Book List

<h2 style="text-align: center;">အခန်း (၉၃၃)</h2> <h2 style="text-align: center;">ရိုးရှင်းသော လေယာဉ်၊ စမ်းသပ်ခြင်းနှင့် အသုံးမဝင်သည်တော့မဟုတ်</h2> <h2 style="text-align: center;">*</h2> <p> </p> <p>ဤကမ္ဘာကြီးသည် ချမ်းသာသူနှင့် ဆင်းရဲသူများကြားရှိ ကွာဟချက်ကို လျှော့ချရန် အမြဲတမ်း ရည်ရွယ်ထားပုံရသည်။ တစ်စုံတစ်ဦးက ရှေ့ကနေ ဦးဆောင်နေပြီဆိုလျှင် ထိုသူသည် အခြားသူများထက် ပိုမိုထူးခြားသော ဂရုစိုက်မှုနှင့် အမြဲကြုံတွေ့ရလေ့ရှိသည်။</p> <p>ဥပမာအားဖြင့် ရှောင်းယီသည် အစကတည်းက အပျော်စီးရွက်သင်္ဘောတစ်စီးကို ပိုင်ဆိုင်ခဲ့သော်လည်း ထိုရွက်သင်္ဘောကို ကန့်သတ်ချက်များ ထားရှိကာ လွတ်လပ်စွာ မောင်းနှင်ခွင့်မပေးခဲ့ပေ။ သတ်မှတ်ထားသော လမ်းကြောင်းပေါ်တွင် မဟုတ်ပါက ရှေးဦး ဧရာမသားရဲကြီးများ၏ တိုက်ခိုက်ခြင်းကို ခံရမည်ဖြစ်သည်။</p> <p>ဖွံ့ဖြိုးတိုးတက်မှုကောင်းမွန်သော ကျွန်းကြီးများ ကြုံတွေ့ရသည့် ပြဿနာများသည်လည်း ကျွန်းငယ်လေးများ ကြုံတွေ့ရသည်ထက် အမြဲတမ်း ပိုများနေတတ်သည်။ အပြန်အလှန်အားဖြင့် ထိုကျွန်းကြီးများသည် ကျွန်းငယ်လေးများထက် အခွင့်အရေး ပိုမိုရရှိသည်ဆိုသည်မှာလည်း ငြင်းမရသော အချက်တစ်ခုပင်။</p> <p>ယင်းသည် စွန့်စားရမှုနှင့် အခွင့်အလမ်းတို့ ဒွန်တွဲနေခြင်းပင် ဖြစ်ရမည်။</p> <p>ရှောင်းယီ မျှော်လင့်ချက်ကင်းမဲ့စွာ ခေါင်းခါးလိုက်မိ၏။ ဤကမ္ဘာ့စည်းမျဉ်းများကို အထက်ကလူများက သတ်မှတ်ထားခြင်းဖြစ်ရာ သူကိုယ်တိုင် ထိုစည်းမျဉ်းများကို မချိုးဖျက်နိုင်သရွေ့ စည်းမျဉ်းအတိုင်းသာ ကစားရုံရှိတော့သည်။</p> <p>“ညီအစ်ကိုတို့ အားလုံးပြောနေကြတဲ့ စကားတွေအရဆိုရင် အဲ့ဒီဒေသခံတွေက မဟာမိတ်တွေ ဖြစ်မနေဘူးလား။ သူတို့ကို ကမ္ဘာ့စည်းမျဉ်းတွေက စေလွှတ်ပြီး သေခြင်းစွမ်းအင်ကို ဘယ်လိုကိုင်တွယ်ရမလဲဆိုတာ လာပြောခိုင်းတာလေ။”</p> <p>“အဲဒီလိုတွေးကြည့်ရင်တော့ ဟုတ်သလိုပဲ။ သူတို့က တကယ်ပဲ မဟာမိတ်တွေ ဖြစ်နိုင်မလား။”</p> <p>“မသေချာဘူး။ သူတို့ သေခြင်းစွမ်းအင်အကြောင်း လာပြောပြတာဟာ ငါတို့ဆီကနေ အကျိုးအမြတ်တစ်ခုခု ပြန်လိုချင်ရုံသက်သက်ပဲ ဖြစ်လိမ့်မယ်။”</p> <p>“မှန်တယ်။ ထာဝရမိတ်ဆွေဆိုတာ မရှိဘူး။ ထာဝရအကျိုးစီးပွားပဲ ရှိတယ်။”</p> <p>“မင်း အဲ့ဒီစကားပုံကို အသုံးချလိုက်တာ တကယ့်ကို ကွက်တိပဲ။”</p> <p>“ဟုတ်တယ်။ တကယ်လို့ သူတို့ရဲ့အင်အားက ငါတို့ကို ခြေမှုန်းပစ်နိုင်မယ်ဆိုရင် သူတို့က ငါတို့ကျွန်းတွေကို တိုက်ရိုက်သိမ်းပိုက်လိုက်မှာပေါ့။ ဒါဆို အဆင့်မြင့်အစားအစာတွေအားလုံးလည်း သူတို့အပိုင်ဖြစ်သွားမှာပဲ။ ဘာလို့ မလုပ်ဘဲ နေမလဲ။”</p> <p>“ဒါဆိုရင်တော့ ငါတို့ အရမ်းအန္တရာယ်များတဲ့ အနေအထားမှာ ရှိနေတုန်းပဲ။”</p> <p>“ဟုတ်တယ်။ အခုဆိုရင် မသေမျိုးတွေကိုတင် မကဘဲ ဒီက ဒေသခံအင်အားစုတွေကိုပါ သတိထားပြီး နေရမယ်။ တကယ်လို့ ငါတို့အရင်ရှိခဲ့တဲ့ ပင်လယ်ပြင်က ဒေသခံတွေပါ လိုက်လာမယ်ဆိုရင်တော့ တကယ့်ကို ရှုပ်ထွေးသွားပြီ။”</p> <p>“သူတို့ လိုက်လာကြမယ်လို့ ငါခံစားရတယ်။ အုတ်မြစ်ကျောက်တိုင်ရှိတဲ့ ကျွန်းတွေအားလုံး ဒီကို ဆွဲသွင်းခံလိုက်ရတာပဲလေ။”</p> <p>“ဒီနေရာက တကယ်ပဲ ကမ္ဘာ့စစ်မြေပြင် ပီသပါပေတယ်။ အင်အားစုမျိုးစုံ ရောယှက်နေတာဆိုတော့ ရှေ့မှာ တိုက်ပွဲတွေ အများကြီးလာဦးမယ်လို့ ငါထင်တယ်။”</p> <p>“ဟူး... ငါတို့ ရှားနိုင်ငံက ငြိမ်းချမ်းရေးကို ဘယ်လောက်မြတ်နိုင်းသလဲဆိုတာ တွေးကြည့်စမ်းပါ။ ဒီကိုရောက်မှ ဘာလို့ အဲ့ဒါတွေ ပျက်စီးကုန်ရတာလဲ။”</p> <p>“မင်း ဒီမှာလည်း ငြိမ်းချမ်းရေးကို ဆက်ပြီးမြတ်နိုးလို့ရပါတယ်။ မင်းရဲ့မေတ္တာတရားနဲ့ သူတို့ကို အလင်းဝင်လာအောင် လုပ်လိုက်ပေါ့။ မင်း လုပ်နိုင်ပါတယ်။”</p> <p>“အားလုံးပဲ အဲ့လောက်ကြီးလည်း စိတ်ဓာတ်ကျမနေကြပါနဲ့။ ဒီနေရာက