Book List

<h2 style="text-align:center">အခန်း (၁၆၀၆)</h2> <h2 style="text-align:center">ကောင်းကင်နတ်ဘုရားအဆင့်၏အရှင်သခင်</h2> <h2 style="text-align:center">*</h2> <p> </p> <p> </p> <p> </p> <p> </p> <p>ရူယိရွှေတုတ်၏ ကြောက်မက်ဖွယ်စွမ်းအားက ရောင်စဉ်ငါးမျိုး အလင်းတန်းများကြားတွင် အက်ကြောင်းတစ်ခု ဖြစ်ပေါ်သွားစေသည်။</p> <p>ထိုအက်ကြောင်းအတွင်းမှ ပုံရိပ်များ တစ်ခုပြီးတစ်ခု ထွက်ပေါ်လာသည်။</p> <p>မဟာမာရူယိ၏ ရောင်စဉ်ငါးမျိုး အလင်းတန်းအောက်တွင် ပိတ်မိနေခဲ့သော မြောက်ပိုင်းကြယ်စင်ဧကရာဇ်၊ တောင်ပိုင်းချန်စန်းဧကရာဇ်တို့သာမက ခြင်္သေ့နတ်ဘုရားနှင့် ခေါင်းကိုးလုံးပိုးကောင်တို့ပင် ထိုအက်ကြောင်းမှတစ်ဆင့် လွတ်မြောက်လာကြသည်။</p> <p>သူတို့အားလုံး နောက်သို့လှည့်ကြည့်လိုက်တော့ နတ်ဘုရားအလင်းပင်လယ်ကြီးကို ဆက်လက်ဖြိုခွင်းနေသည့် ပုံရိပ်တစ်ခုကိုတွေ့လိုက်ရပြီး အံ့သြမှင်တက်သွားကြသည်။</p> <p>ဘေးမှကြည့်နေသော အခြားသူများမှာလည်း မှင်တက်လျှက် ရှိကြသည်ပင်။</p> <p>နတ်ဘုရားသုတ်သင်အစီအရင်ထဲတွင် ရန်ကျောက်ကဲက စကားဆိုလိုက်သည်။</p> <p>“ဖုရှီဗျပ်စောင်းက အလိုအလျောက် အလုပ်လုပ်တာမျိုး မဟုတ်ဘူး ၊ တုံ့ပြန်မှုတစ်ခုခုရှိလာမှ အစွမ်းပြတာ ၊ ဒါကြောင့် တာအိုအဓိပတိတစ်ပါးကို ခဏလောက် တားဆီးထားနိုင်ပေမယ့် ဒီနေရာတစ်ခုလုံးကို ချိတ်ပိတ်ထားနိုင်မှာ မဟုတ်ဘူး ၊ ဒါကြောင့်လည်း တခြားကောင်းကင်နတ်ဘုရားအဆင့် ကျွမ်းကျင်သူတွေ ဒီကိုရောက်လာကြတာပေါ့”</p> <p>သူက မချိပြုံးပြုံးလိုက်ရင်း...</p> <p>“ငါတို့ကိုကူညီဖို့ မြောက်ပိုင်းကြယ်စင်ဧကရာဇ် ရောက်လာပေမယ့် သူတို့ဘက်ကလည်း မဟာမာရူယိ ရောက်လာခဲ့တယ်”</p> <p>ခုန်ရွှမ်းက တိတ်ဆိတ်စွာပင် ရန်ကျောက်ကဲကို စူးစိုက်ကြည့်နေသည်။</p> <p>ထို့နောက် သူက အလင်းပင်လယ် အက်ကွဲကြောင်းကို ပြန်လည်ပြုပြင်ပြီး သောင်းကျန်းနေသည့် မျောက်မင်းကိုနှိမ်နင်းရန် ရောင်စဉ်ငါးမျိုးအလင်းတန်းများကို အရှိန်အဟုန်ဖြင့် လှည့်ပတ်လိုက်သည်။</p> <p>ရန်ကျောက်ကဲက အေးဆေးစွာ ပြုံးလိုက်ပြီး...