Book List

<h2 style="text-align: center;">အခန်း (၁၇၁)</h2> <h2 style="text-align: center;">ယွီဧကရာဇ်၏ ဉာဏ်ပညာ</h2> <h2 style="text-align: center;">*</h2> <p style="text-align:justify"> </p> <p style="text-align:justify">ရှောက်တောင်၊ ဆွေ့ရွှီးနန်းတော်…</p> <p style="text-align:justify">ဖူရှောင်ကွမ်း နိုးလာပြီး သူ၏ လက်ဝါးကို ဖြန့်လိုက်၏။ သေးငယ်သော သဲပုရပိုက်လိပ်တစ်ခုက သူ၏ လက်ထဲတွင် ထွက်ပေါ်လာသည်။ သဲပွင့်လေးများက လရောင်အောက်တွင် ငွေရောင်အလင်းတန်းများဖြင့် တောက်ပနေပြီး သဲတစ်ပွင့်ချင်းစီက ထင်ရှားကာ မျက်စိပသာဒ ဖြစ်စေ၏။</p> <p style="text-align:justify">ထိုသဲပွင့်များထဲတွင် အချိန်နှင့် ဟင်းလင်းပြင် စွမ်းအားများက အတက်အကျ စီးဆင်းနေသည်။ တစ်လကျော်ကြာ တံခါးပိတ် ကျင့်ကြံပြီးနောက်တွင် သူ၏ ကိုယ်ပိုင်သီးသန့် သဲစီးကြောင်း နည်းစနစ်ကို အောင်မြင်စွာ ဖန်တီးနိုင်ခဲ့ပြီ ဖြစ်၏။</p> <p style="text-align:justify">သဲတစ်ပွင့်ချင်းစီတိုင်းတွင် အချိန် စွမ်းအားများ ပါဝင်နေသည်။ ၎င်းတို့ကို တစ်ခုနှင့်တစ်ခု ထပ်လိုက်သောအခါ စွမ်းအားက အတော်လေး အထင်ကြီးလောက်စရာ ဖြစ်သွား၏။</p> <p style="text-align:justify">သူက နည်းစနစ်ကို ရုပ်သိမ်းလိုက်ပြီး တရားထိုင်ရာ အခန်းထဲမှ ထွက်လာခဲ့သည်။</p> <p style="text-align:justify">ဝိညာဉ်အစားအစာ အနည်းငယ်ကို စားသုံးပြီးသည်နှင့် သူ သတင်းအချို့ကို ရရှိလိုက်သည်။</p> <p style="text-align:justify">ဖူရှောင်ကွမ်းက အောက်ဘက်ရှိ ပုစဉ်းရင်ကွဲမိစ္ဆာနှင့် အခြားမိစ္ဆာများကို ကြည့်၍ တစ်ခဏမျှ တိတ်ဆိတ်သွား၏။ သူ တံခါးပိတ် ကျင့်ကြံနေစဉ်အတွင်း အခြေအနေတွေက ဤမျှ လျင်မြန်စွာ ပြောင်းလဲသွားပြီး ကိစ္စရပ်များစွာ ဖြစ်ပျက်သွားလိမ့်မည်ဟု သူ မမျှော်လင့်ထားခဲ့ပေ။</p> <p style="text-align:justify">သူက စိတ်ကို တည်ငြိမ်စေရန် အသက် ပြင်းပြင်းတစ်ချက် ရှူပြီးနောက် ပြောလိုက်သည်။</p> <p style="text-align:justify">“ငါတို့ လုပ်စရာရှိတာ လုပ်ရမှာပဲ... ဧကရီက မိစ္ဆာအသီးသီးကို လက်ခံဖို့ အမိန့်ပေးထားမှတော့ သူ့ညွှန်ကြားချက်အတိုင်း ငါတို့ လိုက်နာရမယ်... ဒါပေမဲ့ နောက်ကွယ်က ရည်ရွယ်ချက်ရှိတဲ့သူတွေ ဒါကို အခွင့်ကောင်းမယူနိုင်အောင် ငါတို့ဘက်က တင်းတင်းကျပ်ကျပ် စစ်ဆေးမှုတွေ လုပ်ရမယ်... မျိုးနွယ်စု နှစ်စုကြားက ဆက်ဆံရေးကတော့ ငါတို့ ထိန်းချုပ်နိုင်တဲ့ အရာမှ မဟုတ်တာ… တစ်လှမ်းချင်းစီပဲ ရှေ့ဆက်သွားကြတာပေါ့...”