BIT

Title

Show in VIP/Series

Status (Active / Inactive)

<h2 style="text-align: center;">အပိုင်း (၅၂၃)</h2>

<h2 style="text-align: center;">မိကျောင်းကြီးနှင့် ရေခူ</h2>

လီချင်းဟွာက ချက်ချင်းပင် ပြောလေသည်။ "ကျွန်တော့်လုပ်လိုက်မယ်"

ထိုသို့ပြောရင်း သူ၏ ကိုယ်ဟန်က တစ်ချက် လက်ခနဲ ဖြစ်သွားပြီးနောက် ထိုဘက်ရှိ သန္ဓေပြောင်း ရေခူ၏ ရှေ့မှောက်သို့ လျင်မြန်စွာ ရောက်ရှိသွားတော့သည်။

သူ ထွက်သွားသည်နှင့် တစ်ပြိုင်နက် သန္ဓေပြောင်း မိကျောင်း၏ အောက်ဘက်ရှိ ဟင်းလင်းပြင် တံခါးပေါက်ကလည်း ချက်ချင်း ပိတ်သွားလေသည်။

"ဝုန်း" ခနဲ အသံကျယ်ကြီးနှင့်အတူ ၎င်း၏ ခန္ဓာကိုယ်ကြီး တစ်ခုလုံးက ရေပြင်ပေါ်သို့ ပြုတ်ကျသွားခဲ့သည်။

"ဒိုင်း"

ဧရာမ ရေလှိုင်းကြီးများက ကောင်းကင်ယံသို့တိုင် လွင့်စင်သွားပြီး တောင်ပြိုမိုးပျံမတတ် အရှိန်အဟုန်ဖြင့် ရိုက်ခတ်သွားလေသည်။

လင်းယွမ်က အလျင်အမြန် လိုက်ပါလာပြီး သန္ဓေပြောင်း မိကျောင်းကြီး၏ ကျောပေါ်သို့ တိုက်ရိုက် ကျဆင်းလာခဲ့သည်။

ထိုအချိန်တွင် သန္ဓေပြောင်း မိကျောင်းကြီးမှာ ပြုတ်ကျသွားသည့် အရှိန်ကြောင့် ခေါင်းမူးမိုက်နေပြီး ကျောပေါ်တွင် လူတစ်ယောက် ရှိနေသည်ကို လုံးဝ သတိမထားမိခဲ့ပေ။

နောက်တစ်စက္ကန့်တွင် လင်းယွမ်က သန္ဓေပြောင်း မိကျောင်းကြီး၏ ခေါင်းကို လက်တစ်ဖက်ဖြင့် ဖိချကာ စိတ်စွမ်းအင်များကို အသုံးပြု၍ ကပ်ပါးမျိုးစေ့ တစ်စေ့ကို လျင်မြန်စွာ စုစည်းဖန်တီးလိုက်သည်။

ကပ်ပါးမျိုးစေ့လေးက သန္ဓေပြောင်း မိကျောင်းကြီး၏ စိတ်ပင်လယ်ထဲသို့ လျင်မြန်စွာ တိုးဝင်သွားလေသည်။

ဤအရာအားလုံးကို လုပ်ဆောင်ပြီးနောက် လင်းယွမ်က သန္ဓေပြောင်း မိကျောင်းကြီး၏ ခေါင်းပေါ်တွင် တင်ပျဉ်ခွေ ထိုင်ချလေသည်။

သန္ဓေပြောင်း မိကျောင်းကြီး အသိစိတ် ပြန်လည်ဝင်ရောက်လာချိန်တွင် ၎င်း၏ ခေါင်းပေါ်၌ လူတစ်ယောက် ရှိနေသည်ကို အာရုံခံမိသွားပြီး ချက်ချင်းပင် ဒေါသထွက်သွားခဲ့သည်။

၎င်း၏ ခန္ဓာကိုယ်က ရေထဲတွင် ရှိနေဆဲ ဖြစ်သော်လည်း သေမင်းတမန် လူးလှိမ့်ခြင်းဖြင့် လင်းယွမ်ကို အောက်သို့ အကြမ်းပတမ်း ခါချရန် ကြိုးစားတော့သည်။

သို့သော်လည်း လင်းယွမ်၏ ကိုယ်ဟန်က လေထဲသို့ မြောက်တက်သွားခဲ့သဖြင့် မိကျောင်းကြီးမှာ အလွတ်ကြီးသာ ခါချမိလျက်သား ဖြစ်သွားလေသည်။

"ဝုန်း" ဟူသော အသံနှင့်အတူ ရေလှိုင်းများက လှိမ့်တက်လာခဲ့သည်။

သန္ဓေပြောင်း မိကျောင်းကြီးက ခေါင်းမော့ကာ လေထဲတွင် ဝဲပျံနေသော လင်းယွမ်ကို ဒေါသတကြီးဖြင့် စိုက်ကြည့်နေသည်။

ထို့နောက် အမြီးဖြင့် ရေပြင်ကို ရိုက်ချကာ ၎င်း၏ ခန္ဓာကိုယ်ကြီးက အထက်သို့ တစ်ဖန် မြင့်မားစွာ ခုန်တက်သွားပြီး လင်းယွမ်ထံသို့ အရှိန်အဟုန်ဖြင့် ကိုက်ဖြဲရန် ပြေးဝင်လာခဲ့သည်။

ရှည်လျားလှသော မိကျောင်းပါးစပ်ကြီးက ကြောက်မက်ဖွယ်ကောင်းသော သံညှပ်ကြီးတစ်ခုပမာ အားကုန် ကိုက်ချလေသည်။