ငါတို့အတွက် စမ်းသပ်ကွင်းတစ်ခုပဲ။ စမ်းသပ်ကွင်းဖြစ်တဲ့အတွက် ဖြေရှင်းနည်းလည်း ရှိမှာပါ။ လုပ်ငန်းစဉ်က ခက်ခဲနိုင်ပေမဲ့ ငါတို့ကြိုးစားရင် ဒီစမ်းသပ်မှုကို အောင်မြင်နိုင်ပါတယ်။”</p> <p>“အောင်မြင်မှုဆိုတာ လုံ့လဝီရိယပေါ်မှာပဲ မူတည်ပါတယ်။ ဘယ်တော့မှ အရှုံးပေးပြီး လဲမကျနဲ့။”</p> <p>“မှန်တယ်။ လူတိုင်း ပြင်ပတိုက်ခိုက်မှုတွေကို ကာကွယ်နေရင်းနဲ့ ကိုယ့်ကျွန်းကိုလည်း ဖွံ့ဖြိုးတိုးတက်အောင်လုပ်ဖို့ မမေ့ကြနဲ့။ ငါ ထောက်ပံ့ရေးသေတ္တာထဲကနေ ခုလေးတင်ရထားတဲ့ ပစ္စည်းကောင်းတစ်ခု ပြလိုက်မယ်။ [ရိုးရှင်းသော လေယာဉ် ထုတ်လုပ်မှုပုံစံ] ၁။”</p> <p>“ဟမ်... ဘာတွေဖြစ်ကုန်တာလဲ။ အခု လေယာဉ်ပျံတွေတောင် ရနေပြီလား။”</p> <p>“သေစမ်း... ငါ့မှာ လေသင်္ဘောတောင် မရသေးဘူး။ တကယ်ပဲ ရေငတ်တဲ့သူက ငတ်သေပြီး ရေကြီးတဲ့သူက နစ်သေနေတာပဲ။”</p> <p>“မင်း အဲ့ဒီအရာကို ရရင်တောင် ပျံနိုင်ပါ့မလား။ မင်းမှာ လေယာဉ်သုံး ရေနံဆီ ဒါမှမဟုတ် ဒီဇယ် ရှိလို့လား။”</p> <p>“အပေါ်က ညီအစ်ကိုရာ... မနာလိုမဖြစ်စမ်းပါနဲ့။ သူမှာမရှိရင်တောင် သူဌေးဆီမှာ ရှိတာပဲ။ သူဌေးက ဓာတ်ဆီနဲ့ ဒီဇယ်အမျိုးမျိုးကို အများပြည်သူဆီ စတင်ရောင်းချနေပြီဆိုတာ မင်းမသိဘူးလား။”</p> <p>“ဟမ်... တကယ်လား။ သူဌေးဆီမှာ အရမ်းအဆင့်မြင့်တဲ့ ဆီချက်စက်ကိရိယာတွေ ဘယ်လိုရှိနေတာလဲ။”</p> <p>“ဟီးဟီး...သူဌေးမှာ အပန်းဖြေစခန်းတောင် ရှိသေးတာပဲ။ အဲဒါကိုရော ဘာလို့ မမေးတာလဲ။”</p> <p>“အဟုတ်ပဲ။ သူဌေးမှာ ဘယ်လိုအဆင့်မြင့်စက်ကိရိယာတွေ ရှိလဲဆိုတာ မင်းကို သတင်းပို့နေရဦးမှာလား။”</p> <p>“ငါ့အမှားပါ။ အားလုံး တော်ကြပါတော့။ ငါက ရေတွင်းထဲက ဖားတစ်ကောင်မှန်း ငါသိသွားပါပြီ။”</p> <p>“လေယာဉ်ပျံရဖို့ဆိုတာ မင်း ကံကောင်းခြင်းနတ်သမီးနဲ့ အတူအိပ်ခဲ့လို့ပဲ ဖြစ်ရမယ်။”</p> <p>“အဲ့လောက်ကြီးတော့ ရိုင်းရိုင်းစိုင်းစိုင်း မပြောပါနဲ့။ ငါက ကံကောင်းခြင်းနတ်သမီးရဲ့ အနမ်းကို ခံလိုက်ရတာပါ။”</p> <p>“ဒါပေမဲ့ ဒီရိုးရှင်းတဲ့ လေယာဉ်က ဘယ်လောက်အထိ ပျံနိုင်မလဲနဲ့ ဘယ်လောက်အထိ ဘေးကင်းမလဲဆိုတာ ဘယ်သူသိမှာလဲ။ ဟိုးတုန်းက ရိုက်ညီနောင်ရဲ့ Flyer 1 တောင် စက္ကန့်အနည်းငယ်ပဲ ဝေဟင်မှာ နေနိုင်ခဲ့တာလေ။”</p> <p>“အဲ့ဒီလိုဆိုရင်တော့ အဲ့ဒီညီအစ်ကို့ရဲ့ ကံက တကယ်ဆိုးတာပဲ။ စက္ကန့်အနည်းငယ်ပဲ ပျံနိုင်တဲ့ လေယာဉ်ရတာက အသုံးမဝင်တာနဲ့ အတူတူပဲ။”</p> <p>“မဟုတ်လောက်ပါဘူး။ ကျွန်းအထိမ်းအမှတ်ကျောက်တိုင်က ငါတို့ကို အခြေခံအကျဆုံးအဆင့်ကြီးတော့ ပေးမှာမဟုတ်ဘူး။ မဟုတ်ရင် ဘာမှ အဓိပ္ပာယ်ရှိတော့မှာ မဟုတ်ဘူးလေ။ ငါတို့ကို သုတေသနလုပ်ဖို့သက်သက် ပေးရုံပဲဖြစ်ပါ့မလား။”</p> <p>“သုတေသနလား။ ဟာသလုပ်မနေစမ်းပါနဲ့။ အခုချိန်မှာ အသက်ရှင်ဖို့တောင် မနည်းလုပ်နေရတာကို သုတေသနက လုပ်ရဦးမှာလား။”</p> <p>“အားလုံးပဲ မငြင်းကြပါနဲ့တော့။ ငါ အဲ့ဒါကို တည်ဆောက်ပြီးသွားပြီ။ ပျံလို့ရတယ်။ ဒါပေမဲ့ ဝေးဝေးတော့ ပျံလို့မရဘူးထင်တယ်။ ငါ အရင်စမ်းသပ်ကြည့်လိုက်ဦးမယ်။ ပြန်လာမှ ပြောပြမယ်။”</p> <p>“ညီအစ်ကို သတိထားနော်။ အဝေးကြီး မပျံသွားနဲ့ဦး။ မဟုတ်ရင် ပြန်လာဖို့ ဆီမလောက်ဘဲ နေဦးမယ်။”</p> <p>ထို့နောက် ထိုလူသည် ရှောင်းယီထံသို့ ချက်ချင်းပင် သီးသန့်စာ ပို့လာခဲ့သည်။</p> <p>“သူဌေး ကျုပ် ဓာတ်ဆီနည်းနည်းလောက် ဝယ်ချင်လို့ပါ။ သူဌေးဆီမှာ ရှိလား။”</p> <p>“ရှိတယ်။”</p> <p>ရှောင်းယီက ပြတ်ပြတ်သားသား ပြန်ဖြေလိုက်ပြီး စပ်စုသည့်အနေဖြင့် မေးလိုက်သည်။</p> <p>“မင်းရဲ့လေယာဉ်က ဓာတ်ဆီအင်ဂျင် သုံးတာလား။”</p> <p>“ဟုတ်ကဲ့။ ကျွန်းအထိမ်းအမှတ်ကျောက်တိုင်ရဲ့ ညွှန်ကြားချက်အရဆိုရင် ခြောက်လုံးထိုး ရေအေးပေးစနစ်သုံး ဓာတ်ဆီအင်ဂျင် (six-cylinder water-cooled gasoline engine) ပါ။”</p> <p>“ကောင်းပြီ။အုတ်မြစ်ကျောက်တိုင် ၁၀၀။ မင်းစမ်းသပ်ဖို့ လိုအပ်တဲ့ ဓာတ်ဆီအားလုံးကို ငါပေးမယ်။ မင်းစမ်းသပ်တဲ့အခါ မင်းရဲ့လက်ကိုင်ဖုန်းကနေ ငါ့ကို Live လွှင့်ပြပေးပါ။ ပြီးတော့ မင်းရလာတဲ့ စမ်းသပ်မှုရလဒ်အားလုံးကိုလည်း ငါသိချင်တယ်။”</p> <p>ရှောင်းယီက အနည်းငယ်စဉ်းစားပြီး ပြန်ဖြေလိုက်သည်။</p> <p>“ပြဿနာမရှိပါဘူး။”</p> <p>တစ်ဖက်လူက ပြန်ဖြေပြီး ချက်ချင်းပင် လဲလှယ်မှုတစ်ခုကို စတင်လိုက်သည်။</p> <p>“[အုတ်မြစ်ကျောက်] ၁၀၀ - အခမဲ့ လဲလှယ်ခြင်း။”</p> <p>ရှောင်းယီ လဲလှယ်မှုကို သဘောတူပြီးနောက် ထိုသူလိုအပ်သည့် ဓာတ်ဆီများကို ပို့ပေးလိုက်သည်။ တစ်ဖက်လူကလည်း လက်ခံပြီးသည်နှင့် Live လွှင့်ခြင်းကို ချက်ချင်း စတင်လိုက်တော့သည်။</p> <p>ထို့နောက် အလွန်ပင် ကြမ်းတမ်းရိုးရှင်းသော လေယာဉ်တစ်စင်း ရှောင်းယီ၏ ဖုန်းမျက်နှာပြင်ပေါ်တွင် ထွက်ပေါ်လာခဲ့သည်။</p> <p>“ရိုးရှင်းသော လေယာဉ်- လေယာဉ်မှူး ၁ ဦး၊ ခရီးသည် ၁ ဦး၊ အရှည် ၇ မီတာ၊ တောင်ပံအကျယ်...”</p> <p>စနစ်၏ ညွှန်ကြားချက်များကို ကြည့်ခြင်းအားဖြင့် ရှောင်းယီသည် ထိုရိုးရှင်းသောလေယာဉ်အကြောင်းကို အခြေခံအားဖြင့် နားလည်သွားခဲ့သည်။</p> <p>ဓာတ်ဆီဖြည့်ပြီးနောက် စမ်းသပ်သူနှစ်ဦးမှာ လေယာဉ်ပေါ်သို့ တက်လိုက်ကြတော့သည်။ ကျွန်းပေါ်တွင် လေယာဉ်ပြေးလမ်းကိုလည်း ရှင်းလင်းထားပြီးဖြစ်သည်။</p> <p>ထို့နောက် စတင်လိုက်၏။</p> <p>လေယာဉ်၏အရှိန်မှာ မြန်သထက် မြန်လာသည်နှင့်အမျှ လေယာဉ်တစ်ခုလုံး ကောင်းကင်ယံသို့ တဖြည်းဖြည်း တက်လှမ်းသွားတော့သည်။</p> <p>ရိုးရှင်းသော လေယာဉ်ဖြစ်သော်လည်း ဆီတိုင်ကီထဲရှိ ဆီအမှတ်အသားမှာ အလွန်ပင် ရှင်းလင်းလှသည်။</p> <p>ကောင်းကင်ယံတွင် မိနစ် ၂၀ ခန့် ဝဲပျံပြီးနောက် ဆီထက်ဝက်ခန့် ကုန်သွားသည်ကို တွေ့ရသဖြင့် ၎င်းတို့ ပြန်လှည့်လာခဲ့ကြလေသည်။</p> <p>ဆင်းသက်ပြီးနောက် စမ်းသပ်သူနှစ်ဦးက