BIT

Title

Show in VIP/Series

Status (Active / Inactive)

<h2 style="text-align: center;">ရှေးဟောင်း ကူး မှော်ပညာ</h2>

မြေပြင်က ဖြူဖွေးနေပြီး လေက အေးစက်ကာ နှင်းပွင့်များက လက်ဝါးအရွယ်ခန့် ကြီးမားလှသည်။

အချိန်များက မျက်စိတစ်မှိတ်အတွင်း ကုန်ဆုံးသွားပြီး ယခုအခါ ပြက္ခဒိန်၏ ဆယ့်နှစ်လပိုင်းသို့ ရောက်ရှိလာခဲ့ပြီ ဖြစ်၏။ ယွီတောင်တန်းတွင် မည်သည့်ပြဿနာမှ မရှိသော်လည်း တောင်အပြင်ဘက်ရှိ အခြေအနေကတော့ တစ်နေ့တခြား ပိုမို ဆိုးရွားလာနေသည်။

သတင်းများက ယွီတောင်တန်းထဲသို့ အဆက်မပြတ် ဝင်ရောက်လာပြီး မိစ္ဆာသခင် လေးပါးကို တစ်လလျှင် တစ်ကြိမ် စုဝေးကာ ဆွေးနွေးတိုင်ပင်ရန် အကြောင်းဖန်လာ၏။

ဆောင်းရာသီ အစပြုချိန်မှာပင် မဟာယွီ၏ ယုံပြည်နယ်၌ ထူးဆန်းသော ကိစ္စတစ်ခု ဖြစ်ပွားခဲ့သည်။

ရာထူးကြီး အရာရှိ အတော်များများ၏ မိသားစုများမှ ကလေးငယ်များ ခိုးယူခံခဲ့ရပြီး အစိုးရ၏ အပြည့်အဝ စုံစမ်းစစ်ဆေးမှုများကလည်း အချည်းနှီးသာ ဖြစ်ခဲ့၏။

ဤကိစ္စက ဧကရာဇ်၏ နားထဲသို့ ရောက်ရှိသွားပြီး ယွီဧကရာဇ် ကိုယ်တိုင် ပြင်းပြင်းထန်ထန် စုံစမ်းစစ်ဆေးရန် အမိန့်ပေးခဲ့သည်။ တော်ဝင် နက္ခတ္တဗေဒဌာနနှင့် တရားရေးစိစစ်မှု ခုံရုံးတို့ ပူးပေါင်းဆောင်ရွက်ခဲ့ကြပြီး နောက်ဆုံးတွင် ထိုကိစ္စက ကုဟော့ငှက်တစ်ကောင်၏ လက်ချက်ဖြစ်ကြောင်း ရှာဖွေတွေ့ရှိခဲ့ကြ၏။

ထိုသတ္တဝါက မိစ္ဆာတစ်ပိုင်းနှင့် သရဲတစ်ပိုင်း ဖြစ်သည်။ သူမ၏ ယခင်ဘဝက သာမန် လူသားအမျိုးသမီး တစ်ဦး ဖြစ်၏။ သူမ ကိုယ်ဝန်ဆောင်ထားသော ကလေးက ထူးခြားသော နေ့ရက်တွင် မွေးဖွားလာမည် ဖြစ်သောကြောင့် ဒေသခံ အရာရှိတစ်ဦးက စိတ်ဝင်စားသွားခဲ့သည်။

လူသိရှင်ကြားတွင်တော့ ကလေး ပျောက်ဆုံးသွားသည်ဟု သတင်းလွှင့်ခဲ့သော်လည်း အမှန်တကယ်တော့ သူမ၏ ခင်ပွန်းဖြစ်သူက ကလေးကို ထိုအရာရှိထံ ဈေးကောင်းကောင်းဖြင့် ရောင်းချခဲ့ခြင်း ဖြစ်၏။

အရာရှိက သူ၏ အိုမင်းနေသော ဖခင်၏ အသက်ကို ကယ်တင်ရန်အတွက် ကလေးကို ဆေးလုံးအဖြစ် ဖော်စပ်ရန် ဝယ်ယူခဲ့ခြင်း ဖြစ်သည်။

