Book List

<h2 style="text-align: center;">အခန်း (၁၈၈)</h2> <h2 style="text-align: center;">စုပေါင်းအကဲဖြတ်မှုများ (၁)</h2> <h2 style="text-align: center;">*</h2> <p> </p> <p>ယန်ချင်းသည် ခန်းမဆောင်ထဲတွင် သူ၏ဘေး၌ ထိုင်နေသော အိမ်ရှေ့စံမင်းသားနှင့် စကားအနည်းငယ် ဖောင်ဖွဲ့ ပြောဆိုလိုက်သည်။</p> <p>သူ၏နာမည်မှာ ကျားဝမ်ယန်ဖြစ်သည်။</p> <p>သူတို့၏ အချိန်တိုလေးအတွင်း အပြန်အလှန်စကားပြောဆိုမှုမှတစ်ဆင့်၊ မောင်နှမများထဲမှ သူ့ကို အဘယ်ကြောင့် ဘုရင်က ရွေးချယ်ချန်ထားခဲ့သနည်း ဆိုသည်ကို ယန်ချင်းက နောက်ဆုံးတွင် နားလည်သွားခဲ့သည်။</p> <p>သူသည် စကားပြောဆိုရာတွင် လိမ်မာပါးနပ်ပေသည်။ ကျင့်ကြံခြင်းအပိုင်းတွင်လည်း သူသည် အမြုတေဖွဲ့စည်းခြင်းအဆင့် ပဉ္စမအဆင့်တွင် ရှိနေသဖြင့် ညံ့ဖျင်းသည်ဟု မဆိုနိုင်ပေ။</p> <p> သို့သော် သူ၏ အခြားမောင်နှမများနှင့် ယှဉ်လျှင်တော့ အနည်းငယ်လိုအပ်နေသေးသည်ဟု ဆိုနိုင်ပေသည်။</p> <p>မောင်နှမခုနစ်ဦးအနက် သမီးတစ်ဦးတွင် အမြင့်ဆုံးကျင့်ကြံခြင်းအဆင့် ရှိနေသည်။ သူမ၏ ကျင့်ကြံခြင်းအဆင့်မှာ အမြုတေဖွဲ့စည်းခြင်းနဝမအဆင့်တွင် ရှိနေသည်။</p> <p>ဘုရင်၏ လူအုပ်စုထဲတွင် ပါဝင်သူများအနက် ကျင့်ကြံခြင်း အဆင့်အရ သူမသည် ထိပ်ဆုံးစာရင်းတွင် ပါဝင်နေသည်။</p> <p>သို့သော် သူမသည် ခရမ်းရောင်မြို့တော်မှ သက်ကြီးရွယ်အို ဇနီးမောင်နှံကဲ့သို့ပင် သူမ၏ ကျင့်ကြံခြင်းအဆင့်ကို ဖုံးကွယ်ထားခဲ့သည်။</p> <p>ယန်ချင်းက သူ၏ဧကရာဇ်အာရုံကို ရင်းနှီးကျွမ်းဝင်မှု မရှိသော နယ်မြေများနှင့် လူစိမ်းများအပေါ် အကျင့်ပါနေသဖြင့် ဖြန့်ကြက်ထားတတ်သောကြောင့်သာ သတိပြုမိသွားခြင်း ဖြစ်သည်။</p> <p>သူမထံတွင် ရှိနေသော ရတနာသည် နန်းတော်အဆင့် ကျင့်ကြံသူတစ်ဦး၏ ဧကရာဇ်အာရုံကို ဖုံးကွယ်ရာတွင် အသုံးမဝင်ခဲ့ပေ။</p> <p>သူမ၏ အစစ်အမှန်ကျင့်ကြံခြင်းအဆင့်မှာ အမြုတေဖွဲ့စည်းခြင်းနဝမအဆင့်တွင် ရှိသော်လည်း၊ အပြင်ပန်းတွင်မူ မောင်နှမခုနစ်ဦးထဲတွင် အားအနည်းဆုံးဖြစ်သော