Book List

<h2 style="text-align:center">ခေတ်သစ်သမားတော်</h2> <h2 style="text-align:center">အခန်း (၈၃၁)</h2> <h2 style="text-align:center">မဟုတ်မမှန် စွပ်စွဲချက်များ</h2> <h2 style="text-align:center">*</h2> <p style="text-align:justify"> </p> <p style="text-align:justify">ယဲ့ပုဖန်က သူ့ရှေ့ရှိ နူးညံ့သိမ်မွေ့သော မိန်းကလေးများကို တစ်ချက် ဝေ့ကြည့်လိုက်ပြီး "ဒီအထဲမှာ ဆေးဖော်စပ်တတ်တဲ့သူ ရှိလား" ဟု မေးလိုက်သည်။ </p> <p style="text-align:justify">ယခုအခါ ဆေးခန်းတွင် သမားတော်နှင့် သူနာပြုများ ရှိနေပြီဖြစ်သော်လည်း ဆေးဖော်စပ်ပေးမည့်သူ လိုအပ်နေသေးပေသည်။</p> <p style="text-align:justify">"ကျွန်မ လုပ်တတ်ပါတယ်" </p> <p style="text-align:justify">ကျူးချွဲ နံပါတ် (၁၉) သည် လူအုပ်ထဲမှ ရှေ့ထွက်လာ၏။ "ကျွန်မအဘိုးက တိုင်းရင်းဆေးဆရာဟောင်း တစ်ယောက်ပါ။ ကျွန်မလည်း ဆေးပညာ နည်းနည်းပါးပါး လေ့လာထားဖူးတယ်။ အိမ်မှာတုန်းက အဘိုး ဆေးဖော်ရင် ခဏခဏ ကူညီပေးဖူးပါတယ်"</p> <p style="text-align:justify">ယဲ့ပုဖန်က "ကောင်းပြီလေ... ဒါဆိုရင် နောက်ပိုင်း လူနာတွေအတွက် ဆေးဖော်စပ်ပေးဖို့ မင်းပဲ တာဝန်ယူလိုက်တော့" ဟု ပြောလိုက်သည်။</p> <p style="text-align:justify">သူတို့ စကားပြောနေကြစဉ်မှာပင် လျီဟုန်ရှို့ အပ်နှံပေးထားသော ဆိုင်းဘုတ်လည်း ရောက်ရှိလာသည်။ </p> <p style="text-align:justify">ယဲ့ပုဖန်က ဆိုင်းဘုတ်ကို ကြည့်လိုက်၏။ တကယ်ကို သေသပ်လှပစွာ ဖန်တီးထားပြီး ရှေးဆန်ကာ ကျက်သရေရှိလှသည်။ ၎င်း၏ အငွေ့အသက်မှာ နတ်အပ်ဘုရင် ဆိုင်းဘုတ်ထက် လုံးဝ နိမ့်ကျမနေပေ။</p> <p style="text-align:justify">သူက ဆိုင်းဘုတ်ကို ချိတ်ဆွဲလိုက်သည်။ ယခုအချိန်မှစ၍ နတ်အပ်ဘုရင် ဆေးခန်းသည် ကူယီမန် (ရှေးဟောင်းဆေးပညာဂိုဏ်း) အဖြစ် တရားဝင် ပြောင်းလဲသွားချေပြီ။ </p> <p style="text-align:justify">ထို့နောက် ဆေးခန်းကို တရားဝင် စတင်ဖွင့်လှစ်လိုက်သည်။ ဗြောက်အိုးဖောက်ခြင်း သို့မဟုတ် အခမ်းအနားများ ကျင်းပခြင်းမျိုး မရှိသော်လည်း မနေ့က