သူမ၏ ခင်ပွန်းက အရက်မူးပြီး ထိုကိစ္စကို ဖွင့်ပြောပြလိုက်ပြီးနောက် အမျိုးသမီးမှာ ရင်ကွဲမတတ် ခံစားခဲ့ရပြီး ခင်ပွန်းဖြစ်သူကို သတ်ဖြတ်ကာ အိမ်တွင် ကြိုးဆွဲချ သေဆုံးသွားခဲ့၏။ သေဆုံးပြီးနောက် သူမ၏ နာကြည်းနေသော ဝိညာဉ်က မကျွတ်လွတ်ဘဲ ကံကောင်းမှု တစ်ခုနှင့် ကြုံတွေ့ခဲ့ရသည်။

သူမက နှစ်တစ်ရာတည်းနှင့် ဓမ္မနယ်ပယ်၏ ပဉ္စမမြောက် ကောင်းကင်ဘုံအဆင့် ကုဟော့ငှက်တစ်ကောင်အဖြစ် အသွင်ပြောင်းလဲသွားပြီး ကလဲ့စားချေရန် ပြန်လာခဲ့ခြင်း ဖြစ်၏။ သူမ ဖမ်းဆီးသတ်ဖြတ်ခဲ့သော ကလေးများ အားလုံးက ထိုအရာရှိ၏ မျိုးဆက်များနှင့် ဆွေမျိုးများ ဖြစ်ကြသည်။

ဤဖြစ်ရပ်က ယုံပြည်နယ်မြို့တော်ကို တုန်လှုပ်သွားစေ၏။ နန်းတော်နှင့် ဂိုဏ်းများမှ ကျင့်ကြံသူများ ပူးပေါင်း၍ ထိုကုဟော့ငှက်မိစ္ဆာကို ဝိညာဉ်လွင့်စင် ပျောက်ကွယ်သွားသည်အထိ သတ်ဖြတ်ခဲ့သည်။

သို့သော်လည်း ကိစ္စက ဤမျှနှင့် မပြီးဆုံးသွားပေ။ ကုဟော့ငှက် သေဆုံးသွားခြင်းက သရဲဘုရင် တစ်ပါးကို ဒေါသထွက်သွားစေ၏။ အကြောင်းမှာ ထိုငှက်က သူ အချစ်ဆုံး ကိုယ်လုပ်တော် ဖြစ်နေသောကြောင့်ပင်။ ထို့ကြောင့် လမ်းတစ်လျှောက်ရှိ ရွာပေါင်း ခုနစ်ဆယ့်နှစ်ရွာနှင့် မြို့ငယ် သုံးမြို့မှာ သတ်ဖြတ်ခံလိုက်ရပြီး ယုံပြည်နယ်၏ လေနက်ချောက်ကမ်းပါးက မဟာယွီနှင့် ရန်ငြိုးဖွဲ့သွားတော့သည်။

ကံဆိုးမှုများက တစ်ခုတည်း လာလေ့မရှိပေ။

ဤဆောင်းရာသီ၏ ဒုတိယလတွင် လျန်ပြည်နယ်ရှိ ချန်းနျောင်းတောင်၌ မိစ္ဆာငှက်များ ဆူပူအုံကြွမှု ဖြစ်ပွားခဲ့သည်။ ဧရာမ မိစ္ဆာလှိုင်းလုံးကြီးက လျန်ပြည်နယ်မြို့တော်ကို တိုက်ခိုက်ခဲ့သဖြင့် လူသားများကြားတွင် သေဆုံးဒဏ်ရာရမှု အများအပြား ဖြစ်ပေါ်ခဲ့၏။

ယွီဧကရာဇ်က ဒေါသတကြီးဖြင့် မိစ္ဆာများကို နှိမ်နင်းရန် စစ်တပ်ကြီးတစ်ခု စေလွှတ်ခဲ့သည်။ တော်ဝင် နက္ခတ္တဗေဒဌာနနှင့် ဒေသခံ ကျင့်ကြံခြင်း ဂိုဏ်းများကလည်း ကူညီရန်အတွက် ချီသန့်စင်သူ အမြောက်အမြားကို စေလွှတ်ခဲ့ကြပြီး ကိုးထပ်ရွှမ်းမျှော်စင်ကလည်း အခြေအနေကို ထိန်းချုပ်ရန် နတ်ဘုရားသခင် တစ်ပါးကို စေလွှတ်ခဲ့၏။

လူသားများနှင့် ထိပ်တိုက်ရင်ဆိုင်ရချိန်တွင် ချန်းနျောင်းတောင်မှ မိစ္ဆာဘုရင် နှစ်ပါးဖြစ်သော ကူတျောက်နှင့် ကျိုနျောင်းတို့က လျန်ပြည်နယ်မြို့တော်မှ တစ်စုံတစ်ယောက်က သူတို့၏ သားသမီးများကို ခိုးယူသွားကြောင်း ရှင်းလင်းစွာ ပြောကြားခဲ့သည်။

တော်ဝင် နက္ခတ္တဗေဒဌာနက လူများစေလွှတ်၍ ရှာဖွေခဲ့သော်လည်း နှိပ်စက်ခံထားရသော အလောင်း အပိုင်းအစများကိုသာ တွေ့ရှိခဲ့ရ၏။ မိစ္ဆာဘုရင်များက ဒေါသထွက်သွားကြပြီး စစ်ပွဲကြီးတစ်ခု ပေါက်ကွဲလာတော့သည်။

လျန်ပြည်နယ်မှ မိစ္ဆာမျိုးနွယ်စုနှင့် လူသားမျိုးနွယ်စုတို့ ထိပ်တိုက်တွေ့ကြလေပြီ။

မဟာလျန် မျိုးနွယ်စု ၄၈ စု မဟာမိတ်အဖွဲ့က အခွင့်အရေးကို အသုံးချ၍ တောင်ကြားလမ်းကို တိုက်ခိုက်ကာ လျန်ပြည်နယ် နယ်စပ်ကို ကျူးကျော်ဝင်ရောက်ပြီး မီးရှို့၊ သတ်ဖြတ်၊ လုယက်ကြကာ မြို့နှစ်မြို့ကို အဆက်မပြတ် သိမ်းပိုက်နိုင်ခဲ့ကြသည်။

နယ်စပ်တစ်လျှောက်တွင် အချက်ပေး မီးခိုးငွေ့များနှင့် ပြင်းထန်သော တိုက်ပွဲများဖြင့် ပြည့်နှက်နေတော့၏။ ဖြစ်ရပ်တစ်ခုချင်းစီတိုင်းက ယွီတောင်တန်းမှ မိစ္ဆာသခင် လေးပါးကို ရှုပ်ထွေးနေသော အချိန်ကာလများအတွက် သက်ပြင်းချမိစေပြီး တစ်ချိန်တည်းမှာပင် ယွီတောင်တန်း ထိခိုက်မှု မရှိခဲ့သည့်အတွက် ကံကောင်းသည်ဟု ခံစားရစေသည်။

ထို့အတူ ရည်ရွယ်ချက် မကောင်းသူများ၏ ပစ်မှတ်ထားခံရခြင်းနှင့် ပဋိပက္ခများ မဖြစ်ပေါ်စေရန် သူတို့၏ လက်အောက်ခံ မိစ္ဆာငယ်များကို ကင်းလှည့်မှုများ တိုးမြှင့်လုပ်ဆောင်ရန် အမိန့်ပေးခဲ့ကြ၏။

…

ဆောင်းလယ်ကာလတွင် မြေပြင်က ငွေရောင်လွှမ်း၍ နှင်းများ ဖုံးလွှမ်းနေပြီး တောင်တန်းများကို နှင်းများက ပိတ်ဆို့ထားသည်။

