Book List

<h2 style="text-align: center;">အခန်း (၁၆၅)</h2> <h2 style="text-align: center;">စစ်ကူများ</h2> <h2 style="text-align: center;">*</h2> <p> </p> <p>“အားလုံးပဲ... အခုလက်ရှိ မြောက်ပိုင်းတောင်တန်းအခြေစိုက်စခန်းမှာ ပြဿနာတက်နေပြီ”</p> <p>လင်းဖုန်းသည် မြောက်ပိုင်းအခြေစိုက်စခန်းမှ ပေးပို့လာသော အကူအညီတောင်းခံလွှာကို အစည်းအဝေးခန်းမရှိ သိုင်းသမားတိုင်း မြင်တွေ့နိုင်ရန် တိုက်ရိုက်ပြသလိုက်သည်။ သိုင်းသမားအားလုံး၏ မျက်နှာရိပ်မျက်နှာကဲများ အနည်းငယ် ပြောင်းလဲသွားကြသည်။ မြောက်ပိုင်းတောင်တန်းနှင့် တောင်ပိုင်းတောင်တန်း အခြေစိုက်စခန်းနှစ်ခုမှာ တစ်ဖက်တစ်ချက်စီတွင် ရှိနေကြသော်လည်း တစ်ခုနှင့်တစ်ခု အဝေးမှ အမှီသဟဲပြုနေကြခြင်း ဖြစ်သည်။ အသေးအဖွဲ ပြိုင်ဆိုင်မှုများ ရှိတတ်သော်လည်း လက်တွေ့တွင်မူ နှစ်ဖက်စလုံးမှာ တစ်ဖက်ကိုတစ်ဖက် မှီခိုနေရသည်။</p> <p>ဥပမာအားဖြင့် ယခင်တစ်ကြိမ် စစ်သေနာပတိချုပ်ကျိုးယွင်ကြောင့် တောင်ပိုင်းတောင်တန်းအခြေစိုက်စခန်း အန္တရာယ်ကြုံရစဉ်က မြောက်ပိုင်းတောင်တန်းအခြေစိုက်စခန်းသည်လည်း စစ်ကူများကို အချိန်မီ ပေးပို့ခဲ့ဖူးသည်။ သို့မဟုတ်ပါက တောင်ပိုင်းတောင်တန်းအခြေစိုက်စခန်း၏ ဆုံးရှုံးမှုမှာ မည်မျှအထိ ကြီးမားသွားမည်ကို မည်သူမျှ မသိနိုင်ပေ။</p> <p>လုဝေ့က လေသံအေးအေးဖြင့် တည်ငြိမ်စွာ ပြောလိုက်သည်။</p> <p>"စစ်သေနာပတိချုပ်... ကျွန်တော်လည်း မြောက်ပိုင်းတောင်တန်းအခြေစိုက်စခန်း အခုကြုံတွေ့နေရတဲ့ ပြဿနာအကြောင်း အစီရင်ခံမလို့ ပြင်နေတာပါ။ အဲဒါက မြေပုရွက်ဆိတ်သားရဲတွေပါပဲ။ အဲဒီမြေပုရွက်ဆိတ်တွေက လွန်ခဲ့တဲ့ သုံးရက်ကတည်းက ပေါ်လာတာပါ။ သူတို့က မြောက်ပိုင်းတောင်တန်းအခြေစိုက်စခန်းကို ဝိုင်းထားကြပေမဲ့ မြောက်ပိုင်းတောင်တန်းရဲ့ အင်အားကို ထည့်တွက်ပြီးတော့ ကြီးကြီးမားမား ပြဿနာမရှိနိုင်ဘူးလို့ ကျွန်တော် ထင်ခဲ့တာ။ အခု အခြေအနေက ဒီလောက်အထိ အရေးပေါ်ဖြစ်သွားလိမ့်မယ်လို့ ကျွန်တော် မမျှော်လင့်ထားခဲ့မိဘူး"</p> <p>စင်စစ်တွင် အခြားသူများက