ဆေးပညာပြိုင်ပွဲကြောင့် လူအများအပြားသည် နာမည်သတင်းကို ကြားသိပြီး လာရောက်ကြလေသည်။</p> <p style="text-align:justify">မည်သို့ပင်ဆိုစေ နတ်အပ်ဘုရင်ထက် ဆေးပညာစွမ်းရည် သာလွန်သော သမားတော်ဆိုသည်မှာ သိပ်မရှိလှပေ။ ထို့အပြင် ဤနတ်ဆေးဆရာလေးက ပို၍ ဆက်ဆံရလွယ်ကူပုံပေါ်ပြီး ဈေးနှုန်းလည်း ကြီးကြီးမားမား မတောင်းဆိုချေ။</p> <p style="text-align:justify">မကြာမီမှာပင် ကူယီမန် ဆေးခန်းလေး တရားဝင် စတင်လည်ပတ်လေတော့သည်။ ယဲ့ပုဖန်က လူနာများကို စမ်းသပ်ကုသပေးရန် တာဝန်ယူပြီး အခြားသူများကမူ စည်းကမ်းထိန်းသိမ်းရေး၊ သန့်ရှင်းရေး၊ ဆေးဖော်စပ်ရေးနှင့် ငွေရှင်းသည့် ကိစ္စများကို တာဝန်ယူကြသည်။</p> <p style="text-align:justify">အားလုံး အလုပ်ရှုပ်နေကြစဉ်မှာပင် "ဆေးပညာ စစ်ဆေးရေး" ဟု စာတန်းထိုးထားသော ဗင်ကား တစ်စီးသည် ဆေးခန်းရှေ့တွင် လာရပ်လေသည်။ </p> <p style="text-align:justify">ကားရပ်သွားပြီးနောက် ယူနီဖောင်းဝတ်ဆင်ထားသူ အချို့ ဆင်းလာကြ၏။ သူတို့၏ လက်မောင်းရှိ ပခုံးတံဆိပ်များတွင်လည်း "ဆေးပညာ စစ်ဆေးရေး" ဟု ရေးသားထားသည်။</p> <p style="text-align:justify">ထိုလူများထဲတွင် ဦးဆောင်လာသူမှာ အပြာရောင်ယူနီဖောင်းဝတ် ပိန်ပိန်ပါးပါး လူလတ်ပိုင်း တစ်ဦး ဖြစ်ပြီး မျက်နှာပေါ်တွင် မောက်မာသော အမူအရာ ရှိနေသည်။ သူက အရာရှိတစ်ဦးနှင့်ပင် တူနေ၏။ </p> <p style="text-align:justify">သူသည် ဆေးခန်းထဲသို့ ဝင်လာပြီး "ဒီမှာ ဘယ်သူ တာဝန်ခံလဲ" ဟု ကျယ်လောင်စွာ အော်မေးလိုက်သည်။</p> <p style="text-align:justify">ယဲ့ပုဖန်က ဆေးစာရေးနေသော ဘောပင်ကို ချထားလိုက်ပြီး သူ့ကို မော့ကြည့်ကာ "ကျွန်တော်ပါပဲ... ဘာကိစ္စရှိလို့လဲ" ဟု ပြန်ဖြေလိုက်သည်။ </p> <p style="text-align:justify">ဤလူများသည် ဆေးလာကုခြင်း မဟုတ်ဘဲ ပြဿနာလာရှာခြင်း ဖြစ်ကြောင်းကို သူ ချက်ချင်း ရိပ်မိလိုက်သည်။ ဝမ်မိသားစု၏ လှုပ်ရှားမှုက ဤမျှ မြန်ဆန်လိမ့်မည်ဟု သူ မထင်ထားခဲ့ပေ။ </p> <p style="text-align:justify">မနေ့ကမှ ပြောင်းရွှေ့သွားပြီး ယနေ့မှာပင် တစ်စုံတစ်ယောက်က သူ၏ တံခါးကို လာခေါက်နေပြီ ဖြစ်သည်။ သို့သော် သူ၏ လုပ်ငန်းစဉ်နှင့် စာရွက်စာတမ်းများ အားလုံးမှာ ပြည့်စုံပြီးသား ဖြစ်ရာ တစ်ဖက်လူက တမင်သက်သက် ပြဿနာရှာရန် မဟုတ်လျှင် ပြဿနာ ရှိလာမည် မဟုတ်ချေ။</p> <p style="text-align:justify">"ပုံမှန် စစ်ဆေးရေးပါ" </p> <p style="text-align:justify">လူလတ်ပိုင်းက ပြောလိုက်သည်။ "မင်းတို့ ဆေးခန်းနဲ့ သက်ဆိုင်တဲ့ စာရွက်စာတမ်းတွေ အကုန်ထုတ်ခဲ့။ မင်းမှာ လိုအပ်တဲ့ အရည်အချင်း ရှိမရှိနဲ့ တရားမဝင် ဆေးကုသနေတာလား ဆိုတာကို ငါ စစ်ဆေးချင်တယ်"</p> <p style="text-align:justify">ယဲ့ပုဖန်က "ခင်ဗျားတို့ စစ်ဆေးလို့ရပါတယ်။ ဒါပေမဲ့ အရင်ဆုံး ခင်ဗျားတို့က ဘယ်ဌာနကလဲ ဆိုတာ ရှင်းရှင်းလင်းလင်း သိဖို့လိုတယ်။ ခင်ဗျားတို့ရဲ့ သက်သေခံကတ်ပြားကို ပြပါ" ဟု ပြောလိုက်သည်။</p> <p style="text-align:justify">ဆေးခန်းဖွင့်ပြီး နှစ်နာရီပင် မပြည့်သေးမီ စစ်ဆေးရန် လူရောက်လာခြင်း ဖြစ်သည်။ ဤကိစ္စ၏ နောက်ကွယ်တွင် တစ်စုံတစ်ယောက်မှ မရှိဘူးဆိုလျှင် အရူးပင်လျှင် ယုံမည်မဟုတ်ပေ။</p> <p style="text-align:justify">ဘေးဘက်မှ လူပုလေးတစ်ယောက်က ခုန်ထွက်လာပြီး "ငါတို့က ဘယ်ဌာနကလဲဆိုတာ မင်းနဲ့ ဘာဆိုင်လို့လဲ။ စစ်ဆေးတာကိုသာ ပူးပေါင်းပါဝင်စမ်းပါ" ဟု မောက်မာစွာ အော်ဟစ်လိုက်သည်။</p> <p style="text-align:justify">ဤလူများသည် နည်းပြချုပ်အား ပြဿနာလာရှာခြင်း ဖြစ်ကြောင်း စီတုတျန့်မော့လည်း ရိပ်မိသွားသည်။ ရွှမ်ယွမ်စံအိမ်၏ အဖွဲ့ဝင် တစ်ဦး၊ ဓားသူတော်စင် စီတုချန်ခုန်း၏ မြေးမလေး တစ်ယောက်အနေဖြင့် သူမသည် ဤလူများကို ဂရုပင် စိုက်မည်မဟုတ်ချေ။</p> <p style="text-align:justify">"ရှင့်မှာ အခြေခံ ယဉ်ကျေးမှုရော ရှိရဲ့လား။ မစစ်ဆေးခင် သက်သေခံကတ်ပြား အရင်ပြရမယ်။ အထောက်အထား မရှိရင် ဒီကနေ ထွက်သွားစမ်း"</p> <p style="text-align:justify">လူပုလေးက ချက်ချင်းပင် အော်ဟစ်လိုက်သည်။ "ဟိုး... သူနာပြုမလေးကများ ငါ့ကို ဒီလို လာပြောရဲတယ်ပေါ့။ နင့်ကို ဖမ်းပစ်လိုက်မယ်ဆိုတာ ယုံလား"</p> <p style="text-align:justify">စီတုတျန့်မော့က အထင်အမြင်သေးစွာဖြင့် "ဒါဆိုလည်း