Book List

<p>အခန်း (၆၂၃)</p> <p>နတ်ဘုရားအသွင်ပြောင်းအဆင့်သို့ တက်လှမ်းခြင်း၊</p> <p>နတ်ဘုရားမိုးကြိုးကပ်ဘေးနှင့် ကံကြမ္မာကောင်း</p> <p>ဖန်ဆင်းခြင်းမိုးရွာသွန်းမှု(၁)။</p> <p>*</p> <p> </p> <p> </p> <p>"ဂိုဏ်းချုပ်ကြီးသာ အောင်မြင်သွားမယ်ဆိုရင် ကျုပ်တို့ရွှမ်ဟွမ်ဂိုဏ်းမှာ တတိယမြောက် နတ်ဘုရားအသွင်ပြောင်းအဆင့် ကျင့်ကြံသူ ပေါ်ထွက်လာတော့မှာမလား...”</p> <p> </p> <p>"ဂိုဏ်းတစ်ခုတည်းမှာ နတ်ဘုရားအသွင်ပြောင်းအဆင့် သုံးယောက်ဆိုတာ ရှေးဟောင်းခေတ်က နတ်ဘုရားအသွင်ပြောင်းအဆင့် ဂိုဏ်းတွေတောင် ဒီလောက်ပဲ ရှိမှာပဲ...”</p> <p> </p> <p>ကျောက်ဟွမ်ကျန်းမှာ အလွန်တရာ အံ့ဩတုန်လှုပ်နေလေသည်။</p> <p> </p> <p>သို့သော်ငြား သူ၏ရင်ထဲတွင် များစွာစိတ်လှုပ်ရှားနေ၏။ အဘယ်ကြောင့်ဆိုသော် ဂိုဏ်းချုပ်ကြီးသာ နတ်ဘုရားအသွင်ပြောင်းအဆင့် ကျင့်ကြံသူဖြစ်လာပါက ရွှမ်ဟွမ်ဂိုဏ်းအတွက် အကျိုးကျေးဇူးများမှာ မည်မျှပင်များပြားမည်ကို ခန့်မှန်း၍ပင် ရမည်မဟုတ်သောကြောင့်ဖြစ်ပေသည်။</p> <p> </p> <p>မူလကတည်းက အင်အားကြီးမားလှသော ရွှမ်ဟွမ်ဂိုဏ်းသည် ယခုအခါ ပို၍ပင် ယှဉ်ပြိုင်နိုင်သူ ကင်းမဲ့သွားတော့မည်ဖြစ်၏။</p> <p> </p> <p>သူသည် ရွှမ်ဟွမ်ဂိုဏ်း၏ အဖွဲ့ဝင်တစ်ဦးဖြစ်ရာ ရွှမ်ဟွမ်ဂိုဏ်းကြီး ယခုထက်ပို၍ အင်အားကြီးမားလာသည်ကို သဘာဝကျစွာပင် လိုလားနေမိသည်။</p> <p> </p> <p>ဤသည်ကား အပင်ကြီးလေ အရိပ်ခိုရကောင်းလေဆိုသည့် စကားနှင့် အတူတူပင် မဟုတ်ပါလော။</p> <p> </p> <p>"အခုအချိန်က အပြိုင်အဆိုင်တွေ ကြီးမားတဲ့ ခေတ်ကာလလို့ပဲ ပြောရမှာပေါ့...”</p> <p> </p> <p>"အရင်တုန်းက ဘယ်လိုမှ ပေါ်ထွက်မလာနိုင်ခဲ့တဲ့ နတ်ဘုရားအသွင်ပြောင်းအဆင့် ကျင့်ကြံသူတွေက အခုတော့ တစ်ယောက်ပြီးတစ်ယောက် ပေါ်ထွက်လာနေကြပြီလေ...”</p> <p> </p> <p>"အခုခေတ်ကြီးမှာ အရင်က တစ်ခါမှ မဖြစ်ဖူးတဲ့ အပြောင်းအလဲတွေ ဖြစ်လာတော့မယ် ထင်တယ်...”