Book List

<h2 style="text-align: center;">အခန်း (၁၇၅)</h2> <h2 style="text-align: center;">စစ်ပွဲ၏ အကြိုနိဒါန်း</h2> <h2 style="text-align: center;">*</h2> <p style="text-align:justify"> </p> <p style="text-align:justify">ဘီယွင်ရေကန်၊ တိမ်ပြာကျွန်းရှိ ဝါးမျှော်စင်အတွင်း…</p> <p style="text-align:justify">မိစ္ဆာသခင် လေးပါးက မိစ္ဆာဘုရင်မကို အရိုအသေပေးရန် စုဝေးရောက်ရှိနေကြ၏။</p> <p style="text-align:justify">ယွီလီက သူမ၏ မျက်လုံးများတွင် အပြုံးတစ်ခုဖြင့် မိစ္ဆာများကို ထခိုင်းလိုက်သည်။ သူမ၏ တံခါးပိတ် ကျင့်ကြံခြင်းက မျှော်မှန်းထားသည့်အတိုင်း ဖြစ်မြောက်အောင်မြင်ခဲ့ကြောင်း အကဲခတ်တတ်သော မည်သည့် မိစ္ဆာမဆို သိနိုင်ပေသည်။</p> <p style="text-align:justify">“ဘုရင်မရဲ့ ဆန္ဒတွေ ပြည့်ဝသွားတဲ့အတွက် ဂုဏ်ယူပါတယ်...”</p> <p style="text-align:justify">မိစ္ဆာသခင် လေးပါးက အချင်းချင်း အကြည့်ချင်းဖလှယ်ကာ တစ်ပြိုင်နက်တည်း ပြောလိုက်ကြပြီး အားလုံး သက်ပြင်းချနိုင်သွားကြ၏။</p> <p style="text-align:justify">ရှေးဟောင်း အမွေအနှစ်များအတွက် တိုက်ပွဲဝင်ရခြင်းက အမြဲတမ်း အန္တရာယ်များပြီး ဘေးဒုက္ခများနှင့် ပြည့်နှက်နေလေ့ရှိသည်။ သူတို့၏ ဘုရင်မအပေါ် ယုံကြည်မှု ရှိသော်လည်း နောင်တရမည့်အစား ကြိုတင်သတိထားခြင်းက အမြဲတမ်း ပိုကောင်း၏။</p> <p style="text-align:justify">သူတို့၏ ဘုရင်မကို ကိုယ်တိုင်ကိုယ်ကျ မမြင်ရမီက သူတို့၏ စိတ်နှလုံးများမှာ စိုးရိမ်ပူပန်မှုများဖြင့် လွင့်မျောနေခဲ့ရသော်လည်း ကံကောင်းထောက်မစွာဖြင့် စိုးရိမ်ပူပန်မှုမှာ အပိုသက်သက်သာ ဖြစ်ခဲ့ပြီး သူတို့၏ ဘုရင်မမှာ ဘေးကင်းကျန်းမာစွာ ရှိနေပေသည်။</p> <p style="text-align:justify">ဝိညာဉ်ဝိုင် တစ်ငုံ သောက်လိုက်ပြီးနောက် ယွီလီက မငြင်းဆန်ဘဲ ရွှင်လန်းစွာ ပြောလိုက်သည်။</p> <p style="text-align:justify">“ရိတ်သိမ်းရရှိမှုက တော်တော်လေး ကောင်းပါတယ်...”</p> <p style="text-align:justify">ထိုစကားကို ကြားသောအခါ မိစ္ဆာသခင် လေးပါးမှာ ဝမ်းသာသွားကြ၏။</p> <p style="text-align:justify">သူတို့၏ ဘုရင်မက ပိုမို စွမ်းအားကြီးမားလေလေ၊ ယွီတောင်တန်းက ပိုမို တည်ငြိမ်လေလေပင်။</p> <p style="text-align:justify">အထူးသဖြင့် လက်ရှိ တင်းမာနေသော အခြေအနေများတွင် ၎င်းက မိစ္ဆာများအတွက် ပို၍ပင် စိတ်အေးသက်သာမှု ဖြစ်စေသည်။</p> <p style="text-align:justify">“ငါ တံခါးပိတ် ကျင့်ကြံနေတုန်း တောင်ထဲမှာ ပြဿနာ တစ်ခုခု ရှိသေးလား...”