Book List

<h2 style="text-align: center;">အခန်း (၆၁၆)</h2> <h2 style="text-align: center;">အင်မော်တယ်ဂူဗိမာန်၊ အင်မော်တယ်ရုပ်ကြွင်းကို ရှာဖွေတွေ့ရှိခြင်းနှင့်</h2> <h2 style="text-align: center;">'အလင်းမျက်လုံးခုနစ်လုံးလျှို့ဝှက်ကျမ်း'ကို ရရှိခြင်း(၄)။</h2> <h2 style="text-align: center;">*</h2> <p>“နှစ်ပေါင်းသောင်းချီ ကြာပြီးနောက်မှာတော့ သွေးနတ်ဆိုးမျိုးစေ့ဟာ စွမ်းအင်တွေအများကြီးကို စုပ်ယူပြီး ပြန်လည်နိုးထလာခဲ့တယ်… ပြီးတော့ ပြန်လည်ရှင်သန်နိုင်ဖို့အတွက် သွေးအရိပ်ဘိုးဘေးရဲ့ ကိုယ်ပေါ်မှာ ကပ်ပါးလုပ်ပြီး လူသတ်ပွဲတွေ စတင်ခဲ့တာပဲ...”</p> <p>“သတ်တာဖြတ်တာ များလွန်းလို့ အင်မော်တယ်ရှားဂိုဏ်းရဲ့ ဘိုးဘေးတွေက ဝိညာဉ်သန္ဓေသားအဆင့်တွေနဲ့ ပူးပေါင်းပြီး သူ့ကို အင်မော်တယ်ရှားကျွန်းမှာ အစီအရင်နဲ့ ချိပ်ပိတ်ထားခဲ့တာပဲ...”</p> <p>“ဒါပေမဲ့ ကံကောင်းချင်တော့ သွေးနတ်ဆိုးသစ်ပင်ဟာ သူ ချိပ်ပိတ်ခံထားရတဲ့ နေရာမှာ အင်မော်တယ်တစ်ဦးရဲ့ အလောင်းကို ရှာတွေ့ခဲ့တာပဲ...”</p> <p>ကျိုးစွေ့သည် ဤသတင်းအချက်အလက်ကို သိရှိလိုက်ရသဖြင့် အလွန်အမင်း တုန်လှုပ်သွားပြီး မျက်ဝန်းများ ကျဉ်းမြောင်းသွားကာ မယုံနိုင်အောင် ဖြစ်သွားရ၏။</p> <p>အင်မော်တယ်တစ်ဦး၏ ရုပ်ကြွင်းတော်ကို ရှာတွေ့ခဲ့ခြင်း။</p> <p>ဤအချက်ကို သိရှိလိုက်ရသဖြင့် ကျိုးစွေ့၏ စိတ်ထဲတွင် ပြောမပြတတ်အောင် တုန်လှုပ်သွားရ၏။ အဘယ်ကြောင့်ဆိုသော် ရှေးဟောင်းခေတ်က နတ်ဆိုးမျိုးနွယ်စုများ ကျင့်ကြံခြင်းလောကသို့ အလုံးအရင်းဖြင့် ကျူးကျော်ဝင်ရောက်လာရခြင်းမှာ ကျင့်ကြံခြင်းလောကတွင် ပုန်းကွယ်နေသော အင်မော်တယ်ရုပ်ကြွင်းတော်များကို ရှာဖွေရန်ဖြစ်သောကြောင့်ပင်။ ထို့ကြောင့်လည်း မကြုံစဖူးသော စစ်ပွဲကြီးများ ဖြစ်ပွားခဲ့ခြင်းဖြစ်၏။</p> <p>သို့သော်လည်း မည်သူမျှ အင်မော်တယ်ရုပ်ကြွင်းတော်ကို ရှာမတွေ့ခဲ့ကြပေ။ ဤသည်မှာ ကျင့်ကြံခြင်းလောက၏ အကြီးမားဆုံးသော လျှို့ဝှက်ချက်များထဲမှ တစ်ခုပင်ဖြစ်၏။</p> <p>သို့သော် မည်သူက ထင်ထားမည်နည်း။ အင်မော်တယ်ရုပ်ကြွင်းတော်ကို သွေးနတ်ဆိုးသစ်ပင်က ရှာတွေ့သွားခဲ့ပြီး ၎င်းမှာလည်း သွေးနတ်ဆိုးသစ်ပင် ချိပ်ပိတ်ခံထားရသည့် နေရာတွင်ပင် ဖြစ်နေချေသည်။</p> <p>“အင်မော်တယ်ရုပ်ကြွင်းတော် ရှိနေတဲ့ နေရာက အင်မော်တယ်ရှားကျွန်းပဲ...”