Book List

<h2 style="text-align: center;">အခန်း (၁၆၀)</h2> <h2 style="text-align: center;">အကျပ်အတည်း</h2> <h2 style="text-align: center;">*</h2> <p> </p> <p> </p> <p>"သူတို့ နောက်ဆုံးတော့ ဆုတ်ခွာသွားကြပြီ။ ငါထင်တာမမှားဘူးဆိုရင် ခုနက ဟိန်းဟောက်သံက မြေအောက်က သင်းခွေချပ်နတ်ဆိုးစစ်သူကြီးဆီက ဖြစ်ရမယ်။ ဟုတ်တယ်မလား"</p> <p>လင်းဖုန်း၏ မျက်နှာအမူအရာမှာ အနည်းငယ် တည်ကြည်နေသည်။ သင်းခွေချပ်နတ်ဆိုးစစ်သူကြီး တစ်ကောင်တည်းသာ ဤမျှများပြားလှသော သင်းခွေချပ်သားရဲများကို အပြည့်အဝ အမိန့်ပေးနိုင်စွမ်း ရှိသည်။</p> <p>"ဟုတ်ပါတယ်။ ကျွန်တော် စစ်သေနာပတိချုပ် ကျိုးယွင်နဲ့အတူ မြေအောက်မှာ တိုက်ခိုက်ခဲ့တုန်းက အဲဒီ သင်းခွေချပ်နတ်ဆိုးစစ်သူကြီးကို မြင်ခဲ့ဖူးတယ်။ ဒီအရှိန်အဝါက အဲဒီ သင်းခွေချပ်နတ်ဆိုးစစ်သူကြီးဆီကဆိုတာ သေချာပါတယ်"</p> <p>လုဝေ့၏ မျက်နှာအမူအရာမှာလည်း အလွန် တည်ကြည်နေသည်။ ကံကောင်းထောက်မစွာဖြင့် ထိုသင်းခွေချပ်နတ်ဆိုးစစ်သူကြီးမှာ တိုက်ပွဲတွင် ပေါ်မလာခဲ့ပေ။ သို့မဟုတ်ပါက လင်းဖုန်းအနေဖြင့် ထိုနတ်ဆိုးစစ်သူကြီးကို မည်သို့ ယှဉ်ပြိုင်နိုင်မည်နည်း။</p> <p>လင်းဖုန်း၏ စိုးရိမ်ပူပန်မှုကို ရိပ်မိသောအခါ လုဝေ့၏ နှုတ်ခမ်းထက်တွင် အပြုံးတစ်ခု ပေါ်လာသည်။</p> <p>"စစ်သေနာပတိချုပ်... စိုးရိမ်စရာ မလိုပါဘူး။ အဲဒီ သင်းခွေချပ်နတ်ဆိုးစစ်သူကြီးက လုံးဝနီးပါး အပြင်ထွက်မလာတတ်ပါဘူး။ အရင်တစ်ခေါက်ကတောင် သူက မြေအောက်မှာပဲ ရှိနေခဲ့တာပါ။ ကျွန်တော်တို့ကသာ သင်းခွေချပ်သားရဲတွေကို အရင်စပြီး သွားတိုက်ခဲ့တာလေ။ လုံးဝ မလွှဲသာမရှောင်သာတဲ့ အခြေအနေမျိုး မဟုတ်ရင် အဲဒီ သင်းခွေချပ်နတ်ဆိုးစစ်သူကြီးက ပေါ်လာမှာ မဟုတ်ပါဘူး"</p> <p>လင်းဖုန်း ခေါင်းညိတ်လိုက်သော်လည်း သူ့ရင်ထဲတွင်မူ အနည်းငယ် စိုးရိမ်နေဆဲပင်။ ယခုတစ်ကြိမ် သင်းခွေချပ်သားရဲများ၏ တိုက်ခိုက်မှုမှာ အလွန် ရုတ်တရက် ဆန်လွန်းလှသည်။ သာမန် သင်းခွေချပ်နတ်ဆိုး တစ်ကောင်အတွက်နဲ့ပဲလား။</p> <p>ဒါက ထင်သလောက် မရိုးရှင်းပုံရသည်။ အဲဒီ သင်းခွေချပ်နတ်ဆိုးစစ်သူကြီးက ဘာလို့ ဒီလောက် အလွယ်တကူ ကိုယ်ထင်မပြချင်ရတာလဲ။ သူက တစ်ခုခုကို ကြောက်နေတာလား၊ ဒါမှမဟုတ် တခြား အကြောင်းပြချက်များ ရှိနေတာလား။ လင်းဖုန်း သေချာမသိသော်လည်း ရန်သူအပေါ်တွင် မျှော်လင့်ချက်အလုံးစုံကို ပုံအပ်ထား၍ လုံးဝ မရနိုင်ကြောင်းကိုတော့ သူ သိထားသည်။</p> <p>ထိုသင်းခွေချပ်နတ်ဆိုးစစ်သူကြီး ပေါ်လာသည်ဖြစ်စေ မပေါ်လာသည်ဖြစ်စေ သူ့အနေဖြင့် ထိုနတ်ဆိုးစစ်သူကြီးကို ခုခံနိုင်မည့် နည်းလမ်း ရှိထားရပေမည်။ သို့မဟုတ်ပါက သူတို့သည် အမြဲတစေ အလွန်အရေးနိမ့်သော အခြေအနေတွင်သာ ရှိနေရပေလိမ့်မည်။</p> <p>"လုဝေ့... အခုတစ်ကြိမ် ထိခိုက်သေဆုံးမှု စာရင်းကို မြန်မြန် ပြုစုလိုက်ပါ။ ပြီးတော့ ချန်ရွှယ်ရဲ့ ကိစ္စနဲ့ ပတ်သက်ပြီး အစီရင်ခံစာ တစ်စောင် ရေးလိုက်။ တတ်နိုင်သမျှ အသေးစိတ် ဖြစ်ပါစေ။ ငါ အထက်ကို တင်ပြပေးမယ်"</p> <p>"နားလည်ပါပြီ"</p> <p>လုဝေ့ ခေါင်းညိတ်လိုက်သော်လည်း သူ၏ မျက်လုံးထဲတွင် ဝမ်းနည်းမှုတချို့ ရှိနေသည်။ ချန်ရွှယ်၏ ကြေမွနေသော အလောင်းမှာ အခြေစိုက်စခန်း အပြင်ဘက်တွင် ရှိနေဆဲပင်။ လောလောဆယ်တွင် သူတို့ အလောင်းများကို သွားရောက် ရှင်းလင်း၍ မရနိုင်သေးပေ။ အချိန်အတိုင်းအတာတစ်ခုအထိ စောင့်ဆိုင်းပြီး သင်းခွေချပ်သားရဲများ အမှန်တကယ် ဆုတ်ခွာသွားပြီဆိုတာကို အတည်ပြုပြီးမှသာ အလောင်းများကို သွားရောက် ရှင်းလင်းရမည် ဖြစ်သည်။</p> <p>ကိစ္စရပ်များကို လုဝေ့ထံ လွှဲအပ်ပြီးနောက် လင်းဖုန်း သူ့နေအိမ်သို့ ပြန်လာခဲ့သည်။</p> <p>လင်းဖုန်းတွင် အစွမ်းထက်သော ပြန်လည်ကုသနိုင်စွမ်း ရှိသော်လည်း သူအလွန်ပင်ပန်းနေဆဲပင်။ ထိုမျှ ကြီးမားသော တိုက်ပွဲကြီးအပြီးတွင် အလွန်တရာ အားအင်ကုန်ခမ်းနေလေပြီ။ ထို့ကြောင့် မူလက အိပ်စက်ချိန်နည်းပါးလှသော လင်းဖုန်းသည်လည်း တစ်နေကုန် အိပ်ရာပေါ်တွင် နှစ်နှစ်ခြိုက်ခြိုက် အိပ်ပျော်သွားတော့သည်။</p> <p>နောက်တစ်နေ့ရောက်မှသာ လင်းဖုန်း လန်းဆန်းတက်ကြွစွာဖြင့် နိုးထလာသည်။</p> <p>"အင်း... ကြယ်တာရာစွမ်းအားတွေကို အရင် ပြန်ဖြည့်ရမယ်"</p> <p>လင်းဖုန်း အားအင်များ ပြန်လည်ပြည့်ဝလာပြီးနောက် ကြယ်တာရာစွမ်းအားများကို ပြန်လည်ဖြည့်တင်းရန် စတင်ပြင်ဆင်လိုက်သည်။ ထို့ကြောင့် သူသည် ကြယ်တာရာဝဲဂယက်ကျင့်စဉ်ကို လှည့်ပတ်လိုက်ပြီး များပြားလှသော ကြယ်စွမ်းအားများကို ဆွဲယူလိုက်ရာ သူ၏ ပတ်ဝန်းကျင်တွင် ကြယ်တာရာစွမ်းအား ဝဲဂယက်တစ်ခု ဖြစ်ပေါ်လာသည်။</p> <p>ကြယ်တာရာဝဲဂယက် ပေါ်လာသည်နှင့်တစ်ပြိုင်နက် လင်းဖုန်းသည် အောက်ခြေမရှိသော တွင်းနက်ကြီးတစ်ခုကဲ့သို့ များပြားလှသော ကြယ်စွမ်းအားများကို အရူးအမူး စုပ်ယူကာ ကြယ်တာရာစွမ်းအားမျှင်များအဖြစ်သို့ အလျင်အမြန် ပြောင်းလဲပစ်လိုက်သည်။</p> <p>လင်းဖုန်းသည် တိုက်ပွဲအတွင်းတွင်လည်း ကြယ်တာရာဝဲဂယက်ကျင့်စဉ်ကို လှည့်ပတ်နိုင်ပေသည်။ သို့သော်လည်း စွမ်းဆောင်ရည်မှာ အလွန် နိမ့်ကျလှသည်။ မည်သို့ပင်ဆိုစေကာမူ သူသည် ကျင့်စဉ်ကို အချိန်တိုင်း မထိန်းချုပ်ထားနိုင်သလို အချိန်မရွေးလည်း အနှောင့်အယှက် ပေးခံရနိုင်သည်။</p> <p>ထို့ပြင် ကြယ်စွမ်းအားများမှာ အလိုအလျောက် ပြန်လည် ပြည့်ဖြိုးလာခြင်း မရှိပေ။ ထို့ကြောင့် တိုက်ပွဲအတွင်းတွင် ကုန်ဆုံးသွားသော ကြယ်တာရာစွမ်းအားများကို တပြိုင်နက်တည်း ပြန်လည်ဖြည့်တင်းရန်မှာ လုံးဝ မဖြစ်နိုင်သလောက်ပင်။</p> <p>ယခုအခါတွင်မှ လင်းဖုန်းသည် ကြယ်တာရာစွမ်းအား ပိုများခြင်း၏ အကျိုးကျေးဇူးကို ခံစားလိုက်ရသည်။ ထို့ပြင် ဟင်းလင်းပြင်ပူဖောင်း၏ စွမ်းအားမှာလည်း သူ မျှော်မှန်းထားသည်ထက် အနည်းငယ် ပိုမို သာလွန်အားကောင်းနေခဲ့သည်။</p> <p>ဟင်းလင်းပြင်ပူဖောင်းမှာ အလွန် အစွမ်းထက်မည်ဟု သူ မရေမရာ ခံစားမိသော်လည်း မည်မျှအထိ အစွမ်းထက်မည်ကို သူ တိုက်ရိုက် နားလည်ထားခြင်း မရှိခဲ့ပေ။</p> <p>စစ်မြေပြင်တွင် သင်းခွေချပ်နတ်ဆိုး ၉ ကောင်နှင့် ရင်ဆိုင်ရသည့် အချိန်ရောက်မှသာ လင်းဖုန်းသည် ဟင်းလင်းပြင်ပူဖောင်းကို အသုံးပြုခဲ့သည်။ ဟင်းလင်းပြင်ပူဖောင်း ၆ ခုက မျက်စိတစ်မှိတ်အတွင်းမှာပင် သင်းခွေချပ်နတ်ဆိုး ၆ ကောင်ကို သတ်ပစ်နိုင်ခဲ့သည်။</p> <p>ထိုသင်းခွေချပ်နတ်ဆိုး ၆ ကောင်မှာ ခုခံနိုင်စွမ်း လုံးဝ မရှိခဲ့ကြပေ။ အသက်တစ်ရှိုက်စာ အချိန်အတွင်းမှာပင် နတ်ဆိုးခြောက်ကောင်စလူံး ကြယ်တာရာပူဖောင်းများ၏ ပြိုကွဲမှုကြောင့် သေဆုံးသွားခဲ့ရသည်။ ထိုသင်းခွေချပ်နတ်ဆိုး ၆ ကောင်မှာ သာမန် သင်းခွေချပ်သားရဲများ မဟုတ်ကြောင်းကို သိထားရမည်။ ၎င်းတို့မှာ အသွင်ပြောင်းနယ်ပယ် ဒုတိယအဆင့် သိုင်းသမားများနှင့်ပင် ယှဉ်နိုင်လိမ့်မည်ဟု လင်းဖုန်း သံသယရှိသည်။</p> <p>ထို့ပြင် သင်းခွေချပ်နတ်ဆိုးများ၏ အစွမ်းထက်ဆုံး အချက်မှာ သူတို့၏ ကျောက်တုံးကဲ့သို့ မာကျောလှသော အရေပြားပင် ဖြစ်သည်။ ကြယ်တာရာစွမ်းအား ပေါက်ကွဲမှုပင်လျှင် ထိုနတ်ဆိုးတို့၏ အရေပြားကို ဖောက်ထွင်းရန် ခက်ခဲလှသည်။</p> <p>သို့သော် သင်းခွေချပ်သားရဲ၏ အစွမ်းထက်ဆုံး ခုခံမှုမှာ ဟင်းလင်းပြင်ပူဖောင်းရှေ့တွင် လူံးဝအသုံးမဝင်ခဲ့ပေ။ ဟင်းလင်းပြင်ပူဖောင်း ပြိုကွဲသွားသည်နှင့်တပြိုင်နက် သင်းခွေချပ်နတ်ဆိုးများ သွေးနှင့် အသားစများအဖြစ်သို့ ချက်ချင်း လွင့်ပါးကြေမွသွားတော့သည်။</p> <p>ကံမကောင်းစွာဖြင့် လက်ရှိ လင်းဖုန်းတွင် ကြယ်တာရာစွမ်းအား အမျှင်ပေါင်း ၂၆၀၀ သာ ရှိသည်။ အကယ်၍ သူ့၌သာ ကြယ်တာရာစွမ်းအား ပိုများခဲ့မည်ဆိုပါက ယခုကဲ့သို့ သနားစရာကောင်းသော အခြေအနေမျိုးသို့ ရောက်မည် မဟုတ်ပေ။ သူ့တွင် ကြယ်တာရာစွမ်းအား အမျှင်ပေါင်း ၃၆၀၀ ကျော်သာ ရှိပါက တစ်ပြိုင်နက်တည်း ဟင်းလင်းပြင်ပူဖောင်း ၉ ခုကို ဖန်တီးနိုင်ပြီး ထိုသင်းခွေချပ်နတ်ဆိုး ၉ ကောင်စလုံးကို ချက်ချင်း သုတ်သင်ပစ်နိုင်ပေလိမ့်မည်။</p> <p>သို့သော် ကြယ်တာရာစွမ်းအား အမျှင်ပေါင်း ၂၆၀၀ ဆိုသည်မှာ လင်းဖုန်း၏ ကန့်သတ်ချက်သို့ ရောက်ရန် အလှမ်းဝေးနေသေးသည်။ သူသည် ကြယ်တာရာစွမ်းအားများကို ဆက်လက် စုစည်းနိုင်သေးသည်။ အသွင်ပြောင်းနယ်ပယ် ဒုတိယအဆင့်ရှိ ကြယ်တာရာစွမ်းအားမှာ ပထမအဆင့်ထက် ၁၀ ဆ ပိုများသည်ဟု တွက်ချက်မည်ဆိုပါက လင်းဖုန်း၏ ကြယ်တာရာစွမ်းအား ကန့်သတ်ချက်မှာ အနည်းဆုံး အမျှင်ပေါင်း ၅၀၀၀ ခန့် ရှိပေလိမ့်မည်။</p> <p>အကယ်၍ သူ့တွင် ကြယ်တာရာစွမ်းအား အမျှင်ပေါင်း ၅၀၀၀ ကျော်သာ ရှိမည်ဆိုပါက သင်းခွေချပ်နတ်ဆိုး တစ်ဒါဇင်ကျော် တစ်ပြိုင်နက်တည်း ရောက်လာလျှင်ပင် လင်းဖုန်း ကြောက်စရာ မလိုတော့ပေ။</p> <p>အကယ်၍ လင်းဖုန်းသာ နောက်ထပ် အဆင့်တက်နိုင်ခဲ့မည်ဆိုပါက သူ၏ ကြယ်တာရာစွမ်းအားမှာ မည်မျှ ကြောက်စရာကောင်းလိုက်မည်နည်း။ လင်းဖုန်းသည် ဤမျှ အလှမ်းဝေးသော ကိစ္စများကို မတွေးတော့ပေ။ ဤတိုက်ပွဲတွင် ဟင်းလင်းပြင်ပူဖောင်း၏ စွမ်းအားမှာ သူ မျှော်မှန်းထားသည်ထက် သာလွန်နေကြောင်း တွေ့ရှိခဲ့ရသည့်အပြင် သူ၏ မွေးရာပါ စွမ်းရည်များ အားလုံးမှာလည်း အဘက်ဘက်မှ တိုးတက်လာပုံရသည်။</p> <p>သူ၏ ခွန်အားစွမ်းရည်၊ အကာအကွယ် ချပ်ဝတ်တန်ဆာ၊ ထက်မြသောဦးချို၊ သို့မဟုတ် မသေနိုင်သောအစွမ်းသတ္တိပင်ဖြစ်ပါစေ ၎င်းတို့အားလုံးမှာ အတိုင်းအတာတစ်ခုအထိ တိုးတက်လာခဲ့သည်။</p> <p>ဤသည်က လင်းဖုန်းကို တွေးတောစရာ ဖြစ်စေခဲ့သည်။ သူ၏ ရုပ်ပိုင်းဆိုင်ရာ တိုးတက်လာသည်နှင့်အမျှ မွေးရာပါ စွမ်းရည်များမှာလည်း ဆက်လက် တိုးတက်လာနိုင်သည်လော။ အကယ်၍ သူ ဒုတိယအကြိမ် အသက်စွမ်းအင် အသွင်ပြောင်းလဲခြင်းကို ဖြတ်ကျော်ပြီး နတ်ဘုရားနယ်ပယ်သို့ ဝင်ရောက်သွားပါက သူ၏ မွေးရာပါ စွမ်းရည်များမှာလည်း ၎င်းနှင့်အတူ တိုးတက်လာမည်လော။</p> <p>အရင်ကဆိုလျှင် လင်းဖုန်းသည် သူ၏ ခွန်အားများ ဆက်လက် တိုးတက်လာပါက ဤမွေးရာပါ စွမ်းရည်များမှာ အနှေးနှင့်အမြန်ဆိုသလို သူ့စံနှုန်းများကို မမီတော့မည်ကို သို့မဟုတ် သူ ဒုတိယအကြိမ် အသက်စွမ်းအင် အသွင်ပြောင်းလဲခြင်းကို ဖြတ်ကျော်ပြီးပါက ဤမွေးရာပါ စွမ်းရည်များမှာ အသုံးမဝင်တော့မည်ကို စိုးရိမ်ခဲ့ဖူးသည်။</p> <p>သို့သော် ယခု ကြည့်ရသည်မှာ ဤကိစ္စအတွက် သူ လုံးဝ စိုးရိမ်ရန် မလိုအပ်တော့ပုံရသည်။ သူ၏ မွေးရာပါ စွမ်းရည်များမှာလည်း တဖြည်းဖြည်းချင်း တိုးတက်လာနိုင်ပုံရသည်။</p> <p>"ငါ သိပ်ပြီးမသန်မာသေးဘူးပဲ"</p> <p>လင်းဖုန်းသည် ထိုသင်းခွေချပ်နတ်ဆိုးစစ်သူကြီးကို သတိရလိုက်သည်။ ထိုနတ်ဆိုးစစ်သူကြီးသည် တောင်ပိုင်းတောင်တန်း အခြေစိုက်စခန်းအတွက် ချိန်ကိုက်ဗုံးတစ်လုံးအလား အလွန်ကြီးမားလှသော ခြိမ်းခြောက်မှုကြီး တစ်ခုပင်။ သတိမမူမိပါက အချိန်မရွေး ပေါက်ကွဲထွက်လာနိုင်ပေသည်။</p> <p>အကယ်၍ သူ၏ ခွန်အားကို အမြန်ဆုံး မြှင့်တင်ချင်ပါက ယခု လင်းဖုန်းတွင် ဖြေရှင်းနည်းတစ်ခု ရှိနေပြီ ဖြစ်သည်။ ၎င်းမှာ ကြမ်းကြုတ်သားရဲမျိုးရိုးဗီဇများကို ဆက်လက် ပေါင်းစပ်ရန်ပင်။</p> <p>မျိုးရိုးဗီဇကန့်သတ်ချက်ကို