Book List

<h2 style="text-align: center;">အခန်း (၆၁၂)</h2> <h2 style="text-align: center;">တောက်ပရွှန်းလဲ့နေသော ချန်ဇီယွင်၊ ယောက်ျားများကို</h2> <h2 style="text-align: center;">မြူဆွယ်တတ်သည့် အရှက်ကင်းမဲ့သော မိစ္ဆာမ(၅)။</h2> <h2 style="text-align: center;">*</h2> <p>"ဒါနဲ့ ဟိုစတုတ္ထအဆင့် တောင်ပံစိမ်းမီးလင်းယုန်က ဘယ်လိုဖြစ်တာလဲ… ဒီရွှမ်ဟွမ်ဘိုးဘေးက သားရဲထိန်းကျောင်းခြင်း ပညာရပ်ကိုလည်း ကျွမ်းကျင်နေတာများလား...”</p> <p>သားရဲတစ်သောင်းတာအိုအရှင်က သိချင်စိတ်ပြင်းပြစွာဖြင့် မေးမြန်းလိုက်သည်။ သားရဲထိန်းကျောင်းခြင်းဂိုဏ်း၏ ဂိုဏ်းချုပ်တစ်ဦးအနေဖြင့် သူသည် ရှေးဟောင်းခေတ်တွင် ပြိုင်ဘက်ကင်းသော သားရဲထိန်းကျောင်းခြင်းကျင့်စဉ်ကို ပိုင်ဆိုင်ခဲ့သည်။</p> <p>နှမြောစရာကောင်းသည်မှာ သူသည် အလွန်အမင်း ထင်ပေါ်အောင် နေထိုင်ခဲ့ခြင်းကြောင့် နတ်ဘုရားအသွင်ပြောင်းအဆင့် နတ်ဆိုးအများအပြား၏ ဝိုင်းရံတိုက်ခိုက်ခြင်းကို ခံခဲ့ရပြီး ထိုအရာက သားရဲထိန်းကျောင်းခြင်းဂိုဏ်းကို ပျက်သုဉ်းသွားစေခဲ့ခြင်း ဖြစ်လေသည်။</p> <p>ထို့ကြောင့် နှစ်ပေါင်းသောင်းနှင့်ချီ ကြာမြင့်သွားပြီးနောက် သားရဲထိန်းကျောင်းခြင်း ပညာရပ်သည် မည်သို့တိုးတက်လာခဲ့မည်ကို သူယခုအခါ အလွန်သိချင်နေမိချေသည်။</p> <p>သူ၏ သားရဲထိန်းကျောင်းခြင်းဂိုဏ်းနှင့် ယှဉ်နိုင်ပါမည်လော။</p> <p>"မှန်ပါတယ်… ရွှမ်ဟွမ်ဘိုးဘေးက သားရဲထိန်းကျောင်းခြင်း ဆရာသခင်တစ်ပါးလည်း ဖြစ်တယ်လို့ ကြားရတယ်...”</p> <p>"လက်ရှိအချိန်အထိ ရွှမ်ဟွမ်ဂိုဏ်းတစ်ခုလုံးမှာ စတုတ္ထအဆင့် ဝိညာဉ်သားရဲကောင်ရေ တစ်သောင်းကျော်တောင် ရှိနေပြီလို့ ကြားဖူးတယ်...”</p> <p>"အဲဒါတွေအားလုံးက ရွှမ်ဟွမ်ဘိုးဘေး တစ်ယောက်တည်းက နှိမ်နင်းထားတာတဲ့လေ...”</p> <p>"ကောလာဟလတွေအရတော့ ရွှမ်ဟွမ်ဘိုးဘေးဟာ ရက်စက်ကြမ်းကြုတ်တဲ့ သားရဲတွေကို ဝိညာဉ်သားရဲတွေအဖြစ် ပြောင်းလဲပေးနိုင်တဲ့ ကယ်တင်ပြောင်းလဲခြင်း ပညာရပ်တစ်ခုကို ပိုင်ဆိုင်ထားတယ်လို့ ဆိုကြတယ်...”