BIT

Title

Show in VIP/Series

Status (Active / Inactive)

<h2 style="text-align: center;">အပိုင်း (၁၁၀၆)</h2>

<h2 style="text-align: center;">လီဟောင်၏ ကျဆုံးခြင်း</h2>

ထိုဖြစ်စဉ်မှာ အလွန်မြန်ဆန်လွန်းသဖြင့် စစ်မှန်သောအင်မော်တယ် ရှေးဟောင်းနတ်ဆိုးပင်လျှင် အချိန်မီ မတုံ့ပြန်နိုင်ခဲ့ပေ။ ၎င်း၏ လောကဦးနတ်ဝိညာဉ်မှာ ခန္ဓာကိုယ်မှ ရုတ်တရက် ကွာထွက်သွားချိန်တွင်မှသာ ၎င်း၏ ရုပ်ခန္ဓာမှာ မျက်စိတစ်မှိတ်အတွင်း သတ်ဖြတ်ခြင်း ခံလိုက်ရပြီဖြစ်ကြောင်း ထိတ်လန့်တုန်လှုပ်စွာ သိလိုက်တော့သည်။

သူတော်စင်အဆင့်မျှသာ ရှိသော်လည်း စစ်မှန်သောအင်မော်တယ်တစ်ပါးကို ချက်ချင်း သတ်ဖြတ်နိုင်ခဲ့ခြင်းဖြစ်သည်။

၎င်းမှာ ရုပ်ခန္ဓာမျှသာ ဖြစ်သော်လည်း မယုံကြည်နိုင်လောက်သော အောင်မြင်မှုတစ်ခု ဖြစ်သည်။

ထုထည်ကြီးမားကာ အရုပ်ဆိုးအကျည်းတန်သည့် နတ်ဆိုး၏ ရုပ်အလောင်းမှာ ဟင်းလင်းပြင်အတွင်း လွင့်မျောနေပြီး အောက်သို့ ပြုတ်ကျတော့မည့်ဆဲဆဲ ဖြစ်နေသည်။ စစ်မှန်သောအင်မော်တယ် ရှေးဟောင်းနတ်ဆိုး၏ လောကဦးနတ်ဝိညာဉ်မှာ ချက်ချင်း တုံ့ပြန်လိုက်ပြီး ခန္ဓာကိုယ်အတွင်းသို့ ပြန်လည်ဝင်ရောက်ကာ ရုပ်ခန္ဓာကို နိုးထစေပြီး ဒဏ်ရာများကို ကုသရန် ကြိုးစားလိုက်သည်။

သို့သော် ထိုအချိန်တွင် လီဟောင်၏ လောကဦးနတ်ဝိညာဉ်မှာ ဘေးတွင် အသင့်စောင့်ကြိုနေပြီ ဖြစ်သည်။

“သေစမ်း”

လီဟောင်၏ လောကဦးနတ်ဝိညာဉ်မှာ ထက်ရှသော ဓားပုံသဏ္ဌာန်သို့ ပြောင်းလဲသွားပြီး ကျိုးပဲ့နေသော အင်မော်တယ်ဓားထက်ပင် ပိုမိုမြန်ဆန်သော အရှိန်ဖြင့် ပိုင်းဖြတ်လိုက်သည်။ လောကဦးနတ်ဝိညာဉ်အတွင်းရှိ ‘ရွှေရောင်စွမ်းအင်ကြိုးမျှင်’ များမှာ တောက်လောင်လာပြီး တောက်ပသော ရွှေရောင်အလင်းတန်းများကို ထုတ်လွှတ်နေသည်။ ၎င်းမှာ တောက်လောင်နေသော ရွှေရောင်မီးလျှံများ ဝန်းရံထားသည့် ဓားပျံတစ်လက်ကဲ့သို့ပင်ဖြစ်သည်။