လင်းယွမ်က ရှောင်တိမ်းခြင်း မရှိဘဲ တည်ငြိမ်သော အကြည့်များဖြင့်သာ ၎င်းကို ကိုက်ခွင့်ပြုထားလေသည်။

"ဒုန်း"

မိကျောင်းပါးစပ်ကြီးက နောက်ဆုံးတွင် လင်းယွမ်ကို ကိုက်မိသွားခဲ့သော်လည်း နောက်တစ်ခဏ၌ ၎င်းထံမှ အလွန် နာကျင်ဟစ်အော်သံကြီး ထွက်ပေါ်လာတော့သည်။

၎င်း၏ ပါးစပ်ထဲတွင် လင်းယွမ်ကို ငုံထားမိသော်လည်း မည်သို့မျှ ဆက်၍ ကိုက်ချ၍ မရနိုင်တော့သည်ကို မြင်တွေ့ရလေသည်။

လင်းယွမ်က လက်တစ်ဖက်ဖြင့် ၎င်း၏ အပေါ်ဘက်ရှိ ချွန်ထက်သော သွားများကို တွန်းကန်ထားပြီး ကျောက်တိုင်ကြီးသဖွယ် ဖြစ်နေသော မေးရိုးအောက်ပိုင်းမှ သွားအရင်းကို ခြေတစ်ဖက်ဖြင့် နင်းထားခဲ့သည်။

ထိုကဲ့သို့ လက်တစ်ဖက်တည်းဖြင့် ထောက်မထားပြီး အစွမ်းထက်လှသော ခွန်အားဖြင့် ဖိနှိပ်ထားမှုအောက်တွင် သန္ဓေပြောင်း မိကျောင်းကြီးမှာ သွားများကို စေ့ရန်ပင် မဖြစ်နိုင်တော့ဘဲ ဝါးမြိုရန်ဆိုသည်မှာ ဝေလာဝေးပင် ဖြစ်သည်။

လင်းယွမ်က ဤပါးစပ်ကြီးကို တစ်ချက် ဝေ့ကြည့်ရာတွင် အတွင်းပိုင်းမှ အလွန် ဆိုးရွားလှသော အပုပ်နံ့ကြီးက နှာခေါင်းထဲသို့ တိုးဝင်လာသည်။

သူက အခြား လက်တစ်ဖက်ကို လက်သီးဆုပ်ကာ သွားတစ်ချောင်းပေါ်သို့ ပြင်းထန်စွာ ထိုးချတော့သည်။

"ဒုန်း"

ပြင်းထန်သော ပေါက်ကွဲသံကြီး ထွက်ပေါ်လာပြီး ထိုသွားမှာ တစ်ခဏအတွင်း အပိုင်းပိုင်းအစစ ကွဲအက်သွားခဲ့သည်။

ချက်ချင်းပင် သွားရင်းမှ သွေးများက ပန်းထွက်လာလေသည်။

ပြင်းထန်သော နာကျင်မှုကြောင့် သန္ဓေပြောင်း မိကျောင်းကြီးမှာ ခေါင်းကို ရူးသွပ်စွာ ခါရမ်းနေပြီး ရေလွှမ်းမိုးမှုထဲတွင် သေမင်းတမန် လူးလှိမ့်ခြင်းကို အဆက်မပြတ် ပြုလုပ်နေတော့သည်။

၎င်းမှာ အသံမထွက်နိုင်သော်လည်း ဤအမူအရာက မည်မျှ နာကျင်နေကြောင်းကို ရှင်းလင်းစွာ ဖော်ပြနေပေသည်။

လင်းယွမ်က ကျိုးပဲ့သွားသော သွားရင်းကို ခြေဖြင့် ကန်ထုတ်ကာ ထိုသွားကျိုးသွားသော ကွက်လပ်မှတစ်ဆင့် အပြင်သို့ ထွက်လာခဲ့သည်။

သူက လေထဲတွင် ဝဲပျံနေရင်း သန္ဓေပြောင်း မိကျောင်းကြီးကို စိုက်ကြည့်ကာ ပြောလေသည်။ "ခွန်အား အမျိုးအစား သန္ဓေပြောင်း သတ္တဝါတွေထဲမှာ မင်းက သိပ်တော့ မစွမ်းဘူး"

"အခုကစပြီး ငါ့နောက်ကိုသာ လိုက်ခဲ့တော့"

ထိုသို့ပြောရင်း သူက လက်တစ်ချက် ဝှေ့ယမ်းပြရာ ကျောဘက်တွင် ရေခဲများ စုစည်းသွားပြီး ချက်ချင်းပင် ဧရာမ ရေခဲသလင်း သံကြိုးကြီးတစ်ခုက တိုက်ရိုက် ရစ်ပတ်ထွက်ပေါ်လာခဲ့သည်။

"ချွမ်း... ချွမ်း"

သံကြိုးကြီးက သန္ဓေပြောင်း မိကျောင်းကြီး၏ လည်ပင်းကို ရစ်ပတ်သွားရာ အလွန် အေးစက်လှသဖြင့် ၎င်းမှာ တုန်ယင်သွားခဲ့ပြီး ကြီးမားလှသော မျက်လုံးအိမ်များထဲတွင် ထိတ်လန့်ကြောက်ရွံ့မှုများ ပြည့်နှက်သွားလေသည်။

လင်းယွမ်က ၎င်း၏ ကျောပေါ်တွင် ရပ်နေကာ ရေခဲသလင်း သံကြိုးဖြင့် အသေအချာ ရစ်ပတ်ထိန်းချုပ်ထားပုံမှာ ရေထဲတွင် မြင်းလှည်း တစ်စီးကို မောင်းနှင်နေသည့်အလား ပုံပေါက်နေသည်။