ရှောက်တောင်၊ ဆွေ့ရွှီးနန်းတော်…

ဖူရှောင်ကွမ်းက အရှေ့ဘက်သို့ မျက်နှာမူ၍ မနက်ခင်း ခရမ်းရောင် ချီစွမ်းအင်ကို ရှူသွင်းနေ၏။ ခရမ်းရောင် မြူခိုးမျှင်များက ငွေရောင်အလင်းမှုန်လေးများနှင့် ရောယှက်ကာ ဖူရှောင်ကွမ်း၏ ပတ်လည်တွင် လှည့်ပတ်နေသည်။

ငွေရောင်ဆံပင်နှင့် လူငယ်လေးက ဗဟိုတွင် တင်ပျဉ်ခွေထိုင်နေပြီး မြင်ကွင်းမှာ နက်နဲဆန်းကြယ်ကာ အိပ်မက်တစ်ခုကဲ့သို့ ဖြစ်နေ၏။

နာရီဝက်ကြာပြီးနောက် သူ၏ ကျင့်ကြံခြင်း ပြီးဆုံးသွားသောအခါ ဖူရှောင်ကွမ်းက မျက်လုံးများကို ဖွင့်လိုက်ရာ ငွေရောင်သူငယ်အိမ်များက တောက်ပလင်းလက်နေသည်။

နှစ်နှစ်တိုင်တိုင် ကြိုးစားအားထုတ်ပြီးနောက် သူက နောက်ဆုံးတွင် 'နေရောင်ခြည် ရာသီဥတု နှစ်ဆယ့်လေးမျိုး' ဟု အမည်ရသော သူ၏ ကိုယ်ပိုင် အသက်ရှူနည်းစနစ်ကို ဖန်တီးနိုင်ခဲ့ပြီ ဖြစ်၏။

နေနှင့် လ၏ အနှစ်သာရများထံမှ ချီစွမ်းအင် စုဆောင်းမှုနှုန်းက နှစ်ဆတိုးလာရုံသာမက သူ၏ ဓမ္မစွမ်းအားကလည်း ပိုမိုမြန်ဆန်စွာနှင့် အရည်အသွေး ပိုမိုကောင်းမွန်စွာ စုဆောင်းနိုင်လာသည်။ ထို့ပြင် သူ၏ ကျင့်ကြံခြင်းကို အထောက်အကူ ပြုရန်အတွက် ရာသီလေးခု၏ တာအိုအနှစ်သာရနှင့် နေရောင်ခြည် ရာသီဥတု နှစ်ဆယ့်လေးမျိုး၏ ဝိညာဉ်အနှစ်သာရများကိုပါ အာရုံခံနိုင်လာ၏။

ယနေ့ စမ်းသပ်ကြည့်ရာတွင် ချီစွမ်းအင် စုဆောင်းသည့် တစ်ရက်တာက အတိတ်က ရက်အတော်ကြာ စုဆောင်းရသည်ထက် ပိုမို ကောင်းမွန်နေသည်။

သူ့ကိုယ်ပိုင် အသက်ရှူနည်းစနစ်ကို ဖန်တီးနိုင်ခဲ့ခြင်းက ဝမ်းသာစရာ ကိစ္စတစ်ခုပင်။ ထိုညတွင် ဖူရှောင်ကွမ်းနှင့် သူ၏ သူငယ်ချင်းများက ဝိုင်သောက်ရင်း သီချင်းဆိုကာ ပျော်ရွှင်စွာ အောင်ပွဲခံခဲ့ကြ၏။

ဒီနှစ် နှစ်သစ်ကူးနေ့တွင် ဧကရီယွီလီက တံခါးပိတ် ကျင့်ကြံရာမှ ထွက်မလာခဲ့ပေ။

မိစ္ဆာသခင် လေးပါးက မိစ္ဆာများကို ဦးဆောင်၍ ဘီယွင်ရေကန် ကမ်းစပ်မှနေ၍ တိမ်ပြာကျွန်းကို အဝေးမှ အရိုအသေပေးခဲ့ကြပြီးနောက် လမင်းကို ပူဇော်၍ ဆုတောင်းမှုများ ပြုလုပ်ခဲ့ကြသည်။ မိစ္ဆာဘုရင်မ မရှိသည်မှလွဲ၍ ပြီးခဲ့သည့်နှစ်ကနှင့် သိပ်မကွာခြားလှပေ။

