Book List

<h2 style="text-align: center;">အခန်း (၆၁၁)</h2> <h2 style="text-align: center;">တောက်ပရွှန်းလဲ့နေသော ချန်ဇီယွင်၊ ယောက်ျားများကို</h2> <h2 style="text-align: center;">မြူဆွယ်တတ်သည့် အရှက်ကင်းမဲ့သော မိစ္ဆာမ(၄)။</h2> <h2 style="text-align: center;">*</h2> <p>ဘာ…။</p> <p>ဤစကားထွက်ပေါ်လာသည်နှင့် ယန်မိသားစု ခေါင်းဆောင်အပါအဝင် အားလုံး၏ မျက်လုံးများ ပြူးကျယ်သွားရပြီး မျက်နှာပေါ်တွင် မယုံနိုင်သော အမူအရာများ ထွက်ပေါ်လာတော့သည်။ သူတို့သည် ရွှမ်ဟွမ်ဂိုဏ်း၏ ဂိုဏ်းချုပ်နှင့် ဆုံတွေ့ရလိမ့်မည်ဟု လုံးဝ ထင်မှတ်မထားခဲ့ဘဲ ဤသည်မှာ အလွန်တရာ အိပ်မက်ဆန်လွန်းလှသည်။</p> <p>အဘယ်ကြောင့်ဆိုသော် ဤတာအိုအမည်ကို မည်သူမျှ အတုခိုးဝံ့မည် မဟုတ်ပေ။ အထူးသဖြင့် ရွှမ်ဟွမ်ဂိုဏ်းမှ တပည့်များဆိုလျှင် မိမိဂိုဏ်းချုပ်ကို မည်သူက အတုခိုးဝံ့ပါမည်နည်း။ ဤသည်မှာ သေလမ်းရှာခြင်းပင် မဟုတ်ပါလော။</p> <p>"ဟုတ်တော့လည်း ဟုတ်ပါတယ်လေ… မင်းတို့ အစုလိုက်အပြုံလိုက် ပြောင်းရွှေ့ရတာ ဒုက္ခများမယ်ဆိုတာ ကျုပ်သိပါတယ်…"</p> <p>"လမ်းခရီးမှာ မိစ္ဆာသားရဲတွေရဲ့ တိုက်ခိုက်မှုကို ခံရနိုင်ပြီး အသေအပျောက်လည်း များနိုင်တယ်…"</p> <p>"ဒါကြောင့် ကျုပ်ရဲ့ ဒီစတုတ္ထအဆင့် တောင်ပံစိမ်းမီးတောက်လင်းယုန်ကို မင်းတို့အတွက် ချန်ထားပေးခဲ့မယ်… အနီးအနားက ကျွန်းကြီးတစ်ခုဆီ ရောက်တဲ့အထိ သူက ကာကွယ်ပို့ဆောင်ပေးလိမ့်မယ်…"</p> <p>ကျိုးစွေ့က လက်နောက်ပစ်ကာ ပြောလိုက်သည်။</p> <p>"ကျေးဇူးတင်ပါတယ် စီနီယာ...”</p> <p>ယန်မိသားစုခေါင်းဆောင်နှင့် အခြားသူများမှာ မျက်ရည်ကျမတတ် ကျေးဇူးတင်သွားကြလေသည်။ သူတို့၏ရှေ့မှ စီနီယာပုဂ္ဂိုလ်မှာ ဤမျှအထိ သဘောထားကောင်းပြီး နောက်ဆက်တွဲ ကိစ္စရပ်အားလုံးကိုပါ စဉ်းစားပေးထားလိမ့်မည်ဟု ထင်မှတ်မထားခဲ့ကြပေ။ အကယ်၍ သူတို့သာ ဤအခွင့်အရေးကို ဆုပ်ကိုင်မထားနိုင်ပါက ယန်မိသားစု ပျက်စီးသွားခြင်းမှာလည်း ထိုက်တန်ပေသည်။</p> <p>မှန်ပေသည်၊ ကျိုးစွေ့သည်လည်း အကြောင်းပြချက်မရှိ ဤနေရာသို့ ရောက်လာခြင်းမဟုတ်ပေ။ အရာအားလုံးသည် ‘ကံကြမ္မာကူ’၏ လမ်းညွှန်မှုကြောင့် ဖြစ်သည်။</p> <p>လွန်ခဲ့သောလေးနှစ်က သူသည် ချန်လန်ပင်လယ်ပြင်ရှိ ကျွန်းကြီးများဆီသို့ စတင်ခရီးလှည့်လည်ခဲ့၏။ ဒေသအသီးသီးရှိ ဘဝနေထိုင်မှုပုံစံများကို နားလည်သဘောပေါက်ရန်၊ လောကီလူသားများ၏ဘဝကို ဖြတ်သန်းခံစားရန်နှင့် ဝမ်းသာခြင်း၊ ဒေါသထွက်ခြင်း၊ ဝမ်းနည်းခြင်း၊ ပျော်ရွှင်ခြင်းစသည်တို့ကို ခံစားသိရှိနိုင်ရန် ဖြစ်ပေသည်။</p> <p>မကောင်းမှုမျိုးစုံ ကျူးလွန်ပြီး ရက်စက်ကြမ်းကြုတ်သူများကို မြင်လျှင် သတ်ပစ်လေ၏။ လူသားများ၏ ကျွန်းများကို နှိပ်စက်ဖျက်ဆီးနေသော မိစ္ဆာသားရဲများကို မြင်လျှင် သုတ်သင်ပစ်သည်။ မတရားမှုများကို ကြုံတွေ့ရပါက ဝင်ရောက်ဖြေရှင်းပေးသည်။</p> <p>အချုပ်အားဖြင့်ဆိုရသော် စိတ်ကူးရှိရာ အရာအားလုံးကို စိတ်လွတ်ကိုယ်လွတ် လုပ်ဆောင်ကာ ကျေးဇူး၊ ကလဲ့စားများကို မိမိဆန္ဒရှိသည့်အတိုင်း လွတ်လပ်စွာ ပြုမူနေထိုင်ခြင်းပင် ဖြစ်လေသည်။</p> <p>ဤသို့ပြုမူပြီးနောက် ကျိုးစွေ့သည် သူ၏ကိုယ်ပေါ်ရှိ ဝိညာဉ်သန္ဓေသားမျိုးစေ့မှာ အဆက်မပြတ် ကြီးထွားလာကြောင်းကို အာရုံခံမိသည်။ တံခါးပိတ်ကျင့်ကြံစဉ်ကထက် အဆပေါင်း မည်မျှပို၍ မြန်ဆန်လာကြောင်းကို သူပင်မသိတော့ချေ။ အဘယ်ကြောင့်ဆိုသော် ဤကိစ္စများကို လုပ်ဆောင်ပြီးနောက် သူ၏တာအိုနှလုံးသားမှာ ကြည်လင်တောက်ပလာပြီး ဉာဏ်အလင်းများမှာလည်း ပွင့်လင်းလာကာ နှစ်ပေါင်းများစွာ ဖိနှိပ်ခံထားရမှုများကို ဖွင့်ထုတ်လိုက်ရသကဲ့သို့ ခံစားလိုက်ရသောကြောင့် ဖြစ်သည်။</p> <p>ဤပင်လယ်ပြင်တွင် သူ့ကို မည်သူကမျှ အနိုင်မယူနိုင်တော့သကဲ့သို့ မည်သည့်အရာကိုမျှ အလွန်အမင်း စိုးရိမ်ပူပန်နေရန် မလိုအပ်တော့ပေ။ တာအိုနှလုံးသား ကြည်လင်သွားပြီးနောက် သူ၏ကျင့်ကြံမှုမှာလည်း သဘာဝကျစွာပင် အလွန်လျင်မြန်စွာ တိုးတက်လာခဲ့လေသည်။</p> <p>သို့သော် ဤကိစ္စများကို ကျိုးစွေ့သည် ဖြစ်ကတတ်ဆန်း လုပ်ဆောင်ခြင်း မဟုတ်သကဲ့သို့ ကြုံရာကျပန်း ဝင်ရောက်စွက်ဖက်ခြင်းလည်း မဟုတ်ပေ။ အားလုံးသည် ‘ကံကြမ္မာကူ’၏လမ်းညွှန်မှုများသာ ဖြစ်လေသည်။</p> <p>ဤကိစ္စများကို လုပ်ဆောင်ပြီးနောက် သူ၏ကိုယ်ပေါ်ရှိကံကြမ္မာမှာ ကြီးမားစွာ တိုးတက်လာပေလိမ့်မည်။ ဤသည်မှာ ကံကြမ္မာ၏ သားတော်များကို တစ်ဦးပြီးတစ်ဦး ကယ်တင်လိုက်ခြင်းနှင့် တူညီပေသည်။ သူသည်လည်း များစွာသော ကံကြမ္မာ၏ သားတော်များအတွက် အသက်သခင်ကျေးဇူးရှင် ဖြစ်လာသည်။</p> <p>ယန်မိသားစုကျွန်းသို့ ရောက်လာခြင်းမှာလည်း ထိုနည်းတူပင်။ ‘ကံကြမ္မာကူ’သည် ဤကျွန်းပေါ်တွင် ကံတရားကြီးမားသူတစ်ဦး ရှိနေကြောင်း အာရုံခံမိသဖြင့် ကျိုးစွေ့ကို ဤနေရာသို့ လာရောက်ကာ ကူညီကယ်တင်ရန် လမ်းညွှန်ခဲ့ခြင်း ဖြစ်သည်။</p> <p>ဤသို့ဖြင့် ဤကံတရားကြီးမားသူသည် ရွှမ်ဟွမ်ဂိုဏ်းသို့ မလွဲမသွေ ဝင်ရောက်လာမည်သာ ဖြစ်သည်။ အကယ်၍ သူသာ ဤကိစ္စကို မလုပ်ဆောင်ခဲ့ပါက ထိုကံတရားကြီးမားသူမှာ အခြားနေရာသို့ သွားရောက်ပူးပေါင်းသွားနိုင်ပေသည်။ သို့မဟုတ် တစ်ကိုယ်တော်ကျင့်ကြံသူတစ်ဦး ဖြစ်သွားနိုင်ချေရှိ၏။</p> <p>'ဒီတစ်ယောက်လား…'</p> <p>ခဏအကြာတွင် ကျိုးစွေ့သည် သူ၏စိတ်အာရုံကို လှုပ်ရှားလိုက်ရာ သူ၏နှလုံးသားမျက်လုံးစွမ်းအားမှာ တစ်ကျွန်းလုံးကို ဖုံးလွှမ်းသွားပြီး ကျွန်းပေါ်ရှိ ယန်ချန်ယွမ်ကို ချက်ချင်းရှာတွေ့သွားလေသည်။</p> <p>ဤလူငယ် ချီသန့်စင်ခြင်းအဆင့်ကျင့်ကြံသူမှာ သမာရိုးကျအသွင်သာ ရှိသည်။ သို့သော် ကိုယ်ပေါ်ရှိကံကြမ္မာမှာမူ အလွန်တရာ အံ့မခန်းဖြစ်ပြီး