သူက သံကြိုးကို တစ်ချက် ဆောင့်ဆွဲကာ ပြင်းထန်စွာ တိုက်ခိုက်နေသော လီချင်းဟွာ ရှိရာဘက်သို့ ညွှန်ပြလျက် အော်ပြောလေသည်။ "သွားကူညီလိုက်"

သန္ဓေပြောင်း မိကျောင်းကြီးမှာ လုံးဝ မလွန်ဆန်ရဲတော့ဘဲ အမြီးကို လှုပ်ခတ်ကာ ထိုဘက်သို့ အလွန် လျင်မြန်သော အလျင်ဖြင့် ကူးခတ်သွားတော့သည်။

လီချင်းဟွာနှင့် သန္ဓေပြောင်း ရေခူတို့ ပြင်းထန်စွာ တိုက်ခိုက်နေသည်ကို မြင်တွေ့ရလေသည်။

ထင်မှတ်မထားသည့်အရာမှာ လီချင်းဟွာက ထိုသန္ဓေပြောင်း ရေခူကို မယှဉ်နိုင်ဖြစ်နေခြင်းပင်တည်း။

သန္ဓေပြောင်း ရေခူ၏ တစ်ကိုယ်လုံးတွင် အပြာရောင် အလင်းတန်းများ ဖုံးလွှမ်းနေပြီး ၎င်း၏ ခန္ဓာကိုယ် တစ်ခုလုံးမှာလည်း ဖောက်ထွင်းမြင်နိုင်သော အခြေအနေသို့ ရောက်ရှိနေသည်။

လီချင်းဟွာက ဟင်းလင်းပြင် တံခါးပေါက်များကို အကြိမ်ကြိမ် အသုံးပြုကာ ၎င်းကို တံခါးပေါက် သံသရာထဲတွင် ပိတ်လှောင်ထားရန် ကြိုးစားနေသည်။

သို့သော် ထိုသန္ဓေပြောင်း ရေခူက ရေဓာတ် သန္ဓေပြောင်း သတ္တဝါ ဖြစ်နေသဖြင့် ရေကို ထိန်းချုပ်နိုင်ရုံသာမက ၎င်း၏ မူလခန္ဓာကိုယ်ကလည်း ဧရာမ ရေလှိုင်းလုံးကြီးအဖြစ် ပြောင်းလဲကာ ထွက်ပြေးပုန်းရှောင်နိုင်စွမ်း ရှိနေပေသည်။

လီချင်းဟွာက ဟင်းလင်းပြင် တံခါးပေါက်ကို ဖွင့်တိုင်း ၎င်းက ရေလှိုင်းကြီးအဖြစ် ပြောင်းလဲကာ တိုက်ရိုက် ရှောင်တိမ်းထွက်ပြေးသွားတတ်သည်။

လီချင်းဟွာက ဟင်းလင်းပြင်အက်ကွဲဓားကွက်ကို ထပ်မံ အသုံးပြုသောအခါတွင်လည်း...

သန္ဓေပြောင်း ရေခူက နည်းလမ်းဟောင်းကို ပြန်သုံးကာ ရေဒြပ်စင် အသွင်ပြောင်း ရေလှိုင်းကြီးအဖြစ် ထပ်မံ ပြောင်းလဲသွားခဲ့သည်။ ဟင်းလင်းပြင်အက်ကွဲဓားကွက်က ရေလှိုင်းကြီးကို ပိုင်းဖြတ်သွားသော်လည်း ၎င်း၏ အစစ်အမှန် ခန္ဓာကိုယ်ကိုမူ မထိခိုက်နိုင်ခဲ့ပေ။

မျက်တောင်တစ်ခတ် အချိန်လေးအတွင်းမှာပင် ၎င်းက ရေလှိုင်းကြီးထဲမှနေ၍ မူလပုံစံအတိုင်း ပြန်လည် ထွက်ပေါ်လာခဲ့သည်။

လီချင်းဟွာ၏ အကြိမ်ကြိမ် တိုက်ခိုက်မှုများက ဤနည်းလမ်းဖြင့်သာ ပျက်ပြယ်သွားခဲ့ရသည်။

၎င်း၏ တိုက်ခိုက်မှုကလည်း အလွန် ထူးဆန်းလှပေသည်။

၎င်း၏ ခန္ဓာကိုယ်ပေါ်တွင် အပြာရောင် အလင်းများ လှုပ်ခတ်သွားပြီးနောက် ရေအမြောက်တစ်ခုအဖြစ် ပြောင်းလဲကာ ခေါင်းပေါ်မှနေ၍ အရှိန်အဟုန်ဖြင့် ပစ်လွှတ်လေသည်။

ပြင်းထန်လှသော ရေဖိအားက လေထုကို ချက်ချင်း ထိုးဖောက်သွားပြီး ပြင်းထန်သော ဟိန်းဟောက်သံကြီးများ ထွက်ပေါ်လာခဲ့သည်။

လီချင်းဟွာက အချိန်မီပင် ဟင်းလင်းပြင် ပူဖောင်းကို အသုံးပြုကာ ကာကွယ်ရန် ကြိုးစားခဲ့သည်။

သို့သော်လည်း ဟင်းလင်းပြင် ပူဖောင်း၏ အကာအကွယ် အင်အားက ထိုရေအမြောက်ကို မတားဆီးနိုင်ခဲ့ချေ။

"ဝုန်း" ဟူသော အသံနှင့်အတူ ပေါက်ကွဲကွဲအက်သွားလေသည်။

လီချင်းဟွာက ဟင်းလင်းပြင် တံခါးပေါက်ကို အလျင်အမြန် ဖွင့်ကာ ရှောင်တိမ်းထွက်ပြေးရတော့သည်။