ဝေါင်း...။

စစ်မှန်သောအင်မော်တယ် ရှေးဟောင်းနတ်ဆိုးသည် ခြိမ်းခြောက်မှုကို ခံစားလိုက်ရသဖြင့် အမျက်ချောင်းချောင်း ထွက်သွားခဲ့သည်။ လီဟောင်၏ အစီအစဉ်ကို ၎င်း ချက်ချင်း နားလည်လိုက်သည်။ လီဟောင်သည် ၎င်း၏ ရုပ်ခန္ဓာကို အရင်သတ်ပြီးမှ သူ၏ လောကဦးနတ်ဝိညာဉ်ကို အသုံးပြုကာ ၎င်း၏ နတ်ဝိညာဉ်ကို ထပ်မံသတ်ဖြတ်ရန် ကြံစည်နေခြင်း ဖြစ်သည်။

အလွန် ရယ်စရာကောင်းသည့် ကိစ္စဖြစ်သည်။

၎င်းကဲ့သို့သော အရှင်သခင်မှာ သူတော်စင်အဆင့်ရှိသူတစ်ဦး၏ လှည့်စားမှုကို ခံလိုက်ရခြင်းဖြစ်သည်။

ခဏချင်းအတွင်းမှာပင် စစ်မှန်သောအင်မော်တယ် ရှေးဟောင်းနတ်ဆိုး၏ လောကဦးနတ်ဝိညာဉ်ပေါ်တွင် ထူထပ်သော အနက်ရောင် မြူခိုးများ ထွက်ပေါ်လာပြီး မီးရှူးမီးပန်းများကဲ့သို့ အရှိန်အဟုန်ဖြင့် မြင့်တက်လာခဲ့သည်။ ၎င်း၏ နတ်ဝိညာဉ်နောက်ကွယ်တွင် အနက်ရောင် လမင်းတစ်စင်း ထွက်ပေါ်လာပြီး လီဟောင်၏ လောကဦးနတ်ဝိညာဉ်ထံသို့ တိုက်ရိုက် ဝင်တိုက်လိုက်သည်။

နတ်ဝိညာဉ်စွမ်းအင်အရ ပြောရလျှင် ၎င်းမှာ စစ်မှန်သောအင်မော်တယ်တစ်ပါး ဖြစ်သည်။ အဆင့်တူ လူသားမျိုးနွယ် စစ်မှန်သောအင်မော်တယ်များပင်လျှင် ၎င်းနှင့် နတ်ဝိညာဉ်ချင်း တိုက်ခိုက်ရန် သတ္တိမရှိကြပေ။ ယခုကဲ့သို့ သူတော်စင်အဆင့်မျှသာ ရှိသူတစ်ဦးက ၎င်းကို ထိပ်တိုက်ရင်ဆိုင်ခြင်းမှာ သေတွင်းထဲသို့ မိမိဘာသာ ခုန်ဆင်းခြင်းပင် ဖြစ်သည်။

သို့သော်လည်း လီဟောင်၏ လောကဦးနတ်ဝိညာဉ်မှာ သူတော်စင်အဆင့် ကျင့်ကြံသူတစ်ဦးတွင် ရှိနိုင်သော စွမ်းအားထက် များစွာ သာလွန်နေပြီး သာမန် စစ်မှန်သောအင်မော်တယ်တစ်ပါးထက်ပင် ကျော်လွန်နေသည်ကို ၎င်း အာရုံခံမိသဖြင့် ထိုထိပ်တိုက်တွေ့မှုတွင် ၎င်း၏ စွမ်းအားအားလုံးကို ထုတ်သုံးလိုက်ခြင်း ဖြစ်သည်။

အနက်ရောင်လမင်းအတွင်းမှ ဖျက်ဆီးခြင်း ဝါးမြိုမှု စွမ်းအားများ ပေါက်ကွဲထွက်လာပြီး ဟင်းလင်းပြင်အတွင်း၌ တောက်ပသော ရွှေရောင်အလင်းနှင့် နက်မှောင်သော အနက်ရောင် အရှိန်အဝါတို့ ပြင်းထန်စွာ ထိပ်တိုက်တွေ့ကြသည်။

“ပိုင်းဖြတ်မယ်”