</p> <p style="text-align:justify">“ဒီလက်အောက်ငယ်သား နာခံပါ့မယ်...”</p> <p style="text-align:justify">ရှောင်ကျူးနှင့် အခြားသူများက ဘာလုပ်ရမည်ကို သိကြ၏။</p> <p style="text-align:justify">မိစ္ဆာများ ထွက်ခွာသွားပြီးနောက် ဖူရှောင်ကွမ်းက ယွင်ရှောင်စင်မြင့်ပေါ်သို့ တက်သွားသည်။ သူက အထက်စီးနေရာမှနေ၍ ရှောက်တောင်ခြေတွင် တဖြည်းဖြည်း တည်ဆောက်နေသော မိစ္ဆာဈေးတန်းကို ငုံ့ကြည့်လိုက်ရာ သူ၏ မျက်လုံးများက အရောင်လက်သွား၏။</p> <p style="text-align:justify">ဤသူများက မြေအောက် မိစ္ဆာဈေးတန်းမှ ရွှေ့ပြောင်းလာသော မိစ္ဆာများ ဖြစ်ကြသည်။ သူတို့ကို အုပ်စုလေးစု ခွဲ၍ ယွီတောင်တန်း၏ အရပ်လေးမျက်နှာ ပတ်လည်တွင် နေရာချထားပေး၏။ သူတို့ကို ကြည့်ခြင်းအားဖြင့် မျိုးနွယ်စု နှစ်စုကြား ဆိုးရွားလာသော ဆက်ဆံရေးကို မြင်တွေ့နိုင်ပေသည်။</p> <p style="text-align:justify">သူက ဓမ္မနယ်ပယ်၏ ပဉ္စမမြောက် ကောင်းကင်ဘုံ အဆင့်တွင် ရှိနေပြီ ဖြစ်သော်လည်း အမှန်တကယ် စွမ်းအားကြီးမားသော သိုင်းပညာရှင်များနှင့် နှိုင်းယှဉ်လျှင် အရေးမပါသေးချေ။ အကယ်၍ မျိုးနွယ်စု နှစ်စုကြား စစ်ပွဲသာ ပြန်လည်စတင်ခဲ့လျှင် ယွီတောင်တန်းလည်း ထိုစစ်ပွဲထဲသို့ ဆွဲသွင်းခံရနိုင်ချေ အလွန်များပြား၏။</p> <p style="text-align:justify">ယင်ဆန်းဂိုဏ်း ဖြစ်စေ၊ ဓားနတ်ဘုရားတောင်တန်း ဖြစ်စေ သို့မဟုတ် ဆုရှင်းဂိုဏ်း ဖြစ်စေ သူတို့က ဤအခွင့်အရေးကောင်းကို လက်လွှတ်ခံမည် မဟုတ်ပေ။ ထိုအချိန်ရောက်လျှင် အခြေအနေက ယွီတောင်တန်းအတွက် အဆင်ပြေမည် မဟုတ်ချေ။</p> <p style="text-align:justify">ဧကရီယွီလီက တိုက်ခိုက်ရေးတွင် သန်မာသည်ဆိုဦးတော့၊ လက်နှစ်ဖက်က လက်လေးဖက်ကို မယှဉ်နိုင်ပေ။ အသိုက်တစ်ခု မှောက်ကျသွားလျှင် မည်သည့်ဥမှ အကောင်းပကတိ ကျန်ရစ်မည် မဟုတ်ချေ။ သူလည်း ဒုက္ခရောက်မည်ဖြစ်ပြီး သူ၏ အသက်အန္တရာယ် ကြုံတွေ့ရကာ သူ၏ တာအိုလမ်းစဉ်လည်း ပျောက်ကွယ်သွားနိုင်၏။</p> <p style="text-align:justify">ဒီလို အဖြစ်ခံလို့ မရဘူး...