အကယ်၍ ကွာခြားချက် တစ်ခုခုရှိသည် ဆိုလျှင် ပို၍ စည်ကားလာခြင်းပင်။ တောင်အပြင်ဘက်မှ ဝင်ရောက်လာသော မိစ္ဆာများကြောင့် ယွီတောင်တန်း မိစ္ဆာမျိုးနွယ်စု၏ လူဦးရေက နှစ်ဆတိုးလာပြီး အသစ်အဆန်းများစွာကို ယူဆောင်လာခဲ့သည်။

ဆောင်းရာသီ ကုန်ဆုံးပြီး နွေဦးပေါက်လာကာ နွေဦးမိုးခြိမ်းသံများ ထွက်ပေါ်လာ၏။ အရာခပ်သိမ်းက အင်းဆက်များ နိုးထချိန်သို့ ဝင်ရောက်လာပြီး သူတို့၏ တက်ကြွမှုများကို ပြန်လည်ရရှိလာကာ ယွီတောင်တန်းကလည်း အစိမ်းရောင်အသစ်များဖြင့် ဖုံးလွှမ်းသွားသည်။

ရှောက်တောင်ပေါ်တွင် ပုံရိပ်တစ်ခုက မြေကြီးထဲမှ လျှိုးထွက်လာသည်။ ထိုသူက ဖူရှောင်ကွမ်းပင်။

သူက ဆည်းဆာနေရောင်အောက်တွင် မြင်နေရပြီဖြစ်သော လဆန်းကို ကြည့်၍ အနည်းငယ် လှုပ်ရှားလိုက်ရာ သူ၏ ဓမ္မစွမ်းအားများက ခန္ဓာကိုယ်အနှံ့သို့ စီးဆင်းသွားသည်။ ထို့နောက် သူ၏ ခန္ဓာကိုယ်က ထပ်မံ ပျောက်ကွယ်သွားပြီး အမှန်တကယ်ပင် ဖမ်းယူရရှိထားသော နေနှင့် လ၏ ဝိညာဉ်အနှစ်သာရများကို ဖြတ်သန်းသွားလာနေ၏။

ထိုအခိုက်အတန့်မှာ အသက်ရှူချိန် အနည်းငယ်စာမျှသာ ကြာမြင့်သော်လည်း ဤသည်ကပင် ဖူရှောင်ကွမ်းကို အလွန်တရာ ဝမ်းသာပျော်ရွှင်သွားစေသည်။

သူက နောက်ဆုံးတွင် ဤမြေလျှိုးသိုင်းကို သူ၏ ကိုယ်ပိုင်အသုံးပြုမှုအတွက် ပြုပြင်မွမ်းမံနိုင်ခဲ့ပြီး အချိန်လွတ်မြောက်ခြင်း နည်းစနစ်ဖြစ်သော 'နေနှင့် လ လွတ်မြောက်ခြင်း' ကို ဖန်တီးနိုင်ခဲ့ပြီ ဖြစ်၏။

ထိုနည်းစနစ်က အချိန်၏ ဝိညာဉ်အနှစ်သာရကို ဖမ်းယူနိုင်ပြီး အချိန်ကွာဟချက်များကြားမှ ဖြတ်သန်း သွားလာနိုင်သည်။ အချိန်ရေစီးကြောင်း နတ်ဘုရားစွမ်းရည်နှင့် ပေါင်းစပ်လိုက်သောအခါ သူ၏ အမြန်နှုန်းက မျက်စိတစ်မှိတ်အတွင်း နှစ်ဆကျော် တိုးလာ၏။