သို့မဟုတ်ပါက ဟင်းလင်းပြင် တံခါးပေါက်ကို တိုက်ရိုက် ဖွင့်ကာ ထိုရေအမြောက်ကို တံခါးပေါက်ထဲသို့ ပစ်သွင်းပြီး အခြားတစ်နေရာမှ တံခါးပေါက် ပြန်ဖွင့်ပေးရသည်။ ထိုအခါ ပစ်သွင်းခံရသော ရေအမြောက်က ပြန်ထွက်လာချိန်တွင် လားရာ ပြောင်းလဲသွားပြီး သန္ဓေပြောင်း ရေခူကိုယ်တိုင်ဆီသို့ ပြန်လည် ဦးတည်သွားတော့သည်။

ဤသည်မှာ သိသာစွာပင် ဟင်းလင်းပြင် တံခါးပေါက်များကို အသုံးပြု၍ ရေအမြောက်၏ တိုက်ခိုက်မှု လားရာကို ပြောင်းလဲခြင်းပင် ဖြစ်သည်။

တစ်ဖက်လူ၏ နည်းလမ်းကို အသုံးပြုကာ တစ်ဖက်လူကို ပြန်လည် တုံ့ပြန်ခြင်း ဆိုသည်ကို အမှန်တကယ် လုပ်ဆောင်ပြခြင်းပင်။

သန္ဓေပြောင်း ရေခူ၏ တစ်ကိုယ်လုံးတွင် အပြာရောင် အလင်းများ လင်းလက်သွားပြီး ဖောက်ထွင်းမြင်နိုင်သော ရေစီးကြောင်း အကာအရံတစ်ခုကို လျင်မြန်စွာ စုစည်းဖန်တီးခဲ့သည်။

ထိုရေအမြောက်က အကာအရံပေါ်သို့ ရိုက်ခတ်သွားရာ၌ ချက်ချင်းပင် "ဝုန်း" ခနဲ ဟိန်းဟောက်သံကြီး ထွက်ပေါ်လာခဲ့သည်။

ရေလှိုင်းများ ပေါက်ကွဲထွက်သွားပြီး ရေစက်ရေမှုန်များက ပေရာနှင့်ချီသော အမြင့်အထိ လွင့်စင်သွားလေသည်။

၎င်း၏ ဧရာမ ခန္ဓာကိုယ်ကြီးမှာလည်း ရိုက်ခတ်မှုကြောင့် ရေပြင်ပေါ်တွင် အကြိမ်ပေါင်းများစွာ လိမ့်ထွက်သွားခဲ့ပြီး လမ်းတစ်လျှောက်တွင် ရေလှိုင်းကြီးများကို ဖိကြိတ်ဖြစ်ပေါ်စေခဲ့သည်။

လီချင်းဟွာက လေထဲမှနေ၍ မနေနိုင်ဘဲ အော်ပြောလေသည်။ "ဆရာလင်း... ဒီသန္ဓေပြောင်း ရေခူက နည်းနည်းတော့ လက်ပေါက်ကပ်တယ်"

"သူ့ရဲ့ ရေဒြပ်စင် အသွင်ပြောင်းတဲ့ အစွမ်းက ကျွန်တော့်ရဲ့ ဟင်းလင်းပြင် တိုက်ကွက်တွေကို ခုခံနိုင်စွမ်း ရှိနေတယ်"

လင်းယွမ်က ထိုအခြေအနေကို မြင်သောအခါ တစ်စုံတစ်ရာကို စဉ်းစားခန်း ဝင်သွားလေသည်။

ဟင်းလင်းပြင် အမျိုးအစား အစွမ်းလို အင်အားကြီးမားသည့် အရာမျိုးကပင် အနိုင်မခံ အရှုံးမပေးနိုင်သည့် အရာမျိုး မဟုတ်သည်မှာ သေချာနေပေပြီ။

ရုပ်ဝတ္ထု ခန္ဓာကိုယ်ကို ဒြပ်မဲ့ ခန္ဓာကိုယ်အဖြစ် ပြောင်းလဲနိုင်သော ဤဒြပ်စင်အသွင်ပြောင်းခြင်း အစွမ်းက ဟင်းလင်းပြင်အက်ကွဲဓားကွက်ကိုပင် ကာကွယ်နိုင်စွမ်း ရှိနေခြင်းကြောင့် လင်းယွမ် အနည်းငယ် အံ့အားသင့်သွားသည်။

သို့သော်လည်း မကြာမီမှာပင် တစ်စုံတစ်ခု မှားယွင်းနေကြောင်း သူ သတိပြုမိသွားခဲ့သည်။

ဒြပ်စင်အသွင်ပြောင်းရုံ သက်သက်ဖြင့် ဤအချက်ကို လုပ်ဆောင်နိုင်မည် မဟုတ်ပေ။

အဘယ်ကြောင့်ဆိုသော် ဒြပ်စင်အသွင်ပြောင်းပြီးနောက်တွင် ရုပ်ပိုင်းဆိုင်ရာ တိုက်ခိုက်မှုများကို ရှောင်လွှဲနိုင်သော်လည်း ဒြပ်စင်အသွင်ပြောင်းထားသော ခန္ဓာကိုယ်၏ အခြေခံ သဘောတရားမှာ တည်ရှိနေဆဲ ဖြစ်သောကြောင့်ပင်။

ဤကဲ့သို့ တည်ရှိနေမှု ပုံစံသည် စိတ်စွမ်းအင်များက ဒြပ်စင်အတွင်းပိုင်းတွင် ပေါင်းစပ်တည်ရှိနေခြင်းသာ ဖြစ်သည်။