</p> <p style="text-align:justify">ထိုသို့တွေးရင်း ဖူရှောင်ကွမ်းက သူ၏ စိတ်ကို တည်ငြိမ်အောင်ထားကာ သူရရှိထားသော သတင်းအချက်အလက်များကို ဖြည်းဖြည်းချင်း စတင် စုစည်းလိုက်သည်။ သူက အလွှာတစ်လွှာချင်းစီကို ခွာချကာ ဂရုတစိုက် တွက်ချက် ခန့်မှန်းကြည့်လိုက်၏။</p> <p style="text-align:justify">မသိလိုက်မသိဘာပင် သူ၏ စိတ်ထဲတွင် အတွေးတစ်ခု ဖြတ်ခနဲ ဝင်လာသည်။ သူ၏ ခန္ဓာကိုယ်က အချိန်ရေစီးကြောင်း စွမ်းအားများဖြင့် လွှမ်းခြုံသွားပြီး မျက်စိတစ်မှိတ်အတွင်းမှာပင် ရှောက်တောင်ပေါ်မှ ထွက်ခွာသွားတော့သည်။</p> <p style="text-align:justify">…</p> <p style="text-align:justify">ဘီယွင်ရေကန်၊ တိမ်ပြာကျွန်း…</p> <p style="text-align:justify">ယွီလီက အခန်း၏ ထိပ်ဆုံးနေရာတွင် ထိုင်၍ ဝိုင်အိုးတစ်အိုးကို ညင်သာစွာ လှုပ်ခါနေ၏။ တစ်ငုံ သောက်လိုက်ပြီးနောက် သူက ပြောလိုက်သည်။</p> <p style="text-align:justify">“ပိုးကောင်လေး မင်း တံခါးပိတ်ကျင့်ကြံရာကနေ ထွက်လာပြီလား... လူသားမျိုးနွယ်စုရဲ့ မင်းသား အသတ်ခံရတဲ့ ကိစ္စနဲ့ပတ်သက်ပြီး ရောက်လာတာမလား...”</p> <p style="text-align:justify">ဖူရှောင်ကွမ်းက အရိုအသေပေးကာ ပြောလိုက်၏။</p> <p style="text-align:justify">“ဧကရီကို ဘာမှ ဖုံးကွယ်ထားလို့ မရပါဘူး...”</p> <p style="text-align:justify">ယွီလီက လွတ်လပ်ပေါ့ပါးစွာ မှီထိုင်လျက် ဂရုမစိုက်သည့်ဟန်ဖြင့် မေးလိုက်သည်။</p> <p style="text-align:justify">“မင်း ဘာပြောချင်တာလဲ… ဒါမှမဟုတ် ဘာမေးချင်တာလဲ...”</p> <p style="text-align:justify">ဖူရှောင်ကွမ်းက ပွင့်ပွင့်လင်းလင်းပင် ပြောလိုက်၏။</p> <p style="text-align:justify">“ရာထူးချခံထားရတဲ့ လူသားမျိုးနွယ်စု မင်းသား သေဆုံးမှုနဲ့ ပတ်သက်ပြီး သံသယဖြစ်စရာ တစ်ခုခု ရှိနေတယ်လို့ ကျွန်တော် ခံစားရတယ်... တစ်စုံတစ်ယောက်က ကျွန်တော်တို့ မိစ္ဆာမျိုးနွယ်စုနဲ့ လူသားမျိုးနွယ်စုကြားက ဆက်ဆံရေးကို ဖျက်ဆီးဖို့၊ နှစ်ဖက်ကြား စစ်ပွဲဖြစ်လာအောင် ရည်ရွယ်ချက်ရှိရှိနဲ့ နောက်ကွယ်ကနေ ထောင်ချောက်ဆင်နေသလိုပဲ...”</p> <p style="text-align:justify">“ဘယ်လိုဖြစ်လို့လဲ...”</p> <p style="text-align:justify">ယွီလီက နောက်ထပ်  ဝိုင်တစ်ငုံသောက်လျက် မေးလိုက်သည်။</p> <p style="text-align:justify">ဖူရှောင်ကွမ်းက သူ၏ သုံးသပ်ချက်များကို ချပြလိုက်၏။</p> <p style="text-align:justify">“ရာထူးချခံရတဲ့ မင်းသားက သာမန်အရပ်သားအဖြစ် လျှော့ချခံလိုက်ရရင်တောင် သူက ဧကရာဇ်ရဲ့ သားတော် ဖြစ်နေတုန်းပဲလေ... သွေးက ရေထက် ပျစ်တယ် မဟုတ်လား... ကိုယ့်သားသမီးကို ကိုယ်တိုင် မြေမြှုပ် သင်္ဂြိုဟ်လိုက်ရတဲ့အတွက် အိုမင်းနေတဲ့ ဧကရာဇ်က သေချာပေါက် ကျေနပ်မှာ မဟုတ်ဘူး...”