</p> <p>“အဲဒါက အင်မော်တယ်ရှားကျွန်းရဲ့ မြေအောက်အနက်ပိုင်းက ပုံရိပ်ယောင် ဟင်းလင်းပြင်ထဲမှာ ပုန်းကွယ်နေတာပဲ...”</p> <p>“သွေးနတ်ဆိုးသစ်ပင်ရဲ့ အမြစ်တွေက ကျွန်းရဲ့ အနက်ပိုင်းအထိ ပြန့်နှံ့သွားပြီး ပုံရိပ်ယောင် ဟင်းလင်းပြင်တစ်ခုကို အာရုံခံမိသွားတာ… အဲဒီမှာပဲ အင်မော်တယ်ရုပ်ကြွင်းတော် ရှိနေတဲ့နေရာကို ရှာတွေ့သွားပြီး သူ အရမ်း ဝမ်းသာသွားခဲ့တာပဲ...”</p> <p>“နှမြောစရာကောင်းတာက သူက ချိပ်ပိတ်ခံထားရတဲ့ အခြေအနေမှာ ရှိနေလို့ အင်မော်တယ်ရုပ်ကြွင်းတော်ကို တွေ့နေရပေမဲ့ အဲဒီ လျှို့ဝှက်ဟင်းလင်းပြင်ထဲကို မဝင်နိုင်ခဲ့ဘူး… မြင်သာမြင် မကြင်ရဖြစ်ပြီး ဘာမှ မလုပ်နိုင်ခဲ့ဘူး...”</p> <p>“ဒါတောင်မှ အင်မော်တယ်ရုပ်ကြွင်းတော်ရှိတဲ့ ဟင်းလင်းပြင်ထဲကနေ ယိုစိမ့်ထွက်လာတဲ့ အင်မော်တယ်အရှိန်အဝါတွေကို ရံဖန်ရံခါ စုပ်ယူနိုင်ခဲ့လို့ သူ့ရဲ့ ကျင့်ကြံဆင့်က အများကြီး တိုးတက်လာခဲ့တာပဲ...”</p> <p>“ဒါကြောင့် အစီအရင်ပျက်သွားတာနဲ့ သူဟာ အပြည့်အဝ လွတ်မြောက်လာပြီး ကျင့်ကြံဆင့်တွေလည်း တရစပ် မြင့်တက်လာခဲ့တာ...”</p> <p>“ဝိညာဉ်သန္ဓေသားအဆင့်ကို ပြန်ရောက်ရုံတင်မကဘဲ နတ်ဘုရားအသွင်ပြောင်းအဆင့်အထိတောင် ပြန်ရောက်လာခဲ့တယ်...”</p> <p>“အဲဒီ လျှို့ဝှက်ဟင်းလင်းပြင်ကို ဖျက်ဆီးဖို့အတွက် သွေးနတ်ဆိုးသစ်ပင်က အင်မော်တယ်ရှားကျွန်းကို သိမ်းပိုက်ပြီး သူ့ရဲ့ နယ်မြေအဖြစ် သတ်မှတ်ခဲ့တာပဲ...”</p> <p>“ဒါကြောင့် နှစ်ပေါင်းနှစ်ရာကျော်လုံးလုံး သူဟာ အင်မော်တယ်ရှားကျွန်းကနေ ထွက်မသွားခဲ့သလို ချန်လန်ပင်လယ်ဒေသမှာလည်း သောင်းကျန်းတာမျိုး မလုပ်ခဲ့တာပဲ...”</p> <p>“အင်မော်တယ်ရုပ်ကြွင်းတော်နဲ့ နှိုင်းယှဉ်ရင် သာမန်လူသားတွေက ဘာမှ မဟုတ်ဘူးလေ...”