Book List

<p>"အားးး။ ကျွတ် ကျွတ်။"</p> <p> </p> <p>"ဆရာ သတိရပြီလား။ ရွှေခေါင်းလောင်းကြီးကို အသံမြည်အောင်လုပ်ပေးပြီးတာနဲ့ချက်ချင်းသတိမေ့သွားတာပဲဆရာ။ ကျုပ်တို့ဖြင့် စိတ်ပူလိုက်ရတာဗျာ။"</p> <p> </p> <p>သတိပြန်ရလာတာနဲ့ စိတ်ပူနေကြတဲ့ ကိုဖိုးတေနဲ့ ကိုမိုးကြိုးတို့က ကျုပ်အနားတိုးကပ်လာကြတယ်။</p> <p> </p> <p>" ကျုပ်အဆင်ပြေပါတယ်။ သိပ်လည်းစိတ်မပူကြပါနဲ့ဗျာ။"</p> <p> </p> <p>" ကျုပ်တို့နှစ်ယောက်မှာက ဆရာပဲရှိတာလေဗျာ။ တကယ်လို့ဆရာတစ်ခုခုဖြစ်သွားရင် ကျုပ်တို့ဘာဆက်လုပ်ရပါတော့မတုန်း။"</p> <p> </p> <p>" အဲ့ဒီတော့လည်း ကိုမိုးကြိုးနဲ့ ကိုဖိုးတေက မိန်းမယူပြီး အေးဆေးနေကြပေါ့ဗျာ။"</p> <p> </p> <p>"ဟာ ဆရာကတော့မဟုတ်တာတွေကပြောပြန်ပြီ။ ကျုပ်တို့ကို ကြိုက်မဲ့လူတောင်မရှိပါဘူးဗျာ။"</p> <p> </p> <p>ရှက်ကိုးရှက်ကန်းနဲ့ပြန်ဖြေတဲ့ကိုမိုးကြိုးကိုကြည့်ရင်း အော်ရယ်မိတယ်။ ကိုဖိုးတေကတော့ တစ်ဖက်ကိုမျက်နှာလွှဲထားတာပေါ့။</p> <p> </p> <p>" သတိပြန်ရလာပြီလားဆရာ။ ကျုပ်တို့က စိတ်ပူနေကြတာဗျို့။ ဘာမှမဖြစ်တာပဲတော်ပါသေးရဲ့ဗျာ။"</p> <p> </p> <p>ကျုပ်တို့ဆရာတပည့်တွေစကားကောင်းနေတုန်း ကျုပ်ရှိရာအခန်းထဲကို 'ယက္ခရာဇာ' နတ်ဘီလူးမင်း ဝင်လာတယ်။ သူ့နောက်မှာက 'ကာဠသူရ' နဲ့ 'အဂ္ဂိမုက္ခ' တို့လည်းပါလာသေးတာ။</p> <p> </p> <p>"ကျုပ်သတိ‌မေ့နေတဲ့အချိန်မှာ ပြုစုပေးထားလို့ကျေးဇူးတင်ပါတယ်။ ခဏလောက်အနားယူပြီးသွားရင်တော့ ကျုပ်တို့ ဒီနေရာကနေထွက်သွားမှာပါ။"</p> <p> </p> <p>"ဘယ့်နဲ့စကားကြီးတုန်းဆရာရယ်။ ဒီနေရာမှာ ဆရာကြိုက်သလောက်သာနေ ၊ ပျော်သလောက်သာနေ။ အို ကုန်ကုန်ပြောမယ်ဗျာ။ တစ်သက်လုံး ဒီမှာနေချင်ရင်လည်း ရတယ်နော်။"</p> <p> </p> <p>" နေ နေပါအုံးဗျာ။ ကျုပ်မှာလည်း ကျုပ်ရည်ရွယ်ချက်နဲ့ကျုပ်မို့ ဒီနေရာမှာတော့ တစ်သက်လုံးမနေပါရစေနဲ့။"</p> <p> </p> <p>" ကျုပ်ကအလကားပြောတာပါဆရာရယ်။ ဟဲဟဲ။"</p> <p> </p> <p>နတ်ဘီလူးမင်း လို့သာပြောတယ်။ အတော် ရွှတ်နောက်နောက် နိုင်တဲ့နတ်ဘီလူးမင်းပါ။ ကျုပ်တစ်သက်ဖြင့်တစ်ခါမှ မတွေ့ဖူးပေါင်။</p> <p> </p> <p>"အဟမ်း။ အဟမ်း။"</p> <p> </p> <p>'ယက္ခရာဇာ' ရဲ့နောက်မှာရှိတဲ့ 'ကာဠသူရ' နတ်ဘီလူးက ချောင်းဟန့်လိုက်တော့မှ ကျုပ်ကိုစနောက်နေတာတွေရပ်သွားတယ်။</p> <p> </p> <p>"အသင် နတ်ဘီလူးမင်းကို ကျုပ်သိချင်တာလေးရှိလို့မေးချင်တယ်။"</p> <p> </p> <p>"မေးပါဆရာ။ မေးပါ။ ဘယ်အကြောင်းအရာကိုများသိချင်လို့လဲ။"</p> <p> </p> <p>"အခုကျုပ်တို့က နတ်ဘီလူးသိုက်နန်းကိုရောက်နေတာဆိုတော့ ဒီသိုက်နန်းက ဘယ်လိုသိုက်နန်းမျိုးလဲဆိုတာကျုပ်သိချင်တယ်။ပြီးတော့ 'ရတ္တဗလ'နဲ့ 'သုဗလ'တို့ ဘီလူးညီနောင်ထမ်းထားတဲ့ရွှေခေါင်းလောင်းကြီးရဲ့ အစွမ်းကိုလည်း မျက်ဝါးထင်ထင်တွေ့ချင်နေတာဗျ။"</p> <p> </p> <p>"အော် ဒါလား။ ဆရာတို့ အခုရောက်နေတဲ့နတ်ဘီလူးသိုက်က 'ကုဝေရနတ်မင်းကြီး'ရဲ့အုပ်ချုပ်မှုအောက်မှာရှိတဲ့ သိုက်တွေထဲကတစ်ခုပေါ့။"</p> <p> </p> <p>"ဒါဆို ကျုပ်တို့က အောက်ပညာသည်တွေဆိုတာသိနေတာတောင် ဒီနေရာအထိခေါ်လာခဲ့တာလား။"</p> <p> </p> <p>'ယက္ခရာဇာ'ရဲ့စကားကြောင့် ကျုပ်ထပ်မေးမိပြန်တယ်။</p> <p> </p> <p>" ဟုတ်ပါတယ်။ ဆရာတို့ကအောက်ပညာသည်တွေဆိုပေမဲ့ ဆရာတို့ရဲ့ ကိုယ်ကျင့်တရားနဲ့ အကျင့်သိက္ခာကို ကောင်းကောင်းသိထားတာမို့ ဒီလိုနေရာအထိခေါ်ဆောင်လာခဲ့တာပါ။ ကျုပ်တို့သိုက်နန်းရဲ့ ရတနာဖြစ်တဲ့ ရွှေခေါင်းလောင်းကြီးပျောက်ဆုံးသွားကတည်းက ကျုပ်တို့သိုက်ရဲ့ စစ်အင်အား ၊ ပညာစွမ်းအားတွေဟာ သိသိသာသာကို ကျဆင်းသွားခဲ့ပါတယ်။ အဲ့လိုအခြေအနေနဲ့ ကျုပ်တို့ဟာမကြာခင်မှာ နတ်မင်းကြီးရဲ့အမိန့်အရ အင်းစောင့်ဘီလူးတွေအဖြစ်နေရတော့မှာပါ။ အဲ့လိုမျိုးအခြေအနေကနေ ပြောင်းပြန်လှန်ပေးလိုက်တာကတော့ ဟော့ဒီကဆရာတို့ပါပဲ။"</p> <p> </p> <p>"ဘယ်လိုဗျ။ ကျုပ်နားမလည်ဘူး။"</p> <p> </p> <p>"ဆရာလည်း သက်သာနေပြီဆိုတော့ ရွှေခေါင်းလောင်းကြီးရှိရာကို သွားကြတာပေါ့လေ။"</p> <p> </p> <p>ကျုပ်ပြောတာကို ပြန်မဖြေတော့ပဲ ကျုပ်တို့ဆရာတပည့်သုံးယောက်ကို ရွှေခေါင်းလောင်းကြီးရှိရာနေရာကိုခေါ်ဆောင်သွားတော့တယ်။ ရွှေခေါင်းလောင်းကြီးရှိရာအခန်းဆီရောက်တော့ အခြွေအရံများစွာကို ခေါင်းလောင်းကြီးအားရွှေ့စေတယ်။ နန်းဆောင်ကြီးရဲ့အပေါ်ဆုံးအထပ်ကိုရွှေ့ခိုင်းတာကိုမြင်လိုက်ရတယ်။ နတ်ဘီလူးစစ်သည်အင်အားတစ်ရာကျော်လောက်က ကြီးမားတဲ့ ရွှေခေါင်းလောင်းကြီးကို မပြီး ရွှေ့လာခဲ့ကြတယ်။ နန်းဆောင်ကြီးရဲ့နောက်ဘက်ဆီမှာက ကျယ်ပြောလှတဲ့ ကွင်းပြင်ကျယ်ကြီးတစ်ခုရှိနေတာကို