မြောက်ပိုင်းတောင်တန်းအခြေစိုက်စခန်း၏ အင်အားကို မသိနိုင်သော်လည်း တောင်ပိုင်းတောင်တန်းအခြေစိုက်စခန်းမှ သိုင်းသမားများကမူ မည်သို့ မသိဘဲ နေပါမည်နည်း။ မြောက်ပိုင်းတောင်တန်းအခြေစိုက်စခန်းတွင် အသွင်ပြောင်းနယ်ပယ် တတိယအဆင့် သိုင်းသမားတချို့ အပါအဝင် သာလွန်လူသား ကျွမ်းကျင်သူ စုစုပေါင်း အယောက် ၅၀ ရှိသည်။</p> <p>အလုံးစုံအင်အားအရဆိုလျှင် မြောက်ပိုင်းတောင်တန်းအခြေစိုက်စခန်းမှာ တောင်ပိုင်းထက် များစွာ ပိုမိုသန်မာသည်။ တောင်ပိုင်းတောင်တန်းအခြေစိုက်စခန်း အင်အား မလျော့ပါးမီ အချိန်ကပင် မြောက်ပိုင်းကို များစွာ မမီခဲ့ပေ။</p> <p>ထိုမျှ အင်အားတောင့်တင်းလှသော မြောက်ပိုင်းတောင်တန်းအခြေစိုက်စခန်းကပင် ယခုအခါ စစ်ကူတောင်းခံလာရသည်ဆိုခြင်းမှာ သူတို့၏ အခြေအနေ မည်မျှအထိ ဆိုးရွားနေကြောင်း ရှင်းရှင်းလင်းလင်း ပြသနေခြင်းပင် ဖြစ်သည်။</p> <p>"မြောက်ပိုင်းတောင်တန်းအခြေစိုက်စခန်းက အခြေအနေကို ပိုပြီး ချဲ့ကားပြောနေတာမျိုးရော ဖြစ်နိုင်မလား"</p> <p>လင်းဖုန်းသည် မြောက်ပိုင်းတောင်တန်းအခြေစိုက်စခန်းအကြောင်း များစွာ မသိသေးသဖြင့် ဤမေးခွန်းကို မေးလိုက်ခြင်း ဖြစ်သည်။</p> <p>လုဝေ့က ခပ်ဖျော့ဖျော့ပြုံးရင်း ရှင်းပြသည်။</p> <p>"မြောက်ပိုင်းတောင်တန်းအခြေစိုက်စခန်းက အခြေအနေကို လူံးဝချဲ့ကားပြောမှာ မဟုတ်ပါဘူး။ ဒီလိုပဲ ပြောပါရစေ... တောင်ပိုင်းတောင်တန်းအခြေစိုက်စခန်းကို မြောက်ပိုင်းဘက်ကနေ စစ်ကူတောင်းတာမျိုးက အရင်က တစ်ခါမှ မရှိခဲ့ဖူးပါဘူး။ သူတို့ကို ကျွန်တော်တို့ဆီကနေ စစ်ကူတောင်းစေဖို့ဆိုတာ တကယ်မလွယ်တဲ့ ကိစ္စပါ"</p> <p>လင်းဖုန်း နားလည်သွားသည်။ အခြေစိုက်စခန်းနှစ်ခုမှာ အမြဲပြိုင်ဆိုင်နေကြပြီး မြောက်ပိုင်းတောင်တန်းအခြေစိုက်စခန်းက အမြဲတမ်း အသာစီး ရနေခဲ့သည်။ အကယ်၍ အမှန်တကယ် မတတ်သာတော့သည့် အခြေအနေမျိုး မဟုတ်ပါက မြောက်ပိုင်းတောင်တန်းအခြေစိုက်စခန်းသည် တောင်ပိုင်းထံမှ လုံးဝအကူအညီတောင်းခံမည် မဟုတ်ပေ။</p> <p>"အားလုံးပဲ... ငါတို့ ဘာလုပ်သင့်တယ်လို့ ထင်ကြလဲ"</p> <p>လင်းဖုန်းသည် သိုင်းသမားအားလုံး၏ သဘောထားကို သိရန် ဝေ့ဝဲကြည့်ရှုကာ မေးမြန်းလိုက်သည်။</p> <p>"ကျွန်တော့်အမြင်ကတော့ မြောက်ပိုင်းတောင်တန်းအခြေစိုက်စခန်းကို ကူညီဖို့ ချက်ချင်း ထွက်ခွာသင့်ပါတယ်အရှင်"</p> <p>"ဟုတ်ပါတယ်အရှင်... မြောက်ပိုင်းက မြေပုရွက်ဆိတ်တွေကို ခုခံနေရတာပါ။ အဲဒီသားရဲတွေက ကိုင်တွယ်ရ မလွယ်ပါဘူး။ တကယ်လို့ သူတို့သာ မြောက်ပိုင်းကို ဖောက်ထွက်သွားနိုင်ရင် ကျွန်တော်တို့ တောင်ပိုင်းတောင်တန်းအခြေစိုက်စခန်းလည်း အဲ့ဒီသားရဲတွေကို ခုခံနိုင်ဖို့ ခက်ပါလိမ့်မယ်။ အဲ့ဒီလိုဖြစ်လာရင် တောင်ပိုင်းတောင်တန်းမြို့ တစ်မြို့လုံး လုံးဝအန္တရာယ်ရှိသွားနိုင်ပါတယ်"</p> <p>"မြောက်ပိုင်းက ဒီလောက်အထိ အန္တရာယ်ကြီးနေမှတော့ ကျွန်တော်တို့ တတ်နိုင်သမျှ မြန်မြန်စစ်ကူပေးသင့်ပါတယ်အရှင်"</p> <p>သိုင်းသမားအများစုမှာ သွားရောက် ကူညီရန် သဘောတူကြသည်။ မည်သို့ပင်ဆိုစေကာမူ အခြေစိုက်စခန်းနှစ်ခုမှာ တစ်ခုနှင့်တစ်ခု နီးကပ်စွာ အမှီသဟဲပြုနေကြသည်။ အကယ်၍ မြောက်ပိုင်းသာ ပျက်စီးသွားပါက တောင်ပိုင်းတောင်တန်းအခြေစိုက်စခန်းသည်လည်း ကြာရှည် တောင့်ခံနိုင်မည် မဟုတ်ပေ။</p> <p>ထိုစဉ် လုဝေ့က ဝင်ပြောလိုက်သည်။</p> <p>"ကျွန်တော်တို့ သွားရမှာတော့ သေချာပါတယ်။ ဒါပေမဲ့ သိုင်းသမား ဘယ်လောက်လောက် စေလွှတ်ရမလဲ။ ကျွန်တော့်အထင်တော့ မြောက်ပိုင်းမှာ လိုအပ်နေတာက တကယ့်ကျွမ်းကျင်သူတွေပါ။ ဒါကြောင့် သာမန်သိုင်းသမားတွေကို အများကြီး ခေါ်သွားဖို့ မလိုလောက်ဘူး ထင်ပါတယ်။ သာလွန်လူသားကျွမ်းကျင်သူတွေနဲ့ ပတ်သက်ရင်တော့ ကျွန်တော်တို့ဆီကနေ လူတွေအများကြီး စစ်ကူသွားနေရင် ကျန်ခဲ့တဲ့အချိန်မှာ သင်းခွေချပ်နတ်ဆိုးတွေ ထပ်လာရင် ဒုက္ခရောက်ပါလိမ့်မယ်။ အဲ့ဒီသားရဲတွေ ထပ်မလာဘူးလို့ ဘယ်သူကမှ တပ်အပ်အာမခံမပေးနိုင်ပါဘူး"</p> <p>လုဝေ့ပြောသည်မှာ အမှန်ပင်။ လူအများကြီး သွား၍ မဖြစ်ပေ။ သို့မဟုတ်ပါက တောင်ပိုင်းတောင်တန်းအခြေစိုက်စခန်းမှာ ဟာလာဟင်းလင်း ဖြစ်ကျန်ခဲ့ပေလိမ့်မည်။ အကယ်၍ သင်းခွေချပ်သားရဲများ ထပ်မံ တိုက်ခိုက်လာပါက အလွန် အန္တရာယ်ရှိသွားနိုင်သည်။</p> <p>လူတိုင်း