</p> <p>"ဒါကြောင့်လည်း ရွှမ်ဟွမ်ဂိုဏ်းရဲ့ အင်အားက ယှဉ်ပြိုင်နိုင်စွမ်းကင်းမဲ့လောက်အောင် ကြီးမားနေပြီး အရပ်လေးမျက်နှာကို စောင့်ကြပ်ဖို့အတွက် စတုတ္ထအဆင့် ဝိညာဉ်သားရဲကောင်ရေ တစ်သောင်းကျော်ကို အချိန်ပြည့် စေလွှတ်နိုင်တာတဲ့...”</p> <p>"ဒါက ရွှမ်ဟွမ်ဂိုဏ်း အုပ်ချုပ်တဲ့ ပင်လယ်နယ်မြေကို အပြည့်အဝ လုံခြုံသွားစေပြီး ဘယ်မိစ္ဆာသားရဲကမှ ဝင်ရောက်တိုက်ခိုက်ဖို့ မရဲဝံ့တော့ဘူးလေ...”</p> <p>ယန်ချန်ယွမ်က သက်ပြင်းချကာ ပြောလိုက်၏။ သူသည်လည်း ဤသတင်းများကို ယန်မိသားစု၏ အခြေတည်အဆင့် ကျင့်ကြံသူထံမှ ကြားသိခဲ့ရခြင်း ဖြစ်သည်။</p> <p>ထို့ကြောင့် သူသည် အမြဲတမ်း ရွှမ်ဟွမ်ဂိုဏ်းသို့ ဝင်ရောက်ချင်ခဲ့သည်။ နှမြောစရာကောင်းသည်မှာ ယန်မိသားစုကျွန်းနှင့် ရွှမ်ဟွမ်ဂိုဏ်းတို့သည် အလွန်တရာ ကွာဝေးလွန်းသဖြင့် ရောက်ရှိရန် လုံးဝမဖြစ်နိုင်ခြင်းပင်။</p> <p>မည်သို့ပင်ဖြစ်စေ သူ၏ ကျင့်ကြံမှုအဆင့်အရဆိုလျှင် ရွှမ်ဟွမ်ကျွန်းသို့ သွားရောက်လိုပါက လမ်းတစ်ဝက်တွင်ပင် သတ်ဖြတ်ခံရမည်မှာ သေချာနေပေသည်။ သို့သော် ယခုမူ မတူညီတော့ချေ။</p> <p>ထိုရွှမ်ဟွမ်ဘိုးဘေးက သူတို့ကို ကာကွယ်ပေးရန်အတွက် စတုတ္ထအဆင့် တောင်ပံစိမ်းမီးတောက်လင်းယုန်ကိုပင် စေလွှတ်ပေးခဲ့၏။ ထို့အပြင် သူတို့ကို ရွှမ်ဟွမ်ဂိုဏ်း အုပ်ချုပ်သည့် ပင်လယ်နယ်မြေသို့ လုံခြုံစွာ ပို့ဆောင်ပေးမည် ဖြစ်သည်။</p> <p>ဤသည်က သူရွှမ်ဟွမ်ဂိုဏ်းသို့ ဝင်ရောက်ရန် အခွင့်အရေး ရရှိသွားပြီဖြစ်ကြောင်း ကိုယ်စားပြုနေလေသည်။ သံသယဖြစ်စရာမလို ဤသည်မှာ အလွန်ကောင်းမွန်သော အခွင့်အရေးကြီးပင်။</p> <p>"မဖြစ်နိုင်တာ… စတုတ္ထအဆင့် ဝိညာဉ်သားရဲကောင်ရေ သောင်းချီပြီး ယဉ်ပါးအောင် လုပ်နိုင်တယ်ဆိုတာ ဘယ်လိုလုပ် လုပ်နိုင်ခဲ့တာလဲ...” ထိုစကားကို ကြားလိုက်ရသောအခါ သားရဲတစ်သောင်းတာအိုအရှင်မှာ ချက်ချင်းပင် ကြက်သေသေသွားပြီး လုံးဝ မယုံကြည်နိုင် ဖြစ်သွားရလေသည်။</p> <p>မူလက သူသည် သားရဲထိန်းကျောင်းခြင်းဂိုဏ်း၏ ကျင့်စဉ်အပေါ် အလွန်ယုံကြည်မှုရှိခဲ့ပြီး ဤခေတ်ကာလမှ သားရဲထိန်းကျောင်းခြင်း ပညာရပ်များမှာ သူ့ကို လုံးဝယှဉ်နိုင်မည်မဟုတ်ဟု ထင်မှတ်ထားခဲ့၏။</p> <p>သို့သော် ယခုမူ ရွှမ်ဟွမ်ဂိုဏ်းက စတုတ္ထအဆင့် ဝိညာဉ်သားရဲကောင်ရေ တစ်သောင်းကျော်ကို ယဉ်ပါးအောင် လုပ်ဆောင်ထားနိုင်ခဲ့ပြီ ဖြစ်ရာ ဤအရေအတွက်မှာ အလွန်တရာ လွန်ကဲလွန်းလှပေသည်။</p> <p>သားရဲထိန်းကျောင်းခြင်းဂိုဏ်း၏ အထွတ်အထိပ်ကာလ၌ပင်လျှင် ဤမျှအထိ နှိုင်းယှဉ်၍မရနိုင်ခဲ့ချေ။</p> <p>သိသာထင်ရှားစွာပင် ဤခေတ်ကာလ၏ သားရဲထိန်းကျောင်းခြင်း ပညာရပ်မှာ ရှေးဟောင်းခေတ်ကာလက သားရဲထိန်းကျောင်းခြင်းဂိုဏ်းကိုပင် ကျော်လွန်သွားလောက်ပြီ ဖြစ်သည်။ သို့မဟုတ်ပါက ဤသို့သောအရာကို လုံးဝ လုပ်ဆောင်နိုင်မည်မဟုတ်ပေ။</p> <p>"မသိဘူးလေ… ဒါက ရွှမ်ဟွမ်ဂိုဏ်းရဲ့ လျှို့ဝှက်ချက်ပဲဟာကို...”</p> <p>"ကျွန်တော်လို ချီသန့်စင်ခြင်းအဆင့် ကျင့်ကြံသူတစ်ယောက်က ဘယ်လိုလုပ် သိနိုင်မှာလဲ...” ယန်ချန်ယွမ်က ပခုံးတွန့်ကာ ပြောလိုက်၏။</p> <p>"ဒီလိုဆိုမှတော့ အခွင့်အရေးရှာပြီး ရွှမ်ဟွမ်ဂိုဏ်းကို ဝင်ရမှာပေါ့...”</p> <p>"မင်း စိတ်ချထားလိုက်… ငါ့အကူအညီပါရင် မင်း ရွှမ်ဟွမ်ဂိုဏ်းကို ဝင်ဖို့ဆိုတာ လက်ဖဝါးလှန်သလို လွယ်ကူသွားမှာပါ...” သားရဲတစ်သောင်းတာအိုအရှင်က ချက်ချင်းပင် ပြောလိုက်သည်။</p> <p>သူ၏ မျက်လုံးများတွင် ရူးသွပ်လုမတတ် စိတ်အားထက်သန်မှုများ ပြည့်နှက်နေပြီး ရွှမ်ဟွမ်ဂိုဏ်းသို့ ချက်ချင်းပင် ဝင်ရောက်ချင်စိတ်များ တဖွားဖွားပေါ်ပေါက်လာကာ ရွှမ်ဟွမ်ဘိုးဘေးက မိစ္ဆာသားရဲများကို ယဉ်ပါးအောင် လုပ်ဆောင်သည့် လျှို့ဝှက်ချက်ကို သိချင်နေမိတော့၏။</p> <p>အကယ်၍ ထိုလျှို့ဝှက်ချက်ကိုသာ သူသိရှိနိုင်မည်ဆိုပါက သူ၏ သားရဲထိန်းကျောင်းခြင်းတာအိုမှာ နောက်တစ်ဆင့်သို့ပင် တက်လှမ်းနိုင်လောက်ပေသည်။</p> <p>"ကောင်းပါပြီ...” ထိုစကားကို