အမြုတေဖွဲ့စည်းခြင်းအဆင့် ဒုတိယအဆင့် အဖြစ်သာ ဖော်ပြထားလေသည်။</p> <p>ယန်ချင်းက ဘာမှထုတ်မပြောဘဲ၊ ထိုကိစ္စကို မသိချင်ယောင်ဆောင်နေရန်သာ ရွေးချယ်လိုက်သည်။</p> <p>ထိုအစီအစဉ်မှာ သူမ၏ သို့မဟုတ် သူမဖခင်၏ သို့မဟုတ် အခြားမောင်နှမတစ်ဦးဦး၏ ပရိယာယ် ဖြစ်နိုင်ပေသည်။</p> <p>တော်ဝင်နိုင်ငံ၏ မိသားစုအရေးဆိုသည်မှာ သူခေါင်းစားခံပြီး တွေးတောချင်သော အရာမျိုး မဟုတ်ပေ။</p> <p>လမ်းခရီးတွင် ဖြတ်သန်းလာခဲ့ရသော အစီအရင် စိုက်ခင်းလောက်ပင် ထိုကိစ္စက သူ့ကို စိတ်မဝင်စားစေခဲ့ပေ။</p> <p>ကျန်ရှိသော မောင်နှမများအတွက်မူ၊ အနိမ့်ဆုံးသူမှာ အခြေတည်အဆင့်၏ အထွတ်အထိပ်တွင် ရှိပြီး ယန်ချင်းခန့်မှန်းရသလောက် သူနှင့် သက်တူရွယ်တူခန့် ရှိမည်ဟု ထင်ရသည်။</p> <p>ကျန်သူများမှာမူ အမြုတေဖွဲ့စည်းခြင်းအဆင့်များ ရှိကြသည်။</p> <p>အစစ်အမှန်အဆင့်ကို ဖုံးကွယ်ထားသော မင်းသမီးကို ဖယ်လိုက်လျှင်၊ ၎င်းတို့ထဲမှ အမြင့်ဆုံးအဆင့်မှာ အမြုတေဖွဲ့စည်းခြင်း၏သတ္တမအဆင့်တွင် ရှိလေသည်။</p> <p>“နွေဦးလွင်ပြင်တိုင်းပြည်ရဲ့ အခြေခံအုတ်မြစ်တွေက မဆိုးဘူးပဲ...”</p> <p>တိုင်းပြည် နယ်နိမိတ်ထဲသို့ ခြေချမိချိန်မှစ၍ ယခုအချိန်အထိ သူ မြင်တွေ့ခဲ့ရသမျှ အရာအားလုံးကို တွေးတောရင်း ယန်ချင်းက သူ့ကိုယ်သူ တီးတိုး ရေရွတ်လိုက်သည်။</p> <p>….</p> <p>ယန်ချင်း အတွေးများထဲ နစ်မြောနေစဉ်၊ သူတို့ ရှိနေသော ခန်းမဆောင်ထဲသို့ တော်ဝင်ကိုယ်ရံတော်တစ်ဦး ဝင်ရောက်လာခဲ့သည်။</p> <p>သူ့တွင် အမြုတေဖွဲ့စည်းခြင်းအဆင့် အဋ္ဌမအဆင့် ရှိသည်။ သူ ထုတ်လွှတ်နေသော ဖိအားများအရ နဝမအဆင့်သို့ တက်လှမ်းရန် အလွန် နီးကပ်နေပုံရသည်။</p> <p>နွေဦးလွင်ပြင်တိုင်းပြည်သည် ယေဘုယျအားဖြင့် အဆင့် ၄ တိုင်းပြည် တစ်ခုဖြစ်သဖြင့်၊ ဤတိုင်းပြည်အတွင်း သူ၏ စွမ်းအားမျိုး ရှိသူတစ်ဦးသည် ရာထူးကြီးမားသူတစ်ဦး ဖြစ်သင့်သည်။</p> <p>သို့သော် လက်ရှိတွင် သူ့ကို သတင်းပို့သူတစ်ဦးအဖြစ် အသုံးပြုနေလေသည်။</p> <p>ထိုကဲ့သို့သော