Book List

<h2 style="text-align: center;">အခန်း (၇၀)</h2> <h2 style="text-align: center;">ဝိညာဉ်သိုင်းပညာရပ်</h2> <h2 style="text-align: center;">*</h2> <p> </p> <p>“သူတို့ ဘာဖြစ်နေကြတာလဲ” ဟု ရှောင်ချောင်က နုံးချိလျော့ရဲနေကြသော မှော်သားရဲများကို ကြည့်ကာ မေးမြန်းလိုက်လေသည်။</p> <p>ဒါချောင်ကမူ သားရဲတင်းကုပ်အတွင်းရှိ ရုန်းကန်လှုပ်ရှားထားသော အမှတ်အသားများကို ကြည့်ရှုကာ အကျိုးအကြောင်းကို ရိပ်စားမိဟန်ဖြင့် “သူတို့ ဒီနေရာကနေ ထွက်ပြေးချင်နေကြတာ ဖြစ်မယ်၊ ဒါပေမဲ့ ဘယ်လိုမှ ရုန်းထွက်လို့ မရကြဘူးလေ” ဟု ဆို၏။</p> <p>“ဪ... အဲ့ဒါကြောင့်ကိုး” ဟု ရှောင်ချောင်က ခေါင်းညိတ်၍ နားလည်သွားဟန်ပြုကာ “ဒါပေမဲ့ အခုတော့ အရေးမကြီးတော့ပါဘူး၊ ဒီနေ့ကစပြီး သူတို့အားလုံး သတ်သတ်လွတ်ပဲ စားရမယ်လို့ ဖုန်းအစ်ကိုက မှာထားတယ်” ဟု ပြောလိုက်လေသည်။</p> <p>ထိုစကားကို ကြားသော် မှော်သားရဲအားလုံး မျက်ရည်ဖြိုင်ဖြိုင် ကျရရှာတော့သည်။ တောနက်ထဲဝယ် အခြားသော သတ္တဝါများကို အမဲလိုက်စားသောက်ခဲ့ကြသည့် သူတို့အဖို့ ယခုမူ သတ်သတ်လွတ်စားရမည့် ရဟန်းဝတ်ဘဝသို့ ရောက်ရတော့မည် မဟုတ်လော။</p> <p>မကြာမီပင် ဒါချောင်နှင့် ရှောင်ချောင်တို့သည် ချီစုစည်းခြင်းမြက်များကို အမြောက်အမြား ယူဆောင်လာကြသည်။ ယင်းဆေးမြက်ပင်တို့မှာ ချင်ယွမ်ဖုန်း စိုက်ပျိုးပြီးနောက် မျိုးစေ့များစွာ ရရှိခဲ့ခြင်းဖြစ်ရာ ထပ်မံစိုက်ပျိုးလေတိုင်း ပိုမိုပွားများလာခဲ့ချေသည်။</p> <p>ယခုအခါ ဤနေရာ၌ ချီစုစည်းခြင်းမြက်ခင်းမှာ ဧကအနည်းငယ်မျှ ရှိနေပြီဖြစ်ရာ ထိုမှော်သားရဲများ စားသုံးရန်အတွက် လုံလောက်လှပေသည်။</p> <p>ဖေယွမ်ဆေးမြက်မှာ အဆင့်မြင့်ဆေးပင် မဟုတ်သော်ငြား ဝိညာဉ်ပင်မျိုးနွယ်ဖြစ်၍ ကမ္ဘာမြေ၏ ဝိညာဉ်စွမ်းအင် အနည်းငယ် ပါဝင်နေသဖြင့် သားရဲများအတွက် ဆာလောင်မှုကို ပြေပျောက်စေနိုင်၏။</p> <p>ထိုသားရဲများထဲတွင် အာဟာတစ်ကောင်သာလျှင် ခိုးကြောင်ခိုးဝှက် ရယ်မောနေလေသည်။ ၎င်းမှာ မွေးမြူရေးခြံထဲတွင် ပိတ်လှောင်ခံထားရသူ မဟုတ်ပေရာ အချိန်မရွေး တောထဲသို့ ပြေးဝင်ကာ ဝဝလင်လင် စားသောက်ပြီးမှ ပြန်လာနိုင်သောကြောင့် ဖြစ်ပေ၏။</p> <p>ချင်ယွမ်ဖုန်းသည် နေမွန်းတည့်ချိန်အထိ အိပ်မောကျနေခဲ့ပြန်သည်။ သို့သော် နိုးလာသည်နှင့် တစ်ပြိုင်နက် ပထမဆုံးလုပ်သည့် အလုပ်မှာ ဆေးလုံးများ ထပ်မံဖော်စပ်ခြင်းပင် ဖြစ်ချေသည်။</p> <p>နဂါးဖမ်းဆေးမီးဖို၏ အပေါက်များမှတစ်ဆင့် ဝိညာဉ်စွမ်းအား အသွယ်သွယ်တို့သည် ဆေးမီးဖိုအတွင်းသို့ စီးဝင်သွားကြသည်။ ယခုအခါ မည်သည့်အရပ်မျက်နှာမှ လာသည်ဖြစ်စေ ချင်ယွမ်ဖုန်းအနေဖြင့် အားလုံးကို ထင်ထင်ရှားရှား မြင်တွေ့နေရပြီ ဖြစ်၏။</p> <p>သူသည် ဆေးဖော်စပ်ခြင်းကို ပြန်လည်စတင်သောအခါ အရာခပ်သိမ်းမှာ အလွန်တရာ ချောမွေ့နေကြောင်း တွေ့ရှိရပြီး ပြဿနာမှန်သမျှကိုလည်း ချက်ချင်း လက်ငင်းပင် ရိပ်စားမိလေသည်။</p> <p>အဆုံး၌ ချင်ယွမ်ဖုန်း၏ ဆေးဖော်စပ်သူဘဝတွင် ပထမဆုံးသော ဆေးလုံးတစ်လုံး ထွက်ပေါ်လာခဲ့ချေပြီ။ ယင်းက ရိုးရှင်းသော ချီစုစည်းခြင်းဆေးလုံးမျှသာ ဖြစ်သော်လည်း ချင်ယွမ်ဖုန်းကိုမူ မျက်ရည်ဝဲစေခဲ့သည်။</p> <p>“ခက်ခဲလိုက်တာ၊ နှစ်ရက်တောင် ကြာသွားတယ်... တစ်နေ့လုံး နှစ်ရက်တိတိပဲ” ဟု သူက ရေရွတ်မိ၏။ လွန်ခဲ့သော နှစ်ရက်တာကာလကို ပြန်လည်တွေးတောမိသောအခါ ချင်ယွမ်ဖုန်း စိတ်ပျက်အားလျော့မိသော်လည်း ယခုမူ ပထမအဆင့် ဆေးဖော်စပ်သူတစ်ဦး အစစ်အမှန် ဖြစ်လာခဲ့ချေပြီ။</p> <p>ထို့အပြင် သူသည် 'ကောင်းကင်ဘုံ သန့်စင်ခြင်း ပညာရပ်' အပေါ်တွင်လည်း အမြင်သစ်များ ရရှိခဲ့သည်။ ဤပညာရပ်မှာ သာမန်ဆေးဖော်စပ်နည်းများနှင့် မတူဘဲ ချုပ်တည်းမှုကင်းမဲ့ခြင်း သို့မဟုတ် အရာအားလုံးကို ရောနှောသန့်စင်ခြင်းအပေါ် အဓိကထားခြင်း ဖြစ်ပေသည်။</p> <p>ကောင်းကင်နှင့် မြေကြီးအပါအဝင် အရာခပ်သိမ်းကို ဆေးမီးဖိုအတွင်း၌ သန့်စင်နိုင်ချေသည်။ သာမန် ဆေးဖော်စပ်နည်းများမှာ ဆေးမြက်ပင်တစ်ခုချင်းစီမှ အနှစ်သာရကို အဆင့်ဆင့် ထုတ်ယူပြီးမှ ဆေးလုံးအဖြစ် စုစည်းရသော်လည်း၊ ကောင်းကင်ဘုံ သန့်စင်ခြင်း ပညာရပ်ကမူ ဆေးမြက်ပင်အားလုံးကို ဆေးမီးဖိုအတွင်းသို့ တစ်ပြိုင်နက်တည်း ထည့်သွင်းရန် လိုအပ်လေသည်။</p> <p>ဤသည်မှာ ဆေးဖော်စပ်သူအဖို့ ကြီးမားသော ဝိညာဉ်စွမ်းအားနှင့် ထိန်းချုပ်မှုစွမ်းရည် ရှိရန် လိုအပ်လှရာ၊ ချင်ယွမ်ဖုန်း၏ ဝိညာဉ်စွမ်းအားမှာ အပိုင်းသုံးဆယ်အထိ ကွဲထွက်နေပြီဖြစ်၍ ထိန်းချုပ်မှုအပိုင်းတွင် ပြိုင်ဘက်ကင်းနေပြီဟု ဆိုနိုင်ပေသည်။</p> <p>ချင်ယွမ်ဖုန်းသည် မျက်စိကို မှိတ်ကာ ကောင်းကင်ဘုံ သန့်စင်ခြင်း ပညာရပ်၏ ကျင့်စဉ်များကို အာရုံစူးစိုက်နေစဉ်မှာပင် မိမိကိုယ်ကိုယ်ပင် သတိမထားမိဘဲ ဒုတိယအဆင့် ဆေးဖော်စပ်သူအဆင့်သို့ တက်လှမ်းသွားခဲ့ချေပြီ။</p> <p>“ဟဲဟဲ... ဒီကောင်းကင်ဘုံ သန့်စင်ခြင်း ပညာရပ်က တော်တော်လေး စိတ်ဝင်စားဖို့ ကောင်းတာပဲ၊ နတ်ဘုရားအဆင့် ပညာရပ်ပီပီ ဆေးဖော်စပ်ရုံတင်မကဘဲ တိုက်ခိုက်ရေးမှာပါ အသုံးချလို့ ရဦးမှာပဲ”</p> <p>ချင်ယွမ်ဖုန်းက တိုးတိုးရေရွတ်ရင်း လက်ကို ရုတ်တရက် ဆန့်ထုတ်လိုက်သည်။ ရှေ့ရှိ ထိုင်ခုံမှာ မမြင်ရသော ဧရာမလက်ကြီးတစ်ဖက်ဖြင့် ဆုပ်ကိုင်ခံလိုက်ရသကဲ့သို့ ပုံပျက်ကြေမွသွားပြီးနောက် အလုံးတစ်လုံးအဖြစ် လိပ်တက်သွားလေသည်။</p> <p>သူ မျက်လုံးဖွင့်လိုက်သည်နှင့် ထိုအလုံးမှာ ကြမ်းပြင်ပေါ်သို့ ကျသွားပြီး အစိတ်စိတ်အမွှာမွှာ ကွဲအက်သွားတော့သည်။</p> <p>“ဟားဟားဟား... ငါ နောက်ဆုံးတော့ နားလည်သွားပြီ၊ ဒီကောင်းကင်ဘုံ သန့်စင်ခြင်း ပညာရပ်က ဝိညာဉ်သိုင်းပညာရပ်ပဲ” ဟု ချင်ယွမ်ဖုန်းက စိတ်လှုပ်ရှားစွာ အော်ဟစ်လိုက်လေသည်။</p> <p>သိုင်းပညာရှင်တစ်ဦးတွင် ကိုယ်ခန္ဓာနှင့် ဝိညာဉ်ဟူ၍ နှစ်ပိုင်းရှိရာ၊ ကိုယ်ခန္ဓာအဆင့် မြင့်မားလာခြင်းက ဝိညာဉ်စွမ်းအားကို တိုးတက်စေသော်လည်း ထိုစွမ်းအားမှာ ဆေးဖော်စပ်ခြင်းမှတစ်ပါး အခြားနေရာတွင် အသုံးမဝင်ဟု ထင်မှတ်ရပေသည်။</p> <p>သို့သော် ဝိညာဉ်စွမ်းအားကို သီးသန့်လေ့ကျင့်ကာ ခုခံရန်ခက်ခဲသော တိုက်ခိုက်မှုအဖြစ် အသုံးချနိုင်သည့် ပညာရပ်မျိုးလည်း ရှိပေသေးသည်။</p> <p>ကောင်းကင်ဘုံ သန့်စင်ခြင်း ပညာရပ်မှာ ထိုကဲ့သို့သော ဝိညာဉ်အခြေပြု သိုင်းပညာရပ်ပင် ဖြစ်ချေသည်။</p> <p> လေ့ကျင့်ထားခြင်းမရှိသော ဝိညာဉ်စွမ်းအားမှာ ကုလားထိုင်တစ်လုံးကိုပင် မနိုင်နင်းသော်လည်း၊ ကျင့်ကြံထားသော ဝိညာဉ်စွမ်းအားမှာမူ ကိုယ်ခန္ဓာနှင့် ရင်ပေါင်တန်းနိုင်သော