ဗီဒီယိုရှေ့တွင် တိုက်ရိုက် အစီရင်ခံလာခဲ့သည်။</p> <p>“မောင်းနှင်ရတာ အလွန်လွယ်ကူပြီး အသားကျတာ မြန်ပါတယ်။ ဒါပေမဲ့ အရမ်းကို ကြမ်းတမ်းရိုးရှင်းလွန်းတော့ အပေါ်မှာ မျက်စိတောင် ကောင်းကောင်းဖွင့်လို့မရဘူး။”</p> <p>“တိုင်းတာရေးကိရိယာတွေအရဆိုရင် ဒီလေယာဉ်က တစ်နာရီကို ကီလိုမီတာ ၇၀ အထိ အရှိန်မြှင့်နိုင်ပါတယ်။ ပျံတက်ချိန်ကစပြီး တွက်ကြည့်ရင် မိနစ် ၄၀ လောက် ပျံသန်းနိုင်လိမ့်မယ်။ နည်းနည်းတော့ ပိုကြာနိုင်ပေမဲ့ ဒီကိန်းဂဏန်းက ပိုပြီး စိတ်ချရပါတယ်။”</p> <p>ထိုအစီရင်ခံစာကို ကြားသောအခါ တစ်စုံတစ်ယောက်က ညည်းညူလိုက်သည်ကို ရှောင်းယီ ကြားလိုက်ရသည်။</p> <p>“ထင်တဲ့အတိုင်းပါပဲ။ တကယ် အသုံးမဝင်ဘူး။”</p> <p>ထိုအခါ ရှောင်းယီက ဝင်ပြောလိုက်သည်။</p> <p>“တကယ်တော့ ဒီလေယာဉ်က အသုံးဝင်ပါသေးတယ်။ ပျံသန်းနိုင်စွမ်းက နည်းနည်းအားနည်းတယ်ဆိုပေမဲ့ ဒါကို ဗုံးကြဲဖို့နဲ့ ကင်းထောက်ဖို့အတွက် သုံးလို့ရတယ်။ အထူးသဖြင့် အခုလို မသေမျိုးကျွန်းတွေရဲ့ ကျူးကျော်မှုကို ရင်ဆိုင်နေရတဲ့အချိန်မှာ ဒါကိုသုံးပြီး ကျွန်းတွေရဲ့ အတွင်းပိုင်းအထိ ဘေးကင်းကင်းနဲ့ ကင်းထောက်နိုင်လိမ့်မယ်။”</p> <p>တစ်ဖက်လူမှာ သိသိသာသာပင် အံ့အားသင့်သွားပြီး ချက်ချင်းပြောလိုက်သည်။</p> <p>“သူဌေး ပြောတာ မှန်တယ်။ လေယာဉ်ရဲ့အရှိန်က မီးပုံးပျံထက် အများကြီး ပိုမြန်တယ်ဆိုတော့ မသေမျိုးကျွန်းကို ကင်းထောက်ဖို့အတွက် ပိုပြီး ဘေးကင်းတာပေါ့။ အကြံပေးတဲ့အတွက် ကျေးဇူးတင်ပါတယ် သူဌေး။”</p> <p>“ပြောမနေနဲ့တော့။ ထောက်ပံ့ရေးသေတ္တာကနေ ဒါကို ရထားတယ်ဆိုကတည်းက အသုံးဝင်မှု တစ်ခုခုတော့ ရှိလို့ဖြစ်မှာပဲ။ မင်းဘာသာမင်း ထပ်ပြီး စဉ်းစားကြည့်လိုက်ပါ။ ရလာတဲ့ ပစ္စည်းတွေကို အလဟဿ မဖြစ်စေနဲ့။”</p> <p>ရှောင်းယီက စကားဆုံးသည်နှင့် ဗီဒီယိုခေါ်ဆိုမှုကို ရပ်စဲလိုက်တော့သည်။</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save