လာဖမ်းကြည့်လေ" ဟု ပြန်ပြောလိုက်သည်။</p> <p style="text-align:justify">စကားများနေသံကို ကြားလျှင် အခြားသူများလည်း ဒေါသတကြီး အမူအရာများဖြင့် စုရုံး ရောက်ရှိလာကြသည်။ နည်းပြချုပ်က အမိန့်ပေးလိုက်သည်နှင့် တစ်ပြိုင်နက် ဤအကောင်များကို သူတို့က ချက်ချင်း ပညာပေးလိုက်တော့မည် ဖြစ်သည်။</p> <p style="text-align:justify">ယဲ့ပုဖန်က လက်ကာပြကာ သူ၏ လက်အောက်ငယ်သားများကို တားဆီးလိုက်သည်။ သူသည် ယခုမှ ဆေးခန်း စတင်ဖွင့်လှစ်ခြင်း ဖြစ်ရာ မလွှဲမရှောင်သာသော အခြေအနေမျိုးမှလွဲ၍ ဤလူများနှင့် ပြဿနာ မတက်ချင်ပေ။</p> <p style="text-align:justify">သူတို့ကို ဦးဆောင်လာသော လူလတ်ပိုင်းက "ငါတို့ စစ်ဆေးရေး ယူနီဖောင်း ဝတ်ထားတာ မမြင်ဘူးလား။ ဒီအဝတ်အစားတွေက ငါတို့ရဲ့ သက်သေခံပဲ။ မင်းကို ငါပြောမယ်... သေသေချာချာ ပူးပေါင်းပါဝင်။ မဟုတ်ရင် မင်းရဲ့ ဆေးခန်းကို အခုချက်ချင်း ချိပ်ပိတ်ပစ်မယ်" ဟု ခြိမ်းခြောက်လေသည်။</p> <p style="text-align:justify">ယဲ့ပုဖန်က ခေါင်းခါလိုက်ပြီး "အဝတ်အစားက ဘာကိုမှ သက်သေမပြနိုင်ဘူး။ ဒါမျိုး တစ်စုံကို ယွမ်နည်းနည်း ပေးရင် ဝယ်လို့ရတယ်။ ခင်ဗျားတို့ စစ်ဆေးလို့ရပေမဲ့ သက်သေခံကတ်ပြားကိုတော့ မဖြစ်မနေ ပြရမယ်။ ဘာဖြစ်လို့လဲဆိုတော့ ဒီခေတ်မှာ ဘာမဆို လုပ်ရဲတဲ့ လိမ်လည်သူတွေက အရမ်း ပေါနေလို့ပဲ"</p> <p style="text-align:justify">စီတုတျန့်မော့ကလည်း ထောက်ခံလိုက်သည်။ "ကြားတယ်မလား။ အထောက်အထားရှိရင် စစ်ဆေး။ မရှိရင် ထွက်သွား"</p> <p style="text-align:justify">"မင်းတို့ကောင်တွေ တော်တော် မိုက်ရိုင်းတာပဲ" </p> <p style="text-align:justify">ဦးဆောင်လာသူ လူလတ်ပိုင်းသည် သူတို့နှစ်ဦးကို ရက်စက်စွာ စိုက်ကြည့်လိုက်ပြီးနောက် သက်သေခံကတ်ပြား တစ်ခုကို ပစ်ပေးလိုက်သည်။</p> <p style="text-align:justify">ယဲ့ပုဖန်က ကတ်ပြားကို ယူ၍ ကြည့်လိုက်သည်။ ကတ်ပြားက အစစ်ဖြစ်၏။ </p> <p style="text-align:justify">လူလတ်ပိုင်း အမျိုးသား၏ အမည်မှာ ကွမ်မင်း ဖြစ်ပြီး မြို့တော် ဆေးပညာ စီမံခန့်ခွဲရေး ဗျူရို၏ စျေးကွက် ကြီးကြပ်ရေးအဖွဲ့မှ အဖွဲ့ငယ်ခေါင်းဆောင်တစ်ဦး ဖြစ်လေသည်။</p> <p style="text-align:justify">ဖတ်ပြီးနောက် သူက ကတ်ပြားကို ပြန်ပေးလိုက်ပြီး အံဆွဲကိုဖွင့်ကာ မနေ့က သူလုပ်ဆောင်ထားသော စာရွက်စာတမ်း အားလုံးကို ထုတ်ပေးလိုက်သည်။ ကွမ်မင်းက ထိုစာရွက်စာတမ်း အားလုံးကို သေချာစွာ စစ်ဆေးကြည့်သော်လည်း မည်သည့် ပြဿနာမျှ ရှာမတွေ့ခဲ့ပေ။</p> <p style="text-align:justify">သူက မျက်မှောင်ကြုတ်သွားပြီး "မင်းက အနောက်တိုင်း ဆရာဝန်လား၊ တိုင်းရင်း သမားတော်လား" ဟု မေးလိုက်သည်။</p> <p style="text-align:justify">ယဲ့ပုဖန်က "ကျွန်တော်က တိုင်းရင်းဆေး သမားတော်ပေါ့။ မဟုတ်ရင် ကျွန်တော်က ဘယ်လိုလုပ် တိုင်းရင်းဆေးခန်း ဖွင့်မှာလဲ" ဟု ပြန်ဖြေသည်။</p> <p style="text-align:justify">"တိုင်းရင်းဆေး ဟုတ်လား..." </p> <p style="text-align:justify">ကွမ်မင်းက လှောင်ပြုံးပြုံးလိုက်သည်။ "မင်းရဲ့ ဇာတိရုပ် ပေါ်လာပြီ မဟုတ်လား။ မင်းလို လူငယ် တစ်ယောက်က ဘယ်လိုလုပ် တိုင်းရင်းဆေးဆရာ ဖြစ်နိုင်မှာလဲ။ မင်းက သိသိသာသာကို လိမ်လည်နေတဲ့ကောင်ပဲ။ ငါတို့နဲ့ လိုက်ခဲ့... အားလုံးကို ရှင်းရှင်းလင်းလင်း ဖြေရှင်းရမယ်" </p> <p style="text-align:justify">ပြောပြီးသည်နှင့် သူက ဘေးရှိ လူများကို လက်ဝှေ့ယမ်းပြလိုက်ကာ "သူ့ကို ဖမ်းခေါ်သွားစမ်း" ဟု အမိန့်ပေးလိုက်သည်။</p> <p style="text-align:justify">စီတုတျန့်မော့ ချက်ချင်းပင် ဒေါသထွက်သွားသည်။ "ရှင်တို့ ဘာလုပ်တာလဲ။ ရှင်တို့မှာ လူဖမ်းပိုင်ခွင့် ဘာအခွင့်အရေး ရှိလို့လဲ"</p> <p style="text-align:justify">ကွမ်မင်းက "ဘာအခွင့်အရေး ရှိရမှာလဲ... သူ့လို သမားတော်အတုကို ဖမ်းပိုင်ခွင့် ရှိတာပေါ့။ မင်းတို့က ငါတို့ကို သုံးနှစ်အရွယ် ကလေးတွေလို့ ထင်နေတာလား။ ဒီလောက် ငယ်ငယ်ရွယ်ရွယ်နဲ့ တိုင်းရင်းဆေး သမားတော် ဘယ်လိုလုပ် ဖြစ်နိုင်မှာလဲ။ သူက အလုပ်သင်တောင် ပြီးသေးပုံမရဘူး။ လူလိမ်မဟုတ်ရင် တခြား ဘာဖြစ်နိုင်ဦးမှာလဲ”</p> <p style="text-align:justify">“ဒီမှာ တရားမဝင် ဆေးကုသနေတယ်လို့ တစ်ယောက်ယောက်က ငါတို့ကို သတင်းလာပေးတာ အံ့ဩစရာ မဟုတ်တော့ဘူး။ တခြားလူတွေက လိမ်စားရင် တိတ်တိတ်ပုန်း လုပ်ကြတာ။ မင်းလိုကောင်မျိုးကတော့ ဆေးခန်းဖွင့်ပြီးကို လိမ်ရဲတယ်။ မင်းက တကယ်ကို မောက်မာလွန်းတယ်"</p> <p style="text-align:justify">သူ စကားပြောပြီးသည်နှင့် တစ်ပြိုင်နက် အနီးနားတွင် စောင့်ဆိုင်းနေသော လူနာများ ချက်ချင်းပင် ပေါက်ကွဲသွားကြတော့သည်။</p> <p style="text-align:justify">"အဓိပ္ပာယ်မရှိတာ... သမားတော်ယဲ့ရဲ့ ဆေးပညာစွမ်းရည်က အလွန်ပြောင်မြောက်တာ။ သူက ဘယ်လိုလုပ် လူလိမ် ဖြစ်နိုင်မှာလဲ..."</p> <p style="text-align:justify">"ဟုတ်ပါ့... နတ်ဆေးဆရာလေးရဲ့ ဆေးပညာက ပြိုင်ဘက်ကင်းပဲ။ သူက ငါ့ရောဂါကို ကုသပေးခဲ့တာ..."</p> <p style="text-align:justify">"မင်းတို့က ပြဿနာလာရှာတာ မဟုတ်လား။ မင်းတို့က ဝမ်မိသားစုဆီက အကျိုးအမြတ်တွေ ရထားလို့ နတ်ဆေးဆရာလေးကို လာပြီး အခက်တွေ့အောင် လုပ်နေတာပဲ..."</p> <p style="text-align:justify">ထိုနေရာရှိ လူအများစုသည် မနေ့က ဖြစ်ရပ်များကို ကိုယ်တိုင်ကိုယ်ကျ မြင်တွေ့ခဲ့ကြသူများ ဖြစ်ရာ ဤလူများ၏ ရည်ရွယ်ချက်ကို အလွယ်တကူပင် ခန့်မှန်းမိသွားကြသည်။ </p> <p style="text-align:justify">ကွမ်မင်း၏ မျက်လုံးများထဲတွင် အထိတ်တလန့် အရိပ်အယောင်တစ်ခု ဖြတ်ပြေးသွားသော်လည်း သူက လျင်မြန်စွာပင် ဟန်ပြန်ဆယ်လိုက်သည်။</p> <p style="text-align:justify">"ဘာတွေ လာဆူညံနေကြတာလဲ။ ငါတို့ ဥပဒေအရ စစ်ဆေးတာကလည်း အားလုံးရဲ့ ဘေးကင်းရေး အတွက်ပဲ။ ဆေးကုသတဲ့သူတိုင်းမှာ အရည်အချင်းစစ် လက်မှတ် ရှိရမယ်"</p> <p style="text-align:justify">"ခင်ဗျားက လက်မှတ် လိုချင်တာလား။ ကျွန်တော့်ဆီမှာ ရှိတယ်" ယဲ့ပုဖန်က ပြောရင်း လက်လှမ်းကာ သူ၏ ဆေးကုသခွင့် လက်မှတ်ကို ပစ်ပေးလိုက်သည်။</p> <p style="text-align:justify">ကွမ်မင်းသည် လက်မှတ်ကို ဖမ်းယူလိုက်ပြီး မှင်သက်သွားသည်။ တစ်ဖက်လူမှာ ငယ်ရွယ်သော်လည်း တကယ့် ဆေးကုသခွင့်လက်မှတ် ရှိနေလိမ့်မည်ဟု သူ မထင်ထားခဲ့ပေ။ ဤသည်မှာ သူ မျှော်လင့်ထားသည်ထက် အနည်းငယ် လွဲချော်သွားခဲ့သည်။</p> <p style="text-align:justify">သို့သော် အလွန်လျင်မြန်စွာပင် သူက