Book List

<h2 style="text-align: center;">အခန်း(၁၂၄)</h2> <h2 style="text-align: center;">*</h2> <p> </p> <p>“ ဘယ်လောက် အားကောင်းလိုက်တဲ့ ကျောက်စိမ်းလက်လဲ… အဲ့ဒါက ဓမ္မရတနာတစ်ခုရဲ့ စွမ်းအားလား… အားကောင်းတဲ့ တိုက်ခိုက်မှုကိုရော ခုခံကာကွယ်မှုကိုရော ပြုလုပ်နိုင်တယ်လား ”</p> <p>အံ့ဩထိတ်လန့်မှုက သီရှီထျန်၏ မျက်လုံးထဲမှာ ထွက်ပေါ်လာသည်။ ဓားဝင်္ကပါ ပျက်စီးသွားသည့်အခိုက် သူ၏ ကျားဟိန်းသံကို ချက်ချင်း ရပ်တန့်လိုက်သည်။ ကျားဟိန်းသံအတတ်က လွန်စွာ လွှမ်းမိုးဗိုလ်ကျပြီး ယင်း၏ တိုက်ခိုက်စွမ်းအားက အလွန်သန်စွမ်းသော်လည်း မိစ္ဆာချီကုန်ဆုံးနှုန်းက ပိုပြီးကြောက်စရာကောင်း၏။ အသက်ရှူချိန်အနည်းငယ်အတွင်းမှာပင် သူ၏ ခန္ဓာကိုယ်ထဲမှ မိစ္ဆာချီခြောက်ဆယ်ရာခိုင်နှုန်းခန့် ကုန်ဆုံးသွားသည်။</p> <p>မိစ္ဆာသန့်စင်ခြင်းမီးဖိုက မိစ္ဆာချီကို အဆက်မပြတ် ထုတ်လွှတ်ပေးနေသောကြောင့် မဟုတ်လျှင် ယခု သူ့ဆီမှာ စွမ်းအားအများကြီး ကျန်ရှိတော့မည် မဟုတ်ချေ။</p> <p>အဖြူရောင်အလင်းက သာမန်ကျင့်ကြံသူများ၏ အမြင်အာရုံကို ဖုံးကွယ်နိုင်သော်လည်း ယင်းက သီရှီထျန်၏ စူးရှသောအမြင်ကို မည်သို့ ဖုံးကွယ်နိုင်မည်နည်း။ အကြည့်တစ်ချက်ဖြင့်ပင် သူက အလင်းဘောလုံးထဲမှ အခြေအနေကို မြင်တွေ့သွားသည်။</p> <p>အဖြူရောင်အလင်းဘောလုံးထဲတွင် ကျောက်စိမ်းလက်၏ လက်ခလယ်က အမှန်တကယ် ကွေးညွတ်နေသည်။ လျှပ်တစ်ပြက်အတွင်းမှာ ကျောက်စိမ်းလက်၏ လက်ခလယ်က အကြိမ်တစ်ရာခန့် ကွေးချည်ဆန့်ချည် ပြုလုပ်လိုက်သည်။ ထိုသို့ဖြစ်သွားတိုင်း ကျောက်စိမ်းအလင်းတန်းများက နေရာအသီးသီးဆီသို့ ပျံသန်းထွက်သွားကြသည်။ ယင်းတို့က သူ့ဆီသို့ ပျံသန်းလာနေသော အဖြူရောင်ငှက်မွှေးတစ်ချောင်းပြီးတစ်ချောင်းကို ဖျက်ဆီးပစ်လိုက်သည်။ သူက စက္ကန့်ပိုင်းလေးအတွင်းမှာ ငှက်မွှေးအားလုံးကို တားဆီးနိုင်ခဲ့သည်။</p> <p>“ ယွမ်အာ… မြန်မြန် ပြန်လာခဲ့ ”</p> <p>ဝတ်စုံစိမ်းဝတ် ကျင့်ကြံသူက ဤနေရာမှာ ဆက်မနေချင်တော့ကြောင်း ထင်ရှားပေသည်။ သူက ထပ်မံ အော်ခေါ်လိုက်သည်။</p> <p>ကျိုးယွမ်ဖေးနှင့် ချူယွမ်က အတူတကွ ရပ်နေကြသည်။ အစောနက သူတို့က အနက်ရောင်မျောက်ဝံဘုရင်နှင့် တိုက်ခိုက်နေခဲ့ကြသည်။ ယခုအချိန်မှာ သူတို့၏ အဝတ်အစားများက စုတ်ပြဲနေပြီး ပရမ်းပတာဖြစ်နေသည်။ ဒဏ်ရာများက သူတို့၏ ခန္ဓာကိုယ်ပေါ်မှာ ထွက်ပေါ်နေပြီး သွေးကွက်တချို့က သူတို့၏ အဝတ်အစားပေါ်မှာ စွန်းထင်နေသည်။</p> <p>အနက်ရောင်မျောက်ဝံဘုရင်နှင့် တိုက်ပွဲတွင် သူတို့ဆီမှာ ထိပ်တန်းအဆင့် သက်စောင့်ဓမ္မလက်နက်ရှိနေသည့်တိုင် သူတို့က အသားစီးမရခဲ့ကြပေ။ နောက်ပိုင်းတွင် သူတို့က ဓားဝင်္ကပါနှင့် စက်ကရာ၏ အသံလှိုင်းတိုက်ခိုက်မှုကို ထပ်မံ ရင်ဆိုင်ခဲ့ကြရသည်။ အဖြစ်အပျက်များက တစ်ခုပြီးတစ်ခု အလွန်မြန်ဆန်စွာ ဖြစ်ပျက်ခဲ့သောကြောင့် သူတို့က အနောက်ဆုတ်ရန် အခွင့်အရေးမရခဲ့ကြပေ။ ကံကောင်းသောကြောင့်သာ ယခုအချိန်ထိ သူတို့တောင့်ခံထားနိုင်ခြင်း ဖြစ်သည်။</p> <p>“ ဂိုဏ်းတူညီမယွမ်… သွားကြရအောင်… ဒီနေရာက ကိစ္စက အကိုတို့ ဝင်စွက်ဖက်နိုင်တဲ့အရာ မဟုတ်ဘူး… အခုချိန်မှ မထွက်သွားရင် ဒီနေရာမှာ အကိုတို့ အသက်ဆုံးရှုံးသွားလိမ့်မယ် ”</p> <p>ကျိုးယွမ်ဖေးသည် သူ့အရှေ့မှ အခြေအနေကို ရှင်းလင်းစွာ နားလည်သည်။ ယခုအချိန်က ခွန်အားပြရမည့်အချိန် မဟုတ်ကြောင်း သူသိသည်။ ယခုအချိန်မှာ အရေးကြီးဆုံးက ဤနေရာမှ ထွက်သွားရန် ဖြစ်သည်။ ဤတိုက်ပွဲ၏ အပြောင်းအလဲက သူ၏ မျှော်လင့်ထားမှုထက် အများကြီး ကျော်လွန်သွားသည်။</p> <p>သူက မိစ္ဆာသားရဲဘုရင်များကို ကြည့်လိုက်ပြီး မျက်မှောင်ကြုတ်လိုက်သည်။</p> <p>ယင်းကို ချူယွမ်ကြားသောအခါ သူက ဘေးပတ်ဝန်းကျင်ကို မြန်ဆန်စွာ ဝေ့ဝိုက်ကြည့်လိုက်သည်။ သူက ကျိုးယွမ်ဖေးနားသို့ ချဉ်းကပ်သွားပြီး ဉာဏ်များသော အမူအရာဖြင့် တိုးတိုးလေး ပြောသည်။</p> <p>“ ဂိုဏ်းတူအကိုကျိုး… အခုချိန်မှာ မိစ္ဆာသားရဲတွေအားလုံးက ကျွန်မရဲ့ တတိယဦးရီးတော်နဲ့ တိုက်ခိုက်နေကြတယ်… သူတို့ရဲ့ စိတ်အာရုံက တတိယဦးရီးတော်ဆီမှာပဲ ရှိနေတယ်… ရှင်ဘာလို့ နဂါးဖမ်းကြိုးကို အသုံးမပြုတာလဲ… ဒီအခွင့်အရေးကို အသုံးချပြီး မိစ္ဆာကျားကို ဖမ်းဆီးလိုက်ပါ… ပြီးသွားရင် တတိယဦးရီးတော်ရဲ့ ကာကွယ်ပေးမှုနဲ့အတူ ဒီကနေ ထွက်သွားကြမယ်… အဲ့ဒီအခါ ဘာပြဿနာမှ မရှိနိုင်ပါဘူး ”</p> <p>သီရှီထျန်၏ အံ့ဖွယ်စွမ်းအားနှင့် အသံလှိုင်းတိုက်ခိုက်မှုကို ချူယွမ်မြင်သောအခါ ကျားနက်ကို လိုချင်စိတ်က ပိုပြီးပြင်းပြလာသည်။ သူက လက်ဗလာဖြင့် ဤနေရာမှ မည်သို့ပြန်သွားနိုင်မည်နည်း။ သူက ခေါင်းထဲမှာ ထွက်ပေါ်လာသော အတွေးကို ကျိုးယွမ်ဖေးအား ချက်ချင်း ပြောပြသည်။</p> <p>သူ၏ မျှော်လင့်ချက်က ကျိုးယွမ်ဖေး ယခင်က ပြောခဲ့ဖူးသော နဂါးဖမ်းကြိုး ဖြစ်သည်။ ထိုကြိုးက ထူးဆန်းသော ရတနာဖြစ်သည်။ အမြူတေဖွဲ့စည်းခြင်းနယ်ပယ် ကျင့်ကြံသူတစ်ယောက်သည်ပင် သတိမထားလျှင် နဂါးဖမ်းကြိုးဖြင့် ဖမ်းဆီးချုပ်နှောင်ခံရလိမ့်မည်။ မည်သို့ဖြစ်ပါစေ ယင်းက ရေနဂါးတစ်ကောင်၏ အကြောမျှင်များဖြင့် သန့်စင်ထားသော ဓမ္မရတနာဖြစ်သည်။ သို့ဖြစ်၍ နဂါးဖမ်းကြိုး၏ စွမ်းရည်ကို သံသယရှိရန် မလိုပေ။</p> <p>“ အဲ့ဒါက… ”</p> <p>ယင်းကို ကျိုးယွမ်ဖေးကြားသောအခါ သူက တဒင်္ဂ တုံ့ဆိုင်းသွားသည်။</p> <p>“ ရှင် ဘာလို့ စဉ်းစားနေသေးတာလဲ… အခုချိန်က အကောင်းဆုံး အခွင့်အရေးလေ… မြန်မြန် လုပ်ပါ ”</p> <p>ချူယွမ်က အလျင်စလို တိုက်တွန်းသည်။</p> <p>ကျိုးယွမ်ဖေး၏ မျက်လုံးထဲ၌ အလင်းရောင်က မှိတ်တုတ်မှိတ်တုတ် ထွက်ပေါ်လာသည်။ နောက်ဆုံးမှာ ဆုံးဖြတ်ချက်ပြတ်သားသော အမူအရာက သူ၏ မျက်နှာပေါ်မှာ ထွက်ပေါ်လာသည်။ သူက ဘေးပတ်ဝန်းကျင်ကို ကြည့်လိုက်လေရာ မိစ္ဆာသားရဲဘုရင်များ၏ စိတ်အာရုံက ဝတ်စုံစိမ်းဝတ် ကျင့်ကြံသူပေါ်မှာ ကျရောက်နေကြောင်း မြင်တွေ့သွားသည်။</p> <p>မည်သို့ဖြစ်ပါစေ အမြူတေဖွဲ့စည်းခြင်းနယ်ပယ် ကျင့်ကြံသူတစ်ယောက်၏ ထွက်ပေါ်လာမှုက မဒူဆာနှင့် တခြားမိစ္ဆာသားရဲဘုရင်များအတွက် ပေါ့သေးသေးကိစ္စ မဟုတ်ပေ။</p> <p>“ ဒီဟာက အခွင့်အရေးကောင်းပဲ ”</p> <p>ကျိုးယွမ်ဖေး၏ လက်ထဲမှာ အလင်းရောင် ဝင်းလက်သွားသည်။ နောက်အခိုက်အတန့်မှာ ထွန်းလင်းတောက်ပသော ကြိုးခွေတစ်ခုက သူ၏ လက်ဖဝါးပေါ်မှာ ထွက်ပေါ်လာသည်။ ကြိုးပေါ်တွင် နက်နဲရှုပ်ထွေးသော မှော်သင်္ကေတများ ရှိသည်။ ကြိုး၏ အသွင်သဏ္ဍာန်သည်လည်း အလွန်ထူးဆန်းသည်။ ကြိုး၏ အစွန်းတစ်ဖက်တွင် အသက်ဝင်နေဟန်ရသော နဂါးဦးခေါင်း ရှိသည်။ အခြားအစွန်းတစ်ဖက်တွင်တော့ နဂါးအမြှီး ရှိသည်။ အကယ်၍ ထိုနှစ်ခုကို အတူတကွ ဆက်လိုက်လျှင် အရွယ်အစားသေးငယ်သော နဂါးတစ်ကောင် ဖြစ်ပေါ်လာလိမ့်မည်။</p> <p>အကယ်၍ တစ်စုံတစ်ယောက်က ကြိုးပေါ်မှ နက်နဲရှုပ်ထွေးသော မှော်သင်္ကေတများကို သေချာဂရုတစိုက် စစ်ဆေးကြည့်မည်ဆိုလျှင် ယင်းတို့က မရေမတွက်နိုင်သော နဂါးအကြေးခွံများနှင့် ဆင်တူကြောင်း မြင်ရလိမ့်မည်။ ကြိုးသည် ဓမ္မရတနာနှင့် မတူပေ။ ယင်းအစား နဂါးတစ်ကောင်၏ သက်မဲ့ရုပ်ကြွင်းနှင့် ပိုပြီးဆင်တူသည်။ ယင်းက အလွန်အသက်ဝင်ပြီး အံ့ဖွယ်ကောင်းသည်။</p> <p>“ နဂါးဖမ်းကြိုး… အဲ့ဒီမိစ္ဆာကျားကို ချည်နှောင်လိုက်စမ်း ”</p> <p>ကျိုးယွမ်ဖေးက အော်ပြောလိုက်သည်။ ထိုအခါ သူ၏ လက်ဖဝါးပေါ်မှ နဂါးဖမ်းကြိုးက သူ့ဘာသာ အသက်ဝင်လာဟန် ရ၏။ ကြိုးက သေးငယ်သော နဂါးတစ်ကောင်အဖြစ် အမှန်တကယ် ပြောင်းလဲသွားသည်။ နဂါးသည် မယုံကြည်နိုင်ဖွယ်ကောင်းသော အလျင်နှင့်အတူ သီရှီထျန်၏ ဧရာမခန္ဓာကိုယ်ဆီသို့ ပျံသန်းသွားသည်။ ထို့ပြင် မှိတ်တုတ်မှိတ်တုတ် ထွန်းလင်းသော အလင်းရောင်နှင့်အတူ နဂါးဖမ်းကြိုးက ရုတ်တရက် ရှည်လျားသွားပြီး သေးငယ်လာသည်။</p> <p>လျှပ်တစ်ပြက်အတွင်းမှာ နဂါးဖမ်းကြိုးက သီရှီထျန်၏ အနားသို့ ရောက်ရှိလာသည်။ နဂါးဦးခေါင်းက အလွန်တိတ်ဆိတ်စွာ ချဉ်းကပ်သွားနေလေရာ သီရှီထျန်၏ ခန္ဓာကိုယ်နားသို့ ရောက်ရန် သိပ်မလိုတော့ပေ။</p> <p>ထိုမြင်ကွင်းကို မြင်သောအခါ ချူယွမ်က ဖော်မပြနိုင်အောင် စိတ်လှုပ်ရှားသွားသည်။ သူ၏ မျက်နှာပေါ်မှာ မျှော်လင့်မှုဖြင့် ပြည့်နှက်သွားသည်။ ထို့ပြင် သူ၏ မျက်လုံးထဲမှာ စိုးရိမ်သော အကြည့်လည်း ရှိ၏။ သူက မည်သည့်အဖြစ်အပျက်ကိုမှ အလွတ်မခံချင်သောကြောင့် မျက်တောင်ပင်မခတ်ဝံ့ပေ။</p> <p>သို့သော်လည်း ထိုအခိုက်အတန့်မှာ…</p> <p>သီရှီထျန်က ရုတ်တရက် အနောက်သို့ ခေါင်းလှည့်လိုက်သည်။ သူက သွေးဆာလောင်နေသော ပါးစပ်ကို ဟလိုက်ပြီး ကျိုးယွမ်ဖေးနှင့် ချူယွမ်ကို သရော်လှောင်ပြောင်သော အမူအရာဖြင့် အထင်သေးစွာ ကြည့်လိုက်သည်။</p> <p>“ မင်းတို့တွေ ငါ့အနောက်ကနေ ခိုးကြောင်ခိုးဝှက် တိုက်ခိုက်လာလိမ့်မယ်ဆိုတာ ငါသိတယ်… မင်းတို့မသေမျိုးကျင့်ကြံသူတွေက ဉာဏ်အများဆုံးနဲ့ ကောက်ကျစ်အယုတ်မာဆုံး သတ္တဝါတွေဆိုတာ ဒီဘုရင် သိပြီးသား… ငါသီရှီထျန်က ဘယ်လိုလုပ် ဒီလိုလှည့်ကွက်ထဲ ကျဆင်းသွားမှာလဲ ”</p> <p>စကားပြောလိုက်သည်နှင့်ချက်ချင်း သူ၏ ကျားခန္ဓာကိုယ်က ရုတ်တရက် တုန်ယင်သွားသည်။ ချက်ချင်းဆိုသလိုပင် မိစ္ဆာမြူခိုးက သူ၏ ခန္ဓာကိုယ်ထဲမှ စိမ့်ထွက်လာသည်။ လျှပ်တစ်ပြက်အတွင်းမှာ မိစ္ဆာမြူခိုးက သူ့ခန္ဓာကိုယ်တစ်ခုလုံးကို အပြည့်ဖုံးလွှမ်းသွားသည်။ ထို့နောက် မိစ္ဆာမြူခိုးက မြန်ဆန်စွာ ကျုံ့သွားပြီး မဟူရာလခြမ်းကွေးဓားများအဖြစ် ဖွဲ့စည်းသွားသည်။</p> <p>မိစ္ဆာမြူနှင်းဓားသွားကို သူဖန်တီးပြီးနောက် ယင်းကို သူအားလပ်သည့်အခါတိုင်း အဆက်မပြတ် လေ့ကျင့်ခဲ့သည်။ သူက မိစ္ဆာမြူနှင်းဓားသွားကို ဖွဲ့စည်းသည့် ကြာချိန်ကို တတ်နိုင်သမျှ လျော့ချရန် ကြိမ်ဖန်များစွာ လေ့ကျင့်ခဲ့သည်။ သူက မိစ္ဆာမြူနှင်းဓားသွားကို အချိန်တိုလေးအတွင်း မြန်ဆန်စွာ ဖွဲ့စည်းချင်သည်။ အကယ်၍ ဖြစ်နိုင်လျှင် သူက မိစ္ဆာမြူနှင်းဓားသွားကို အတွေးတစ်ချက်ဖြင့် ချက်ချင်း ဖွဲ့စည်းချင်သည်။ ထိုအခါကျလျှင် သူ၏ မိစ္ဆာမြူနှင်းဓားသွားက အံ့ဖွယ်ကောင်းသော တိုက်ခိုက်ရေးအတတ်ပညာတစ်ခု ဖြစ်လာလိမ့်မည်။</p> <p>ကြိမ်ဖန်များစွာ လေ့ကျင့်ပြီးနောက် သူက အတွေးတစ်ချက်ဖြင့် ဖွဲ့စည်းနိုင်သော နယ်ပယ်သို့ မရောက်ရှိသေးသော်လည်း မိစ္ဆာမြူနှင်းဓားသွားကို ဖွဲ့စည်းနိုင်သော ကြာချိန်ကို အတတ်နိုင်ဆုံး လျော့ချနိုင်ခဲ့သည်။ ထို့ကြောင့် ယခုအချိန်မှာ သူက မိစ္ဆာမြူနှင်းဓားသွားကို မြန်ဆန်စွာ ဖွဲ့စည်းနိုင်ခဲ့သည်။</p> <p>စက္ကန့်ပိုင်းလေးအတွင်းမှာ မိစ္ဆာမြူနှင်းဓားသွားများက သူ၏ ခန္ဓာကိုယ်တစ်ဝိုက်မှာ ချက်ချင်း ဖွဲ့စည်းသွားကြသည်။</p> <p>“ မင်းက ဒီဘုရင်ကို ချည်နှောင်ချင်တယ်လား… မင်းရဲ့ စွမ်းအားက မလုံလောက်သေးဘူး… ချိုးဖြတ်လိုက်စမ်း ”</p> <p>သူ၏ အမိန့်ပေးမှုအောက်မှာ ဒါဇင်ချီသော မိစ္ဆာမြူနှင်းဓားသွားများက အရှေ့သို့ တစ်ပြိုင်နက် ပျံသန်းထွက်သွားကြပြီး ကြွပ်ဆပ်သော သတ္ထုမြည်သံကို ထုတ်လွှတ်လိုက်သည်။ အနက်ရောင်အလင်းတန်းများက အရပ်မျက်နှာအသီးသီးထံမှ ထွက်ပေါ်လာကြသည်။ ယင်းတို့က နဂါးဖမ်းကြိုးကို တစ်ပြိုင်နက်ဖြစ်လုနီးပါး ခုတ်ပိုင်းလိုက်ကြသည်။</p> <p>ကံမကောင်းစွာပင် သီရှီထျန် မျှော်လင့်ထားသော မြင်ကွင်းက မဖြစ်ပေါ်လာပေ။ နဂါးဖမ်းကြိုးက မပြတ်တောက်သွားပေ။ ယင်းအစား ကြိုးပေါ်တွင် မှိတ်တုတ်မှိတ်တုတ်အလင်း ထွက်ပေါ်လာသည်။ မိစ္ဆာမြူနှင်းဓားသွားများ၏ တိုက်ခိုက်စွမ်းအားက နဂါးဖမ်းကြိုးပေါ်မှ အလင်းကြောင့် အားနည်းသွားသည်။ စွမ်းအားနှစ်ဆယ်ရာခိုင်နှုန်း သုံးဆယ်ရာခိုင်နှုန်းခန့်သာ ကြိုးပေါ်သို့ ကျရောက်သွားသည်။ ထိုမျှစွမ်းအားက နဂါးဖမ်းကြိုးအပေါ် မည်သည့်ထိခိုက်ပျက်စီးမှုမှ မဖြစ်စေပေ။</p> <p>“ ဘယ်လောက် သန်မာလိုက်တဲ့ ရတနာလဲ… ငါသီရှီထျန် အဲ့ဒီကြိုးကို လိုချင်တယ် ”</p> <p>မိစ္ဆာမြူနှင်းဓားသွား၏ စွမ်းအားကို ကောင်းကောင်း သူသိသည်။ သာမန်ဓမ္မလက်နက်တစ်ခုက မိစ္ဆာမြူနှင်းဓားသွားဒါဇင်ခန့်ဖြင့် ခုတ်ပိုင်းခံရလျှင် ယင်း၏ မျက်နှာပြင်ပေါ်မှာ အက်ကွဲရာများ သေချာပေါက် ထွက်ပေါ်လာလိမ့်မည်။ မသေမျိုးကျင့်ကြံသူတစ်ယောက်၏ ဓားပျံသည်ပင် သူ၏ မိစ္ဆာမြူနှင်းဓားသွားများကို မည်သည့်ထိခိုက်ပျက်စီးမှုမှ မဖြစ်စေဘဲ ခုခံတားဆီးနိုင်လိမ့်မည် မဟုတ်ချေ။</p> <p>သို့သော်လည်း သူ၏ မိစ္ဆာမြူနှင်းဓားသွားများက နဂါးဖမ်းကြိုးကို ခုတ်ပိုင်းလိုက်သည့်အခါ ကြိုးပေါ်တွင် မည်သည့်ခြစ်ရာမှ မထွက်ပေါ်လာပေ။ မိစ္ဆာမြူနှင်းဓားသွားများ နဂါးဖမ်းကြိုးပေါ်သို့ ကျဆင်းသွားသည့်အခိုက် ဓားသွားမှ ထုတ်လွှတ်နေသော ထက်ရှမှုက ရုတ်တရက် ပျောက်ကွယ်သွားကြောင်း ရှင်းလင်းစွာ သူခံစားမိခဲ့သည်။</p> <p>ထိုနဂါးဖမ်းကြိုးက အံ့ဖွယ်ထူးခြားသော ဓမ္မရတနာဖြစ်ကြောင်း သီရှီထျန် ချက်ချင်း သိလိုက်သည်။ လျှပ်တစ်ပြက်အတွင်းမှာ ထိုကြိုးကို ပိုင်ဆိုင်ချင်သော အတွေးက သူ၏ စိတ်ထဲမှာ ချက်ချင်း ထွက်ပေါ်လာသည်။</p> <p>နဂါးဖမ်းကြိုးသည် မိစ္ဆာမြူနှင်းဓားသွားများ၏ တိုက်ခိုက်မှုအောက်မှာ မည်သည့်ထိခိုက်ပျက်စီးမှုမှ မဖြစ်ခဲ့သော်လည်း ယင်းက လေထဲမှာ ရပ်တန့်သွားသည်။ ကြိုးသည် ကိုယ်ပိုင်အသက်ဝိညာဉ် ရှိနေသည့်အလား မှိတ်တုတ်မှိတ်တုတ် အဖြူရောင်အလင်းကို ထုတ်လွှတ်လိုက်သည်။</p> <p>“ မကောင်းတော့ဘူး… မိစ္ဆာကျားက ငါတို့ကို ရှာတွေ့သွားပြီ… ဂိုဏ်းတူညီမယွမ်… မိစ္ဆာကျားကို ဒီတစ်ကြိမ် မဖမ်းဆီးနိုင်တော့ဘူး… ဒီကနေ အမြန်ဆုံး ထွက်သွားကြရအောင်… အရင်ဆုံး နဂါးဖမ်းကြိုးကို ငါပြန်ယူရမယ် ”</p> <p>ကျိုးယွမ်ဖေးသည် လူငယ်မျိုးဆက်၏ ပါရမီရှင်တစ်ယောက် ဖြစ်သည်။ သီရှီထျန်၏ မျက်လုံးထဲမှ အထင်သေးရှုံ့ချမှုကို သတိထားမိသောအခါ သူတို့၏ အကြံအစည်က ထုတ်ဖော်ခံလိုက်ရပြီဖြစ်ကြောင်း သူသိလိုက်သည်။ ဤသို့အခြေအနေမျိုးမှာ အရှေ့ဆက်တိုးခြင်းက မဟန်ကြောင်း သူနားလည်သည်။</p> <p>နဂါးဖမ်းကြိုးမှာ အစွမ်းထက်သော တိုက်ခိုက်စွမ်းရည်မရှိခြင်း မဟုတ်ပေ။ မည်သို့ဖြစ်ပါစေ ယင်းက ဓမ္မရတနာတစ်ခု ဖြစ်သည်။ သို့သော်လည်း သူ၏ ကျင့်ကြံခြင်းစွမ်းရည်က ချီသန့်စင်ခြင်းနယ်ပယ်မှာသာ ရှိသေး၏။</p> <p>ဓမ္မရတနာ၏ စွမ်းအားအပြည့်အဝကို ထုတ်လွှတ်နိုင်ရန် အမြူတေဖွဲ့စည်းခြင်းနယ်ပယ် ကျင့်ကြံခြင်းစွမ်းအားကို လိုအပ်သည်။ သို့ဖြစ်၍ ချီသန့်စင်ခြင်းနယ်ပယ်မှာသာ ရှိသေးသော သူက နဂါးဖမ်းကြိုး၏ စွမ်းရည်ကို အပြည့်အဝ မထုတ်လွှတ်နိုင်ပေ။ သူက နဂါးဖမ်းကြိုး၏ စွမ်းရည်တစ်စိတ်တစ်ပိုင်းကိုသာ အသုံးပြုနိုင်သည်။</p> <p>ထို့ပြင် ဤနေရာမှာ ရန်သူများက ဘေးပတ်ပတ်လည်မှာ ရှိနေကြသည်။ ဤနေရာမှာ အချိန်ကြာကြာ ဆက်နေခြင်းက သူတို့အတွက် မကောင်းမွန်ပေ။ အကယ်၍ ကံမကောင်းလျှင် သူတို့က ဤနေရာမှာတင် အသက်ဆုံးရှုံးသွားနိုင်သည်။</p> <p>နောက်ဆုံးရလဒ်အနေဖြင့် ကျိုးယွမ်ဖေးက ဆုံးဖြတ်ချက်တစ်ခု ချလိုက်သည်။ သူက သီရှီထျန်ကို ဆက်ပြီး တိုက်ခိုက်ရန် စိတ်မဝင်စားတော့ပေ။ သူက ချိပ်တံဆိပ်လက်ဟန်သင်္ကေတတစ်ခုကို ဖွဲ့စည်းလိုက်လေရာ နဂါးဖမ်းကြိုးက ချက်ချင်း ထွန်းလင်းတောက်ပလာသည်။ နဂါးဖမ်းကြိုး၏ နဂါးဦးခေါင်းက ရုတ်တရက် အနောက်သို့ လှည့်လိုက်ပြီး ဦးတည်ရာပြောင်းလိုက်သည်။ နဂါးဖမ်းကြိုးက အမှန်တကယ်ပင် ကျိုးယွမ်ဖေးဆီသို့ ပြန်သွားသည်။</p> <p>“ မင်းက ကြိုးကို ပြန်ယူချင်တယ်လား… အဲ့လောက်လွယ်မလား… အဲ့ဒါကို ငါ့အတွက် ချန်ထားခဲ့စမ်း ”</p> <p>စက်ကရာက နဂါးဖမ်းကြိုးကို လိုချင်နေလေရာ ယင်းကို မည်သို့ကြောင့် အလွယ်တကူ ပြန်ပေးနိုင်မည်နည်း။ သူက အေးစက်စက် နှာခေါင်းရှုံ့လိုက်ပြီး သူ၏ ကျားလက်သည်းကို မြှောက်လိုက်ကာ အဝေးမှ နဂါးဖမ်းကြိုးထံသို့ ကုတ်ဆွဲလိုက်သည်။</p> <p> </p> <p style="text-align: center;">***</p>


Save