အစီအစဉ်အပေါ် ဘုရင်၏ အတွေးကို ယန်ချင်းခန့်မှန်းရမည် ဆိုလျှင်၊ ပထမအချက်မှာ ယန်ချင်းကို လေးစားမှုပြသရန် ဖြစ်ပြီး၊ နောက်တစ်ချက်မှာ အကဲဖြတ်မှု ခံယူရန် ရောက်လာမည့် အဖွဲ့အစည်းများကို အင်အားပြသရန် ဖြစ်ပေမည်။</p> <p>ဝိညာဉ်ကျင့်ကြံခြင်းဂိုဏ်း၏ ပိုင်နက်နယ်မြေမှာ ရှုပ်ထွေးပြီး ပရမ်းပတာဖြစ်နေသည်။ ဂိုဏ်းသစ်များ သို့မဟုတ် မျိုးနွယ်စုသစ်များက နေရာအနှံ့မှ အမြဲတမ်းပေါ်ထွက်လာလေ့ ရှိသည်။</p> <p>အချို့မှာ လွတ်လပ်သောအဖွဲ့အစည်းများ ဖြစ်သော်လည်း၊ အများစုမှာမူ နွေဦးလွင်ပြင်တိုင်းပြည်နှင့် အင်အားတူညီသော အခြား အဆင့် ၄ အဖွဲ့အစည်းများ၏ နယ်ရုပ်များသာ ဖြစ်ကြပြီး၊ ကျန်သူများမှာ ပြင်ပအင်အားစုများမှ ထည့်သွင်းထားသော နယ်ရုပ်များ ဖြစ်ကြသည်။</p> <p>ထိုဒေသတစ်ခုလုံးမှာ လှည့်စားမှုများ၊ စူးစမ်းထောက်လှမ်းမှုများ၊ လျှို့ဝှက်တိုက်ပွဲများဖြင့် ပြည့်နှက်နေသော အမှိုက်ပုံကြီး တစ်ခု ဖြစ်နေသည်။</p> <p>ထို့ကြောင့် နွေဦးလွင်ပြင်တိုင်းပြည် အနေဖြင့် ဝိညာဉ်ကျင့်ကြံခြင်းဂိုဏ်းနှင့် အဆက်အသွယ်ရှိသည်ဟု ယူဆရလျှင်ပင်၊ ဤအဖွဲ့အစည်းများနှင့် ပတ်သက်၍ ပေါ့ဆနေ၍ မရနိုင်ပေ။</p> <p>ကိုယ်ရံတော်က သူတို့ နှစ်ဦးလုံးကို ဦးစွာအရိုအသေပေးလိုက်ပြီးနောက်၊ သူ့ကို အခန်းထဲသို့ ခေါ်ဆောင်လာသည့် အကြောင်းရင်းကို စတင်ပြောပြလေသည်။</p> <p>“သခင်လေးယန်ချင်း... ဘုရင်မင်းမြတ်ဆီ ပို့ထားတဲ့ အဖွဲ့အစည်းတွေ စာရင်းရဲ့ တစ်ဝက်လောက်က ရောက်နေပါပြီ...”</p> <p>“သူတို့ကို ဒီကို ချက်ချင်းလွှတ်လိုက်ရမလား၊ ဒါမှမဟုတ် အကဲဖြတ်မှု မစခင် အဖွဲ့အစည်းအားလုံး ရောက်လာတဲ့အထိ စောင့်ချင်ပါသလား ခင်ဗျာ...”ကိုယ်ရံတော်က မေးလိုက်သည်။</p> <p>“အင်း... သူတို့ကို လွှတ်လိုက်ပါ၊ တစ်ဝက်ဆိုတာ စတင်ဖို့ လုံလောက်တဲ့ အရေအတွက် ဖြစ်နေပါပြီ...”</p> <p>“ကျန်တဲ့ တစ်ဝက်ကိုတော့ သူတို့ ရောက်လာတာနဲ့တစ်ပြိုင်နက် လွှတ်ပေးလိုက်ပါ... အားလုံးစုံတဲ့အထိ စောင့်နေဖို့ မလိုပါဘူး...”