</p> <p style="text-align:justify">“အရှင်မင်းကြီးကို သတင်းပို့ပါတယ်... တောင်ထဲမှာတော့ ဘာပြဿနာမှ မရှိခဲ့ပါဘူး… ဒါပေမဲ့ တောင်အပြင်ဘက် အခြေအနေကတော့ အတော်လေး ရှုပ်ထွေးလာပါတယ်...”</p> <p style="text-align:justify">ယွီလီက မျက်ခုံးတစ်ဖက် ပင့်လိုက်ပြီး စိတ်ဝင်စားသွား၏။</p> <p style="text-align:justify">ဖူရှောင်ကွမ်းက ဂျီမိုနှင့် ကျိုကွမ်းကို အချက်ပြလိုက်ရာ မိစ္ဆာနှစ်ပါးက လက်ရှိ အခြေအနေများကို တစ်ယောက်တစ်လှည့်စီ ချက်ချင်း ရှင်းပြကြပြီး မီးလျှံနီကလည်း သူ့ကိုယ်သူ အသိအမှတ်ပြုခံရစေရန် ရံဖန်ရံခါ ဝင်ရောက်စွက်ဖက်ကာ စကားအနည်းငယ် ဝင်ပြောလေသည်။</p> <p style="text-align:justify">ဝိုင်တစ်ကျိုက် မော့သောက်လိုက်ပြီးနောက် ယွီလီ၏ မျက်နှာပေါ်တွင် အံ့ဩသွားသည့်ဟန် ပေါ်လာ၏။</p> <p style="text-align:justify">သူမ တံခါးပိတ် ကျင့်ကြံနေသည့် တစ်နှစ်မပြည့်တပြည့် အချိန်လေးအတွင်း ဤမျှလောက် ကိစ္စများစွာ ဖြစ်ပျက်ခဲ့လိမ့်မည်ဟု သူမ မမျှော်လင့်ထားခဲ့ပေ။</p> <p style="text-align:justify">အိမ်ရှေ့မင်းသား ရာထူးချခံရခြင်း၊ ဧကရီ သတိလစ်မေ့မြောသွားခြင်း၊ ချန်မုတောင် ဖျက်ဆီးခံရခြင်း၊ လျန်ပြည်နယ် မိစ္ဆာလှိုင်းလုံးကြီး၊ တိုင်းတစ်ပါး မျိုးနွယ်စုများက နယ်စပ်ဂိတ်များကို တိုက်ခိုက်လာခြင်း... အစရှိသည့် ကိစ္စများက ပုံပြင်စာအုပ်များထက်ပင် စိတ်လှုပ်ရှားစရာကောင်းသော ဇာတ်လမ်းများ တစ်ခုပြီးတစ်ခုနှင့် အမှန်တကယ်ပင် အလှည့်အပြောင်းများ ပြည့်နှက်နေပေသည်။</p> <p style="text-align:justify">“အခု ဘုရင်မက တံခါးပိတ် ကျင့်ကြံရာကနေ ထွက်လာပြီဆိုတော့ လက်အောက်ငယ်သားတွေမှာ မှီခိုအားထားစရာ ရသွားပါပြီ... မဟာယွီ နန်းတော်ကိုပဲ ရင်ဆိုင်ရ ရင်ဆိုင်ရ… ဓားနတ်ဘုရားတောင်တန်းကိုပဲ ရင်ဆိုင်ရ ရင်ဆိုင်ရ… ဘာကိုပဲ ရင်ဆိုင်ရပါစေ ကျွန်တော်တို့မှာ ယုံကြည်ချက်တချို့ ရရှိသွားပါပြီ...”