ခေတ္တမျှ ဆွေးနွေးကြပြီး ဤအချက်ကို သဘောတူလိုက်ကြသည်။ သို့သော် လူမည်မျှ ခေါ်သွားမည်ကို နောက်ဆုံးဆုံးဖြတ်ရမည့်သူမှာ လင်းဖုန်းပင် ဖြစ်သည်။ အဆုံးတွင်မူ လင်းဖုန်းသည် လက်ရှိတောင်ပိုင်းတောင်တန်းအခြေစိုက်စခန်း၏ စစ်သေနာပတိချုပ် မဟုတ်ပါလား။</p> <p>လင်းဖုန်း ခေတ္တခဏ စဉ်းစားပြီးနောက် ဆုံးဖြတ်ချက်ချလိုက်သည်။</p> <p>"လေသင်္ဘောတစ်စီး ချက်ချင်း ပြင်ဆင်လိုက်ပါ။ နောက်ကျတာထက် စောစောသွားပြီး ကူညီတာက ပိုကောင်းမယ်။ စစ်ကူတွေကို ငါကိုယ်တိုင် ဦးဆောင်သွားမယ်။ ငါနဲ့အတူ တပ်ရင်းမှူး ၁၀ ယောက်နဲ့ အခြေစိုက်စခန်းက သာမန်သိုင်းသမား ၃၀၀၀ လိုက်ခဲ့ရမယ်"</p> <p>ထိုလူအင်အားမှာ အလွန်ကြီးမားသည်ဟု မဆိုနိုင်သော်လည်း တောင်ပိုင်းတောင်တန်းအခြေစိုက်စခန်း၏ လက်ရှိအင်အား ထက်ဝက်နီးပါး ရှိနေပြီ ဖြစ်သည်။ အကယ်၍ သင်းခွေချပ်သားရဲများ ထပ်မံ တိုက်ခိုက်လာလျှင်ပင် တောင်ပိုင်းတွင် ကျန်ရှိနေသောသူများက အချိန်အတန်ကြာ တောင့်ခံထားနိုင်မည်ဖြစ်ကာ အလွယ်တကူ ကျဆုံးသွားလိမ့်မည် မဟုတ်ပေ။</p> <p>လင်းဖုန်း ဆုံးဖြတ်ချက်ချပြီးပြီ ဖြစ်သဖြင့် မည်သူမျှ စောဒကမတက်ကြပေ။ ထို့နောက် လင်းဖုန်းသည် လုဝေ့ အပါအဝင် တပ်ရင်းမှူး ၁၀ ဦးကို ကိုယ်တိုင်ကိုယ်ကျ ရွေးချယ်လိုက်သည်။</p> <p>"ကဲ...အခုပဲ သွားပြင်ဆင်ကြတော့။ နောက်နာရီဝက်နေရင် ငါတို့ ထွက်ခွာမယ်"</p> <p>လူတိုင်း ချက်ချင်း လူစုခွဲသွားကြသည်။ ယွီရှန်း တစ်ဦးတည်းသာ အနည်းငယ် ဝေခွဲမရဖြစ်နေသည်။ နောက်ဆုံးတွင် သူမနေနိုင်တော့ဘဲ မေးလိုက်သည်။</p> <p>"လင်းဖုန်း... ငါ့ကို ဘာလို့ ထည့်မတွက်ထားတာလဲ"</p> <p>လင်းဖုန်းက အသာပြုံးလျက် ပြောလိုက်သည်။</p> <p>"ယွီရှန်း... မင်းက အခြေစိုက်စခန်းကို အခုမှရောက်ခါစပဲ ရှိသေးတယ်။ လက်ရှိအခြေအနေတွေကို အပြည့်အဝ မကျွမ်းကျင်သေးဘူး။ မြောက်ပိုင်းကို သွားရမယ့် ခရီးကလည်း အန္တရာယ်ရှိနိုင်တယ်။ ငါတို့နှစ်ယောက် အတူတူ တိုက်ပွဲဝင်ချင်တယ် ဆိုပေမဲ့ အဓိပ္ပာယ်မရှိတဲ့ စတေးမှုမျိုးတော့ အဖြစ်မခံနိုင်ဘူး။ စိတ်မပူပါနဲ့... ဒီနေရာက ရှေ့တန်းပဲလေ။ မင်း တိုက်ပွဲဝင်ဖို့ အခွင့်အရေးတွေ အများကြီး ရဦးမှာပါကွာ"</p> <p>ယွီရှန်း ခေါင်းညိတ်လိုက်သည်။ သူက ပြုံးရင်း ပြောလိုက်သည်။</p> <p>"လင်းဖုန်း... သတိထားသွားပါဦး"</p> <p>"ဟားဟားဟား...