</p> <p>ယန်ချင်းက ပြောလိုက်သည်။</p> <p>“သူတို့ ဒီကို ဝင်လာတဲ့ အခါကျရင်လည်း တန်းစီဖို့ အဲဒီပုံစံအတိုင်းပဲ သုံးလိုက်ပါ... အစောဆုံးရောက်လာတဲ့ သူတွေက ရှေ့ဆုံးမှာ နေမယ်၊ အဲဒီလို အစဉ်လိုက်ပေါ့...”</p> <p>ခေတ္တမျှ စဉ်းစားပြီးနောက် ယန်ချင်းက ထပ်မံပြောလိုက်သည်။</p> <p>“ကျွန်တော်တို့ အဲဒီအတိုင်းပဲ လုပ်ဆောင်လိုက်ပါ့မယ်...”</p> <p>ကိုယ်ရံတော်က ပြတ်သားစွာ ပြန်ပြောလိုက်သည်။</p> <p>“ကျေးဇူးအများကြီးတင်ပါတယ်... အမ်း...”</p> <p>ယန်ချင်း သူ့ကို မည်သို့ ခေါ်ရမည်ကို မသိဘဲ အနေရခက်နေသည့် အမူအရာကို မြင်လိုက်ရချိန်တွင် ကိုယ်ရံတော်က ပြုံးရင်း ဖြေလိုက်သည်။</p> <p>“ကျွန်တော့် နာမည်က ပုကျဲ့ပါ ခင်ဗျာ...”</p> <p>“ပုကျဲ့... ခင်ဗျားရဲ့ ကြိုးစား အားထုတ်မှုတွေအတွက် ထပ်ပြီး ကျေးဇူးတင်ပါတယ်...”</p> <p>ယန်ချင်းက ယဉ်ကျေးစွာ ပြုံးရင်း ပြောလိုက်သည်။</p> <p>ပုကျဲ့က သူနှင့် မင်းသား နှစ်ဦးလုံးကို အရိုအသေ ပေးလိုက်ပြီးနောက်၊ အစီအစဉ်များ ပြုလုပ်ရန် အလျင်အမြန် ထွက်သွားလေသည်။</p> <p>အသေးအဖွဲ ကိစ္စလေးများတွင်ပင် ပေါ့ဆမှု မရှိစေရန် ဘုရင်က အထပ်ထပ်အခါခါ အလေးအနက် မှာကြားထားခဲ့သည်။</p> <p>ထို့ကြောင့်ပင် လူများစွာ၏ အထက်နှင့် လူအနည်းငယ်၏ အောက်တွင်သာ ရှိပြီး မင်းသားအချို့နှင့် တန်းတူအာဏာကို ကိုင်စွဲထားသော တော်ဝင်ကိုယ်ရံတော်တပ်မှူးဖြစ်သည့် သူက ယနေ့တွင် သတင်းပို့သူနှင့် လမ်းပြတစ်ဦးအဖြစ် ဆောင်ရွက်နေရခြင်း ဖြစ်သည်။</p> <p>…</p> <p>“ကျွန်တော့်ရဲ့ ပေါ့ဆမှုအတွက် တောင်းပန်ပါတယ် အစ်ကိုယန်ချင်း...”</p> <p>အိမ်ရှေ့စံမင်းသားက ရှက်ရွံ့စွာဖြင့် အလျင်အမြန် တောင်းပန်လိုက်သည်။</p> <p>ယန်ချင်းက ပုကျဲ့အား ခေါ်ဆိုရန် အနေရခက်နေသည်ကို မြင်လိုက်ရချိန်တွင်၊ သူ၏ အကူအညီပေးရမည့် တာဝန်များတွင် အနည်းငယ် ပေါ့ဆသွားသည်ဟု ခံစားလိုက်ရသည်။</p> <p>အရည်အချင်းပြည့်ဝသော လက်ထောက်တစ်ဦးအနေဖြင့်၊ အရေးကြီးသော သံတမန်ရေးရာ အစည်းအဝေးများအတွက် ဝန်ကြီးများက