</p> <p>“လောကတစ်ခုလုံးက လူသားအားလုံးကို သတ်ပစ်တာထက် အင်မော်တယ်ရုပ်ကြွင်းတော် တစ်ခုတည်းက ပိုပြီး တန်ဖိုးရှိတာပဲ...”</p> <p>“အကယ်၍သာ ဒီအင်မော်တယ်ရုပ်ကြွင်းတော်ကို ဝါးမြိုနိုင်ခဲ့ရင် သွေးနတ်ဆိုးသစ်ပင်ရဲ့ ကျင့်ကြံဆင့်ဟာ မကြုံစဖူးတဲ့ အဆင့်အထိ မြင့်တက်သွားမှာပဲ...”</p> <p>ကျိုးစွေ့က မျက်မှောင်ကြုတ်လိုက်၏။ သူ၏ စိတ်ထဲတွင် အလွန်အမင်း တုန်လှုပ်သွားရသည်။ သူသည်လည်း သွေးနတ်ဆိုးသစ်ပင်က ဤကဲ့သို့သော ထိတ်လန့်ဖွယ် လျှို့ဝှက်ချက်ကို သိရှိထားပြီး အင်မော်တယ်ရုပ်ကြွင်းတော်ကို ရှာတွေ့ထားလိမ့်မည်ဟု မမျှော်လင့်ထားခဲ့ချေ။</p> <p>အကယ်၍သာ ထိုလျှို့ဝှက်ဟင်းလင်းပြင်၌ အားကောင်းသော တားမြစ်ချက်များနှင့် အစီအရင်များ မရှိခဲ့ပါက ၎င်းသည် အင်မော်တယ်ရုပ်ကြွင်းတော်ကို ဝါးမြိုကာ မကြုံစဖူးသော နတ်ဆိုးကြီးအဖြစ် ဆင့်ကဲပြောင်းလဲသွားပြီးဖြစ်လောက်‌သည်။</p> <p>“ဒါကြောင့်လည်း 'ကံကြမ္မာကူ'က နတ်ဘုရားအသွင်ပြောင်းအဆင့်ကို မတက်လှမ်းခင် အင်မော်တယ်ရှားကျွန်းကို တစ်ခေါက်ပြန်လာဖို့ ငါ့ကို သတိပေးခဲ့တာကိုး...”</p> <p>“သွေးနတ်ဆိုးသစ်ပင်ကို အရင်ဆုံး ရှင်းပစ်ရမယ်...”</p> <p>“ဖြစ်နိုင်တာက ဒါဟာ ကံကြမ္မာစွမ်းအားရဲ့ လမ်းညွှန်မှု ဒါမှမဟုတ် ကောင်းကင်တာအိုရဲ့ ကြိုတင်သတိပေးချက်ပဲ ဖြစ်ရမယ်… ဒါကြောင့်လည်း ငါ ဒီကို ပြန်လာပြီး ဒီကမ္ဘာပျက်ကပ်ဘေးကို ကြိုတင်ဖြေရှင်းနိုင်ခဲ့တာပဲ...”</p> <p>ကျိုးစွေ့က မေးစေ့ကို ပွတ်သပ်လိုက်သည်။</p> <p>ယခုအချိန်တွင် သူသည် 'ကံကြမ္မာကူ'၏ အစွမ်းထက်ပုံကို သဘောပေါက်သွားပြီဖြစ်၏။ ပုံမှန်အားဖြင့်ဆိုလျှင် ‘ပစ္စည်းရှာဖွေကူ’ပင် အင်မော်တယ်ရုပ်ကြွင်းတော်၏ တည်နေရာကို ရှာဖွေနိုင်မည်မဟုတ်ချေ။</p> <p>အဘယ်ကြောင့်ဆိုသော် ဤကဲ့သို့သော ရတနာများ၏ အဆင့်အတန်းမှာ အလွန်မြင့်မားလွန်းပြီး ‘ပစ္စည်းရှာဖွေကူ’၏ စွမ်းဆောင်ရည်ထက် ကျော်လွန်နေသောကြောင့်ဖြစ်၏။ သို့သော် ကံကြမ္မာစွမ်းအားသည်မူ ဤလောကရှိ အခွင့်အလမ်းများစွာကို ရှာဖွေရန် သူ့ကို လမ်းပြပေးနိုင်သည်။ အင်မော်တယ်ရုပ်ကြွင်းတော်သည်ပင် ထိုအခွင့်အလမ်းများထဲမှ တစ်ခုသာဖြစ်၏။</p> <p>ယခုအခါ သူသည် ကျင့်ကြံခြင်းလောက၏ ကံကြမ္မာအရှင်သခင် ဖြစ်နေပြီဖြစ်ရာ အဆင့်မြင့်ရတနာများနှင့် အခွင့်အရေးများစွာကို ရှာဖွေတွေ့ရှိနိုင်ခြင်းမှာ မဆန်းတော့ချေ။</p> <p>ကျိုးစွေ့အနေဖြင့် ရွှမ်ဟွမ်ဂိုဏ်းကို တည်ထောင်ခဲ့ပြီး ကံကြမ္မာစွမ်းအား ကြီးမားသော တပည့်များစွာကို လက်ခံခဲ့သောကြောင့် သူ၏ကံကြမ္မာမှာ အဆမတန် တိုးတက်လာခဲ့ခြင်းဖြစ်၏။ ထို့ကြောင့်ပင် သူသည် ကျင့်ကြံခြင်းလောက၌ ကံကြမ္မာအကောင်းဆုံးသော ကျင့်ကြံသူဖြစ်လာပြီး အင်မော်တယ်ရုပ်ကြွင်းတော်ရှိရာကို ရှာတွေ့နိုင်ခဲ့ခြင်းဖြစ်၏။</p> <p>မည်သည့်အရာကိုမဆို ဘေးကင်းစွာဖြင့် အောင်မြင်အောင် လုပ်ဆောင်နိုင်ရုံမျှမက သာမန်နေရာတစ်ခုသို့ သွားလျှင်ပင် ရတနာများကို ရှာတွေ့နိုင်ပေသည်။ ဤသည်မှာ ကံကြမ္မာအရှင်သခင်၏ အခွင့်ထူးခံပင်ဖြစ်၏။</p> <p>ဝှစ်…။</p> <p>ထိုသို့တွေးတောရင်း ကျိုးစွေ့သည် ကိုယ်ဟန်တစ်ချက် လှုပ်ရှားလိုက်ကာ သွေးနတ်ဆိုးသစ်ပင်ကြောင့် ဖြစ်ပေါ်လာသော တွင်းနက်ကြီးထဲသို့ ဆင်းသက်လိုက်သည်။ တွင်းနက်ကြီးအတွင်း၌ 'သွေးနတ်ဆိုးမျိုးစေ့' တစ်ခု ကျန်ရှိနေသည်ကို သူ ချက်ချင်းပင် အာရုံခံမိလိုက်၏။ ထိုမျိုးစေ့မှ ဆိုးယုတ်ညစ်ထေးပြီး မှောင်မိုက်သော သွေးအနံ့အသက်များ ထွက်ပေါ်နေကာ မျက်နှာပြင်ထက်၌လည်း သွေးနတ်ဆိုးရုန်းသင်္ကေတများစွာ ထင်ဟပ်နေလေသည်။</p> <p>သွေးနတ်ဆိုးသစ်ပင်သည် သေဆုံးခါနီးအချိန်၌ 'သွေးနတ်ဆိုးပြန်လည်မွေးဖွားခြင်း' အတတ်ကို တစ်ဖန်အသုံးပြုကာ 'သွေးနတ်ဆိုးမျိုးစေ့' အဖြစ် ပြောင်းလဲသွားခဲ့ခြင်းဖြစ်ကြောင်း သိသာလှ‌သည်။ အကယ်၍ ကျိုးစွေ့သာ သွေးနတ်ဆိုးသစ်ပင်၏ မှတ်ဉာဏ်များကို မရရှိခဲ့ပါက နောင်နှစ်ပေါင်းသောင်းချီ ကြာသောအခါ သွေးနတ်ဆိုးသစ်ပင်သည် တစ်ဖန်ပြန်လည်၍ ရှင်သန်လာပေလိမ့်မည်။</p> <p>“ဒီနတ်ဆိုးတွေက တကယ်ကို သတ်ရခက်တာပဲ… သေသွားရင်တောင် ပြန်ရှင်နိုင်တဲ့ နည်းလမ်းတွေ ရှိနေကြသေးတယ်...”</p> <p>“ကံကောင်းလို့ သူ့ရဲ့ လျှို့ဝှက်ချက်ကို ကြိုသိလိုက်ရတာ… မဟုတ်ရင် နောင်တစ်ချိန်မှာ ဒီသွေးနတ်ဆိုးသစ်ပင်က တစ်ကျော့ပြန် သောင်းကျန်းဦးမှာပဲ...”