</p> <p>“လွန်ခဲ့တဲ့ နှစ်ပေါင်း(၁၀၀)လောက်တုန်းက ငါ အမတခုံရုံးကို သွားတိုက်ခဲ့တယ် ၊ ပြန်စဉ်းစားကြည့်ရင် အဲဒီတုန်းက ငါ ပြတ်ပြတ်သားသား ဆုံးဖြတ်ခဲ့လို့ အမတခုံရုံးကို အငိုက်မိသွားစေခဲ့တာ ၊ ဒါက တကယ့်ကို ကံကောင်းခဲ့တာပဲ”</p> <p>သူက ဆက်ပြောလိုက်သည်။</p> <p>“အဲဒီတုန်းက မင်းသာရှိနေမယ်ဆိုရင် ငါ ထွက်ပြေးရုံကလွဲပြီး တခြားနည်းလမ်းရှိမှာ မဟုတ်ဘူး ၊ အဲဒါဆို သစ္စာဖောက်ကိုသတ်ပြီး မိတ်ဆွေတွေအတွက် လက်စားချေပေးနိုင်မှာတောင် မဟုတ်ဘူး”</p> <p>မဟာမာရူယိက...</p> <p>“ဒီနေ့ ထူးခြားမှုတစ်ခုခုဖြစ်သွားမယ်ဆိုရင်တော့... မင်းတို့အားလုံး ဒီနေရာမှာ အဆုံးသတ်သွားရလိမ့်မယ်”</p> <p>စကားဆုံးသွားသည်နှင့် ‌ရောင်စဉ်ငါးမျိုးနတ်ဘုရားအလင်းတန်းများ ပိုမိုအားကောင်းလာသည်။</p> <p>ကောင်းကင်ယံတစ်ခုလုံး ဖုံးလွှမ်းလုနီးပါးဖြစ်သွားသော အလင်းပင်လယ်ပြင်ကြီးက ရွှေရောင်ပုံရိပ်ကို ပြန်လည်နှစ်မြုပ်ပစ်တော့မည့်အလားပင်။</p> <p>ရန်ကျောက်ကဲက အကြောက်တရားကင်းမဲ့သော စူးရှသည့်မျက်ဝန်းများဖြင့် မဟာမာရူယိကို ကြည့်လိုက်သည်။</p> <p>“ဟုတ်တယ်... ၊ ဒီနေ့ တစ်ခုခုထူးခြားတာတော့ အမှန်ပဲ ၊ ဘာပဲဖြစ်ဖြစ် ငါတို့အားလုံး တိုးတက်လာကြတာပဲလေ”</p> <p>သူက လက်တစ်ချောင်းကို ချိုးလိုက်ပြီး...</p> <p>“ဥပမာပြောရရင်... ငါကိုယ်တိုင်ဝင်တိုက်စရာ မလိုဘူး ၊ နက်ရှိုင်းချီစွမ်းအား(၃)ခုနဲ့တင် ချီထျန်းမဟာသူတော်စင်ရဲ့ အစစ်အမှန်ရုပ်ခန္ဓာကို ထိန်းချုပ်ထားနိုင်တယ် ၊ ပြီးတော့... ချီထျန်းမဟာသူတော်စင်ရဲ့ အစစ်အမှန်ရုပ်ခန္ဓာကို အသွင်ပြောင်းနိုင်တဲ့အချိန်ကလည်း အရင်ကထက်ပိုပြီး ကြာရှည်ခံနိုင်လာပြီ ၊ နောက်တစ်ချက်က...”</p> <p>ရန်ကျောက်ကဲက အေးဆေးသည့်လေသံဖြင့် ဆက်ပြောလိုက်သည်။</p> <p>“နောက်တစ်ချက်က... ဒီစကားကတော့ မင်းတို့ကို နည်းနည်းပါးပါး စိတ်ဒဏ်ရာရစေနိုင်မယ်ထင်တယ် ၊ ချီထျန်းမဟာသူတော်စင် တန်ခိုးစွမ်းအား အထွတ်ထိပ်အဆင့်မှာတုန်းက ဘယ်လောက်စွမ်းအားကြီးခဲ့လဲဆိုတာ... မင်းတို့အားလုံး အတိတ်ကကိစ္စတွေ ပြန်အမှတ်ရလာအောင် ငါက ကူညီပေးနိုင်တယ်”</p> <p>ရန်ကျောက်ကဲ၏စကား ဆုံးသွားသည်နှင့် ရောင်စဉ်ငါးမျိုးအလင်းတန်းများအတွင်းရှိ မျောက်မင်းထံမှ ကြုံးဝါးသံတစ်ချက် ထွက်ပေါ်လာပြီး သူ၏ခန္ဓာကိုယ်ပတ်ပတ်လည်တွင် ရွှေရောင်တိမ်တိုက်များ ရစ်သိုင်းသွားသည်။</p> <p>ကြုံးဝါးသံကြီးနှင့်အတူ မျောက်မင်း၏ခန္ဓာကိုယ်က ပေါက်ကွဲထွက်လုမတတ် ကြီးမားလာသည်။</p> <p>တစ်ချိန်တည်းမှာပင် ဧရာမမျောက်ကြီး၏လည်ပင်းမှ ဦးခေါင်းနှစ်လုံးထပ်မံထွက်ပေါ်လာပြီး ခန္ဓာကိုယ်ဘေးမှ လက်(၄)ဖက် ထပ်မံ ပေါ်ထွက်လာသည်။</p> <p>ဦးခေါင်း(၃)လုံးနှင့် လက်(၆)ဖက် ဖြစ်လေသည်။</p> <p>တူညီသောမျက်နှာ ၊ တူညီသော ရွှေမျက်စံမီးမျက်စိ...။</p> <p>ပြီးတော့ တူညီသော ရူယိရွှေတုတ်...။</p> <p>ရူယိရွှေတုတ်သည်လည်း (၃)ခုကွဲထွက်သွားပြီး မျောက်မင်းက ရွှေတုတ်များကိုဝှေ့ယမ်းလိုက်ရာ ပတ်ဝန်းကျင်တစ်ခုလုံး အစအနမကျန်အောင် ပျက်ဆီးကုန်တော့၏။ </p> <p>မျောက်မင်း၏ ရွှေမျက်စံမီးမျက်စိ (၃)စုံက နေဝန်းထက်ပင် ပိုမိုတောက်ပနေပြီး သူ၏ ဧရာမခန္ဓာကိုယ်ကြီးက စကြာဝဠာတစ်ခုလုံးအား ဖုံးလွှမ်းထားလေရာ လူ့ဘုံကိုနင်းခြေပြီး ငရဲဘုံ၏ ဝိညာဉ်မြစ်ထက်တွင် မတ်တတ်ရပ်နေသည့်အလား ထင်မှတ်ရသည်။</p> <p>မျောက်မင်းက ခါးကိုဆန့်လိုက်ပြီး ဦးခေါင်း(၃)လုံးက အထက်သို့ မော့ကြည့်လိုက်သည်။</p> <p>သူ၏အကြည့်များက မိုးကောင်းကင်အတားအဆီးများကိုဖြတ်ကျော်ကာ အမြင့်ဆုံးသော ကောင်းကင်ဘုံအလွှာအထိ ရောက်ရှိသွားသည်။</p> <p>ရူယိရွှေတုတ်(၃)လက်လုံးက တပြိုင်တည်းရိုက်ခတ်လိုက်ရာ ရိုက်ချက်ဖြတ်သန်းသွားရာနေရာတိုင်းတွင် ဖန်ဆင်းခြင်းလက်ရာများ ပျောက်ကွယ်သွားပြီး ကနဦးကောင်းကင် အပိုင်းပိုင်းမကွဲခင်က တည်ရှိခဲ့သော မြေ ၊ ရေ ၊ လေ ၊ မီး မူလဒြပ်စင်များသာ ကျန်ရစ်တော့သည်။</p> <p>ဒြပ်စင်စွမ်းအားများက ကြောက်မက်ဖွယ်ရာ ထကြွသောင်းကျန်းနေပြီး ဗလာနယ်တစ်ခုလုံး ပရမ်းပတာဖြစ်ကာ မှောင်အတိကျသွားသည်။</p> <p>မည်သည့်အရာကိုမှ ခွဲခြားမရနိုင်ဘဲ အရာအားလုံး ရှုပ်ထွေးသွားလေသည်။</p> <p>ခေါင်းသုံးလုံး လက်ခြောက်ဖက်ရှိသော ဧရာမမျောက်ကြီးကို တွေ့မြင်သည်နှင့် လူတိုင်း ကြက်သီးမွေးညင်းထသွားရသည်။</p> <p>သူတို့အားလုံး အံ့သြတုန်လှုပ်စွာဖြင့် ရေရွတ်လိုက်ကြ၏။</p> <p>“ချီ... ထျန်း... မဟာ... သူတော်စင်....”