သူတို့ကို ပြင်ဆင်ပေးသကဲ့သို့ မည်မျှပင်သေးငယ်သော ကိစ္စဖြစ်ပါစေ ယန်ချင်းကို အကြောင်းစုံပြောပြထားသင့်သည်ဟု သူ တွေးမိသည်။</p> <p>ထိုအစည်းအဝေးများတွင်ဆိုလျှင်၊ ရောက်လာမည့် အဖွဲ့များနှင့် ပွဲအကြောင်းကို ပွဲနှင့် သက်ဆိုင်သည်ဖြစ်စေ၊ မသက်ဆိုင်သည်ဖြစ်စေ သတင်းအချက်အလက် မျိုးစုံကို သူတို့အား ကြိုတင် ဖြည့်ဆည်းပေးထားလေ့ ရှိသည်။</p> <p>“ဟားဟား... မင်းသားဝမ်ယန် အဲဒါကို သိပ်ပြီး စိတ်ပူမနေပါနဲ့... ဒီမှာ ခင်ဗျားတို့ အားလုံးကို အလုပ်ရှုပ်အောင် လုပ်နေတာက ကျွန်တော်ဆိုတော့ ခင်ဗျားရဲ့ တောင်းပန်မှုကို လက်ခံဖို့ ကျွန်တော့်မှာ အဲဒီလောက် မျက်နှာမထူပါဘူး...”</p> <p>“ခင်ဗျားနဲ့ ခင်ဗျားတို့ တိုင်းပြည်ရဲ့ အကူအညီတွေ၊ ပြီးတော့ အစီအစဉ်တွေကို မြန်မြန်ဆန်ဆန် ပြုလုပ်ပေးခဲ့တဲ့အတွက်   ကျေးဇူးအများကြီးတင်ပါတယ်...”</p> <p>ယန်ချင်းက မက်မွန်ပန်းဝိုင်အရက် အိုးတစ်လုံးနှင့် ဝိုင်ခွက် နှစ်ခွက်ကို ထုတ်ယူလိုက်သည်။</p> <p>တစ်ခွက်ကို သူ့အတွက် ငှဲ့လိုက်ပြီး ကျန်တစ်ခွက်ကို အိမ်ရှေ့စံမင်းသားအတွက် ငှဲ့ပေးလိုက်သည်။</p> <p>“ဒါကို ကျွန်တော့်ရဲ့ ကျေးဇူးတင်မှုအဖြစ် သဘောထားလိုက်ပါ...”</p> <p>ယန်ချင်းက ဝိုင်ခွက်ကို မြှောက်ကာ ညင်သာစွာပြောလိုက်သည်။</p> <p>“ဒါဆိုရင်လည်း အစ်ကိုယန်ချင်းရဲ့ ကျေးဇူးကို မျက်နှာပြောင်တိုက်ပြီး လက်ခံရတော့မှာပဲ...”</p> <p>အိမ်ရှေ့စံမင်းသားက ပြုံးရင်း ယန်ချင်း၏ ဝိုင်ခွက်ကို တိုက်ကာ ပြန်ပြောလိုက်သည်။</p> <p>သူတို့ နှစ်ဦးလုံး ဝိုင်ခွက်များကို တစ်ကျိုက်တည်း မော့သောက်လိုက်ကြပြီးနောက်၊ ကျေနပ်နေသော အမူအရာများဖြင့် သက်ပြင်းမှုတ်ထုတ်လိုက်ကြသည်။</p> <p>အထူးသဖြင့် မင်းသားမှာ ပို၍ပင် ကျေနပ်နေပုံရသည်။</p> <p>ဝိုင်အရက်၏ ထူးကဲသော အရသာကြောင့် သူ၏ မျက်ဝန်းများမှာ အံ့သြမှုဖြင့် ကျဉ်းမြောင်းသွားခဲ့သည်။</p> <p> ဝိုင်တွင် အေးမြသောခံစားမှုနှင့်အတူ ချိုမြိန်သော အရသာတစ်ခု ပါဝင်နေသည်။</p> <p>စက္ကန့်အနည်းငယ် အကြာတွင်၊ သူ သောက်လိုက်သော ဝိုင်ထဲမှ စွမ်းအင်များက ခန္ဓာကိုယ်ထဲ၌ မီးတောင်တစ်ခုကဲ့သို့ ပေါက်ကွဲထွက်လာချိန်တွင် သူ၏ အမူအရာမှာ ပို၍ပင် အံ့သြမှင်သက်သွားခဲ့သည်။</p> <p> စွမ်းအင်များ အလဟဿ မဖြစ်သွားစေရန် သို့မဟုတ် စွမ်းအင်လွန်ကဲမှုကြောင့် သွေးကြောများအတွင်း ကြီးမားသောဖိအားများ မဖြစ်ပေါ်လာစေရန်အတွက် ထိုစွမ်းအင်များကို လည်ပတ်စေရန် သူ၏ ကျင့်စဉ်ကို အလျင်အမြန်အသက်သွင်းလိုက်ရသည်။</p> <p>“ဝိုင် တစ်ငုံလေးကတောင် အမြုတေဖွဲ့စည်းခြင်း အလယ်အလတ်အဆင့်ကျွမ်းကျင်သူ တစ်ယောက်ကို တုန်လှုပ်သွားစေနိုင်တယ် ဆိုတော့ ယီကျဲရဲ့ တိုးတက်မှုက အရမ်းမြန်ဆန်နေတာပဲ...”</p> <p>“သူ တံခါးပိတ် ကျင့်ကြံရာကနေ မထွက်လာမချင်း ဝိုင်အသစ်တွေ ထပ်မရနိုင်တော့တာက နှမြောစရာပဲ...”</p> <p>ယန်ချင်း သက်ပြင်းချရင်း စိတ်ထဲမှ တွေးလိုက်သည်။သူ၏ စိတ်အခြေအနေကို ပေါ့ပါးသွားစေရန် သူက နောက်ထပ် တစ်ခွက် ထပ်ငှဲ့လိုက်သည်။</p> <p>“ကျေးဇူးအများကြီးတင်ပါတယ် အစ်ကိုယန်ချင်း... ဒါပေမဲ့ ကျွန်တော် ဆက်ပြီး မခံနိုင်တော့ဘူး ထင်တယ်... ထပ်သောက်ရင် ကိုယ့်ကိုယ်ကိုယ် အရှက်ခွဲသလိုပဲ ဖြစ်နေလိမ့်မယ်...”</p> <p>ယန်ချင်း နောက်ထပ်တစ်ခွက်ထပ်ငှဲ့ရန် ပြင်နေသည်ကို မြင်လိုက်ရချိန်တွင်၊ အိမ်ရှေ့စံမင်းသားက ထိတ်လန့်စွာဖြင့် ငြင်းဆန်လိုက်သည်။</p> <p>သူ၏ မျက်လုံးများထဲတွင် ရောထွေးနေသော စိတ်ခံစားချက်များကို မြင်တွေ့နေရသည်။ ဝိုင်အိုးကို ကြည့်နေစဉ် သူ၏ အကြည့်များထဲတွင် နောင်တ၊ ကြောက်ရွံ့မှု၊ သတိထားမှုနှင့် လိုချင်တပ်မက်မှုများ ရောနှောပါဝင်နေလေသည်။</p> <p>ယန်ချင်းက တုံ့ပြန်သည့်အနေဖြင့် ပြုံးရုံသာ ပြုံးလိုက်ပြီး၊ မင်းသားက ဘေးမှနေ၍ မနာလိုစွာ ငေးကြည့်နေစဉ် နောက်ထပ်တစ်ခွက်ကို မော့သောက်လိုက်လေသည်။</p> <p>မိနစ်အနည်းငယ် အကြာတွင်၊ စံအိမ်တော်အတွင်း၌ တီးတိုးပြောဆိုသံအနည်းငယ် ရုတ်တရက် ဆူညံစွာ ထွက်ပေါ်လာလေတော့သည်။</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save