ယုတ္တိဗေဒအရဆိုလျှင် လီချင်းဟွာ၏ ဟင်းလင်းပြင်အက်ကွဲဓားကွက်သည် ဒြပ်စင် ခန္ဓာကိုယ်ကို ဆုတ်ဖြဲပစ်ခဲ့ပြီး ဖြစ်သည်။

ထိုသည်မှာ ဒြပ်စင် ခန္ဓာကိုယ်၏ အစိတ်အပိုင်း တစ်ခုကို ဟင်းလင်းပြင် အက်ကွဲကြောင်းထဲသို့ မျိုချခြင်းနှင့် အတူတူပင် ဖြစ်သည်။

အကယ်၍ ဒြပ်စင် ခန္ဓာကိုယ်သည် ပိုင်းဖြတ်ခံရပြီးနောက် ပြန်လည် မကုစားနိုင်ပါက ဒြပ်စင်အသွင်ပြောင်းထားသော ရန်သူအတွက် ဤသည်ကလည်း အသက်အန္တရာယ် ရှိစေနိုင်သော ဒဏ်ရာတစ်မျိုးပင် ဖြစ်ပေမည်။

ထိုသို့ဆိုလျှင် ဤသန္ဓေပြောင်း ရေခူက မည်သို့ လုပ်ဆောင်နိုင်ခဲ့သနည်း။

လင်းယွမ်က အနည်းငယ် စဉ်းစားရုံဖြင့် ၎င်း၏ နောက်ကွယ်မှ အကြောင်းရင်းကို ချက်ချင်း နားလည်သွားတော့သည်။

"ဒါက ဒြပ်စင်အသွင်ပြောင်း ခန္ဓာကိုယ်သက်သက် မဟုတ်ဘူး... ဒြပ်စင် အသုံးပြုပြီး ထွက်ပြေးနိုင်တဲ့ အစွမ်းလည်း ရှိနေတယ်"

"ရေလျှိုးအစွမ်းမျိုး ဖြစ်ရမယ်... သူက ဒြပ်စင် အသွင်ပြောင်းပြီးတာနဲ့ ရေရှိတဲ့ နေရာဆိုရင် မျက်တောင်တစ်ခတ်အတွင်းမှာကို ရှောင်ပြေးနိုင်သွားတာပဲ"

"လီချင်းဟွာရဲ့ ဟင်းလင်းပြင်အက်ကွဲဓားကွက် သူ့ကို ဘာမှ မလုပ်နိုင်ရတဲ့ အကြောင်းရင်း အမှန်က... တကယ်တော့ အဲဒီဓားချက်က သူ့ကို လုံးဝ မထိခဲ့လို့ပဲ"

"ဒါဆို လီချင်းဟွာက ဘာဖြစ်လို့ သူ ထွက်ပြေးမယ့် ဘက်ကို ကြိုတင် တားဆီးပြီး ဟင်းလင်းပြင် တံခါးပေါက်နဲ့ သူ့ကို ပြန်ဆွဲမခေါ်နိုင်ခဲ့တာလဲ"

လင်းယွမ်၏ ဤသံသယ ပေါ်ထွက်လာသည်နှင့် တစ်ပြိုင်နက် ချက်ချင်းပင် အသိဝင်သွားခဲ့သည်။

"စိတ်စွမ်းအင် မလုံလောက်လို့ပဲ"

သူ၏ စိတ်ထဲတွင် ချက်ချင်း သဘောပေါက်သွားလေသည်။

လီချင်းဟွာက ဟင်းလင်းပြင် အမျိုးအစား အစွမ်းပိုင်ရှင် ဖြစ်သဖြင့် အဓိက အရည်အသွေးမှာ စိတ်စွမ်းအင် ဖြစ်နေမည်မှာ အသေအချာပင်။

သို့သော်လည်း သူက မျိုးရိုးဗီဇမျိုးစေ့ အဆင့်သို့ ယခုမှ ကျော်ဖြတ်ထားသူ ဖြစ်သဖြင့် စိတ်စွမ်းအင်မှာ သိပ်ပြီး မြင့်မားနေမည် မဟုတ်ချေ။

ဤသန္ဓေပြောင်း ရေခူကလည်း အလားတူပင် ရေဓာတ် သန္ဓေပြောင်း သတ္တဝါ ဖြစ်သဖြင့် အဓိက အရည်အသွေးမှာ စိတ်စွမ်းအင်ပင် ဖြစ်ပေလိမ့်မည်။

လီချင်းဟွာက တစ်ဖက်လူ ထွက်ပြေးမည့် လားရာကို မတားဆီးနိုင်ရခြင်း၏ အဓိက အကြောင်းရင်းမှာ သူ၏ စိတ်စွမ်းအင် အဓိက အရည်အသွေးက ဤသန္ဓေပြောင်း ရေခူလောက် မမြင့်မားသောကြောင့်ပင် ဖြစ်သည်။

လင်းယွမ်၏ အမြင်တွင်မူ ဤသန္ဓေပြောင်း ရေခူက ရေဒြပ်စင် အသွင်ပြောင်းသည့် အခိုက်အတန့်တွင် ရေလျှိုးအစွမ်းကို အသုံးပြုကာ မူလနေရာမှ ချက်ချင်း ထွက်ပြေးသွားခဲ့ခြင်း ဖြစ်သည်။