</p> <p style="text-align:justify">ဖူရှောင်ကွမ်းက မြှောက်ပင့်မှုနှင့် အမှန်တရား ရောယှက်၍ ပြောလိုက်သည်။</p> <p style="text-align:justify">မိစ္ဆာသခင် သုံးပါးကလည်း သဘောတူသည့်အနေဖြင့် ခေါင်းညိတ်လိုက်ကြ၏။ ဤသည်က အမှန်တရားပင်။ သူတို့၏ ဘုရင်မက သူတို့၏ ယုံကြည်မှု ဖြစ်သည်။ သူမ တံခါးပိတ် ကျင့်ကြံရာမှ ထွက်မလာမီက ယွီတောင်တန်းကို မကာကွယ်နိုင်ဘဲ သူမ၏ မျှော်လင့်ချက်များကို စိတ်ပျက်စေမည်ကို စိုးရိမ်သဖြင့် သူတို့၏ စိတ်နှလုံးများမှာ အမြဲတမ်း လွင့်မျောနေခဲ့ရ၏။</p> <p style="text-align:justify">ကံကောင်းထောက်မစွာဖြင့် အရာအားလုံးက ဘေးကင်းကျန်းမာခဲ့သည်။</p> <p style="text-align:justify">မိစ္ဆာများက သစ္စာရှိပြီး တာဝန်ကျေပွန်ကြောင်း သိသောကြောင့် ယွီလီက နှမြောတွန့်တိုမနေပေ။ ယွီတောင်တန်း၏ ယေဘုယျ အခြေအနေကို မေးမြန်းပြီးနောက် သူမက လက်မြှောက်ကာ ဝါးသေတ္တာ လေးလုံးကို ပေးပို့လိုက်၏။</p> <p style="text-align:justify">“တောင်အပြင်ဘက် အခြေအနေက အန္တရာယ်များတယ်… ပြီးတော့ မင်းတို့အနေနဲ့ ယွီတောင်တန်းကို စောင့်ရှောက်ရတာ မလွယ်ကူဘူးလေ... ဒါက မင်းတို့အတွက် ဆုလာဘ်ပဲ... ပြန်သွားပြီး ကြိုးကြိုးစားစား ကျင့်ကြံကြ... အခုက ပြဿနာများတဲ့ အချိန်ကာလဖြစ်လို့ မင်းတို့ရဲ့ ကျင့်ကြံခြင်းနဲ့ စွမ်းအားကို တိုးတက်အောင် အစွမ်းကုန် ကြိုးစားကြ… ပေါ့ပေါ့ဆဆ မနေကြနဲ့...”</p> <p style="text-align:justify">“ဘုရင်မရဲ့ သွန်သင်ဆုံးမမှုတွေကို ရိုသေလေးစားစွာ နာခံပါ့မယ်...”</p> <p style="text-align:justify">မိစ္ဆာသခင် လေးပါးက ကျေးဇူးတင်စကားဆိုကာ အရိုအသေပေးပြီး ဆုလာဘ်များကို ပြတ်ပြတ်သားသား လက်ခံလိုက်ကြသည်။ သူတို့၏ ဘုရင်မက လက်ဝှေ့ယမ်းပြလိုက်သည်နှင့် သူတို့က နှုတ်ဆက်၍ ထွက်ခွာသွားကြ၏။</p> <p style="text-align:justify">ထွက်ခွာသွားသော မိစ္ဆာများ၏ ကျောပြင်များကို ကြည့်လျက် ယွီလီက သက်သောင့်သက်သာရှိသော အနေအထားတစ်ခုကို ရှာကာ ဘေးတိုက်လှဲလျောင်းလိုက်ပြီး လက်တစ်ဖက်ဖြင့် ခေါင်းကို ထောက်ထားကာ ကျန်လက်တစ်ဖက်က ဝိုင်အိုးကို ကိုင်ထားသည်။</p> <p style="text-align:justify">ဝိုင်တစ်ငုံ သောက်လိုက်ပြီးနောက် သူမ၏ အကြည့်များက ပြတင်းပေါက်မှတစ်ဆင့် ကောင်းကင်ယံရှိ လမင်းကြီးဆီသို့ ရောက်သွားပြီး သူမ၏ နှုတ်ခမ်းများပေါ်တွင် လှပသော အပြုံးတစ်ခု ဖြစ်ပေါ်လာ၏။</p> <p style="text-align:justify">ရှေးဟောင်း လျှို့ဝှက်နယ်မြေသို့ သွားရောက်ရသည့် ဤခရီးစဉ်က အလွန်တရာ အန္တရာယ်များလှသော်လည်း ရရှိလာသော အကျိုးအမြတ်များက ကြီးမားလှသည်။ သူမက အမွေအနှစ်ကို အောင်မြင်စွာ ရရှိခဲ့ရုံသာမက ရှေးဟောင်း လျှို့ဝှက်နယ်မြေတစ်ခုကိုပါ ထိန်းချုပ်ခွင့် ရရှိခဲ့၏။</p> <p