ဘာမှ စိတ်ပူမနေနဲ့"</p> <p>လင်းဖုန်းတွင် ပြင်ဆင်စရာ ဘာမှမရှိပေ။ သူသည် လေသင်္ဘောဆီသို့ တန်းတန်းမတ်မတ် ဦးတည်သွားလိုက်သည်။</p> <p>တောင်ပိုင်းတောင်တန်းအခြေစိုက်စခန်းတွင် လေသင်္ဘောများကို အမြဲတမ်း အရန်သင့် ပြင်ဆင်ထားလေ့ရှိသည်။ လူ ၃၀၀၀ မဆိုထားနှင့် လူ ၅၀၀၀ ကိုပင် တပြိုက်နက် သယ်ဆောင်နိုင်သည်။ ဤကဲ့သို့သော လေသင်္ဘောများကို ပုံမှန်အားဖြင့် အသုံးမပြုကြပေ။ စစ်ပွဲအတွင်း အန္တရာယ်ကြုံရချိန် သို့မဟုတ် ဆုတ်ခွာရချိန်များတွင်သာ အသုံးပြုလေ့ရှိသည်။</p> <p>လေသင်္ဘောပေါ်တွင် လင်းဖုန်းသည် မြေပုရွက်ဆိတ်များအကြောင်းကို အရင်ဆုံး လေ့လာလိုက်သည်။ ဤမြေပုရွက်ဆိတ်များတွင် သင်းခွေချပ်သားရဲများနှင့် တူညီသော အချက်တစ်ခု ရှိသည်။ ၎င်းမှာ မြေအောက်လိုဏ်ခေါင်းများ တူးရာတွင် ကျွမ်းကျင်ခြင်းပင် ဖြစ်သည်။ သူတို့မှာလည်း ကိုင်တွယ်ရ ခက်ခဲပြီး အရေအတွက် အလွန်များပြားလှသည်။</p> <p>သို့သော် မြေပုရွက်ဆိတ်များနှင့် သင်းခွေချပ်သားရဲများမှာ ဆက်ဆံရေး သိပ်မကောင်းကြပေ။ သူတို့တွင် ကိုယ်ပိုင်နယ်မြေအသီးသီး ရှိကြပြီး ပုံမှန်အားဖြင့် တစ်ဖက်နှင့်တစ်ဖက် ကျူးကျော်ခြင်း မရှိကြပေ။ အကယ်၍ ကျူးကျော်မှုများ ရှိလာပါက သူတို့အချင်းချင်းပင် တိုက်ခိုက်တတ်ကြသည်။</p> <p>သင်းခွေချပ်သားရဲများနှင့် နှိုင်းယှဉ်လျှင် ဤမြေပုရွက်ဆိတ်များမှာ ပို၍ပင် ကိုင်တွယ်ရ ခက်ခဲလှသည်။ ထိုသားရဲများသည် အရေအတွက် များပြားရုံသာမက အလွန်တရာ လျင်မြန်ဖြတ်လတ်ကြသေးသည်။ သူတို့၏ သွားများမှာလည်း အထူးသဖြင့် စူးရှထက်မြက်လှပြီး မာကျောသော သံမဏိများကိုပင် တစ်ချက်တည်းဖြင့် ကိုက်ဖြတ်နိုင်သည်။</p> <p>ထို့ကြောင့်ပင် မြောက်ပိုင်းတောင်တန်းအခြေစိုက်စခန်းသည် မြေပုရွက်ဆိတ်များကို ခုခံရန်အတွက် ဤမျှ ကြီးမားသော အင်အားကို စုစည်းထားရခြင်း ဖြစ်သည်။</p> <p>'ငါ ဒီမြေပုရွက်ဆိတ်တွေဆီက