သူက တစ်ဖက်လူ၏ တည်ရှိနေမှုကို ရှင်းလင်းစွာ အာရုံခံနိုင်နေပေသည်။

အဘယ်ကြောင့်ဆိုသော် သူ၏ စိတ်စွမ်းအင်က သန္ဓေပြောင်း ရေခူထက် အဆပေါင်းများစွာ မြင့်မားနေသောကြောင့်ပင်။

"ဝုန်း"

ထိုအချိန်မှာပင် နောက်ထပ် ဟိန်းဟောက်ပေါက်ကွဲသံကြီး တစ်ခု ထွက်ပေါ်လာပြန်သည်။

သန္ဓေပြောင်း ရေခူက ရေဒြပ်စင်အဖြစ် လုံးဝ ပြောင်းလဲသွားပြီး ရေအောက်ခြေသို့ ငုပ်လျှိုးသွားသည်ကို မြင်တွေ့ရလေသည်။

ပေါက်ကွဲသံကြီး ထွက်ပေါ်လာပြီး ရေလှိုင်းများက နေရာအနှံ့သို့ လွင့်စင်သွားကာ နေရာတိုင်းတွင် ရေပက်ဖြန်းမှုများ ရှိနေလေသည်။

လီချင်းဟွာက ဤသန္ဓေပြောင်း ရေခူ၏ ခြေရာကို လုံးဝ လက်လွတ်ဆုံးရှုံးသွားခဲ့ပြီ ဖြစ်သည်။

သူက အလွန် သတိထားနေပြီး ခိုးကြောင်ခိုးဝှက် တိုက်ခိုက်ခံရခြင်းမှ ကင်းဝေးစေရန် အချိန်မီပင် ဟင်းလင်းပြင် ပူဖောင်းကို ဖွင့်ကာ သူ၏ ခန္ဓာကိုယ်ပတ်လည်တွင် စုစည်းထားခဲ့သည်။

လင်းယွမ်က အကြည့်တစ်ချက် ဝေ့ကြည့်ပြီးနောက် ချက်ချင်းပင် အေးစက်စက် အပြုံးတစ်ခု ထွက်ပေါ်လာခဲ့သည်။

"သေချင်နေတာပဲ"

သူက သံကြိုးကို တစ်ချက် ဆောင့်ဆွဲရာ ခြေအောက်ရှိ သန္ဓေပြောင်း မိကျောင်းကြီးက ချက်ချင်း ခေါင်းမော့လာပြီး ရှေ့မှ တက်လာသော ရေလှိုင်းကြီးကို ပါးစပ်ဟကာ ကိုက်ချတော့သည်။

"ဒုန်း"

ရေလှိုင်းကြီးကို သန္ဓေပြောင်း မိကျောင်းကြီးက ဖျက်ဆီးပစ်ပြီးနောက် ရေစီးကြောင်းတစ်ခု စုစည်းလာကာ ဧရာမ သန္ဓေပြောင်း ရေခူအဖြစ် ပြောင်းလဲသွားလေသည်။

ဤတိရစ္ဆာန်က လီချင်းဟွာကို သွားရောက် မတိုက်ခိုက်တော့ဘဲ အနီးသို့ ရောက်ရှိလာသော လင်းယွမ်ကို ပြောင်းလဲ တိုက်ခိုက်လာခဲ့ခြင်းပင်။

ထိုအချိန်တွင် ၎င်းက ရေဒြပ်စင်အဖြစ် ပြောင်းလဲကာ ရေလှိုင်းကြီးများထဲတွင် ပုန်းကွယ်နေခဲ့သော်လည်း လင်းယွမ်က ချက်ချင်းပင် အကဲခတ်မိသွားခဲ့သည်။

သန္ဓေပြောင်း မိကျောင်းကြီးက ရေလှိုင်းများကို ဖျက်ဆီးလိုက်သည့် အခိုက်အတန့်တွင် ၎င်းက ပုံပေါ်လာပြီး ဧရာမ ခန္ဓာကိုယ်ကြီးမှနေ၍ ရေအမြောက်တစ်ခုကို ပစ်လွှတ်လေသည်။

"ဝုန်း"

အမြောက်ဆန်က သန္ဓေပြောင်း မိကျောင်းကြီးထံသို့ အရှိန်အဟုန်ဖြင့် ပြေးဝင်လာရာ သန္ဓေပြောင်း မိကျောင်းကြီးမှာ အချိန်မီ မရှောင်တိမ်းနိုင်တော့ဘဲ လက်သည်းနှစ်ဖက်ဖြင့် ရေအမြောက်ကို ဖိချရလေသည်။

ချက်ချင်းပင် ကြီးမားသော ပေါက်ကွဲသံကြီး ထွက်ပေါ်လာပြီး သန္ဓေပြောင်း မိကျောင်းကြီး၏ ခန္ဓာကိုယ် တစ်ခုလုံး လွင့်ထွက်သွားကာ ရေပြင်ပေါ်တွင် အကြိမ်ပေါင်းများစွာ လိမ့်ထွက်သွားခဲ့သည်။

ဗိုက်လှန်သွားပြီးနောက် ကြီးမားလှသော အညိုအမည်းစွဲ ဒဏ်ရာကြီးများကိုပါ မြင်တွေ့ရလေသည်။

ဤရေခူ ပစ်လွှတ်လိုက်သော ရေအမြောက်၏ စွမ်းအားက သာမန် မဟုတ်ပေ။

လင်းယွမ်၏ ကိုယ်ဟန်က အချိန်မီပင် လေထဲသို့ ဝဲပျံတက်သွားခဲ့ပြီး သူက စွမ်းအင်တိုင်းမျက်မှန်ကို တပ်ဆင်ကာ ဤသန္ဓေပြောင်း ရေခူကို ပစ်မှတ်ထားလိုက်သည်။