</p> <p> </p> <p>"ကျင့်ကြံခြင်းလောကရဲ့ ရွှေခေတ်ကြီးကို ကြိုဆိုရတော့မယ် ထင်ပါရဲ့...”</p> <p> </p> <p>ဝူဝေ့တာအိုအရှင်မှာလည်း အလွန်ပင် စိတ်လှုပ်ရှားနေလေသည်။</p> <p> </p> <p>သူသည် ရွှမ်ဟွမ်ဂိုဏ်းတစ်ခုလုံး၏ ကံကြမ္မာအရှိန်အဝါများ ပိုမိုအားကောင်းလာသည်ကို ခံစားလိုက်ရပြီး ယခင်က တစ်ခါမျှ မရှိဖူးသော အဆင့်တစ်ခုအထိ ရောက်ရှိသွားပြီဖြစ်ကြောင်း သိလိုက်ရ၏။</p> <p> </p> <p>သူကိုယ်တိုင်လည်း ကုယုံတောင်ထွတ်၏ တောင်ထွတ်သခင်တစ်ဦးအနေဖြင့် အဆုံးမဲ့သော ကံကြမ္မာအရှိန်အဝါ၏ ကာကွယ်စောင့်ရှောက်မှုကို ရရှိထားသည်။</p> <p> </p> <p>အနာဂတ်တွင် သူသည်လည်း နတ်ဘုရားအသွင်ပြောင်းအဆင့်သို့ တက်လှမ်းရန် အခွင့်အရေး ရနိုင်ချေရှိ၏။</p> <p> </p> <p>ဤသည်က လူတစ်ယောက် အောင်မြင်သွားလျှင် သူ့ပတ်ဝန်းကျင်ရှိ သူများပါ အကျိုးခံစားရသည်ဆိုသည်နှင့် အတူတူပင် ဖြစ်ချေသည်။</p> <p> </p> <p>'အရင်က ရွှမ်ဟွမ်ဂိုဏ်းချုပ်ကို အညံ့ခံခဲ့တာက မှန်ကန်တဲ့ ရွေးချယ်မှုပဲ… ကိုယ့်သဘောနဲ့ကိုယ် ရွှမ်ဟွမ်ဂိုဏ်းကို မဝင်ခဲ့ရင် ဒီလိုအကျိုးကျေးဇူးတွေကို ဘယ်လိုလုပ် ခံစားရပါ့မလဲ… နာမည်ကြီး တရားဝင်ဂိုဏ်းက ပိုကောင်းတာပဲ…' ဟု သူ တွေးလိုက်မိသည်။</p> <p> </p> <p>'အင်အားကြီးအဖွဲ့အစည်းရဲ့ လူတစ်ယောက် ဖြစ်နိုင်နေမှတော့ ဘာလို့ တစ်ကိုယ်တော်ကျင့်ကြံသူဘဝနဲ့ နေတော့မှာလဲ…'</p> <p> </p> <p>...</p> <p> </p> <p>အခြားသော ကုယုံတောင်ထွတ်၏ တပည့်ဖြစ်သူ စုန့်ဖျင်အန်းသည်လည်း ထိုနေရာတွင် ရှိနေ၏။</p> <p> </p> <p>သူသည်လည်း ရွှမ်ဟွမ်ဂိုဏ်း၏ တပည့်တစ်ဦးဖြစ်လာသည်မှာ အချိန်အတိုင်းအတာတစ်ခု ကြာမြင့်နေပြီဖြစ်ရာ ရွှမ်ဟွမ်ဂိုဏ်းမှ အကျိုးကျေးဇူးများစွာကို သဘာဝကျကျ ရရှိထားလေသည်။</p> <p> </p> <p>ဤသည်မှာ သူ၏ဘဝတွင် ယခင်က တစ်ခါမျှ မကြုံဖူးသော အကောင်းဆုံး အချိန်ကာလတစ်ခုဟု ဆိုနိုင်ပေသည်။</p> <p> </p> <p>မည်သည့် ပရိယာယ်အကြံအစည်များကိုမျှ စိုးရိမ်စရာမလိုသလို