style="text-align:justify">ထိုနယ်မြေထဲတွင် များပြားလှသော ဝိညာဉ်ပစ္စည်းများနှင့် ပေါများလှသော အရင်းအမြစ်များ ပါဝင်သည်။ အဝါရောင်အဆင့် ဝိညာဉ်ပစ္စည်းများက နွားမွေးများသဖွယ် များပြားလှပြီး ရွှမ်းအဆင့် ဝိညာဉ်ပစ္စည်းများကလည်း မနည်းမနော ရှိကာ မြေအဆင့် ဝိညာဉ်ပစ္စည်းများပင် ပေါများလှပြီး ကောင်းကင်အဆင့် ဝိညာဉ်ပစ္စည်း တစ်ခုတောင် ပါဝင်သေး၏။</p> <p style="text-align:justify">နောင်လာမည့် အချိန်အတော်ကြာသည်အထိ သူမအနေဖြင့် အရင်းအမြစ်များအတွက် စိုးရိမ်စရာ မလိုတော့ပေ။</p> <p style="text-align:justify">မိစ္ဆာသခင် လေးပါးကို သူမ ပေးသနားခဲ့သော ပစ္စည်းများအကြောင်း တွေးမိပြီး ယွီလီက ချိုမြိန်စွာ ပြုံးလိုက်ကာ ဝိုင်တစ်ကျိုက် မော့သောက်လိုက်ပြီး ဤငြိမ်းချမ်းသော ခေတ်ကာလက မည်မျှကြာကြာ တည်တံ့နိုင်မည်နည်းဟု တွေးတောရင်း လမင်းကြီးကို ဆက်လက် ငေးမောနေတော့သည်။</p> <p style="text-align:justify">…</p> <p style="text-align:justify">ဆွေ့ရွှီးနန်းတော်၊ ရှောက်တောင်…</p> <p style="text-align:justify">ငွေရောင်အလင်းတန်းတစ်ခု ကျဆင်းလာပြီး အချိန်စွမ်းအားများက တားမြစ်ကန့်သတ်ချက်ကို ချေဖျက်ပစ်လိုက်၏။</p> <p style="text-align:justify">ဝါးသေတ္တာကို ဖွင့်လိုက်သည်နှင့် ပြင်းထန်သော ဝိညာဉ်ချီစွမ်းအင်များက သူ့ဆီ ဝင်ရောက်လာသည်။ ဖူရှောင်ကွမ်း၏ သူငယ်အိမ်များက ကျုံ့ဝင်သွားပြီး အလွန်တရာ ဝမ်းသာသွား၏။</p> <p style="text-align:justify">ထိုအရာများက အမှန်တကယ်ပင် ရွှမ်းအဆင့် ဝိညာဉ်ပစ္စည်း သုံးခု ဖြစ်နေသည်။ တစ်ခုက အဆင့်မြင့် ဖြစ်ပြီး နှစ်ခုက အဆင့်နိမ့် ဖြစ်၏။</p> <p style="text-align:justify">“ဒီတစ်ကြိမ် သခင်မလေးရဲ့ ရိတ်သိမ်းရရှိမှုက စိတ်ကူးထားတာထက် အများကြီး သာလွန်နေတဲ့ပုံပဲ... သူမက ရှေးဟောင်း လျှို့ဝှက်နယ်မြေ တစ်ခုလုံးကိုများ ထိန်းချုပ်ခွင့် ရသွားတာလား...”</p> <p style="text-align:justify">နှစ်ပေါင်းများစွာ အတူနေလာခဲ့သဖြင့် သူတို့ အရှင်သခင်မ၏ စိတ်သဘောထားကို သူ အနည်းငယ် နားလည်ထား၏။ ရိတ်သိမ်းရရှိမှု ကြီးမားလေလေ၊ သူမက ပိုမို ရက်ရောလေလေပင်။ သူမက ရှေးဟောင်း လျှို့ဝှက်နယ်မြေတစ်ခုကို အမှန်တကယ် ပိုင်ဆိုင်ထားပါက သူ့အတွက်လည်း ကောင်းမွန်သော ကိစ္စတစ်ခု ဖြစ်လာမည် ဖြစ်၏။</p> <p style="text-align:justify">သူက အရင်းအမြစ်များအတွက် အလျင်စလို