စွမ်းအင်တိုင်း မျက်မှန်ပေါ်ရှိ ကိန်းဂဏန်းများက ခုန်ပေါက်နေပြီး များမကြာမီမှာပင် ၇၃ မှတ် နေရာတွင် ရပ်တန့်သွားခဲ့သည်။

ဤသည်မှာ အဓိက အရည်အသွေး ၇၃ မှတ်အထိ ရောက်ရှိနေသော သန္ဓေပြောင်း သတ္တဝါတစ်ကောင် ဖြစ်နေပေသည်။

လီချင်းဟွာက အနိုင်မယှဉ်နိုင်ဘဲ သန္ဓေပြောင်း မိကျောင်းကြီးကလည်း ၎င်းကို မတိုက်ခိုက်နိုင်သည်မှာ အံ့သြစရာ မဟုတ်တော့ပေ။

လင်းယွမ်က ပြုံးလိုက်သည်။

"အတော်ပဲ... ထိုက်ယန်တောင်ရဲ့ ရေတပ်ကို လေ့ကျင့်ပေးဖို့ လိုနေတာ... မင်းလို တိရစ္ဆာန်မျိုး ရောက်လာတာ အတော်ပဲ"

"ဝုန်း"

နောက်ထပ် ရေအမြောက်တစ်ခုက လင်းယွမ်ထံသို့ အရှိန်အဟုန်ဖြင့် ပြေးဝင်လာပြန်သည်။

သို့သော် လင်းယွမ်က အသာအယာ ရယ်မောကာ လက်သီးတစ်ချက် ထိုးချတော့သည်။

"ဝုန်း"

ကြောက်မက်ဖွယ်ကောင်းသော ရေခဲစွမ်းအင်များက သူ၏ လက်သီးပေါ်မှနေ၍ အရှိန်အဟုန်ဖြင့် ထွက်ပေါ်လာခဲ့သည်။

မျက်တောင်တစ်ခတ်အတွင်း ဟင်းလင်းပြင်က အေးခဲသွားပြီး ရေခဲတုံး အမြောက်အမြား စုစည်းလာကာ ရေခိုးရေငွေ့များက ရေခဲနှင်းများအဖြစ် တိုက်ရိုက် ပြောင်းလဲကျဆင်းလာလေသည်။

ထိုရေအမြောက်က လေထဲတွင် အရှိန်အဟုန်ဖြင့် လာနေဆဲမှာပင် တိုက်ရိုက် အေးခဲသွားပြီး ရေခဲဘောလုံးကြီး တစ်ခုအဖြစ် ပြောင်းလဲသွားခဲ့သည်။

အတွင်းပိုင်း ဖွဲ့စည်းပုံက သိသိသာသာ ပြောင်းလဲသွားသဖြင့် ရေအမြောက်က ပေါက်ကွဲနိုင်စွမ်းကို ချက်ချင်း လက်လွတ်ဆုံးရှုံးသွားတော့သည်။

လင်းယွမ်က လေထဲမှနေ၍ အပြင်းအထန် ကန်ချလေသည်။

"ဝုန်း"

ရေခဲဘောလုံးအဖြစ် အေးခဲသွားသော ရေအမြောက်က တစ်ခဏအတွင်းမှာပင် ကန်ထုတ်ခံရသဖြင့် နောက်သို့ ပြန်လည် လွင့်စင်သွားခဲ့သည်။

သန္ဓေပြောင်း ရေခူက ထိုအခြေအနေကို မြင်သောအခါ ချက်ချင်းပင် လက်တံများကို လှုပ်ခတ်ကာ ရေဒြပ်စင်အဖြစ် ပြောင်းလဲပြီး အလျင်အမြန် ရှောင်တိမ်းထွက်ပြေးရန် ပြင်လေသည်။

လင်းယွမ်က အကြည့်တစ်ချက် ဝေ့ကြည့်လိုက်ပြီး ၎င်း ထွက်ပြေးမည့် လားရာကို ကြိုတင် အာရုံခံမိနေပြီး ဖြစ်သည်။

သူက ရေခဲသလင်း သံကြိုးကို ပြင်းထန်စွာ ရိုက်ချသည်ကို မြင်တွေ့ရလေသည်။

"ချွမ်း... ချွမ်း"

သံကြိုးကြီးက ဟင်းလင်းပြင်ကို ထိုးဖောက်သွားပြီး ရေလွှမ်းမိုးနေသော ရေလှိုင်းကြီးများထဲသို့ အရှိန်အဟုန်ဖြင့် ထိုးဆင်းသွားလေသည်။

"ဂျစ်... ဂျစ်... ဂျစ်"

ရေလှိုင်းများက တစ်ခဏအတွင်း အေးခဲသွားပြီး ရေကြီးရေလျှံမှုက ရေခဲတုံးများအဖြစ် တိုက်ရိုက် ပြောင်းလဲသွားတော့သည်။

ရေလှိုင်းများထဲတွင် ဧရာမ ရေခူ၏ ကိုယ်ဟန်က ချက်ချင်း အေးခဲ ပုံပေါ်လာပြီး ရေခဲတုံးကြီးထဲတွင် အရှင်လတ်လတ် အေးခဲသွားရလေသည်။

လင်းယွမ်၏ ကိုယ်ဟန်က တစ်ချက် လက်ခနဲ ဖြစ်သွားပြီး မီးတောက်မျဉ်းတစ်ခုအဖြစ် ပြောင်းလဲကာ ရေခဲပိတ်လှောင်ခံထားရသော ရေခူ၏ ရှေ့မှောက်သို့ မျက်တောင်တစ်ခတ်အတွင်း ရောက်ရှိလာခဲ့သည်။