အရေးအကြီးဆုံးအချက်မှာ သူက ဆဋ္ဌမမြောက် ကောင်းကင်ဘုံနှင့် ခြေတစ်လှမ်း ပိုနီးကပ်လာခြင်းပင်။ လက်ရှိတွင် တောင်အပြင်ဘက်ရှိ အခြေအနေများက လျင်မြန်စွာ ပြောင်းလဲနေပြီး မုန်တိုင်းတစ်ခု ကျရောက်လာတော့မည့် အရိပ်အယောင်များ ရှိနေသည်။ သူ၏ စွမ်းအား ပိုမို ကြီးမားလေလေ၊ ဆူပူအုံကြွမှုများ ယွီတောင်တန်းကို ဖြတ်သန်းသွားချိန်တွင် မိမိကိုယ်ကိုယ် ကာကွယ်နိုင်စွမ်း ပိုများလေလေပင် ဖြစ်၏။

ထိုသို့တွေးရင်း ဖူရှောင်ကွမ်းက မိစ္ဆာဘုရင်များ စုဝေးပွဲကို သတိရသွားသည်။

ယခင် ဖိတ်စာတွင် အလယ်ပိုင်းလွင်ပြင် မိစ္ဆာဘုရင်များ စုဝေးပွဲကို ယခုနွေဦးရာသီတွင် ကျားဟိန်းသံတောင်၌ ကျင်းပမည်ဟု ဖော်ပြထား၏။ မိစ္ဆာဘုရင် မည်မျှ တက်ရောက်ကြမည်နှင့် မည်ကဲ့သို့သော စည်းမျဉ်းများကို ဆွေးနွေးကြမည်ကို သူ သိချင်နေမိသည်။

ထိုသို့တွေးရင်း သူက ခါးဆွဲတံဆိပ်ပြားကို ထုတ်ယူကာ အခြား မိစ္ဆာသခင် သုံးပါးကို အကြောင်းကြားလိုက်သည်။

ကျားဟိန်းသံတောင်က အမြဲတမ်း စစ်လိုလားသော အုပ်စုတွင် ပါဝင်ခဲ့၏။ မိစ္ဆာဘုရင်များ စုဝေးပွဲ ပြီးနောက်တွင် မိစ္ဆာမျိုးနွယ်စုက ကြီးမားသော လှုပ်ရှားမှုများ ပြုလုပ်လာဖွယ် ရှိသည်။

ယွီတောင်တန်းက ပါဝင်ပတ်သက်ခြင်း မရှိသော်လည်း အချို့ကိစ္စများကိုတော့ ကြိုတင် ကာကွယ်ထားရမည် ဖြစ်၏။ ပြီးခဲ့သည့်နှစ်ကတည်းက သူတို့ ပြင်ဆင်နေခဲ့ကြသော်လည်း ယခု အချိန်နီးကပ်လာပြီဖြစ်၍ ပိုမို လုံခြုံအောင် လုပ်ဆောင်ရန် လိုအပ်နေသေးသည်။

…

မဟာယွီ၏ မြို့တော်၊ ဖုန်းယွမ်မြို့…

နန်းတော်တစ်ခုလုံးက လေးလံသော လေထုဖြင့် ဖုံးလွှမ်းနေ၏။ မိန်းမစိုးများ၊ နန်းတွင်းအစေခံများ၊ သက်တော်စောင့်များ၊ ကိုယ်လုပ်တော်များ၊ မင်းသမီးများနှင့် မင်းသားများ မည်သူမျှ ဤအချိန်တွင် ပြဿနာ မရှာရဲဘဲ ငြိမ်ငြိမ်သက်သက် နေနေကြသည်။ အဘယ်ကြောင့်ဆိုသော် လက်ရှိ ဧကရီမှာ နာမကျန်း ဖြစ်နေသောကြောင့်ပင်။

သူမနှင့် ဧကရာဇ်တို့က ငယ်စဉ်ကတည်းက ဇနီးမောင်နှံ ဖြစ်ခဲ့ကြပြီး အခက်အခဲများကို အတူတကွ ဖြတ်သန်းခဲ့ကြသူများ ဖြစ်သည်။ ယွီဧကရာဇ်က လောကကြီးကို သိမ်းပိုက်နေချိန်တွင် သူမက သူ၏ အရည်အချင်းရှိသော လက်ထောက်ဖြစ်ခဲ့ပြီး နောက်တန်းကို တည်ငြိမ်အောင် ထိန်းထားပေးခဲ့၏။