အခုမှပဲသိရတော့တယ်။</p> <p> </p> <p>" ဆရာက ဒီခေါင်းလောင်းကြီးရဲ့အစွမ်းကိုမြင်ချင်တာဆိုတော့ ကျုပ်ကပြရသေးတာပေါ့ဗျာ။"</p> <p> </p> <p>'ယက္ခရာဇာ' နတ်ဘီလူးမင်းက သူ့ကိုယ်ပေါ်က အဆောင်အယောင်တွေကိုချွတ်ချလိုက်ပြီး ‌အပေါ်ပိုင်းဗလာကျင်းနဲ့ ခေါင်းလောင်းကြီးရှိရာပြေးသွားကာ အားပြင်းလှတဲ့လက်သီးကြီးကိုသုံးပြီး ခေါင်းလောင်းကြီးအသံမြည်အောင်တီးတော့တယ်။</p> <p> </p> <p>"ဒေါင် ဒေါင် ဒေါင် ဒေါင် ဒေါင်။"</p> <p> </p> <p>ငါးချက်လောက်ဆက်တိုက်တီးခတ်လိုက်ပြီးချိန်မှာတော့ စောနကမြင်ရတဲ့ကွင်းပြင်ကျယ်ကြီးထဲမှာ အဆုံးမရှိတဲ့ နတ်ဘီလူးစစ်သည်‌များစွာဟာ ထူးဆန်းစွာပေါ်ထွက်လာခဲ့တယ်။</p> <p> </p> <p>"ဟာ နတ်ဘီလူးစစ်သည်တွေအများကြီးပါပဲလား။"</p> <p> </p> <p>ကိုဖိုးတေနဲ့ ကိုမိုးကြိုးတို့နှစ်ယောက်သား အံ့ဩလွန်းလို့ ပြိုင်တူအော်လိုက်မိကြတယ်။ သူတို့မပြောနဲ့ ကျုပ်တောင် ထမအော်မိတာပဲကံကောင်း။ နည်းနည်းနောနော နတ်ဘီလူးစစ်သည်အင်အားကြီးမှမဟုတ်ပဲ။ မျက်စိတစ်ဆုံး မဲသဲနေအောင်ကိုများပြားလွန်းနေတာကိုး။</p> <p> </p> <p>"ဒါက ဒီခေါင်းလောင်းကြီးရဲ့အစွမ်းလို့ပြောရမှာပေါ့။ အဲ့ဒီနတ်ဘီလူးစစ်သည်တွေက ခေါင်းလောင်းတီးသူရဲ့အမိန့်ကိုပဲနာခံလိမ့်မယ်။ ကျုပ်က ငါးချက်တိတိ တီးလိုက်တာမို့ နတ်ဘီလူးစစ်သည် အယောက် ငါးထောင်ဟာ ကျုပ်တို့ရှေ့မှာပေါ်လာခဲ့တာပေါ့လေ။"</p> <p> </p> <p>"အော် ဒီလိုလား။ ဒီပစ္စည်းရဲ့တန်ဖိုးက အဖိုးမဖြတ်နိုင်အောင်ပါပဲလား။"</p> <p> </p> <p>ခေါင်းလောင်းကြီးရဲ့အစွမ်းကိုလည်းသိလိုက်ရပြီ။ ကျုပ်ကလည်း အားအင်တွေပြန်ပြည့်လာပြီမို့ နတ်ဘီလူးသိုက်နန်းရှင် 'ယက္ခရာဇာ' တို့ကိုနှုတ်ဆက်ကာ ကျုပ်တို့ရှိသင့်ရှိထိုက်တဲ့ လူ့ဘုံဘက်ခြမ်းကိုပြန်လာခဲ့လိုက်တယ်။ ပြန်ခါနီးမှာ 'ယက္ခရာဇာနတ်ဘီလူးမင်း'က ကျုပ်ကို ရွှေခေါင်းလောင်းလေးတစ်လုံးကိုလက်ဆောင်ပေးလိုက်သေးတာ။ အဲ့ဒီခေါင်းလောင်းလေးက တကယ့်ကိုမှ အရွယ်အစားသေးသေးလေး။ ကျုပ်ရဲ့လက်သီးဆုပ်လောက်ကိုမရှိတဲ့ ခေါင်းလောင်းအသေးစားလေးပေါ့လေ။ အင်မတန်အရေးကြီးတဲ့အချိန် ၊ သေရေးရှင်ရေးဖြစ်နေတဲ့အချိန်မှသာ ဒီခေါင်းလောင်းလေးကို အသံမြည်အောင်လုပ်ဖို့ တဖွဖွလည်းမှာလိုက်သေးတာ။</p> <p> </p> <p style="text-align: center;">***</p>


Save