သယံဇာတအရင်းအမြစ်များနှင့် ကျင့်စဉ်ပညာရပ်များအတွက်လည်း ပူပန်စရာမလိုချေ။</p> <p> </p> <p>အေးအေးချမ်းချမ်းဖြင့် ကျင့်ကြံအားထုတ်နေရုံဖြင့် ကျင့်ကြံခြင်းအဆင့်မှာ အဆက်မပြတ် တိုးတက်လာနိုင်ပေသည်။</p> <p> </p> <p>ဝန်ခံရလျှင် ဤသည်ထက် ပိုကောင်းသော အချိန်ကာလမျိုး ရှိမည်မဟုတ်တော့ချေ။</p> <p> </p> <p>"ဆရာ... ဂိုဏ်းချုပ်ကြီးက နတ်ဘုရားအသွင်ပြောင်းအဆင့်ကို တက်လှမ်းနိုင်မယ်လို့ ဆရာထင်လား...”</p> <p> </p> <p>စုန့်ဖျင်အန်းက သူ၏လက်ရှိ ရှောင်းယောင်လက်စွပ်ကို ကြည့်ရင်း အနည်းငယ် စိုးရိမ်ပူပန်စွာဖြင့် မေးလိုက်သည်။</p> <p> </p> <p>သူသည် ရွှမ်ဟွမ်ဂိုဏ်းချုပ်အပေါ် ယုံကြည်မှု အပြည့်အဝရှိထားပြီး ထိုသို့သော ဂန္ထဝင်ပုဂ္ဂိုလ်ကြီးတစ်ဦး နတ်ဘုရားအသွင်ပြောင်းအဆင့်သို့ တက်လှမ်းရာတွင် ကြီးမားသော ပြဿနာရှိမည်မဟုတ်ဟု ထင်ထားသော်လည်း အလွန်အမင်း စိုးရိမ်ပူပန်နေမိသောကြောင့် စိတ်များ ရှုပ်ထွေးနေမိခြင်းဖြစ်၏။</p> <p> </p> <p>အကယ်၍ အဆင့်တက်လှမ်းမှုသာ ကျရှုံးသွားပါက ရွှမ်ဟွမ်ဂိုဏ်းအပေါ် သက်ရောက်လာမည့် ထိုးနှက်ချက်မှာ ခန့်မှန်း၍ပင် ရနိုင်မည်မဟုတ်ပေ။</p> <p> </p> <p>ဂိုဏ်းကြီးတစ်ခုလုံးပင် ပြိုကွဲပျက်စီးသွားနိုင်မည်လား မပြောနိုင်ချေ။</p> <p> </p> <p>မည်သို့ပင်ဖြစ်စေ ဂိုဏ်း၏ အဓိကကျောရိုးမှာ ရွှမ်ဟွမ်ဘိုးဘေးပင် မဟုတ်ပါလော။</p> <p> </p> <p>အကယ်၍ ရွှမ်ဟွမ်ဘိုးဘေးသာ ကျဆုံးသွားပါက ရွှမ်ဟွမ်ဂိုဏ်းကြီးမှာလည်း သဘာဝကျကျ ဆက်လက် တည်ရှိနေတော့မည်မဟုတ်ပေ။</p> <p> </p> <p>"မင်းက လာနောက်နေတာလား...”</p> <p> </p> <p>"ဒီလို မကောင်းဆိုးဝါးကတောင် နတ်ဘုရားအသွင်ပြောင်းအဆင့်ကို မတက်လှမ်းနိုင်ဘူးဆိုရင် ဒီလောကမှာ ဘယ်သူကများ လုပ်နိုင်တော့မှာလဲ...”</p> <p> </p> <p>"ပွင့်ပွင့်လင်းလင်းပြောရရင် ငါ ဝိညာဉ်ကမ္ဘာမှာ ပါရမီရှင် အတော်များများကို တွေ့ခဲ့ဖူးတယ်...”