</p> <p>ရောင်စဉ်ငါးမျိုး နတ်ဘုရားအလင်းတန်းများအတွင်းမှ ခုန်ထွက်လာသော မျောက်မင်းကိုကြည့်ရင်း 'ရှေးခေတ် နတ်ဘုရားများအပ်နှင်းခြင်းကာလ' ကို ကြုံခဲ့ဖူးသူတိုင်း တာအိုဆရာ’ကျူးထီ’ ကို သတိရသွားကြသည်။</p> <p>တာအိုဆရာ’ကျူးထီ’ သည်လည်း ဤသို့ပင် ရောင်စဉ်ငါးမျိုးအလင်းတန်းများကို ချိုးဖျက်ခဲ့ဖူးသည် မဟုတ်ပါလား။</p> <p>မဟာမာရူယိ၏မျက်နှာက တည်ကြည်လေးနက်သွားသည်။ သို့သော် သူ့မျက်ဝန်းများကတော့ မီးလျှံများပမာ တဟုန်းဟုန်းတောက်လောင်လာသည်။</p> <p>ထို့နောက် သူ၏ ကြီးမားသော ‘ရွှေခန္ဓာ’ တစ်ခုလုံးတွင် ပြင်းထန်သော မီးလျှံများ တောက်လောင်လာသည်။</p> <p>သူက ရောင်စဉ်ငါးမျိုး နတ်ဘုရားအလင်းတန်းများကို အလျှင်အမြန်လည်ပတ်စေပြီး ချီထျန်းမဟာသူတော်စင်၏ ရွှေတုတ်ကို ခုခံရင်ဆိုင်လိုက်၏။</p> <p>အလယ်ခေတ်တွင် ချီထျန်းမဟာသူတော်စင်က ကောင်းကင်ဘုံနန်းတော်တွင် သောင်းကျန်းခဲ့ပြီး ကျောက်စိမ်းကောင်းကင်ဘုံအရှင်နှင့် အပြင်းအထန်တိုက်ခိုက်ခဲ့သည်။</p> <p>ယခုတစ်ကြိမ်မှာတော့ ကောင်းကင်နတ်ဘုရားအဆင့် ထိပ်တန်းကျွမ်းကျင်သူနှစ်ယောက်ဖြစ်သော ချီထျန်းမဟာသူတော်စင်နှင့် မဟာမာရူယိတို့၏တိုက်ပွဲကို တဖန်ပြန်လည် တွေ့မြင်ရသည်ပင်။</p> <p>ချီထျန်းမဟာသူတော်စင်နှင့် မဟာမာရူယိ...။</p> <p>ကျောက်စိမ်းကောင်းကင်ဘုံအရှင် ကွယ်ပျောက်သွားပြီးနောက်ပိုင်း ဤတိုက်ပွဲက ကောင်းကင်နတ်ဘုရားအဆင့်တွင် မည်သူက အရှင်သခင်ဖြစ်ကြောင်း အဆုံးအဖြတ်ပေးမည့်တိုက်ပွဲ ဖြစ်သည်။</p> <p>ထိပ်တန်းအဆင့် ကျွမ်းကျင်သူနှစ်ယောက်၏တိုက်ပွဲဖြစ်သဖြင့် နှစ်ဖက်လုံး ပတ်ဝန်းကျင်ကို အမှုမထားနိုင်ကြတော့ပေ။</p> <p>အတားအဆီးမရှိ အစွမ်းကုန် ထိပ်တိုက်ရင်ဆိုင်ကြသည်ဖြစ်ရာ အနီးပတ်ဝန်းကျင်ရှိ အရာအားလုံး ပြာမှုန့်အဖြစ် ပြောင်းလဲသွားကြသည်။</p> <p>ကြီးမားလှသော ကြယ်စင်မြစ်ကြီးမှာလည်း မျက်တောင်တစ်ခတ်အတွင်း အစိတ်စိတ်အမွှာမွှာ ပြတ်တောက်သွားရသည်။</p> <p>စီးဆင်းနေသော မြစ်ရေများနှင့် လှည့်ပတ်နေသော ကြယ်တာရာများအားလုံးမှာ သဲလွန်စမကျန်အောင် ချေဖျက်ခြင်း ခံလိုက်ရသည်။</p> <p>ကြယ်စင်မြစ်ပြင်ပရှိ ဗလာနယ်သည်လည်း တိုက်ပွဲလှိုင်းလုံးများ၏ရိုက်ခတ်မှုကို ပြင်းထန်စွာ ခံစားနေရသည်။</p> <p>ဗလာနယ်က အစက်အပြောက်တစ်ခုအဖြစ် ကျုံ့ဝင်သွားပြီး အရာဝတ္ထုပေါင်းစုံ ၊ အချိန်နှင့်နေရာ အရာအားလုံး အစက်အပြောက်လေးထဲ စုစည်းသွားကြသည်။</p> <p>ထိုအစက်အပြောက်လေးက ချက်ချင်းဆိုသလို ပြန်လည်ပွင့်ထွက်လာပြီး ချီထျန်းမဟာသူတော်စင်နှင့် မဟာမာရူယိတို့၏ပုံရိပ်များ ပြန်လည်ထွက်ပေါ်လာသည်။</p> <p>ချီထျန်းမဟာသူတော်စင်က စွမ်းအားအပြည့်နှင့် ရှိနေဆဲပင်။</p> <p>သူက ဟိန်းဟောက်သံတစ်ချက်ပြုလုပ်လိုက်ပြီး လက်(၆)ဖက်ဖြင့် ရူယိရွှေတုတ်(၃)လက်ကိုလှည့်ပတ်ပြီး ခုန်ရွှမ်းထံသို့ အရှိန်အဟုန်ဖြင့် ဝင်ရောက်သွားပြီး တကျော့ပြန်တိုက်ပွဲ စတင်လိုက်သည်။</p> <p>ခုန်ရွှမ်း၏ ရွှေခန္ဓာက အနည်းငယ် မှိန်ဖျော့လျှက် ရှိသည်။ သို့သော် သူ၏ ရောင်စဉ်ငါးမျိုးအလင်းတန်းများကတော့ အားကောင်းနေဆဲပင်။</p> <p>ချီထျန်းမဟာသူတော်စင်နှင့် ရင်ဆိုင်ရာတွင် သူက နောက်ဆုတ်မည့်ဟန်မပြဘဲ ရောင်စဉ်ငါးမျိုး နတ်ဘုရားအလင်းတန်းများကို ရန်သူထံသို့ ပစ်လွှတ်လိုက်သည်။</p> <p>သူတို့နှစ်ယောက်လုံး ကောင်းကင်ယံအလင်းရောင်များ ပျောက်ကွယ်သွားသည်အထိ တိုက်ခိုက်နေကြသည်။</p> <p>မဟာမာရူယိက ရောင်စဉ်ငါးမျိုးအလင်းတန်းများကို မရပ်မနားပစ်လွှတ်လျှက် ရန်သူကို အလင်းတန်းများထဲ ပိတ်မိသွားစေရန် ကြိုးပမ်းနေသည်။</p> <p>ချီထျန်းမဟာသူတော်စင်ကတော့ ရူယိရွှေတုတ်ဖြင့် အဆက်မပြတ်ရိုက်နှက်လျှက် ရန်သူကို ပြားပြားဝပ်သွားအောင် တိုက်ခိုက်နေသည်။</p> <p>သူက ဝန်းရံလာသော နတ်ဘုရားအလင်းတန်းများကို ရိုက်ခွဲပစ်လိုက်ပြီး ရန်သူ၏အားနည်းချက်ကို အာရုံစိုက်ကာ ရူယိရွှေတုတ်များဖြင့် အားကုန်လွှဲရိုက်လိုက်သည်။</p> <p>ပြင်းထန်သည့်တိုက်ပွဲကိုကြည့်းရင်း နေရာတွင်ရှိနေသူများအားလုံး မှင်တက်လျှက် ရှိကြသည်။</p> <p>ယန်ကျန်း၏ မျက်ခုံးနှစ်ခုကြားမှ တတိယမျက်လုံးက ခေါင်းသုံးလုံး လက်ခြောက်ဖက်ရှိသော မျောက်မင်း၏ပုံရိပ်ကို စူးစိုက်ကြည့်ရင်း စကားဆိုလိုက်သည်။</p> <p>“တကယ်ကို မမေ့နိုင်စရာ အမှတ်တရဟောင်းတွေ ပြန်မြင်ယောင်စေတာပဲ”</p> <p>သူက ဆက်ပြောလိုက်သည်။</p> <p>“အဲဒါ မြေကြီးအမြုတေကျောက်တုံးကြောင့် မဟုတ်လား ၊ အခု သူ အဲဒါကို ခံနိုင်ရည်ရှိသွားပြီလား”</p> <p>မြောက်ပိုင်းကြယ်စင်ဧကရာဇ်နှင့် တောင်ပိုင်းချန်စန်းဧကရာဇ်တို့၏ အကြည့်များကတော့ ဖော်ပြရန်ခက်ခဲလောက်အောင် ရှုပ်ထွေးနေကြသည်။</p> <p>အလယ်ခေတ်တွင် ချီထျန်းမဟာသူတော်စင် ကောင်းကင်ဘုံနန်းတော်တွင် သောင်းကျန်းခဲ့စဉ်က သူတို့နှစ်ယောက်လုံး မျက်မြင်သက်သေ ရှိခဲ့ကြသည်။</p> <p>ချီထျန်းမဟာသူတော်စင် ဤမျှအစွမ်းထက်ရသည်မှာ မည်သို့သော ဒဏ်ခတ်မှုမျိုးနှင့် ရင်ဆိုင်ရပါစေ ပျက်ဆီးခြင်းမရှိသော မသေမျိုး 'နတ်မိစ္ဆာခန္ဓာ' ကြောင့်သာ မဟုတ်ပေ။</p> <p>မြေကြီးအမြုတေကျောက်တုံး၏ ဖျက်ဆီး၍မရသော အစွမ်းသတ္တိကို ဘေးဖယ်ထားလျှင်တောင်မှ ချီထျန်းမဟာသူတော်စင်၏ မွေးရာပါ ပါရမီ ၊ တိုက်စစ် ၊ ခံစစ်နှင့် အမြန်နှုန်းတို့မှာ သမိုင်းတစ်လျှောက် စွမ်းအားအကြီးဆုံး တည်ရှိမှုများထဲမှ တစ်ခုဖြစ်နေခဲ့ပြီးသားပင်။</p> <p>ကျောက်စိမ်းကောင်းကင်ဘုံအရှင်နှင့် ယှဉ်ပြိုင်တိုက်ခိုက်စဉ်ကလည်း တိုက်ပွဲလှိုင်းလုံးများကြောင့် ငရဲဘုံတစ်ခုလုံးသည်ပင် ပြိုကျပျက်ဆီးလုနီးပါး ဖြစ်ခဲ့ရသည်။</p> <p>ယခုလည်း အထွတ်ထိပ်အခြေအနေသို့ မရောက်ရှိသေးခင်မှာပင် တာအိုသခင်’လုယာ’ ကို အရှက်ကွဲလောက်အောင် ဖိအားပေးနိုင်ခဲ့သည်။</p> <p>လက်ရှိမှာတော့ သူက မြေကြီးအမြုတေကျောက်တုံး၏အစွမ်းကို အပြည့်အဝ ထိန်းချုပ်နိုင်သည့် အထွတ်ထိပ်အခြေအနေသို့ ပြန်လည်ရောက်ရှိသွားပြီဖြစ်ရာ မဟာမာရူယိ၏ ရောင်စဉ်ငါးမျိုး နတ်ဘုရားအလင်းတန်းများကို တစ်ချက်ပင်နောက်မဆုတ်ဘဲ ထိပ်တိုက်ရင်ဆိုင်ခဲ့သည်။</p> <p>သူတို့နှစ်ယောက် ထိတွေ့လိုက်တိုင်း ထွက်ပေါ်လာသော စွမ်းအားလှိုင်းလုံးများကြောင့် ကောင်းကင်တစ်ခုလုံး မှောက်လှန်သွားပြီး မြေပြင်သည်လည်း အစိတ်စိတ်အမွှာမွှာ ပြိုကွဲပျက်ဆီးသွားသည်။</p> <p>တိမ်မြူမိုင်တစ်သောင်းမဟာဂဠုန်၏မျက်ဝန်းများ အရောင်တောက်သွားပြီး...