ထိုအခိုက်အတန့်တွင် ဖြစ်ပေါ်လာသော တိုက်ပွဲမှာ ကောင်းကင်ဘုံအသီးသီး၏ အာရုံကို ဖမ်းစားထားပြီး ကြည့်နေကြသူများမှာ သူတို့၏ နှလုံးခုန်သံများ ရပ်တန့်သွားသကဲ့သို့ ခံစားလိုက်ရသည်။

ဘုန်း

လီဟောင်၏ လောကဦးနတ်ဝိညာဉ်သည် စစ်မှန်သောအင်မော်တယ် ရှေးဟောင်းနတ်ဆိုး၏ နတ်ဝိညာဉ်ကို ထိုးဖောက်သွားခဲ့သည်။

သို့သော် ထိုသို့ ထိုးဖောက်သွားသည်နှင့် တစ်ပြိုင်နက် လီဟောင်သည် ဓားသွားများစွာရှိသော တောအုပ်တစ်ခုကို ဖြတ်သန်းလိုက်ရသကဲ့သို့ ခံစားလိုက်ရပြီး တစ်ကိုယ်လုံးမှာ အပိုင်းပိုင်း အလှီးခံရသကဲ့သို့ ပြင်းထန်သော နာကျင်မှုကို ခံစားလိုက်ရသည်။ သူ၏ လောကဦးနတ်ဝိညာဉ်မှာ ဒဏ်ရာများဖြင့် ပြည့်နှက်သွားပြီး အလင်းရောင်မှာ မှိန်ဖျော့သွားခဲ့သည်။ တောက်လောင်နေသော ရွှေရောင်စွမ်းအင်ကြိုးမျှင် စွမ်းအင်များမှာလည်း ခဏချင်းအတွင်း ကုန်ခမ်းသွားခဲ့သည်။

တစ်ဖက်တွင်လည်း စစ်မှန်သောအင်မော်တယ် ရှေးဟောင်းနတ်ဆိုး၏ လောကဦးနတ်ဝိညာဉ်မှာ ပိုင်းဖြတ်ခံလိုက်ရသဖြင့် နာကျင်စွာ အော်ဟစ်လိုက်သည်။ သံသရာအတွင်းမှ ရှေးဟောင်းနတ်ဆိုးမျိုးနွယ်အဖြစ် မွေးဖွားလာခဲ့သော ၎င်းအနေဖြင့် နတ်ဝိညာဉ်လမ်းစဉ် တိုက်ပွဲတစ်ခုတွင် ထိုကဲ့သို့ ရှုံးနိမ့်လိမ့်မည်ဟု မထင်ထားခဲ့ပေ။

၎င်း၏ ပိုင်းဖြတ်ခံလိုက်ရသော နတ်ဝိညာဉ် အက်ကြောင်းများအတွင်းမှ ထူထပ်သော အနက်ရောင် အရှိန်အဝါများမှာ နတ်ဝိညာဉ်သွေးများကဲ့သို့ ပန်းထွက်လာပြီး ပျက်စီးသွားသော ဒဏ်ရာများကို ပြန်လည် စုစည်းရန် ကြိုးစားနေသည်။

လီဟောင်သည် ၎င်းအား ထိုသို့သော အခွင့်အရေးမျိုးကို လုံးဝ ပေးမည်မဟုတ်ပေ။ သူသည် နာကျင်မှုကို အံတုကာ ချက်ချင်းပင် ပြန်လှည့်လာပြီး သူ၏ လောကဦးနတ်ဝိညာဉ်ကို ဓားတစ်လက်ကဲ့သို့ အသုံးပြုကာ ထပ်မံ ပိုင်းဖြတ်လိုက်သည်။

စစ်မှန်သောအင်မော်တယ် ရှေးဟောင်းနတ်ဆိုးမှာ ဒေါသထွက်သွားပြီး အင်မော်တယ်နယ်မြေကို ရုတ်တရက် ထုတ်ဖော်လိုက်သည်။

ထိုနယ်မြေအတွင်း၌ စူးရှစွာ အော်ဟစ်နေကြသော မရေမတွက်နိုင်သည့် တစ္ဆေပုံသဏ္ဌာန် အနက်ရောင် အရိပ်များ ထွက်ပေါ်လာခဲ့သည်။

