Book List

<p>"ဟေ့ကောင်ဂတုံး။ ရွာထဲက ကာလသားတွေကို ဒီညနေငါ့အိမ်လာခဲ့ကြဖို့ မှာလိုက်အုံးနော်။"</p> <p> </p> <p>"ဟုတ်ကဲ့သူကြီး။"</p> <p> </p> <p>'အိမ်မွှေးရွာ'သူကြီးဦးမင်း‌မောင်က အိမ်ထဲကထွက်သွားတဲ့ ကာလသားခေါင်း ကိုဂတုံးကို မှာလိုက်တယ်။ဒီလိုနဲ့ညနေရောက်တော့ 'အိမ်မွှေးရွာ'အတွင်းမှာရှိကြတဲ့ ကာလသားတွေ သူကြီးဦးမင်းမောင်ရဲ့အိမ်ကို စုရုံးရောက်ရှိလာကြတယ်။</p> <p> </p> <p>"ဟေ့ ဟေ့။ တိတ်တိတ်နေကြစမ်း။ ရွာထဲက ကာလသားတွေစုံကြပြီလား။"</p> <p> </p> <p>"စုံပါပြီသူကြီး။ အားလုံးရောက်ပါပြီ။"</p> <p> </p> <p>သူကြီးအသံကိုကြားရတော့ ပေါက်ပေါက်ဖောက်သလို စကားပြောနေကြတဲ့ ကာလသား‌တွေဟာ မီးကျီးခဲကို ရေနဲ့ပက်လိုက်သလိုတိတ်ဆိတ်သွားတော့တယ်။</p> <p> </p> <p>"အေး။ ဒါဆို ငါပြောစရာရှိတာပြောမယ်။ မကြာခင်မှာ ငါ့ရဲ့သား မင်းခေါင် ထောင်ကနေလွတ်လာတော့မယ်။ အဲ့ဒီတော့ မင်းတို့ကိုကြိုပြီးသတိပေးစရာရှိတာပေးထားလို့ရအောင် ခေါ်လိုက်တာပဲ။ ငါ့သားထောင်ကလွတ်လာလာချင်း ရွာကိုပြန်ရောက်တာနဲ့ မင်းတို့ကာလသားတွေက ရွာထိပ်ကနေကြိုဆိုရမယ်။ ပြီးရင် ငါ့သားကိုအဝေးတစ်နေရာပို့မှာဖြစ်တဲ့အတွက် ဒီရွာမှာနေတုန်းနေခိုက် သူစိတ်ချမ်းသာသလိုနေခိုင်းရမယ်။ ကြာကြလားဟေ့။"</p> <p> </p> <p>"ကြား ကြားပါတယ်သူကြီး။"</p> <p> </p> <p>"အေး။ အဲ့ဒါဆိုမင်းတို့ပြန်လို့ရပြီ။"</p> <p> </p> <p>သူကြီးရဲ့စကားဆုံးတော့ ကာလသားတွေဟာ သူတို့ရဲ့အိမ်ရှိရာကို အလျှိုလျှိုပြန်ကုန်ကြတယ်။မကြာခင် ထောင်ကထွက်လာမဲ့ သူကြီးဦးမင်းမောင်ရဲ့သား မင်းခေါင်ဆိုသူက လွန်ခဲ့တဲ့ ၅ နှစ်က မဒိမ်းကျင့် လူသတ်မှုနဲ့ ထောင်ဒဏ်နှစ်ရှည်ကျနေခဲ့တာ။အင်္ဂလိပ်အရာရှိတွေကို သူကြီးရဲ့လာဘ်‌ထိုးမှုကြောင့် နှစ်မစေ့ပဲ ပြန်လွတ်လာခဲ့တာပေါ့။ သူကြီးဦးမင်းမောင်ရဲ့သား မင်းခေါင်အကြောင်းကိုလည်း အားလုံးသိအောင်ပြန်ပြောရအုံးမယ်။</p> <p> </p> <p>လွန်ခဲ့တဲ့ ၅ နှစ်ကအချိန်ကိုပြန်သွားကြရအောင်။</p> <p>'အိမ်မွှေးရွာ'ရဲ့ ဘေးကပ်လျက်ရွာဖြစ်တဲ့ 'သုံးကန်'ရွာမှာ နှစ်စဉ်နှစ်တိုင်း ရွာလုံးကျွတ်ကျင်းပတဲ့ ဘုရားပွဲရှိနေတယ်။ ဆယ့်နှစ်ပွဲဈေးသည်တွေအပြင် တရားမဝင် လောင်းကစားဝိုင်းတွေကလည်းရှိနေပြန်တယ်။ မင်းခေါင်တစ်ယောက် အဲ့ဒီလောင်းကစားဝိုင်းတွေမှာ ပတ်ပြီး ဖဲရိုက် ၊ ကြွေလှည့် လုပ်နေခိုက် 'သုံးကန်ရွာ' ရဲ့အချောဆုံးအလှဆုံးဖြစ်တဲ့ 'ပန်းမှုန်'ကိုမြင်မြင်ချင်းသဘောကျမိသွားခဲ့တယ်။ လောင်းကစားဝိုင်းတွေမှာ ထိုင်နေခိုက် ပွဲဈေးကိုလာတဲ့ 'ပန်းမှုန်'ကို မြင်မိတဲ့ မင်းခေါင်ဟာ နေမရထိုင်မရဖြစ်ကာ အလွန်စွဲလမ်းသွားတော့တယ်။</p> <p> </p> <p>" ဟေ့ ။ 'ပန်းမှုန်' အစ်ကို့ကိုသိလားဟင်။"</p> <p> </p> <p>"အို ရှင်ကဘယ်ကမို့ ကျုပ်ကသိရမှာတုန်းတော့်။ ရှုပ်ရှုပ်ရှက်ရှက်တွေမလုပ်ပါနဲ့။ကျုပ်သွားမဲ့လမ်းရှေ့ကဖယ်ပေးစမ်းပါ။"</p> <p> </p> <p>ဘုရားပွဲပြီးသွားလို့နောက်ရက်မှာ မင်းခေါင်က ဘုန်းကြီးကျောင်းကိုဆွမ်းချိုင့်သွားပို့တဲ့ 'ပန်းမှုန်'ပြန်အလာကိုစောင့်ပြီး လူပျိုအပျိုသဘာဝရည်းစားစကားပြောတော့တယ်။ သူ့အပေါ်ကိုခါးခါးသီးသီးငြင်းလိုက်တဲ့ 'ပန်းမှုန်'ရဲ့အပေါ်ကို အငြှိုးအတေးကြီးစွာမှတ်ထားလိုက်တယ်။ နောက်ရက်တွေလည်း အမျိုးမျိုး‌နှောက်ယှက်နေတာမို့ 'ပန်းမှုန်'ခမျာ အိမ်ထဲက အိမ်အပြင်တောင်မထွက်ရဲဖြစ်လာရတယ်။ ဒီအကြောင်းတွေကိုသိသွားတဲ့ 'ပန်းမှုန်'ရဲ့ အစ်ကိုဖြစ်သူ 'ဖိုးခွား'က စတင်မေးမြန်းတော့တယ်။</p> <p> </p> <p>" ညီမလေး။ ခုတလော ဘုန်းကြီးကျောင်းကို သိပ်မသွားတော့ပါလား။ တစ်ခုခုများဖြစ်လို့လား။တစ်ခုခုဖြစ်နေတာဆိုရင်လည်း ကိုကြီးကိုပြောနော်။"</p> <p> </p> <p>"ဟို ညီမလေးဘာမှမဖြစ်ပါဘူးကိုကြီးရဲ့။ ဒီရက်ထဲ နေလို့သိပ်မကောင်းလို့မသွားဖြစ်တာပါ။"</p> <p> </p> <p>'အိမ်မွှေးရွာ'သူကြီးရဲ့သားက လိုက်နှောက်ယှက်နေတယ်ဆိုတာကို မပြောရဲပဲ လိမ်ပြောနေတယ်ဆိုတာ 'ဖိုးခွား'သိပေမဲ့ ညီမဖြစ်သူစိတ်ဆင်းရဲရမှာစိုးလို့ ဘာမှဆက်မပြောခဲ့ဘူး။</p> <p> </p> <p style="text-align: center;">***</p>


Save