မျိုးရိုးဗီဇတချို့ကို စုဆောင်းပြီးတော့ သင်းခွေချပ်သားရဲ မျိုးရိုးဗီဇတွေနဲ့ နှိုင်းယှဉ်ကြည့်ရမယ်။ အနာဂတ်မှာ ကြမ်းကြုတ်သားရဲမျိုးရိုးဗီဇအသစ်တွေကို ပေါင်းစပ်ဖို့အတွက် ပိုပြီး နှိုင်းယှဉ်စရာတွေ ရှိထားမှ ဖြစ်မယ်'</p> <p>လင်းဖုန်း၏ စိတ်ထဲတွင် ပထမဆုံး ပေါ်လာသည်မှာ မြေပုရွက်ဆိတ်များက မည်မျှအထိ ခက်ခဲမည်ဆိုခြင်း မဟုတ်ပေ။ သူတို့၏ မျိုးရိုးဗီဇများပင် ဖြစ်သည်။ လင်းဖုန်းသည် ယခင်ကလို အနန္တလမ်းစဉ်အကယ်ဒမီမှ သာမန်ကျောင်းသားလေး မဟုတ်တော့ပေ။ သူသည် ကြီးမားသော အာဏာကို ဆုပ်ကိုင်ထားပြီး ဒေသတစ်ခုကို အုပ်ချုပ်နေသော အစွမ်းထက်သည့် သိုင်းသမားတစ်ဦး ဖြစ်နေပြီ ဖြစ်သည်။</p> <p>ယခုအခါ သူသည် ကြမ်းကြုတ်သားရဲ အမျိုးမျိုးနှင့် ထိတွေ့ခွင့် ရနေပြီ ဖြစ်သည်။ ထို့ကြောင့် သားရဲမျိုးရိုးဗီဇများကို ထပ်မံပေါင်းစပ်ရာတွင် ရွေးချယ်စရာ လုံးဝ မရှိခဲ့သော ယခင်ကလို အကန့်အသတ်များ ရှိနေတော့မည် မဟုတ်ပေ။</p> <p>နာရီဝက်ခန့် ကြာပြီးနောက်တွင် အခြေစိုက်စခန်းမှ တပ်ရင်းမှူး ၁၀ ဦးသည် သိုင်းသမား ၃၀၀၀ ကို ဦးဆောင်ကာ လေသင်္ဘောပေါ်သို့ တက်လာခဲ့ကြသည်။</p> <p>"အားလုံး အဆင်သင့်ဖြစ်ပြီဆိုရင် အခုပဲ ထွက်ကြစို့။ ငါတို့ရဲ့ ပစ်မှတ်က မြောက်ပိုင်းတောင်တန်း အခြေစိုက်စခန်းပဲ"</p> <p>ဝူး...</p> <p>လင်းဖုန်း၏ အသံအဆုံးတွင် ကြီးမားလှသော လေသင်္ဘောကြီးမှာ စတင် ပျံတက်သွားတော့သည်။</p> <p>...</p> <p>"တောင်ပိုင်းတောင်အခြေစိုက်စခန်းက လူတွေ အခုထိ ရောက်မလာသေးဘူးလား"</p> <p>စစ်သေနာပတိချုပ်မိုလေ့ မျက်မှောင်ကြုတ်လိုက်သည်။ သူသည် မြောက်ပိုင်းတောင်တန်းအခြေစိုက်စခန်းကို အနှစ် ၂၀ ကြာ စောင့်ကြပ်ခဲ့သော အသွင်ပြောင်းနယ်ပယ် တတိယအဆင့် ကျင့်ကြံသူတစ်ဦး ဖြစ်သည်။ သူသည် တောင်ပိုင်းတောင်တန်းအခြေစိုက်စခန်းထံမှ စစ်ကူတောင်းရသည့် ဤကဲ့သို့သော အကျပ်အတည်းမျိုးကို ဘယ်သောအခါကမှ မကြုံတွေ့ခဲ့ဖူးပေ။</p> <p>သို့သော် အခြေစိုက်စခန်း အပြင်ဘက်ရှိ များပြားလှသော မြေပုရွက်ဆိတ်အုပ်ကြီးကိုကြည့်ကာ စစ်ကူတောင်းရန်မှလွှဲ၍ သူ ဘာမှမတတ်တော့နိုင်ပေ။</p> <p>"စစ်သေနာပတိချုပ်... ကျွန်တော့်အထင်တော့ တောင်ပိုင်းတောင်တန်းအခြေစိုက်စခန်းအပေါ် အများကြီး မျှော်လင့်ချက် မထားသင့်ဘူး ထင်တယ်။ တောင်ပိုင်းတောင်တန်းအခြေစိုက်စခန်းကလည်း ဟိုတလောကမှ အကြီးအကျယ် ဆုံးရှုံးမှုတွေ ကြုံခဲ့ရတာလေ။ အခုလက်ရှိ စစ်သေနာပတိချုပ်အသစ်က လူသားမျိုးနွယ် သူရဲကောင်းတံဆိပ်ရထားတဲ့ လင်းဖုန်း ဆိုတဲ့သူပဲ။ သူက မျိုးရိုးဗီဇကန့်သတ်ချက်ကို ချိုးဖြတ်ထားတာ သိပ်မကြာသေးဘူးရယ်။ သူ ဘယ်လောက်အထိများ သန်မာနိုင်မှာမို့လို့လဲ။ သူတို့ လာခဲ့ရင်တောင် ကျွန်တော်တို့ရဲ့ လက်ရှိပြဿနာကို ဖြေရှင်းပေးနိုင်လိမ့်မယ်လို့တော့ ကျွန်တော်မထင်ဘူးဗျ"</p> <p>မိုလေ့၏ ရင်ထဲတွင် ခဲဆွဲထားသကဲ့သို့ လေးလံသွားသည်။ မှန်ပေသည်။ တောင်ပိုင်းတောငိတန်းအခြေစိုက်စခန်းသည် မိမိကိုယ်ကိုယ်ပင် မနည်းကာကွယ်နေရခြင်းဖြစ်ကာ လက်ရှိသူတို့၏ အင်အားမှာလည်း အောက်ဆုံးသို့ ရောက်ရှိနေသည်။ ယခင်က သူသည် တောင်ပိုင်းတောင်တန်းအခြေစိုက်စခန်း၏ စစ်သေနာပတိချုပ်ကျိုးယွင်ကို အမြဲတစေ အထင်သေးခဲ့သည်။ နှစ်ဖက်စလုံးမှာလည်း ပြိုင်ဆိုင်မှုတချို့ ရှိခဲ့ကြသည်။</p> <p>သို့သော် ကျိုးယွင်သည် အနည်းဆုံးတော့ အသွင်ပြောင်းနယ်ပယ် တတိယအဆင့် ရှိသူတစ်ဦး ဖြစ်သည်။ မိုလေ့ကိုယ်တိုင်ပင်လျှင် သူ့ကို အပြည့်အဝအနိုင်ရရန် လုံးဝဥဿုံ ယုံကြည်မှု မရှိခဲ့ပေ။ အကယ်၍ ကျိုးယွင်သာ ယခုလက်ရှိ ဤနေရာတွင် ရှိနေမည်ဆိုပါက တောင်ပိုင်းတောင်တန်းအခြေစိုက်စခန်းမှ စစ်ကူများကို မျှော်လင့်စရာ ရှိပေဦးမည်။</p> <p>လင်းဖုန်းကရော...။ သူသည် လူသားမျိုးနွယ် သူရဲကောင်းတံဆိပ် ရထားသော်လည်း မျိုးရိုးဗီဇကန့်သတ်ချက်ကို ချိုးဖြတ်ထားခါစသာ ရှိသေးသည်။ သူသည် ကံကောင်း၍သာ ထိုတံဆိပ်ကို ရခဲ့ခြင်း ဖြစ်ပေလိမ့်မည်။ အသွင်ပြောင်းနယ်ပယ် လက်သစ်တစ်ယောက်က မည်မျှအထိ ခွန်အားရှိနိုင်မည်နည်း။</p> <p>အကယ်၍ မြောက်ပိုင်းတောင်တန်းအခြေစိုက်စခန်းသည် ဤအကျပ်အတည်းမှ လွတ်မြောက်လိုပါက ကိုယ့်ကိုယ်ကိုသာ အားကိုးရပေလိမ့်မည်။</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save