တစ်ချိန်တည်းတွင် အနက်ရောင်လမင်းအတွင်းမှ ဝါးမြိုခြင်း စွမ်းအားများကလည်း ထပ်မံ လွှမ်းခြုံလာခဲ့သည်။

လီဟောင်၏ အရှိန်မှာ အလွန်မြန်ဆန်သည်။ ‘နတ်ဘုရားအရိုး’ ၏ စွမ်းအားဖြင့် အဆင့်မြှင့်ထားသော လောကဦးနတ်ဝိညာဉ်သည် အကန့်အသတ်များကို ကျော်ဖြတ်ထားပြီး ဓားတာအို အဆင့် (၁၀) ၏ အရှိန်၊ ‘ပျံသန်းနေသော လသဏ္ဌာန်’ နှင့် အခြားသော စွမ်းရည်များ၏ ပံ့ပိုးမှုကြောင့် အင်မော်တယ်နယ်မြေအတွင်းမှာပင် အလင်းတန်းတစ်ခုကဲ့သို့ လမ်းကြောင်းတစ်ခုကို ဖောက်ထွက်ကာ မျက်စိတစ်မှိတ်အတွင်း ပိုင်းဖြတ်နိုင်ခဲ့သည်။

သို့သော် သူ၏ လောကဦးနတ်ဝိညာဉ်မှာ အင်မော်တယ်နယ်မြေကို ထိတွေ့လိုက်သည်နှင့် အနက်ရောင်လမင်း၏ ဝါးမြိုခြင်းစွမ်းအားကို မရှောင်လွှဲနိုင်ခဲ့ပေ။ အရေခွံကို နွှာယူခံရသကဲ့သို့ ပြင်းထန်သော နာကျင်မှုမှာ လောကဦးနတ်ဝိညာဉ် တစ်ခုလုံးသို့ ပျံ့နှံ့သွားခဲ့ပြီး လီဟောင်မှာ မအော်မိစေရန် မနည်း ထိန်းချုပ်ထားရသည်။

သာမန် လောကဦးနတ်ဝိညာဉ်တစ်ခုသာ ဖြစ်ပါက ထိုဝါးမြိုခြင်းစွမ်းအားနှင့် ထိတွေ့ရုံဖြင့် ချက်ချင်း မှိန်ဖျော့သွားပြီး ပျက်စီးသွားနိုင်သည်။

“သေစမ်း... သေစမ်း... သေစမ်း”

ဘုန်း ဘုန်း ဘုန်း

ဟင်းလင်းပြင်အတွင်း၌ လီဟောင်သည် ရူးသွပ်သွားသူတစ်ဦးကဲ့သို့ အရေခွံနွှာပြီး အကြောဆွဲခံရသည်ထက် အဆပေါင်းသောင်းချီ ပိုမိုပြင်းထန်သော ဝိညာဉ်နာကျင်မှုကို အံတုကာ စစ်မှန်သောအင်မော်တယ် ရှေးဟောင်းနတ်ဆိုး၏ နတ်ဝိညာဉ်ကို အဆက်မပြတ် တိုက်ခိုက် ပိုင်းဖြတ်နေသည်။

သူသည် ဒဏ်ရာချင်း လဲလှယ်သော နည်းလမ်းကို အသုံးပြုနေခြင်း ဖြစ်သည်။ သူ၏ တိုက်ခိုက်မှုတိုင်းမှာ သူ့ကိုယ်သူလည်း ပြင်းထန်စွာ ဒဏ်ရာရစေသော်လည်း သူသည် မိမိကိုယ်မိမိ စတေးမည့် ဆုံးဖြတ်ချက်ဖြင့်သာ ဆက်လက် တိုက်ခိုက်နေသည်။