</p> <p>ကျိုးစွေ့က လက်တစ်ချက်ဝှေ့ယမ်းလိုက်ပြီး ထို 'သွေးနတ်ဆိုးမျိုးစေ့' ကို ချက်ချင်း သိမ်းဆည်းလိုက်၏။ သူသည် ယခုလောလောဆယ်တွင် ဤမျိုးစေ့ကို ဖျက်ဆီးရန် အစီအစဉ်မရှိသေးဘဲ နောင်တစ်ချိန်တွင် အသုံးဝင်လာနိုင်သည်ဟု ယူဆထားသည်။ ဖျက်ဆီးလိုပါကလည်း အချိန်မရွေး လုပ်ဆောင်နိုင်သည် မဟုတ်ပါလော။</p> <p>ဝှစ်…။</p> <p>သွေးနတ်ဆိုးသစ်ပင် ချန်ထားခဲ့သော ဘေးအန္တရာယ်ကို ဖြေရှင်းပြီးနောက် ကျိုးစွေ့သည် တွင်းနက်ကြီး၏ အောက်ခြေအထိ ဆက်လက်ဆင်းသက်လိုက်သည်။ သူသည် အနက်ပေပေါင်း ထောင်ချီအထိ ဆင်းသက်ခဲ့ရပြီးနောက် နောက်ဆုံးတွင် မြေအောက်အနက်ဆုံးပိုင်းသို့ ရောက်ရှိသွားလေသည်။</p> <p>ထိုနေရာမှာ ယခင်က သွေးနတ်ဆိုးသစ်ပင်၏ အမြစ်များ တည်ရှိခဲ့သော နေရာဖြစ်သလို အင်မော်တယ်ရုပ်ကြွင်းတော်ရှိသော လျှို့ဝှက်ဟင်းလင်းပြင် တည်ရှိရာနေရာလည်းဖြစ်၏။</p> <p>ဝုန်း…။</p> <p>ကျိုးစွေ့က နှလုံးသားမျက်လုံးစွမ်းအားကို အသုံးပြု၍ ပတ်ဝန်းကျင်ဟင်းလင်းပြင်ကို စစ်ဆေးလိုက်ရာ မြေအောက်အနက်ပိုင်း၌ တကယ့်ကိုပင် အထူးခြားဆုံးသော ပုံရိပ်ယောင်ဟင်းလင်းပြင်တစ်ခု ရှိနေသည်ကို တွေ့ရှိလိုက်ရသည်။ သူ၏ရှေ့မှောက်တွင် အဖြူရောင် ဝင်ပေါက်တံခါးကြီးတစ်ချပ်ပေါ်လာပြီး ထိုတံခါးပေါ်တွင် ထူထပ်သိပ်သည်းလှသော လျှို့ဝှက်တားမြစ်ချက်များနှင့် အစီအရင်များစွာ ရေးထိုးထားလေသည်။ တံခါးကြီး၏ ပတ်ဝန်းကျင်၌ နက်ရှိုင်းပြီး ခန့်မှန်းရခက်သော အရှိန်အဝါများ ဖုံးလွှမ်းနေ၏။</p> <p>ဤအဖြူရောင် တံခါးကြီးကို ဖြတ်ကျော်နိုင်မှသာလျှင် ထိုထူးခြားသော ဟင်းလင်းပြင်ထဲသို့ ဝင်ရောက်နိုင်မည်ဖြစ်ကြောင်း ထင်ရှားနေသည်။ သို့သော် ဤတံခါးကြီးကို ဖြတ်ကျော်ရန်မှာမူ ထင်သလောက် မလွယ်ကူလှပေ။</p> <p>ဟိုးယခင်က သွေးနတ်ဆိုးသစ်ပင်သည် နည်းလမ်းအမျိုးမျိုးဖြင့် ကြိုးပမ်းခဲ့သော်လည်း ဤဟင်းလင်းပြင်တံခါးကို ဖွင့်နိုင်ခြင်းမရှိခဲ့ပေ။ သို့မဟုတ်ပါက ၎င်းသည် ထိုအင်မော်တယ်အလောင်းကို ဝါးမျိုခဲ့သည်မှာ ကြာလှပြီဖြစ်၏။</p> <p>"ခဏနေဦး... ငါ ဒီတံခါးကို ဖွင့်နိုင်ပုံရတယ်..."