သူမက စစ်မြေပြင်တွင်လည်း သွေးထွက်သံယို တိုက်ပွဲများကို တိုက်ခိုက်ကာ ယွီဧကရာဇ်ကို ကယ်တင်ရန် တပ်ဖွဲ့များကို ဦးဆောင်ခဲ့ဖူးသည်။ သူမက စာပေရော၊ သိုင်းပညာပါ ကျွမ်းကျင်ပြီး အမျိုးသားများထက် မညံ့သော သူရဲကောင်း အမျိုးသမီးတစ်ဦး ဖြစ်၏။

ဧကရာဇ်နှင့် ဧကရီတို့က အချင်းချင်း အလွန် နက်ရှိုင်းသော သံယောဇဉ် ရှိကြသည်။

ဧကရီ၏ ဖျားနာမှုနှင့် ပတ်သက်၍ ယွီဧကရာဇ်မှာ အလွန်အမင်း စိုးရိမ်ပူပန်နေပြီး စိတ်အခြေအနေလည်း ဆိုးရွားနေ၏။ မျက်နှာသာပေးခံရဆုံး ကိုယ်လုပ်တော်တစ်ဦး စကားမှားပြောမိ၍ ငြင်းပယ်ခံရရုံသာမက သူ အနှစ်သက်ဆုံး မင်းသားပင်လျှင် အပြစ်တင်ခံခဲ့ရသည်။

တော်ဝင်ဆေးရုံမှ တော်ဝင် သမားတော်များမှာ ပို၍ပင် ဒုက္ခရောက်နေကြပြီး သူတို့၏ မုတ်ဆိတ်မွေးများပင် အစုလိုက်အပြုံလိုက် ကျွတ်ကျနေကြ၏။ သူတို့က ရောဂါအကြောင်းရင်းကို လုံးဝ ရှာမတွေ့နိုင်ဘဲ ဧကရီ ဘာကြောင့် သတိလစ် မေ့မြောနေရသနည်း ဆိုသည်ကို မသိကြပေ။

အံ့မခန်း ကုသနိုင်စွမ်းရှိသော ဆေးပညာကျောင်းတော်၏ ဆရာသခင် တစ်ဦးဖြစ်သည့် တော်ဝင်ဆေးရုံ၏ အကြီးအကဲပင်လျှင် ဧကရီ၏ နာကျင်မှုကို သက်သာအောင်သာ လုပ်ပေးနိုင်ခဲ့သည်။ သူက ရှေးဟောင်းဆေးကျမ်းများကို ပြန်လည်လေ့လာပြီးနောက် သံသယတစ်ခု ဖြစ်ပေါ်လာပြီး တော်ဝင် နက္ခတ္တဗေဒဌာန၏ အကြီးအကဲနှင့်အတူ ပူးပေါင်းတိုင်ပင်ဆွေးနွေးရန် မျှော်လင့်ချက်ဖြင့် ဧကရာဇ်ထံ တင်ပြခဲ့၏။

သူတို့က ဆက်တိုက် စစ်ဆေးမှုများနှင့် ဆွေးနွေးမှုများ ပြုလုပ်ပြီးနောက် ရောဂါအကြောင်းရင်းကို နောက်ဆုံးတွင် အတည်ပြုနိုင်ခဲ့သည်။

အိုမင်းနေသော တော်ဝင်သမားတော်က ဧကရီ၏ အိပ်ဆောင်တွင် စောင့်ဆိုင်းနေသော ဧကရာဇ်ကို အရိုအသေပေးကာ ပြောလိုက်သည်။

“အရှင်မင်းကြီး... ရောဂါလက္ခဏာတွေအရ ကြည့်ရရင် ဧကရီက ဖျားနာနေတာ မဟုတ်ဘဲ ရှေးဟောင်း ကူး မှော်ပညာရဲ့ တိုက်ခိုက်မှုကို ခံထားရတာပါ...”