အသက်ရှူကြိမ် အနည်းငယ်အတွင်းမှာပင် ပြင်းထန်သော ထိပ်တိုက်တွေ့မှုများ ဆက်တိုက် ဖြစ်ပေါ်ခဲ့သည်။ လီဟောင်၏ ရူးသွပ်သော တိုက်ခိုက်ပုံကြောင့် စစ်မှန်သောအင်မော်တယ် ရှေးဟောင်းနတ်ဆိုးမှာ ဒေါသထွက်ရာမှ ထိတ်လန့်သွားခဲ့ပြီး နောက်ဆုံးတွင် နောက်ဆုတ်ချင်စိတ်ပင် ပေါ်လာခဲ့သည်။

၎င်း၏ ရှေ့မှ လူသားမှာ သူ၏ လောကဦးနတ်ဝိညာဉ်မှာ ၎င်းထက် မနိမ့်ကျသည့်အပြင် အသေခံမည့် ဆုံးဖြတ်ချက်မှာလည်း အလွန်ပြတ်သားလွန်းသည်။ ၎င်းမှာမူ စစ်မှန်သောအင်မော်တယ်တစ်ပါး ဖြစ်ပြီး အင်မော်တယ်ဧကရာဇ်၏ ရတနာကို ရယူကာ ခေါင်းဆောင်အဆင့်သို့ တက်လှမ်းရန် ကြီးမားသော မျှော်လင့်ချက်များ ရှိနေသူ ဖြစ်ရာ ထိုကဲ့သို့သော အမှိုက်ကောင်တစ်ဦးနှင့် တိုက်ခိုက်ရင်း မည်သို့ အသေခံနိုင်မည်နည်း။

ရွှစ်...။

ဒဏ်ရာများဖြင့် စုတ်ပြတ်နေသော ရှေးဟောင်းနတ်ဆိုး၏ လောကဦးနတ်ဝိညာဉ်မှာ ရုတ်တရက် အနက်ရောင် မြူခိုးများအဖြစ် ပြောင်းလဲသွားပြီး ၎င်း၏ ရုပ်ခန္ဓာဆီသို့ ဦးတည် ပြေးထွက်သွားခဲ့သည်။

၎င်းသည် ရုပ်ခန္ဓာအတွင်းသို့ ပြန်လည်ဝင်ရောက်ကာ လျှို့ဝှက်နည်းစနစ်တစ်ခုကို အသုံးပြုပြီး လီဟောင်ကို အပြတ်အသတ် သတ်ဖြတ်ရန် ဆုံးဖြတ်လိုက်ခြင်း ဖြစ်သည်။ လီဟောင်အနေဖြင့် ၎င်း၏ ရုပ်ခန္ဓာကို ထပ်မံ သတ်ဖြတ်နိုင်မည့် အခွင့်အရေးကို လုံးဝ ပေးတော့မည်မဟုတ်ပေ။

“ထွက်ပြေးဖို့ မစဉ်းစားနဲ့”

လီဟောင်သည် ၎င်း၏ အကြံကို သတိထားမိသည်။ ဝိညာဉ်အကြိမ်ကြိမ် ခွဲထုတ်ခံရသကဲ့သို့ ပြင်းထန်လှသော နာကျင်မှုကြောင့် သူ၏ မျက်လုံးများမှာ နီရဲနေပြီ ဖြစ်သည်။ ပြိုင်ဘက်၏ လောကဦးနတ်ဝိညာဉ် ရုပ်ခန္ဓာအတွင်းသို့ မဝင်ရောက်မီမှာပင် လီဟောင်သည် သူ၏ ‘အရာဝတ္ထု ထိန်းချုပ်ခြင်း စွမ်းအား’ ကို အစွမ်းကုန် ထုတ်ဖော်ကာ ပြိုင်ဘက်၏ ရုပ်ခန္ဓာကို လွှမ်းခြုံလိုက်သည်။

ထို့နောက် လီဟောင်သည် သူ၏ ခွန်အားရှိသမျှ အသုံးပြုကာ ထိုရုပ်ခန္ဓာကြီးကို တားမြစ်နယ်မြေဆီသို့ ပစ်လွှတ်လိုက်သည်။

ဝူး...။

တောင်တန်းတစ်ခုကဲ့သို့ ကြီးမာသော ရှေးဟောင်းနတ်ဆိုး၏ ရုပ်အလောင်းကြီးမှာ နှစ်ဖက်နတ်ဆိုးချိုင့်ဝှမ်း ဆီသို့ တိုက်ရိုက် လွင့်စင်သွားခဲ့သည်။

