် သင်ယူလိုက်တော့သည်။</p> <p>သူ၏ ယခုလက်ရှိ စိတ်စွမ်းအင်ဖြင့် အစိမ်းရောင်အဆင့် အစွမ်းများကို သင်ယူရာတွင် မျက်စိတစ်မှိတ် အတွင်းမှာပင် ပြီးမြောက်သွားနိုင်ပေသည်။</p> <p>"ဝုန်း"</p> <p>လင်းယွမ်၏ စိတ်စွမ်းအင်က ခန္ဓာကိုယ်တွင်းရှိ သန္ဓေပြောင်းစွမ်းအင်များကို လှုံ့ဆော်လိုက်သည်နှင့်အမျှ နောက်တစ်စက္ကန့်တွင် သူ၏ ခန္ဓာကိုယ်က ရုတ်တရက် တုန်ခါသွားခဲ့သည်။</p> <p>ထို့နောက် လင်းယွမ်က သူ၏ ရုပ်ပိုင်းဆိုင်ရာ ခန္ဓာကိုယ်က တဖြည်းဖြည်း ပျောက်ကွယ်သွားပြီး ထူထပ်သော ရေခိုးရေငွေ့များ အဖြစ်သို့ ပြောင်းလဲသွားကြောင်းကို ခံစားလိုက်ရသည်။</p> <p>သူက စိတ်စွမ်းအင်ကို တစ်ချက် လှုပ်ရှားလိုက်ရာ ရေခိုးရေငွေ့နှင့် တူညီသော ခန္ဓာကိုယ်က ရေစီးကြောင်းများထဲတွင် အလျင်အမြန် ကူးခတ်သွားတော့သည်။</p> <p>ငါးလေးများက သူ၏ ခန္ဓာကိုယ်ကို ဖြတ်သန်းသွားသောအခါ သူက ရှင်းလင်းသော အထိအတွေ့ကို ရရှိနေပေသည်။</p> <p>သို့သော် ထိုငါးငယ်လေးများကမူ မည်သည့်အရာကိုမျှ မသိရှိဘဲ သူ ပြောင်းလဲထားသော ရေပူဖောင်းထဲတွင် ဟိုဟိုဒီဒီ ကူးခတ်နေကြဆဲ ဖြစ်သည်။</p> <p>"ဒါက ဒြပ်စင်အဖြစ် အသွင်ပြောင်းတဲ့ ခံစားချက်လား... တကယ်ကို အံ့ဩစရာကောင်းတာပဲ"</p> <p>လင်းယွမ်က ပြုံးလိုက်ပြီး "ပြန်ရောက်ရင် ဒီသင်္ကေတကို ရေဓာတ် အစွမ်းပိုင်ရှင်တွေ အားလုံးကို သင်ပေးလို့ ရပြီ"</p> <p>"ထိုက်ယန်တောင်မှာ ရေဓာတ် အစွမ်းပိုင်ရှင်တွေ မနည်းဘူး... အကုန်လုံးသာ ဒီအစွမ်းကို တတ်ကျွမ်းသွားကြမယ် ဆိုရင် ထိုက်ယန်တောင်ရဲ့ အင်အားကို အများကြီး မြှင့်တင်ပေးနိုင်လောက်တယ်"</p> <p>လင်းယွမ်၏ မျက်လုံးများက အနည်းငယ် တောက်ပသွားပြီးနောက် သူ၏ ခန္ဓာကိုယ်က ရေအောက်တွင် ဆက်လက်၍ ကူးခတ်သွားခဲ့သည်။</p> <p>သို့သော်လည်း သူက မကြာမီမှာပင် ပြဿနာတစ်ခုကို တွေ့ရှိသွားခဲ့သည်။ ရေဒြပ်စင်ပြောင်းလဲခြင်း အခြေအနေတွင် ရုပ်ပိုင်းဆိုင်ရာ ခန္ဓာကိုယ်၏ အချုပ်အနှောင်များ မရှိတော့သည့်အပြင် အသက်ရှူရန်ပင် မလိုအပ်တော့ပေ။</p> <p>တစ်နည်းဆိုရသော် ရေဒြပ်စင်ပြောင်းလဲခြင်းကို တတ်ကျွမ်းထားသော အစွမ်းပိုင်ရှင်များက ရေအောက်တွင် ရေရှည် နေထိုင်နိုင်ပြီ ဖြစ်သည်။</p> <p>"ဒါပေမဲ့ ရေဒြပ်စင်ပြောင်းလဲတဲ့အစွမ်းသုံးရင်... ကုန်ဆုံးသွားတဲ့ စွမ်းအင်တွေက ရေလူသားအသွင်ပြောင်းတာထက် အများကြီး ပိုများတယ်"</p> <p>လင်းယွမ်က ခန္ဓာကိုယ်တွင်းရှိ ကုန်ဆုံးသွားသော စွမ်းအင်များကို ခံစားကြည့်လိုက်ရာ ရေဒြပ်စင်ပြောင်းလဲခြင်း၏ အားနည်းချက်ကို တဖြည်းဖြည်း သတိပြုမိလာခဲ့သည်။</p> <p>ဤအစွမ်းက စွမ်းအင်ကုန်ဆုံးမှု အလွန် ပြင်းထန်သဖြင့် အချိန်တိုအတွင်း တိုက်ခိုက်ရာတွင် အသုံးပြုနိုင်သော်လည်း ဤအခြေအနေကို အချိန်ကြာမြင့်စွာ ထိန်းသိမ်းထားရန်မူ မဖြစ်နိုင်ပေ။</p> <p>သူက ရေဒြပ်စင်ပြောင်းလဲခြင်း အစွမ်း၏ အပြောင်းအလဲများကို ခံစားနေရင်း တစ်ဖက်မှ ဆက်လက်၍ ရှာဖွေနေခဲ့သည်။</p> <p>ထိုအချိန်တွင်ပင် သူ၏ ခန္ဓာကိုယ်က ရုတ်တရက် တုံ့ဆိုင်းသွားပြီး မျက်လုံးများက မလှမ်းမကမ်းဆီသို့ လှမ်းကြည့်လိုက်သည်။</p> <p>မလှမ်းမကမ်းရှိ ချိုင့်ဝင်နေသော ရေညှိတောတစ်ခုထဲတွင် ပေ ၂၀ ခန့် ရှည်လျားသော မြွေငယ်လေး အမြောက်အမြား စုဝေးနေကြသည်ကို မြင်တွေ့လိုက်ရသည်။</p> <p>ထိုရေညှိတောထဲတွင်မူ စက်ဝိုင်းပုံစံ အကြည်ရောင် ပူဖောင်းတစ်ခု ပေါ်ထွက်နေပြီး ၎င်းအထဲတွင် ရှည်လျားသော မြွေကြီးတစ်ကောင် ပိတ်မိနေပေသည်။</p> <p>လင်းယွမ်က ထိုပူဖောင်းကို မြင်လိုက်ရသောအခါ ချက်ချင်းပင် မျက်နှာအမူအရာ ပြောင်းလဲသွားခဲ့သည်။</p> <p>"ဟင်းလင်းပြင် ပူဖောင်းပဲ"</p> <p>ဆက်ရန်...</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save