Book List

<h2 style="text-align:center">အခန်း (၁၃၄)</h2> <h2 style="text-align:center">ငှက်သုံးကောင်နှင့် လှံတစ်လက်</h2> <h2 style="text-align:center">*</h2> <p> </p> <p> </p> <p>“အဲ့ဒီမှာ ရပ်လိုက်စမ်း”</p> <p>လုပ်ကြံသတ်ဖြတ်ခြင်း တာအိုနှင့် ပတ်သက်၍ ဉာဏ်အလင်း ပိုမို ရရှိလာသည်နှင့်အမျှ ရန်ချီ၏ စွမ်းရည်မှာလည်း သိသိသာသာ ကျွမ်းကျင်လာချေပြီ။ သူက မဟာမိုးကြိုး သံဓားသိုင်းကို အသုံးပြုကာ ခုခံနေသော လီထောင်အား ဖိအားပေးပြီး နောက်ဆုတ်သွားစေရုံမက ထိုအခွင့်အရေးကို အမိအရ ဆုပ်ကိုင်၍ အသက်ဓာတ် စမ်းရေဘူးသီးခြောက်ကိုပါ အရယူလိုက်နိုင်၏။</p> <p>သူက တွန့်ဆုတ်မနေဘဲ ထိုပုလင်းအား ပင်လယ်နှလုံးသား လက်စွပ်အတွင်းသို့ ပစ်သွင်းလိုက်တော့သည်။</p> <p>အမှန်စင်စစ် ဤပစ္စည်းမှာ တောင်တစ်လုံးပမာ လေးလံလှပြီး သူ့ကို ဖိသတ်နိုင်စွမ်း ရှိပေသည်။ ထို့အပြင် အသက်ဓာတ်စမ်းရေ၏ အားကောင်းသော အရှိန်အဝါကြောင့် သူ့အား ခြေရာခံမိရန် လွယ်ကူစေ၏။ ထို့ကြောင့် လီထောင်နှင့် တိုက်ပွဲကြီး ဆင်နွှဲရန် စိတ်မဝင်စားချေ။ အကယ်၍ သတ်ဖြတ်လိုက်ပါက ကျောင်းတော်တွင် ပြဿနာကြီး ဖြစ်လာနိုင်သလို မသတ်ဖြတ်လျှင်လည်း သူ့အမည်နာမကို အလွယ်တကူ ခွဲခြား သိမြင်သွားနိုင်ပေသည်။</p> <p>တော်ဝင်အိမ်ရှေ့စံ ပေးအပ်သော တာဝန် မပြီးမြောက်ခဲ့သဖြင့် လီထောင်တို့မှာ စိတ်ဓာတ် အတော်လေး ကျဆင်းနေလေပြီ။</p> <p>ဘူးသီးခြောက် တစ်ပုလင်းစာ အသက်ဓာတ် စမ်းရေက ရန်ချီအတွက် ကောင်းကင်နှင့် မြေကြီး တုန်လှုပ်စေလောက်သည့် အပြောင်းအလဲများ ပေးစွမ်းနိုင်ပေသည်။ ပုလင်းကို မဖွင့်ရသေးလျှင်ပင် အစွမ်းထက်သော အသက်ဓာတ် အရှိန်အဝါကို ခန္ဓာကိုယ် အစိတ်အပိုင်းများက ခံစားမိပြီး တက်ကြွ လန်းဆန်းလာကြ၏။</p> <p>ဤမြင့်မြတ်ရေစင်မှာ သက်ရှိအားလုံး၏ အသက် အရင်းအမြစ်နှင့် တူညီလှပေသည်။</p> <p>“သေချင်နေတာလား”</p> <p>လီထောင်က ဒေါသတကြီး အော်ဟစ်လိုက်သည်။ မျက်စိရှေ့မှောက်တွင်ပင် လက်ထဲမှ အသက်ဓာတ်စမ်းရေ အလုခံလိုက်ရသဖြင့် စိတ်ပျက်မိသလို ဒေါသများလည်း ပေါက်ကွဲထွက်လာ၏။ ဤသည်မှာ ကိုယ်ကျိုးစီးပွား ဆုံးရှုံးရုံသာမက တာဝန်မကျေပွန်ပါက တော်ဝင်အိမ်ရှေ့စံ အဖွဲ့အစည်း၌ မျက်နှာပျက်စရာ ဖြစ်လာပေလိမ့်မည်။</p> <p>ထိန်းချုပ်မရနိုင်လောက်သည့် ဒေါသပင်။ ယခင်က သူ့ဘဝတွင် ဤကဲ့သို့ အဖြစ်မျိုး မကြုံဖူးခဲ့ပေ။</p> <p>“မိုးကြိုးပစ်သံ၏ ပြောင်းလဲခြင်း … ရန်သူအားလုံး သတ်ဖြတ်ဖို့ မိုးကြိုးအနန္တ အသက်ဝင်စေ…”</p> <p>မိုးကြိုးပစ်သံနှင့်အတူ ဓားအလင်းများ ထွက်ပေါ်လာတော့သည်။ ကြောက်မက်ဖွယ် မိုးကြိုးတစ်သောင်းက သွေးနွံအိုင်ကို ရိုက်ခတ်ပြီး လီထောင်မှာလည်း မိုးကြိုးများနောက်မှ ထပ်ကြပ်မကွာ လိုက်ပါလာ၏။ ရန်ချီတစ်ယောက် ကမ္ဘာမြေအဆုံး ထွက်ပြေးလျှင်ပင် မရမက လိုက်လံ သတ်ဖြတ်တော့မည့် ဟန်ပင်။</p> <p>ရန်ချီ သွေးနွံထဲ ဆင်းသက်ပြီး မကြာမီမှာပင် အစွမ်းထက်သည့် မိုးကြိုးပစ်ချက်က သူ့နောက်ကျောဘက် မြေပြင်ကို ထိမှန်သွားကာ မကောင်းဆိုးဝါး စွမ်းအင်များကို ချေဖျက်ရင်း ဖောက်ထွက်မရသည့် အတားအဆီးတစ်ခုအဖြစ် ဖြန့်ကျက်လာသည်။</p> <p>ဘုန်း …</p> <p>သူ့ လှံတံက ဓားအလင်းနှင့် ရင်ဆိုင်မိရာတွင် ပြင်းထန်သော လှိုင်းများကြောင့် သွေးနွံအိုင်မှ သွေးများ လေထဲသို့ ပန်းထွက်လာတော့သည်။</p> <p>ထို့နောက် ရန်ချီက ဆက်လက် ထွက်ပြေးလေ၏။</p> <p>လီထောင်က အနောက်မှနေ၍ ဓားအလင်းတန်းဖြင့် ပစ်လွှတ်လိုက်ရာ ဓားစွမ်းအင်များ ဝန်းရံလျက် မိုးကြိုးပစ်သံများ ဆူညံစွာ ထွက်ပေါ်လာသည်။</p> <p>သူထုတ်ဖော်လိုက်သည့် ဓားစွမ်းအင်အလင်းတန်းက မိုးကြိုးလျှပ်စီးကဲ့သို့ လမ်းကြောင်း တစ်လျှောက်ရှိ အရာအားလုံးကို ဖျက်ဆီးပစ်နိုင်စွမ်းရှိ၏။</p> <p>ပထမဆုံးအနေဖြင့် လီထောင်က ရန်ချီ၏ ရွှေဖြူရောင် ချပ်ဝတ်ကို သတိထားမိလိုက်သည်။ တချိန်တည်းမှာပင် သူ့ အဖွဲ့သား နှစ်ယောက်က ရန်ချီအား တြိဂံပုံစံ ဝန်းရံ ပိတ်ဆို့လိုက်ကြချေပြီ။</p> <p>“ဟေ့… သူငယ်ချင်း”</p> <p>လီထောင်က ရက်စက်သော အကြည့်ဖြင့် စိုက်ကြည့်ကာ ပြောလိုက်သည်။</p> <p>“ငါတို့က အင်မော်တယ်ခြေနင်း ကျောင်းတော်က လက်ရင်း ကျောင်းသားတွေပဲ … ငါ့နာမည်က လီထောင်… ကျန်တဲ့နှစ်ယောက်က ချွီလင်နဲ့ ချွီဟွေ့ … လူတွေက ငါတို့သုံးယောက်ကို ကောင်းကင်၊ မြေကြီး၊ လူသား သူရဲကောင်း သုံးဖော်လို့ခေါ်ကြတယ်… မင်းက