၎င်းသည် နှစ်ဖက်နတ်ဆိုးချိုင့်ဝှမ်း၏ နယ်ပယ်အတွင်းသို့ ရောက်သည်နှင့် အက်ကြောင်းကြီးများဆီသို့ အရှိန်အဟုန်ဖြင့် ဆွဲယူခြင်း ခံလိုက်ရသည်။

ထိုမြင်ကွင်းကို မြင်လိုက်ရသောအခါ စစ်မှန်သောအင်မော်တယ် ရှေးဟောင်းနတ်ဆိုးမှာ ခေတ္တမျှ မှင်သက်သွားခဲ့သည်။ ၎င်း၏ ဦးနှောက်မှာ ပေါက်ကွဲမတတ် ခံစားလိုက်ရပြီး မျက်လုံးများမှာလည်း ပြူးထွက်မတတ် ဖြစ်သွားကာ ကောင်းကင်ယံသို့ ဟိန်းဟောက်ရင်း ၎င်း၏ ရုပ်ခန္ဓာနောက်သို့ အပြင်းအထန် လိုက်သွားခဲ့သည်။

သို့သော် နှစ်ဖက်နတ်ဆိုးချိုင့်ဝှမ်း၏ နယ်မြေအနီးသို့ ရောက်သောအခါ ၎င်းသည် မကောင်းသော အတိတ်နိမိတ်ကို ခံစားလိုက်ရသဖြင့် မရပ်တန့်ဘဲ မနေနိုင်ခဲ့ပေ။

၎င်း၏ ရုပ်ခန္ဓာမှာ နက်မှောင်သော အက်ကြောင်းကြီး နှစ်ခုအတွင်းသို့ ကျဆင်းသွားပြီး အစအနပင် မကျန်တော့ဘဲ ပျောက်ကွယ်သွားသည်ကို ၎င်းသည် လက်ပိုက်ကြည့်နေခဲ့ရသည်။

တစ်ချိန်တည်းတွင် လီဟောင်၏ လောကဦးနတ်ဝိညာဉ်မှာလည်း နောက်ကွယ်မှ ထပ်ကြပ်မကွာ လိုက်ပါလာခဲ့သည်။

စစ်မှန်သောအင်မော်တယ် ရှေးဟောင်းနတ်ဆိုးထံမှ မကြုံစဖူး ပြင်းထန်သော နတ်ဆိုးအရှိန်အဝါများ ပေါက်ကွဲထွက်လာခဲ့သည်။ ၎င်းသည် အမှန်တကယ်ပင် အမျက်ဒေါသ ထွက်သွားပြီ ဖြစ်သည်။

ဟိန်း...။

၎င်း၏ လောကဦးနတ်ဝိညာဉ်မှာ လီဟောင်ကဲ့သို့ တောက်လောင်လာပြီး နတ်ဝိညာဉ်၏ မူလအခြေခံ စွမ်းအားများကို စတင် ဝါးမြိုလိုက်သည်။ အနက်ရောင်လမင်း၏ စွမ်းအားအောက်တွင် ၎င်း၏ အရှိန်အဝါမှာ အဆပေါင်းများစွာ တိုးမြင့်လာခဲ့သည်။

လီဟောင်၏ မျက်နှာမှာ အနည်းငယ် ပြောင်းလဲသွားပြီး အလျင်အမြန် ရပ်တန့်လိုက်သော်လည်း နောက်ကျသွားခဲ့ပြီ ဖြစ်သည်။ သူသည် ၁၅မိုင်နယ်ပယ် အကန့်အသတ်အဆင့်ကို လျင်မြန်စွာ အသုံးပြုလိုက်ပြီး သူ၏ လောကဦးနတ်ဝိညာဉ်ကို လျင်မြန်စွာ လှုပ်ရှားကာဟင်းလင်းပြင်၏ အခြားတစ်နေရာတွင် ပြန်လည် ထွက်ပေါ်လာခဲ့သည်။

***

Book List