ပြေးလွှားရှာဖွေနေစရာ မလိုတော့ဘဲ မိမိ လိုချင်သောအရာများနှင့် လဲလှယ်ရန်အတွက် အဆင့်လိုက် အကျိုးပြုလုပ်ငန်းများကိုသာ စုဆောင်းရန် လိုအပ်တော့မည် ဖြစ်သည်။</p> <p style="text-align:justify">ဖူရှောင်ကွမ်း၏ အကြည့်က ဝိညာဉ်ပစ္စည်း သုံးခုပေါ်သို့ ကျရောက်သွားပြီး စတင် စစ်ဆေးကြည့်လိုက်ရာ ချက်ချင်းပင် ပိုမို ဝမ်းသာပျော်ရွှင်သွားတော့၏။</p> <p style="text-align:justify">အဆင့်နိမ့် ရွှမ်းအဆင့် ဝိညာဉ်ပစ္စည်း နှစ်ခုက မြေဓာတ် သက်ရှိများကို မြေဓာတ် နည်းစနစ်များ ကျင့်ကြံရာတွင် အထောက်အကူ ပြုသည်။</p> <p style="text-align:justify">အဆင့်မြင့် ရွှမ်းအဆင့် ဝိညာဉ်ပစ္စည်း တစ်ခုကတော့ ရှားပါးလှသော အချိန်စွမ်းအင် ပါဝင်သည့် ပစ္စည်းတစ်ခု ဖြစ်ပြီး နံနက်ခင်းနှင့် ညနေခင်းပန်းဟု အမည်ရကာ နံနက်ခင်းတွင် ပွင့်၍ ညနေခင်းတွင် သေဆုံးလေ့ရှိပြီး ကြွယ်ဝသော အချိန်စွမ်းအားများ ပါဝင်၏။</p> <p style="text-align:justify">စစ်ဆေးပြီးနောက် သူက ဝိညာဉ်ပစ္စည်း သုံးခုကို သိမ်းဆည်းလိုက်ပြီး လရောင်ကို စုပ်ယူကာ အေးချမ်းစွာ အနားယူလိုက်သည်။</p> <p style="text-align:justify">နောက်တစ်နေ့ ညနေခင်းတွင် လန်းဆန်းတက်ကြွနေသော ဖူရှောင်ကွမ်းက အဆင့်နိမ့် ရွှမ်းအဆင့် ဝိညာဉ်ပစ္စည်း တစ်ခုကို ထုတ်ယူကာ စားသုံးလိုက်၏။ သူ၏ မိစ္ဆာရုပ်ခန္ဓာက ကြွယ်ဝသော မြေဓာတ် ဝိညာဉ်ချီစွမ်းအင်များဖြင့် ဖုံးလွှမ်းသွားသည်နှင့်အမျှ သူက မြေဓာတ် နည်းစနစ်များကို စိတ်အားထက်သန်စွာ ကျင့်ကြံလိုက်ပြီး သူ၏ ကျွမ်းကျင်မှုကို တိုးမြှင့်ကာ အတွေးများကိုလည်း ချဲ့ထွင်လျက် သူ၏ ကိုယ်ပိုင် တတိယမြောက် မြေဓာတ် နည်းစနစ်ကို ဖန်တီးနိုင်ရန် မျှော်လင့်နေမိသည်။</p> <p style="text-align:justify">ကံမကောင်းစွာဖြင့် ကိစ္စရပ်များက စီစဉ်ထားသည့်အတိုင်း ဖြစ်မလာခဲ့ပေ။</p> <p style="text-align:justify">သူ၏ မြေဓာတ် နည်းစနစ်များအပေါ် ကျွမ်းကျင်ပိုင်နိုင်မှုက အံ့မခန်း ဖြစ်သော်လည်း ဖူရှောင်ကွမ်းက နည်းစနစ်သစ် တစ်ခုကို ဖန်တီးရန် မအောင်မြင်ခဲ့ချေ။</p> <p style="text-align:justify">ကံကောင်းထောက်မစွာဖြင့် ဤကဲ့သို့သော အရာများကို အတင်းအကျပ် လုပ်ယူ၍ မရနိုင်ကြောင်း သူ သိရှိထားသဖြင့် အပြုသဘောဆောင်သော စိတ်ထားကို ထိန်းသိမ်းထားနိုင်ခဲ့ပြီး စိတ်ပျက်အားငယ်ခြင်း မရှိခဲ့ပေ။</p> <p style="text-align:justify">လဝက်ခန့်အကြာတွင် ဖူရှောင်ကွမ်းက နောက်ထပ် အဆင့်နိမ့် ရွှမ်းအဆင့် ဝိညာဉ်ပစ္စည်း တစ်ခုကို ထုတ်ယူလိုက်ပြန်၏။ သူ၏ မိစ္ဆာရုပ်ခန္ဓာက ကြွယ်ဝသော မြေဓာတ် ဝိညာဉ်အနှစ်သာရများဖြင့် ဖုံးလွှမ်းသွားသည်နှင့်အမျှ သူက မြေဓာတ် နည်းစနစ်များကို ကျွမ်းကျင်ပိုင်နိုင်လာစေရန် ဆက်လက် လေ့လာလိုက်သည်။</p> <p style="text-align:justify">မိစ္ဆာသုံးပါးလည်း ဤအတိုင်းပင်။ တောင်အပြင်ဘက် အခြေအနေများက သူတို့ကို အရေးတကြီး ခံစားရစေပြီး အားလုံးက အချိန်လုကာ ကျင့်ကြံနေကြ၏။</p> <p style="text-align:justify">သူတို့၏ လက်အောက်ခံ မိစ္ဆာများပင် လွှမ်းမိုးမှု ခံရကာ ကျင့်ကြံခြင်းကို ပိုမို အာရုံစိုက်လာကြသည်။</p> <p style="text-align:justify">ထိုအပြောင်းအလဲကို ယွီလီမှာ ကျေနပ်အားရနေမိ၏။</p> <p style="text-align:justify">တူတစ်ချောင်းတည်းဆိုလျှင် အလွယ်တကူ ကျိုးပဲ့နိုင်သော်လည်း တူဆယ်ချောင်းဆိုလျှင် သံမဏိကဲ့သို့ မာကျောခိုင်ခံ့ပေသည်။ သူမက ယွီတောင်တန်းကို ကာကွယ်နိုင်သော်လည်း အရာအားလုံးအတွက် သူမကိုသာ အားကိုးနေ၍ မရနိုင်ပေ။</p> <p style="text-align:justify">ယွီတောင်တန်း အမှန်တကယ် ကြီးပွားတိုးတက်ပြီး မြင့်မားလာစေရန် မိစ္ဆာများက ကြိုးစားအားထုတ်ကာ အတူတကွ ပူးပေါင်းလုပ်ဆောင်ရန် လိုအပ်သည်။ သို့မဟုတ်ပါက ထိုအင်အားက ရေတိုအောင်မြင်မှု တစ်ခုသာ ဖြစ်သွားလိမ့်မည်။</p> <p style="text-align:justify">ဝိုင်တစ်ကျိုက် မော့သောက်လိုက်ပြီးနောက် ယွီလီက အလယ်ပိုင်းလွင်ပြင် ဒေသရှိ အခြေအနေများနှင့် သတင်းအချက်အလက်များ ပိုမို ရရှိရန် ဝမ်မုသစ်တောကို ဆက်သွယ်သည့် လျှို့ဝှက်နည်းစနစ် တစ်ခုကို အသုံးပြုလိုက်၏။</p> <p style="text-align:justify">…</p> <p style="text-align:justify">ဖုန်းယွမ်မြို့၊ မဟာယွီ မြို့တော်…</p> <p style="text-align:justify">ကူး မှော်ပညာကို ဖယ်ရှားပြီးနောက် ဧကရီက လျင်မြန်စွာ သတိရလာပြီး မကြာသေးမီက ကျန်းမာရေး ပြန်လည် ကောင်းမွန်လာခဲ့သည်။ သို့သော်လည်း သူမ၏ ခန္ဓာကိုယ်ကို အားဖြည့်ရန် ဝိညာဉ်ပစ္စည်းများ အသုံးပြုနေသော်လည်း သူမ၏ ကျန်းမာရေးက ယခင်ကလောက် မကောင်းတော့ဘဲ ဂရုတစိုက် ထိန်းသိမ်းထားသော သူမ၏ အလှအပပင် ယိုယွင်းလာကာ ပိုမို အိုမင်းလာခဲ့၏။</p> <p style="text-align:justify">ဤတစ်ကြိမ်တွင် သူမက မွေးရာပါ မူလချီစွမ်းအင်ကို ထိခိုက်ခဲ့ပြီး ၎င်းက သူမ၏ သက်တမ်းကို