ကံကြမ္မာရွှေနဂါးအဖြစ်ပင် ပေါင်းစည်းနေလေသည်။</p> <p>တစ်နည်းဆိုရသော် ထိုသူသာ မသေဆုံးပါက အနာဂတ်တွင် နတ်ဘုရားအသွင်ပြောင်းအဆင့်သို့ မလွဲမသွေ ရောက်ရှိလာမည် ဖြစ်သည်။</p> <p>ထိုသူသာ ရွှမ်ဟွမ်ဂိုဏ်းသို့ ဝင်ရောက်လာပါက ရွှမ်ဟွမ်ဂိုဏ်း၏ အနာဂတ်တွင် နတ်ဘုရားအသွင်ပြောင်းအဆင့် ကျင့်ကြံသူတစ်ဦး ထပ်မံထွက်ပေါ်လာမည်မှာ သေချာလှသည်။</p> <p>'ကံကြမ္မာရဲ့သားတော်တွေ အများကြီး ထွက်ပေါ်လာတာပဲ' ဟု ကျိုးစွေ့ တွေးလိုက်မိ၏။</p> <p>'တကယ်ပဲ ကပ်ဘေးကြီး ရောက်လာတဲ့အခါ လူသားကျင့်ကြံသူတွေ အများကြီး ကံကြမ္မာအထောက်အပံ့တွေ ရလာကြတာပဲ… ဒါကြောင့် ကပ်ဘေးကြီးနဲ့ ကြုံရတိုင်း ပါရမီရှင်တွေ အများကြီး ထွက်ပေါ်လာကြတာပေါ့… တစ်နည်းပြောရရင် ပါရမီရှင်တွေ အများကြီး ထွက်ပေါ်လာတယ်ဆိုတာက ကပ်ဘေးကြီး မကြာခင် ရောက်လာတော့မယ်ဆိုတဲ့ အဓိပ္ပာယ်ပဲ…'</p> <p>ကျိုးစွေ့သည် မျက်လုံးများကို အနည်းငယ်မှေးစင်းလိုက်သည်။</p> <p>ဤနှစ်များအတွင်း ရွှမ်ဟွမ်ဂိုဏ်းသည် ကံကြမ္မာရွှေနဂါး ပိုင်ဆိုင်ထားသော တပည့်လေးငါးဦးခန့်ကို အနည်းဆုံး လက်ခံရရှိခဲ့သည်။ ပုံမှန်အားဖြင့်ဆိုလျှင် ခေတ်တစ်ခေတ်တည်းတွင် ဤမျှများပြားသောပါရမီရှင်များ မည်သို့ထွက်ပေါ်လာနိုင်မည်နည်း။</p> <p>သို့သော် ယခုမူ မတူညီတော့ပေ။ ကျင့်ကြံခြင်းလောက၊ ရှေးဟောင်းမိစ္ဆာလောကနှင့် ရှေးဟောင်းသားရဲလောကတို့ ပေါင်းစည်းသွားကာ လောကသုံးခုပေါင်းစည်းသည့် အထူးကာလတစ်ခုသို့ ရောက်ရှိနေပြီ ဖြစ်သည်။</p> <p>ဤအချိန်တွင် ကျင့်ကြံခြင်းလောကသည် ကြီးမားသော အကျပ်အတည်းကြီးတစ်ခုနှင့် ကြုံတွေ့နေရ၏။ ထို့ကြောင့် ကောင်းကင်တာအိုသည် သဘာဝအတိုင်း မိမိကိုယ်ကိုယ် ကယ်တင်ရန် လူသားကျင့်ကြံသူများကို ကံကြမ္မာအထောက်အပံ့များ ပေးအပ်ကာ လူသားပါရမီရှင်များ အလျင်အမြန် ကြီးထွားလာစေရန် ကူညီပေးနေခြင်း ဖြစ်ပေသည်။</p> <p>ဤသည်မှာ ခေတ်တစ်ခေတ်တွင် ပါရမီရှင်များ မကြာခဏထွက်ပေါ်လာခြင်း၏ အရေးကြီးသော အကြောင်းရင်းတစ်ခုဟု ဆိုနိုင်လေသည်။ သို့သော် ဤခေတ်ကာလသာ ပြီးဆုံးသွားပါက နောက်ဆက်တွဲ ကာလရှည်ကြာစွာ ပါရမီရှင်များ ထွက်ပေါ်လာတော့မည် မဟုတ်ပေ။ ရှည်လျားသော သာမန်ခေတ်ကာလတစ်ခုသာ ဖြတ်သန်းရပေလိမ့်မည်။ ဤသည်မှာ သဘာဝတရား၏ နိယာမပင်။</p> <p>'ယန်မိသားစုကျွန်းကို ကယ်တင်ခဲ့ပြီးပြီဆိုတော့ ဒီလူက ငါ့ရွှမ်ဟွမ်ဂိုဏ်းနဲ့ ရေစက်ရှိတယ်လို့ ဆိုနိုင်တယ် နောက်ဆက်တွဲကိစ္စတွေကိုတော့ ဝင်စွက်ဖက်ဖို့ မလိုတော့ဘူး… သူ့အလိုလို ငါ့ရွှမ်ဟွမ်ဂိုဏ်းကို ရောက်လာလိမ့်မယ်…'</p> <p>ဤသို့တွေးမိပြီးနောက် ကျိုးစွေ့သည် ထိုယန်မိသားစုမှ လူငယ်ကျင့်ကြံသူနှင့် စကားပြောရန် မရည်ရွယ်တော့ဘဲ ကိုယ်ခန္ဓာကိုလှုပ်ရှားကာ အလင်းတန်းတစ်ခုအဖြစ် ပြောင်းလဲပြီး ဤနေရာမှ လျင်မြန်စွာ ထွက်ခွာသွားတော့သည်။ ယန်မိသားစုကျွန်းမှ နေထိုင်သူများကို ကာကွယ်ရန် စတုတ္ထအဆင့် တောင်ပံစိမ်းမီးတောက်လင်းယုန်ကိုသာ ဤနေရာ၌ ချန်ထားရစ်ခဲ့၏။</p> <p>အမှန်စင်စစ်အားဖြင့် ဤကာလများအတွင်း ကျိုးစွေ့သည် မိစ္ဆာသားရဲများကို သုတ်သင်နှိမ်နင်းရန် နေရာအနှံ့သွားရောက်ခဲ့ပြီး စတုတ္ထအဆင့် မိစ္ဆာသားရဲအမြောက်အမြားကို ယဉ်ပါးစေခဲ့ကာ ၎င်းတို့အား အိပ်မက်ဆိုးမျိုးစေ့များ စိုက်ပျိုးပေး၍ မိမိ၏ဝိညာဉ်သားရဲများအဖြစ် ပြောင်းလဲခဲ့လေသည်။</p> <p>ယခုအချိန်အထိဆိုလျှင် ရွှမ်ဟွမ်ဂိုဏ်းတွင် စတုတ္ထအဆင့် ဝိညာဉ်သားရဲကောင်ရေ သောင်းနှင့်ချီ၍ ရှိနေပြီဖြစ်သည်။ အင်အားမှာ ယခင်ကထက် အဆပေါင်းမည်မျှအထိ တိုးတက်သွားမှန်းပင် မသိနိုင်တော့ချေ။</p> <p>…………</p> <p>ကျိုးစွေ့ ပျောက်ကွယ်သွားပြီးနောက်မှသာ သားရဲတစ်သောင်းတာအိုအရှင်မှာ ထပ်မံစကားပြောဝံ့လာပြီး အသိစိတ်အာရုံဖြင့် အသံလွှင့်ကာ မေးလိုက်သည်။ "ဒီလူက တကယ်ကြီး ဘယ်သူလဲ...”