</p> <p> </p> <p>"ဒါပေမဲ့ ဒီရွှမ်ဟွမ်ဘိုးဘေးလောက် ကြောက်စရာကောင်းတဲ့သူမျိုးကိုတော့ ပထမဆုံးအကြိမ် တွေ့ဖူးတာပဲ...”</p> <p> </p> <p>"ဒီလူသာ ဝိညာဉ်ကမ္ဘာသို့ တက်လှမ်းနိုင်ခဲ့မယ်ဆိုရင် အနာဂတ် လူသားမျိုးနွယ်ရဲ့ အစွမ်းထက်ပုဂ္ဂိုလ်ကြီး ဖြစ်လာမှာ အသေအချာပဲ...”</p> <p> </p> <p>အရက်တာအိုအရှင်မှာ အံ့သြချီးကျူးနေမိသည်။</p> <p> </p> <p>သူသည် ယခင်က လေဟာနယ်သန့်စင်ခြင်းအဆင့် အစွမ်းထက်ပုဂ္ဂိုလ်ကြီးတစ်ဦး ဖြစ်ခဲ့ရာ သူ၏ကျင့်ကြံခြင်းအဆင့်မှာ နတ်ဘုရားအသွင်ပြောင်းအဆင့် ကျင့်ကြံသူများထက် အဆပေါင်းများစွာ ပိုမိုအားကောင်းခဲ့၏။</p> <p> </p> <p>စိတ်ဝိညာဉ်ကမ္ဘာထဲတွင်ပင် သူသည် အရေးပါသော ပုဂ္ဂိုလ်တစ်ဦးဟု သတ်မှတ်ခံရသည်။</p> <p> </p> <p>သို့သော်ငြား သူ၏ အလားအလာမှာ လေဟာနယ်သန့်စင်ခြင်းအဆင့်တွင်သာ ရပ်တန့်သွားပြီဖြစ်ကြောင်း သူသိထားပြီး၊ ခန္ဓာပေါင်းစည်းခြင်းအဆင့် အစွမ်းထက်ပုဂ္ဂိုလ်ကြီးတစ်ဦး ဖြစ်လာရန်မူ မည်မျှဝေးကွာနေသေးသည်ကိုပင် မသိနိုင်တော့ချေ။</p> <p> </p> <p>သို့တိုင်အောင် ဤရွှမ်ဟွမ်ဘိုးဘေး၏ အလားအလာမှာ အလွန်တရာ အံ့မခန်းဖြစ်ပြီး အနာဂတ်တွင် လေဟာနယ်သန့်စင်ခြင်းအဆင့်၌သာ ရပ်တန့်နေမည်မဟုတ်ကြောင်း အသေအချာပင် ဖြစ်သည်။</p> <p> </p> <p>ခန္ဓာပေါင်းစည်းခြင်းအဆင့် အစွမ်းထက်ပုဂ္ဂိုလ်ကြီး သို့မဟုတ် မဟာယာနအဆင့် ဘိုးဘေးကြီးတစ်ပါးပင် ဖြစ်လာနိုင်ချေရှိ၏။</p> <p> </p> <p>ဤသည်က အင်မော်တယ်တစ်ပါး၏ အသွင်အပြင်ပင် ဖြစ်ပေသည်။</p> <p> </p> <p>"အဲဒီလိုဆိုရင်တော့ ဂိုဏ်းချုပ်ကြီးရဲ့ ဒီတစ်ခေါက် အဆင့်တက်လှမ်းမှုက သေချာပေါက် အောင်မြင်မှာပဲ...”</p> <p> </p> <p>ထိုစကားကို ကြားလိုက်ရသောအခါ စုန့်ဖျင်အန်းမှာလည်း ချက်ချင်းပင် စိတ်အေးသွားတော့သည်။</p> <p> </p> <p>...