ထိခိုက်စေမည် ဖြစ်သည်။</p> <p style="text-align:justify">ဧကရီက သူမ၏ တူဖြစ်သူ တုကူရီကို ခွင့်မလွှတ်ခဲ့ပေ။ သူ မည်မျှပင် တောင်းပန်ပါစေ သူမ၏ သတ်ဖြတ်လိုစိတ်က ခိုင်မာနေဆဲပင်။ ဆွေမျိုးတော်စပ်မှုကို ငဲ့ညှာသောအားဖြင့် သူမက သူ့ကို အပိုင်းပိုင်းခုတ်ထစ်ခြင်း မပြုလုပ်ဘဲ အလောင်းအပြည့်အစုံ ချန်ထားပေးခဲ့၏။</p> <p style="text-align:justify">ယွီဧကရာဇ်က ဧကရီ၏ နန်းဆောင်သို့ နေ့စဉ် လာရောက်လည်ပတ်သည်။</p> <p style="text-align:justify">ထိပ်ဆုံးနေရာတွင် ထိုင်ရင်း ရှာဖွေတွေ့ရှိထားသော သက်သေအထောက်အထားများကို ကြည့်ကာ မဟာယွီ အုပ်စိုးသူ၏ မျက်နှာမှာ မှုန်မှိုင်းနေ၏။ သူက သက်သေအထောက်အထားများကို ဧကရီထံ ကမ်းပေးရင်း ဒေါသတကြီးဖြင့် ပြောလိုက်သည်။</p> <p style="text-align:justify">“တကယ့် မိစ္ဆာမျိုးနွယ်စုပါလား... ငြိမ်းချမ်းရေးက အချိန်အကြာကြီး တည်တံ့နေလို့ သူတို့က ငါတို့ လူသားမျိုးနွယ်စုနဲ့ စစ်ခင်းချင်နေတာလား... ပြီးတော့ မဟာယုံရဲ့ အကြွင်းအကျန်တွေကလည်း သူတို့ရဲ့ မကောင်းဆိုးဝါး ရည်ရွယ်ချက်တွေနဲ့ အလယ်ပိုင်းလွင်ပြင် ဒေသတွေကို လုယက်ဖို့ အခွင့်အရေးယူပြီး တိုင်းတစ်ပါး ရန်သူတွေနဲ့တောင် ပူးပေါင်းကြံစည်နေကြတယ်... တကယ့်ကို ခွင့်လွှတ်လို့မရတဲ့ ရာဇဝတ်မှုပဲ... ပြီးတော့ တကယ့်ကို သစ္စာရှိလှပါတယ်ဆိုတဲ့ ငါ့ရဲ့ အရာရှိကောင်းတွေကတောင် သူတို့နဲ့ ပူးပေါင်းကြံစည်နေကြတယ်...”</p> <p style="text-align:justify">သူ၏ သံသယများက အမှန်တကယ်ပင် မှန်ကန်နေခဲ့၏။ မဟာယွီတွင် မကြာသေးမီက ဆက်တိုက် ဖြစ်ပေါ်နေသော ဘေးအန္တရာယ်များက ရိုးရှင်းခြင်း မရှိပေ။ မိစ္ဆာမျိုးနွယ်စုက ရှေ့တန်းမှနေ၍ ပြဿနာရှာသူများ ဖြစ်ကြသည်။</p> <p style="text-align:justify">အခြားသော အင်အားစုများက နောက်ကွယ်မှနေ၍ မီးလောင်ရာ လေပင့်ပေးနေကြ၏။</p> <p style="text-align:justify">သက်သေအထောက်အထားများကို ဖတ်ပြီးနောက် ဧကရီက တည်ကြည်လေးနက်သော မျက်နှာထားဖြင့် ပြောလိုက်သည်။</p> <p style="text-align:justify">“အရှင်မင်းကြီး ဘယ်လို တုံ့ပြန်ဖို့ စီစဉ်ထားပါသလဲ...”</p> <p style="text-align:justify">ယွီဧကရာဇ်က တစ်ခဏမျှ စဉ်းစားပြီးနောက် ပြောလိုက်၏။</p> <p style="text-align:justify">“တော်ဝင်ဂုဏ်သိက္ခာကို စော်ကားလို့ မရဘူး... ငါ့ရဲ့ မဟာယွီကသာ လျစ်လျူရှုနေမယ်ဆိုရင် လှောင်ပြောင်စရာတစ်ခုပဲ ဖြစ်လာပြီး ဒီလူယုတ်မာတွေရဲ့ မောက်မာမှုကို အားပေးအားမြှောက် လုပ်ရာကျလိမ့်မယ်... ကျင်းပြည်နယ် မိစ္ဆာမျိုးနွယ်စုကို တိုက်ခိုက်ဖို့ စစ်တပ်စေလွှတ်ဖို့ ငါကိုယ်တော် ဆုံးဖြတ်လိုက်ပြီ...”