ကြားလိုက်ရသောအခါ ယန်ချန်ယွမ်မှာလည်း အလွန်စိတ်လှုပ်ရှားသွားသည်။</p> <p>ဤစီနီယာကြီးမှာ မည်မျှအထိ အစွမ်းထက်ကြောင်း သူကောင်းကောင်းသိထားသည် မဟုတ်ပါလော။</p> <p>အကယ်၍ ဤစီနီယာကြီးကသာ သူ့ကို ကူညီမည်ဆိုပါက သူရွှမ်ဟွမ်ဂိုဏ်းသို့ ဝင်ရောက်နိုင်ရေးမှာ သေချာပေါက် အောင်မြင်မည့်ကိစ္စပင် ဖြစ်လေသည်။</p> <p> ......</p> <p>ယခုအချိန်တွင်မူ ကျိုးစွေ့သည် ဓားပျံစီးကာ ပျံသန်းလာခဲ့၏။ ကောင်းကင်ယံထက်တွင် ငွေရောင်အလင်းတန်းတစ်ခုအဖြစ် ပြောင်းလဲသွားပြီး သူ၏ အရှိန်အဟုန်မှာ ကြယ်ပျံတစ်စင်းနှယ် မယုံနိုင်လောက်အောင် မြန်ဆန်လွန်းလှပေသည်။</p> <p>ဤတစ်ခေါက်ခရီးစဉ်၏ ခရီးပန်းတိုင်မှာ သူလူ့လောကသို့ ဝင်ရောက်လှည့်လည်ခြင်း၏ နောက်ဆုံးမှတ်တိုင်လည်း ဖြစ်၏။ ဤခရီးစဉ် ပြီးဆုံးသွားပြီးနောက်တွင် နတ်ဘုရားအသွင်ပြောင်းအဆင့်သို့ တက်လှမ်းရန် တံခါးပိတ်ကျင့်ကြံရတော့မည် ဖြစ်သည်။</p> <p>ထိုနောက်ဆုံးမှတ်တိုင်ဆိုသည်မှာ သဘာဝကျကျ သူအစကနဦး ကူးပြောင်းရောက်ရှိလာခဲ့သည့် နေရာဖြစ်သော အင်မော်တယ်ရှားကျွန်းပင် ဖြစ်လေသည်။</p> <p>ရိုးရိုးသားသားပြောရလျှင် နတ်ဘုရားအသွင်ပြောင်းအဆင့်သို့ မတက်လှမ်းမီ သူ၏ အကြီးမားဆုံးသော နောင်တမှာ ဤကျွန်းနှင့် ပတ်သက်နေသည်ဟု သူခံစားမိ၏။</p> <p>ယခင်က အင်မော်တယ်ရှားကျွန်းပေါ်တွင် ရုတ်တရက် ပေါ်ထွက်လာခဲ့သော သွေးနတ်ဆိုးသစ်ပင်ကြောင့်သာ သူသည် မွေးရပ်မြေကို စွန့်ခွာကာ အင်မော်တယ်ရှားကျွန်းမှ ထွက်ပြေးခဲ့ရခြင်း ဖြစ်သည်။</p> <p>ယခုအခါ သူ၏ အင်အားများမှာ အဆမတန် တိုးတက်လာခဲ့ပြီဖြစ်ကာ နတ်ဘုရားအသွင်ပြောင်းအဆင့် ရုပ်ခန္ဓာကျင့်ကြံသူတစ်ဦးပင် ဖြစ်နေခဲ့ပြီ မဟုတ်ပါလော။</p> <p>ထို့ကြောင့် ပြန်လာပြီး ဤပြဿနာကို ဖြေရှင်းရမည့်အချိန် ရောက်ပြီဟု သူခံစားမိလေသည်။ သေချာပေါက်ပင် ဤအကြိမ် လှုပ်ရှားမှုသည်လည်း အတိုင်းအတာတစ်ခုအထိ အန္တရာယ်ရှိနေပေသည်။</p> <p>မည်သို့ပင်ဖြစ်စေ ထိုသွေးနတ်ဆိုးသစ်ပင်တွင် မည်သို့သော အစွမ်းအစများ ရှိနေသည်ကို မည်သူကမျှ မသိနိုင်ချေ။ သို့သော် သူသည်လည်း အလုံးစုံ ပြင်ဆင်ထားပြီးဖြစ်ရာ အကယ်၍ တကယ်တမ်း ယှဉ်ပြိုင်၍မရနိုင်ပါက သူသည် တိုက်ရိုက်ပင် ထွက်ပြေးမည် ဖြစ်၏။</p> <p>မည်သို့ပင်ဖြစ်စေ ‘တည်နေရာပြောင်းကူ’၏ စွမ်းအားအကူအညီဖြင့်ဆိုလျှင် နတ်ဘုရားအသွင်ပြောင်းအဆင့် နတ်ဆိုးတစ်ကောင်ဖြစ်နေလျှင်တောင်မှ သူထွက်ခွာသွားမည်ကို တားဆီးနိုင်ရန် မတွေးထားသင့်ပေ။</p> <p>ရွှစ်…။</p> <p>အချိန်သိပ်မကြာလိုက်ဘဲ ကျိုးစွေ့သည် နောက်ဆုံးတွင် အင်မော်တယ်ရှားကျွန်းသို့ ရောက်ရှိသွားလေသည်။</p> <p>"ဒါက...”</p> <p>ထိုအခိုက်အတန့်တွင် ကျိုးစွေ့က မျက်လုံးများကို ကျဉ်းမြောင်းလိုက်ကာ အဝေးရှိ အင်မော်တယ်ရှားကျွန်းဆီသို့ လှမ်းကြည့်လိုက်၏။</p> <p>ကျွန်းတစ်ကျွန်းလုံးမှာ ဧရာမ သွေးရောင်သစ်ပင်ကြီးတစ်ပင်၏ ဖုံးလွှမ်းခြင်းကို ခံထားရပြီး ပတ်ဝန်းကျင်တစ်ခုလုံးတွင် အနီရောင်မြူခိုးများ ပြည့်နှက်နေကာ အလွှာသုံးထပ်ပါရှိသော သွေးရောင်အကာအကွယ် အတားအဆီးတစ်ခုကို ဖြစ်ပေါ်စေလျက်ရှိသည်။</p> <p>ထိုအကာအကွယ်ပေါ်တွင်လည်း သိပ်သည်းများပြားလှသော သွေးရောင်ရုန်းသင်္ကေတများ ဖုံးအုပ်နေသည်။ အဝေးမှကြည့်မည်ဆိုလျှင် ဧရာမ သွေးရောင်အသိုက်ကြီးတစ်ခုနှင့်ပင် တူနေချေသည်။</p> <p>မည်သူဖြစ်စေ ဝင်ရောက်သွားပါက သေချာပေါက် ဝါးမြိုခံရမည်ဖြစ်ရာ အမှန်တကယ်ပင် ကျောချမ်းဖွယ်ရာကောင်းလှ၏။ မိုင်တစ်သန်းပတ်လည်ရှိ ပင်လယ်နယ်မြေတစ်ခုလုံးမှာ အခြေခံအားဖြင့် သေဆုံးနေသည့်အလား တိတ်ဆိတ်ငြိမ်သက်နေပြီး မည်သည့်သက်ရှိသတ္တဝါမှ တည်ရှိမနေသည့်ပုံ ပေါ်လေသည်။</p> <p>ဝှမ်…။</p> <p>နောက်တစ်စက္ကန့်တွင် ကျိုးစွေ့သည် နှလုံးသားမျက်လုံး၏ စွမ်းအားကို အသုံးပြုလိုက်ကာ အင်မော်တယ်ရှားကျွန်းဆီသို့ ထိုးဖောက်ဝင်ရောက်သွားစေလိုက်၏။</p> <p>မျက်စိဖြင့်မရသော နှလုံးသားစွမ်းအားသည် ထိုသွေးရောင် အကာအကွယ်အတားအဆီးနှင့် သွေးရောင်မြူခိုးများကို အလွယ်တကူ ထိုးဖောက်သွားပြီး