Book List

<p>ကျုပ်တို့လာခဲ့တဲ့ဘက်ဆီမှာက မုန်တိုင်းထန်နေပေမဲ့ ဒီဘက်လောကမှာကျ သာယာတဲ့ရာသီဥတုနဲ့အတူ လေပြေအေးကလေးတွေကတိုက်လို့။ လူ့လောကဘက်ခြမ်းနဲ့များကွာပါ့။ ကျုပ်တို့နဲ့အတူပါလာတဲ့ မိန်းကလေးက မြင်းဖြူကြီးပေါ်မှာ ခံ့ခံ့ညားညားနဲ့လိုက်ပါသွားတယ်။ ကျုပ်တို့မှာဖြင့် အဖမ်းခံရတဲ့ အကျဉ်းသားတွေလို ငြိမ်ငြိမ်လေးလိုက်ပါခဲ့ရတယ်။ ပန်းပေါင်းစုံပျိုးထားတဲ့ ဥယျာဉ်ကြီးတစ်ခုရဲ့ရှေ့ကဖြတ်သွားတဲ့အချိန်မှာ အမျိုးသမီးစစ်သည်တွေဟာ တုံ့ဆိုင်းခြင်းမရှိပဲ ရပ်တန့်သွားကြတယ်။</p> <p> </p> <p>"သမီးတော်လေး။ အမလေး။ မယ်မယ်ဖြင့်လေ စိတ်တွေပူလိုက်ရတာကွယ်။"</p> <p> </p> <p>ရောင်စုံပန်းပင်တွေကြားကထွက်လာတဲ့ အမျိုးသမီးတစ်ဦးကိုမြင်လိုက်ရတယ်။ အဲ့ဒိအမျိုးသမီးက ဒိသိုက်ကြီးရဲ့ သိုက်နန်းရှင် သခင်မကြီး သုနန္ဒာဒေဝီပဲဖြစ်ရမယ်။</p> <p> </p> <p>"ဒီနှစ်ယောက်က ဘယ်ကဘယ်လိုပါလာတာလဲ။"</p> <p> </p> <p>"မယ်မယ်ဘုရား။ ဒီအမျိုးသားနှစ်ယောက်က သခင်မလေးကို ပြန်လိုက်ပို့ကြတဲ့သူတွေပါ။ မယ်မယ်ဘုရားနဲ့တွေ့ပြီး အကျိုးအကြောင်းပြောပြလို့ရအောင် တစ်ပါတည်းခေါ်ဆောင်လာခဲ့ခြင်းပါ။"</p> <p> </p> <p>"ကောင်းပြီ။ သမီးတော်လေးကို နန်းဆောင်ရှိရာခေါ်တောင်သွားပေတော့။"</p> <p> </p> <p>စောနကပဲ သူ့သမီးတော်လေးကို စိတ်ပူနေတဲ့ဟန်ပြပေမဲ့ ကျုပ်တို့ကိုစကားပြောတဲ့လေသံက တစ်မျိုးပြောင်းသွားတယ်။ အင်းပေါ့လေ။ ဒီသိုက်နန်းက သာမန်သိုက်နန်းတွေနဲ့မှ မတူပဲ။</p> <p> </p> <p>" ကဲလာကြ။ ဘယ်ကစပြီးပြောကြမလဲ။"</p> <p> </p> <p>သိုက်နန်းရှင်သခင်မသုနန္ဒာဒေဝီက ကျုပ်တို့ကိုနေရာထိုင်ခင်းပေးပြီး ကျုပ်တို့နဲ့သူ့ရဲ့သမီးတော် သုဝဏ္ဏဒေဝီတို့ ဆုံခဲ့ပုံတွေကိုပြန်ပြောပြစေချင်နေပုံရတယ်။ အဲ့ဒါနဲ့ ကျုပ်ကပဲကြားထဲကဝင်ပြီး ပြောပြရတော့တယ်။ အကြောင်းစုံကိုသိသွားတဲ့နောက်မှာတော့ ပတ်ဝန်းကျင်လေထုအနေအထားက ရုတ်ချည်းပြောင်းလဲသွားပြီး တင်းမာလာတာကိုသတိထားလိုက်မိတယ်။</p> <p> </p> <p>"တောက်။ ဒါကြောင့်မို့ နင်တို့ယောက်ျား‌တွေကိုယုံလို့မရတာပေါ့။ ငါ့သမီးတော်လေးဘာမှမဖြစ်ပေလို့နော်။ မဟုတ်ရင် နင်တို့နှစ်ကောင်လုံး အသေဆိုးနဲ့သေအောင်ကျိန်စာတိုက်ပစ်လိုက်လို့ရတယ်။နားလည်လား။"</p> <p> </p> <p>" တကယ်တော့ ဒီလိုဖြစ်သွားရတာ ကျုပ်အပြစ်တွေကြောင့်လည်းပါပါတယ်။ သခင်မကြီး အပြစ်ပေးချင်တယ်ဆိုရင် ကျုပ်ကိုပဲပေးပါ။ ဒီက ဆရာက ကျုပ်အကူအညီတောင်းလို့သာ သိုက်နန်းတံခါးကိုဖွင့်ပေးရတာပါ။"</p> <p> </p> <p>"ကောင်းပြီလေ။ ကိုယ့်အမှားကိုယ်ဝန်ခံရဲတဲ့ မင်းရဲ့သတ္တိကိုတော့ ချီးကျူးပါတယ်။ ဒါပေမဲ့မင်းကိုတော့ သေချာပေါက်အပြစ်ပေးမှရမယ်။လာ ရှေ့နားကိုတိုး။"</p> <p> </p> <p>သိုက်နန်းရှင်သခင်မ သုနန္ဒာဒေဝီက ကိုမင်းသိုက်ကိုအနားခေါ်လိုက်ပြီး နဖူးကိုလက်နဲ့ထောက်ထားလိုက်တယ်။ ပါးစပ်ကလည်း တတွတ်တွတ်နဲ့ဘာတွေရွတ်မှန်းမသိဘူး။ ခဏအကြာမှာ ကိုမင်းသိုက်ခွေကျသွားတာမို့ ကျုပ်ကပဲလှမ်းဖမ်းလိုက်ရတယ်။</p> <p> </p> <p>" ကောင်လေး။ နင့်လူကိုခေါ်သွားတော့။ ဒီနေ့ဒီအချိန်ကစလို့ သူဟာ စိတ်ရောဂါတစ်မျိုးဖြစ်ပြီး အရူးအနှမ်းဘဝနဲ့ ဆယ်နှစ်တိုင်တိုင်နေရဖို့ ငါကျိန်စာတိုက်လိုက်တယ်။ အခုနင်တို့ပြန်လို့ရပြီ။"</p> <p> </p> <p>ဘာမှအထွန့်တက်ပြီးမပြောနိုင်တော့ပဲ ကိုမင်းသိုက်ကိုထမ်းခေါ်ပြီးတာနဲ့ 'မြပုလဲသိုက်'အတွင်းကနေ ကျုပ်တို့ကိုစောင့်နေတဲ့ ကိုဖိုးတေတို့ရှိရာကိုသာ ပြန်လာခဲ့လိုက်တယ်။ ကျုပ်တို့‌လူ့လောကဘက်ကိုပြန်ရောက်တော့ နေ့ခင်းအချိန်တောင်ဖြစ်နေပါပေါ့လား။</p> <p> </p> <p style="text-align: center;">***</p> <p style="text-align: center;">ပြီး။</p> <p style="text-align: center;">***</p> <p> </p> <p>မှတ်ချက်။ ။စိတ်ကူးယဉ်ရေးသားထားသောဇာတ်လမ်းဖြစ်ပါသဖြင့် အမှားများပါခဲ့သည်ရှိသော် နားလည်ခွင့်လွှတ်ပေးကြဖို့ မေတ္တာရပ်ခံတောင်းပန်အပ်ပါသည်။</p> <p> </p> <p style="text-align: right;">သင်ဆရာ မြင်ဆရာ ကြားဆရာအပေါင်းအား</p> <p style="text-align: right;">ဦးထိပ်ထားလျက်</p> <p style="text-align: right;">လေးစားစွာဖြင့်</p> <p style="text-align: right;">မောင်ပိုင်(ပုလဲ)</p> <p style="text-align: center;">***</p>


Save