ထိုဆေးကုသခွင့် လက်မှတ်ကို အိတ်ကပ်ထဲ ထည့်လိုက်ပြီး "ဒီလက်မှတ်က အတုပဲ။ ငါတို့နဲ့ လိုက်ခဲ့" ဟု ပြောလေသည်။ </p> <p style="text-align:justify">ယနေ့ သူလာရသည့် ရည်ရွယ်ချက်မှာ ပြဿနာရှာပြီး ဆေးခန်းကို ချိပ်ပိတ်ရန် ဖြစ်သည်။ မည်သို့ပင်ဖြစ်စေ သူ၏ ရည်မှန်းချက်ကို အကောင်အထည်ဖော်ရမည်သာ ဖြစ်သည်။</p> <p style="text-align:justify">ယဲ့ပုဖန်က "ခင်ဗျားက အတုလို့ ပြောလိုက်ရုံနဲ့ အတုဖြစ်သွားရောလား။ အဲဒီအပေါ်မှာ ခင်ဗျားတို့ ဌာနရဲ့ တရားဝင် တံဆိပ်တုံး ပါတာကို မမြင်ဘူးလား။ ဒါ့အပြင် ခင်ဗျားတို့က ဆေးပညာ စစ်ဆေးရေးဌာန သက်သက်ပဲ။ လူဖမ်းဖို့ ဘာအခွင့်အရေး ရှိလို့လဲ" ဟု ချေပလိုက်သည်။</p> <p style="text-align:justify">"ဒါက တရားမဝင် ဆေးကုသမှုပဲ... ဒါဟာ ရာဇဝတ်မှုတစ်ခုပဲ။ ငါတို့က မင်းကို အရင်ဆုံး ကိုင်တွယ်ခွင့် ရှိတယ်။ ပြီးမှ တခြားဌာနတွေကို လွှဲပြောင်းပေးရမှာ" </p> <p style="text-align:justify">ကွမ်မင်းက လှောင်ပြုံးပြုံးလိုက်ပြီး "ကောင်လေး... မြို့တော်ကို လာတဲ့ ပြင်ပလူတစ်ယောက်အနေနဲ့ မျက်စိဖွင့်ပြီး အခြေအနေကို ရှင်းရှင်းလင်းလင်း ကြည့်ဖို့ ငါ အကြံပေးချင်တယ်။ ငါတို့နဲ့ ပူးပေါင်းပြီး အားလုံးကို ရှင်းရှင်းလင်းလင်း ရှင်းပြ။ မဟုတ်ရင်တော့ မင်း ဒုက္ခရောက်လိမ့်မယ်"</p> <p style="text-align:justify">"ဝမ်မိသားစုရဲ့ ဆေးခန်းက နှစ်ပေါင်းများစွာ ဖွင့်လာတာတောင် ခင်ဗျားတို့ လာစစ်ဆေးတာ တစ်ခါမှ မမြင်ဖူးပါဘူး။ ကျွန်တော့် ဆေးခန်းကိုတော့ ဖွင့်ဖွင့်ချင်း လာတယ်။ ပြီးတော့ ကျွန်တော့်ရဲ့ အစစ်ဖြစ်တဲ့ လက်မှတ်ကိုတောင် အတုလို့ စွပ်စွဲသေးတယ်။ တကယ်ကို မဟုတ်မမှန် စွပ်စွဲချင်မှတော့ အကြောင်းပြချက် ရှာဖို့ ဘာခက်လို့လဲ" </p> <p style="text-align:justify">ယဲ့ပုဖန်သည် ကွမ်မင်းကို စူးရှသော မျက်လုံးများဖြင့် စိုက်ကြည့်ကာ "ခင်ဗျားကို ဝမ်ရွှမ်တယ်က လွှတ်လိုက်တာ မဟုတ်လား" ဟု မေးလိုက်တော့သည်။</p> <p style="text-align:justify"> </p> <p style="text-align:justify"> </p> <p style="text-align:center">***</p>


Save