</p> <p style="text-align:justify">“ဒေါသအလျောက် သူက အဆုံးထိတိုင် စုံစမ်းစစ်ဆေးလိမ့်မယ်... မိစ္ဆာမျိုးနွယ်စု ပါဝင်ပတ်သက်နေတယ်ဆိုတဲ့ သဲလွန်စတွေ ထွက်ပေါ်လာတာနဲ့ မျိုးနွယ်စု နှစ်စုကြား ဆက်ဆံရေးက တင်းမာသွားလိမ့်မယ်... ဒီအချိန်မှာ တခြားတစ်ခုခု ထပ်ဖြစ်လာမယ်ဆိုရင် စစ်ပွဲ ပြန်စသွားဖို့ သိပ်ကို သေချာနေပြီ...”</p> <p style="text-align:justify">“ဒီကိစ္စရဲ့ နောက်ကွယ်မှာ ဘယ်သူရှိနေတယ်လို့ မင်း ထင်လဲ...”</p> <p style="text-align:justify">“မင်းသားနဲ့ ရန်ငြိုးရှိတဲ့ မိစ္ဆာတစ်ကောင် ဖြစ်နိုင်သလို လူသားမျိုးနွယ်စုအပေါ် နာကြည်းချက်ရှိတဲ့ မိစ္ဆာတစ်ကောင်လည်း ဖြစ်နိုင်တယ်… ဒါမှမဟုတ် တောင်ထိပ်ပေါ်ကနေ ကျားနှစ်ကောင် သတ်ပုတ်နေတာကို ကြည့်ချင်တဲ့ တခြားအင်အားစု တစ်ခုခုက မိစ္ဆာမျိုးနွယ်စုနဲ့ လူသားမျိုးနွယ်စု နှစ်ဖက်စလုံးကို နစ်နာသွားအောင် လုပ်တာလည်း ဖြစ်နိုင်တယ်...”</p> <p style="text-align:justify">“မင်းရဲ့ သုံးသပ်ချက်က အတော်လေး အဓိပ္ပာယ်ရှိတယ်... မင်း ဘာဆက်လုပ်ဖို့ စီစဉ်ထားလဲ...”</p> <p style="text-align:justify">“ဘုရင်မအနေနဲ့ စာတစ်စောင်ရေးပြီး မဟာယွီ ဧကရာဇ်ဆီ ဆုန်ဝမ်ထောင်ကတစ်ဆင့် ပေးပို့ခိုင်းလို့ ရပါတယ်... ကျွန်တော်တို့ ယွီတောင်တန်းက အခုမှ အင်အားစတင် ကြီးမားလာတာဆိုတော့ ပြီးခဲ့တဲ့ နှစ်နှစ်အတွင်းမှာ အဆက်မပြတ် ဆူပူအုံကြွမှုတွေနဲ့ ပြည့်နှက်နေခဲ့တာ...”</p> <p style="text-align:justify">“ကျွန်တော်တို့အနေနဲ့ နောက်ထပ် ပြဿနာတွေကို ထပ်ပြီး ရင်မဆိုင်နိုင်သေးဘူး… ကျွန်တော်တို့ရဲ့ အခြေခံအုတ်မြစ်ကို တည်ဆောက်ဖို့နဲ့ အင်အားပြန်ဖြည့်တင်းဖို့ အချိန်လိုအပ်တယ်...”</p> <p style="text-align:justify">ထိုစကားကို ကြားသောအခါ ယွီလီက လှပစွာ ပြုံးလိုက်၏။</p> <p style="text-align:justify">“မင်းက ဒီလိုမျိုး တွေးတောနိုင်မှတော့ ယွီတောင်တန်းကို မင်းလက်ထဲ အပ်ထားခဲ့ဖို့ ငါ စိတ်ချရပြီ...”</p> <p style="text-align:justify">ဖူရှောင်ကွမ်းမှာ အနည်းငယ် မှင်တက်သွားပြီး နားမလည်နိုင်စွာဖြင့် မေးလိုက်သည်။</p> <p style="text-align:justify">“ဘုရင်မက တံခါးပိတ် ကျင့်ကြံတော့မလို့လား...”</p> <p style="text-align:justify">“ဟုတ်လည်း ဟုတ်တယ်၊ မဟုတ်လည်း မဟုတ်ဘူး...”