</p> <p> </p> <p>အခြားသော နေရာတစ်နေရာတွင်။</p> <p> </p> <p>လူငယ်ကျင့်ကြံသူတစ်ဦးသည် ရွှမ်ဟွမ်ကျွန်းသို့ ယခုလေးတင် ရောက်ရှိလာခဲ့၏။ သူကား ယန်ချန်ယွမ်ပင် ဖြစ်သည်။</p> <p> </p> <p>စတုတ္ထအဆင့်သားရဲဖြစ်သော တောင်ပံစိမ်းမီးလင်းယုန်၏ အကာအကွယ်ဖြင့် ယန်မိသားစုသည်လည်း အနီးအနားရှိ စတုတ္ထအဆင့် ကျွန်းတစ်ကျွန်းသို့ ချောမွေ့စွာ ရောက်ရှိလာပြီး အခြေချနေထိုင်နိုင်ခဲ့ပြီဖြစ်သည်။</p> <p> </p> <p>ထို့နောက် သူသည်လည်း ရွှမ်ဟွမ်ကျွန်းဆီသို့ မရပ်မနား အပြေးအလွှား လာခဲ့ခြင်းဖြစ်၏။</p> <p> </p> <p>ထိုအခိုက်အတန့်တွင် ကျိုးစွေ့၏ နတ်ဘုရားအသွင်ပြောင်းအဆင့်သို့ တက်လှမ်းနေသည့် မြင်ကွင်းနှင့် ကွက်တိပင် တိုးသွားခဲ့ရသည်။</p> <p> </p> <p>"ငါတို့ရဲ့ ကံက အရမ်းကောင်းလွန်းနေတာပဲ...”</p> <p> </p> <p>"ဂိုဏ်းချုပ်ကြီး နတ်ဘုရားအသွင်ပြောင်းအဆင့်ကို တက်လှမ်းနေတဲ့ မြင်ကွင်းနဲ့ အံကိုက်ကို ကြုံလိုက်ရတယ်လို့...”</p> <p> </p> <p>ယန်ချန်ယွမ်သည် ဤကဲ့သို့သော ကောင်းကင်နှင့်မြေကြီး၏ ထူးခြားသော ဖြစ်စဉ်ကြီးကို အံ့သြမှင်တက်စွာ ကြည့်နေမိပြီး သူ၏စိတ်ထဲတွင် တုန်လှုပ်မှုများနှင့် ကိုးကွယ်ကြည်ညိုမှုများ ပြည့်နှက်နေတော့သည်။</p> <p> </p> <p>'နောင်တစ်ချိန်မှာ ငါသာ ဒီလိုကျင့်ကြံသူမျိုး ဖြစ်လာနိုင်မယ်ဆိုရင် ဒီဘဝအတွက် လူဖြစ်ရကျိုးနပ်ပြီပဲ' ဟု သူ တွေးလိုက်မိသည်။</p> <p> </p> <p>"တကယ်ကို ရိုးရှင်းမနေဘူးပဲ...”</p> <p> </p> <p>"အရင်တုန်းက ငါပြောခဲ့ဖူးတယ်… ဒီလူက အနာဂတ်မှာ နတ်ဘုရားအသွင်ပြောင်းအဆင့်ကို ရောက်နိုင်ချေ အရမ်းများတယ်လို့လေ...”</p> <p> </p> <p>"ဒါပေမဲ့ ဒီလူကို ငါအထင်သေးမိသွားလိမ့်မယ်လို့ မထင်ခဲ့မိဘူး… အခုချက်ချင်းတောင် အဆင့်တက်တော့မယ်တဲ့လား...”</p> <p> </p> <p>"ဒါက ဖရိုဖရဲခေတ်ကြီးထဲကနေ မွေးဖွားလာတဲ့ မကောင်းဆိုးဝါးပါရမီရှင် ဆိုတာမျိုးလား...”