ထိပ်သီးကျွမ်းကျင်သူ တစ်ယောက်ဆိုတော့ ငါတို့အကြောင်း ကြားဖူးလောက်မှာပါ… ကျားပါးစပ်ထဲက အစာကို နှိုက်ရင် ဘာဖြစ်မလဲဆိုတာ သိတယ်မဟုတ်လား… အခု အသက်ဓာတ် စမ်းရေကို ပြန်ပေးဖို့ အခွင့်အရေး ပေးမယ်… မင်းသာ ပြန်ပေးရင် အခုကိစ္စကို ဒီမှာတင် ကျေအေးပေးလိုက်မယ်”</p> <p>လီထောင်၏ မျက်လုံးများအရ ရန်ချီသာ ငြင်းဆန်ပါက အစွမ်းကုန် တိုက်ခိုက် သတ်ဖြတ်ရန် အဆင်သင့် ဖြစ်နေကြောင်း ထင်ရှားလှပေသည်။</p> <p>ရန်ချီက သူတို့သုံးယောက်အကြောင်း မကြားဖူးရုံမက “ကောင်းကင်၊ မြေကြီး၊ လူသား သူရဲကောင်းသုံးဖော်” ဆိုသည်ကိုလည်း နားမလည်ချေ။ သို့သော် ထိုသည်မှာ သူ ကျောင်းတော်သို့ ရောက်ရှိသည်မှာ မကြာသေးသောကြောင့်ဖြစ်နိုင်သည်။ အကယ်၍ လီဟီ သို့မဟုတ် အခြား သူငယ်ချင်းများသာ ယခုနေရာတွင်ရှိနေပါက အလွန် တုန်လှုပ်သွားကြပေလိမ့်မည်။</p> <p>သူတို့မှာ ကျောင်းတော်မှ ကျောင်းသားများအတွက် ဒဏ္ဍာရီထဲမှ ပုဂ္ဂိုလ်များဖြစ်ကြပြီး ထိုအဆင့် ရောက်ရှိရန် စွန့်စားခန်းများစွာ ဖြတ်သန်းခဲ့ကြရသူများ ဖြစ်သည်မဟုတ်ပါလား။</p> <p>အကယ်၍ သူတို့သာ စွန့်စားခန်း မထွက်ခဲ့ပါက ငွေကြေးများစွာ စုဆောင်းနိုင်မည် မဟုတ်ပေ။</p> <p>“ဂိုဏ်းတူအစ်ကိုကြီး… ဘာလို့ လေကုန်ခံပြီး ဒီအရူးကို ရှင်းပြနေမှာလဲ”</p> <p>ချွီလင်က ဖြတ်ပြောလိုက်သည်။ သူမက အဖွဲ့ထဲတွင် အကြမ်းတမ်းဆုံး ဖြစ်ပုံရပြီး တိုက်ခိုက်ရန် ဆုံးဖြတ်ထားပြီး ဖြစ်သည်။</p> <p>“ငါတို့ သူ့ကို ဝန်းရံထားပြီးပြီပဲ… ကောင်းကင်၊ မြေကြီး၊ လူသား ပူးပေါင်းတိုက်ကွက်ကို သုံးလိုက်ကြစို့ … သူ့ကို သတ်ပစ်တာက ပိုကောင်းတယ်… ငါတို့ပစ္စည်းကို ခိုးယူရဲတဲ့ သတ္တိ ဘယ်ကရလာလဲ စမ်းသပ်ကြည့်ရသေးတာပေါ့”</p> <p>“မင်းတို့ သဘောပဲ”</p> <p>ရန်ချီက အသံကို ဖျက်၍ တည်ငြိမ်စွာ တုံ့ပြန်လိုက်သည်။</p> <p>“ငါကတော့ ပြန်ပေးမှာမဟုတ်ဘူး… တိုက်ချင်ရင် တိုက်ကြတာပေါ့… ကောင်းကင်၊ မြေကြီး၊ လူသား သူရဲကောင်းသုံးဖော်ဆိုတာ ငါ့လက်ထဲကနေ အသက်ရှင်ရက် ထွက်သွားနိုင်မလား ကြည့်ရသေးတာပေါ့”</p> <p>ထို့နောက် လှံကို ဝှေ့ယမ်းကာ ထိပ်ဖျားအား ကောင်းကင်ဆီသို့ ညွှန်လိုက်သည်နှင့် လှံတံတစ်လျှောက် ရွှေဖြူရောင် မီးတောက်များ ကခုန် လှုပ်ရှားလာတော့သည်။</p> <p>သူတို့သုံးယောက်က ဘေးဘက်ဝဲယာမှ ပိတ်ဆို့ထားသဖြင့် ပြန်လည်တိုက်ခိုက်ခြင်းမှလွဲ၍ ရွေးချယ်စရာ မရှိတော့ပေ။</p> <p>သို့သော် မကြာသေးမီက တိုးတက်မှုများကြောင့် ရန်ချီမှာ အနည်းငယ်မျှပင် ကြောက်ရွံ့ခြင်း မရှိချေ။</p> <p>“တကယ်ကို မသိတတ်တဲ့ကောင်ပဲ… ဟမ့်”</p> <p>လီထောင်က နှာခေါင်းရှုံ့လိုက်သည်။</p> <p>“ကောင်းပြီ… သေသွားမှ ငါတို့ကို အပြစ်မတင်နဲ့”</p> <p>ထို့နောက် သူက ဓားကို ဝှေ့ယမ်းလိုက်၏။ အမှန်စင်စစ် စကားပြောကာ အချိန်ဆွဲပြီး အစစ်အမှန် စွမ်းအင်များ စုဆောင်းနေခြင်း ဖြစ်သည်။</p> <p>“မိုးကြိုးလျှပ်စီး… သက်ရှိအပေါင်းကို ဖျက်ဆီးလိုက်စမ်း”</p> <p>စွမ်းအင်လုံလောက်သည်နှင့် အသေသတ်ကွက်ကို ထုတ်ဖော်လိုက်တော့သည်။ ဓားဝှေ့ယမ်းမှုကြောင့် ကောင်းကင်၌ မိုးကြိုးတိမ်တိုက်များ ဖြစ်ပေါ်လာကာ မိုးကြိုးမုန်တိုင်းများ ဆင်းသက်လာ၏။ ကောင်းကင်နှင့် မြေကြီးမှ စွမ်းအားအားလုံးကို ထိန်းချုပ်ထားသည့်နှယ်။</p> <p>သူတို့အတွက် ကံဆိုးသည်မှာ ရန်ချီက ပိုမိုသန်မာနေခြင်းပင်။ သူ လှုပ်ရှားလိုက်သည်နှင့် ကမ္ဘာဦး ဆင်ရိုင်းများ၏ ဟိန်းဟောက်သံများ ထွက်ပေါ်လာပြီး လှံတံဖြင့် ထိုးသွင်းရင်ဆိုင်လိုက်သည်။ အဆုံးအစမဲ့သော လှံရှည်ပုံရိပ်များ ဖြစ်ပေါ်လာမှုနှင့်အတူ ငရဲပြည်မှ စွမ်းအင်များ ပါဝင်လာပြီး မိုးကြိုးလျှပ်စီး ဓားချက်ကို ဖြိုခွင်းလိုက်၏။</p> <p>လက်နက်နှစ်ခု ရင်ဆိုင်မိသည်နှင့် တပြိုင်နက် ပေါက်ကွဲသံကြီး ထွက်ပေါ်လာတော့သည်။</p> <p>“မိုးကြိုးနတ်ဘုရား၏ အမျက်ဒေါသ…”</p> <p>လီထောင် အော်ဟစ်လိုက်ချိန်တွင် အသံမှာတုန်ခါနေပြီး သားရဲငယ်များကိုပင် သေဆုံးစေနိုင်လောက်သည်။</p> <p>ဓားကွက်က ပိုမိုအားကောင်းလာကာ မိုးကြိုးလျှပ်စီးများ ဝန်းရံလျက် သူ့ နဖူးထက်၌ မြွေနှင့်တူသော မိုးကြိုးများ ဝန်းရံနေသည့် ငှက်ခေါင်း လူခန္ဓာကိုယ်နှင့် ထူးဆန်းသော သက်ရှိပုံရိပ်တစ်ခု ဖြစ်ပေါ်လာသည်။ ထိုအရာက မိုးကြိုးနတ်ဘုရားတစ်ပါးဖြစ်ကာ လက်တစ်ဖက်မှ ဗုံကို ကိုင်ထားပြီး ကျန်လက်တစ်ဖက်ဖြင့် တီးခတ်လိုက်၏။</p> <p>ဘုန်း.. ဘုန်း.. ဘုန်း.. ဘုန်း.. ဘုန်း.. ဘုန်း..