</p> <p style="text-align:justify">ယွီလီက ရှင်းပြလိုက်၏။</p> <p style="text-align:justify">“ဒီအတောအတွင်း ငါက ဝမ်မုသစ်တောနဲ့ စာတွေ အများကြီး အပြန်အလှန် ပေးပို့ခဲ့ပြီးတော့ အခေါင်းပေါက် ဝါးပင်အကြောင်း သတင်းအချက်အလက် တော်တော်များများကို စုဆောင်းရရှိခဲ့တယ်... သူက ရှေးဟောင်းခေတ်က ဝါးဘိုးဘေးကြီးတွေထဲက တစ်ပါးဖြစ်ပြီး သူ့ရဲ့ အမွေအနှစ်က ငါ့အတွက် အခွင့်အရေးတစ်ခုပဲ...”</p> <p style="text-align:justify">“မကြာသေးခင်ကမှ အခေါင်းပေါက် ဝါးတံဆိပ်ပြားက သတင်းတစ်ခု ပို့လာတယ်... အခု ဝါးတံဆိပ်ပြား သုံးခုစလုံး ပိုင်ရှင်ကိုယ်စီ ရှိသွားကြပြီတဲ့... ရှစ်လပိုင်း ဆယ့်ငါးရက် လပြည့်ညရောက်ရင် လျှို့ဝှက်နယ်မြေထဲ ဝင်ရောက်ဖို့ လမ်းကြောင်း ပွင့်လာလိမ့်မယ်... အဲဒီအချိန်ကျရင် ငါက အမွေအနှစ်ကို လုယူဖို့အတွက် မူလဝိညာဉ်ကို ခန္ဓာကိုယ်ကနေ ခွဲထုတ်သွားရမှာမို့ တခြားကိစ္စတွေအတွက် အချိန်ရှိမှာ မဟုတ်ဘူး...”</p> <p style="text-align:justify">“ဂုဏ်ယူပါတယ် ဘုရင်မ... ဆန္ဒတွေ ပြည့်ဝပါစေ...”</p> <p style="text-align:justify">ဖူရှောင်ကွမ်းက ဝမ်းသာမှုနှင့် စိုးရိမ်မှု ရောထွေးနေသော ခံစားချက်ဖြင့် ပြောလိုက်သည်။</p> <p style="text-align:justify">ယွီလီက ဝိုင်ကို တစ်ကျိုက်မော့သောက်လိုက်ပြီးနောက် ဆက်ပြော၏။</p> <p style="text-align:justify">“မဟာယွီ ဧကရာဇ်ဆီ စာရေးဖို့ ကိစ္စကတော့ မလိုအပ်ပါဘူး...”</p> <p style="text-align:justify">“မဟာယွီမင်းဆက်ကို တည်ထောင်နိုင်ခဲ့တဲ့ အိုမင်းနေတဲ့ ဧကရာဇ်က သတိမေ့နေတဲ့ သူအိုကြီး မဟုတ်ဘူးလေ... အစပိုင်းမှာတော့ သူက ဒေါသအလျောက် လှုပ်ရှားကောင်း လှုပ်ရှားလိမ့်မယ်… ဒါပေမဲ့ သူ မြန်မြန်ဆန်ဆန်ပဲ ပြန်တည်ငြိမ်သွားပြီး အခြေအနေကို ထိုးထွင်းမြင်နိုင်လိမ့်မယ်...”</p> <p style="text-align:justify">“နောက်ကွယ်မှာ မိစ္ဆာမျိုးနွယ်စုရဲ့ အကြံအစည်တွေ တကယ်ပဲ ရှိနေတယ်ဆိုရင်တောင် ယွီတောင်တန်းက ပါဝင်ပတ်သက်ခြင်း မရှိတာမို့ အိုမင်းနေတဲ့ ဧကရာဇ်က ငါတို့အပေါ် ဒေါသပုံချလောက်တဲ့အထိ မမိုက်မဲဘူး... သူက တကယ့် တရားခံဆီကနေပဲ ပြဿနာကို ရှာလိမ့်မယ်… အလွန်ဆုံးရှိ ငါတို့ ယွီတောင်တန်းကို စောင့်ကြည့်သတိထားရုံလောက်ပဲ ရှိမှာပါ...”</p> <p style="text-align:justify">ဖူရှောင်ကွမ်းက အိပ်မက်မှ လတ်တလော နိုးထလာသကဲ့သို့ ခံစားလိုက်ရသည်။</p> <p style="text-align:justify">“ဘုရင်မက ဉာဏ်ပညာ ကြီးမားလှပါတယ်... ကျွန်တော် အများကြီး သင်ယူလိုက်ရပါပြီ...”