</p> <p> </p> <p>သားရဲတစ်သောင်းလက်ကောက်ထဲတွင် ပုန်းအောင်းနေသော သားရဲတစ်သောင်းတာအိုအရှင်မှာလည်း အံ့သြနေမိလေသည်။ ယခင် သူနတ်ဘုရားအသွင်ပြောင်းအဆင့်သို့ တက်လှမ်းခဲ့စဉ်က ကောင်းကင်ဖြစ်စဉ်မှာ မိုင်ထောင်ချီ ဧရိယာလောက်ကိုသာ လွှမ်းခြုံနိုင်ခဲ့သည်ကို သူပြန်လည် သတိရမိသွား၏။</p> <p> </p> <p>ဤရွှမ်ဟွမ်ဘိုးဘေးနှင့် မည်သို့မျှ ယှဉ်၍မရနိုင်ချေ။</p> <p> </p> <p>'သူနဲ့များ ယှဉ်လိုက်ရင် ငါ့ဘဝက ခွေးလောက်တောင် တန်ဖိုးမရှိသလို ဖြစ်သွားတာပဲ' ဟု တွေးမိလိုက်သလို၊ 'လူအချင်းချင်း နှိုင်းယှဉ်ရတာက တကယ်ကို ဒေါသထွက်စရာ ကောင်းလွန်းတယ်' ဟု တွေးလိုက်မိပြန်သည်။</p> <p> </p> <p>ဤခေတ်ကြီးတွင် ပါရမီရှင်များ အဆက်မပြတ် ပေါ်ထွက်နေသည်ဟု သူခံစားနေရလေသည်။</p> <p> </p> <p>...</p> <p> </p> <p>ရွှမ်ဟွမ်တောင်ထွတ် အနီးတစ်ဝိုက်တွင်။</p> <p> </p> <p>ချန်ဇီယွင်၊ ယဲ့ဖေးရို၊ ချူတျဲယီနှင့် ရှရွှေယန်စသည့် တာအိုလက်တွဲဖော်များသည်လည်း ဤနတ်ဘုရားအသွင်ပြောင်းအဆင့် ကောင်းကင်ဖြစ်စဉ်ကြီးကို ငေးကြည့်နေကြ၏။</p> <p> </p> <p>သူတို့တစ်ဦးချင်းစီ၏ လှပသော မျက်လုံးလေးများမှာ ပြူးကျယ်နေပြီး များစွာ တုန်လှုပ်နေကြသည်။</p> <p> </p> <p>"အရမ်းကောင်းတာပဲ… ကောင်းကင်နဲ့မြေကြီးရဲ့ စွမ်းအင်တွေကို ဆွဲငင်ပြီး နတ်ဘုရားအသွင်ပြောင်းအဆင့် ကောင်းကင်ဖြစ်စဉ်ကို ဖန်တီးလိုက်ပြီ...”</p> <p> </p> <p>"နောက်တစ်ဆင့်အနေနဲ့ ကောင်းကင်နဲ့မြေကြီးရဲ့ စွမ်းအင်တွေကို ခန္ဓာကိုယ်ထဲ ဆွဲသွင်းပြီး နတ်ဘုရားအသွင်ပြောင်းအဆင့် မှော်စွမ်းအင်အဖြစ် ပြောင်းလဲလိုက်ရုံပဲ...”</p> <p> </p> <p>"အဲဒီလိုဆိုရင်တော့ တကယ့် နတ်ဘုရားအသွင်ပြောင်းအဆင့်ကို တက်လှမ်းနိုင်ပြီပေါ့...”</p> <p> </p> <p>ယဲ့ဖေးရိုမှာ အလွန်တရာ ဝမ်းမြောက်ဝမ်းသာ ဖြစ်နေလေသည်။</p> <p> </p> <p>သူမသည် နတ်ဘုရားအသွင်ပြောင်းအဆင့် အစောပိုင်းကျင့်ကြံသူတစ်ဦး ဖြစ်သောကြောင့် ဤအဖြစ်အပျက်ကို ကိုယ်တိုင် ကြုံတွေ့ခဲ့ဖူးရာ နတ်ဘုရားအသွင်ပြောင်းအဆင့်သို့ မည်သို့ တက်လှမ်းရမည်ကို လက်ဖဝါးပေါ်က အရေးအကြောင်းများကဲ့သို့ ရှင်းလင်းစွာ သိထားပေသည်။</p> <p> </p> <p>ဤမျှ အံ့မခန်းဖြစ်လှသော နတ်ဘုရားအသွင်ပြောင်းအဆင့်၏ ထူးခြားဖြစ်စဉ်ကြီးကို မြင်လိုက်ရသောအခါ သူမ၏ခင်ပွန်းသည် ယခုတစ်ကြိမ် အဆင့်တက်လှမ်းမှုတွင် သေချာပေါက် အောင်မြင်မည်ဖြစ်ကြောင်း သူမသိလိုက်၏။</p> <p> </p> <p>ယခင်ကတည်းက သူမသည် ကျိုးစွေ့အပေါ် ယုံကြည်မှု အပြည့်အဝရှိထားပြီး သေချာပေါက် အောင်မြင်မည်ဟု တွက်ထားခဲ့သည်။ သို့သော် ကိစ္စရပ်များ တကယ်တမ်း မဖြစ်လာသေးခင်တွင် မည်သို့ဖြစ်လာမည်ကို မည်သူက ကြိုသိနိုင်ပါမည်နည်း။</p> <p> </p> <p>ယခုကဲ့သို့သော ထူးခြားဖြစ်စဉ်ကြီးကို မြင်လိုက်ရပြီးနောက်တွင်မူ သူမသည် လုံးဝ စိတ်ချသွားတော့သည်။</p> <p> </p> <p>"ငါ့ယောက်ျားပီပီ တကယ်ကို အစွမ်းထက်လွန်းတယ်...”</p> <p> </p> <p>"နတ်ဘုရားအသွင်ပြောင်းအဆင့်ကို အခုလေးတင် တက်လှမ်းတာတောင်မှ မိုင်ပေါင်းသိန်းနဲ့ချီတဲ့ ကောင်းကင်နဲ့မြေကြီးရဲ့ စွမ်းအင်တွေကို ဆွဲငင်နိုင်နေပြီ...”</p> <p> </p> <p>"ဒါက တကယ်ကို ချဲ့ကားလွန်းရာ ကျနေပြီ...”</p> <p> </p> <p>ယဲ့ဖေးရိုတစ်ယောက် ရင်သပ်ရှုမောစွာ ရေရွတ်လိုက်မိသည်။</p> <p> </p> <p>ယခင် သူမ နတ်ဘုရားအသွင်ပြောင်းအဆင့်သို့ တက်လှမ်းခဲ့စဉ်က မိုင်သောင်းချီဧရိယာရှိ ကောင်းကင်နှင့်မြေကြီး၏ စွမ်းအင်များကိုသာ ဆွဲငင်နိုင်ခဲ့ခြင်းဖြစ်သည်။</p> <p> </p> <p>ဤသည်ပင်လျှင် အခြေခံအုတ်မြစ် အတော်လေး ခိုင်မာနေပြီဖြစ်သည်။</p> <p> </p> <p>တကယ်တမ်းတွင် သူမ တစ်ယောက်တည်းသာ မဟုတ်ဘဲ ခေတ်အဆက်ဆက်မှ နတ်ဘုရားအသွင်ပြောင်းအဆင့် ကျင့်ကြံသူတိုင်း ထိုသို့ပင် ဖြစ်ကြလေသည်။</p> <p> </p> <p>သာမန်ကျင့်ကြံသူဆိုလျှင် အလွန်ဆုံး မိုင်ထောင်ချီဧရိယာလောက်ကိုသာ လွှမ်းမိုးနိုင်ပြီး အခြေခံအုတ်မြစ်ခိုင်မာသူများကသာ မိုင်သောင်းချီ ဧရိယာအထိ ဆွဲငင်နိုင်ခြင်းဖြစ်၏။</p> <p> </p> <p>သို့သော် သူမ၏ခင်ပွန်းမှာမူ အခြေခံအုတ်မြစ်ခိုင်မာလွန်းလှသဖြင့် လူတိုင်းကို ကြက်သီးထစေနိုင်သော မိုင်ပေါင်းသိန်းနှင့်ချီသည့် ဧရိယာအထိ ဆွဲငင်နိုင်စွမ်း