</p> <p>ဗုံမြည်သံတစ်ချက်က မိုးကြိုးကို ပိုမိုတောက်ပလာစေသည်။ ထိုနေရာရှိ လူတိုင်း၏ နှလုံးသားထဲ၌ ဗုံနှင့် အတီးခံနေရသလို ခံစားလိုက်ရသည်။</p> <p>ဓားအလင်းက ရန်ချီကို ဝန်းရံလျက် လျင်မြန်စွာ ရွေ့လျားလာသဖြင့် ရှောင်ရှားရန် မဖြစ်နိုင်တော့ပေ။</p> <p>သို့သော် ရန်ချီကလည်း ရှောင်ရှားရန် စိတ်ကူးမရှိဘဲ လှံတံဖြင့် ထိပ်တိုက် ရင်ဆိုင်လိုက်သည်။</p> <p>သူ ထိုးသွင်းလိုက်သည့်အချိန်တွင် ကမ္ဘာဦး ဆင်ရိုင်းအော်သံနှင့်အတူ သူ့နောက်ကျောဘက်တွင် ဆင်ရိုင်းအုပ်ကြီးပေါ်လာကာ မြေပြင်ကိုပင် ကွဲအက်စေတော့မည့်အလား။ ထိုသည်မှာ ငရဲချေမှုန်း နတ်ဆင်စွမ်းအား၏ အဆုံးစွန် အဆင့်ဖြစ်ပြီး ဆင်ရိုင်း (၈၁) ကောင်၏ စွမ်းအားကို ပေါင်းစပ်ထားခြင်း ဖြစ်ပေသည်။</p> <p>သူ့ ငရဲနတ်ဆိုးလှံတံမှာ နတ်ဘုရားနယ်မြေ၏ တစ်စိတ်တစ်ပိုင်းကဲ့သို့ ဖြစ်လာပြီး အစစ်အမှန်နှင့် အတုအယောင်ကြား ရောထွေးနေ၏။</p> <p>ယခုအခါ ငရဲနတ်ဆိုးလှံတံက မဟာမိုးကြိုး သံဓားသိုင်းနှင့် ထိပ်တိုက်ရင်ဆိုင်မိပါက မည်သို့ ဖြစ်လာမည်နည်း။</p> <p>ခလွမ် …</p> <p>ကျယ်လောင်သော ပေါက်ကွဲသံနှင့်အတူ ဓားမှာ အပိုင်းပိုင်း ပြတ်ထွက်သွားပြီး မိုးကြိုးနတ်ဘုရား ပုံရိပ်မှာလည်း ပြိုကွဲပျက်စီးသွားလေပြီ။</p> <p>လီထောင်တစ်ယောက် ဤကဲ့သို့ စွမ်းအားအဆင့်နှင့် ရင်ဆိုင်ရသောအခါ ခက်ခဲသော အခြေအနေသို့ ရောက်သွားရသည်။</p> <p>မဟာမိုးကြိုး သံဓားသိုင်းက တော်ဝင်အဆင့် စွမ်းအင်ပညာရပ်ဖြစ်ပြီး ငရဲချေမှုန်း နတ်ဆင်စွမ်းအားကမူ နတ်ဘုရားအဆင့် ဖြစ်သည်။ ထိုနှစ်ခု မည်သို့ ယှဉ်နိုင်မည်နည်း။</p> <p>လီထောင်တစ်ယောက် မျက်နှာဖြူရော်ကာ နောက်သို့ ဒယီးဒယိုင် ဆုတ်ခွာသွားရသည်။ သူ နောက်ဆုတ်သွားသည်နှင့် ချွီလင်နှင့် ချွီဟွေတို့က ချက်ချင်း တိုက်ကွက်ခင်းလိုက်ကြ၏။ ချွီလင်က ချီမန်သွမ့်ကျား စက်ဝန်းဘီးဖြင့် တိုက်ခိုက်လိုက်ရာ ရန်ချီ၏ ပတ်ဝန်းကျင်၌ လမင်းနှင့် နေမင်း တစ်သောင်းခန့် ပေါ်ထွက်လာသကဲ့သို့ ထင်မှတ်ရသည်။</p> <p>“လေ၊ သစ်တော၊ မီးတောင်…”</p> <p>ထိုသည်မှာ နောက်ထပ် ထိပ်သီးအဆင့် စွမ်းအင် ပညာရပ်ပင်။</p> <p>ချွီဟွေကမူ မျက်လုံးများကို မှေးစင်းလျက် လွှသွားများ ပါရှိသော မှိန်းလက်နက်ကို ထုတ်ယူလိုက်သည်။</p> <p>“အဆက်မပြတ် လောင်ကျွမ်းနေသော ဥက္ကာပျံ…”</p> <p>သူတို့က လီထောင် နောက်ဆုတ်သွားသည်နှင့် တိုက်ခိုက်ကြတော့သည်။ ရန်ချီကို အသက်ရှူခွင့်ပင် မပေးဘဲ အပြတ်ရှင်းရန် ကြံရွယ်ထားကြသည်။</p> <p>ရန်သူကို ချေမှုန်းရန် မျှော်လင့်ချက်ဖြင့် သူတို့က အင်အားပေါင်းကာ တိုက်ခိုက်ကြခြင်း ဖြစ်သည်။ တစ်ဖက်လူက အဆင့် (၈)၊ အဆင့် (၉) လောက အုပ်ချုပ်သူ ဖြစ်နေလျှင်ပင် အရေးမကြီးပေ။ သူတို့၏ အစစ်အမှန် စွမ်းအင်များ ကုန်ခန်းသွားသည်နှင့် ကြီးစွာသော ဒုက္ခနှင့် ကြုံတွေ့ရပေလိမ့်မည်။</p> <p>သို့သော် သူတို့ ရန်ချီကို လျှော့တွက်ခဲ့ခြင်းမှာ ကံဆိုးစရာပင်။</p> <p>ရန်ချီက ဝင်ရောက်လာသော တိုက်ခိုက်မှုများကို အေးစက်စွာ ကြည့်ရင်း ရေရွတ်လိုက်သည်။</p> <p>“ကွက်တိပဲ”</p> <p>သူက လှံတံကို နောက်တစ်ချက် ထိုးသွင်းလိုက်၏။ ထိုစွမ်းအားမှာ သူ့ပြိုင်ဘက် နှစ်ယောက်ထက် များစွာသာလွန်နေသည်။</p> <p>“ကောင်းကင်နှင့် မြေကြီး၏ စွမ်းအား…”</p> <p>သူက ကြုံးဝါးလိုက်သည်။ ထိုအချိန်တွင် ပတ်ဝန်းကျင်ရှိ ကောင်းကင်နှင့် မြေကြီးမှ စွမ်းအားများကို လှံရှည်က စုပ်ယူသွားကာ အမြင့်ဆုံး အခြေအနေထိ တောက်ပလာခဲ့လေပြီ။</p> <p>သက်ရှိအားလုံးကို ထိန်းချုပ်ထားသကဲ့သို့ အရှိန်အဝါမျိုးပင်။</p> <p>အစစ်အမှန် စွမ်းအင်များက မိုးခြိမ်းသံကဲ့သို့ လမ်းကြောင်းတစ်လျှောက်ရှိ မြေပြင်ကို ဖျက်ဆီးသွားတော့သည်။ ထိုစွမ်းအားအဆင့်က ရန်ချီအား ကောင်းကင်နှင့်မြေကြီး အားလုံး၏ အုပ်ချုပ်သူ တစ်ယောက်ကဲ့သို့ ထင်မှတ်စေ၏။</p> <p>ထိုသည်မှာ နတ်ဘုရားအဆင့် စွမ်းအင် ပညာရပ်၏ စွမ်းအား ဖြစ်ပေသည်။</p> <p>နတ်ဘုရားဆိုသည်မှာ အဘယ်နည်း။ အရာအားလုံးကို သိမြင်ကာ၊ အရာအားလုံးကို ဖန်တီးနိုင်ပြီး၊ ထာဝရ ရှင်သန်နိုင်သော အနန္တတန်ခိုးရှင်… ထိုအရာကို နတ်ဘုရားဟု ခေါ်သည်။</p> <p>နတ်ဘုရားတစ်ပါးက ကမ္ဘာကြီးကို အလင်းဖြင့် ဆေးကြောသန့်စင်သင့်သည်ဟု မိန့်ကြားပါက သက်ရှိတိုင်း အလင်းရောင်များ တောက်ပလာကြမည်။ ကမ္ဘာကြီးကို ဖျက်ဆီးမည်ဟု မိန့်ကြားပါက ထိုကမ္ဘာကြီးမှာ ပြာပုံ ဖြစ်သွားပေလိမ့်မည်။</p> <p>ကမ္ဘာကြီးကို နတ်ဘုရားများက ဖန်တီးခဲ့သလို သက်ရှိအပေါင်းကိုလည်း နတ်ဘုရားများကပင် ဖန်တီးခဲ့ခြင်းဖြစ်သည်။ ထို့ကြောင့် နတ်ဘုရားအဆင့် စွမ်းအင် ပညာရပ်မှာ အလွန် ထူးခြားလွန်းသည်ဟု သတ်မှတ်နိုင်ပေသည်။</p> <p>ရန်ချီက ကောင်းကင်နှင့်မြေကြီးတစ်ခုလုံး၏ အုပ်ချုပ်သူ အစစ်အမှန် တစ်ယောက် မဖြစ်သေးသော်လည်း သေမျိုးသက်ရှိ အဆင့်ထက် ကျော်လွန်နေပြီး သူ့ပတ်ဝန်းကျင်ရှိ ကမ္ဘာကြီးပင် ပြောင်းလဲလာခဲ့လေပြီ။</p> <p>ဝုန်း…</p> <p>သူ့ တိုက်ခိုက်မှုက ကောင်းကင်နှင့် မြေကြီးကို ပဲ့တင်ထပ်စေပြီး ကောင်းကင်တွင် တိမ်များကဲ့သို့ လည်ပတ်နေသော ဓားသွားဘီးများမှာ ရှုံးနိမ့်သွားခဲ့ရသည်။ ချွီလင်၏ မျက်နှာ ဖြူရော်သွားကာ နောက်သို့ ဒယီးဒယိုင် ဆုတ်ခွာရင်း ပါးစပ်အပြည့် သွေးများ အန်ထုတ်လိုက်ရသည်။</p> <p>ရန်ချီက ထိုတိုက်ကွက်နောက်သို့ လိုက်မသွားဘဲ ချွီဟွေ၏ ဥက္ကာပျံ တိုက်ကွက်ဘက်သို့ လှည့်လိုက်၏။</p> <p>သူ့ လှံရှည်က နောက်တစ်ကြိမ် အရာရာကို လွှမ်းမိုးသွားပြန်သည်။ ချွီဟွေမှာ ကျော်ကြားသော လက်ရင်းကျောင်းသားတစ်ယောက်ဖြစ်သော်လည်း ရန်ချီ၏ အစစ်အမှန် စွမ်းအင်များကြောင့် လုံးဝ မှေးမှိန်သွားခဲ့ရသည်။ သူ့မျက်လုံးများတွင် ကြောက်ရွံ့မှုများဖြင့် တုန်လှုပ်နေလေပြီ။ အဆိုးဝါးဆုံး အိပ်မက်ထဲတွင်ပင် ဤမျှ သန်မာသော လူတစ်ယောက် ရှိနေလိမ့်မည်ဟု ထင်မှတ်မထားခဲ့ချေ။</p> <p>“မင်းတို့သုံးယောက်က သိပ်အားနည်းလွန်းတယ် … အင်မော်တယ်ခြေနင်း ကျောင်းတော် ဟုတ်လား … တော်ဝင်အိမ်ရှေ့စံ အဖွဲ့အစည်း ဟုတ်လား… မင်းတို့ရဲ့ တော်ဝင်အိမ်ရှေ့စံကသာ ငါနဲ့ ယှဉ်ပြိုင်ဖို့ အရည်အချင်း ရှိကောင်း ရှိနိုင်လိမ့်မယ် … မင်းတို့ကတော့ အဆင့်မမီဘူး… ရှင်းလား”</p> <p>ရန်ချီ၏ လှံတံ ပျောက်ကွယ်သွားပြီးနောက် လူပါ ပျောက်ကွယ်သွားတော့သည်။</p> <p>ပြိုင်ဘက် သုံးယောက်မှာလည်း လိုက်ဖမ်းလိုစိတ် မရှိကြတော့ပေ။</p> <p> </p> <p> </p> <p style="text-align:center">End</p> <p style="text-align:center">***</p>


Save