</p> <p style="text-align:justify">“ကျင်းပြည်နယ်က တောင်ပိုင်းနယ်စပ်နဲ့ အနီးကပ် ဆက်သွယ်နေတာ... ဒီဖြစ်ရပ်ရဲ့ နောက်ကွယ်မှာ ကျင်းပြည်နယ် မိစ္ဆာမျိုးနွယ်စု ရှိနေမှန်း သိသွားပြီဆိုတော့ မျောက်တွေကို သတိပေးဖို့ ကြက်ကို သတ်ရမယ်… မိစ္ဆာမျိုးနွယ်စုကို ဟန့်တားရမယ်…”</p> <p style="text-align:justify">“ပြီးတော့ တခြား အင်အားစုတွေကို ရှင်းလင်းဖို့ အခွင့်အရေးကို ယူပြီး တွေ့ရှိထားတဲ့ ခြေကုပ်စခန်းတွေကို အမြစ်ပြတ် သုတ်သင်ရမယ်... တခြား မိစ္ဆာမျိုးနွယ်စုတွေနဲ့ ပတ်သက်လို့တော့ ငါ့ရဲ့ မဟာယွီကို ဝင်မစွက်ဖက်တဲ့သူတွေကို လတ်တလောမှာ သတိနဲ့ စောင့်ကြည့်ရမယ်... ကျင်းပြည်နယ်ကို ထောက်ပံ့ဖို့ ရဲတင်းတဲ့ ဘယ်မိစ္ဆာမျိုးနွယ်စုကိုမဆို ကြံရာပါအဖြစ် သတ်မှတ်ပြီး သုတ်သင်ပစ်ရမယ်...”</p> <p style="text-align:justify">ဧကရီက ထောက်ခံလိုက်သည်။</p> <p style="text-align:justify">“အရှင်မင်းကြီးရဲ့ အစီအစဉ်က သိပ်ကို သင့်လျော်ပါတယ်... ပြင်ပရန်သူတွေကို တွန်းလှန်ဖို့အတွက် ပြည်တွင်း တည်ငြိမ်မှုက ပထမဆုံး လာရပါမယ်... နောက်ကွယ်ကနေ လျှို့ဝှက် ဖျက်ဆီးတာတွေကို ကာကွယ်ဖို့ နန်းတွင်း အရာရှိတွေကိုလည်း ရှင်းလင်းဖို့ လိုအပ်ပါတယ်... နောက်ပြီး ငါတို့ရဲ့ အောင်နိုင်ခြေကို တိုးမြင့်ဖို့ ကျင်းပြည်နယ် မိစ္ဆာမျိုးနွယ်စုကို ချေမှုန်းရာမှာ ဂိုဏ်းအသီးသီးကို ဆက်သွယ်ပြီး သူတို့ရဲ့ အင်အားကို အသုံးချဖို့ လိုအပ်ပါတယ်...”</p> <p style="text-align:justify">ယွီဧကရာဇ်က ကန့်ကွက်စရာ မရှိပေ။</p> <p style="text-align:justify">သူတို့က အစီအစဉ်ကို ပိုမို ကောင်းမွန်အောင် ပြင်ဆင်လိုက်ကြပြီး အမိန့်များကို လျင်မြန် ပြတ်သားစွာ ထုတ်ပြန်လိုက်ကြသည်။</p> <p style="text-align:justify">ယွီတောင်တန်း မိစ္ဆာဈေးတန်းအထက် ကောင်းကင်ယံတွင်…</p> <p style="text-align:justify">မိုးကြိုးနှင့် လျှပ်စီးများဖြင့် တိမ်မည်းကြီးများ စုဝေးလာတော့သည်။</p> <p style="text-align:justify">…</p> <p style="text-align:justify"> </p> <p style="text-align:justify"> </p> <p style="text-align: center;">***</p> <p style="text-align:justify"> </p>


Save