</p> <p>"စီနီယာ... အဲဒီလူက နတ်ဘုရားအသွင်ပြောင်းအဆင့်ဂိုဏ်းရဲ့ ဂိုဏ်းချုပ် ဘိုးဘေးရွှမ်ဟွမ်လို့ ကြားဖူးပါတယ်…"</p> <p>"ဒီစီနီယာက အခုချိန်မှာ အသက် ၃၀၀ ပဲ ရှိသေးပေမဲ့ ဝိညာဉ်သန္ဓေသားပြီးပြည့်စုံခြင်းအဆင့်ကို ရောက်နေတဲ့ ကျင့်ကြံသူ ဖြစ်နေပါပြီ…"</p> <p>"နတ်ဘုရားအသွင်ပြောင်းအဆင့်နဲ့ဆိုရင်လည်း သိပ်မဝေးတော့ပါဘူး…"</p> <p>"ပိုပြီး အံ့သြစရာကောင်းတာက သူ့မှာ တာအိုလက်တွဲဖော်တွေ အများကြီးရှိနေတာပဲ… အဲဒီအထဲက နှစ်ယောက်ဆိုရင် ကျုပ်တို့ ချန်လန်ပင်လယ်ဒေသရဲ့ နှစ်ယောက်တည်းရှိတဲ့ နတ်ဘုရားအသွင်ပြောင်းအဆင့် အမျိုးသမီးကျင့်ကြံသူတွေလေ… ယောက်ျားကောင်းဆိုတာ ဒီလိုမျိုး ဖြစ်သင့်တာပေါ့...”</p> <p>ယန်ချန်ယွမ်မှာ အလွန်တရာ အထင်ကြီးလေးစားနေမိတော့၏။ သူသည် ယန်မိသားစုခေါင်းဆောင်ထံမှ ဆက်စပ်သတင်းများကို ကြားသိခဲ့ရခြင်းဖြစ်သည်။</p> <p>မည်သို့ပင်ဖြစ်စေ ကျိုးစွေ့သည် အလွန်တရာ နာမည်ကြီးလွန်းလှပြီး ရွှမ်ဟွမ်ဂိုဏ်း၏ ဂိုဏ်းချုပ်ဖြစ်သည့်အပြင် အလှတရားတွင် ပြိုင်ဘက်ကင်းသော အမျိုးသမီးကျင့်ကြံသူများစွာကို တာအိုလက်တွဲဖော်အဖြစ် ပိုင်ဆိုင်ထားလေသည်။</p> <p>ပို၍အရေးကြီးသည်မှာ နတ်ဘုရားအသွင်ပြောင်းအဆင့် အမျိုးသမီးကျင့်ကြံသူနှစ်ဦးက သူ၏တာအိုလက်တွဲဖော်များ ဖြစ်နေခြင်းပင်။ ဤသည်မှာ အခြားသူများကို အကြီးအကျယ် မနာလိုဖြစ်စေသည်။</p> <p>မှန်ပေသည်၊ ချန်ဇီယွင်တစ်ယောက် ကျိုးစွေ့၏တာအိုလက်တွဲဖော် ဖြစ်သွားသည့်ကိစ္စသည်လည်း လွန်ခဲ့သော နှစ်အနည်းငယ်ကတည်းက ပျံ့နှံ့နေခဲ့ပြီ ဖြစ်၏။ နတ်ဘုရားအသွင်ပြောင်းအဆင့် ကျင့်ကြံသူတစ်ဦးအနေဖြင့် အခြားသူများ၏ အတင်းအဖျင်းပြောဆိုမှုများကို ဂရုစိုက်နေရန် မလိုအပ်ဘဲ မိမိလုပ်ချင်သည်ကို လွတ်လပ်စွာ လုပ်ဆောင်နိုင်ပေသည်။</p> <p>မည်သူကများ တစ်စုံတစ်ရာ ရဲရဲဝံ့ဝံ့ ပြောဆိုရဲမည်နည်း။ ထို့အပြင် ထိုသတင်းကို