နဂါးဝတ်ရုံကို ဆင်မြန်းထားပြီး လူလားမြောက်ခါစ အရွယ်တွင် ရှိနေသော ယွီဧကရာဇ်က ထိပ်ဆုံးနေရာတွင် ထိုင်နေ၏။ သူက ပါးစပ်ကျယ်ကျယ်၊ နှာတံပေါ်ပေါ်နှင့် လေးထောင့်စပ်စပ် မျက်နှာရှိသည်။ သူ၏ အရှိန်အဝါက ခမ်းနားကြီးကျယ်ပြီး သူ၏ တစ်ကိုယ်လုံးက အဆင့်မြင့် အုပ်စိုးသူတစ်ဦး၏ မြင့်မြတ်မှုနှင့် ဖိအားများကို ထုတ်လွှတ်နေ၏။

အိုမင်းနေသော တော်ဝင်သမားတော်၏ စကားကို ကြားသောအခါ သူက စူးရဲစွာ စိုက်ကြည့်ကာ စားပွဲကို ရိုက်ချလိုက်သည်။

“ရိုင်းစိုင်းလှချည်လား...”

အိုမင်းနေသော တော်ဝင်သမားတော်က အလျင်စလို ပြောလိုက်၏။

“အရှင်မင်းကြီး... ဒီကျွန်အိုကြီးက အရှင်မင်းကြီးကို မလှည့်စားရဲပါဘူး... ဒီကိစ္စကို တော်ဝင် နက္ခတ္တဗေဒဌာနရဲ့ အကြီးအကဲလည်း သက်သေပြနိုင်ပါတယ်… ဒါက တကယ်ပဲ ရှေးဟောင်း ကူး မှော်ပညာပါ...”

တော်ဝင် နက္ခတ္တဗေဒဌာန၏ အကြီးအကဲက အိုမင်းနေသော တော်ဝင်သမားတော်ကို ဤရှုပ်ထွေးမှုထဲသို့ သူ့ကို ဆွဲသွင်းလာသည့်အတွက် စိတ်ထဲမှ ကျိန်ဆဲနေရင်း ရိုသေလေးစားစွာ ပြန်ဖြေလိုက်သည်။

“အရှင်မင်းကြီး... သမားတော်ရွှီ ပြောတာ မှန်ပါတယ်... ဒီရှေးဟောင်း ကူး မှော်ပညာက အဋ္ဌမမြောက် ကောင်းကင်ဘုံအဆင့် ကြောင်ဘုရင်ရဲ့ မူလဝိညာဉ်ကို ကြားခံအဖြစ် အသုံးပြုရပြီး ဧကရီရဲ့ ဆံပင် ဒါမှမဟုတ် တခြား ကိုယ်ပိုင်ပစ္စည်းတွေလို အရာတွေ လိုအပ်ပါတယ်...”

“နောက်ပြီး ဧကရီကို ထိခိုက်ဖို့အတွက် သွေးသားရင်းချာ တစ်ယောက်ယောက်က ကိုယ်တိုင် လုပ်ဆောင်ရတာပါ... ဒီမှော်ပညာက အရှင်မင်းကြီးရဲ့ ဧကရီ အသက်အန္တရာယ်ကို မခြိမ်းခြောက်နိုင်ပေမဲ့ သုံးလကြာလို့ သူမ ပြန်နိုးလာတဲ့အခါ ရုပ်သေးရုပ်တစ်ရုပ် ဖြစ်သွားပြီး ကူး လွှတ်လိုက်တဲ့သူရဲ့ အမိန့်တွေကို မဖြစ်မနေ လိုက်နာရပါလိမ့်မယ်...”

ယွီဧကရာဇ်က ဒေါသတကြီးဖြင့် စားပွဲကို လက်ဝါးတစ်ချက်တည်းနှင့် ရိုက်ချိုးပစ်လိုက်၏။

“စုံစမ်းစမ်း... ဧကရီကို လုပ်ကြံရဲလောက်အောင် ဘယ်သူက ဒီလောက်တောင် သတ္တိကောင်းနေလဲ ဆိုတာ ငါကိုယ်တော် အတိအကျ သိချင်တယ်...”

…

***

Book List