</p> <p>“အစ်ကို့လိုကျွမ်းကျင်သူနဲ့ တိုက်ခိုက်တဲ့အခါ... ဒီတိုက်ပွဲက သရေကျမလား ၊ ချီထျန်းမဟာသူတော်စင်ကပဲ အနိုင်ရမလားဆိုတာ သူ့ရဲ့ မသေမျိုး နတ်မိစ္ဆာခန္ဓာကပဲ အဆုံးအဖြတ်ပေးသွားမှာပဲ”</p> <p>လက်ရှိတွင် ချီထျန်းမဟာသူတော်စင်က သူ၏ မသေမျိုး နတ်မိစ္ဆာခန္ဓာကိုအသုံးပြုကာ ရောင်စဉ်ငါးမျိုး အလင်းတန်းများ၏ ချုပ်နှောင်မှုမှ ရုန်းထွက်နေခြင်း ဖြစ်သည်။</p> <p>သို့ပေသိ ရောင်စဉ်ငါးမျိုး အလင်းတန်းများကို တစ်ချက်တည်းဖြင့် ရိုက်ခွဲနိုင်မည်ဆိုလျှင်မဟာမာရူယိအနေဖြင့် တိုက်ခိုက်မှုကို ကြံ့ကြံ့ခံနိုင်မည်လား မသေချာပေ။</p> <p>ယခုအချိန်ထိ တိုက်ပွဲအနိုင်အရှုံး အတိအကျ မဆုံးဖြတ်နိုင်သေးသော်လည်း ရေရှည်တိုက်ခိုက်သွားမည်ဆိုပါက တိုက်ပွဲရလဒ် မည်သို့ဖြစ်မည်ကို လူတိုင်းရိပ်မိနေကြပေပြီ။</p> <p>တာအိုအဆင့် အဓိပတိများမရှိသော ဤလောကတွင် မည်သူက အရှင်သခင် ဖြစ်မည်နည်း။</p> <p>ယခု ကောင်းကင်နတ်ဘုရားအဆင့်တို့၏ ဧကရာဇ်မှာ...</p> <p>နောက်ဆုံးမှာတော့...</p> <p>ချီထျန်းမဟာသူတော်စင် “စွန်းဝူခုန်း” ပင် ဖြစ်ပေသည်။</p> <p>မငြိမ်းသောမီးအိမ်ရှေးဟောင်း‌တာအိုဗုဒ္ဓက တိုက်ပွဲကို စူးစိုက်ကြည့်ရင်း...</p> <p>“ဒါပေမဲ့ သူက စွန်းဝူခုန်းအစစ် မဟုတ်သေးဘူး”</p> <p>သူက ဆက်ပြောလိုက်သည်။</p> <p>“သူ့ရဲ့ လက်ရှိပုံစံနဲ့ဆိုရင် အခြေအနေကို ထိန်းထားနိုင်မယ့်အချိန်က ပိုပြီးတိုတောင်းသွားလိမ့်မယ် ၊ ခုန်ရွှမ်းအနေနဲ့ ဘယ်လောက်ထိ ကြံ့ကြံ့ခံနိုင်မလဲဆိုတဲ့အပေါ်မှာပဲ မူတည်တော့တယ်”</p> <p>ထိုအချိန်မှာပင် စကြာဝဠာတစ်ခုလုံးကို လွှမ်းခြုံထားသည့် ကနဦးကောင်းကင် အဋ္ဌဂံသင်္ကေတကားချပ် ကြီးမှာ ပျောက်ကွယ်လုနီးပါး ဖြစ်လာလေသည်။</p> <p>ကြယ်စင်မြစ်ထဲမှ တိုက်ပွဲက မည်မျှပင် ပြင်းထန်ပါစေ အစိမ်းရောင်ကြာပန်းကတော့ ထိခိုက်မှုမရှိဘဲ အေးချမ်းငြိမ်သက်စွာ ရှိနေဆဲပင်။</p> <p>ပွင့်ဖတ်များ အနည်းငယ်လှုပ်ရှားသွားပြီး ပွင့်အာလာတော့မည့် အရိပ်အယောင်များ ပြသလာသည်။</p> <p>ထိုစဉ်မှာပင် ရွှမ်တုကိုယ်တော် ကိုင်ဆောင်ထားသည့် ဖုရှီဗျပ်စောင်းမှ “ထောက်” ခနဲ အသံတစ်ချက် ထွက်ပေါ်လာသည်။</p> <p>နောက်ဆုံးကျန်ရှိသော ဗျပ်စောင်းကြိုး ပြတ်တောက်သွားခဲ့ပြီ ဖြစ်၏။</p>


Save