</p> <p>နိမိတ်ကောင်းတစ်ခုကို ရရှိလိုက်သကဲ့သို့ ကျိုးစွေ့၏စိတ်ထဲတွင် ရုတ်တရက် ဉာဏ်အလင်းပွင့်သွား၏။ 'ကံကြမ္မာကူ'ထံမှ သတင်းစကားတစ်ခုက စီးဝင်လာသည်ကို သူခံစားလိုက်ရပြီးနောက် မိမိနှင့် ဤတံခါးကြားတွင် ရင်းနှီးကျွမ်းဝင်သော အငွေ့အသက်တစ်ခု ထွက်ပေါ်နေသည်ကို သတိပြုမိလိုက်သည်။</p> <p>နောက်တစ်စက္ကန့်တွင် သူ၏နှလုံးသားမျက်လုံးစွမ်းအားဖြင့် ထိုအဖြူရောင်တံခါးကို အသာအယာ ထိတွေ့လိုက်၏။</p> <p>ဝုန်း...။</p> <p>ထိုခဏ၌ပင် အဖြူရောင်တံခါးသည် တစ်စုံတစ်ခုကို အာရုံခံမိသွားပုံရပြီး ချက်ချင်းပင် ကြီးမားသော ဝဲဂယက်ကြီးတစ်ခုအဖြစ် ပြောင်းလဲသွားချေသည်။</p> <p>ရွှစ်…။</p> <p>ကျိုးစွေ့သည် ခုခံနိုင်စွမ်းမရှိသော အားအင်တစ်ရပ်ကို ခံစားလိုက်ရပြီး တစ်ကိုယ်လုံး ချက်ချင်းပင် စုပ်ယူခြင်းခံလိုက်ရ၏။ လုံးဝ ပြန်လည်ခုခံနိုင်စွမ်း မရှိခဲ့ပေ။ ဤဟင်းလင်းပြင်စွမ်းအားမှာ ဤကမ္ဘာ၏ အကန့်အသတ်ကိုပင် ကျော်လွန်နေလေသည်။ မကြာမီမှာပင် ကျိုးစွေ့သည် ကမ္ဘာငယ်လေးတစ်ခုအတွင်းသို့ ရောက်ရှိနေသည်ကို တွေ့လိုက်ရ၏။</p> <p>သူ၏ခြေထောက်နှစ်ဖက်မှာ မာကျောသော မြေသားပေါ်တွင် နင်းထားမိလျက်သားရှိနေသည်။ သူသည် ရှေးဟောင်းဆန်သော ခြံဝင်းတစ်ခုထဲသို့ ရောက်ရှိနေခြင်းဖြစ်ပြီး အဝေးရှိ ကွင်းပြင်လွတ်တစ်ခုတွင် “ရှန်းဟိုင်” ဟူသော စာလုံးနှစ်လုံး ရေးထိုးထားသည့် ကျောက်စာတိုင်တစ်ခု စိုက်ထူထားသည်ကို တွေ့ရလေသည်။</p> <p>ထိုကျောက်စာတိုင်ထံမှ ခန့်မှန်းရခက်သော အ‌ရှိန်အဝါများ ထွက်ပေါ်နေပြီး ပတ်ဝန်းကျင်တွင်မူ စိမ်းလန်းစိုပြေသော သစ်ပင်ပန်းမန်များ ပေါက်ရောက်နေသည်။</p> <p>သို့သော် ကျိုးစွေ့ကို ပို၍အံ့အားသင့်စေသည်မှာ ရှေ့ဘက်ရှိ ကွင်းပြင်လွတ်တစ်ခုတွင် အဖြူရောင်တာအိုဝတ်ရုံ ဝတ်ဆင်ထားသော အဖိုးအိုတစ်ဦးမှာ အေးချမ်းစွာ လဲလျောင်းနေခြင်းပင် ဖြစ်၏။ ထိုသူ့ထံမှ ပြင်းထန်သော အင်မော်တယ်အနှစ်သာရ အငွေ့အသက်များ ထွက်ပေါ်နေချေသည်။</p> <p>***</p> <p> </p>


Save