</p> <p style="text-align:justify">သူက အလွန်အမင်း စိုးရိမ်ပူပန်နေခဲ့သဖြင့် သူ၏ တည်ငြိမ်မှုကို ဆုံးရှုံးခဲ့ရခြင်း ဖြစ်၏။</p> <p style="text-align:justify">တိုင်းပြည်တည်ထောင်ခဲ့သော ဧကရာဇ်တစ်ပါးက အဘယ်ကြောင့် သာမန် ညံ့ဖျင်းသူတစ်ယောက် ဖြစ်နိုင်မည်နည်း။ လက်ရှိ လူသားမျိုးနွယ်စု၏ လှုပ်ရှားမှုတွင် နောက်ကွယ်မှ တွန်းအားပေးနေသော အင်အားစု အသီးသီးအပြင်၊ အိုမင်းနေသော ဧကရာဇ် ကိုယ်တိုင်က သူတို့၏ ကစားကွက်ကို အသုံးချကာ တစ်ခုခုကို စီစဉ်နေခြင်းလည်း ဖြစ်နိုင်၏။</p> <p style="text-align:justify">လွန်ခဲ့သည့် နှစ်အနည်းငယ်အတွင်း သတ်ဖြတ်မှုများကို မကြာခဏ ကြုံတွေ့ခဲ့ရသောကြောင့် သူက အလွန်အကျွံ တုံ့ပြန်မိခဲ့ခြင်း ဖြစ်သည်။</p> <p style="text-align:justify">ယွီလီက ပြုံး၍ ပြောလိုက်သည်။</p> <p style="text-align:justify">“တံခါးပိတ် ကျင့်ကြံရာကနေ ထွက်ထွက်ချင်းမှာပဲ မင်း ဒါကို တွေးမိတာက တော်တော်လေး ကောင်းနေပါပြီ...”</p> <p style="text-align:justify">အမှန်တကယ်တော့ ထိုအချက်ကို နားလည်သဘောပေါက်ရန် သူမကိုယ်တိုင်ပင် လဝက်ခန့် အချိန်ယူ စဉ်းစားခဲ့ရခြင်း ဖြစ်၏။ သို့သော်လည်း ထိုကိစ္စကို သူမ ဖွင့်ပြောပြမည် မဟုတ်ချေ။</p> <p style="text-align:justify">ဘုရင်မ တစ်ပါးအနေဖြင့် သူမက ဉာဏ်ပညာကြီးမားပြီး ထက်မြက်သူတစ်ဦး ဖြစ်နေရမည် မဟုတ်ပါလား။</p> <p style="text-align:justify">ရင်ထဲမှ ဝန်ထုပ်ဝန်ပိုးကြီး ကျဆင်းသွားသည်နှင့် ဖူရှောင်ကွမ်းက မထွက်ခွာမီ ကျင့်ကြံခြင်းဆိုင်ရာ အခက်အခဲ အချို့နှင့် ပတ်သက်၍ ဧကရီယွီလီထံမှ လမ်းညွှန်မှုများ တောင်းခံခဲ့သည်။</p> <p style="text-align:justify">…</p> <p style="text-align:justify">ရှောက်တောင်၊ ဆွေ့ရွှီးနန်းတော်…</p> <p style="text-align:justify">ဖူရှောင်ကွမ်းက ကြန့်ကြာနေသော ကိစ္စရပ်များကို ကိုင်တွယ်ဖြေရှင်းပြီး မိစ္ဆာများကို အားပေးစကားပြောကာ သူတို့၏ သက်ဆိုင်ရာ တာဝန်များကို ထမ်းဆောင်ရန် အမိန့်ပေးပြီးနောက် သူ၏ အာရုံကို ပြောင်းလဲလိုက်သည်။ သူက နေ့စဉ် ချီစွမ်းအင် စုဆောင်းခြင်း၊ ခန္ဓာကိုယ်သန့်စင်ခြင်းနှင့် ဝိညာဉ်အာရုံကို သွေးအေးလေ့ကျင့်ခြင်းများအပြင် လွန်ခဲ့သည့်အချိန်က ဧကရီယွီလီ ပေးအပ်ခဲ့သော မြေဓာတ် နည်းစနစ် နှစ်ခုအပေါ် အာရုံစိုက်လိုက်၏။</p> <p style="text-align:justify">တစ်ခုက