Book List

<h2 style="text-align: center;">အခန်း ၁၀၄</h2> <h2 style="text-align: center;">တပ်မှူးကြီးအဖြစ် ရာထူးတိုးခြင်း</h2> <h2 style="text-align: center;">*</h2> <p> </p> <p> </p> <p> </p> <p>လီကျစ်သည် သူ၏ မြင်းကောင်းမြင်းသန့်ကိုစီးကာ တပ်မှူးကြီးလော်နှင့်အတူ ရုံးတော်သို့ ရောက်ရှိလာခဲ့သည်။</p> <p>ယခုအခါ လီကျစ်၏ အဆင့်အတန်းမြင့်မားလာပြီဖြစ်ရာ အိမ်တော်ထိန်းဆွန်းကို ရှာဖွေနေရန် မလိုအပ်တော့ပေ။ သူက သူ၏ကတ်ပြားကို တိုက်ရိုက်ပေးအပ်လိုက်ပြီး ခေတ္တမျှ စောင့်ဆိုင်းပြီးနောက် စီမံခန့်ခွဲရေးတာဝန်ခံတစ်ဦးက လီကျစ်နှင့် အခြားသူများကို ဒုတိယခန်းမဆောင်ဆီသို့ ကြိုဆိုခေါ်ဆောင်သွားလေသည်။</p> <p>ဒုတိယခန်းမဆောင်အတွင်း၌ ပြည်နယ်ဘုရင်ခံ ဟယ်ရှီရှို့နှင့် စစ်ဘက်ရေးရာ ကြိုတင်ပြင်ဆင်မှုဆိုင်ရာ တာဝန်ခံအမတ် ကျာတိန်းပေတို့က စောင့်ဆိုင်းနေနှင့်ပြီးဖြစ်သည်။</p> <p>ဟယ်ရှီရှို့က လီကျစ် လျှောက်လာသည်ကို မြင်သောအခါ ပြုံးလျက် ကျာတိန်းပေအား…</p> <p>"ကြည့်စမ်း… သူ ရောက်လာပြီ… ပြီးတော့ တပ်မှူးကြီးတစ်ယောက်ကိုပါ ခေါ်လာသေးတယ်…"</p> <p>ကျာတိန်းပေက လက်နှစ်ဖက်ကိုယှက်ကာ…</p> <p> "ပြည်နယ်ဘုရင်ခံမင်းကြီး... မင်းကြီးရဲ့ ခန့်မှန်းချက်က ကွက်တိပဲဗျာ…"</p> <p>လီကျစ်နှင့် တပ်မှူးကြီးလော်တို့သည် ဒုတိယခန်းမဆောင်အတွင်းသို့ ဝင်ရောက်လာပြီး ပြည်နယ်ဘုရင်ခံကို အရိုအသေပေးလိုက်ကြသည်။ လီကျစ်က မတ်တတ်ရပ်ကာ…</p> <p>"ပြည်နယ်ဘုရင်ခံမင်းကြီးကို မတွေ့ရတာရက်အတော်ကြာပြီဆိုပေမယ့် မင်းကြီးက ပိုပြီးတောင် ကျန်းမာရွှင်လန်းနေသေးတယ်နော်…"</p> <p>ဟယ်ရှီရှို့က အားရပါးရ ရယ်မောလိုက်ပြီး…</p> <p> "မင်းက တကယ်ကို စကားပြောတတ်တာပဲ"</p> <p>သူက ခေတ္တရပ်လိုက်ပြီး ကျာတိန်းပေကို လက်ညှိုးထိုးပြကာ…</p> <p> "ဒါက ထန်းကျင်းမြို့ရဲ့ စစ်ဘက်ရေးရာကြိုတင်ပြင်ဆင်မှုဆိုင်ရာ တာဝန်ခံအမတ် ကျာတိန်းပေပဲ။ သူက ဒီနေ့ မင်းကိုလာတွေ့ဖို့ သီးသန့်ရောက်လာတာ…"</p> <p>လီကျစ်က ကျာတိန်းပေဘက်သို့ လှည့်ကြည့်လိုက်ရာ သူသည် အသက်လေးဆယ်ကျော်အရွယ် လေးထောင့်စပ်စပ်မျက်နှာပိုင်ရှင်ဖြစ်ပြီး မေးစေ့တွင် မုတ်ဆိတ်မွေးမရှိသော်လည်း နှာခေါင်းအောက်တွင် နှုတ်ခမ်းမွေးနှစ်စုရှိကာ ရှည်လျားကျဉ်းမြောင်းပြီး သွက်လက်သောမျက်လုံးတစ်စုံကို ပိုင်ဆိုင်ထားသည်ကို တွေ့လိုက်ရသည်။</p> <p>လီကျစ်နောက်မှ လိုက်ပါလာသော တပ်မှူးကြီးလော်က လှည့်ကာ ဒူးထောက်လျက်</p> <p>"ကျွန်တော်မျိုး တာဝန်ခံအမတ်မင်းကို ဂါရဝပြုပါတယ်…"</p> <p>လီကျစ်လည်း လှည့်ကာ အရိုအသေပေးရန် ပြင်လိုက်သော်လည်း ကျာတိန်းပေက သူ့ကို အမြန်ထိန်းကိုင်လိုက်သည်။ လီကျစ်က ပြည်နယ်ဘုရင်ခံ၏ ဆွေမျိုးဖြစ်နေ၍လား သို့မဟုတ် လီကျစ်တွင် အံ့မခန်းစွမ်းအင်များရှိပြီး ကြီးမားသောအောင်မြင်မှုများ ရရှိထား၍လား မသေချာသော်လည်း ကျာတိန်းပေသည် လီကျစ်ကို အလွန်အမင်းအလေးထားကာ သူ့ကို အရိုအသေပေးခွင့် မပြုပေ။</p> <p>"တပ်မှူးကြီးက ဒီနေ့အတွက် အောင်ပွဲခံသူရဲကောင်းပဲ... ဒီလောက်ကြီးကျယ်တဲ့ အရိုအသေတွေ ပေးနေဖို့ မလိုပါဘူး…"</p> <p>လီကျစ် မတ်တတ်ရပ်လိုက်သောအခါ ကျာတိန်းပေက သူ့ကို ခေါင်းအစခြေအဆုံး သေသေချာချာ အကဲခတ်ကြည့်ရှုလိုက်ပြီးနောက်</p> <p>"တကယ်ပဲ လူငယ်သူရဲကောင်းတစ်ယောက်ပါလား... ဒီလောက်ကြီးမားတဲ့ အောင်မြင်မှုတွေကို ရယူနိုင်ခဲ့တာ အံ့ဩစရာ မဟုတ်တော့ပါဘူး။ မင်းက ငါတို့ ထန်းကျင်းမြို့အတွက် ကြီးမားတဲ့ ဂုဏ်သိက္ခာကို ယူဆောင်လာပေးခဲ့တာပဲ…"</p> <p>သူက 'တပ်မှူးကြီး' ဟု ခေါ်လိုက်သည်ကို ကြားသောအခါ လီကျစ်သည် တပ်မှူးကြီးအဖြစ် အမှန်တကယ် ရာထူးတိုးခံရပြီမှန်း သိလိုက်ပြီး အလွန်ဝမ်းသာသွားလေသည်။</p> <p>"တာဝန်ခံအမတ်မင်းက ကျွန်တော်မျိုးကို မြှောက်ပင့်နေပါပြီ…"</p> <p>ကျာတိန်းပေက လီကျစ်၏ ရာထူးတိုးမြှင့်ခံရမှုကို ကြေညာပြီးဖြစ်သည်ကို မြင်သောအခါ ဟယ်ရှီရှို့လည်း အချိန်မဆွဲတော့ပေ။ သူက အစေခံတစ်ဦးကို လီကျစ်၏ ခါးဆွဲကတ်ပြားနှင့် ဧကရာဇ်မင်းမြတ်၏ အမိန့်တော်စာချွန်လွှာကိုယူလာစေပြီး အသံကျယ်ကျယ်ဖြင့် ကြေညာလိုက်သည်။</p> <p>"လီကျစ်... ဒီ ကယ်ဆယ်ရေးနဲ့ နှိမ်နင်းရေး စစ်ပွဲမှာ မင်း ငါ့ကို စိတ်မပျက်စေခဲ့ဘူး။ အခု စစ်ရေးအမတ်ကြီးရုံးရဲ့ ရာထူးတိုးမြှင့်မှုနဲ့ ဆုလာဘ်တွေ ရောက်လာပြီဆိုတော့ မင်းကို ထန်းကျင်းမြို့ လက်ဝဲတပ်ဖွဲ့စခန်းရဲ့ တပ်မှူးကြီးအဖြစ် စတုတ္ထအဆင့်ရာထူးတိုးမြှင့်ပေးလိုက်ပြီး ဖန့်ကျားရွာရဲ့ တပ်မှူးကြီးအဖြစ်ခန့်အပ်လိုက်ပြီ။ ဒါက မင်းရဲ့ ခါးဆွဲကတ်ပြား ဧကရာဇ်မင်းမြတ်ရဲ့ အမိန့်တော်စာချွန်လွှာနဲ့ အဆောင်အယောင်ဝတ်စုံတွေပဲ။ မင်း ဒါတွေကို သေသေချာချာ သိမ်းဆည်းထားရမယ်…"</p> <p>ဟယ်ရှီရှို့က ထိုပစ္စည်းများကို လီကျစ်ထံ ပေးအပ်လိုက်ပြီးနောက် ပြုံးကာ…</p> <p>"ဒီကယ်ဆယ်ရေးနဲ့ နှိမ်နင်းရေးစစ်ပွဲမှာ မင်း ပါဝင်နိုင်အောင် ငါ ဘယ်လို စီစဉ်ပေးခဲ့လဲ"</p> <p>လီကျစ်က ထိုပစ္စည်းများကို လက်ခံယူရင်း ရိုသေစွာ ဦးညွှတ်လိုက်ပြီး အသံကျယ်ကျယ်ဖြင့်…</p> <p>"ကျွန်တော်မျိုးရဲ့ ရာထူးတိုးမြှင့်ခံရမှုက ပြည်နယ်ဘုရင်ခံမင်းကြီးရဲ့ ကျေးဇူးတော်နဲ့ စီစဉ်ပေးမှုတွေကြောင့်ပါပဲ။ လီကျစ် ဘယ်တော့မှမေ့မှာ မဟုတ်ပါဘူး…"</p> <p>ဟယ်ရှီရှို့ကပြုံးကာ ခေါင်းညိတ်လိုက်ပြီးနောက် အသံကျယ်ကျယ်ဖြင့် ဆက်လက်ကြေညာလေသည်။</p> <p>"ထန်းကျင်းမြို့ လက်ဝဲတပ်ဖွဲ့စခန်းရဲ့ တပ်မှူးကြီးလီကျစ်... ဆုတော်ကိုလက်ခံယူဖို့ ဒူးထောက်လိုက်ပါ…"</p> <p>လီကျစ်သည် ဤစကားကို ရုတ်တရက်ကြားလိုက်ရသဖြင့် နားမလည်နိုင် ဖြစ်သွားသော်လည်း ကြောင်တောင်တောင်ဖြင့် ဒူးထောက်လိုက်ရာ... ဟယ်ရှီရှို့၏ စကားသံကို ကြားလိုက်ရသည်။</p> <p>"ထန်းကျင်းမြို့ လက်ဝဲတပ်စခန်းရဲ့ တပ်မှူးကြီး၊ ဖန့်ကျားရွာရဲ့ တပ်မှူးကြီး လီကျစ်... ရန်သူတွေကို သုတ်သင်ရာမှာ မင်းရဲ့ ရဲရင့်တဲ့ စွမ်းဆောင်မှုတွေနဲ့ သူပုန်တွေကို နှိမ်နင်းရာမှာ မင်းရဲ့ ထူးချွန်တဲ့ တာဝန်ထမ်းဆောင်မှုတွေအတွက် ဧကရာဇ်မင်းမြတ်က အလွန်ကျေနပ်အားရတော်မူတယ်။ ဒါကြောင့် မင်းကို ငွေသျှူး တစ်ရာ သီးသန့် ဆုတော်ချီးမြှင့်လိုက်တယ်… သေသေချာချာ လက်ခံယူပါ…"</p> <p>ဒါက ဧကရာဇ်မင်းမြတ်ရဲ့ သီးသန့် ဆုတော်ပဲ…</p> <p>လီကျစ်သည် မြေပြင်ပေါ်တွင် ဒူးထောက်လျက် ဧကရာဇ်မင်းမြတ်ချီးမြှင့်သော ငွေတုံးကြီး နှစ်တုံးကို ရိုသေစွာလက်ခံယူကာ လက်နှစ်ဖက်ဖြင့် ကိုင်ထားလိုက်သည်။ ငွေတုံးများသည် ဖြူဖွေးနေပြီး အရည်အသွေးအလွန်ကောင်းမွန်ကာ အစွန်းနှစ်ဖက်တွင်ကြီးမား၍ အလယ်တွင် ကျဉ်းမြောင်းကာ အနားသားများက အပေါ်သို့ ကော့တက်နေသည်။ အပေါ်ဘက် အလယ်ဗဟိုတွင် 'လု အက္ခရာ အမှတ် ၂၃၃၀' ဟု ထွင်းထုထားသည်။ အလယ်ဗဟို၏ ဘေးတစ်ဖက်တစ်ချက်တွင် 'ချုံကျန်းမင်းဆက် ခုနစ်နှစ်၊ ဆယ့်တစ်လပိုင်းတွင် ငွေသွန်းလုပ်ရုံမှ သွန်းလုပ်သည်'၊ 'သန့်စင်ပြီး ငွေသျှူး ငါးဆယ်'၊ 'အလုပ်ရုံမှူး ကုအာရှင်း နှင့် အခြားသူများ'၊ 'လက်မှုပညာရှင် ချိုးရှီဖျင်' ဟု ထွင်းထုထားလေသည်။</p> <p>ဧကရာဇ်မင်းမြတ်ချီးမြှင့်သော ငွေကို မြင်သောအခါ ဟယ်ရှီရှို့ ကျာတိန်းပေ နှင့် အနောက်တွင်ရပ်နေသော တပ်မှူးကြီးလော်တို့အားလုံးမနာလိုသည့် အမူအရာများ ပြသလာကြသည်။ ဤငွေသျှူး တစ်ရာသည် သာမန်ငွေများမဟုတ်ဘဲ အလွန်တရာ ကြီးကျယ်ခမ်းနားသော ဂုဏ်ကျက်သရေတစ်ခုဖြစ်သည်။ စစ်ဘက်အမတ်အများစုသည် သူတို့၏ တစ်သက်တာတွင် ဤကဲ့သို့သောထူးခြားသည့် ဂုဏ်ပြုမှုကို တစ်ခါမှမရရှိဖူးကြပေ။ ယေဘုယျအားဖြင့် ဤကဲ့သို့သော ဧကရာဇ်မင်းမြတ်၏ ဆုတော်များကိုရရှိသူများသည် ဧကရာဇ်မင်းမြတ်၏ ငွေကို မိသားစု အမွေအနှစ်အဖြစ် သိမ်းဆည်းထားလေ့ရှိကြသည်။</p> <p>လီကျစ်က ဒူးထောက်လျက်…</p> <p> "ဧကရာဇ်မင်းမြတ်ရဲ့ ကျေးဇူးတော်က အတိုင်းအဆမရှိ ကြီးမားလှပါတယ်... ကျွန်တော်မျိုး လီကျစ် ထာဝရကျေးဇူးတင်ရှိနေမှာပါ"</p> <p>လီကျစ် ပြောပြီးသောအခါ ဟယ်ရှီရှို့က ခေါင်းညိတ်ကာ…</p> <p> "သွား... သွား... အမြန်သွားပြီး မင်းကြီး အဆောင်အယောင် ဝတ်စုံတွေ သွားလဲလိုက်…"</p> <p>ထိုအခါမှ လီကျစ်လည်း မတ်တတ်ရပ်ကာ ဘေးဘက်အခန်းသို့သွားပြီး အဆောင်အယောင် ဝတ်စုံများနှင့် ခါးဆွဲကတ်ပြားကို သွားလဲလေသည်။</p> <p>စတုတ္ထအဆင့် တပ်မှူးကြီးတစ်ဦး၏ အပြည့်အစုံဝတ်ဆင်မှုသည် ပဉ္စမအဆင့် ဒုတိယတပ်မှူးကြီးတစ်ဦး၏ ဝတ်ဆင်မှုနှင့် အလွန်ကွာခြားလေသည်။ အနက်ရောင် ပိုးဇာဦးထုပ်တွင် ရွှေရောင်ထိပ်ဖူးပါရှိပြီး ထိပ်တွင်ပုလဲလုံးကြီးတစ်လုံးကိုမြှုပ်နှံထားသည်။ တပ်မှူးကြီးများ၏ နေ့စဉ်ဝတ်ရုံမှာ ဒုတိယတပ်မှူးကြီးများ၏ အပြာရောင်ဝတ်ရုံနှင့်မတူဘဲ နီရဲသောအရောင်ဖြစ်သည်။ ဝတ်ရုံပေါ်ရှိ အဆင့်သတ်မှတ်ချက်ရင်ဘတ်တံဆိပ်တွင် အပေါ်ဘက်၌ မင်္ဂလာရှိသော တိမ်တိုက်များကိုပန်းထိုးထားပြီး အောက်ဘက်တွင်ရိုက်ခတ်နေသော လှိုင်းလုံးများကို ပန်းထိုးထားကာ အလယ်တွင် လက်သည်းများကုတ်ခြစ်နေသည့် ကြောက်မက်ဖွယ် ကျားတစ်ကောင်ကို ပန်းထိုးထားသည်။ ဝတ်ရုံနှင့် လိုက်ဖက်သောခါးပတ်ကိုမူ ရွှေစင်ဖြင့် ပြုလုပ်ထားလေသည်။</p> <p>ခါးဆွဲကတ်ပြားကိုကြည့်လိုက်လျှင်... ၎င်းကို ရွှေစင်ဖြင့်သွန်းလုပ်ထားပြီး ပစ္စည်းအရည်အသွေးကောင်းမွန်ကာ ဒုတိယတပ်မှူးကြီးတစ်ဦး၏ ရွှေရောင်ဆိုးထားသော ခါးဆွဲကတ်ပြားထက် အများကြီးပိုမိုမြင့်မားလေသည်။ ကတ်ပြားမှာ နှစ်လက်မကျယ်ပြီး ၆ လက်မခန့် ရှည်လျားကာ တိမ်တိုက်နဂါးနှစ်ကောင်နှင့် ဝပ်နေသောကျားနှစ်ကောင်တို့ဖြင့် အလှဆင်ထားသည်။ ခါးဆွဲကတ်ပြား၏ အနောက်ဘက်တွင် မင်မင်းဆက်၏ တိုက်ကျူးဧကရာဇ်မင်းမြတ်၏ အမိန့်တော်ကိုထွင်းထုထားပြီး အရှေ့ဘက်တွင်မူ ထန်းကျင်းမြို့ လက်ဝဲတပ်ဖွဲ့စခန်း၏ တပ်မှူးကြီးလီကျစ် ဟု စာတစ်ကြောင်းထွင်းထုထားလေသည်။ ခါးဆွဲကတ်ပြား၏ အစွန်းနှစ်ဖက်တွင် အပေါက်ဝိုင်းများရှိပြီး ထိုအပေါက်များမှ ပိုးကြိုးနီလေး ချည်နှောင်ထားသည်။ လီကျစ်သည် ခါးဆွဲကတ်ပြားကို သူ၏ ခါးပတ်တွင် ချိတ်ဆွဲလိုက်သည်။</p> <p>လီကျစ်သည် ကြေးမုံပြင်တွင် မိမိကိုယ်ကို ပြန်ကြည့်လိုက်ရာ ဤအနီရောင်ဝတ်ရုံက သူ့ကို အများကြီး ပိုမိုခန့်ညားထည်ဝါစေသည်ဟု ခံစားရပြီး အလွန်ကျေနပ်သွားလေသည်။</p> <p>ဝတ်ရုံသစ်ကို ဝတ်ဆင်ထားသော လီကျစ် ဒုတိယခန်းမဆောင်သို့ ပြန်ရောက်လာသောအခါ ဟယ်ရှီရှို့က သူ၏ မုတ်ဆိတ်မွေးများကိုသပ်ရင်း အားရပါးရ ရယ်မောကာ…</p> <p> "ကြီးကျယ်ခမ်းနားတဲ့ စစ်ဘက်အမတ်ကြီးတစ်ပါး ရောက်လာပါပြီ…"</p> <p>လီကျစ်သည် ခံတပ်စခန်းတစ်ခု၏ တပ်မှူးကြီးတစ်ယောက်သာ ဖြစ်သော်လည်း သူသည် ပြည်နယ်ဘုရင်ခံ၏ တိုက်ရိုက်ဝန်ထမ်းအဖွဲ့ဝင်တစ်ဦးအဖြစ်ပင် အသိအမှတ်ပြုမခံရပေ။ သို့ရာတွင် မင်မင်းဆက်၌ စစ်ဘက်အမတ်များသည် ယေဘုယျအားဖြင့် အဆင့်ပိုမြင့်ကြသည်။ ယခုအချိန်တွင် လီကျစ်သည် အဆင့်အတန်းအရ စတုတ္ထအဆင့် စစ်ဘက်အမတ်ကြီးတစ်ဦး ဖြစ်နေပြီဖြစ်သည်။ အနီရောင်ဝတ်ရုံကို ဝတ်ဆင်ထားသော သူသည် တတိယအဆင့် နယ်ဘက်အမတ်ကြီး ဟယ်ရှီရှို့ ဝတ်ဆင်သော ဝတ်ရုံနှင့် အရောင်တူညီနေပြီး တူညီစွာပင် ခန့်ညားထည်ဝါနေလေသည်။</p> <p>သေချာသည်မှာ အရာရာကိုအပြင်ပန်းအသွင်အပြင်ဖြင့် ဆုံးဖြတ်၍မရပေ။ မင်မင်းဆက် နှောင်းပိုင်းတွင် စစ်ဘက်အမတ်များကို အတော်လေးအထင်အမြင်သေးကြသည်။ တတိယအဆင့် တပ်မှူးကြီးတစ်ဦးဖြစ်သော တပ်မှူးကြီးလော်ပင်လျှင် ထန်းကျင်းမြို့၏ စစ်ဘက်ရေးရာ ကြိုတင်ပြင်ဆင်မှုဆိုင်ရာတာဝန်ခံအမတ်အဖြစ် တာဝန်ထမ်းဆောင်နေသော စတုတ္ထအဆင့် တရားရေးအမတ်ကြီးရုံး၏ လက်ထောက်စောင့်ကြည့်ရေးအမတ်ဖြစ်သူ ကျာတိန်းပေ၏ ရှေ့တွင် ဒူးထောက်ရမည် ဖြစ်လေသည်။</p> <p>လီကျစ်က ပြုံးကာ…</p> <p> "ပြည်နယ်ဘုရင်ခံမင်းကြီးက နောက်နေပြန်ပါပြီ…"</p> <p>တာဝန်ခံအမတ် ကျာတိန်းပေက…</p> <p> "တပ်မှူးကြီးရဲ့ အဆက်မပြတ်ရာထူးတိုးမြှင့်ခံရမှုတွေက တကယ်ကို အားကျစရာကောင်းလှပါတယ်"</p> <p>လီကျစ်က လက်နှစ်ဖက်ကိုယှက်ကာ…</p> <p> "ဒါတွေအားလုံးက ပြည်နယ်ဘုရင်ခံမင်းကြီးရဲ့ ကျေးဇူးတော်ကြောင့်ပါ"</p> <p>ဟယ်ရှီရှို့သည် လီကျစ်၏ အသိဉာဏ်ရှိမှုကိုမြင်သောအခါ သူ၏ မုတ်ဆိတ်မွေးများကို သပ်ရင်းပြုံးကာ ဘာမှမပြောတော့ပေ။</p> <p>ပြည်နယ်ဘုရင်ခံနှင့် စကားအနည်းငယ်ပြောဆိုပြီးနောက် လီကျစ်သည် နှုတ်ဆက်ထွက်ခွာလာခဲ့သည်။ ရုံးတော်မှအထွက်တွင် လီကျစ်သည် တပ်မှူးကြီးလော်ကိုပါ နှုတ်ဆက်လိုက်သည်။</p> <p>လီကျစ်သည် တပ်မှူးကြီးအဖြစ် ရာထူးတိုးခံရသော်လည်း သူသည် တပ်မှူးကြီးလော်၏ လက်အောက်တွင်ရှိနေဆဲဖြစ်သည်။ သို့ရာတွင် တပ်မှူးကြီးလော်သည် အထက်အကြီးအကဲတစ်ဦး၏ အာဏာကိုမပြသဘဲ လီကျစ်အပေါ် အလွန်ခင်မင်ရင်းနှီးစွာဆက်ဆံကာ လီကျစ်၏ ပခုံးကို ပုတ်လျက် တပ်မှူးရုံးတော်သို့ မကြာခဏလာလည်ရန် ပြောလေသည်။ လီကျစ်က အားလုံးကို သဘောတူလိုက်ပြီးနောက် ထွက်ခွာလာခဲ့သည်။</p> <p>အနီရောင် ဝတ်ရုံကိုဝတ်ဆင်ကာ မြင်းစီးလာသော လီကျစ်သည် လုံးဝ ကွဲပြားခြားနားသော အရှိန်အဝါတစ်ခုကို ထုတ်လွှင့်နေလေသည်။ ထန်းကျင်းမြို့တော် လမ်းမများပေါ်ရှိ လမ်းသွားလမ်းလာများသည် ဤအဆင့်မြင့် စစ်ဘက်အမတ်ကြီးကို အနှောင့်အယှက်ဖြစ်စေမည်ကို စိုးရိမ်သဖြင့် လမ်းဖယ်ပေးကြလေသည်။</p> <p>လီကျစ်သည် ထန်းကျင်းမြို့တော်မှ ထွက်ခွာလာပြီး အနောက်ဘက်သို့ မြင်းစီးလာကာ ဖန့်ကျားရွာ၏ အနောက်ဘက်တံခါးမှ ဝင်ရောက်လာခဲ့သည်။</p> <p>လီကျစ် ရာထူးတိုးလာပြီး အနီရောင်ဝတ်ရုံကို ဝတ်ဆင်ထားသည်ကို မြင်သောအခါ လမ်းဘေးတစ်ဖက်တစ်ချက်ရှိ ဖန့်ကျားရွာမှ ပြည်သူများသည် စိတ်လှုပ်ရှားစွာဖြင့် လမ်းရှင်းပေးကြပြီး မြင်းပေါ်မှ လီကျစ်ကို မော့ကြည့်နေကြလေသည်။</p> <p>"တပ်မှူးငယ်က ရာထူးတိုးလာပြီဟေ့… သူက အနီရောင် ဝတ်ရုံကို ဝတ်ထားတာပဲ… အခု သူ့ကို ဘယ်လို ခေါ်ရမလဲ"</p> <p>"မင်းက ဘာသိလို့လဲ… သခင်လေးက တပ်မှူးငယ် မဟုတ်တော့ဘူး… သခင်လေးက အခု တပ်မှူးကြီး ဖြစ်နေလောက်ပြီ…"</p> <p>"သခင်လေးက တကယ်ကိုအရည်အချင်းရှိတာပဲ သူ့နောက်ကို လိုက်တာက အနာဂတ်အတွက် တကယ်ကို တောက်ပစေမှာ သေချာတယ်…"</p> <p>လီကျစ်၏ ရာထူးတိုးမြှင့်ခံရမှုက ဖန့်ကျားရွာမှ ပြည်သူများကို အလွန်စိတ်လှုပ်ရှားစေခဲ့သည်။ လီကျစ်၏ ရာထူးပိုမိုမြင့်မားလေ ဖန့်ကျားရွာရှိ သူတို့၏ ဘဝအတွက် ပိုမိုကောင်းမွန်သော အာမခံချက်ရှိလေဖြစ်ရာ သူတို့က လီကျစ်၏ ရာထူးတိုးမြှင့်ခံရမှုကို စိတ်နှလုံးအကြွင်းမဲ့ ဆန္ဒပြုနေကြခြင်းဖြစ်သည်။</p> <p>လီကျစ်သည် သူ၏မြင်းကို စီးကာ ရုံးတော်တံခါးဝသို့ရောက်ရှိလာခဲ့ပြီး မြင်းပေါ်မှ ဆင်းလိုက်သည်။ ဤရုံးတော်မှာ သေချာပေါက် တပ်မှူးကြီးရုံးတော် ဖြစ်သွားပြီဖြစ်သည်။</p> <p>သူ၏ မိခင်ကြီးသည် အစေခံမလေးအချို့နှင့်အတူ ပင်မခန်းမဆောင်တွင် လီကျစ်ကို စောင့်ဆိုင်းနေလေသည်။ ယခု လီကျစ် အနီရောင်ဝတ်ရုံကိုဝတ်ဆင်ကာ ဝင်လာသည်ကို