ရှိနေပေသည်။</p> <p> </p> <p>သူမ၏ခင်ပွန်း စုစည်းလိုက်သော မူလဝိညာဉ်မှာ အလွန်တရာ အစွမ်းထက်မြက်ပြီး စိတ်ကူး၍ မရနိုင်လောက်အောင်ပင် ကြီးမားနေသည်ဟုသာ ဆိုရပေမည်။</p> <p> </p> <p>ထို့ကြောင့်သာ ယခုကဲ့သို့ အခြေအနေမျိုး ဖြစ်ပေါ်လာရခြင်းဖြစ်၏။</p> <p> </p> <p>"အဲဒီလိုဆိုရင်တော့ ယောက်ျားရဲ့ ဒီတစ်ခေါက် အဆင့်တက်လှမ်းမှုက အောင်မြင်သွားပြီ မဟုတ်လား...”</p> <p> </p> <p>သခင်မမက်မွန်ပွင့်နှင့် အခြားသူများကပါ ဝမ်းသာအားရဖြင့် မေးလိုက်ကြပြီး ယဲ့ဖေးရိုနှင့် ချန်ဇီယွင်တို့နှစ်ဦးအား အလိုအလျောက် လှမ်းကြည့်လိုက်ကြလေသည်။</p> <p> </p> <p>မည်သို့ပင်ဖြစ်စေ ဤနေရာတွင် နတ်ဘုရားအသွင်ပြောင်းအဆင့် ကျင့်ကြံသူဟူ၍ သူတို့နှစ်ဦးသာ ရှိနေရာ အခြေအနေအရပ်ရပ်ကို အရှင်းလင်းဆုံး သိနိုင်မည် မဟုတ်ပါလော။</p> <p> </p> <p>"ဒီကိစ္စကတော့ တစ်ဝက်ပဲ အောင်မြင်သေးတယ်လို့ ပြောရမှာပဲ...”</p> <p> </p> <p>"မူလဝိညာဉ်ကို စုစည်းတာက အခုမှ အစပဲ ရှိသေးတာလေ...”</p> <p> </p> <p>"ပိုအရေးကြီးတာက နောက်လာမယ့် အဆင့်နှစ်ဆင့်ဖြစ်တဲ့ ကောင်းကင်မိစ္ဆာကပ်ဘေးနဲ့ နတ်ဘုရားအသွင်ပြောင်းအဆင့် မိုးကြိုးကပ်ဘေးပဲ...”</p> <p> </p> <p>"ဒီကပ်ဘေးနှစ်ခုကို ကျော်ဖြတ်နိုင်မှသာ နတ်ဘုရားအသွင်ပြောင်းအဆင့် ကျင့်ကြံသူအဖြစ် လုံးလုံးလျားလျား သတ်မှတ်လို့ရမှာ...”</p> <p> </p> <p>"ယောက်ျားက အရမ်းကို အစွမ်းထက်တယ်ဆိုပေမဲ့ လုံးဝ မကျော်ဖြတ်နိုင်သေးခင်မှာတော့ သတိထားဖို့ လိုသေးတယ်...”</p> <p> </p> <p>ချန်ဇီယွင်က လေးနက်သောလေသံဖြင့် ပြောလိုက်သည်။</p> <p> </p> <p>"တကယ်လည်း ဒီလိုပါပဲ...”</p> <p> </p> <p>"ဒါပေမဲ့ အခုချိန်မှာ ငါတို့လည်း ယောက်ျားကို ကူညီပေးလို့ မရဘူးလေ… ဘာဆက်ဖြစ်မလဲဆိုတာ ဒီတိုင်း စောင့်ကြည့်နေရုံကလွဲလို့ အခြားမရှိဘူး...”</p> <p> </p> <p>ယဲ့ဖေးရိုသည်လည်း ခေါင်းညိတ်လိုက်သည်။</p> <p> </p> <p style="text-align: center;">***</p> <p> </p>


Save