မြေလျှိုး နည်းစနစ် ဖြစ်သည်။ ထိုနည်းစနစ်က မြေကြီးထဲတွင် လွတ်လပ်စွာ သွားလာနိုင်စေ၏။</p> <p style="text-align:justify">အခြားတစ်ခုကတော့ မြေတံတိုင်း နည်းစနစ် ဖြစ်သည်။ ဤနည်းစနစ်ကတော့ တိုက်ခိုက်မှုများကို ကာကွယ်ရန်အတွက် မြေကြီးဖြင့် တံတိုင်းများ တည်ဆောက်နိုင်စွမ်း ရှိသည်။</p> <p style="text-align:justify">နည်းစနစ် နှစ်ခုစလုံးက အရည်အသွေးကောင်းမွန်ပြီး တိုက်ခိုက်ရေး နည်းစနစ်တစ်ခုဖြစ်သော သဲစီးကြောင်း နည်းစနစ်နှင့် အပြန်အလှန် အထောက်အကူ ပြုနေသည်။ ထိုနည်းစနစ်များထံမှ သူ၏ ကိုယ်ပိုင် နည်းစနစ်များကို နားလည်သဘောပေါက်နိုင်မည်လား ဆိုသည်ကတော့ သူ၏ ကိုယ်ပိုင် စုဆောင်းမှု၊ နားလည်နိုင်စွမ်းနှင့် ကံကြမ္မာအပေါ်တွင်သာ မူတည်နေ၏။</p> <p style="text-align:justify">အချိန်များက ချောက်ကမ်းပါးကို ဖြတ်ကျော်သွားသော မြင်းဖြူတစ်ကောင်ပမာ လျင်မြန်စွာ ကုန်ဆုံးသွားပြီး ဆောင်းဦး၏ အအေးဓာတ်က တစ်နေ့ထက်တစ်နေ့ ပိုမို လေးလံလာသည်။ သူတို့ထံ လာရောက်ပူးပေါင်းသော မိစ္ဆာများ အဆက်မပြတ် ဝင်ရောက်လာသည်မှလွဲ၍ ယွီတောင်တန်းက စနစ်တကျ ဖွံ့ဖြိုးတိုးတက်လာခဲ့၏။</p> <p style="text-align:justify">ထိုကာလအတွင်း ကျူးယွင်က နောက်ဆုံးတွင် ဓမ္မနယ်ပယ်၏ တတိယမြောက် ကောင်းကင်ဘုံသို့ ခြေချနိုင်ခဲ့ပြီး ဝက်ခေါင်းနှင့် မိန်းကလေးတစ်ဦးအဖြစ် တစ်စိတ်တစ်ပိုင်း အသွင်ပြောင်းလဲနိုင်ခဲ့ကာ တန်းခန်း သွေးဆက်ခံသူ၏ အငွေ့အသက် အနည်းငယ်ကို နိုးထစေနိုင်ခဲ့သည်။</p> <p style="text-align:justify">ဤသည်က သူမအပြင် ဝက်အဖေနှင့် ဝက်အမေတို့ကိုပါ အလွန်တရာ ဝမ်းသာပျော်ရွှင်သွားစေ၏။ သူတို့က ဆွေမျိုးမိတ်ဆွေများအတွက် ချက်ချင်းပင် စားသောက်ပွဲကြီးတစ်ခု ကျင်းပပေးခဲ့ကြသည်။</p> <p style="text-align:justify">ဖူရှောင်ကွမ်းကလည်း သူ၏ သူငယ်ချင်းအတွက် သဘာဝကျကျပင် ပျော်ရွှင်နေခဲ့၏။ သူက တစ်ညလုံး အရက်သောက်ပြီး မိုးလင်းမှသာ အိမ်ပြန်ရောက်တော့သည်။</p> <p style="text-align:justify">ရှစ်လပိုင်း ဆယ့်လေးရက်နေ့ ည၊ ဝါးမျှော်စင်…</p> <p style="text-align:justify">မိစ္ဆာသခင် လေးပါး ဤနေရာတွင် စုဝေးရောက်ရှိနေကြ၏။</p> <p style="text-align:justify">ထိုစဉ် ယွီလီ ထွက်ပေါ်လာသည်။ သူမက လျှို့ဝှက်နယ်မြေထဲ ဝင်ရောက်မည့် သူမ၏ အစီအစဉ်ကို ပြောပြပြီးနောက် ယွီတောင်တန်းကို မိစ္ဆာသခင် လေးပါးထံ ယာယီ လွှဲအပ်ခဲ့၏။ အထူး သတိထားရန်၊ တည်ငြိမ်မှုကို ဦးစားပေးရန်၊ ဆုံးဖြတ်ရခက်သည့်အခါ အချင်းချင်း တိုင်ပင်ဆွေးနွေးရန်နှင့် ဆုံးဖြတ်ချက် မချနိုင်သေးပါက ဖူရှောင်ကွမ်း၏ ဆုံးဖြတ်ချက်ကို လိုက်နာရန် သူတို့ကို ညွှန်ကြားခဲ့သည်။</p> <p style="text-align:justify">ကျန်သည့် မိစ္ဆာသခင် သုံးပါးက ဤကိစ္စကို ကန့်ကွက်ခြင်း မရှိပေ။ သန်မာသူကို လေးစားခြင်းက စည်းမျဉ်းတစ်ခု ဖြစ်၏။</p> <p style="text-align:justify">ထို့ပြင် ဖူရှောင်ကွမ်း၏ စွမ်းဆောင်ရည်များက လူတိုင်း၏ မျက်စိရှေ့တွင် ထင်ရှားနေသည်။ နှုတ်လှန်ထိုးတတ်သော မီးလျှံနီပင်လျှင် ဖူရှောင်ကွမ်းအပေါ် ကြောက်ရွံ့ရိုသေစိတ် ရှိနေ၏။</p> <p style="text-align:justify">ညွှန်ကြားချက်များ ပေးပြီးနောက် ယွီလီက တံခါးပိတ် ကျင့်ကြံရန် ဝင်သွားခဲ့သည်။</p> <p style="text-align:justify">မိစ္ဆာသခင် လေးပါးကလည်း အတိတ်အကြောင်းများကို ခဏတဖြုတ် စကားစမြည်ပြောပြီးနောက် ထွက်ခွာသွားကြ၏။</p> <p style="text-align:justify">တစ်ချိန်တည်းမှာပင် ရေကန်ထဲတွင် လှေစီးရင်း မဟာပညာရှိမှတ်တမ်း၏ 'ကောင်းကင်ဘုံကို မွှေနှောက်ခြင်း' အမည်ရှိ အခန်းသစ်ကို ဖတ်နေသော ဝတ်ရုံဖြူ မိစ္ဆာဘုရင်က မျက်မှောင်ကြုတ်သွားသည်။ ဇာတ်လမ်းအကြောင်းအရာက အံ့မခန်းဖြစ်ပြီး အလွန် ဖတ်ကောင်းသော်လည်း ယခုအချိန်တွင် သူ အနည်းငယ် မကျေမနပ် ဖြစ်နေ၏။</p> <p style="text-align:justify">သူက ဖုန်းယွမ်မြို့ဘက်သို့ လှမ်းကြည့်လိုက်ရာ သူ၏ အကြည့်များက အဆုံးအစမရှိသော ရေအေးကန်ကြီးတစ်ခုကဲ့သို့ နက်ရှိုင်းနေသည်။</p> <p style="text-align:justify">“ယွီဧကရာဇ်ဆီက မျှော်လင့်ထားတဲ့အတိုင်းပဲ... ဒါပေမဲ့ ဒီကစားပွဲက အခုမှ စရုံပဲ ရှိသေးတာ... ဘယ်သူက အောင်ပွဲခံမလဲဆိုတာ မသိရသေးဘူး...”</p> <p style="text-align:justify">ထို့နောက် သူက တောင်ဘက်သို့ ခေါင်းလှည့်ကြည့်လိုက်၏။</p> <p style="text-align:justify">တောင်ကြီးတစ်လုံးအတွင်း၌ မီးတောက်များက ကောင်းကင်ယံသို့ ထိုးတက်နေပြီး လက်နက်များ၏ အငွေ့အသက်က ကျောချမ်းဖွယ်ရာ ကောင်းလှသည်။</p> <p style="text-align:justify">မိစ္ဆာမျိုးနွယ်စုမှာ လူသားမျိုးနွယ်စု စစ်တပ်၏ သတ်ဖြတ်ခြင်းကို ခံနေရချေပြီ။</p> <p style="text-align:justify">…</p> <p style="text-align:justify"> </p> <p style="text-align: center;">***</p> <p style="text-align:justify"> </p>


Save