သူက လက်သီးတစ်ချက် ထိုးချလိုက်သည်။

"ဒိုင်း" ဟူသော အသံနှင့်အတူ ကြီးမားသော ပေါက်ကွဲသံကြီး ထွက်ပေါ်လာပြီး ရေခဲလွှာများ ကွဲအက်သွားသည်။

လင်းယွမ်၏ လက်သီးက ရေခဲလွှာကို ထိုးဖောက်သွားပြီး သန္ဓေပြောင်း ရေခူ၏ ခန္ဓာကိုယ်ပေါ်သို့ ကျရောက်သွားလေသည်။

ချက်ချင်းပင် ဂျယ်လီတစ်ခုကဲ့သို့ အထိအတွေ့မျိုး ခံစားလိုက်ရသည်။

သန္ဓေပြောင်း ရေခူ၏ ခန္ဓာကိုယ်ကြီးမှာ ရူးသွပ်စွာ တုန်ရီသွားပြီး အေးခဲနေသည့် အခြေအနေအောက်တွင် ၎င်းက ရေဒြပ်စင်အဖြစ် ပြောင်းလဲခြင်းသို့ မဝင်ရောက်နိုင်တော့ဘဲ လင်းယွမ်၏ ကြောက်မက်ဖွယ်ကောင်းသော လက်သီးချက်ကို အရှင်လတ်လတ် ခံရတော့သည်။

ချက်ချင်းပင် ၎င်း၏ မျက်လုံးထဲတွင် ကြယ်မီးပွားများ လွင့်စင်သွားပြီး ဦးနှောက်မှာ တုန်ခါသွားကာ ပေါက်ကွဲထွက်မတတ် ဖြစ်သွားသည်။

လင်းယွမ်က ဤအခွင့်အရေးကို အသုံးချကာ ၎င်း၏ စိတ်ပင်လယ်ထဲသို့ ကပ်ပါးမျိုးစေ့ တစ်စေ့ကို တိုက်ရိုက် ထိုးသွင်းစိုက်ပျိုးတော့သည်။

ဤနေရာတွင် တိုက်ပွဲ ပြီးဆုံးသွားခဲ့ပြီ ဖြစ်သည်။

လင်းယွမ်၏ ကိုယ်ဟန်က တစ်ချက် လက်ခနဲ ဖြစ်သွားပြီး ရေခဲပန်းပုရုပ်ကြီးပမာ ဖြစ်နေသော ရေခူ၏ ခေါင်းပေါ်သို့ လေထဲမှနေ၍ ရပ်လေသည်။

၎င်း၏ ခန္ဓာကိုယ်ထဲသို့ ကပ်ပါးမျိုးစေ့ ထည့်သွင်းထားမှုကို ခံစားနေရပြီး အသက်ရှင်ခြင်းနှင့် သေဆုံးခြင်းကို မိမိကိုယ်တိုင် ထိန်းချုပ်ထားနိုင်ပြီ ဖြစ်သဖြင့် လင်းယွမ်က အသာအယာ ရယ်မောလေသည်။

ထိုအချိန်တွင် လီချင်းဟွာကလည်း အပြေးရောက်လာပြီး ဤမြင်ကွင်းကို မြင်သောအခါ မျက်နှာတွင် အံ့သြချီးကျူးမှုများ အပြည့်ဖြင့် မနေနိုင်ဘဲ ဖြစ်သွားခဲ့သည်။

"တကယ် မိုက်တယ်ဗျာ..." သူက မည်သို့ ဖော်ပြရမည်ကို တကယ် မသိတော့သဖြင့် ဤစကားလုံး အနည်းငယ်ကိုသာ မနေနိုင်ဘဲ ပြောထွက်သွားတော့သည်။

လင်းယွမ်က ပြုံးကာ ပြောလေသည်။ "ဒီမျိုးရိုးဗီဇမျိုးစေ့အဆင့် သန္ဓေပြောင်း သတ္တဝါနှစ်ကောင်ကို ငါ ထိန်းချုပ်ပြီးပြီ... နောက်ကြရင် ထိုက်ယန်တောင်ကို ခေါ်သွားပြီး သေချာလေး လေ့ကျင့်ပေးရမယ်"

လီချင်းဟွာက ခေါင်းညိတ်လေသည်။ "ဆရာလင်း ကိုယ်တိုင်ဝင်ပါတော့ ကျွန်တော် အများကြီး စိတ်အေးရတာပေါ့"

သူက မီးပင်လယ်ဘက်သို့ လှည့်ကြည့်ကာ ပြောလေသည်။ "ဒီလောက် အချိန်ကြာနေတာတောင် တခြား မျိုးရိုးဗီဇမျိုးစေ့အဆင့် သန္ဓေပြောင်း သတ္တဝါတွေ ရောက်မလာသေးဘူးဆိုတော့ ဒီနားတစ်ဝိုက်မှာ မရှိတော့ဘူး ထင်တယ်"

လင်းယွမ်က ခေါင်းတစ်ချက် ညိတ်ပြလေသည်။ "တခြားနေရာတွေကို ဆက်သွားကြည့်ကြတာပေါ့"

လီချင်းဟွာကလည်း ချက်ချင်းပင် ခေါင်းညိတ်ကာ သူတို့သုံးယောက်က ဤနယ်မြေမှ ချက်ချင်း ထွက်ခွာသွားပြီး အခြားသော မျိုးရိုးဗီဇမျိုးစေ့အဆင့် သန္ဓေပြောင်း သတ္တဝါများကို ဆက်လက် ရှာဖွေကြတော့သည်။

ဆက်ရန်...

***

Book List