မြင်သောအခါ မိခင်းကြီးက အံ့ဩတကြီးဖြင့်…</p> <p>"ကျစ်အာ... သား နောက်ဆုံးတော့ ပြန်ရောက်လာပြီပေါ့… သား အိမ်ပြန်လာမယ့်အချိန်ကို အမေ လနဲ့ချီပြီး စောင့်နေခဲ့ရတာ… သား ဒီနေ့ ပြန်လာမယ်လို့ မနေ့ကကြားတော့ ဒီမနက်ကတည်းက အမေ ဒီမှာစောင့်နေတာ။ ဒါပေမဲ့ သားက ဒီမနက်တံခါးဝကိုရောက်ပြီးတာနဲ့ ချက်ချင်း ပြန်ထွက်သွားတယ်လေ"</p> <p>"ကျွန်တော် တပ်မှူးကြီးလော်နဲ့အတူ ရုံးတော်ကိုသွားပြီး တပ်မှူးကြီး အဆောင်အယောင် ဝတ်စုံတွေနဲ့ ခါးဆွဲကတ်ပြား သွားယူနေလို့ပါ…"</p> <p>"ဘာလို့ အခု အနီရောင်ဝတ်ရုံကြီး ဝတ်လာတာလဲ။ သားကို မတွေ့ရတာ လအနည်းငယ်ပဲ ရှိသေးတယ်... သား ထပ်ပြီး ရာထူးတိုးသွားပြန်ပြီလား"</p> <p>"ဟုတ်ပါတယ် မိခင်ကြီး... သား အခု စတုတ္ထအဆင့် စစ်ဘက်မင်းကြီးဖြစ်သွားပါပြီ…"</p> <p>မိခင်းကြီးက အံ့ဩတကြီးဖြင့်…</p> <p> "စတုတ္ထအဆင့်… ဘယ်လောက်တောင်မြင့်တဲ့ ရာထူးလဲ… ရာထူးနာမည်က ဘာလဲ"</p> <p>"တပ်မှူးကြီးပါ…"</p> <p>ရီကျန်းကတော်က အစေခံမလေးများကို ဝမ်းသာအားရကြည့်လိုက်ပြီးနောက် လီကျစ်၏ အင်္ကျီလက်ကို ဆွဲကာ…</p> <p>"ကျစ်အာ... အမေနဲ့အတူ ဘေးဘက်ခြံဝင်းကိုလိုက်ခဲ့… သားအဖေအတွက် အမွှေးတိုင် သွားထွန်းကြမယ်… သား ရာထူးတိုးတဲ့အကြောင်း သားအဖေကို သွားပြောပြရအောင်"</p> <p>လီကျစ်သည် မိခင်ကြီးနေထိုင်ရာ ဘေးဘက်ခြံဝင်းသို့လိုက်သွားပြီး ဘေးဘက်ခြံဝင်း၏ ပင်မခန်းမဆောင်ရှိ သူ၏ ဖခင်၏ ကဗျဉ်းတိုင်ရှေ့တွင် အမွှေးတိုင်သုံးတိုင် ထွန်းညှိလိုက်သည်။ မိခင်ကြီးကလည်း အမွှေးတိုင်သုံးတိုင် ထွန်းညှိကာ ပူဇော်လိုက်ပြီး…</p> <p>"အရှင်... ရှင်ရဲ့ သားလေးက အခုဆိုအောင်မြင်နေပြီ… သူက လေးလကျော်လောက် စစ်တိုက်ခဲ့ရတာ… အခု သူက စတုတ္ထအဆင့် စစ်ဘက်အမတ်ကြီးဖြစ်နေပြီ… တပ်မှူးကြီးတဲ့ ဒီအကြောင်းကိုသိရင် ရှင်တော့ တမလွန်မှာ ပြုံးနေတော့မှာပဲ…"</p> <p>လီကျစ်က ပြုံးလျက် မိခင်ကြီးနှင့်အတူ အတန်ကြာစကားပြောပြီးနောက် ထွက်ခွာလာခဲ့လေသည်။</p> <p> </p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save