ချိုးဖြတ်ပြီးကတည်းက လင်းဖုန်းသည် ကြမ်းကြုတ်သားရဲများ၏ မျိုးရိုးဗီဇများကို ဆက်လက်ပေါင်းစပ်သင့်မသင့် စဉ်းစားနေခဲ့သည်။ အကယ်၍ သူသာ ကြမ်းကြုတ်သားရဲမျိုးရိုးဗီဇများနှင့် ပေါင်းစပ်လိုက်ပါက အလုံးစုံစွမ်းအားကို သိသာထင်ရှားစွာ တိုးတက်လာစေမည် ဖြစ်သည်။</p> <p>အသိသာဆုံး တိုးတက်မှုမှာ သူ၏ ရုပ်ပိုင်းဆိုင်ရာ ကြံ့ခိုင်မှု တိုးတက်လာခြင်းပင် ဖြစ်သည်။ ပဉ္စမမြောက် သားရဲမျိုးရိုးဗီဇကို ပေါင်းစပ်လိုက်သည်နှင့် လင်းဖုန်း၏ ခွန်အားမှာ ထပ်မံ တိုးတက်လာနိုင်သည်။ သူ့ခန္ဓာကိုယ်ကို သီးသန့် အားကိုးခြင်းဖြင့်ပင် တန် ၃၅၀ ခွန်အားသာမက တန် ၄၀၀ သို့မဟုတ် ထိုထက်မက ပိုမိုသန်မာသော ခွန်အားကို ထုတ်လွှတ်နိုင်ပေလိမ့်မည်။</p> <p>ဤသည်မှာ လင်းဖုန်း သူ၏ ခန္ဓာကိုယ်အသွင်ပြောင်းလဲခြင်းမှတစ်ဆင့် ခွန်အားကို တဖြည်းဖြည်း မြှင့်တင်နိုင်သည့် အရှိန်ထက် များစွာ ပို၍မြန်ဆန်လှသည်။ သို့သော် တစ်ချိန်တည်းမှာပင် လင်းဖုန်းသည် ပဉ္စမမြောက် သားရဲမျိုးရိုးဗီဇကို ပေါင်းစပ်ရန် အနည်းငယ် တွန့်ဆုတ်နေခဲ့သည်။</p> <p>ကြမ်းကြုတ်သားရဲမျိုးရိုးဗီဇများကို ထပ်မံပေါင်းစပ်ပြီးနောက် သူ၏ ခန္ဓာကိုယ်ကန့်သတ်ချက်မှာလည်း ထပ်မံ ကျိုးပျက်သွားမည်ကို သူ စိုးရိမ်နေသည်။ သို့ဆိုလျှင် သူ၏ ကြယ်တာရာစွမ်းအား ကန့်သတ်ချက်မှာ အမျှင်ပေါင်း ၆၀၀၀ သို့မဟုတ် ထိုထက်မကအထိပင် ရောက်ရှိသွားနိုင်သည်။ အကယ်၍ ထိုသို့သာ ဖြစ်သွားခဲ့လျှင် သူ အသွင်ပြောင်းနယ်ပယ် တတိယအဆင့်သို့ တက်လှမ်းရန်မှာ ပို၍ပင် ခက်ခဲသွားပေလိမ့်မည်။</p> <p>မျိုးရိုးဗီဇပေါင်းစပ်ခြင်းက သူ့ကို အချိန်တိုအတွင်း ခွန်အား တိုးတက်လာစေနိုင်သည်။ ထိုနည်းလမ်းသည် လက်ရှိ အခြေအနေအတွက် အထောက်အကူ ဖြစ်စေလိမ့်မည်။</p> <p>မပေါင်းစပ်ခြင်းကမူ ရေရှည်အတွက် အကျိုးကျေးဇူးအချို့ ရှိပေလိမ့်မည်။ အနည်းဆုံးတော့ အနာဂတ်တွင် လင်းဖုန်း အသွင်ပြောင်းနယ်ပယ် တတိယအဆင့်သို့ တက်လှမ်းရန် အနည်းငယ် ပို၍ လွယ်ကူသွားပေလိမ့်မည်။</p> <p>သူ ပေါင်းစပ်သင့်သလား။ လင်းဖုန်း အကျပ်ရိုက်နေလေပြီ။</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save