ထုတ်ပြန်လိုက်ပြီးနောက် ရွှမ်ဟွမ်ဂိုဏ်း၏နာမည်မှာ ပို၍ပင် ကျော်ကြားလာတော့သည်။</p> <p>ရွှမ်ဟွမ်ဂိုဏ်းသည် ချန်လန်ပင်လယ်ဒေသ၏ အင်အားအကြီးဆုံးဂိုဏ်းကြီး ဖြစ်လာခဲ့ပြီဟု ဆိုနိုင်ပေ၏။ အခြားသော ဝိညာဉ်သန္ဓေသားအဆင့်ဂိုဏ်းများမှာမူ ရွှမ်ဟွမ်ဂိုဏ်း၏ လက်အောက်ခံဂိုဏ်းများအဖြစ်သာ ရပ်တည်နိုင်တော့မည်ပုံ ပေါ်လေသည်။</p> <p>"အသက်သုံးရာအရွယ်နဲ့တင် ဝိညာဉ်သန္ဓေသားအဆင့် ပြီးပြည့်စုံသွားပြီလား… ဒီလို ပါရမီရှင်မျိုးက ရှေးဟောင်းခေတ်မှာတောင် အရမ်းထူးချွန်တဲ့ ပုဂ္ဂိုလ်ကြီး ဖြစ်နေမှာပဲ… ဒီခေတ်မှာ ဒီလိုလူမျိုးကို တွေ့ရလိမ့်မယ်လို့ မထင်ထားခဲ့မိဘူး… တကယ်ကို မယုံကြည်နိုင်လောက်အောင်ပဲ...”</p> <p>သားရဲတစ်သောင်းတာအိုအရှင်သည် ဤခေတ်ကာလ၏ ကျင့်ကြံခြင်းလောကမှာ တဖြည်းဖြည်း ကျဆင်းလာခဲ့ပြီး ရှေးဟောင်းခေတ်ကာလ၏ ခမ်းနားကြီးကျယ်သော ကျင့်ကြံခြင်းအခြေအနေများနှင့် နှိုင်းယှဉ်၍ မရနိုင်တော့ဟု မူလက ထင်မှတ်ထားခဲ့သော်လည်း၊ ယခုမြင်တွေ့လိုက်ရချိန်တွင်မူ သူသည် ဤခေတ်မှ ကျင့်ကြံသူများကို အထင်သေးမိခဲ့ပြီဟု ခံစားလိုက်ရ၏။</p> <p>ကောင်းကင်နှင့် မြေကြီး၏ ပတ်ဝန်းကျင် အခြေအနေများ မတူညီတော့သော်လည်း စစ်မှန်သော ပါရမီရှင်များမှာမူ ထင်ပေါ်ကျော်ကြားလာစမြဲပင်။</p> <p>၎င်းတို့သည် ပတ်ဝန်းကျင်၏ သက်ရောက်မှုကို မခံရသည့်အပြင် ပတ်ဝန်းကျင်ကိုပင် ပြောင်းလဲပစ်နိုင်ကြပေသည်။</p> <p>ဤရွှမ်ဟွမ်ဘိုးဘေးမှာ မျိုးဆက်တစ်ခု၏ မဟာဆရာသခင်တစ်ဦး ဖြစ်ပေသည်။ သံသယဖြစ်စရာမလို ထိုသူသည် ကျင့်ကြံခြင်းလောက၏ သမိုင်းစာမျက်နှာတွင် အမည်တွင်ကျန်ရစ်မည့်သူ ဖြစ်၏။</p> <p>အကယ်၍ ရွှမ်ဟွမ်ဂိုဏ်းသာ ဆက်လက်တည်တံ့နေမည်ဆိုပါက ရွှမ်ဟွမ်ဘိုးဘေး၏ နာမည်ဂုဏ်သတင်းမှာ အနည်းဆုံး နှစ်ပေါင်းသောင်းနှင့်ချီ၍ ကြာရှည်စွာ တည်ရှိနေမည် ဖြစ်၏။</p> <p>***</p> <p> </p>


Save