ကျွန်း၏ အတွင်းပိုင်းဆီသို့ ဝင်ရောက်သွားသည်။</p> <p>ထိုခဏတွင် ယင်းဧရာမ သွေးနတ်ဆိုးသစ်ပင်ကြီး၏ သစ်ကိုင်းများပေါ်၌ သွေးရောင်အရိုးစုများ တစ်ခုပြီးတစ်ခု တွဲလောင်းကျနေသည်ကို သူအံ့အားသင့်ဖွယ် အာရုံခံမိလိုက်သည်။ မြေပြင်ပေါ်တွင်လည်း မရေတွက်နိုင်သော သွေးရောင်အရိုးစုများ တိတ်ဆိတ်စွာ လဲလျောင်းနေကြသည်။ ကျွန်းတစ်ကျွန်းလုံးမှာ သေဆုံးနေသည့်အလား တိတ်ဆိတ်ငြိမ်သက်နေပြီး အသက်ဓာတ် အရှိန်အဝါအားလုံး ဆုံးရှုံးနေခဲ့ပြီ ဖြစ်သည်။</p> <p>လူသားများသာမက ကျွန်းပေါ်တွင် နေထိုင်ကြသော မိစ္ဆာသားရဲများ၊ သားငှက်တိရစ္ဆာန်များနှင့် အခြားသော သက်ရှိသတ္တဝါ အားလုံးပါ သေဆုံးသွားခဲ့ကြခြင်း ဖြစ်၏။</p> <p>အားလုံးမှာ အရိုးစုများအဖြစ်သို့ ပြောင်းလဲသွားခဲ့ကြလေသည်။ တစ်ခုတည်းသော သက်ရှိဆို၍ သွေးနတ်ဆိုးသစ်ပင်သာရှိပြီး ၎င်းက ဤသေမင်းနိုင်ငံ၏ တစ်ဦးတည်းသော အရှင်သခင် ဖြစ်ပေသည်။</p> <p>ဝိုးတဝါးအနေဖြင့် ထိုဧရာမ သွေးနတ်ဆိုးသစ်ပင်ကြီး၏ ခန္ဓာကိုယ်ပေါ်တွင် ကြောက်မက်ဖွယ်ရာ တစ္ဆေဝိညာဉ်များ တစ်ကောင်ပြီးတစ်ကောင် ပေါ်ထွက်နေသည့်ပုံပေါ်ပြီး ကုဋေကုဋာချီသော လူသားတို့၏ မကျွတ်မလွတ်သော ဝိညာဉ်များ ပေါင်းစပ်ပါဝင်နေသည့်အလား ဖြစ်နေချေသည်။</p> <p>၎င်းတို့သည် သွေးနတ်ဆိုးသစ်ပင်၏ ခန္ဓာကိုယ်ထဲမှ ရုန်းထွက်ချင်နေသည့်အလား နာကျင်စွာဖြင့် ရူးသွပ်မတတ် အော်ဟစ်နေကြသည်။ နှမြောစရာကောင်းသည်မှာ မည်သည့်အရာကမျှ အသုံးမဝင်ခဲ့ခြင်းပင်။</p> <p>ဆန့်ကျင်ဘက်အနေဖြင့် ဤတစ္ဆေဝိညာဉ်များ၏ စွမ်းအားက သွေးနတ်ဆိုးသစ်ပင်၏ စွမ်းအားကို အဆက်မပြတ် တိုးပွားလာစေခဲ့၏။</p> <p>သွေးနတ်ဆိုးသစ်ပင်၏ အကြိမ်ကြိမ် အသက်ရှူသွင်း ရှူထုတ်မှုနှင့်အတူ ဤသွေးရောင် အကာအကွယ်အတားအဆီးမှာလည်း အဆက်မပြတ် ကျယ်ပြန့်လာနေပြီး ပတ်ဝန်းကျင်ရှိ ပင်လယ်နယ်မြေများဆီသို့ ပျံ့နှံ့သွားလေသည်။</p> <p>ဤအတိုင်းသာ ဆက်သွားမည်ဆိုပါက မိုင်သန်းပေါင်းများစွာ ကျယ်ဝန်းသော ပင်လယ်နယ်မြေများအားလုံးသည် သွေးနတ်ဆိုးသစ်ပင်၏ ပိုင်နက်နယ်မြေ ဖြစ်လာတော့မည် ဖြစ်သည်။</p> <p>'တကယ်ပဲ နတ်ဘုရားအသွင်ပြောင်းအဆင့် နတ်ဆိုးတစ်ကောင် ဖြစ်နေတာကိုး…'</p> <p>ကျိုးစွေ့၏ သူငယ်အိမ်များမှာ ကျုံ့ဝင်သွားလေသည်။ သူသည် နှလုံးသားမျက်လုံး၏ စွမ်းအားကို အသုံးပြု၍ ထိုးထွင်းဆန်းစစ်လိုက်ရာ ဤသွေးနတ်ဆိုးသစ်ပင်၏ ကျင့်ကြံမှုမှာ နတ်ဘုရားအသွင်ပြောင်း ကနဦးအဆင့်သို့ ရောက်ရှိနေပြီဖြစ်ကြောင်း ချက်ချင်း အာရုံခံမိလိုက်၏။</p> <p>ထင်ရှားသည်မှာ ယခင်က သွေးနတ်ဆိုးသစ်ပင်နှင့် ပတ်သက်၍ သူ၏ ခန့်မှန်းချက်မှာ မှန်ကန်နေခဲ့ပြီး သမာရိုးကျ ဝိညာဉ်သန္ဓေသားအဆင့် နတ်ဆိုးတစ်ကောင် မဟုတ်ခဲ့ချေ။</p> <p>'အကယ်လို့ သွေးနတ်ဆိုးသစ်ပင်က တကယ်ပဲ နတ်ဘုရားအသွင်ပြောင်းအဆင့် နတ်ဆိုးတစ်ကောင်ဆိုရင် အတိတ်တုန်းက အင်မော်တယ်ရှားဂိုဏ်းကို တည်ထောင်ခဲ့တဲ့ ဘိုးဘေးက သူ့ကို ဘယ်လိုများ ချိတ်ပိတ်နိုင်ခဲ့တာလဲ…' ကျိုးစွေ့ တွေးလိုက်မိ၏။</p> <p>‘မဟုတ်မှလွဲရော နောက်ပိုင်းမှ အစွမ်းထက်လာပြီး နတ်ဘုရားအသွင်ပြောင်းအဆင့်ကို တက်လှမ်းသွားခဲ့တာများလား…'</p> <p>ဝုန်း…။</p> <p>ဤအခိုက်တန့်မှာပင် အင်မော်တယ်ရှားကျွန်း၏ ဗဟိုချက်တွင်ရှိသော သွေးနတ်ဆိုးသစ်ပင်သည် တစ်စုံတစ်ခုကို အာရုံခံမိသွားပုံရပြီး ကြမ်းကြုတ်ရက်စက်သော အရှိန်အဝါတစ်ခုက ချက်ချင်းပင် လွှမ်းမိုးလာကာ ကြောက်မက်ဖွယ်ကောင်းသော မုန်တိုင်းတစ်ခုကို ဖြစ်ပေါ်လာစေတော့၏။</p> <p>သွေးရောင်သစ်ကိုင်းများက လှံရှည်ကြီးများသဖွယ် ပြင်းထန်စွာ ထိုးနှက်တိုက်ခိုက်လာကြပြီး ၎င်းတို့အပေါ်တွင် လိမ်ကောက်နေသော သွေးရောင် ရုန်းသင်္ကေတများ ပေါ်ထွက်နေကာ ပုပ်သိုးဆွေးမြည့်ခြင်း၊ သတ်ဖြတ်ခြင်း၊ အမှောင်ထုနှင့် မကောင်းဆိုးဝါးစသော အရှိန်အဝါများ ပြည့်နှက်နေလေသည်။</p> <p>အကယ်၍ တိုက်ခိုက်ခံလိုက်ရသည်နှင့် ချက်ချင်းဆိုသလို မိမိ၏ ခန္ဓာကိုယ်ပေါ်ရှိ အသွေးအသားနှင့် ဝိညာဉ်ကို ဝါးမြိုခံရနိုင်ပေသည်။</p> <p>***</p> <p> </p>


Save