အစွမ်းရှိသည့်အပြင် ရုပ်ဝတ္ထုအဖြစ်ပင် ဖန်တီးလာနိုင်ပေသည်။</p> <p>အချို့သော အစွမ်းထက် ဆေးဖော်စပ်သူများသည် ဆေးဖော်စပ်ခြင်း၌သာ အာရုံစူးစိုက်ရင်း မိမိတို့၏ ဝိညာဉ်ကို မသိစိတ်ဖြင့် ကျင့်ကြံမိကြရာ၊ သူတို့သည် 'မဟာဆရာ' သို့မဟုတ် 'ဘုရင်အဆင့်' သိုင်းပညာရှင်များကိုပင် ဝိညာဉ်စွမ်းအားသက်သက်ဖြင့် ယှဉ်ပြိုင်နိုင်ကြသည်ဟု သတင်းစကားများ ရှိလေသည်။</p> <p>သို့သော် ချင်ယွမ်ဖုန်းမှာမူ ထိုအဆင့်သို့ ရောက်ရန် များစွာ လိုပါသေးသည်။ ယခုအခါ ထိုင်ခုံတစ်လုံးကို ခြေမွှနိုင်ခြင်းမှာပင် သူ၏ အစွမ်းကုန်ပင် ဖြစ်ချေသည်။</p> <p>ဝိညာဉ်သိုင်းပညာရပ်များမှာ မိမိတို့၏ ဝိညာဉ်စွမ်းအားကို အလိုရှိရာ ပုံသဏ္ဌာန်ဖော်ကာ မမြင်ရသော ဓားများအဖြစ် ပြောင်းလဲတိုက်ခိုက်နိုင်သော်လည်း ယင်းက ရုပ်ပိုင်းဆိုင်ရာကို ထိခိုက်စေခြင်းထက် ရန်သူ၏ ဝိညာဉ်ကိုသာ ဒဏ်ရာရစေခြင်း ဖြစ်သည်။</p> <p>သို့သော် ကောင်းကင်ဘုံ သန့်စင်ခြင်း ပညာရပ်မှာမူ ထူးခြားလှသည်။ ယင်းက ရန်သူကို ဆေးလုံးတစ်လုံးကဲ့သို့ သဘောထားကာ ပတ်ဝန်းကျင်ရှိ ဟင်းလင်းပြင်ကို ဖိသိပ်ချုပ်ချယ်ခြင်းဖြင့် ရန်သူကို ထိခိုက်စေခြင်း ဖြစ်ပေရာ ဝိညာဉ်စွမ်းအားကို အသုံးချသည့် နောက်ထပ် နည်းလမ်းတစ်မျိုးပင် ဖြစ်ချေသည်။</p> <p>ယခုအချိန်တွင် သူ၏ ဝိညာဉ်စွမ်းအားမှာ အားမကောင်းသေးသော်လည်း တိုက်ခိုက်ရေးစွမ်းရည်ကိုမူ များစွာ အထောက်အကူ ပြုလေသည်။</p> <p>ထို့အပြင် ဝိညာဉ်စွမ်းအားသည် စိတ်စွမ်းအင်ကဲ့သို့ပင် အရာဝတ္ထုများကို ထိန်းချုပ်နိုင်စွမ်းရှိသည်။</p> <p>အစွမ်းထက်သော သိုင်းပညာရှင်များသည် ဝိညာဉ်စွမ်းအားဖြင့် ပျံသန်းနိုင်သော ဓားများကို စေခိုင်းကာ မိုင်ပေါင်းထောင်ချီဝေးသော အရပ်မှ ရန်သူ့ခေါင်းကို ဖြတ်နိုင်သလို၊ ဓားပေါ်တွင် စီးနင်း၍လည်း ပျံသန်းနိုင်ကြသည်ဟု ဆိုသည်။</p> <p>“ကောင်းပြီ... ငါ့ရဲ့ အစွမ်းတွေ ပိုတောင့်တင်းလာလေလေ၊ ငါ့ကို ဘယ်သူက ကျိန်စာတိုက်ခဲ့တာလဲဆိုတာ ရှာဖွေဖို့ ပိုလွယ်ကူလေလေပဲ” ဟု ချင်ယွမ်ဖုန်းက လက်သီးကို တင်းတင်းဆုပ်ကာ ခက်ထန်သော အမူအရာဖြင့် ပြောလိုက်လေသည်။</p> <p>နောင်လာမည့် ရက်များအတွင်း ချင်ယွမ်ဖုန်းသည် ညစဉ် ဆေးဖော်စပ်ပြီးမှ ကျင့်ကြံခြင်းကို ပြုလုပ်ရာ ဝိညာဉ်စွမ်းအားမှာလည်း တစ်နေ့ထက်တစ်နေ့ ပိုမိုအားကောင်းလာခဲ့သည်။</p> <p>သူသည် ဒုတိယအဆင့် ဆေးလုံးကိုလည်း အောင်မြင်စွာ ဖော်စပ်နိုင်ခဲ့သဖြင့် ဒုတိယအဆင့် ဆေးဖော်စပ်သူအဖြစ်သို့ ရောက်ရှိသွားခဲ့ချေပြီ။</p> <p>ဤသတင်းသာ ပြင်ပသို့ ပေါက်ကြားသွားပါက လူအများ၏ မနာလိုမှုကို ခံရပေလိမ့်မည်။ သာမန်လူတစ်ဦးအဖို့ ဒုတိယအဆင့်သို့ ရောက်ရန် ဆယ်စုနှစ်တစ်ခုမက ကြိုးစားရသော်လည်း ချင်ယွမ်ဖုန်းမှာမူ ပါရမီရှင်များပင် မမီနိုင်လောက်အောင် နှစ်ရက်အတွင်း တက်လှမ်းနိုင်ခဲ့ခြင်းကြောင့်ပင်။</p> <p>ဝက်ဝက်ကွဲအောင် ဆေးဖော်စပ်ခဲ့သည့် ရက်သတ္တပတ် နှစ်ပတ်ခန့် ကြာပြီးနောက်၊ ချင်ယွမ်ဖုန်းသည် ဆေးမီးဖိုနှင့် အခြားအသုံးအဆောင်များကို သိမ်းဆည်းလိုက်သည်။</p> <p> မွေးမြူရေးခြံရှိ သားရဲများပင် ဆေးလုံးများစွာ စားခဲ့ကြရပြီးဖြစ်ရာ ယခုအခါ လက်ဝယ်ရှိ ဆေးပင်များမှာ သူ့အတွက် လုံလောက်မှု မရှိတော့ပေ။</p> <p>ထို့ကြောင့် သူသည် နန်ဝူးမြို့သို့သွား၍ ဆေးပင်အချို့ ထပ်မံဝယ်ယူရန် ဆုံးဖြတ်လိုက်ရာ ဒါချောင်နှင့် ရှောင်ချောင်တို့ကလည်း လိုက်ပါရန် ပြင်ဆင်ကြလေသည်။</p> <p>ထိုစဉ်မှာပင် အစီအရင်၏ အပြင်ဘက်၌ မောဟိုက်နေသော လူတစ်ယောက် ပြေးလာသည်ကို ချင်ယွမ်ဖုန်း မြင်တွေ့လိုက်ရ၏။</p> <p>“အိုင်ဖေး...?း”</p> <p>လာသူမှာ အခြားသူမဟုတ်၊ ချင်ယွမ်ဖုန်း၏ ဂျူနီယာညီလေး ဖြစ်သော အိုင်ဖေး ပင် ဖြစ်ချေသည်။</p> <p>“စီနီယာအစ်ကို...”</p> <p>အိုင်ဖေးမှာ အသက်ရှူမဝဘဲ စိုးရိမ်တကြီးဖြင့် ချင်ယွမ်ဖုန်းရှိရာသို့ တန်းတန်းမတ်မတ် လျှောက်လာလေသည်။</p> <p>“နေဦး... ခဏစောင့်ဦး” ဟု ချင်ယွမ်ဖုန်းက လောလောလောလော လှမ်းအော်လိုက်သော်လည်း၊ အိုင်ဖေးမှာ တစ်လမ်းလုံး ပြေးလာရသဖြင့် ပင်ပန်းနွမ်းနယ်နေပြီး အလှမ်းလည်း ဝေးနေသဖြင့် ချင်ယွမ်ဖုန်း၏ စကားကို မကြားရဘဲ ခါးထောက်လျက် ရှေ့သို့ ဆက်တိုးလာခဲ့ချေသည်။</p> <p>ချက်ချင်းပင် ရွှေရောင် လျှပ်စစ်စီးကြောင်းတစ်ခု လက်ခနဲ ဖြစ်သွားပြီး အိုင်ဖေး၏ ခန္ဓာကိုယ်မှာ လွင့်စင်ထွက်သွားတော့ပေရာသတည်း။</p> <p>***</p> <p> </p>


Save